‘Nong-y taab wʋsgo’
‘Nong-y taab wʋsgo’
“Bɩ y nong taab wʋsg ne ba-biis nonglem.”—ROM DÃMBA 12:10.
1, 2. Zems-n-ta-bʋg buud la rũndã-rũndã misioneer a ye la tʋm-tʋmd a Poll tall ne b saam-biisã?
A DON sẽn yɩ misioneer yʋʋm 43 n zĩnd yaang tẽnsẽ wã, nebã ra mi-a-la wala ned sẽn da nong neb nins a sẽn da sõngdã hal wʋsgo. A sẽn wa n bẽed a yõor bãagã, neb nins a sẽn da zãms Biiblã sãnda yii kɩlometa tusa zĩigẽ n wa yeel-a woto: “Kamsahamnida, kamsahamnida!” Sẽn dat n yeel ne Koore buudã gomd tɩ “barka, barka!” A Don sẽn da tall nonglem ning ne-bã kẽe b sũur hal wʋsgo.
2 Neb a taab me la b ra pẽg wa a Don. Pipi kiris-nebã wakate, tʋm-tʋmd a Poll talla nonglem wʋsg ne neb nins a sẽn da sõngdã. A Poll da sakd n mongda a meng b yĩnga. Baa ne a sẽn da yaa ned sẽn da kɩs sɩd wʋsg ne a tẽebã, a leb n da yaa sũ-bʋgsem soab la a get neb a taabã yell “wa kom-bõoneg [ma] sẽn gũud bãmb ne nonglmã.” A ra gʋlsa Tesalonik tigingã n yeele: “Tõnd me sẽn nong yãmb wʋsga yĩnga, tõnd ka kõ yãmb Wẽnnaam Koe-nooga bal ye, tõnd kõo yãmb tõnd mens me n paase, tõnd sẽn nong yãmba yĩnga.” (1 Tesalonik rãmba 2:7, 8) Kaoosg poore, a Poll sẽn wa n yeel Efɛɛz saam-biisã tɩ b pa na n le yã yẽ neng yɛsã, “bãmb fãa yãba wʋsgo, n mobg a Poll n mok yẽnda.” (Tʋʋma 20:25, 37) Vẽenega, zood ning sẽn da be a Poll ne saam-biisã sʋkã ra pa tek b sẽn yaa tẽed-n-taasã bal ye. B ra nonga taab wʋsgo.
Nonglmã nens toɛy-toɛya
3. Biiblã pʋgẽ, gom-bi-bʋs n tar loees ne nonglmã?
3 Gʋlsg Sõamyã pʋgẽ, wʋm taab la nimbãan-zoeer tara loees wʋsg ne nonglmã sẽn yaa kiris-nebã zʋg ning sẽn ya-a kãseng n yɩɩdã. (1 Tesalonik rãmba 2:8; 2 Pɩɛɛr 1:7) Wala sãnem pɛɛlg bɩ diama wã nens sẽn maneg tɩ zems taab to-to n be rasãndã, zʋg-sõma kãensã fãa tʋmda ne taab n womd bi-sõmse. B pa kɩtd tɩ kiris-nebã pẽnegd taab bal ye, b kɩtdame tɩ b pẽnegd b saasẽ Ba wã me. Yaa rẽ n so tɩ tʋm-tʋmd a Poll da sagl a tẽed-n-taasã woto: “Bɩ nonglem zĩnd tɩ zãmbg kaẽ ye. . . . Bɩ y nong taab wʋsg ne ba-biis nonglem.”—Rom dãmba 12:9, 10.
4. ‘Nonglem wʋsgã’ võor yaa bõe?
