B kisg-b-la zaalem yĩnga

“Bãmb kisga maam zaalem bala.”—ZÃ 15:25.

1, 2. a) Bõe yĩng tɩ b sã n gomd kiris-nebã wẽnga, yaa lingr ne neb kẽere, la bõe yĩng tɩ pa segd n ling tõndo? b) Kisgrã võ-bʋg la d na n vaees sõs-kãngã pʋgẽ? (Ges-y tẽngr notã.)

A ZEOVA KASET RÃMBÃ modgdame n na n tũ Wẽnnaam Gomdã noyã. Rẽ kɩtame tɩ b tar yʋ-noog tẽns wʋsg pʋsẽ. La wakat-wakate, neba rõt-b lame. Wala makre, Saint Petersburg sẽn be Risi tẽngã guvɛrnema ned a yembr yeela woto: “B bilga tõnd a Zeova Kaset rãmbã wa tũudum wil-bil neb sẽn solgd n maand b yɛlã, n kʋʋd kamb la b mense.” La nin-kãseng kãng sẽn tʋm ne a Zeova Kaset rãmbã b tigis-kãsengẽ sẽn tigim tẽns wʋsg nebã yeelame: “Masã, mam yãame tɩ b yaa neb wa b taabã la sẽn nong laado. . . . B yaa neb sẽn pa baood goama, la b nong taab wʋsgo.” A paasame: “Mam sɩd pa wʋmd bũmb ning sẽn kɩt tɩ nebã yagd ziri woto b zugã ye.”—1 Pɩɛɛr 3:16.

² B sã n dõt Wẽnnaam sõgen dãmbã n yetẽ tɩ b yaa wẽng maandba, pa noom-b ye, la nebã sẽn gomd-b wẽngã pa ling-b ye. A Zezi reng n keooga a karen-biisã woto: “Dũniyã sã n kisg yãmba, bɩ y bãng t’a reng n kisga maam. . . . La a yɩɩ woto tɩ goam nins sẽn gʋls bãmb tõog pʋgẽ wã pidsi: Bãmb kisga maam zaalem bala.” * (Zã 15:18-20, 25; Yɩɩl Sõamyã 35:19; 69:5) A ra reng n togsa a karen-biisã woto: “B sã n da bool yir soab tɩ Beelzebul, b kõn bool a yira rãmb woto n yɩɩd bɩ?” (Matɩe 10:25) Kiris-nebã miime tɩ b sẽn dõt-b woto wã naaga namsg ra-lukã b sẽn sakdã sʋka, b sẽn lebg Kirist karen-biisã yĩnga.—Matɩe 16:24.

3. Hal sẽn ta zĩ-bʋg la b nams Wẽnnaam balemdb hakɩkã?

³ Yaa hal sẽn sɩng ne “nin-tɩrg a Abɛll” wakatã la b namsd Wẽnnaam balemdb hakɩkã b tẽebã yĩnga. (Matɩe 23:34, 35) B namsgã pa tek yɛl a wãn ye. A Zezi yeelame tɩ ‘neba fãa na n kisga’ a karen-biisã, yẽ yʋʋrã yĩnga. (Matɩe 10:22) Sẽn paase, tʋm-tʋmd a Poll gʋlsame tɩ Wẽnnaam sõgen dãmbã, rat n yeel tɩ tõnd ned kam fãa, segd n gũume tɩ b nams-a a tẽebã yĩnga. (2 Tɩmote 3:12) Bõe yĩng tɩ yaa woto?

