Tõnd yaame, la pa tẽebã wɛɛngẽ ye
Tõnd yaame, la pa tẽebã wɛɛngẽ ye
“[A Zeova] n naan dũniyã soolem fãa, . . . ned sã n yɛ, bãmb kõt-a-la pãnga. Ned pãng sã n booge, bãmb paasd-a-la pãnga.”—EZAI 40:28, 29.
1, 2. a) Bool-bʋg sẽn be yamleoog la b taas neb nins fãa sẽn dat n kẽes-b mens baleng sẽn yaa yɩlemdã pʋgẽ wã? b) Bõe n tõe n wa rat n sãam tõnd tẽebã?
TÕND sẽn ya a Zezi karen-biisã yĩnga, d mii a bool-kãngã sẽn be yamleoogã hal sõma: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. . . . Tɩ bõe, mam yɛla yaa naana, la mam zɩɩb yaa faasga.” (Matɩe 11:28-30) Kiris-nebã leb n paamda ‘yolsg sẽn yit a Zeova nengẽ.’ (Tʋʋma 3:19, NW ) Sãmbg sẽn ka be, yãmb meng mii sɩd nins y sẽn zãms Biiblã pʋgẽ wã sẽn wat ne yolsg ningã, n tar beoog-raar saagr sẽn kõt sũ-noog la y tũud a Zeova noyã y vɩɩmã pʋgẽ.
2 Baasg zãnga, a Zeova sõgen dãmbã kẽer sũy mi n wa sãamame. Wakat ninga sũ-sãangã pa kaoosd ye. La sasa ninga a tõe n kaoosa wʋsgo. Sã n beẽ n beẽ, neb kẽer tõe n wa tagsdame tɩ kiris-ned tʋʋmã lebga zɩɩb sẽn zɩs wʋsg ne bãmba, la tɩ pa kõt vʋʋsg wala a Zezi sẽn da kãabã ye. Tags-kɛg woto tõe n wa rat n sãama zood ning kiris-ned sẽn tar ne a Zeova wã.
3. Bõe yĩng t’a Zezi kõ saglg ning sẽn be Zã 14:1 wã?
3 Wakat bilf sẽn deng a Zezi yõkrã la a kʋʋbã, a yeela a karen-biisã woto: “Da sak-y tɩ yãmb sũyã sãam ye. Bɩ y tẽ Wẽnnaam, la bɩ y tẽ maam me.” (Zã 14:1) A Zezi goma gom-kãensã a tʋm-tʋmdbã sẽn da pa na n kaoos la b seg yel-tooda yĩnga. A sẽn gom woto wã zugẽ, ra pa na n kaoos la b paam namsg ye. A Zezi ra miime tɩ sũ-sãamsã ra tõe n wa luba tʋm-tʋmdbã tẽebã wɛɛngẽ. (Zã 16:1) Tʋm-tʋmdbã sã n da pa gũusi, sũ-sãamsã ra tõe n wa komsa b tẽebã n kɩt tɩ b bas a Zeova teegre. Yaa woto me ne kiris-nebã rũndã-rũndã. Sũ-sãang sẽn tõt saab tõe n nams-d-la wʋsg la koms d raoodo. (Zeremi 8:18) Tõnd sẽn sɩd yaa ned ning d sũurã pʋgẽ wã tõe n komsame. Yel-kãens tõe n sãama d sũur la koms d tẽebã n kɩt meng tɩ d pa ye tʋll n balem a Zeova ye.
4. Bõe n tõe n sõng tõnd tɩ d kogl d makr wɛɛngẽ sũurã ne yaamse?
4 Biiblã sagl-kãngã sɩd zemsame: “Bɩ f gũus ne f sũura tagsg n yɩɩd bũmba fãa. Tɩ bala, ned vɩɩm yita a sũur pʋgẽ.” (Yelbũna 4:23) Biiblã kõt-d-la sagls sẽn yaa sõma sẽn sõngd-d tɩ d kogend d makr wɛɛngẽ sũurã t’a ra wa ya la a koms raood tẽebã wɛɛngẽ ye. La nananda, d segd n bao n bãnga bũmb ning sẽn kɩtd tɩ d yaadẽ wã.
