A Zeova yaa tõnd “pãng zi̇̃ig toog wakate”
A Zeova yaa tõnd “pãng zi̇̃ig toog wakate”
“Nin-tɩrs fãagr yita [a Zeova] nengẽ. [A] yaa bãmb pãng zĩig toog wakate.”—YƖƖL SÕAMYÃ 37:39.
1, 2. a) A Zezi pʋʋsame n kos bõe a karen-biisã yĩnga? b) Bõe la Wẽnnaam dat t’a nin-buiidã maane?
A ZEOVA tõeyã bũmb fãa. A tõe n kogla a balemdb hakɩkã wa a sẽn dat to-to. A ra tõẽ lame meng n welg a nin-buiidã ne dũniyã neb a taabã n ning-b zĩig sẽn tar laafɩ la bãan pʋgẽ. La a Zezi pʋʋsa a saasẽ Ba wã a karen-biisã yĩng woto: “Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soaba ra tõog-b ye.”—Zã 17:15.
2 A Zeova pa rat n yiis tõnd “dũniyã pʋgẽ ye.” La a ratame tɩ d vɩɩmd dũniyã neb sʋk sẽn na yɩl n moon neb a taabã a koɛɛgã sẽn kõt saagr la belsgã. (Rom dãmba 10:13-15) La wala a Zezi sẽn wilg a pʋʋsgã pʋgẽ wã, d sẽn vɩ dũni kãngã pʋgẽ wã yĩnga, “wẽng soaba” tõe n zabda ne-do. Ãdem-biis nins sẽn yaa wẽn-kɩɩsdbã n paas malɛg-wẽnsã wata ne toog la yɩɩr wʋsgo, la kiris-nebã pa põsd rẽ ye.—1 Pɩɛɛr 5:9.
3. A Zeova balemdbã meng segd n maoa ne yel-bʋse, la bels-bʋg la d paamd Wẽnnaam Gomdã pʋgẽ?
3 Mak-kãens pʋsẽ, d sã n komsd raood wakat-wakate pa lingr ye. (Yelbũna 24:10) Biiblã tara kɩbay wʋsg sẽn gomd wẽn-sakdb sẽn seg tood yelle. Yɩɩl gʋlsdã yeelame: “Nin-tɩrg paamda tood wʋsgo, la Zusoaba yiisda yẽnda bãmb fãa pʋgẽ.” (Yɩɩl Sõamyã 34:20) N-ye, baa ‘nin-tɩrsã’ pa põsd yel-tood ye. Wala yɩɩl gʋlsd a Davɩɩde, wakat-wakate, d ‘pãngã tõe n sɛɛme tɩ d gĩin kao hal wʋsgo.’ (Yɩɩl Sõamyã 38:9) La a Zeova sẽn ‘pẽnegd neb nins sũy sẽn sãamã, la a fãagd sũ-pa-noom dãmbã’ kõta belsgo.—Yɩɩl Sõamyã 34:19; 94:19.
4, 5. a) Wala sẽn zems ne Yelbũna 18:10, bõe la d segd n maan sẽn na yɩl tɩ Wẽnnaam kogl-do? b) Yel-bʋs takɩ la d tõe n maan n paam Wẽnnaam sõngre?
4 Wala sẽn zems ne a Zezi pʋʋsgã, a Zeova sɩd gũuda tõndo. A yaa tõnd “pãng zĩig toog wakate.” (Yɩɩl Sõamyã 37:39) Yelbũnã sebr tara goam sẽn wõnd woto, a sẽn yeel tɩ: “[A Zeova] yʋʋr yaa wa gasg sẽn tar pãnga. Nin-tɩrg tõe n kẽe be tɩ bũmb da paam-a ye.” (Yelbũna 18:10) Verse kãngã wilgda sɩd sẽn yaa kãsenga, a Zeova sẽn get a bõn-naandsã yell ne nonglmã wɛɛngẽ. Sẽn yɩɩd fãa, Wẽnnaam kogenda nin-tɩrs nins sẽn baood-a ne b sũy fãa wã, wala tõnd sẽn zoet n debd n na n tɩ soond gasg sẽn tar pãng pʋgẽ wã.