4 Gɛrk gom-biig ning tʋm-tʋmd a Poll sẽn tũnug ne n yeel tɩ ‘nonglem wʋsgã’ tara nens a yiibu. Pipi soabã yaa zoodo, t’a a to wã yaa nonglem. Wala Biibl-mit a yembr sẽn bilgã, woto rat n yeelame “tɩ b segd n bãnga kiris-nebã n welg wala neb sẽn tar zems-n-taar ne taab hal sõma, la sẽn teend taab wa zak neba, nonglem sẽn be b sʋkã yĩnga.” Rẽ yĩnga yãmb tagsg yaa woto ne tẽebã pʋgẽ sãam-biisã la saam-bi-pogsã bɩ? Tigingã pʋgẽ, zems-n-taar la nonglem n segd n loe kiris-nebã ne taaba. (Galat dãmba 6:10) Rẽ n so tɩ Rom dãmb 12:10 yetẽ tɩ d “nong taab wʋsg ne ba-biis nonglem.” N-ye, kiris-nebã sẽn nong taabã pa a sẽn yaa bũmb sẽn zemsã yĩng bala, bɩ rẽ sẽn yaa tɩlae ne-bã yĩng ye. D segd n nonga “ba-biisã ne sɩda,” la d ‘nong taab wʋsg ne d sũyã fãa.’—1 Pɩɛɛr 1:22.
‘Wẽnnaam zãmsa tõnd tɩ d nong taaba’
5, 6. a) Wãn-wãn la a Zeova tũnug ne tigis-kãsems nins sẽn tigim tẽns wʋsg nebã n zãms a nin-buiidã kiris-neb nonglmã? b) Wãn-wãn la zood ning sẽn be saam-biisã sʋkã wat n paam pãnga?
5 Baa dũni kãngã pʋgẽ “neb wʋsg nonglem” sã n lebgda maasga, a Zeova zãmsda a nin-buiidã rũndã-rũndã ‘tɩ b nong taaba.’ (Matɩe 24:12; 1 Tesalonik rãmba 4:9) A Zeova Kaset rãmbã tigis-kãsems nins sẽn tigimd tẽns wʋsg nebã yaa wakat sẽn yaa kãseng b sẽn paamd zãms-kãngã. Tigis-kãsems kãens sasa, Kaset rãmb nins sẽn be b tẽngẽ wã segda b saam-biis nins sẽn yit zĩ-zãrsẽ wã, la bãmb wʋsg reegd-b-la b zagsẽ. Tigis-kãseng a yembr sẽn zĩnd sẽn nan pa kaoos sasa, Kaset rãmbã sẽn kẽngã kẽer yii tẽnsẽ nebã sẽn pa nong n wilgd b sũ-noog bɩ b sũ-sãang vẽeneg ye. Kiris-ned a yembr sẽn sõng nebã tɩ b paam ro-gãasã yeelame: “Saam-bi-kãensã sẽn wa n sig paalmã, b ra zoeta nebã. La rasem a yoob zugẽ b sẽn wa n na n kulã bãmb ne b gãag soben dãmbã mobga taab n kʋme. B pa na n tol n yĩm nonglem ning b sẽn tall ne taabã ye.” Baa ne d saam-biisã sẽn yitẽ fãa, d sã n deegd-b sãando, d paamda segb n na n maan taab neere.—Rom dãmba 12:13.
6 Yel-kãensã d sẽn yãt tigis-kãsemsẽ wã sɩd bee yamleoog wʋsgo, la kiris-neb sã n zĩnd ne taab n balem a Zeova yʋʋm wʋsgo, zems-n-taar sẽn tar pãng n wat n zĩnd b sʋka. D sã n mi d saam-biisã sõma, d tõe n nan-b lame n paas b zʋg-sõmã wã yĩnga. Wala makre, b pʋ-peelmã, d sẽn tõe n kɩs sɩd ne-b wakat fãa wã, b sõmblmã, b sẽn yaa kõtbã, b sẽn nand neb a taabã, b nimbãan-zoeerã la b sẽn pa get b mens yell balã. (Yɩɩl Sõamyã 15:3-5; Yelbũna 19:22) A Mark sẽn yɩ misioneer n zĩnd Afirik yaangã yeelame tɩ “f sã n lagem ne saam-biisã n tʋme, kɩtdame tɩ zood sẽn tar pãng zĩnd y sʋka.”