Kirist tũudmã pa weoogd ned ye
5. Yɩ kiris-nedã wɛɛngẽ, bõe n tõe n wõnd lebende?
5 Yaa sɩd tɩ f sã n yaa kiris-neda f segdame n mao wʋsgo. (Luk 13:24) A Zezi pʋd n da yeela woto: “Ned ninga fãa sẽn ka rɩkd a kũum [da-luk] n tũ maam, a ka tõe n yɩ mam karen-biig ye.” (Luk 14:27) F sã n kelg gom-kãensã zugẽ-zugẽ, tõe n wõnda wa b yaa lebend ne a Zezi sẽn da yeel tɩ yẽ zɩɩbã yaa faasg n kõt vʋʋsgã, la gom-kãensã yaool n pa kɩɩsd taab ye.
6, 7. Bõe yĩng tɩ d tõe n yeel tɩ tõnd sẽn balemd Wẽnnaam to-to wã pa wat ne yaamse?
6 Baa yĩn-wɩsgr la tʋʋm tood sẽn tõe n wa ne yĩngã yaamsã, rẽ tõe n kõo sũ-noog la yolsgo, sã n mikame tɩ yaa bũmb sẽn be bark yĩng la d maand rẽ. (Koɛɛg Soaba 3:13, 22) La bõe n ye be t’a bark yɩɩd d sẽn na n taasd d taabã sɩd ning sẽn be Biiblã pʋgẽ wã? Sẽn paase, d sã n ges nafa nins d sẽn paamd d sẽn modgd n tũud vɩɩm manesem noy nins Wẽnnaam sẽn kõ wã sẽn tar yõod wʋsgã, d mikdame tɩ d naongã pa baa fʋɩ ye. (Yelbũna 2:10-20) Baa b sã n wa namsd-d Wẽnnaam Rĩungã yĩnga d na n gesa rẽ wala waoogre.—1 Pɩɛɛr 4:14.
7 A Zezi zɩɩbã sɩd kõta yolsgo, sẽn yɩɩd fãa, d sã n mak-a ne tẽeb lik ning pʋgẽ neb nins sẽn ket ziri tũudmã pʋgẽ sẽn be wã. Wẽnnaam nong-d-la hal wʋsgo, la a pa baood tɩ d maan yɛl d sẽn pa tõe ye. A Zeova ‘tõogã ka toog ye.’ (1 Zã 5:3) Kirist tũudum hakɩkã b sẽn bilg Gʋlsg Sõamyã pʋgẽ wã sakr pa weoogd ned ye. Tõnd sẽn balemd Wẽnnaam to-to wã pa wat ne yaams la raood komsg ye.
“Bas-y zɩɩb fãa”
8. Naoor wʋsgo, bõe n mi n wat ne tẽebã wɛɛngẽ yaamse?
8 Naoor wʋsgo, yaa zɩɩb nins dũni-wẽn-kãngã sẽn wat ne n paasd d zutã n kɩtd tɩ d yaad tẽebã wɛɛngẽ. Sẽn mik tɩ “dũniyã fãa bee wẽng soaba nugẽ” wã yĩnga, a pida ne pãn-tusd-wẽns buud toor-toor sẽn tõe n koms d raoodo, la kɩt tɩ d pa ye tõe n maan yɛlã ne zemsg d kiris-ned vɩɩmã pʋgẽ ye. (1 Zã 5:19) Bõn-datɩ sẽn pa tɩlae pʋgb tõe n kɩtame tɩ tẽebã tʋʋm nins d sẽn pidsd daar fãa wã lebg toogo. Bõn-datɩ kãens sẽn pa tɩlaeyã tõe n komsa d raood wall sãam d sũur menga. Rẽ n kɩt tɩ Biiblã sagend-d tɩ d “bas zɩɩb fãa” wã.—Hebre dãmba 12:1-3.