5 D sã n wa segd yɛl sẽn kõt-d yɩɩre, wãn to la d tõe n zoe n tɩ bao koglg a Zeova nengẽ? Bɩ d ges yɛl a tãab sẽn tar yõod wʋsg d sẽn tõe n maan sẽn na yɩl n paam a Zeova sõngre. Pipi, d segd n pʋʋsa d saasẽ Ba wã. Yiib-n-soaba, d segd n saka a vʋʋsem sõngã sor-wilgri. La tãab-n-soaba, d segdame n sak a Zeova seglsã n maan tũud-n-taar ne kiris-neb nins sẽn tõe n yols tõnd d toogã pʋgẽ wã.
Pʋʋsgã pãnga
6. Wãn to la kiris-neb hakɩkã get pʋʋsgã?
6 Logtoɛɛmb kẽer yetame tɩ pʋʋsgã tɩbsda yam-ka-m-meng la sũ-sãamse. Yaa sɩd tɩ f sã n yãk sasa sẽn yaa sɩɩ n bʋgs sõma wa pʋʋsgo, tõe n yols-f-la ne sũ-sãamse, la mizik kelgr bɩ yĩng nomb me tõe n yols-f-la woto. La kiris-neb hakɩkã pa get pʋʋsgã wala sũ-sãams tɩɩm bal ye. Ne tõndo, pʋʋsgã yaa sõsg sẽn tar waoogr ne d Naandã. Pʋʋsgã tɩ loee ne tõnd wẽn-sakrã la bas-m-yam ning tõnd sẽn tar ne Wẽnnaamã. N-ye, pʋʋsgã yaa tõnd balengã neng a yembre.
7. Pʋʋs ne bas-yard dat n yeelame tɩ bõe, la wãn to la rẽ sõngd tõnd tɩ d mao ne yɩɩrã?
7 Tõnd pʋʋsgã sasa d segd n talla bas-yard ne a Zeova. Tʋm-tʋmd a Zã gʋlsame: “Tõnd tara tẽeb kãng ne bãmba, tɩ tõnd sã n kos bũmb sẽn zems bãmb daabo, b kelgda tõndo.” (1 Zã 5:14) A Zeova sẽn yaa sẽn ka to Soabã, n yaa sɩd Wẽnnaam yɛng sẽn tõe fãa wã, a sɩd kelgda a balemdbã sẽn pʋʋsd-a ne b sũy fãa wã neere. D sẽn mi tɩ d Wẽnnaamã sẽn tar nonglmã kelgda tõndo, d sã n wa togsd-a d yɩɩrã la d zu-loeesã yaa bũmb sẽn kõt belsgo.—Filip rãmba 4:6.
8. Bõe yĩng tɩ kiris-neb nins sẽn yaa kɩs-sɩd dãmbã pa segd n zoe yãnd abada bɩ n tags tɩ b pa zemse, b sã n wa pʋʋsd a Zeova?
8 Kiris-neb nins sẽn yaa sakdbã pa segd n zoe yãnd abada, n tags tɩ b pa zemse, bɩ n pa tar bas-m-yam, b sã n wa pʋʋsd a Zeova ye. Yaa sɩda, d sũy sã n sãam ne d mense, bɩ zu-loeesã sã n dat n lim-du, tõe n kɩtame tɩ d pa rat n pẽneg a Zeova n pʋʋs-a wakat fãa ye. Sã n yaa woto, bɩ d tẽeg t’a Zeova ‘zoeta a neb nins sẽn namsda nimbãanega,’ la t’a ‘belsda sũ-sãoong rãmbã.’ (Ezai 49:13; 2 Korẽnt dãmba 7:6) Sẽn yɩɩd fãa, yaa yɩɩr la toog wakat la d segd n teeg d saasẽ Ba wã t’a yɩ d pãng zĩiga.