7. Bõe la tõnd segd n maan n dɩ kiris-neb nonglmã nafa tigingã pʋgẽ?
7 Sẽn na yɩl tɩ nonglem woto zĩnd tigingã pʋgẽ wakat fãa, a nebã segd n pẽnegda taaba. D sã n kẽnd tigissã wakat fãa, d paasda zood ning d sẽn tar ne d saam-biisã la d saam-bi-pogsã pãnga. D sã n wat tigissã, n sõsd ne taab sẽn deng tigissã la b poor la d kõt leoor tigissã sasa, d kengda taab raood la d nekd taab ratem, sẽn na yɩl tɩ d ‘nong taab la d maand tʋʋm sõma.’ (Hebre dãmba 10:24, 25) Etazĩni, kãsem soab a ye yeelame: “Mam tẽrame tɩ m sẽn da wa n nan yaa biigã, wakat fãa, tõnd zakã neb ra bee zags nins neb sẽn da kaoosd Rĩungã roogẽ tigissã poor n sõsd ne taab sõma n kengd taab tẽeb n yaool n kulã sʋka.”
Y segd n ‘paka y sũurã yaleng’ bɩ?
8. a) Bõe la a Poll sagl Korẽnt nebã tɩ b maane, a sẽn da wa n yeel-b tɩ b ‘pak b sũyã yalengã’? b) Bõe la tõnd tõe n maan tɩ nonglem wʋsg zĩnd tigingã pʋgẽ?
8 Sẽn na yɩl n wilg nonglem kãng zãnga, d segd n “paka” d sũurã yalengo. Tʋm-tʋmd a Poll da gʋlsa Korẽnt tigingã woto: “D laka d sũur zãng n wilg-yã. D sũurẽ wã, weer bee y yĩnga.” A Poll sagla bãmb me tɩ b ‘pak b sũurã yalengo.’ (2 Korẽnt dãmba 6:11-13, Sebr Sõngo) Yãmb me tõe n talla nonglem ne neb a taabã n paas bɩ? Y pa segd n gũ tɩ b reng n wilg b nonglem ne-y ye. A Poll lɛtr ning a sẽn tool Rom dãmbã pʋgẽ, a sẽn yeel-b tɩ b tall nonglem wʋsg ne taabã, a paasa sagl-kãngã: “Bɩ y waoog taaba.” (Rom dãmba 12:10) Sẽn na yɩl n waoog neb a taabã, y tõe n yãka yam n pʋʋsd-b tigissẽ wã. Y leb n tõe n bool-b lame tɩ b wa yi koe-moonegã ne-yã, wall y naag taab n segl tigisga. Rẽ maaneg paasda nonglem.
9. Bõe la saam-biis kẽer maan sẽn na yɩl n bao zood ne b tẽed-n-taasã n paase? (Paas-y makr toor-toor sẽn yit yãmb babgẽ wã.)
9 Tigingã pʋgẽ, zagsã neb la ned kam fãa tõe n ‘paka b sũyã yalengo,’ b sẽn na n tʋgd n kaagd taaba, tõe tɩ yaa b sẽn na n dɩ ne taab la b lagem taab n kok pemsem tɩ naf-ba. (Luk 10:42; 14:12-14) Wakat-wakate, a Hakop nong n tigimda neb a wãn tɩ b yit ne taab n kokd pemsem. A yeelame: “Kamb la kãsemb fãa naagdame, tɩ ned kam fãa wa lebg n kul ne sũ-noog a sẽn pa na n yĩm. Woto sɩd pẽnegd-b-la taaba.” D sẽn yaa kiris-nebã, d segd n maoome n da yɩ tẽed-n-taas bal ye, d segd n yɩɩ zo-rãmb hakɩk me.—3 Zã 14.
