Bũmb y sẽn sɩd tõe n paame

“NED sã n wa tool-y sebr sẽn wilgd tɩ paoong y ned sẽn ki n bas tɩ b pa sokd a yell n gũud-yã, bɩ y maan gũusg tɩ tõe n yaa sɩlem sẽn na yɩl n belg-yã.”

Woto yaa keoogr Etazĩni siglg ning sẽn get-a lɛta wã toolg yellã sẽn gʋls n ning ẽntɛrnetã pʋgẽ. Bõe yĩng tɩ b keoogd nebã woto? Yaa tɩ neb tusa n zoe n paam koe-kãngã ẽntɛrnetã pʋgẽ: ‘Yãmb ned n ki n bas paoong y sẽn segd n wa reeg n sooge.’ Rẽ kɩtame tɩ neb wʋsg yiis ligd sẽn ta tõnd ligdã tus a tãab bɩ sẽn yɩɩd rẽ n tool sẽn na yɩl tɩ b maan sebr sẽn wilgd bũmbã sẽn beẽ, la b sẽn segd n tũ soay nins n paam-a. Zu-bʋko, nin-kãensã pa paam fʋɩ ye. Neb nins fãa sẽn tool ligdã paama sebr sẽn tar kɩba-yɛnga, tɩ ra lebg vẽeneg tɩ bãmb ned ba a ye da pa tõe n paam fʋɩ ye.

Sẽn maand-b sɩlem-tʋʋm kãensã wã tikda nebã sẽn dat zaalmã zug n bɛlgd-ba. La Biiblã yaool n pẽgda neb nins sẽn basd arzɛgs ne b kambã, a sẽn yeel tɩ “nin-sõng basda arzɛgs a yagens” yĩngã. (Yelbũna 13:22) A Zezi meng tãng zug zãmsgã pʋgẽ, a togsa goam neb wʋsg sẽn mi la b nongẽ. A yeelame: “Bark bee sũ-maasem dãmba zutu, tɩ bõe, bãmb na soog dũniyã.”—Matɩe 5:5.

A Zezi goamã tẽegd-d-la gom-kãensã Wẽnnaam sẽn da vẽneg pĩnd wẽndẽ Israɛll rĩm a Davɩɩd t’a gʋls yʋʋm kobs sẽn loogã: “Sũ-maasem dãmba na n sooga [tẽngã] n maan sũ-noog laafɩ wʋsg yĩnga.”—Yɩɩl Sõamyã 37:11.

‘N soog tẽngã.’ Ad wã sɩd yaa saagr sẽn kõt sũ-noogo! La rẽ yĩnga d sɩd tõe n talla bas-m-yam tɩ kɩba-kãngã pa sɩlem sẽn na yɩl n belg ãdem-biisã n dɩ wala d sẽn zoe n yã zugẽ wã sɩda? N-yẽe, d tõe n talla bas-m-yam. Sẽn mik tɩ tẽngã bee bõn-kãsems nins a Zeova sẽn naanã sʋka, la tɩ yaa yẽ n yaa b Naand la b Soabã, a tara sor n na n kõ-a ned ning a sẽn date. A Zeova ra tũnuga ne rĩm a Davɩɩd n kãab a Biribl nongr a Zezi Kirist kãab-kãngã sẽn yaa bãngr-gomdã: “Kos maam, la mam na kõ foom dũniyã soolem fãa tɩ f sooge. La fo soolem na n taa dũniyã tɛk fãa.” (Yɩɩl Sõamyã 2:8) Yaa rẽ yĩng n kɩt tɩ tʋm-tʋmd a Poll da yeel t’a Zezi la ned ning ‘Wẽnnaam sẽn yãk t’a soog bũmb fãa wã.’ (Hebre dãmba 1:2) Rẽnd d sɩd tõe n talla bas-m-yam zãng t’a Zezi sẽn yeel tɩ sũ-bʋgsem dãmba na n sooga tẽngã, a sɩd ra gomda ne pʋ-peelem, la a tara tõog me n na n pids a kãabgã.—Matɩe 28:18.

Dẽnd bũmb ning sẽn pak masã wã yaa tõog n bãng kãab-kãngã sẽn na n pids to-to. Rũndã-rũndã, d sẽn gesẽ fãa, wõnda wa fãadbã la sɩlem dãmbã n nafd n yɩɩda. Bõe n na n kell sũ-bʋgsem dãmba sẽn na n wa  sooge? Sẽn paase, tẽngã tara zu-loe-kãsems wala tẽngã, koomã la pemsmã rẽgengo, la rat-tɩ-loog rãmbã ne mag-koees rãmbã sẽn zaeed a laogã. Rẽ yĩnga tẽngã na wa n tall bõn-sõng b sẽn tõe n soog sɩda? D kot-y lame tɩ y karem sõsg ning sẽn pʋgdã tɩ y na n yãa sogs-kãensã la a taab leoor sẽn tar yõodo.

[Foto, seb-neng a 3]

Bõn-sõng n sɩd gũud-yã: Y na n paam-a lame bɩ?