9. Tẽebã yõod yaa bõe, d sã n wa pʋʋsd Wẽnnaam?
9 D sã n dat n dɩ pʋʋsgã sẽn yaa zu-noog bũmbã nafa, d segd n talla tẽeb hakɩka. Biiblã yeelame tɩ “ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.” (Hebre dãmba 11:6) Tẽeb pa f sẽn na n tẽed tɩ Wẽnnaam beeme bal ye. Tẽeb hakɩkã baoodame tɩ d sɩd tẽ tɩ Wẽnnaam tõeeme la a ratame n keo tõndo, d sẽn sakd-a wakat fãa wã yĩnga. “Zusoaba geta nin-tɩrse, la b wʋmda bãmb pʋʋsgo.” (1 Pɩɛɛr 3:12) D sẽn mi wakat fãa t’a Zeova geta tõnd yell ne nonglmã kɩtdame tɩ d pʋʋsgã tar võor wʋsgo.
10. Tõnd segd n pʋʋsa wãn to, d sã n dat t’a Zeova kogl-d tẽebã wɛɛngẽ?
10 Tõnd sã n pʋʋsd a Zeova ne d sũur fãa, a kelgda tõndo. Yɩɩl gʋlsdã gʋlsame: “Zusoaba, mam boonda yãmb ne m sũur fãa, bɩ y leok maam.” (Yɩɩl Sõamyã 119:145) Tõnd pʋʋsgã pa pʋʋsg sẽn togsd ne zug bal wa b sẽn maand tũudum wʋsg pʋsẽ wã, sẽn yaa goam sẽn pa yit sũurẽ wã ye. Tõnd sã n pʋʋsd a Zeova ne d “sũur fãa,” tõnd goamã tara võor la bõn-datla. D sã n pʋʋs woto ne d sũur fãa poore, d sɩngdame n paam yolsgo, d sẽn ‘bas d yellã ne a Zeova’ wã yĩnga. Wala Biiblã sẽn kãabdã, ‘yẽ na n kogla’ tõndo.—Yɩɩl Sõamyã 55:23; 1 Pɩɛɛr 5:6, 7.
Wẽnnaam vʋʋsem sõngã yaa tõnd sõngda
11. Ne manesem a yembr bʋg la a Zeova leokd tõndo, d sã n ket n kot a sõngre?
11 A Zeova pa kelgd tõnd pʋʋsgã bal ye, a leokdame me. (Yɩɩl Sõamyã 65:3) A Davɩɩd gʋlsame: “Mam boonda yãmb m tooga raare, yãmb sẽn leokd maama yĩnga.” (Yɩɩl Sõamyã 86:7) Woto yĩnga, a Zezi yeela a karen-biisã tɩ b ket n kot a Zeova sõngre, bala d ‘saasẽ Ba wã’ na n ‘kõo neb nins sẽn kot yẽ wã vʋʋsem sõngo.’ (Luk 11:9-13) N-ye, Wẽnnaam vʋʋsem sõngã sõngda a nin-buiidã la a belsd-ba.—Zã 14:16.
