B namsd-b-la b tẽebã yĩnga, la b tara sũ-noogo
B namsd-b-la b tẽebã yĩnga, la b tara sũ-noogo
“[Sũ-noog rãmb la yãmba, NW ] neb sẽn na n gom yãmb wẽnga, la b nams yãmba, la b sãbs yãmb mam yĩnga.”—MATƖE 5:11.
1. Bas-m-yam bʋg la a Zezi kõ a karen-biisã, sũ-noogã la namsgã wɛɛngẽ?
A ZEZI sẽn tʋm a tʋm-tʋmdbã pipi tɩ b tɩ moon Rĩungã, a keoog-b lame tɩ b na n sega kɩɩsgo. A yeel-b-la woto: “Neba fãa na n kisga yãmb mam yʋʋrã yĩnga.” (Matɩe 10:5-18, 22) La sẽn deng rẽ, a Tãng zug Zãmsgẽ wã, a kõo a tʋm-tʋmdbã la neb a taab bas-m-yam tɩ pa tɩlae tɩ namsg a woto sãam b sũ-noogã ye. A Zezi pʋd n wilgame tɩ nebã sã n nams tõnd d sẽn yaa kiris-nebã yĩnga, segd n kõ-d-la sũ-noogo. Wãn to la namsg tõe n kõ ned sũ-noogo?
Namsgo, tɩrlmã yĩnga
2. Sã n yaa ne a Zezi la tʋm-tʋmd a Pɩɛɛre, yaa nams-bʋg buud n kõt sũ-noogo?
2 Bʋʋm a nii soab sẽn kõt sũ-noog a Zezi sẽn togsã yaa: “[Sũ-noog rãmb la neb ninsi, NW ] neb sẽn namsd bãmb tɩrlem yĩnga, tɩ bõe, [saasẽ] soolem yaa bãmb dẽnda.” (Matɩe 5:10) Namsg meng woto wã ka nafr ye. Tʋm-tʋmd a Pɩɛɛr gʋlsame: “Tɩ bõe, yãmb sã n nams y kongr yĩng n deeg ne sũ-mare, ada bee waoogr bɩ? La yãmb sã n maan tʋʋm sõama n nams yõwã yĩng la y reeg ne sũ-mare, ada bee bark Wẽnnaam taoore.” La a paasa woto: “Bɩ yãmb ned ba a yembr da paam namsgo yẽ sẽn yaa nin-kʋʋda walla wagdre walla nin-wẽnga walla yel-dãmbd yĩng ye. La ned sã n paam namsg a sẽn yaa Kirist neda yĩnga, bɩ a ra zoe yãnd ye, la bɩ a pẽg Wẽnnaam yʋ-kãng yĩnga.” (1 Pɩɛɛr 2:20; 4:15, 16) Sã n yaa ne a Zezi goamã, namsgã wata ne sũ-noogo, sã n mik tɩ yaa tɩrlmã yĩng la f namsda.
3. a) Paam namsg tɩrlmã yĩng rat n yeelame tɩ bõe? b) Bõe la namsgã maan pipi kiris-nebã?
3 Tɩrlem hakɩkã yaa f sẽn na n sakd Wẽnnaam daabã la a noyã. Rẽnd nams tɩrlem yĩng rat n yeelame tɩ f na n paama namsgo, f sẽn pa na n sak n kɩɩs Wẽnnaam noyã yĩnga. Zʋɩf rãmbã tũudum taoor dãmb namsa tʋm-tʋmdbã, b sẽn zãgs tɩ b kõn bas a Zezi yʋʋrã yĩng moonegã. (Tʋʋma 4:18-20; 5:27-29, 40) Rẽ sãama b sũ-noogã bɩ yalsa b moonegã bɩ? Abada! “Tʋm-tʋmdba yii karenga bʋ-kaoodba sʋk ne sũ-noogo b sẽn zems tɩ paam namsg a Zezi yʋʋra yĩngã. La daar fãa Wẽnnaam dooga pʋgẽ ne dot pʋsẽ bãmb zãmsa neba la b moon a Zezi Kirist koe-noogã n ka bas ye.” (Tʋʋma 5:41, 42) B sẽn nams b tẽebã yĩng woto wã kõ-b-la sũ-noog la paas b yẽesmã moonegã tʋʋmdẽ. Kaoosg poore, Rom dãmbã namsa pipi kiris-nebã, b sẽn zãgs tɩ b kõn balem Rom soolmã naab wa Wẽndã yĩngã.
