“Yik n gilg tẽngã”
“Yik n gilg tẽngã”
“Yik n gilg tẽngã n ges a woglma ne a yalma fãa.”—SƖNGRE 13:17.
1. No-bʋg sẽn be yamleoog la Wẽnnaam kõ a Abrahaam?
YÃMB nongame n tog sor ne mobill wɩkɛn n kok pemsem bɩ? Kẽer nonga woto maaneg ne kut weef sẽn na yɩl n yẽeg b yĩns la b tõog n ges weoogã sõma. Kẽer nong n kẽnda nao sẽn na yɩl n paam weer n ges weoogã sõma. Kẽn-kãensã buudã pa nong n kaoosd wʋsg ye. La mams-y n ges a Abrahaam tagsg sẽn da segd n yɩ a soaba, Wẽnnaam sẽn yeel-a tɩ: “Yik n gilg tẽngã n ges a woglma ne a yalma fãa; tɩ bõe, mam na n kõo foo yẽnda” wã.—Sɩngre 13:17.
2. A Abrahaam sẽn yi Eziptã poore yɛ la a kẽng-yã?
2 Ges-y b sẽn togs gom-kãensã yɛl nins pʋsẽ wã. A Abrahaam zĩnda Ezipt ne a pagã la neb a taaba. Sɩngr sak 13 yeta tõnd tɩ b yii Ezipti, n tall b rũmsã n kẽng “Negɛb.” Rẽ poore, a Abrahaam “basa Negɛb n yik n kẽnd la a yalsdẽ hal tɩ ta Betɛlle.” Zu-loɛɛg sẽn wa n zĩnd a Abrahaam rũm-kɩɩmbã ne a ba-biig biig a Lot rũm-kɩɩmbã sʋkã, wa n lebga vẽeneg tɩ bãmb b yiibã ra segd n welga taab tɩ ned fãa bao zĩiga, t’a Abrahaam yeel a Lot t’a reng n yãk yẽ sẽn dat n kẽng zĩig ningã. A Lot yãka “Zʋrdẽ zĩ-sõngã,” sẽn sakd kood wa ‘Zusoaba zẽed zĩigã,’ la a wa n baas n tɩ zĩnda Sodom. Wẽnnaam yeela a Abrahaam yaa: “Zĩig ninga fo sẽn be wã, bɩ f nak n ges rɩtg ne goabg la yaang ne taoore.” Tõe t’a Abrahaam zĩnda tãn-lug-lug sẽn pẽ Betɛllã zug n yã tẽngã babs a taabã. La ra pa tek woto ye. Wẽnnaam yeel-a lame t’a “yik n gilg tẽngã” n bãng a halhaalã la a zĩisa sõma.
3. Bõe yĩng tɩ tõe n yɩ toog tɩ d mams a Abrahaam sẽn gilg n ges tẽns ninsã?
3 A Abrahaam sẽn gilg tẽngã to-to fãa, sẽn deng t’a ta Hebrõ, a bãnga Kãabg Tẽngã n yɩɩd neb wʋsg sẽn be tõnd sʋkã. Tags-y zĩis nins yell b sẽn gom ka wã zutu: Negɛb, Betɛll, Zʋrdẽ soolmã, Sodom la Hebrõ. Yaa toog ne yãmb tɩ y mams zĩ-kãensã sẽn da beẽ wã bɩ? Ne neb wʋsgo, woto yaa toogo, bala a Zeova sõgen dãmb wʋsg pa tɩ gilg tẽngã woglem la a yalem n ges zĩis nins kɩbay b sẽn karem Biiblã pʋgẽ wã ye. La zemsame tɩ d bao n bãng zĩis nins yell Biiblã sẽn goma. Bõe yĩnga?
4, 5. a) Wãn to la Yelbũna 18:15 tɩ loe ne Biiblã sẽn gom tẽns nins yellã bãngre? b) Bõe la Sofoni sak a 2 bilgda?