Kisgr zaalem yĩngã sẽn yitẽ

4. Wãn to la Biiblã wilgd kisgr zaalem yĩngã fãa sẽn yitẽ?

⁴ Wẽnnaam Gomdã wilgdame tɩ hal sɩngr wẽndẽ wã, ned n solg n tusd nebã tɩ b kisgd Wẽnnaam balemdb hakɩkã. D rɩk makr ne pipi tẽeb ned a Abɛll b sẽn kʋ ne pʋtoogã. Biiblã yetame t’a kẽem a Kayẽ sẽn kʋ-a wã “ra yaa wẽng soab” a Sʋɩtãanã rẽnda. (1 Zã 3:12) A Kayẽ ra tagsda wa a Sʋɩtãana, tɩ Sʋɩtãanã tũnug ne-a n pids a raab wẽnsã. Biiblã leb n sõngda tõnd tɩ d bãng a Sʋɩtãan sẽn tall tʋʋmd ninga, tood nins sẽn paam a Zoob la a Zezi Kiristã pʋgẽ. (Zoob 1:12; 2:6, 7; Zã 8:37, 44; 13:27) Wilgr sebrã wilgda a Zezi karen-biisã namsg sẽn yitẽ vẽenega. A yeta woto: ‘Sʋɩtãana na n kẽesa yãmb kẽer bi-bees roogẽ tɩ yãmb paam makre.’ (Wilgri 2:10) N-ye, ya a Sʋɩtãan n wat ne kisgr ning fãa sẽn paamd Wẽnnaam nin-buiidã b bʋʋm zugã.

5. Bõe yĩng t’a Sʋɩtãan kis Wẽnnaam balemdb hakɩkã?

⁵ Bõe yĩng t’a Sʋɩtãan kis Wẽnnaam balemdb hakɩkã? A Sʋɩtãan sẽn maan zãmb sẽn wilgd t’a tara wuk-m-meng sẽn loog noorã, a kɩɩsa “Rĩm sẽn so zamaan fãa” sẽn yaa Wẽnnaam a Zeova wã. (1 Tɩmote 1:17; 3:6) A yetame tɩ Wẽnnaam sẽn dɩt naamã to-to a bõn-naandsã zutã yaa ne weoogr wʋsgo, tɩ ned ba a yembr pa maand a Zeova raabã ne yam-sõngo, la tɩ nebã sakd-a-la b mens nafr yĩng bala. A Sʋɩtãan yetame tɩ b sã n kõ-a sor t’a na n mak ninsaalbã, a tõe n kɩtame tɩ b fãa bas Wẽnnaam balengo. (Sɩngre 3:1-6; Zoob 1:6-12; 2:1-7) A Sʋɩtãan sẽn sãam a Zeova yʋʋrã n yeel t’a yaa wɛoogda, ziri yagda, la t’a pa tõog n maan yɛlã sõma wã, a baoodame n na n wags ne Wẽnnaam ãndũniyã naam dɩɩb pʋgẽ. Rẽnd a sũurã sẽn yik ne Wẽnnaam sõgen dãmbã ya a sẽn dat tɩ b balem yẽ wã yĩnga.—Matɩe 4:8, 9.

6. a) Wãn to la gomd ning sẽn tɩ loe ne a Zeova naam sẽn ka to wã pak tõnd mengã? b) Wãn to la gom-kãngã võor wʋmb sõngd tõnd tɩ d tall d burkĩndã? (Ges-y zĩ-gũbrã, seb-neng 12.)

⁶ Yãmb nee gom-kãngã sẽn pak yãmb vɩɩmã to-to bɩ? Y sẽn ya a Zeova sõgnã, y yãame tɩ baa Wẽnnaam daabã maaneg sã n baood modgr wʋsgo, rẽ maanegã nafa n yɩɩde. La sã n mik tɩ yãmb vɩɩmã yɛl kɩtame tɩ pa nana bɩ yaa toog meng ne yãmb tɩ y ket n sakd a Zeova noyã? La sã n wõnd a Zeova raabã maaneg pa nafd yãmba? Y na n tagsame t’a Zeova baleng pa tar yõod bɩ? Bɩ y sẽn nong a Zeova wã yĩnga, la y sẽn nand a zʋg-sõma wã na n kɩtame tɩ y ket n maand a raabã fãa? (Tõodo 10:12, 13) A Zeova sẽn basd a Sʋɩtãan t’a wat ne toog tõnd ned kam fãa zugã, a kõo tõnd ned kam fãa sor tɩ d leok a Sʋɩtãan no-baoodmã.—Yelbũna 27:11.