4. Yɛl kẽer bʋs yĩng n kɩt tɩ b namsd kiris-nebã?
4 Tõnd wakatã, b namsa a Zeova Kaset rãmbã, b sẽn zãgsd tɩ b kõn bas “Wẽnnaam soolem koe-noog kãngã” wã moonegã yĩnga. (Matɩe 24:14) B sã n yiis noor n gɩdg kiris-nebã tɩ b ra maan b tigissã, b sakame n na n namse, la b pa basd taab tiging ye, bala Biiblã n kõ noor tɩ b tigim taaba. (Hebre dãmba 10:24, 25) B namsda kiris-nebã, b sẽn pa kẽesd b toog dũniyã yɛlẽ wã, bɩ b sẽn zãgsd tɩ b kõn deeg zɩɩmã yĩnga. (Zã 17:14; Tʋʋma 15:28, 29) Baasg zãnga, Wẽnnaam nin-buiidã sẽn teend tɩrlmã, kɩtdame tɩ b yamã gãe bãan la kõt-b sũ-noog rũndã-rũndã.—1 Pɩɛɛr 3:14.
B sãbg-b-la Kirist yĩnga
5. Bõe yĩng la b sẽn namsd a Zeova nin-buiidã rũndã-rũndã wã?
5 Bʋʋm a wae soab sẽn kõt sũ-noog a Zezi sẽn togs a Tãng zug Zãmsgẽ wã me tɩ loee ne namsgã b tẽebã yĩnga. A togsame: “[Sũ-noog rãmb la yãmba, NW ] neb sẽn na n gom yãmb wẽnga, la b nams yãmba, la b sãbs yãmb mam yĩnga.” (Matɩe 5:11) Bũmb ning sẽn kɩt t’a Zeova nin-buiidã paamd namsgã yaa b sẽn pa dũni wẽngã rẽndã yĩnga. A Zezi yeela a karen-biisã woto: “Yãmb sã n yaa dũniyã rẽnda, dũniyã na nong a meng rẽnda. La yãmb ka dũniyã rẽnd ye, la mam tũusa yãmb dũniyã neba sʋka; yaa woto n kɩt tɩ dũniyã kis yãmba.” (Zã 15:19) Tʋm-tʋmd a Pɩɛɛr me togsame: “A linga bãmb yãmb sẽn ka le magd ne bãmb n maand wẽng woto wã, la bãmb gomda yãmb wẽnga.”—1 Pɩɛɛr 4:4.
6. a) Bõe yĩng tɩ kiris-neb nins sẽn zaeyã sẽn ket tẽng zugã ne b tũud-n-taasã paamd sãbgr la namsgo? b) Sãbg-kãng boogda tõnd sũ-noogã bɩ?
6 Tõnd zoe n yãame tɩ pipi kiris-nebã paama namsgo, b sẽn zãgs tɩ b kõn bas a Zezi yʋʋrã yĩng moonegã. Kirist bobla a karen-biisã tʋʋm-kãngã: “La yãmb na n yɩɩ mam kaset dãmb . . . dũniyã tɛk fãa.” (Tʋʋma 1:8) Kirist saam-biis nins sẽn yaa wẽn-sakdb sẽn paam vʋʋsem sõng zaeeb n ket tẽng zugã sẽn paamd ‘kʋʋng kãsengã’ sẽn yaa b tũud-n-taasã sõngrã, pidsda tʋʋm-kãngã ne yẽesem. (Wilgri 7:9) Woto kɩtame t’a Sʋɩtãan zabd ne “paga [sẽn yaa Wẽnnaam saasẽ siglgã] yagensa sẽn kellã la sẽn sakd Wẽnnaam noore la sẽn tar a Zezi kasetã.” (Wilgri 12:9, 17) Tõnd sẽn yaa a Zeova Kaset rãmbã, d kõta kaset a Zezi sẽn yaa Wẽnnaam Rĩungã Rĩm sẽn dɩt naam masã wã zugu. Yaa Rĩung kãng sẽn yaa goosneemã n na n sãam ninsaalbã goosneema rãmba, tɩ b bas zĩig n kõ Wẽnnaam dũni paalgã sẽn yaa tɩrgã. (Daniɛll 2:44; 2 Pɩɛɛr 3:13) Woto kɩtame tɩ b sãbgd tõnd la b namsd tõndo. La d tara sũ-noogo, d sẽn namsd Kirist yʋʋrã yĩngã.—1 Pɩɛɛr 4:14.