4 Wẽnnaam Gomdã yetame: “Nin-yẽeseng paamda bãngre. Yam soab kelgdame n baood bãngre.” (Yelbũna 18:15) Yɛl wʋsg n be tɩ ned tõe n bãnge, la bãngr sẽn yaa takɩ ning sẽn tɩ loe ne Wẽnnaam a Zeova la a yel-manesmã tara yõod wʋsgo. Sɩd-sɩda, yaa tɩlae tɩ d karem bũmb ning sẽn be Biiblã pʋgẽ wã sẽn na yɩl n paam bãng-kãngã. (2 Tɩmote 3:16) La bãng-y tɩ d segd n wʋma yɛlã võore. Rẽ rat n yeelame tɩ f bãng bũmbu, tɩ f bãng loees nins sẽn be bũmbã babs la a tõrã sʋka. Yaa woto ne zĩis nins yell Biiblã sẽn gomã. Wala makre, tõnd sʋkã neb wʋsg mii Ezipt sẽn beẽ, la yaa hal sẽn ta zĩ-bʋg la d mi Biiblã sẽn yeel t’a Abrahaam yii Ezipt ‘n kẽng Negɛb’ la a wa kẽng Betɛll la Hebrõ wã võore? Yãmb nee loees ning sẽn be zĩ-kãens ne taab sʋkã bɩ?
5 Tõe tɩ y Biiblã kareng pʋgẽ, y karma Sofoni sak a 2 wã. Beenẽ y karma galʋ-tẽnse, neb la tẽns yʋya. B goma Gaza, Askelõ, Asdod, Ekrõ, Sodom, Niniiv, Kanaã, Moaab, Amo la Asiri yell sag-kãngã pʋgẽ. Neb n sɩd vɩɩmd zĩ-kãensã n pids Wẽnnaam bãngr-goamã. Rẽ yĩnga yãmb tõog n mamsa zĩ-kãens sẽn be zĩis nins bɩ?
6. Bõe n wa n kɩt tɩ kiris-neb kẽer nand kart dãmbã masã?—Ges-y zĩ-gũbrã.
6 Neb wʋsg sẽn zãmsd Wẽnnaam Gomdã paama nafa wʋsgo, b sẽn ges kart dãmb nins sẽn wilgd tẽns nins yell Biiblã sẽn goma. B sẽn maand woto wã pa tɩ b nong n geta kart dãmb ye, la yaa b sẽn ne tɩ b sã n ges zĩisã sẽn be kart dãmbã zutã, b tõe n bãnga Wẽnnaam Gomdã n paasã yĩnga. Kart dãmbã leb n tõe n sõng-b lame tɩ b wʋm yɛlã võor n paase, tɩ b yã bũmb nins b sẽn da zoe n miẽ wã sẽn tar loees ne kɩbay a taab to-to. Makr a wãna d sẽn na n gesa na n kɩtame tɩ y tall naneb ne a Zeova n paase, la y paam vẽnegr n paas a Gomdã kɩbay wɛɛngẽ. (Ges-y zĩ-gũbrã sẽn be seb-neng 14 pʋgẽ wã.)
Zĩisã zãrem bãngr paasda yɛlã võor-wʋmbo
7, 8. a) Bõn-kãseng bʋg la a Sãmsõ maan Gaza? b) Kɩba-bʋg n tõe n kɩt tɩ d tall naneb n paas ne bõn-kãseng ningã a Sãmsõ sẽn maanã? d) Wãn to la kɩbar ning sẽn tɩ loe ne a Sãmsõ wã bãngr la a võor wʋmb tõe n sõng tõndo?
7 Bʋkaoodba 16:2 pʋgẽ, d karemda be tɩ bʋkaood a Sãmsõ kẽnga Gaza. B nong n gomda Gaza yell rũndã-rũndã kɩbayẽ wã, tɩ rẽ kɩt tɩ y tõe n mi a Sãmsõ sẽn da be zĩig ning Filisti soolmã sẽn pẽ Mediterane mogrã noorã. [11] Masã, ges-y Bʋkaoodba 16:3: “A Sãmsõ gãandame tɩ ta yʋʋn-sʋka. La yʋʋn-sʋk sẽn ta, yẽ yiimi n vigs tẽnga noor kʋɩlensa ne a ra-lugdsã la kʋɩlen-kuyã fãa n palg a bãok n kẽng tãng zug sẽn teesd Hebrõ.”