10. Bõe la d tõe n maane, d sã n wa tar yell ne d saam-biisã?
10 Baasg zãnga, pãn-komsmã tõe n kɩtame tɩ yɩl n bɩɩs zood la d tall nonglem ne neb a taabã pa nana ye. Bõe la d tõe n maane? Pipi, d tõe n pʋʋsa Wẽnnaam n kos t’a sõng-d tɩ d paam zems-n-taar ne d saam-biisã. Wẽnnaam sẽn dat t’a sõgen dãmbã tall zood ne taabã, a na n leoka pʋʋs-kãens d sẽn maand ne d sũur fãa wã. (1 Zã 4:20, 21; 5:14, 15) D segd n tʋmame tɩ zems ne d pʋʋsgã me. A Ric sẽn yaa kaagr yel-gɛt Afirik yaangã tẽra saam-biig a yembr sẽn da tar manesem sẽn yikd sũuri, tɩ rẽ kɩt t’a lagem-n-taar da yaa toogo. A Ric yeelame: “Wall tɩ m gil saam-biigã, mam yãka yam n na n bao n bãng-a sõma. M wa n bãngame t’a yãadmẽ wã, a ba wã weoog-a-la wʋsgo. Mam sẽn wa n bãng tɩ saam-biigã maoo hal wʋsg sẽn na yɩl n bas yel-kãngã, la m sẽn yã a sẽn tõog n toeem to-to wã, m nan-a-la wʋsgo. Tõnd lebga zo-rãmb hakɩka.”—1 Pɩɛɛr 4:8.
Pelgd-y y pʋs ne taaba
11. a) Bõe n yaa tɩlae sẽn na yɩl tɩ tiging neb ne taab nonglem tõog n paase? b) Bõe yĩng tɩ f sã n zãagd f meng ne nebã, tõe n yɩ yell ne-f tẽebã?
11 Rũndã-rũndã, neb wʋsg vɩɩ woto bal n pa baood n tall zood hakɩk ne ned ba a yembr ye. Ad woto sɩd yaa kaeto! Pa tɩlae tɩ manesem kãngã zĩnd kiris-neb tigingã pʋgẽ, la a pʋd n pa segd n zĩnd a pʋgẽ me ye. Saam-biir nonglem hakɩkã pa sõss sẽn be waoogr la manesem sõng tallg ne saam-biisã bal ye, a leb n pa f sẽn na n pʋʋsd saam-biisã n vẽgsd b nus ne goam ferrr n pa satẽ ye. D segd n sɩd pakda d sũurã wala a Poll sẽn maan to-to ne Korẽnt saam-biisã, tɩ d tẽed-n-taasã bãng tɩ b yell sɩd pak-d lame. Baa ne sẽn pa neba fãa n tõe n pẽneg b taabã nana-nana wã, f sã n zãagd f meng wʋsg ne nebã, rẽ me tõe n yɩɩ yelle. Biiblã keooga woto: “Sẽn ka rat n naag-a neb baooda sẽn noom a menga. Yẽ kɩɩsda yam sõama fãa.”—Yelbũna 18:1.
12. Bõe yĩng tɩ yẽsg yaa tɩlae sẽn na yɩl tɩ d tõog n pẽneg taab sõma tigingã pʋgẽ?
12 Zood hakɩk pʋgẽ, pelg f pʋg n yẽs ne f to tara yõod wʋsgo. (Zã 15:15) Tõnd fãa rata zo-rãmb d sẽn tõe n togs d sũur yɛl la d tagsgo. Sẽn paase, d sã n mi taab sõma, d tõe n gesa taab yell nana-nana. Tõnd sã n get taab yelle, nonglem wʋsg na n zĩnda tigingã pʋgẽ, la d na n pidsa a Zezi gom-kãensã: “Sẽn kõta sũ-noog yɩɩda sẽn deegd-a.”—Tʋʋma 20:35, Sebr Sõngo; Filip rãmba 2:1-4.