‘Nebã sã n gomd yãmb wẽnga’

7. Manesem a yembr a Sʋɩtãan sẽn tũnugd ne n dat n kɩt tɩ tõnd bas a Zeova la bʋgo?

⁷ Masã, bɩ d maag d yĩng n ges sɩlem tʋʋm nins a Sʋɩtãan sẽn tũnugd ne n dat n kɩɩs a Zeova ne a sõgen dãmbã a yembre: a tũnugda ne kãnegre. A Zezi boola a Sʋɩtãan tɩ “ziri ba.” (Zã 8:44) A Sʋɩtãan yaa munaafɩɩk sẽn kãnegd Wẽnnaam, n yagd ziri a gomdã sẽn be nafa wã zugu, la a sãamd a yʋ-sõngã n yɩɩd neb a taabã fãa. A Sʋɩtãan tũnugda ne goam sẽn kɩtd tɩ b tags wẽnga, rõdga, la ziri vẽeneg-vẽeneg n kɩɩsd a Zeova naam sẽn ka to wã, la a tũnugd ne manesem kãens me n kãnegd Wẽnnaam sõgen dãmb nins sẽn yaa burkĩmbã. A sẽn sãamd Kaset rãmb kãens yʋyã wʋsgã yĩnga, a tõe n kɩtame tɩ makr zẽne, tɩ yaa toog ne-b n yɩɩd tɩ b yals kãn-kãe a taoore.

8. Wãn to la a Sʋɩtãan sãam a Zoob yʋʋrã, la rẽ waa ne bõe?

⁸ Ges-y bũmb nins sẽn paam a Zoobã. A Zoob yʋʋrã võor yaa: “B sẽn kisg a soabã.” A Sʋɩtãan sẽn kɩt t’a Zoob paoongã sãam t’a kambã ki, la a lob-a bãagã toor sẽn ka be, nebã nifẽ, a kɩtame t’a Zoob yɩ wa yel-wẽn-maand Wẽnnaam sẽn sɩbgde. B sẽn da waoogd a Zoob wʋsgã, a roagdbã la a zo-rãmbã ra wa n paoogd-a lame. (Zoob 19:13-19; 29:1, 2, 7-11) Sẽn paase, ne ziri bɛlsdbã maasem, a Sʋɩtãan baoome n na n  ‘sãam a sũurã n nams-a ne goama,’ n kɩt tɩ b sɩng n yetẽ t’a ra segd n maana yel-wẽn-kãsenga, n wa baas n ning-a taal vẽeneg-vẽeneg n yeel t’a yaa wẽng maanda. (Zoob 4:6-9; 19:2; 22:5-10) Ad woto sɩd ra segd n komsa a Zoob raood wʋsgo!

9. Wãn to la b kɩt tɩ neba tags t’a Zezi yaa yel-wẽn-maanda?

⁹ Wẽnnaam Biribl a Zezi sẽn ya a Zeova naam sẽn ka to wã tɛɛnd-kãsengã yĩnga, a Sʋɩtãan kisg-a lame n yɩɩg nebã fãa. A Zezi sẽn wa tẽng zugã, a Sʋɩtãan baoome n na n sãam a yʋʋrã, la wa a sẽn da maan to-to ne a Zoobã, a kɩtame tɩ nebã tags t’a Zezi yaa yel-wẽn-maanda. (Ezai 53:2-4; Zã 9:24) Nebã bool-a lame tɩ rã-tɩgd la yão-be-neda, la b ra yetẽ tɩ ‘zĩn n tar-a.’ (Matɩe 11:18, 19; Zã 7:20; 8:48; 10:20) B rõd-a lame t’a tʋʋsa Wẽnnaam. (Matɩe 9:2, 3; 26:63-66; Zã 10:33-36) Rẽ sãama a Zezi sũuri, bala a ra miime tɩ woto ra na n kɩtame tɩ b tʋʋs a Ba wã zaalem. (Luk 22:41-44) Sẽn na n baase, b kaa a Zezi ra-luk zug wa bi-bɛɛg b sẽn kãab wẽngã. (Matɩe 27:38-44) A Zezi sẽn tall a burkĩndã tɩ zems zãngã, a reega namsg wʋsgo, ‘yel-wẽna rãmb sẽn kɩɩs yẽ wã’ yĩnga.—Hebre dãmba 12:2, 3.

