Tall-y tagsg sẽn zems rãamã yũub wɛɛngẽ
Tall-y tagsg sẽn zems rãamã yũub wɛɛngẽ
“[Rãam yaanda neda], rãam wata ne zaba. Sẽn bas-a tɩ rãam lub-a ka yam soab ye.”—YELBŨNA 20:1,
1. Wãn to la yɩɩl-gʋlsdã wilg a mi-beoog ne kũun kẽer a Zeova sẽn kõ?
“BARK sõama fãa la kũun sõama fãa yita yĩngr vẽenem Ba nengẽ n sigda, la bãmb yaa a yembr daar fãa n ka tedgd baa bilf ye.” Woto la karen-biig a Zak gʋls-yã. (Zak 1:17) Yɩɩl gʋlsdã sẽn da tar mi-beoog ning ne Wẽnnaam, kũun wʋsg nins a sẽn kõ-a wã yĩngã, a yɩɩla woto: “Yãmb kɩtame tɩ yamd bɩ yir dũms yĩnga, tɩ kooda me bɩt ninsaalba sõngr yĩnga, tɩ bãmb tõe n paam dɩɩb sẽn yit tẽnga pʋgẽ, la rãam sẽn kõt neba sũ-noogo, la kaam sẽn salemd bãmb nense, la rɩɩb sẽn kengd neba sũyã.” (Yɩɩl Sõamyã 104:14, 15) Divẽ wã la rãamã buud a taabã me yaa kũun sẽn yaa sõma sẽn yit Wẽnnaam nengẽ wala moodã, rɩɩbã la kaamã. D manesem segd n yɩɩ wãn ne kũun kãensã?
2. Sogs-bʋs la d na n leok rãamã yũub wɛɛngẽ?
2 Kũun yaa sõma, b sã n tʋmd ne-a tɩ zems bala. Wala makre, sɩɩd ‘yaa noogo,’ la “fo sã n dɩ sɩɩd wʋsgo ka sõama ye.” (Yelbũna 24:13; 25:27) ‘Rãam yũub bilf’ tõe n talla yamleoogo, la a yũub wʋsg yaa yel-kãsenga. (1 Tɩmote 5:23) Biiblã keoogdame tɩ rãam yaanda neda, la a paase: “Rãam wata ne zaba. Sẽn bas-a tɩ rãam lub-a ka yam soab ye.” (Yelbũna 20:1, Sebr Sõngo) La bas tɩ rãam lub-f rat n yeelame tɩ bõe? * Yaa f sẽn na n yũ rãam tɩ ta zĩ-bʋg la b tõe n yeel tɩ f yũu wʋsg tɩ looge? Tags-bʋg n zems yel-kãngã wɛɛngẽ?
Wãn to la f tõe n bas tɩ rãam ‘lub-fu’?
3, 4. a) Bõe n wilgd tɩ Biiblã gɩdga rãam yũ n su? b) Yel-bʋs kẽer n wilgd tɩ ned tɩga rãam?
3 Pĩnd Israɛllẽ wã, biribl sã n da yaa yão-be-ned la rã-yũud piig la a yiib n pa rat n toeem, b ra lobd-a-la ne kug n kʋ. (Tõodo 21:18-21) Tʋm-tʋmd a Poll sagla kiris-nebã tɩ b “ra maan tũud-n-taar ne ned sẽn boond a meng tɩ ba-biiga n yaool n yaa nin-yoaada walla zoe-bõn soaba walla bõn-naands pʋʋsda walla nin-tʋʋsa walla rã-yũuda [rã-tɩgda, NW ] walla fãad ye, hal tɩ yãmb da sak n dɩ ne ned a woto ye.” Vẽenega, Gʋlsg Sõamyã gɩdga rãamã yũ tɩ looge.—1 Korẽnt dãmba 5:11; 6:9, 10.
