Wãn-wãn la sũ-maasem dãmba na n soog tẽngã?

“TÕE tɩ y mi a Zezi goam nins sẽn wilgd tɩ “sũ-maasem dãmba na n sooga dũniyã” hal sõma. Sɩd yaa goam sẽn kẽed sũur wʋsgo. La d sã n ges bũmb nins fãa nebã sẽn maand taabã la b sẽn maand tẽngã, yãmb tagsdame tɩ bõe n na n kell tẽngã zug sũ-maasem bɩ sũ-bʋgsem dãmbã sẽn na n wa sooge?”—Matɩe 5:5; Yɩɩl Sõamyã 37:11

A Myriam sẽn yaa a Zeova kaset soabã, tũnuga ne sok-kãngã n sɩng sõsg sẽn tik Biiblã zugu. Rao ning a sẽn da sõsd ne wã leokame tɩ sã n yaa a Zezi n kãab woto, yaa vẽeneg tɩ bõn-sõms na n kella tẽngã zug sũ-bʋgsem dãmbã sẽn na n wa sooge. Tẽngã pa na n wa yɩ zĩig b sẽn sãam tɩ ned pa tõe n zĩnd a zug ye.

Sãmbg sẽn ka be, leok-kãngã ra wilgdame tɩ saagr beeme. La d tara bʋʋm n na n tẽ tɩ na n sɩd yɩɩ woto bɩ? Hakɩka d sɩd tõe n tẽeme, bala Biiblã kõt-d-la bʋʋm wʋsg tɩ d tõe n tẽ tɩ kãab-kãngã na n pidsame tɩ sik kaẽ ye. Sɩd-sɩda, kãab-kãngã pidsgã tara loees wʋsg ne raab ning Wẽnnaam sẽn tar ne ninsaalbã la ne tẽngã. La b kõ-d-la bas-m-yam tɩ Wẽnnaam sẽn dat n maan bũmb ninga fãa na n tõogame. (Ezai 55:11) Sã n yaa woto, yaa raab bʋg la Wẽnnaam da tar ne ninsaalbã sɩngrẽ wã, la wãn to la raab-kãng na n pidsi?

Wẽnnaam daab ne tẽngã wakat fãa yĩnga

Wẽnnaam a Zeova naana tẽngã raab takɩ yĩnga. “Yaa Zusoabã n naan saasã. Bãmb yaa Wẽnnaam. Yaa bãmb n naan dũniyã. Bãmb yẽbg-a lame. Bãmb ka naan-a t’a lebg zaalem ye. Bãmb naan-a lame tɩ neb zĩnd a zugu. Bãmb yeelame: ‘Mam yaa Zusoaba, zu-soab a to ka be ye.’ ” (Ezai 45:18) Dẽnd Wẽnnaam naana tẽngã sẽn na yɩl tɩ neb zĩnd a zug bala. Sẽn paase, a ratame tɩ ninsaalb vɩɩmd tẽngã zug wakat sẽn kõn sa. A “yẽbga dũniyã a yẽgr zugu; a kõn tol n dĩms abada.”—Yɩɩl Sõamyã 104:5; 119:90.

Wẽnnaam sẽn tar daab ning ne tẽngã leb n yaa vẽeneg me tʋʋmd ning a sẽn da kõ pipi raoã ne a pagã pʋgẽ. A Zeova ra yeela a Ãdem ne a Hawa “tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” (Sɩngre 1:28) Tẽng ning Wẽnnaam sẽn da kõ a Ãdem ne a Hawa wã ra segd n yɩɩ bãmb ne b yagensã zĩndg zĩig wakat sẽn kõn sa yĩnga. Yʋʋm kobs loogr poore, yɩɩl-gʋlsdã yeelame tɩ “saasẽ yaa Zusoabã n so,  la [a] kõo ninsaalbã [tẽngã].”—Yɩɩl Sõamyã 115:16.

Sẽn na yɩl tɩ saag-kãngã sẽn be rasãndã tõog n pidsi, a Ãdem ne a Hawa la b yagensã ra segd n saka Wẽnnaam a Zeova sẽn yaa Naand la vɩɩmã Kõt la b Soaalã la b tũud a noyã ne yamleoogo. A Zeova togs-b-la rẽ vẽenega, bala a kõo raoã noor n yeele: “Fo tõe n yãgsa tɩɩsa fãa sẽn be zẽeda zĩigẽ wã biis n dɩ, la ra sak n yãk sõama ne wẽng bãngr tɩɩga biis n dɩ ye. Tɩ bõe, fo sã n dɩ a biisa daare, fo sɩd na n kiime.” (Sɩngre 2:16, 17) A Ãdem ne a Hawa sã n da rat n kell n vɩɩmd Edɛn zẽedẽ wã, b ra segdame n sak no-kãngã sẽn da yaa nana la vẽenegã. B sã n da sakẽ a noorã, rẽ ra na n wilgame tɩ b tara mi-beoog ne d saasẽ Ba wã bũmb nins fãa a sẽn maan n kõ-bã yĩnga.