10. Wãn to la a Sʋɩtãan zabd ne kiris-neb nins sẽn paam vʋʋsem sõng zaeebã tõnd wakatã?

¹⁰ Tõnd wakatã, Sʋɩtãanã kisga Kirist karen-biis nins sẽn paam vʋʋsem sõngã zaeeb n ket tẽng zugã. B wilgame t’a Sʋɩtãan yaa ‘Kirist ba-biisa rõta sẽn dõt bãmb tõnd Wẽnnaam taoor wĩntoog ne yʋngã.’ (Wilgri 12:9, 10) B sẽn dig-a n yiis saasẽ t’a be tẽngã zugã tɛka, a Sʋɩtãan maooda wʋsg n na n kɩt tɩ b ges Kirist ba-biisã wa neb b sẽn segd n bak n kisgi. (1 Korẽnt dãmba 4:13) Tẽns kẽer pʋsẽ, b kãneg-b lame n yetẽ tɩ b yaa tũudum will sẽn yaa yelle, wala b sẽn da kãneg pipi kiris-nebã to-to wã. (Tʋʋma 24:5, 14; 28:22) Wa d sẽn wilg sõs-kãngã sɩngrẽ wã, b yelga ziri n sãam b yʋʋrã. La ne ‘waoogre, paoogre, yʋ-beed la yʋ-noog pʋgẽ,’ Kirist ba-biisã sẽn zae ne vʋʋsem sõngã, sẽn paamd b tũud-n-taasã sẽn yaa ‘piis a taabã’ teelgã, modgda ne sik-m-meng ‘n sakd Wẽnnaam noore la b tar a Zezi kasetã.’—2 Korẽnt dãmba 6:8; Zã 10:16; Wilgri 12:17.

11, 12. a) Tõe tɩ yaa bõe yĩng la b sẽn ningd kiris-nebã taalã? b) Wãn to la kiris-ned tõe n nams a bʋʋm zug a tẽebã yĩnga?

¹¹ Yaa sɩda, pa b sã n wa wɩt a Zeova sõgen fãa la yaa ‘tɩrlem yĩng’ ye. (Matɩe 5:10) Yaa tõnd mengã pãn-komsem yĩng n kɩtd tɩ d paamd zu-loees kẽere. D ‘sã n nams d kongr yĩng n deeg ne sũ-mare,’ pa tar keoor ye. La kiris-ned ‘sã n sak namsg a bʋʋm zugu yẽ kaset a sũur pʋgẽ ne Wẽnnaam yĩnga, ada bee bark’ a Zeova nifẽ. (1 Pɩɛɛr 2:19, 20) Yel-bʋs pʋsẽ la rẽ tõe n zĩndi?

¹² B namsa kẽere, b sẽn zãgs tɩ b kõn naag n maan rog-n-migs kẽer kʋyã wɛɛngẽ wã, sẽn kɩɩsd Gʋlsg Sõamyã yĩnga. (Tõodo 14:1) Kom-bɩɩs sẽn ya a Zeova Kaset rãmb la b tʋʋd wakat fãa, b sẽn tũud a Zeova noyã sẽn tɩ loe ne vɩɩm manesmã yĩnga. (1 Pɩɛɛr 4:4) B ninga roagdb kẽer sẽn yaa kiris-neb taal zaalem, n yeel tɩ b pa get b kamba yelle, bɩ tɩ b namsda b kamba, b sẽn bao n na n tɩbs b kambã n pa tũnug ne zɩɩmã yĩnga. (Tʋʋma 15:29) Kiris-neb kẽer roagdb bɩ b yags bak-b-la toore, b sẽn lebg a Zeova sõgen dãmbã yĩnga. (Matɩe 10:34-37) Nin-kãensã fãa b sẽn nams b bʋʋm zugã tũuda  no-rɛɛsdbã makre, la makr ning a Zezi mengã sẽn basã.—Matɩe 5:11, 12; Zak 5:10; 1 Pɩɛɛr 2:21.