7, 8. B rõda pipi kiris-nebã bõe?
7 A Zezi yeelame t’a karen-biisã segd n gesa b mens wa neb sẽn tar sũ-noogo, baa nebã ‘sã n gom bãmb wẽng’ yẽ yĩnga. (Matɩe 5:11) Sɩd yɩɩ woto ne pipi kiris-nebã. B sẽn wa n ning tʋm-tʋmd a Poll bãens roog Rom yʋʋmd 59-61 wã sẽnẽ, Zʋɩf rãmbã taoor dãmb sẽn da be be wã yeela kiris-nebã wɛɛngẽ tɩ: “Tõnd mi tɩ neb nins fãa sẽn sakd kareng kãngã paamda kɩɩsg zĩiga fãa.” (Tʋʋma 28:22) B ra yeelame t’a Poll ne a Sɩlas ra ‘rãmbda dũniyã,’ n ‘kɩɩsd Sezaar tõogo.’—Tʋʋma 17:6, 7.
8 Pĩnd yɛl mit a Latourette gʋlsa kiris-nebã sẽn da be Rom soolmã naam wakatã wɛɛngẽ n yeele: “Rõdgã ra yaa buud toor-toore. B sẽn da zãgsd tɩ b kõn naag n maan kɩfen dãmbã yɛlã yĩnga, b ra yetame tɩ kiris-nebã yaa wẽnd kae rãmba. B sẽn da pa sakd n maan wa neb a taabã, wala makre kɩfen dãmbã kibs rãmba la zãma sʋk reemã, . . . b ra get-b-la wa neb sẽn kis ãdem-biisã. . . . B ra yetame tɩ b rapã la b pagbã segda taab yʋng . . . n yoaada. . . . [Kirist kũumã Tẽegr] sẽn da yaa tẽedbã bal n maandã yĩnga, b yelga kɩbar tɩ kiris-nebã ra rɩkda biig n maan maoong wakat fãa n dɩt a zɩɩmã la a nemdã.” Sẽn paase, pipi kiris-nebã sẽn zãgs tɩ b kõn balem Rom soolmã naabã yĩnga, b ra yetame tɩ b yaa soolmã bɛɛba.
9. Bõe la pipi kiris-nebã maan rõdg nins b sẽn dõd-bã taoore, la yɛlã yaa wãn to rũndã-rũndã?
9 Rõd-kãens pa kɩt tɩ pipi kiris-nebã pa kẽng taoor ne b tʋʋmdã, sẽn yaa moon Rĩungã koe-noogã ye. Yʋʋmd 60-61 sasa, a Poll da tõog n yeelame tɩ koe-noogã woma biisi, la t’a ‘moona dũniyã fãa.’ (Kolos rãmba 1:5, 6, 23) Yaa woto me rũndã-rũndã. B rõta a Zeova Kaset rãmbã wa b sẽn dõd pipi kiris-nebã. La ne rẽ fãa, Rĩungã koe-noog mooneg kẽngda taoor la a kõt neb nins sẽn moond-a wã sũ-noog wʋsgo.
D tara sũ-noog b sẽn namsd tõnd wa b sẽn nams no-rɛɛsdbã
10, 11. a) Wãn to la a Zezi baas bʋʋm a wae soabã sẽn kõt sũ-noogã yell goama? b) Bõe yĩng tɩ b ra namsd no-rɛɛsdbã? Rɩk-y makr n wilgi.
10 A Zezi baasa a goamã sẽn tɩ loe ne bʋʋm a wae soab sẽn kõt sũ-noogã n yeel woto: “Bɩ y maan sũ-noogo . . . tɩ bõe, b ra namsa Wẽnnaam no-rɛɛsdba me woto sẽn deng yãmba.” (Matɩe 5:12) Israɛll buudã pa kelg no-rɛɛsdb nins a Zeova sẽn tʋm tɩ b tɩ keoog nin-kɩɩsdbã ye, la naoor wʋsgo b nams-b lame. (Zeremi 7:25, 26) Tʋm-tʋmd a Poll wilga rẽ woto: “La mam na n yeela bõe n paase? Weer ka be tɩ mam tõe n togs . . . Wẽnnaam no-rɛɛsdba yell ye. Ne tẽebo, bãmb . . . saka yaalgo la pãbre la balgre la bi-bees-roogo.”—Hebre dãmba 11:32-38.