9. Wãn-wãn la laogã pʋgb tõe n yɩ zɩɩb n kõ-do?
9 Wala makre, yaa yʋ-baoore, ligdã baoobo, reemã, tog sor n tɩ noog f yõor la yɛl a taab baoob n pak dũniyã neba. Rẽ tõe n talla pãn-tusdg tõnd tagsgã zugu. (1 Zã 2:15-17) Pipi kiris-neb kẽer n pʋg arzɛgs tɩ rẽ wa ne zu-loees b vɩɩmã pʋgẽ. Tʋm-tʋmd a Poll wilga woto: “Neb nins sẽn dat n yɩ arzɛgs rãmba kẽeda makre la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ. Tɩ bõe, ligd datem yaa bõn-wẽns fãa yẽgre. La ligd datem sẽn so kẽerã, b basa tẽebo n kẽes b mens to-kãseng pʋgẽ.”—1 Tɩmote 6:9, 10.
10. Bõe la d tõe n zãms arzɛgsã wɛɛngẽ a Zezi ka-fẽrgdã kɩbar pʋgẽ?
10 Tõnd sã n wa ya bɩ d komsa raood Wẽnnaam tʋʋmdã pʋgẽ, yaa arzɛgs pʋgb n deeg tẽebã yɛl zĩig n yãmb bɩ? Tõe n sɩd yɩɩ woto, wa a Zezi sẽn bilg a ka-fẽrgdã kɩbar pʋgẽ wã. A Zezi rɩka ‘yɩɩr ne dũniyã yɛla, arzɛgsã belgr la bũmb a taab ratmã’ n mak ne gõos sẽn “dɩt Wẽnnaam koɛɛgã” tõnd sũurã pʋgẽ. (Mark 4:18, 19) Rẽ n so tɩ Biiblã sagend-d woto: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tara sek yãmba. Tɩ bõe, Wẽnnaam menga yeelame yaa: ‘Mam kõn bas yãmb walla m mong yãmb abada ye.’ ”—Hebre dãmba 13:5.
11. Wãn-wãn la d tõe n bas bũmb nins sẽn tõe n yɩ zɩɩb ne-dã?
11 Wakat ninga, pa yɛl a taabã pʋgb n gĩt tõnd vɩɩmã ye, yaa tõnd sẽn tʋmd to-to ne bũmb nins d sẽn zoe n tarẽ wã n gĩt-a. Neb kẽer tõe n wa komsa raoodo, b sẽn lʋɩ bã-kɛgemse, neb b sẽn nong sẽn ki wall zu-loees a taab yĩnga. B wa n yãame tɩ wakat-wakate b segd n demsa b vɩɩmã. Saam-biig a ye ne a pag basa yɛl kẽer b sẽn da nong n maandẽ la b mensã bõn-datɩ kẽer sẽn pa tɩlae. Sɩd-sɩda b vaeesa b teedã n yiis bũmb nins fãa sẽn tar loees ne bõn-datɩ kãensã n lebs kɛɛnga. Wakat-wakate, d fãa sã n tagsd d sẽn nong n maand bũmb ninsã la d sẽn tar teed ninsa zutu, n basd teed la yɛl nins sẽn pa tɩlaeyã sẽn na yɩl n da wa ya tɩ d sũyã sãame, rẽ na n naf-d lame.
Maan-tɩ-zems yaa tɩlae
12. Bõe la d segd n sak n deeg tõnd meng tudgrã wɛɛngẽ?
12 Tõnd sẽn tudgd baa yaa yel-bõoneg pʋsẽ wã, bilf-bilfã rẽ tõe n wa waa ne zu-loees d vɩɩmã pʋgẽ. Ad a Davɩɩd gom-kãensã sɩd yaa sɩda: “Mam [tudgrã] zãntlem yɩɩda m zug woglem n yaa wa zɩɩbo, a zɩslem yɩɩda mam sẽn tõe.” (Yɩɩl Sõamyã 38:5) Naoor wʋsgo, yɛl a wãn remsg bal na n yols-d-la ne zɩɩb sẽn yaa kãsemse.