B sã n wa sãbgd-d bɩ d yals kãn-kãe

13. Bõe n tõe n sõng tõnd tɩ d tall tẽeb sẽn yaa kãn-kãe, b sã n wa sãbgd tõnd wʋsgo?

¹³ B sã n wa sãbgd tõnd wʋsg d tẽebã yĩnga, d tõe n komsa raood wala sẽn yɩ to-to ne no-rɛɛs a Zeremi wã, n tags tɩ d pa tõe n ket n maand Wẽnnaam daabã ye. (Zeremi 20:7-9) Bõe n tõe n sõng tõnd tɩ d tall tẽeb sẽn yaa kãn-kãe? Ges-y yellã wa a Zeova sẽn get-a to-to wã. A geta neb nins sẽn talld b burkĩndã wa tõogdba, la pa wa neb b sẽn tõog ye. (Rom dãmba 8:37) Mams-y n ges neb nins sẽn teel a Zeova naam sẽn ka to wã, baa ne paoogr ning fãa Sʋɩtãanã sẽn wa ne b zutu, wala sẽn yɩ to-to ne rap la pagb wa a Abɛlle, a Zoob la a Zezi ma a Maari la pĩnd wẽndẽ neb a taab sẽn yɩ wẽn-sakdbã, n paas tõnd tẽed-n-taasã rũndã-rũndã wã. (Hebre dãmba 11:35-37; 12:1) Tags-y b burkĩndã yelle. Wẽn-sakdb kʋʋng kãngã boonda tõnd tɩ d wa naag-b n paam keoorã b sẽn bĩng neb nins sẽn tõogd dũniyã ne b tẽebã yĩngã.—1 Zã 5:4.

14. Wãn to la pʋʋsg ne d sũur fãa tõe n keng-d sẽn na yɩl tɩ d kell n sak Wẽnnaam?

¹⁴ Yɩɩrã ‘sã n wa yaa wʋsg ne tõndo,’ d tõe n pʋʋsa a Zeova ne d sũur fãa, la a na n belsa tõnd la a keng d pɛlga. (Yɩɩl Sõamyã 50:15; 94:19) A na n kõo tõnd yam ning sẽn yaa tɩlae ne-dã sẽn na yɩl n mao ne makrã la a sõng-d tɩ d ra yĩm yel-kãseng ning sẽn tɩ loe ne a Zeova naam sẽn ka to wã, sẽn kɩt tɩ b kis a sõgen dãmbã zaalem yĩngã ye. (Zak 1:5) A Zeova leb n tõe n kõo tõnd “Wẽnnaam laafɩ sẽn yɩɩd neba bãngr fãa” wã. (Filip rãmba 4:6, 7) Bãan kãngã Wẽnnaam sẽn kõt tõndã kɩtdame tɩ d ra yɛɛse, la d yals kãn-kãe weoog-kãseng taoore, tɩ sãmb-sãmb bɩ rabeem ra tõog-d ye. Ne a vʋʋsem sõngã maasem, a Zeova tõe n teela tõnd bũmb ning fãa a sẽn bas tɩ wa tõnd zutã taoore.—1 Korẽnt dãmba 10:13.

15. Bõe n tõe n sõng tõnd tɩ d ra tall sũ-kẽka, d sã n wa namsdẽ?

¹⁵ Bõe n tõe n sõng tõnd tɩ d ra tall sũ-kẽk ne neb nins sẽn kis tõnd zaalem yĩngã? Tẽeg-y tɩ tõnd bɛɛbã meng ya a Sʋɩtãan ne a zĩn dãmbã. (Efɛɛz rãmba 6:12) Baa ninsaalb kẽer sã n namsd tõnd ne yamleoogo, neb wʋsg sẽn kɩɩsd Wẽnnaam nin-buiidã maanda woto ne zɩɩlem, bɩ neb a taab sẽn tusd-bã yĩng bala. (Daniɛll 6:5-17; 1 Tɩmote 1:12, 13) A Zeova ratame tɩ “neba [buud] fãa paam fãagre la b bãng sẽn yaa sɩda.” (1 Tɩmote 2:4) Sɩda, pĩnd kɩɩsdb n lebg tõnd tẽebã pʋgẽ saam-biis masã, b sẽn yã tõnd yel-manesem sẽn yaa sõma wã yĩnga. (1 Pɩɛɛr 2:12) Sẽn paase, d tõe n paama zãmsg ne a Zakoob biribl a Zozɛfo. Baa ne a Zozɛf sẽn nams wʋsg a ba-biisã manesem yĩngã, a pa kisg-b ye. Bõe yĩnga? Ya a sẽn yã a Zeova nug yellã pʋgẽ wã yĩnga, a sẽn kɩt tɩ yɛlã tũ sor to-to n wa pids a raabã. (Sɩngre 45:4-8) Woto me, a Zeova tõe n tũnuga ne namsg tõnd sẽn deegd tɩrlmã yĩng n wẽnemd yɛlã tɩ kõ a yʋʋrã ziiri.—1 Pɩɛɛr 4:16.