12. Wãn to la Wẽnnaam vʋʋsem sõngã tõe n sõng tõndo, zu-loeesã sã n wa wõnd b yɩɩda d pãnga?
12 Baa tõnd sã n wa segd makr toɛy-toɛya, Wẽnnaam vʋʋsem sõngã tõe n kõo tõnd “pãng ning sẽn yɩɩd ninsaal dẽndã.” (2 Korẽnt dãmba 4:7, NW ) Tʋm-tʋmd a Poll sẽn da segd tood wʋsgã yeela woto ne bas-yardo: “Mam tõee fãa ne ned ning sẽn kõta maam pãnga.” (Filip rãmba 4:13, Sebr Sõngo) Woto, rũndã-rũndã me, kiris-neb wʋsg wa n paama raood la pãng tẽebã wɛɛngẽ, b sẽn pʋʋs n bõos Wẽnnaam t’a leok-bã yĩnga. Naoor wʋsgo, d sã n paam Wẽnnaam vʋʋsem sõngã sõngre, d pa na n ges tɩ yɛl nins sẽn wat ne yɩɩrã yɩɩda d pãng ye. Pãn-kãng Wẽnnaam sẽn kõtã yĩnga, d tõe n yeela wala tʋm-tʋmdã: “Yɛl gũbgda tõndo, la b ka sẽbgd tõnd ye, toog wʋmda tõndo, la tõnd yam ka yood ye, neb namsda tõndo, la Wẽnnaam ka bas tõnd ye, neb pãbda tõnd n lubdẽ, la b ka sãam tõnd ye.”—2 Korẽnt dãmba 4:8, 9.
13, 14. a) Wãn to la a Zeova wilg t’a yaa tõnd pãng zĩig a Gomdã pʋgẽ? b) Wãn to la Biiblã noy tũub sõng yãmb mengã?
13 Vʋʋsem sõngã leb n vẽnega neb tɩ b gʋls Wẽnnaam Gomdã n bĩng tõnd nafr yĩnga. A Gomdã pʋgẽ, wãn to la a Zeova wilg t’a yaa tõnd pãng zĩig yel-beed wakate. Manesem a yembr ya a sẽn kõt tõnd yam la a kɩt tɩ d tõe n tags neerã. (Yelbũna 3:21-24) Biiblã sõngda tõnd tɩ d tʋm ne d zugã bãngr la d tagsgã tɩ yɩ sõma n paase. (Rom dãmba 12:1, NW ) Wẽnnaam Gomdã kareng la a zãmsg wakat fãa, n paas a tũub maasem yĩnga, d na n wa tõog n bãngda ‘sõma ne wẽng n bakdẽ.’ (Hebre dãmba 5:14) Tõe tɩ yãmb mengã yãa Biiblã noy sẽn sõng-y to-to tɩ y rɩk sard sẽn yaa sõma zu-loeesã taoore. Biiblã kõta tõnd yam sẽn tõe n sõng-d tɩ d paam yɛl nins sẽn wat ne yɩɩrã tɩɩm.—Yelbũna 1:4.
14 Wẽnnaam Gomdã tara bũmb a to sẽn kengd tõnd tẽebã: yaa fãagrã saagre. (Rom dãmba 15:4) Biiblã yeta tõnd tɩ bõn-wẽnsã pa na n ket n be wakat fãa ye. Toog buud fãa sẽn paamd tõnd yaa wakat bilf yĩnga. (2 Korẽnt dãmba 4:16-18) Tõnd “tara tẽeb ne vɩɩm sẽn ka sɛta yelle, Wẽnnaam sẽn ka tõe n yag ziri sẽn kãab hal dũniyã sẽn nan ka naanã.” (Tɩt 1:2) Tõnd sã n kɩdemd saag-kãng yĩnga, n miẽ tɩ d tara beoog-daar sẽn na n tall yamleoog ning a Zeova sẽn kãabã wakat fãa, d tõe n maana sũ-mar toog pʋgẽ.—Rom dãmba 12:12; 1 Tesalonik rãmba 1:3.