11 Rĩm wẽng a Akaab ne a pag a Zezabɛll naamã rɩɩb wakate, a Zeova no-rɛɛsdb wʋsg la b kʋ ne sʋʋga. (1 Rĩm dãmba 18:4, 13; 19:10) B balga no-rɛɛs a Zeremi, la kaoosg poore b lob-a-la bulg sẽn tar bɛgd pʋgẽ. (Zeremi 20:1, 2; 38:6) B ra loba no-rɛɛs a Daniɛll gɩgma bokẽ. (Daniɛll 6:17, 18) No-rɛɛsdb kãensã fãa sẽn deng Kirist zãmaanã paama namsgo, b sẽn da teend a Zeova baleng hakɩkã yĩnga. Zʋɩf rãmbã tũudum taoor dãmb ra namsda no-rɛɛsdb wʋsgo. A Zezi yeelame tɩ gʋlsdbã ne Fariziẽ rãmbã ra yaa “neb nins sẽn kʋ Wẽnnaam no-rɛɛsdba kamba.”—Matɩe 23:31.
12. Bõe yĩng tɩ tõnd sẽn yaa a Zeova Kaset rãmbã, d getẽ tɩ yaa zu-noog bũmbu, b sã n namsd tõnd wa pĩnd wẽndẽ no-rɛɛsdbã?
12 Rũndã-rũndã, tõnd sẽn yaa a Zeova Kaset rãmbã, b nong n namsda tõndo, d sẽn tar yẽesem Rĩungã koe-noog mooneg pʋgẽ wã yĩnga. Tõnd bɛɛbã yetame tɩ tõnd “tuubda nebã ne pãngã,” la tõnd miime t’a Zeova balemdb hakɩk nins sẽn deng tõndã me paama sãbgr woto. (Zeremi 11:21; 20:8, 11) Tõnd getame tɩ yaa zu-noog bũmbu, b sã n namsd tõnd wa b sẽn da nams pĩnd wẽndẽ no-rɛɛsdbã me b tẽebã yĩngã. Karen-biig a Zak gʋlsame: “M ba-biisi, ne namsgo la sũ-mar yelle, bɩ y mams Wẽnnaam no-rɛɛsdba sẽn da gom ne Zusoaba yʋʋrã. Gese, tõnd yetame tɩ bark bee neb nins sẽn sakd namsg ne sũ-mara zutu.”—Zak 5:10, 11.
D tara bʋʋm wʋsg n na n tall sũ-noogo
13. a) Bõe yĩng tɩ b sẽn namsd tõndã pa komsd d raoodo? b) Yaa bõe n sõngd tõnd tɩ d yals kãn-kãe, la bõe la rẽ wilgda?
13 Kɩɩsdbã sẽn namsd tõndã pa na n koms d raood ye, la d paamda belsgo, d sẽn mi tɩ d tũuda no-rɛɛsdbã, pipi kiris-nebã la Kirist Zezi mengã makrã yĩnga. (1 Pɩɛɛr 2:21) Gʋlsg Sõamyã goam kõta tõnd sũ-noog wʋsgo, wala makre, tʋm-tʋmd a Pɩɛɛr goam nins sẽn pʋgdã: “Mam zo-nongdse, bɩ y ra sak tɩ makr sẽn wẽnd bugum sẽn makd yãmba ling yãmb wa bõn-sãang ye. Bark bee yãmb zutu neb sã n gomd yãmb wẽng Kirist yʋʋrã yĩnga, tɩ bõe, Wẽnnaam Sɩɩga sẽn yaa waoogr Sɩɩga bee yãmb zutu.” (1 Pɩɛɛr 4:12, 14) Tõnd sẽn zoe n yã bũmb ninsã wilgdame tɩ d tõe n yalsa kãn-kãe namsgã taoore, a Zeova vʋʋsem sõngã sẽn be tõnd zut n kõt-d pãngã yĩng bala. Vʋʋsem sõngã teelg wilgdame t’a Zeova ning–d-la barka, la rẽ kõta tõnd sũ-noog wʋsgo.—Yɩɩl Sõamyã 5:13; Filip rãmba 1:27-29.