16, 17. Bõe yĩng tɩ d pa segd n maan yɩɩr ne kɩɩsdbã sẽn modgd n dat n gɩdg tõnd moonegã?

¹⁶ D pa segd n maan yɩɩr tɩ loog nugu, sã n wõnd kɩɩsdbã tõogame n gɩdg koe-noogã yelgr ye. Ne kasetã b sẽn kõt dũniyã gill zugã maasem, a Zeova rĩmsda tẽnsã masã tɩ bõn-neebã kẽedẽ. (Azze 2:7) Kirist Zezi sẽn yaa Pekɩɩm Sõngã yetame: ‘Mam piisa wʋmda mam koɛɛga. Mam mii bãmba, la  bãmb tũuda maam. Mam kõta bãmb vɩɩm sẽn ka sɛta. . . . La ned ka tõe n deeg bãmb mam nugẽ ye.’ (Zã 10:27-29) Malɛg-sõmsã me kẽesa b toog tẽebã tigisg sẽn yaa kãsengã pʋgẽ. (Matɩe 13:39, 41; Wilgri 14:6, 7) Woto yĩnga, bũmb kae kɩɩsdbã sẽn na n yeel bɩ n maan tɩ tõog n gɩdg Wẽnnaam daabã pidsg ye.—Ezai 54:17; Tʋʋma 5:38, 39.

¹⁷ Naoor wʋsgo, kɩɩsdbã modgr womda biis bãmb sẽn da pa tẽede. Afirik buud a yembr pʋgẽ, b yelga ziri sẽn pa tõe n bãng n bilg a Zeova Kaset rãmbã zugu, tɩ b sẽn yet tɩ b yaa Sʋɩtãanã balemdbã be rẽ sʋka. Woto kɩtame t’a Zeova Kaset rãmbã sẽn wa wakat ning fãa n na n kaag a Grace, a ra zoetame n solg a roogã poor hal tɩ b wa looge. Vugri, a Grace egiliizã karen-saamb zẽka tõnd sebr a yembr n yeel neb nins fãa sẽn da be be wã tɩ b ra karm-a, bala a na n kɩtame tɩ b bas b tẽebã. La woto kɩtame t’a Grace rat n karem tõnd sɛbã. A Zeova Kaset rãmbã sẽn wa rẽ poore, a Grace pa solg ye. A sõsa ne-b n deeg sebre, tɩ b sɩng Biibl zãmsg ne-a t’a reeg lisg yʋʋmd 1996. Masã a Grace rɩkda a sẽkã n baood neb a taab b sẽn togs yɛl sẽn pa sɩd a Zeova Kaset rãmbã zugu.’

Keng-y y tẽebã masã

18. Bõe yĩng tɩ d segd n keng d tẽebã tɩ mak-toos nan pa wa, la wãn to la d tõe n maan woto?

¹⁸ A Sʋɩtãan sẽn tõe n kɩt tɩ b kisg tõnd wakat buud fãa zaalem yĩngã kɩtame tɩ tar yõod wʋsg tɩ d keng d tẽebã masã. Wãn to la d tõe n maan rẽ? Kɩbar sẽn yit tẽng a yembr b sẽn namsẽ a Zeova nin-buiidã b tẽebã yĩng yetame: “Bũmb a yembr n yɩ vẽenega: Makr sã n wa, pa toog ne neb nins sẽn minim n maand yɛlã sõma tẽebã wɛɛngẽ wã, la sẽn nand sɩd ning sẽn be Biiblã pʋgẽ wʋsgã tɩ b yals kãn-kãe ye. La  neb nins sẽn vaand tigissã la b moond koe-noogã loant-loant lohorem wakatã, la b kɩɩsd yel-kɩds pʋsẽ wã, naoor wʋsgo b lʋɩta mak-toaag sasa.” (2 Tɩmote 4:2) Yãmb sã n ne zĩis y sẽn segd n maneg tɩ yɩ sõma n paase, bɩ y modg n maneg tao-tao.—Yɩɩl Sõamyã 119:60.