8 Sãmbg sẽn ka be, galʋ-tẽng sẽn tar pãng wa Gaza kʋɩlensã ne a ra-lugdsã ra yalmame la zɩsa. Mams-y n ges b tʋkr sẽn da segd n yɩ to-to. A Sãmsõ maana woto, la yaa yɛ la a tall-b n kẽnge, la a sẽn kẽngẽ wã zãrem taa wãn to? Be neere, Gaza ra bee mogrã noore. [15] La Hebrõ sẽn da be yaangã zãntlem da taa metr 900, tɩ sɩd da yaa rʋʋb menga. D pa tõe n wilg ‘tãngã sẽn teesd Hebrõ’ wã sẽn be zĩig ning takɩ ye, la galʋ-tẽngã ne Gaza ra zãra ne taab sẽn na ta kɩlometr 60, tɩ woto ket n yaa rʋʋbo. D sẽn mi tẽns a yiibã ne taab zãrmã kɩtdame tɩ d nand a Sãmsõ sẽn maan bũmb ningã masã n yɩɩda, bɩ bõe? La d tẽeg bũmb ning sẽn kɩt t’a Sãmsõ ra tõe n maan woto wã. A Zeova vʋʋsmã kõo yẽ pãnga. (Bʋkaoodba 14:6, 19; 15:14) Tõnd sẽn yaa kiris-neb rũndã-rũndã wã, d pa gũud tɩ Wẽnnaam vʋʋsem sõngã kõ tõnd yãoog pãng sẽn yɩɩd d taabã rẽnd ye. La vʋʋsem sõngã pãng tõe n kɩtame tɩ d wʋm tẽebã yɛl võor n paase, la a kõ tõnd tẽeb pãngã. (1 Korẽnt dãmba 2:10-16; 13:8; Efɛɛz rãmba 3:16; Kolos rãmba 1:9, 10) N-ye, d sẽn wʋm kɩbar ning sẽn tɩ loe ne a Sãmsõ wã võorã, d sɩd bãngame tɩ Wẽnnaam vʋʋsem sõngã tõe n sõng-d lame.
9, 10. a) Bõe ne bõe la a Zedeõ maan n tõog Madiã nebã? b) Wãn to la zĩisã bãngr sõngd tõnd tɩ kɩba-kãngã tall pãng n paase?
9 A Zedeõ sẽn tõog Madiã nebã yaa kɩbar a to sẽn wilgd tɩ tara yõod tɩ d bãng zĩisã ne taab zãrem. Biiblã karemdb wʋsg miime tɩ bʋkaood a Zedeõ ne a sodaas 300 wã tõoga Madiã la Amalɛk neb 135 000 sẽn sũ taabã, n paas a taab sẽn da be Zizreɛll bãoogẽ wã sẽn pẽ More tãngã. [18] A Zedeõ sodaasã peeba baordo, n wã rʋgd n zẽk b bug-vɩlensã n kelem n yeele: “A Zeova ne a Zedeõ sʋʋga!” Rẽ yɛɛsa bɛɛbã tɩ wa ne zũnd-zãnd b sʋka, tɩ b sɩng taab kʋʋbo. (Bʋkaoodba 6:33; 7:1-22) Ra yaa yellã fãa la woto, tʋʋmd b sẽn maan yãg-yãg yʋng bal bɩ? Karm-y Bʋkaoodba sak a 7 la a 8. Y na n yãame t’a Zedeõ kẽnga taoor ne zabrã. Zĩis wʋsg nins yell b sẽn goma sʋka, d pa tõe n bãng kẽer zĩis ye, rẽ n so tɩ tõe tɩ b pa pukd Biiblã kart dãmb zut ye. La d mii yɛl sẽn sek d na bãng a Zedeõ tʋʋmã.