14. Bõe yĩng tɩ d tõe n kɩdem ne sũ-noogo, b sẽn namsd tõnd tɩrlmã yĩngã?
14 Bũmb a to sẽn kɩt tɩ neba kɩɩsgã la namsgã reegr tɩrlmã yĩngã kõt tõnd sũ-noogã yaa a sẽn wilgd tɩ d yaa kiris-neb hakɩk sẽn yaa wẽn-sakdbã. Tʋm-tʋmd a Poll gʋlsame: “Neb nins fãa sẽn dat n tũ Kirist Zezi ne pʋ-peelma na n paama namsgo.” (2 Tɩmote 3:12) Tõnd tara sũ-noog wʋsgo, d sẽn mi tɩ d sã n kell n tall burkĩnd makrã pʋgẽ, d sõngd n leokda Sʋɩtãanã sẽn yeel t’a Zeova bõn-naandsã fãa maanda a raabã b meng nafr yĩngã. (Zoob 1:9-11; 2:3, 4) D kɩdem ne sũ-noogo, d sẽn sõngd baa yaa bilf n wilgdẽ t’a Zeova naam sẽn ka to wã sẽn yaa tɩrgã zemsame wã.—Yelbũna 27:11.
Kɩdm-y ne sũ-noog keoorã yĩnga
15, 16. a) Bʋʋm bʋg la a Zezi kõ tõnd tɩ d tõe n ‘maan sũ-noog n kɩdem’? b) Keo-bʋg n gũud kiris-neb nins sẽn zae ne vʋʋsem sõngã saasẽ, la wãn to la ‘piis a taabã’ sẽn yaa b tũud-n-taasã me na n paam keoobo?
15 A Zezi leb n togsa bũmb a to sẽn kɩt tɩ d tõe n tall sũ-noogo, b sẽn kãnegd tõnd la b namsd tõnd d tẽebã yĩng wala sẽn yɩ to-to ne no-rɛɛsdbã pĩnd wẽndẽ wã. Bʋʋm a wae soab sẽn kõt sũ-noogã kɩbar saabẽ a yeelame: “Bɩ y maan sũ-noogo n kɩdem, yãmb keoor sẽn yaa kãseng [saasẽ] wã yĩnga.” (Matɩe 5:12) Tʋm-tʋmd a Poll gʋlsame: “Yel-wẽna yaood yaa kũum, la Wẽnnaam kũuna yaa vɩɩm sẽn ka sɛta tõnd Zusoaba Kirist Zezi maasem yĩnga.” (Rom dãmba 6:23) N-ye, ‘keoor sẽn yaa kãsengã’ yaa vɩɩmã, la a pa keoor d sẽn tõe n paam ne d meng modgr ye. Yaa kũuni. A Zezi yeelame tɩ keoorã bee saasẽ, bala a yita a Zeova nengẽ.
16 Sẽn zae-b ne vʋʋsem sõngã paamda “vɩɩm maanf” sẽn yaa vɩɩmd ne Kirist saasẽ n pa tol n ki wã. (Zak 1:12, 17) ‘Piis a taabã’ tara saagr n na n vɩɩmd wakat sẽn pa sat tẽng zug arzãnã pʋgẽ. (Zã 10:16; Wilgri 21:3-5) Sul a yiibã pa paamd ‘keoorã’ ne b mens tʋʋm ye. Sẽn zae-b ne vʋʋsem sõngã la ‘piis a taabã’ paamda b keoorã, a Zeova “bark kãsenga” yĩnga. Rẽ n kɩt tɩ tʋm-tʋmd a Poll yeel woto: “Bark Wẽnnaam bãmb kũuna noor sẽn ka tõe n togsa yĩnga.”—2 Korẽnt dãmba 9:14, 15.