13. Bõe la d tõe n maan n wilg d saam-biisã tɩ d sɩd nong-b lame?
13 Sẽn na yɩl tɩ nonglem ning d sẽn tar ne nebã tall yõod wʋsgo, d segd n wilg-a-la vẽenega. (Yelbũna 27:5) Tõnd sã n tar nonglem hakɩk ne nebã, na n pukda d nen-wamdã zugu, la rẽ tõe n kɩtame tɩ neb a taabã me tall nonglem ne-do. Biiblã yel-bũnd a yembre yeelame tɩ “ned sã n yõgemd a noor ne foom, kõta foom sũ-noogo.” (Yelbũna 15:30) D sã n maan neb a taabã yel-sõmde, rẽ me kɩtdame tɩ nonglem wʋsg zĩndi. Baa ne nonglem hakɩkã sẽn pa bũmb b sẽn daadã, f sã n kõ ned kũun ne f sũur fãa, tõe n kɩtame tɩ f paam a soabã zoodo. Kart postalle, lɛtr la ‘goam b sẽn togs a wakat’ yaa manesem toor-toor f sẽn tõe n tũnug ne n wilg f nonglem wʋsgo. (Yelbũna 25:11; 27:9) D sã n paam neb a taabã zoodo, d segd n kell n wilgda ne d manesmã tɩ d sɩd nong-b lame. Sẽn yɩɩd fãa, d zo-rãmbã sã n wa rat sõngre, d na n sõng-b lame. Biiblã yeelame tɩ “tũud-n-taag hakɩk nonga wakat fãa, la a yaa saam-biig sẽn dog toog wakat yĩnga.”—Yelbũna 17:17, NW.
14. Bõe la d tõe n maane, d sã n pẽnegd ned tɩ wõnd a pa rat d zoodo?
14 Yaa vẽeneg tɩ d pa na n tõog n paam neba fãa zood tigingã pʋgẽ ye. Sãmbg sẽn kae, saam-biis kẽer n be d sẽn na n pẽ ne n yɩɩda. Woto yĩnga, ned sã n wa wõnd a pa rat y zood wala y sẽn tʋll to-to wã, bɩ y ra yɩ tao-tao n tags tɩ yell n be ne yãmb bɩ ne yẽ soabã ye. Ra pẽdg-y n na n bao nin-kãng soab zood me ye. Y sã n kell n tall zood manesem ne-a wa y sẽn tõe tɛka, y kõt-a-la weer t’a tõe n wa yɩ y zoa.
“Mam nonga foom ne m sũur fãa zãnga”
15. Pãn-tusd-bʋg la pẽgr wall pẽgr kaalem tõe n tall neb a taabã zutu?
15 Ad a Zezi sũur sɩd da segd n yɩɩ noog a lisgẽ wã, a sẽn wa n wʋm koɛɛg sẽn yi saasẽ sẽn yeel-a woto wã: “Mam nonga foom ne m sũur fãa zãnga.” (Mark 1:11) Gom-kãensã segd n da kɩtame t’a Zezi kɩs sɩd n paas t’a Ba wã sɩd ra nong-a lame. (Zã 5:20) Zu-bʋko, neb kẽer zɩ n wʋm neb nins bãmb sẽn waoogd la b nongẽ wã sẽn pẽgd-b ye. Bi-pugl yʋʋr sẽn boond t’a Ann yeelame: “Kamb wʋsg wala maam pa tar neb b roagdbã sʋk sẽn sakd b tẽebã ye. D yiyã, d sẽn wae n wʋmdẽ yaa wɩdg woo wɩdg bala. Woto sãamda d sũuri.” Baasg zãnga, kom-kãens sã n wa lebg tigingã neba, b paamda tẽeb zaka, ba rãmb la ma rãmba, saam-biis la saam-bi-pogs sẽn nong-b la b teend-b tẽebã pʋgẽ.—Mark 10:29, 30; Galat dãmba 6:10.