10 A Zedeõ riga sodaas nins sẽn kellã n zʋʋg Bɛt-sita la Abɛl-mehola goabg babgẽ wã sẽn pẽ Zʋrdẽ kʋɩlgã. (Bʋkaoodba 7:22-25) Biiblã yetame: ‘A Zedeõ ne neb kobs-tã wã sẽn be ne yẽ wã taa Zʋrdẽ kʋɩlgã n dʋʋg-a. Bãmb yɛɛme, la b ket n digda b bɛɛbã.’ Israɛll nebã sẽn dʋ kʋɩlgã rʋʋndã, b riga b bɛɛbã n tees goabg babgã n ta Sukot la Penuɛll sẽn pẽ Zabokã, n tɩ ta tãensẽ wã Zogbeha (sẽn pẽ rũndã-rũndã Amman sẽn be Jordanie wã). Woto ra yaa kɩlometr 80 la b sẽn zoe n pʋg b bɛɛbã n zab ne-bã. A Zedeõ yõka Madiã rĩm dãmb a yiib n kʋ, la a leb a galʋ-tẽngẽ wã Ofra, sẽn pẽ zĩig ning zabrã sẽn sɩngẽ wã. (Bʋkaoodba 8:4-12, 21-27) Vẽenega, a Zedeõ sẽn tõog n maan bõn-kãseng ningã pa tek minit a wãn bard peebgo, bug-vɩlens zẽk n yuum la koɛɛg zẽkr ye. La tags-y n ges rẽ sẽn kɩtd tɩ goam nins b sẽn togs tẽeb nebã wɛɛngẽ wã pãng paas to-to: “Weer ka be tɩ mam tõe n togs a Zedeõ [ne a taab sẽn] lebg pãens rãmb zabr zĩigẽ” wã kɩbar ye. (Hebre dãmba 11:32-34) Kiris-nebã me tõe n yaame, la b segd n ket n maanda Wẽnnaam daabã.—2 Korẽnt dãmba 4:1, 16; Galat dãmba 6:9.
Nebã tagsg la b manesem yaa wãn to?
11. So-toak bʋg la Israɛll nebã ra segd n maane, sẽn deng tɩ b ta Kadɛse, la b sẽn wa n ta be wã poore?
11 Kẽer tõe n gesa Biiblã kart dãmb n yã zĩisã, la yãmb tagsdame tɩ kart dãmbã tõe n kɩtame tɩ y bãng nebã tagsg sɩda? D rɩk makr ne Israɛll nebã sẽn yi Sinayi Tãngẽ wã n kẽng Kãabg Tẽngẽ wã. B sẽn da kẽnd la b yalsdẽ wã, b wa n baas n taa Kadɛs (bɩ Kadɛs-barnea). [9] Tõodo 1:2 yetame tɩ yaa rasem 11 so-toaka, sẽn zems kɩlometr 270. Yaa be la a Moiiz zĩnd n tʋm neb 12 tɩ b tɩ gũus n ges Kãabg Tẽngã. (Sõdbo 10:12, 33; 11:34, 35; 12:16; 13:1-3, 25, 26) Neb 12 wã kẽnga rɩtg babgẽ wã n pasg Negɛb, n loog Bɛɛr-seba, n kẽng Hebrõ, n ta Kãabg Tẽngã rɩtg babg todgã. (Sõdbo 13:21-24) Israɛll nebã sẽn sak n tẽ neb piigã kɩba-wẽnsã yĩnga, b ra segd n yeeba we-raoogã pʋgẽ yʋʋm 40. (Sõdbo 14:1-34) Bõe la rẽ wilgd b tẽebã la b sẽn da teeg a Zeova wã sẽn da ta zĩig ningã?—Tõodo 1:19-33; Yɩɩl Sõamyã 78:22, 32-43; Ziid 5.
