Sũ-noogã baoobo

YƲƲM a wãn sẽn looge b soka neb Alemayn, Etazĩni, Fãrens la Gãrãnd Bertayn sok-kãnga: “Bõe la yãmb dat sẽn na yɩl n tall sũ-noogo?” Neb nins b sẽn sokã sʋka, bãmb 89 koabg zug yeelame tɩ yaa f sẽn na n paam laafɩ, neb 79 koabg zug n yeel tɩ yaa zĩid-n-taar sẽn be sũ-noog kãadmã pʋgẽ, neb 62 koabg zug goma kamb paoong yelle, tɩ neb 51 koabg zug yeel tɩ yaa tʋʋm sõng paoong n wat ne sũ-noogo. Sẽn paase, baa neba sẽn nong n yet tɩ ligd pa wat ne sũ-noogã, neb 47 koabg zug n kɩs sɩd tɩ ligd wata ne sũ-noogo. La yɛlã nebã sẽn vɩɩmd n yã wã wilgda bõe zĩ-kãngã wɛɛngẽ?

Nananda, d ges loees ning nebã sẽn yet tɩ bee ligd ne sũ-noog sʋkã. B soka Etazĩni neb koabg nins sẽn tar-b arzɛgs n yɩɩdã, n mik tɩ bãmb ka tar sũ-noog n yɩɩd neb a taabã ye. Sẽn paase Etazĩni, yʋʋm 30 wã sẽn loogã pʋgẽ, neb wʋsg paoong fɩɩga naoor a yiib la bala, la sã n yaa ne zu-lɛbg yɛl mitba, nin-kãensã sũ-noog ka yɩɩd pĩndã ye. Togs sɩda, kɩbar a ye n wilg woto: “Wakat kãng pʋgẽ me, neba sũ-sãams paasa wʋsgo. Kom-bɩɩsã sẽn kʋʋd b mensã sõor fɩɩga naoor a tãabo. Kãadmã kaoob sõor fɩɩga naoor a yiibu.” Tẽns sõor sẽn zems 50 pʋsẽ, neb wʋsg n bao n na n bãng ligd sã n tõe n waa ne sũ-noogo, n wa baas n mik t’a pa kõt ned sũ-noog ye.

La laafɩ, kãadem sẽn yaa sõma, la tʋʋm sõng paoong kõta ned sũ-noog bɩ? Sɩda, sã n da yaẽ tɩlae tɩ ned paam bõn-kãensã n yaool n tall sũ-noogo, yaa wãn masã ne neb milyõ rãmb nins sẽn bẽedã, bɩ neb nins kãadem sẽn pa sõma wã? Yɩta wãn masã ne kẽed-n-taas nins sẽn ka tar kambã, la ne pagb la rap nins sẽn ka tar tʋʋm sõngã? Yaa tɩlae tɩ nin-kãensã vɩɩmd ne sũ-sãams bɩ? Sẽn paase, rẽ yĩnga neb nins sẽn tar laafɩ la sũ-noog b kãadmã pʋgẽ wã yɛl sã n toeeme, b na n ket n tara sũ-noog bɩ?

Tõnd baooda sũ-noogã zĩig ning sẽn segdã bɩ?

Ned kam fãa ratame n tall sũ-noogo. Rẽ ka ling tõnd ye, bala b bilgda ninsaal Naandã n yetẽ t’a yaa ‘sũ-noog Wẽnde,’ sẽn paase, a naana ninsaal a meng wẽnego. (1 Tɩmote 1:11, Sebr Sõngo; Sɩngre 1:26, 27) Dẽnd ninsaalbã sẽn baood sũ-noogã yaa bũmb sẽn zemse. Baasg zãnga, neb wʋsg tagsdame tɩ sũ-noog tallg yaa wala f sẽn na n dat n gãd  bĩisr sẽn dʋr tẽnga, fãa yʋlgdame tɩ f gãd vɩʋʋgo.

Rẽ yĩnga yaa neb kẽer sẽn maand tɩ loogd sũ-noogã baoob pʋgẽ wã yĩng bɩ? Nebã vɩɩm yɛl wɛɛngẽ bãngd a ye sɩd ra tagsda woto. A yeelame: “Bũmb a yembr sẽn kɩt tɩ d tar sũ-sãamsã yaa sũ-noogã baoobo.” Sɩd na n yɩɩ woto, d sã n baood sũ-noog zĩis nins sẽn ka zemsẽ wã. Sã n yaa woto, yaa vẽeneg tɩ d na n paama sũ-sãamse. Bao n yɩ arzɛk soaba, yʋ-baoore, bõn-datɩ pʋgb naamã walla neba vɩɩm manegr bɩ laogã wɛɛngẽ, bɩ rat-m-yembr vɩɩm la mengã tʋlsem pidsg zĩig pʋgẽ ka kɩtd tɩ ned paam sũ-noog ye. Rẽnd ka lingr ne-do, neb kẽer sẽn tar tagsa sẽn kɩɩsd taab sũ-noogã wɛɛngẽ, wala seb-gʋlsd a ye sẽn gʋls woto wã: “D sã n da tõe n basẽ sũ-noogã baoobo, d sũurã tõe n yɩẽ-la noogo”!

Tara yõod wʋsg tɩ d bãng tɩ sok-n-gɛsgã yell b sẽn gom sõasgã sɩngrẽ wã wilgame tɩ neb 10 sʋka, neb a 4 n tagsd tɩ yel-sõmd maaneg la neb a taabã sõngr wata ne sũ-noogo. Sẽn paase, nin-yɛng neb a 4 zug n wilg vẽeneg tɩ ned tẽeb sõngd-a-la hal sõma t’a tall sũ-noogo. Yaa vẽeneg tɩ d segd n bao n bãnga bũmb ning d sẽn segd n maan n paam sũ-noog hakɩka. Sõasg ning sẽn pʋgdã na n sõng-y lame tɩ y maan dẽ.

[Foto rãmba, seb-neng a 3]

Neb wʋsg tagsdame tɩ ligdi, zak vɩɩm sẽn yaa sõma, bɩ tʋʋm sõng wata ne sũ-noogo. Y tagsda woto bɩ?