13. Wãn to la maan-tɩ-zems tõe n sõng-d tɩ d tall tagsg sẽn zems d koe-moonegã zugu?
13 Biiblã sagend-d lame tɩ d tall “yam ne yẽesem.” (Yelbũna 3:21, 22) A leb n yetame tɩ “yam ninga sẽn yit yĩngra” yaa sõma. (Zak 3:17) Yɩɩr n da tar neb kẽere, b sẽn da rat n moon koe-noogã tɩ ta b taabã yĩnga. La Biiblã sagend-d-la woto: “Bɩ ned kam fãa mak a meng tʋʋma, dẽ, yẽ na yaool n maan sũ-noog a meng yĩng bala, la ka ne ned a to ye, tɩ bõe, ned kam fãa na n tʋka a meng zɩɩbo.” (Galat dãmba 6:4, 5) Yaa sɩd tɩ tõnd tẽed-n-taasã mak-sõng tõe n sõng-d lame tɩ d balem a Zeova ne d sũur fãa, la yam ne maan-tɩ-zems na n sõng-d lame tɩ d yãk bõn-datɩ tɩ zems ne tõnd mengã yɛl sẽn yaa to-to wã.
14, 15. Wãn-wãn la d tõe n wilg tɩ d tara yam d yĩnsa laafɩ koglg la sũ-sãamsã gilb wɛɛngẽ?
14 Tõnd sã n yaa maan-tɩ-zems soaba, leb n tõe n sõng-d-la yɛl sẽn wõnd b paoodame pʋsẽ tɩ d tõog n gil yaamse. Wala makre, rẽ yĩnga d baood n na n talla minimd sẽn yaa sõmã sẽn na sõngd-d tɩ d kogl d yĩnsã laafɩ bɩ? Ges-y saam-biig a ye ne a pag sẽn tʋmd a Zeova Kaset rãmbã tʋʋmd will a yembrẽ makre. Yaamsã gilb wɛɛngẽ b bãnga yam tallg yõodo. Paga yeelame: “Baa ne tõnd tʋʋmã sẽn sõs n zem to-to fãa, yʋng fãa d kẽeda gãag wakat yɛnga. Tõnd leb n maanda yĩn-wɩsgr wakat fãa me. Rẽ sɩd sõngd-d lame. D bãnga d pãn-tõogã tɛka, la d maanda yɛlã tɩ zemsd ne rẽ. Tõnd pa baood n na n mak d mens ne neb nins sẽn wõnd b tʋmdame n pa yaadẽ wã ye.” Rẽ yĩnga tõnd minimame n dɩt rɩ-sõma la d vʋʋsdẽ tɩ sekdẽ bɩ? D sã n get d yĩnsã laafɩ yell wa sẽn zemse, tõe n booga d sũ-sãamsã la d yaamsã tẽebã wɛɛngẽ.
15 Tõnd sʋkã neb kẽer tara raab sẽn pa wõnd b taabã rẽnd ye. Wala makre, kiris-nin-poak a ye sẽn da tʋmd Wẽnnaam tʋʋmdã wakat fãa ra moona koɛɛgã zĩis sẽn pa nana pʋgẽ. A bẽe bã-kɛgemse, kãnsɛɛr meng yõk-a lame. Bõe n sõng-a t’a tõog n mao ne yel-kãensã sẽn wat ne sũ-sãamsã? A yeelame: “Tara yõod ne maam tɩ m paam zĩig tiisg sẽn kaẽ n zĩnd m yembre. M sã n wa neẽ tɩ m yɩɩrã la m yaamsã paasdame, m miime tɩ yaa tɩlae tɩ m bao sẽk n zĩnd m yembr n karem la m vʋʋse.” Tõog n tags sõma la paam yam sõngd-d lame tɩ d bãng d raabã n welg la d pids-a n tõog n gil tẽebã wɛɛngẽ yaamse.
Wẽnnaam a Zeova kõt-d-la pãnga
16, 17. a) Bõe yĩng tɩ tar yõod wʋsg tɩ d ges d tẽebã laafɩ yelle? b) Bõe la d segd n naag d daar fãa tʋʋmã sʋka?