12. Bõe la d tõe n yeel Israɛll nebã tẽeb wɛɛngẽ, la bõe yĩng tɩ d segd n bʋgs a zugu?
12 Tik-y zĩisã zãrem ne taabã zug n tags rẽ yelle. Israɛll nebã sã n da tallẽ-la tẽeb la b tũ a Zozue ne a Kalɛɛb saglgã, b ra na n zãaga zĩig n yaool n kẽ Kãabg Tẽngẽ wã bɩ? Kadɛs ne Bɛɛr-lahairoi a Izaak ne a Rebeka sẽn da zĩndẽ wã ra pa yɩɩd kɩlometr 16 ye. [gl 7] A ra pa ta kɩlometr 95 ne Bɛɛr-seba, sẽn da yaa galʋ-tẽng ning sẽn da be Kãabg Tẽngã goabg toadgẽ wã ye. (Sɩngre 24:62; 25:11; 2 Sãmwɛll 3:10) B sẽn yi Ezipt n kẽng Sinayi Tãngẽ wã la b maan kɩlometr 270 n ta Kadɛsã, b ra bee Kãabg Tẽngã kõom zug la bala. Sã n yaa ne tõndo, d bee tẽng zug Arzãnã b sẽn kãabã noore. Woto zãmsda tõnd bõe? Tʋm-tʋmd a Poll goma Israɛll nebã sẽn da be zĩig ningã yelle, la a kõ sagl-kãngã: “Bɩ d kẽ vʋʋsg kãng pʋgẽ tao-tao, tɩ ned ba a yen da wa tũ kɩɩsgã mamsg n lʋɩ ye.”—Hebre dãmba 3:16–4:11, Kãab-paalgã Koe-noogo.
13, 14. a) Yel-bʋg pʋgẽ la Gabaõ nebã rɩk sard sẽn pa nana? b) Bõe la Gabaõ nebã manesem wilgda, la bõe la rẽ segd n zãms tõndo?
13 Neb a taab n tall manesem zẽnga. B ra kɩsa sɩd tɩ Wẽnnaam na n pidsa a raabã. Kɩbar ning sẽn gomd Gabaõ nebã yellã wilgda rẽ vẽenega. A Zozue sẽn tall Israɛll nebã n pɩʋʋg Zʋrdẽ Kʋɩlgã n tɩ kẽes tẽng ning Wẽnnaam sẽn kãab a Abrahaam ne a yagensã poore, wakat da taame tɩ b segd n yiis Kanaã nebã. (Tõodo 7:1-3) Gabaõ nebã ra bee nin-kãens sʋka. Israɛll nebã tõoga Zeriko ne Ai n tilg b sik-zĩigã noorẽ be, Gilgalle. Gabaõ nebã sẽn da pa rat n naag Kanaã nebã b sẽn kãab wẽngã n ki wã, b tʋma neb tɩ b tɩ yã a Zozue Gilgalle. Sẽn na yɩl n paam zood kaool ne Israɛll nebã, b yeelame tɩ bãmb yii sẽn zʋʋg Kanaã soolmã.
14 Neb nins b sẽn tʋma yeelame: “Tõnd yii zĩ-zãrgẽ yãmb Zusoab a Wẽnnaam yʋʋra yĩnga.” (Zozue 9:3-9) F sã n ges b futã la b teedã, sɩd ra yaa wa b yita zĩ-zãrgẽ, la Gabaõ yaool n da pa yɩɩd kɩlometr 30 ne Gilgall ye. [gl 19] A Zozue ne nanambsã tẽ-b lame n maan zood kaool ne Gabaõ la ne galʋ-tẽns nins sẽn pẽ Gabaõ wã. Yaa sẽn na yɩl n põs sãoongã yĩng bal la Gabaõ nebã sẽn maan sɩlem woto wã bɩ? Pa woto ye. B manesmã wilgdame tɩ b ra rat n taa Israɛll Wẽnnaamã yam. A Zeova sakame tɩ Gabaõ nebã lebg neb sẽn na n “kɛ raado la b yõng koom n kõ neba Zusoaba tẽn-kugra yĩnga.” (Zozue 9:11-27) Gabaõ nebã kell n wilgame tɩ b tʋllame n tʋm sik-m-meng tʋʋm a Zeova tʋʋmdã pʋgẽ. Yaa wa Gabaõ buudã neb kẽer zĩnda Netinim dãmba bɩ tʋm-tʋmdb sẽn yi Babilon yembdẽ wã n lebg n wa wã sʋka, sẽn tʋm wẽn-doogã b sẽn lebs n me wã pʋgẽ. (Ɛsdras 2:1, 2, 43-54; 8:20) D tõe n dɩka b togs-n-taar n modg n tall laafɩ ne Wẽnnaam la d yɩ neb sẽn sakd n tʋmd sik-m-meng tʋʋm a tʋʋmdẽ wã.