4 Biiblã bilgda yɛl sẽn wilgd tɩ ned yũu rãam n tɩgã n yetẽ: “Rãam sã n yaa miuug n pɩnd wamd pʋgẽ n kɛɛda, ra sak n ges-a ye. A rũmda ned wa waafo, a rũmda wa põeere. Fo nin na n yãa bõn-sãamse, la fo na n yɩɩ mo-be-neda.” (Yelbũna 23:31-33) Rãam yũ tɩ loog rũmda wa waaf sẽn tar zẽnem, n wat ne bãase, zu-lɛbga, n tõe tɩ ned sobg menga. Ned sẽn tɩg rãam tõe n yãa “bõn-sãamse,” a sẽn tõe n wa zʋbsdẽ wã yĩnga. A leb n tõeeme n pa tõog n yõk a meng wa raasenkam ne gom-dẽgd la tʋlsem wẽns togsg ye.
5. Bõe yĩng tɩ rãam yũ tɩ loog yaa wẽnga?
5 Yaa wãn to ne ned sẽn na n yũud rãam n gũusd n pa suud tɩ yaa vẽeneg nebã nifẽ? Neb kẽer tõe n yũu rãam wʋsg tɩ nebã pa ne t’a yũume n su ye. La tags tɩ woto pa yell sɩd yaa belgre. (Zeremi 17:9) Bilf-bilfu, rãamã tõe n wa kula ned t’a lebg ‘rã-yũuda,’ bɩ rãam yamba. (Tɩt 2:3) A Caroline Knapp gʋlsame n wilg sẽn tõe n yɩ to-to tɩ ned wa lebg rã-yũudã wɛɛngẽ. A yeelame tɩ “rãam pa kuus ned zĩig pʋgẽ ye, yaa bilf-bilfu.” Rã-yũur sɩd yaa bẽd-kʋʋdg sẽn solge!
6. Bõe yĩng tɩ d segd n zãag d meng ne rãam yũ tɩ loog la yão-beedo?
6 Ges-y a Zezi keoog-kãngã me: “Bɩ y gũus y mense n da sak tɩ yão-beed ne rã-yũuri la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri.” (Luk 21:34, 35) Pa tɩlae tɩ ned yũ rãam n su tɩ yaool n kɩt t’a zʋm yĩngã bɩ tẽebã wɛɛngẽ ye. Yaa wãn to, a Zeova daarã sã n wa mik nin-kãng yel-kãngã pʋgẽ?
Rã-yũur sẽn tõe n wa ne yɛl ninsi
7. Bõe yĩng tɩ rã-yũur kɩɩsd noor ning sẽn be 2 Korẽnt dãmb 7:1 pʋgẽ wã?
7 Rã-yũur tõe n kɩtame tɩ yɛl wʋsg paam ned yĩngã la tẽebã wɛɛngẽ. Sãoor bãas la zu-lɛbg bee rãamã bãas sʋka. Ned sã n yũud rãam wʋsg tɩ loogdẽ, sã n beẽ-n-beẽ tõe n waa ne bãas nins b sẽn boond tɩ kãnsɛɛrã, diabɛte, n paas sũur la pʋg bãase. Vẽenega, rãamã yũub wʋsgã yaa lebend ne Gʋlsg Sõamyã no-kãngã: “Bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.”—2 Korẽnt dãmba 7:1.
8. Sã n yaa ne Yelbũna 23:20, 21, bõe la rã-yũur tõe n wa ne?
8 Rã-yũur tõeeme me n sãam ned ligd bɩ a tʋʋm menga. Pĩnd Israɛllã rĩm a Salomo keoogame: “Ra tũ rã-yũudb la yão-beed rãmb ye.” Bõe yĩnga? A wilgame: “Tɩ bõe, rã-yũudb ne yão-beed rãmb na n lebga nimbãan dãmba. Gõeem kɩtdame tɩ ned yeelg kʋɩdse.”—Yelbũna 23:20, 21.