16 Yaa vẽeneg tɩ d tẽebã laafɩ koglg n tar yõod n yɩɩda. D sã n tar zems-n-taar sõma-sõma ne Wẽnnaam a Zeova, yĩnsã wɛɛngẽ d tõe n yaame, la d kõn tol n ya ne a baleng ye. “Ned sã n yɛ, [a Zeova] kõt-a-la pãnga. Ned pãng sã n booge, [a] paasd-a-la pãnga.” (Ezai 40:28, 29) Tʋm-tʋmd a Poll sẽn zoe n yã gom-kãensã pidsg yẽ mengã zugã gʋlsame: “Tõnd ka tadgd ye; la baa tõnd yĩn-kiidsa sã n sãam, tõnd sɩɩga tara manegr daar fãa.”—2 Korẽnt dãmba 4:16.
17 Ges-y tɩ b yeelame tɩ “daar fãa.” Woto baoodame tɩ d rɩt a Zeova seglsã nafa daar fãa. Misioneer a ye sẽn maan yʋʋm 43 a tʋʋmdẽ wã maoa ne yĩnga wɛɛngẽ yaams la sũ-sãamse. La a pa ya tẽebã wɛɛngẽ ye. A yeelame: “Mam minimame n yikd pĩnda, sẽn na yɩl n tõog n pʋʋs a Zeova la m karem a Gomdã, la m yaool n sɩng tʋʋma. Mam sẽn minim woto maaneg daar fãa wã n sõng-m tɩ m mao n tãag rũndã.” N-ye, d sɩd tõe n teega a Zeova t’a sõng-d ne a pãngã, d sã n pʋʋsd-a “daar fãa” la d bʋgsd a zʋg-kãsemsã la a kãabsã zutu.
18. Wãn-wãn la Biiblã belsd kɩs-sɩd rãmb nins sẽn kʋʋl bɩ sẽn bẽedã?
18 Sẽn yɩɩd fãa, woto sɩd sõngda neb nins sẽn koms raood b sẽn kʋʋl la b sẽn ka laafɩ wã yĩngã. Nin-kãensã tõe n wa komsa raoodo, pa tɩ b makda b mens ne neb a taabã ye, yaa b sẽn makd b masã tʋʋmã ne bãmb sẽn da tõe n maan pĩnda yĩnga. Ad sɩd kengda raood d sẽn mi t’a Zeova nanda sẽn kʋʋl-bã! Biiblã yeelame: “Zoob-peend yaa wa waoogr maanfo. La yaa tɩrlem sor zug la b paamd-a.” (Yelbũna 16:31) A Zeova miime tɩ tõnd pãngã pa tõe fãa ye, la a nanda d sẽn balemd-a ne d sũy fãa baa ne d pãn-komsmã. Sẽn paase, Wẽnnaam pa na n tol n yĩm tʋʋm-sõmã nins d sẽn zoe n maanã yell ye. Gʋlsg Sõamyã kõt-d-la bas-m-yam woto: “Tɩ bõe, Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.” (Hebre dãmba 6:10) Ad d fãa sũy sɩd yaa noogo, d sẽn tar neb sẽn sɩng n tar kɩs-sɩd ne a Zeova hal sẽn na maan yʋʋm wʋsg tɩ be d sʋkã!
Ra koms-y raood n bas ye
19. D sã n maand tʋʋm sõma wakat fãa, wãn-wãn la na n naf-do?
19 Neb wʋsg tẽedame tɩ tʋʋm sẽn wɩsgd yĩng maaneg wakat fãa tõe n booga yaamse. Wala woto, tẽebã tʋʋm maaneg wakat fãa me tõe n booga sũ-sãamsã la tẽebã wɛɛngẽ yaamse. Biiblã yetame: “Bɩ tõnd da yɛ ne tʋʋm sõama maaneg ye, tɩ bõe, wakat sã n ta tõnd na wʋk yaoodo tõnd sã n ka yɛ ye. Woto yĩnga, tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.” (Galat dãmba 6:9, 10) Ges-y tɩ b gomda “tʋʋm sõama” la ‘yel-sõmd’ maaneg yelle. Woto rat n yeelame tɩ d segd n maana bũmbu. Maan tʋʋm sõma n kõ neb a taabã sɩd tõe n sõng-d lame tɩ d ra ya a Zeova balengã wɛɛngẽ ye.