D yɩ neb sẽn modgd b mense
15. Bõe yĩng tɩ tar yõod tɩ d bãng zĩis nins yell b sẽn gom kiris-neb Gɛrk Gʋlsg Sõamyã pʋgẽ wã?
15 Biiblã sẽn gom zĩis nins yellã bee kiris-neb Gɛrk Gʋlsg Sõamyã kɩbay wala a Zezi la tʋm-tʋmd a Poll koe-moonegã so-togsã pʋsẽ. (Mark 1:38; 7:24, 31; 10:1; Luk 8:1; 13:22; 2 Korẽnt dãmba 11:25, 26) Kɩbay nins sẽn pʋgdã pʋsẽ, bɩ y mams so-togs nins b sẽn da maanã n gese.
16. Wãn to la kiris-neb nins sẽn be Beere wã wilg tɩ b nonga a Polle?
16 A Poll so-toak a yiib-n-soabẽ wã (rẽega sĩb-zɩɩm kartã zugu), a taa Filip sẽn be Gɛrɛs tẽngã masã wã. [gl 33] A moona koe-noogã be, tɩ b kẽes-a bãens roog n wa bas-a, t’a yi be n kẽng Tesaloniki. (Tʋʋma 16:6–17:1) Zʋɩf rãmbã sẽn wa ne tẽn-dãmbgã yĩnga, Tesalonik saam-biisã sagla a Poll t’a kẽng Beere, sẽn zãr ne kɩlometr 65 wã. A Poll koe-moonegã woma biis Beere, la Zʋɩf rãmbã waame n tus zãma wã tɩ b rãmb tẽngã. Woto yĩnga, “ba-biisa tʋma a Poll t’a kẽng ko-kãsenga noore,” la “neb nins sẽn yãag a Pollã yãaga yẽnda n ta Atɛn.” (Tʋʋma 17:5-15) Tẽedb paalsã ra sakame n kẽn kɩlometr 40 n kẽng Eze mogrẽ wã, n yao ligd n kẽ batayo n maan kɩlometr 500. So-toak a woto ra tõe n waa ne yelle, la saam-biisã saka yel-kãens sẽn na yɩl n zĩnd ne a Poll n paase, a sẽn togd sor Wẽnnaam yʋʋr yĩngã.
17. Bõe võor la d tõe n wʋm sõma n paase, d sã n bãng Mile ne Efɛɛz sẽn zãr ne taab to-to wã?
17 A Poll so-toak a tãab-n-soabã sasa (rẽega kẽeg kartã zugu), a taa Mile koom kogendã yalsg zĩigẽ. A tʋmame tɩ b bool kãsem dãmb sẽn be Efɛɛz tigingã sẽn da zãr ne kɩlometr 50 wã tɩ b wa. Mams-y n ges kãsem dãmb kãensã sẽn bas b tʋʋm a taabã n na n kẽng a Poll nengẽ wã. B sẽn da wa n be sorẽ wã, b ra segd n gomda b sẽn na n wa seg a Pollã yelle. B sẽn wa n tigim ne a Poll la b wʋm a sẽn pʋʋsã poore, “bãmb fãa yãba wʋsgo n mobg a Poll n mok yẽnda.” Rẽ poore, “bãmb yãaga yẽnda hal n tɩ ta koom koglga zĩigẽ” sẽn na yɩl n kẽng Zerizalɛm. (Tʋʋma 20:14-38) B ra tara yɛl wʋsg n na n tags la b gom b zutu, b sẽn da wa n lebd Efɛɛzã. Rẽ yĩnga, b sẽn tall nonglem ning n kẽn kẽn-wok woto sẽn na yɩl n zĩnd ne Wẽnnaam tʋm-tʋmdã sẽn da tõe n zãms-b la a keng b raoodã pa noom yãmb sɩda? Yãmb pa ne bũmb kɩba-kãngã pʋgẽ y sẽn tõe n tũ y vɩɩmã pʋgẽ sɩda?