19. Wẽnnaam sõgen dãmbã sẽn tall burkĩnd neba sẽn kis-b zaalem yĩngã taoorã wilgda bõe?

¹⁹ Burkĩnd ning Wẽnnaam balemdb hakɩkã sẽn tall namsg nins a Sʋɩtãan kisgrã sẽn wa ne wã taoorã yaa kaset sẽn tar pãng sẽn wilgd t’a Zeova naam sẽn ka to wã zemsame la a yaa tɩrga. B kɩs-sɩdã noogda Wẽnnaam sũuri. Baa ninsaalbã sã n yaand-ba, a soab ning ziir sẽn yɩɩd tẽngã la saasã “ka zoet yãnd bãmb neba sẽn bool bãmb tɩ b Wẽnnaama ye.” Sɩda, nin-kãensã fãa sẽn yaa kɩs-sɩd dãmba wɛɛngẽ, d tõe n sɩd yeelame tɩ ‘bãmb yaa neb dũniyã sẽn ka zems ne-b ye.’—Hebre dãmba 11:16, 38.

[Tẽngr note]

Y tõe n wilga a võor bɩ?

• Bõe n kɩt tɩ b kisg Wẽnnaam balemdb hakɩkã zaalem yĩnga?

• Wãn to la a Sʋɩtãan kɩt tɩ b ning a Zoob la a Zezi taal sẽn na yɩl n sãam b burkĩndã?

• Wãn to la a Zeova kengd tõnd tɩ d yaas kãn-kãe a Sʋɩtãan kisgrã taoore?

[Zãmsgã sogsgã]

[Zĩ-gũbri/Foto, seb-​neng 12]

B bãnga yellã meng-menga

A Zeova Kaset soab a yembr sẽn be Ukrɛn b sẽn gɩdgẽ Rĩungã mooneg sẽn yɩɩd yʋʋm 50 wã yeelame: “A Zeova Kaset rãmbã sẽn da wa n be yɛl nins pʋsẽ wã ra pa yit ninsaalbã nengẽ bal ye. . . . Taoor dãmb wʋsg ra maanda b tʋʋmd bala. Guvɛrnema wã sã n da toeeme, taoor dãmb kãens pʋgda sẽn wa-a paalma, la tõnd nengẽ yɛlã pa toeemd ye. D bãngame tɩ Biiblã ra zoe n wilga tõnd d zu-loeesã sẽn sɩd yit zĩig ningã.

“Tõnd ra pa get d mensã wa neb ninsaalbã sẽn da namsd d bʋʋm zug bal ye. Bũmb ning sẽn sõng tõnd tɩ d yals kãn-kãe toog pʋgẽ wã yaa tõnd sẽn bãng yell ning b sẽn wa ne Edɛn zẽedẽ wã: yaa yell ning sẽn tɩ loe ne sor ning Wẽnnaam sẽn tar n na n dɩ naamã. . . . Tõnd yãka yam n na n teel Wẽnnaam yel-kãng pʋgẽ, pa ninsaalbã nafa yĩng bal ye, la yaa ãndũniyã Naab sẽn ka to wã raab yĩng me. D ra wʋma yɛl nins sẽn tɩ loe ne rẽ wã võor meng-meng sõma. Rẽ kenga tõnd sẽn na yɩl tɩ d tõog n tall d burkĩndã, baa yɛl nins sẽn yaa tood n tɩ yɩɩdã pʋsẽ.”

[Seb-​neng 12 fotã]

B yõka a Victor Popovych yʋʋmd 1970

 [Foto, seb-​neng a 9]

Ãnd soab n kɩt tɩ b yaal a Zezi woto?

[Foto, seb-​neng 11]

A Zoobe, a Maari la Wẽnnaam rũndã-rũndã sõgen dãmb wa a Stanley Jones teela a Zeova naam sẽn ka to wã