20. Sẽn na yɩl n mao ne raood komsgã, ãnd rãmb tũud-n-taar la d segd n gili?
20 La tõnd sã n tũud neb nins sẽn pa nand Wẽnnaam noyã bɩ d naagd-b n tʋmdẽ, tõe n wa lebga zɩɩb sẽn wat ne yaamse. Biiblã keoogd-d-la woto: “Kug ne bĩisr zɩsame, la yalem sũ-yikr zɩsame n yɩɩd bãmba.” (Yelbũna 27:3) Sẽn na n yɩl n mao ne raood komsgã la yaamsã, yɩta sõma tɩ d ra bao neb nins sẽn tar tags-kɛg la sẽn nong n yaa yel-gẽnesdb la b wɩt b taabã tũud-n-taar ye.
21. Wãn-wãn la d tõe n keng neb a taabã raood kiris-neb tigissẽ wã?
21 Kiris-neb tigissã yaa bũmb a ye a Zeova sẽn tũnugd ne n kõt-d pãng tẽebã wɛɛngẽ. Be d tõe n kenga taab raood ne zãmsgã d sẽn paamdã la tũud-n-taarã. (Hebre dãmba 10:25) Tigingã pʋgẽ, nebã fãa segd n mao n kenga b taabã tẽebo, b sã n wa kõt leoor tigissẽ wã, wall b sã n wa zãmsd tigingã neba. Yaa neb nins sẽn lʋɩt taoor zãmsgã wɛɛngẽ wã n segd n keng neb a taabã raood n yɩɩda. (Ezai 32:1, 2) Baa b sã n wa segd n kõ sagls wall b zab neda, b tog n maana rẽ ne sũ-maasem, sẽn na yɩl tɩ tõog n keng nebã raoodo. (Galat dãmba 6:1, 2) D sẽn nong taabã sɩd na n sõng-d lame tɩ d balem a Zeova n pa ya ye.—Yɩɩl Sõamyã 133:1; Zã 13:35.
22. Baa ne d sẽn yaa ninsaalb sẽn pa zems zãngã, bõe yĩng tɩ d tõe n tall raoodo?
22 A Zeova baleng saabã wakat kãensã baooda modgre. Kiris-nebã me pa põsd yɩɩre, sũ-sãams la zu-loees ye. D sẽn yaa neb sẽn pa zems zãnga yĩnga d yaa kom-kom wa yagd laase. Baasg zãnga Biiblã yetame tɩ “tõnd tara paoong kãnga yagd laas pʋsẽ, tɩ pãng kãseng kãng na yɩ Wẽnnaam dẽnda, la ka tõnd dẽnd ye.” (2 Korẽnt dãmba 4:7) N-yẽe, d na n wa yaame bɩ n koms raoodo, la bɩ ra yɩ tẽebã wɛɛngẽ abada. Wall tɩ yɩɩ woto, bɩ d yeel ne raood yaa: “[A Zeova] yaa mam sõngda.”—Hebre dãmba 13:6.
Lebg-n-gese
• Zɩɩb bʋs sẽn zɩs la d tõe n base?
• Wãn to la d tõe n maan d tẽed-n- taasã “yel-sõmde”?
• Wãn-wãn la a Zeova kengd tõnd d sã n wa ya, bɩ d sã n komsa raoodo?
[Zãmsgã sogsgã]
[Foto, seb-neng 19]
A Zezi ra miime tɩ sũ-sãang sẽn tõt saab tõe n wa komsa tʋm-tʋmdbã raoodo
[Foto, seb-neng 20]
Neb kẽer basa yɛl kẽer b sẽn da nong n maandẽ la bõn-datɩ sẽn pa tɩlae
[Foto, seb-neng 22]
Baa ne d pãn-komsmã, a Zeova nanda d sẽn balemd-a ne d sũur fãa wã hal wʋsgo