Bao-y bãng Kãabg Tẽngã la bũmb ning sẽn gũud tõndã
18. Zĩis nins Biiblã sẽn gom b yellã wɛɛngẽ, bõe la d na n maane?
18 Mak-kãensã wilgdame tɩ tara yõod tɩ d bãng tẽng ning Wẽnnaam sẽn kõ Israɛll nebã, la tɩ tẽn-kãngã sõngda tõnd tɩ d wʋm Biiblã kɩbay wʋsg võore. (La d tõe n paasa d bãngrã ne tẽns nins sẽn gũbg kãabg tẽngã tɩ Biiblã gom b yellã.) Tõnd sã n bãng Kãabg Tẽngã la d wʋm a yɛlã võor n paase, d pa na n yĩm no-kãseng b sẽn da baood tɩ Israɛll nebã tũ sẽn na yɩl n kẽ tẽng ning sẽn ‘tar bĩisim la sɩɩdã’ pʋgẽ wã ye. No-kãng ra yaa b zoe a Zeova la b tũ a noyã.—Tõodo 6:1, 2; 27:3.
19. Arzãn dãmb a yiib bʋs yell la d segd n tagsd wakat fãa?
19 Rũndã-rũndã me, tõnd segdame n zoe a Zeova la d tũ a noyã. D sã n maan woto, d na n sõng n kɩtame tɩ tõnd tẽeb arzãnã sẽn be kiris-neb tigingã pʋgẽ dũniyã gill zugã yɩ noog n paase. D na n ket n bãngda tẽeb arzãnã la d paamd bark a pʋgẽ. La d miime tɩ bark sẽn yɩɩd woto n wate. A Zozue talla Israɛll nebã n pasg Zʋrdẽ kʋɩlgã n kẽ tẽng sẽn sakd kood la sẽn noom pʋgẽ. Masã, d sɩd tõe n gẽega tẽng zug Arzãnã, sẽn yaa tẽn-noog ning sẽn be tõnd taoorã ne bas-m-yam.
Y tẽrame bɩ?
• Bõe yĩng tɩ d segd n tʋll n bao n bãng tẽns nins yell Biiblã sẽn gomdã sõma n paase?
• Sõs-kãngã pʋgẽ, yel-bʋs sẽn tɩ loe ne zĩisã n kõ yãmb vẽnegr n paase?
• Bõe n lebg vẽeneg ne yãmba, y sẽn bãng zĩisã sẽn tɩ loe ne yɛl kẽerã?
[Zãmsgã sogsgã]
[Zĩ-gũbri, seb-neng 14]
‘ Voyez le bon pays ’
Yʋʋmd 2003 la 2004 tigims gĩn sull tigis-kãsemsẽ wã, yɩɩ ne sũ-noog la a Zeova kaset rãmbã reeg seb-bil ning sẽn yaa ‘ Voyez le bon pays ’ wã. Seb-paall kãngã sẽn be sẽn zems buud-goam 80 pʋsẽ wã pida ne kart dãmb sẽn tar gʋlem wʋsg ne zĩ-gũb sẽn wilgd Biiblã sẽn gomd zĩis nins yellã, sẽn tɩ yɩɩd fãa Kãabg Tẽngã wakat toɛy-toɛy pʋsẽ.
Sõsg ning b sẽn naag kada soabã gomda kart dãmb takɩ yelle, n wilg seb-nensã sõor ne gʋls-tagd wala [15]. Yãmb sã n tar seb-paall kãngã, bɩ y rɩk sẽk n bãng a yɛl kẽer sẽn tõe n sõng-y tɩ y bãng la y wʋm Wẽnnaam Gomdã võor sõma n paase.