17. Bõe yĩng tɩ b sã n namsd tõndo, d tõe n ‘kɩdem ne sũ-noogo’?
17 Tʋm-tʋmd a Poll gʋlsa Rom kiris-nebã. Bãmb kẽer da na n paama nams-toaag Rom soolem naab a Neerõ nugẽ. A yeela woto: “Tõnd maanda sũ-noog wʋsg namsg pʋgẽ me, tõnd sẽn bãng tɩ namsg wata ne sũ-mara yĩnga. La sũ-mar wata ne tõogr makr pʋga, la tõogr kãng kɩtdame tɩ tõnd gũ tõnd tẽeb pidsgu. La tẽeb pidsg gũudum ka belgd ye.” A paasame me: “Bɩ y maan sũ-noog ne yãmb sẽn gũud yãmb tẽeb pidsgã. Bɩ y maan sũ-mar toog pʋgẽ.” (Rom dãmba 5:3-5; 12:12) Tõnd saagrã yaa tɩ vɩɩmd saasẽ tɩ yaa tẽng zug me, d sẽn na n paam keoor ninga, d wẽn-sakrã makrã pʋgẽ wã yĩngã yaa kãseng wʋsg n yɩɩd bũmb ning fãa tõnd sẽn da segd n paam. D sũyã nooma wʋsgo, d sẽn na n vɩɩmd wakat sẽn kõn sa, n maan d nonglem Ba a Zeova raabã la d pẽg-a, tõnd Rĩm a Zezi Kirist naamã rɩɩb sasa wã yĩnga. ‘D kɩdemda ne sũ-noogo.’
18. Saabã sẽn kolgdã, d segd n gũume tɩ tẽnsã maan bõe, la a Zeova na n maana bõe?
18 Tẽns kẽer pʋsẽ, b namsa a Zeova Kaset rãmbã la b ket n namsd-b b tẽebã yĩnga. A Zezi bãngr-gomd ning sẽn tɩ loe ne dũni wẽng kãngã saabã pʋgẽ, a keooga kiris-neb hakɩkã woto: ‘Buud fãa na n kisga yãmb mam yʋʋra yĩnga.’ (Matɩe 24:9) Tõnd sẽn kolgd saabã wakatã, a Sʋɩtãan na n kɩtame tɩ tẽnsã kisg a Zeova nin-buiidã. (Ezekɩɛll 38:10-12, 14-16) Rẽ na n kɩtame t’a Zeova tik n yiki. A yeelame: “Mam na n wilgame tɩ m yaa kãsenga la m yaa sõngo, la m na n kɩtame tɩ buud wʋsg bãng mam sẽn ya a soaba. B na n bãngame tɩ mam yaa [a Zeova].” (Ezekɩɛll 38:23) Woto, a Zeova na n sõmsa a yʋ-kãsengã la a fãag a nin-buiidã bɛɛbã sẽn namsd-bã nugẽ. Woto yĩnga, sũ-noog bee ne “ned ninga sẽn yalsd kãn-kãe.”—Zak 1:12.
19. D sẽn gũud a Zeova ra-kãsengã, bõe la d segd n maandẽ?
19 ‘A Zeova ra-kãsengã’ sẽn tar kolgrã yĩnga, bɩ d kɩdem ne sũ-noogo, d sẽn “zems tɩ paam namsg” a Zezi yʋʋrã yĩngã. (2 Pɩɛɛr 3:10-13; Tʋʋma 5:41) Wala pipi kiris-nebã, bɩ d ket n ‘moond a Zezi Kirist koe-noogã’ la a Rĩungã sẽn yaa goosneemã n da base, n gũud d keoorã a Zeova dũni paalgã sẽn yaa tɩrgã pʋgẽ.—Tʋʋma 5:42; Zak 5:11.
Lebg-n-gese
• Nams tɩrlem yĩng rat n yeelame tɩ bõe?
• B sẽn nams pipi kiris-nebã b tẽebã yĩngã, maan-b-la bõe?
• Bõe yĩng tɩ b tõe n yeel t’a Zeova Kaset rãmbã paamda namsg wala pĩnd wẽndẽ no-rɛɛsdbã?
• Bõe yĩng tɩ d tõe n ‘maan sũ-noog n kɩdem,’ b sẽn namsd tõnd d tẽebã yĩngã?
[Zãmsgã sogsgã]
[Foto rãmba, seb-neng 28, 29]
“Sũ-noog rãmb la yãmba, neba sã n sãbgd yãmb la b namsd-yã”
[Fotã soaadbã]
Neb sull sẽn be bãens-roogẽ: Chicago Herald-American