16. Bõe yĩng tɩ pa sõma tɩ d sãbg modgr ning neb a taabã sẽn maandã?
16 Buud kẽer pʋsẽ, roagdbã, nin-kẽembã la karen-saam dãmbã pa wae n pẽgd kambã wʋsg ye, bala b tagsdame tɩ rẽ tõe n wa kɩtame tɩ biig maan tɩ yõsg wall a wuk a menga. Tags-kãensã buud tõe n kẽe kiris-nebã zags la tigingã pʋgẽ menga. Kãsembã sã n wa gomd ne biig sõsg a sẽn maan tigingã pʋgẽ bɩ bũmb a to a sẽn tõog n maan wɛɛngẽ, tõe tɩ b na n yeelame: “Yɩɩ sõma, la nindaar bɩ f modg tɩ yɩɩg woto.” Bɩ tõe tɩ b na n wilga biigã b sũ-pa-noaang ne manesem a to. Wʋsg tẽedame tɩ rẽ sõngda kambã tɩ b maan b sẽn tõe tɛka. La naoor wʋsgo, rẽ tõe n kɩtame tɩ kambã bas modgr nins b sẽn maandã, wall b tagsdẽ tɩ b pa tõe n maan tɩ yɩ sõma ye.
17. Bõe yĩng tɩ d segd n bao n pẽg neb a taabã?
17 Baasg zãnga, d pa segd n tags tɩ yaa f sẽn wat n dat n sagl ned bal la f segd n pẽg-a ye. B sã n pẽg ned ne pʋ-peelem, kɩtdame tɩ nonglem wʋsg zĩnd zakã la tigingã pʋgẽ, la rẽ kɩtdame tɩ kambã tʋgd n baood sagls saam-biisã la saam-bi-pogs nins sẽn tar minimã nengẽ. Woto yĩnga, d manesmã ne neb a taabã pʋgẽ, bɩ d bas d buudã minungã, la d ‘yeelg nin-paalgã wa fuugu, nin-paalg ning Wẽnnaam sẽn naan wa a sẽn data, tɩrlem la sõmblem sɩd sẽn wat ne wã.’ D pẽg neb a taabã wa a Zeova sẽn maandã.—Efɛɛz rãmba 4:24, Kãab-paalgã Koe-noogo.
18. a) Kom-bɩɩse, bõe la y segd n tags sagls nins kãsembã sẽn kõt-yã wɛɛngẽ? b) Bõe yĩng tɩ nand tɩ b sagl neda, kãsembã tagsdẽ la b pʋʋsd rẽ yĩnga?
18 Sẽn paase, kom-bɩɩse, kãsemba sã n wa kibl-y wall b sagl-y bɩ y ra yɩ tao-tao n yeel tɩ b pa nong-y ye. (Koɛɛg Soaba 7:9) B sɩd nong-y lame! Yaa yãmb yell sẽn pak-bã, la b sẽn nong-y wʋsgã yĩng la b sẽn sagend-yã. Sã n pa rẽ, bõe yĩng tɩ b na n maan modgr n gom ne-y yellã zugu? Kãsembã, la sẽn yɩɩd fãa tigingã kãsem dãmb sẽn mi goam sẽn tõe n tall pãn-tusdg ningã, naoor wʋsgo, nand tɩ b sagl neda, b rɩkda sẽk sõma n tags la b pʋʋse, bala yaa neer bal la b rat n maane.—1 Pɩɛɛr 5:5.
