Karemdbã sogsgo

Bõe la kiris-neb tigingã tagsd yão-beedã zugu?

Wẽnnaam Gomdã gɩdga yão-beed la rã-tɩgre, n wilgdẽ tɩ yaa zʋg wẽns Wẽnnaam sõgen sẽn pa segd n talle. Woto yĩnga, ne kiris-neb tigingã, yão-be-ned sẽn pa rat n toeem yaa yembr ne ned sẽn minim n yũud rãam n suuda. Rã-tɩgd la yão-be-ned fãa pa segd n zĩnd kiris-neb tigingã pʋgẽ ye.

Yelbũna 23:20, 21 yetame: “Ra tũ rã-yũudb la yão-beed rãmb ye. Tɩ bõe, rã-yũudb ne yão-beed rãmb na n lebga nimbãan dãmba. Gõeem kɩtdame tɩ ned yeelg kʋɩdse.” A Moiiz Tõogã tũub wakate, b wilga Tõod 21:20 pʋgẽ tɩ b ra segd n kʋʋ kɩɩs la “tõtre.” Sẽn zems ne verse kãensã, tõtr a woto sẽn pa tekd yam n kos sugrã zʋg a yiibã yaa yão-beed la rã-yũuri. Vẽenega, pĩnd wẽndẽ Israɛllã pʋgẽ, ned sẽn da rat n yɩ Wẽnnaam sõgen ra pa segd n yɩ yão-beed soab ye.

La yão-be-ned yaa bõe? Bõe la kiris-neb gɛrk Gʋlsg Sõamyã yet rẽ wɛɛngẽ?  Yão-be-ned yaa ned sẽn nong n dɩtẽ la a yũud wʋsg tɩ loogdẽ. Dẽnd yão-beed yaa rat wʋsgo, la Wẽnnaam Gomdã yeta tõnd tɩ “rat wʋsg rãmb” bee neb nins sẽn pa na n paam Wẽnnaam soolmã sʋka. (1 Korẽnt dãmba 6:9, 10, Sebr Sõngo; Filip rãmba 3:18, 19; 1 Pɩɛɛr 4:3) Sẽn paase, tʋm-tʋmd a Poll sẽn keoog kiris-nebã “yĩnga ratem biis” wɛɛngẽ wã, a sõdga ‘rã-tɩgr la yão-beed la bũmb sẽn wẽnd woto.’ (Galat dãmba 5:19-21) Naoor wʋsgo, yaa kibs rãmb sẽn naag ne tʋʋm-dẽgd pʋsẽ la b yãt yão-beedã la rã-tɩgrã. Wala sẽn yaa to-to ne “yĩnga ratem biis” a taabã, b sã n mi zĩig fãa tɩ kiris-ned yaa yão-be-ned sẽn tõdg fasɩ t’a kõn toeeme, b segd n yiis-a-la tigingã pʋgẽ.—1 Korẽnt dãmba 5:11, 13. *

Baa Wẽnnaam Gomdã sẽn get rã-tɩgd ne yão-be-ned wa bõn-yɛngã, rã-tɩgd bãngr yaa nana n yɩɩda. Naoor wʋsgo, f tõe n yãa bãn nins sẽn wilgd tɩ ned tɩga rãamã vẽenega. La yaa toog tɩ f tõog n bãng yão-beed soab n welge, bala bãnd kae f sẽn tõe n yã n bãng ye. Woto yĩnga, sẽn na yɩl n welg yell sẽn tɩ loe ne yão-beedo, tigingã kãsem dãmb segd n tagsame tɩ bɩ la b gũus neere.

Wala makre, ned sã n yaa bedr tɩ looge, tõe n wilgdame t’a yaa yão-beed soaba. La pa wakat fãa la bedrem yaa yão-beed bãnd ye. Bedrem sẽn loog noor tõe n yɩɩ bãaga. A leb n tõe n yaa rog-ne. Bũmb d sẽn pa segd n yĩm me yaa tɩ bedrem sẽn loog noor yaa yĩng yalẽ, la yão-beed yaa zʋgo. Ned sẽn yaa bedr tɩ loog yaa ned sẽn nob tɩ looge, la yão-be-ned yaa ned sẽn nong n dɩtẽ tɩ loogd nugu. Dẽnd b pa tõe n yeel tɩ ned yaa yão-beed soab a sẽn yaa bedr tɩ loog yĩng ye. Yaa nedã sẽn tar manesem ning rɩɩb taoorã n wilgd bal t’a yaa yão-beed soaba. Ned bedrem tõe n zemsame bɩ a yaa bãanega, t’a yaool n yaa yão-be-neda. Sẽn paase, nebã tagsg sẽn tɩ loe ne bedrmã bɩ yaok ning sẽn zemsã pa a yembr zĩig fãa ye.

Bõe n tõe n kɩt tɩ f bãng yão-beed soab n welge? Wakat fãa, yão-be-ned pa tõe n yõk a meng rɩɩb taoor ye. Pʋd n yaa ned sẽn dɩt n tõgd hal tɩ wa namsd-a, bɩ n kɩt t’a bẽ. A sẽn pa tar yõk-m-mengã wilgdame t’a pa gũusd a manesmã na n wa paoog a Zeova bɩ n sãam a nin-buiidã yʋʋr ye. (1 Korẽnt dãmba 10:31) La d pa segd n ges ned sẽn dɩt wakat-wakat tɩ loogdẽ wala yão-be-ned ye. (Efɛɛz rãmba 5:5) Baasg zãnga, sẽn zems ne Galat dãmba 6:1 goamã, tõe tɩ kiris-ned a woto rata sõngre. A Poll yeelame: “M ba-biisi, yãmb sã n wa mik tɩ ned n beege, bɩ yãmb sẽn sakd Sɩɩg Sõnga sagl yẽnda ne sũ-maasem t’a yɩ tɩrga.”

Bõe yĩng tɩ Biiblã sẽn sagl tɩ d lak d mens ne yão-beedã tar yõod rũndã-rũndã n yɩɩda? Yaa tɩ bala, a Zezi sagla tõnd wakatã wɛɛngẽ woto: “Bɩ y gũus y mense n da sak tɩ yão-beed ne rã-yũuri la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri.” (Luk 21:34, 35) Sẽn na yɩl n da tall manesem sẽn tõe n sãam d tẽebã, d segd n laka d mens ne yão-beedo.

Kiris-ned segd n talla yõk-m-menga. (1 Tɩmote 3:2, 11) Woto yĩnga, sãmbg sẽn kae, a Zeova na n sõnga neb nins sẽn modgd ne b sũy fãa n na n kell n yɩ maan-tɩ-zems rãmb rɩɩbã la rãamã wɛɛngẽ wã.—Hebre dãmba 4:16.

[Tẽngr note]