9. Bõe yĩng tɩ yaa yam tʋʋmd tɩ f ra yũ rãam n yaool n wẽn mubilli?
9 Bãngr sebr a yembr (The Encyclopedia of Alcoholism) wilga yell a to n yeele: “B vaeesame n yã tɩ rãam kɩtdame tɩ ned mobill wẽneb minim booge, t’a pa tõe n yɩ tao-tao n yõg fẽrʋ bɩ n lob valʋ wã ye. Sẽn paase, a ye pa tõe n maan yɛlã tɩ tũ taaba, a gũusgã la a nenemã boogdame, la a pa tõe n mag yɛlã sõma tɩ zems wa pĩndã me ye.” Yũ rãam n yik n wẽn mubillã wata ne yel-beedo. Etazĩni pʋgẽ wã bala, neb tusa pi-gĩn n kiidi, tɩ neb tus-kobs pogendẽ, rãamã yũub sẽn wat ne aksɩdã rãmb ninsã yĩnga. Yel-kãngã sẽn paamd neb nins n tɩ yɩɩd yaa kom-bɩɩsã sẽn pa tar minim wʋsg mubilã wẽneb wɛɛngẽ la b pa tõe rãamã. Ned tõe n yũ rãam wʋsg n yik n wẽn mubill la a yeel wakat kãng pʋgẽ t’a nanda vɩɩmã sẽn yaa Wẽnnaam a Zeova kũunã sɩda? (Yɩɩl Sõamyã 36:10) Vɩɩmã sẽn yaa bõn-sõngã yĩnga, nand tɩ f wẽn mubilli, sẽn são n yɩɩd yaa f sẽn pa na n yũ rãam baa bilfu.
10. Wãn to la rãamã tõe n sãam tõnd tagsgã, la bõe yĩng tɩ woto yaa yelle?
10 Rãamã yũub wʋsgã sãamda nebã yĩngã la tẽebã wɛɛngẽ. Biiblã yetame: “Rãam menesda neba yam.” (Oze 4:11) Rãam sãamda ned tagsgo. Etazĩni siglg a yembr sẽn get dorgã rɩkr yell tẽn-kãng pʋgẽ togsa woto: “Ned sã n yũ rãam, rãamã tʋgd n kẽe a zɩɩmẽ wã n ta a kalkõtã tao-tao. Rãamã sɩngdame n kɩtdẽ tɩ kalkõtã babs nins sẽn so nedã tagsa wã la a sũurã tʋʋmd lebg maasga. Nedã ye pa tõe n yõk a meng ye.” Sã n wa yaa woto, d tõe n bʋdga nana-nana, n maand yaare, la d lʋɩ kʋɩɩbg wʋsg pʋgẽ.—Yelbũna 20:1.
11, 12. Wãn to la rãam yũub wʋsgã tõe n sãam ned tẽebo?
11 Sẽn paase, Biiblã kõta noor woto: “Yãmb sẽn dɩta walla yãmb sẽn yũuda walla yãmb sẽn maand bũmb a taaba, bɩ y maan fãa Wẽnnaam waoogr yĩnga.” (1 Korẽnt dãmba 10:31) Rãam yũub wʋsg waoogda Wẽnnaam bɩ? Kiris-ned segd n gũusame t’a yʋʋr da yi t’a yaa rã-yũud piig la a yiib ye. Rẽ sãamda a Zeova yʋʋrã, pa waoogd-a ye.
12 Yaa wãn to yẽ, kiris-ned sẽn pa tar yõk-m-meng rãamã yũub wɛɛngẽ sã n kɩt t’a tẽed-n-taag sẽn tõe n yaa karen-bi-paalg lʋɩ tẽeba wɛɛngẽ? (Rom dãmba 14:21) A Zezi keooga tõnd woto: “Ned sã n maan kom-bõoneg kãens sẽn tẽed maama ned a yembr t’a lʋɩ, a yaa sõama tɩ b loe yẽ soab kokor ne pĩig kugri n lob-a ko-kãsenga pʋgẽ.” (Matɩe 18:6) Rãam yũub wʋsg tõeeme me n kɩt tɩ ned kong zu-noog tʋʋm a sẽn da tar tigingã pʋgẽ. (1 Tɩmote 3:1-3, 8) D bãng me tɩ rã-yũurã tõe n waa ne rãmbg zakã pʋgẽ.