A Ãdem ne a Hawa sẽn kɩɩs Wẽnnaam sẽn da kõ-b noor ningã ne yamleoogã, sɩd-sɩda, b tõdga ned ning sẽn kõ-a bãmb bũmb nins fãa b sẽn da tarã. (Sɩngre 3:6) B sẽn maan woto wã, b konga arzãnã sẽn da yaa b vɩɩm zĩig n be rasãnd wʋsgã, la b kɩt tɩ b yagensã me kong-a. (Rom dãmba 5:12) La pipi raoã ne a pagã kɩɩsg gɩdga raab ning Wẽnnaam sẽn da yãk a sẽn wa n naand tẽngã bɩ?

Wẽnnaam pa toeem ye

Wẽnnaam tũnuga ne a no-rɛɛs a Malaki n yeele: “Mam yaa [a Zeova,] mam ka tek ye.” (Malaki 3:6) Fãrens Biibl mit a Louis Fillion wilgame tɩ verse kãngã tara loees wʋsg ne Wẽnnaam kãabsã pidsgu. A gʋlsa woto: “A Zeova ra tõe n sãama a nin-buiidã sẽn da yaa tõtbã, la a sẽn pa toeemd a kãabsã yĩnga, baa sẽn sõs n yɩla, a na n pidsa bũmb ning a sẽn da kãab pĩndã.” Wẽnnaam kãabsã, yaa ned tɩ yaa tẽng tõre, bɩ ninsaalbã fãa la a kãab bũmb me, a pa na n yĩm ye. A na n pids-b-la wakat ning a sẽn yãkã. “Bãmb tẽegda b kãabga yell wakat fãa, bãmb noor goama yaa zãmaan tusr yĩnga.”—Yɩɩl Sõamyã 105:8.

Wãn-wãn la d tõe n sɩd tall bas-m-yam t’a Zeova pa toeem daab ning a sẽn da sɩng n tar ne tẽngã? D tõe n sɩd talla bas-m-yam ne rẽ, bala, Biiblã sẽn yaa Wẽnnaam Gomd a sẽn vẽneg tɩ b gʋlsã babs fãa pʋgẽ, d yãta b sẽn gʋls tɩ Wẽnnaam na n kõo tẽngã ãdem-biis nins sẽn yaa sakdbã tɩ b sooge. (Yɩɩl Sõamyã 25:13; 37:9, 22, 29, 34) Sẽn paase, Gʋlsg Sõamyã bilga neb nins a Zeova sẽn barkã n yeel tɩ b zĩi laafɩ, la tɩ b ned kam fãa zĩi a ‘viyn tɩɩg ne a kankang  tẽngr tɩ ned ka yɛɛsd-b ye.’ (Miise 4:4; Ezekɩɛll 34:28) Neb nins a Zeova sẽn yãkã “na n mee zags n zĩnd b pʋsẽ. Bãmb na n sela tɩɩse n dɩ b biisã.” Laafɩ na n zĩnda bãmb ne we-rũmsã sʋk menga.—Ezai 11:6-9; 65:21, 25.

Bũmb a to la b wilg Biiblã pʋgẽ tɩ yaa bũmb ning Wẽnnaam sẽn kãab tɩ watẽ wã reng-n-lɛmbga. Rĩm a Salomo naamã wakate, Israɛll soolmã talla laafɩ la arzɛka. Wakat kãnga, “laafɩ zĩnda Zida ne Israɛll tẽnsa pʋsẽ sẽn sɩng ne Dan hal n tɩ ta Beer-Seba, tɩ ned kam fãa so a viyn tɩɩg ne a kankanga n zĩ a tẽngre a Salomo yõor tɛka.” (1 Rĩm dãmba 5:5) Biiblã yeelame t’a Zezi ‘yɩɩda a Salomo,’ tɩ yɩɩl-gʋlsdã sẽn da wa n gomd a Zezi naamã yell bãngr-gomd pʋgẽ wã yeel tɩ ‘tɩrlem na n toba yẽ zãmaanẽ la laafɩ wʋsg na n zĩnda hal tɩ ta kiuug sɛɛbo.’ Wakat kãnga, ‘ki wʋsg na n zĩnda soolmã pʋgẽ. A na n miima tãensã zutu.’—Luk 11:31; Yɩɩl Sõamyã 72:7, 16.