Tigingã yaa kaset tɩ Wẽnnaam nonga tõndo
15. Wãn to la kiris-nebã tõe n yɩ bark n kõ b taaba?
15 Bũmb a to sẽn yit a Zeova nengẽ tɩ tõe n naf tõnd toog wakat yaa tũud-n-taar ning d sẽn tar kiris-neb tigingã pʋgẽ wã. Biiblã yetame: “Tũud-n-taag hakɩk nonga wakat fãa, la a yaa saam-biig sẽn dog toog wakat yĩnga.” (Yelbũna 17:17, NW ) Wẽnnaam Gomdã sagenda nebã fãa sẽn be tigingã pʋgẽ wã tɩ b waoog taab la b nong taaba. (Rom dãmba 12:10) Tʋm-tʋmd a Poll gʋlsa woto: “Bɩ ned kam fãa ra bao a meng sõngr bal ye, la bɩ ned kam fãa bao a taab sõngr me.” (1 Korẽnt dãmba 10:24) D sã n tagsd woto, tõe n sõng-d lame tɩ d ges neb a taabã ratem yell n yɩɩd tõnd mensã toodo. Tõnd sã n sõngd neb a taabã, pa bãmb bal la d sõngd ye, d paamda sũ-noog sẽn kɩtd tɩ d tõe n tʋk d zɩɩbã nana n yɩɩda.—Tʋʋma 20:35.
16. Wãn to la kiris-ned fãa tõe n keng a taabã raoodo?
16 Rap la pagb nins sẽn bɩ tẽebã wɛɛngẽ wã tõe n talla tʋʋm-kãseng neb a taabã tẽeb kengr pʋgẽ. Sẽn na yɩl n maan woto, b maandame tɩ b tõe n pẽneg-b n gom ne wakat fãa. (2 Korẽnt dãmba 6:11-13) Tigingã sɩd paamda barka, nebã fãa sã n pẽgd kom-bɩɩsã, n kengd sẽn wa-b tẽebã pʋgẽ paalmã tẽebo, la b kengd neb nins yam-ka-m-meng sẽn tarã raoodo. (Rom dãmba 15:7) Saam-biir nonglmã me na n sõnga tõnd tɩ d ra rɩk yam wẽns n dogl taab ye. D pa segd n yɩ yãg-yãg n yeel tɩ ned sã n tar zu-loeese, wilgdame t’a tẽebã komsame ye. Wa sẽn zemse, a Poll sagla kiris-nebã tɩ b “bels sũ-sãoong rãmbã.” (1 Tesalonik rãmba 5:14) Biiblã wilgdame tɩ baa kiris-neb nins sẽn yaa wẽn-sakdbã tõe n wa paama toogo.—Tʋʋma 14:15.
17. Segb bʋs la d tar n na n paas d nonglmã ne d tẽed-n-taasã?
17 Kiris-neb tigissã kõta segb sẽn yaa sõma wʋsg tɩ d na n bels taab la d keng taab raoodo. (Hebre dãmba 10:24, 25) Tõnd sẽn tar nonglem ne taab woto wã pa tek tigingã tigissẽ ye. La tõnd sẽn yaa Wẽnnaam nin-buiidã leb n baooda segb n na n naag taab wakat-wakate. Yel-tood sã n wa wa, d na n sõnga taab sõma, zood sẽn tar pãng sẽn zoe n be tõnd ne taab sʋkã yĩnga. Tʋm-tʋmd a Poll gʋlsame: “Tɩ welgr kõn zĩnd yãmb yĩnga pʋgẽ ye, la tɩ wila fãa na ges taab yell tɩ zemse. La will a yembr sã n namsdẽ, wila fãa namsda ne yẽnda. La will a yembr sã n paam waoogre, wila fãa maanda sũ-noog ne-a.”—1 Korẽnt dãmba 12:25, 26.
18. Manesem bʋg la d segd n lak d mens ne, d sã n wa koms raoodo?
18 Wakat-wakate, d tõe n komsa raood wʋsg n pa rat n maan tũud-n-taar ne d tẽed-n-taasã ye. D segd n kɩɩsa manesem kãngã n da wa mong d mens ne belsg la sõngr ning d tẽed-n-taasã sẽn tõe n kõt-da ye. Biiblã keoogda tõnd woto: “Sẽn ka rat n naag-a neb baooda sẽn noom a menga. Yẽ kɩɩsda yam sõama fãa.” (Yelbũna 18:1) Tõnd sẽn tar saam-biisã wilgdame tɩ Wẽnnaam geta d yell ne nonglem. Tõnd sã n bãng tɩ rẽ yaa seglg b sẽn dɩk ne nonglem, d na n paama yolsg toog wakate.