1) Kart dãmb wʋsg tara goam bɩ zĩ-gũb sẽn wilgd bãn wʋsg sẽn be kartã zug võore [18]. 2) Kart dãmb wʋsg wilgda zĩisã zãrem ne taab sẽn wilgd miles rãmbã la a kɩlometr dãmbã sõore, tɩ tõe n kɩt tɩ y bãng zĩisã zãrem [26]. 3) Naoor wʋsgo bõn-sɩleng n teesd rɩtg babgã, tɩ y tõe n bãng y sẽn be babg ningã [gl 19]. 4) Naoor wʋsgo, kart dãmbã pʋsẽ, zĩis nins sẽn zãntã yaa gʋlem-gʋlem [12]. 5) Kartã tõe n tara gʋls-biis la nimero rãmb a kɩremsẽ wã, sẽn sõngd-y tɩ y tõe n mak n bãng galʋ-tẽns bɩ zĩis yʋy sẽn beẽ [gl 23]. 6) Seb-nens a yiib ẽndɛgsã sẽn tar zĩisã yʋyã zĩigẽ [34-5], y tõe n yãa seb-nensã nimero rãmb sẽn gʋls tagd-tagdo, naoor wʋsgo b tũuda ne kart sẽn wilgd zĩig wala E2. Y sã n wa tũnug ne bõn-kãensã naoor a wãna, y na n mikame tɩ b sõngd-y lame tɩ y paas y bãngrã la yɛlã võor wʋmbo.
[Taablo/Kart, seb-neng 16, 17]
TẼNGÃ ZĨIS KARTE
(Sebrã meng pʋgẽ la y tõe n yã fãa)
A. Mog-kãsengã noore
B. Zʋrdẽ nen-taoor babgã
1. Asɛɛr babgã
2. Door mogr noore
3. Saarõ weoogã
4. Filisti weoogã
5. Yaang la nen-taoor sʋk bãoogã
a. Megido tẽn-lamdã
b. Zizreɛll tẽn-lamdã
C. Zʋrdẽ nen-taoor tãensã
1. Galile tãensã
2. Karmell tãensã
3. Samari tãensã
4. Sefela (tãn-bõonesã)
5. Zida tãensã
6. Zida rasempʋɩɩgã
7. Negɛb
8. Parã rasempʋɩɩgã
D. Araba (bãoogã)
1. Hule bãoogã
2. Galile mogrã zĩiga
3. Zʋrdẽ bãoogã
4. Yamsem mogrã (Mog-kɩɩngã)
5. Araba (Yamsem mogrã goabga)
E. Tãensã/Zʋrdẽ yaangã zĩ-zãntsã
1. Basã
2. Gileaad
3. Amon ne Moaab
4. Edom tãngã zĩ-lama
F. Libã tãensã
[Kart]
Ɛrmõ tãngã
More
Abɛl-mehola
Betɛll
Gibeon
Gaza
Sukot
Gilgall
Hebrõ
Sodom?
Kadɛs
Zogbeha
[Kart/Foto, seb-neng 15]
(Sebrã meng pʋgẽ la y tõe n yã fãa)
KANAÃ
Megido
Dotã
Sekɛm
Betɛll (Luz)
Zerizalɛm (Salɛm)
Betlehɛm (Efrata)
Mamre
Geraar
Rehobot
Ai
Hebrõ
(Makpela)
Bɛɛr-seba
Sodom?
NEGEB
Rehoboth?
[Tãensã]
Moria
[Mogre]
Yamsem Mogrã
[Kʋɩlsã]
Jʋrdẽ
[Foto, seb-neng 15]
A Abrahaam pɩʋʋga tẽngã
[Kart, seb-neng 18]
(Sebrã meng pʋgẽ la y tõe n yã fãa)
Filip
Amfipolis
Beere
Atɛn
Korẽnt
Neapolis
Tesalonik
SAMOTRAS
Troas
Efɛɛz
Mile
ROOD