Wẽnnaam a Zeova sẽn pidsd a gomd fãa wã pa na n kõ tẽngã neb nins a sẽn kãab-a wã bal ye, a na n kɩtame me t’a ye lebg zĩ-neer wala a sẽn da yaa to-to sɩngrẽ wã. Wẽnnaam Gomdã yeta tõnd Wilgr 21:4 pʋgẽ tɩ dũni paalg ning b sẽn kãab tɩ watẽ wã pʋgẽ, Wẽnnaam “na n yẽesa nintãmã fãa t’a ra le zĩnd [nebã] ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.” Bũmb ning b sẽn kãabã pa bũmb a to n zʋʋg arzãn ye.—Luk 23:43.

Y sẽn tõe n paam bũmb ning b sẽn kãabã to-to

Yaa goosneema sẽn na n zĩnd saasẽ n dɩ naam tẽngã zug n na n toeem tẽngã t’a lebg arzãnã. Goosneem kãng yaa Rĩung t’a Rĩmã yaa a Zezi Kirist. (Matɩe 6:9, 10) Rĩung kãng na n deng n ‘sãama neb nins sẽn sãamd tẽngã.’ (Wilgri 11:18; Daniɛll 2:44) Rẽ poore, a Zezi Kirist sẽn yaa “Laafɩ-naaba” na n pidsa bãngr-gom-kãensã: “Yẽ soolem paadame, la a laafɩ ka be tɛk ye.” (Ezai 9:5, 6) Rĩung kãng naamã rɩɩb wakate, neb milyõ rãmba, n paas neb nins b sẽn na n vʋʋgã na n paam n sooga tẽngã.—Zã 5:28, 29; Tʋʋma 24:15.

Ãnd dãmb n na n wa paam bõn-kãngã sẽn be yamleoog woto wã? A Zezi yeelame: “Bark bee sũ-maasem dãmba zutu, tɩ bõe,  bãmb na soog dũniyã.” (Matɩe 5:5) La yɩ sũ-maasem soab bɩ sik-m-meng soabã rat n yeelame tɩ bõe? B nong n yetame tɩ ‘sik-m-meng’ bɩ “sũ-maasem soab” yaa nin-sõngo, maan-tɩ-zems la sulg-m-meng soaba, la ned sẽn pa nong goamã. La Gɛrk gom-biig ning b sẽn tũnug ne ka wã võor tagem yɩɩda woto. A William Barclay yeela a sebr a ye pʋgẽ (New Testament Wordbook) tɩ “sũ-bʋgsem soab yaa ned sẽn tar pãng wa kutu.” A wilgda ned yam bɩ a sũurã halhaal sẽn kɩt t’a tõe n tall sũ-mar wẽng b sẽn maan-a taoor n pa kẽk a sũuri, bɩ n pa tags a na maan n lebs ye. Rẽ fãa ya a soabã sẽn tar zems-n-taar ne Wẽnnaamã yĩnga, tɩ rẽ kõt-a pãngã.—Ezai 12:2; Filip rãmba 4:13, Sebr Sõngo.

Sũ-bʋgsem soab sikda a meng n sakd Wẽnnaam noyã a vɩɩmã nens fãa pʋsẽ. A pa pẽdgd n dat bal n tũ yẽ mengã bɩ neb a taab tagsg ye. A leb n yaa ned b sẽn tõe n zãms nana-nana la sẽn sakd t’a Zeova zãms-a. Yɩɩl gʋlsd a Davɩɩd ra gʋlsame: “[A Zeova] tallda sik-m-mens rãmba tɩrlem pʋgẽ n zãmsd bãmb b sore.”—Yɩɩl Sõamyã 25:9; Yelbũna 3:5, 6.

Yãmb na n zĩnda “sik-m-mens rãmbã” sẽn na n soog tẽngã sʋk bɩ? Y sã n bao n bãng a Zeova la a raabã n modgd n zãmsd a Gomdã sõma la y tũud bũmb ning y sẽn zãmsdã, y me tõe n saagame tɩ y na n wa zĩnda tẽng zug arzãnẽ n vɩɩmd a pʋgẽ wakat sẽn-kõn-sa.—Zã 17:3.

[Foto, seb-neng a 5]

Wẽnnaam daabã ne tẽngã yaa vẽeneg tʋʋmd ning a sẽn kõ pipi raoã ne a pagã pʋgẽ

[Foto, seb-neng a 6, 7]

Laafɩ la bãan ning sẽn zĩnd a Salomo naamã wakatã yaa bũmb ning Wẽnnaam sẽn kãabã reng-n-lembga

[Fotã sẽn yitẽ]

Piisã la tãngã foto: Pictorial Archive (Near Eastern History) Est.; Araab rãmbã widpeelgo: Hai-Bar, Yotvata, Israel; Ka-koaadã sẽn koodã: Garo Nalbandian

[Foto, seb-neng a 7]

Yãmb na n zĩnda tɩrlem dũni paalg ning sẽn watã pʋgẽ bɩ?