D kell n tall yam-sõngo
19, 20. Wãn to la Gʋlsg Sõamyã sõngd tõnd tɩ d ra tall tags-wẽnse?
19 Raood komsg la sũ-sãams sã n wa tar-do, yaa nana tɩ d tall tags-wẽnse. Wala makre, kẽer sẽn wa n segd makr sɩngame n tagsdẽ tɩ b pa tar tẽebo, n wa baas n tags tɩ b toogã wilgdame tɩ b pa tat Wẽnnaam yam ye. La tẽeg-y t’a Zeova pa makd ned ne “wẽng ye.” (Zak 1:13) Biiblã yetame: “[Wẽnnaam] ka namsd ninsaalbã n kõt-b sũ-sãoong ne pʋ-toog ye.” (Wiisgu 3:33) Sẽn yaa lebend ne rẽ, a Zeova sõgen dãmbã sã n namsdẽ, a sũur sãamda wʋsgo.—Ezai 63:8, 9; Zakari 2:12.
20 A Zeova yaa “Ba sẽn yaa nimbãan-zoeer Ba la belsg fãa Wẽnnaam.” (2 Korẽnt dãmba 1:3) A geta tõnd yelle, la a na n zẽka tõndo, wakat sã n ta. (1 Pɩɛɛr 5:6, 7) Tõnd sã n mi wakat fãa tɩ Wẽnnaam nonga tõndo, na n sõng-d lame tɩ d kell n tall yam-sõngo, hali n maan sũ-noog menga. A Zak gʋlsame: “M ba-biisi, makr toɛy-toɛy sã n paam yãmba, bɩ y geelg bãmb wa sũ-noog bala.” (Zak 1:2) Bõe yĩnga? A leokdame: “Tɩ bõe, a sã n paam makr n tõoge, a na n deega vɩɩm maanf Zusoaba sẽn kãab neb nins sẽn nong bãmba.”—Zak 1:12.
21. Baa ne zu-loees nins fãa tõnd sẽn segdã, bõe la Wẽnnaam kãab neb nins sẽn na n tall kɩs-sɩd ne-a wã?
21 Wala a Zezi sẽn keoog tõndã, dũniyã pʋgẽ d na n paama toogo. (Zã 16:33) La Biiblã kãabdame tɩ ‘toogo, sũ-sãoong walla namsgo, walla kom walla naongo, walla yel-pakr’ pa tõe n welg tõnd ne a Zeova la a Biriblã nonglem ye. (Rom dãmba 8:35, 39) Ad sɩd kõta belsg d sẽn mi tɩ toog buud fãa d sẽn segdã yaa wakat bilf yĩngã! Nananda, d sẽn gũud tɩ ninsaalbã namsg sa wã, tõnd nonglem Ba a Zeova geta tõnd yelle. D sã n bao a koglgo, a na n yɩɩ “tãn-luglug neb nins sẽn namsda yĩnga. [A] yaa tãn-luglug namsg wakate.”—Yɩɩl Sõamyã 9:10.
Bõe la d zãms-yã?
• Bõe n pa segd n ling kiris-nebã, b sẽn ket n vɩ dũni-wẽn-kãngã pʋgẽ wã?
• Tõnd sã n wa segd makr toɛy-toɛya, wãn to la d sẽn pʋʋsd ne d sũur fãa wã kengd d tẽebã?
• Wãn to la Wẽnnaam vʋʋsem sõngã yaa sõngda?
• Bõe la d tõe n maan n sõng taaba?
[Zãmsgã sogsgã]
[Foto, seb-neng 15]
D segd n baoa a Zeova wala d sẽn zoet n na n tɩ soond gasg sẽn tar pãng pʋgẽ
[Foto rãmba, seb-neng 16]
Sẽn bɩ-b tẽebã wɛɛngẽ wã tũnugda ne segb b sẽn paam fãa n pẽgd b taabã la b kengd b raoodo