A Zeova “pida ne nonglem”
19. Bõe yĩng tɩ neb nins sũy sẽn da zoe n sãamã tõe n teeg a Zeova t’a sõng-ba?
19 Neb kẽer sẽn da tall nonglem wʋsg ne neb pĩnd tɩ baas wẽng tõe n wa tagsdame tɩ nonglem wʋsg tallg ne ned baasda ne sũ-sãams bala. Yɩl tɩ bãmb rãmbã ye pak b sũur ne neb a taabã, rẽnd b tall raood la tẽeb wʋsgo. La b pa segd n yĩm t’a Zeova “ka zãr ne tõnd fãa ye.” A yet-d lame tɩ d kolg-a. (Tʋʋma 17:27; Zak 4:8) A wʋmda tõnd sẽn pa rat n paam sũ-sãamsã võore, la a kãabame t’a na n teel-d lame la a sõng-do. Yɩɩl-gʋlsd a Davɩɩd kõt-d-la bas-m-yam woto: “Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã.”—Yɩɩl Sõamyã 34:19 .
20, 21. a) Wãn to la d mi tɩ d tõe n paama zood ne a Zeova? b) Bõe la d segd n maan sẽn na yɩl n paam zood ne a Zeova?
20 Zood ning sẽn tar yõod n yɩɩd tõnd sẽn tõe n bao n paamã yaa zood ne a Zeova. La woto yaa bũmb sẽn sɩd tõe bɩ? N-ye. Biiblã sɩd gomda rap la pagb sẽn yɩ nin-tɩrs sẽn da pẽ d saasẽ Ba wã sõma yelle. B gʋlsa nin-kãens goamã sẽn kẽed sũurã sẽn na yɩl n kõ-d bas-m-yam tɩ tõnd me tõe n pẽnega a Zeova.—Yɩɩl Sõamyã 23, 34, 139; Zã 16:27; Rom dãmba 15:4.
21 Neba fãa tõe n pidsa bũmb nins a Zeova sẽn baood sẽn na yɩl n tall zood ne yẽ wã. A Davɩɩd ra soka woto: “Zusoaba, ãnda n na n sig yãmb zãndẽ? Yaa ned ninga sẽn kẽnd ne pʋ-peelem la a maand tɩrga la a gomd sɩd ne a sũur fãa.” (Yɩɩl Sõamyã 15:1, 2; 25:14) D sã n neẽ tɩ Wẽnnaam raabã maaneg womda bi-sõma la kɩtdẽ tɩ d paamd a sor-wilgr la a koglgo, d wat n bãngame t’a Zeova “pida ne nonglem.”—Zak 5:11, Kãab-paalgã Koe-noogo.
22. Zems-n-ta-bʋg buud la a Zeova rat t’a nin-buiidã tall ne taaba?
22 A Zeova sẽn sakd tɩ ninsaalb sẽn pa zems zãng tõe n yɩ a zo-rãmbã sɩd yaa bark n kõ-do! Rẽ pa segd n kɩt tɩ d tall nonglem wʋsg ne taab sɩda? Ne a Zeova sõngre, tõnd ned kam fãa tõe n sõng n kɩtame tɩ nonglem wʋsg sẽn yaa kiris-neb hakɩkã bãndã zĩndi, la a rɩ a nafa. Wẽnnaam Rĩungã naam sasa, tẽngã zugu, ned kam fãa na n talla nonglem ne neb a taabã wakat sẽn kõn sa yĩnga.
Y tõe n wilgame bɩ?
• Nebã ne taab manesem segd n yɩɩ wãn to kiris-neb tigingã pʋgẽ?
• Wãn to la tõnd ned kam fãa tõe n kɩt tɩ nonglem zĩnd tigingã pʋgẽ?
• Wãn-wãn la pẽgr hakɩk kɩtd tɩ nonglem zĩnd kiris-nebã ne taab sʋka?
• Wãn to la a Zeova sẽn nong-d wʋsgã teend tõnd la kẽngd d raoodo?
[Zãmsgã sogsgã]
[Foto rãmba, seb-neng 30, 31]
Y tõe n ‘paka d sũurã yaleng’ n nong neb a taabã bɩ?