Y na n maana wãn n gil rã-yũurã zu-loeese?
13. Bõe n yaa tɩlae sẽn na yɩl n lak d mens ne rãamã yũ tɩ loogã?
13 D sã n dat n zãag d meng ne rã-yũurã sẽn wat ne yɛl ninsã, yaa d sẽn na n zãag d meng ne yũ tɩ loogã, pa yũ n tɩgã bal ye. Ãnd n tõe n bãng n wilg yãmb yũub sẽn zems la sẽn looge? Sẽn mik tɩ rẽ tɩ loee ne yɛl wʋsgã yĩnga, noor sẽn pa vigsd kae d sẽn tõe n kõ n wilg rãam yũ tɩ loogã sẽn yaa to-to ye. Ned fãa segd n bãnga a sẽn tõe n yũ n tekẽ, la a ra zʋʋg rẽ ye. Bõe n na n sõng yãmb tɩ y bãng rãam sã n yaa wʋsg tɩ loog ne yãmba? Noor beeme n tõe n wilg-d sor bɩ?
14. Bõe n tõe n sõng yãmb tɩ y bãng y sẽn segd n yũ n tek zĩig ninga?
14 Biiblã yetame: “Tall yam ne yẽesem n da sak tɩ b loog n bas-f ye. Bãmb na n yɩɩ vɩɩm f yĩnga. La b na n yɩɩ wa kĩnd fo kokorẽ.” (Yelbũna 3:21, 22) Rẽnd yell ning sẽn na n wilg tõnd sorã la woto: Yãmb sã n yũ rãam tɩ wa sek a na kɩt tɩ y ye pa tõe n tags tɩrga, rat n yeelame t’a yaa wʋsg ne yãmba. La y segdame n tall pʋ-peelem ne y mengã n sak n deeg yãmb mengã sẽn segd n yũ n tekẽ wã.
15. Wakat bʋg la d pa segd n yũ rãam baa yaa bilfu?
15 Wakat ning menga, d pa segd n yũ rãam baa yaa bilf meng ye. Pag sã n tʋtẽ, a tõe n yãka yam n pa yũ rãam baa bilfu, yɛl nins rẽ sẽn tõe n wa ne biigã sẽn be a pʋgẽ wã zug yĩnga. Sẽn paase, d na n wilga nonglem ne ned sẽn maood n dat n bas rãam bɩ sẽn kis rãam n da yũ rãam a taoor ye. A Zeova kõo neb nins sẽn da tʋmd maan-kʋʋrã tʋʋm sɛk-roogẽ wã noor woto: “[Y] sã n dat n kẽ sɛk-roogẽ wã, bɩ y ra yũ rãam walla bũmb sẽn yilimd neng ye, tɩ y sã n maan woto, y na n kiimi.” (Maankʋʋre 10:8, 9) Woto yĩnga, ra yũ-y rãam n yaool n kẽng kiris-neb tigissẽ wã, y sã n wa moond koe-noogã, la y sã n tʋmd tẽeb tʋʋmd a to ye. Sẽn paase, tẽns nins pʋsẽ rãamã yũub sẽn gɩdgã, bɩ b sẽn yãkẽ yʋʋm ned sẽn segd n ta n yaool n yũ rãamã, d segd n tũu tẽngã noyã.—Rom dãmba 13:1.
16. B sã n wa kãab-y rãam, bõe la y segd n maane?
16 B sã n kãab yãmb rãam, pipi sokr y sẽn segd n sok y meng la woto: ‘Rẽ yĩnga m segd n yũume menga?’ Y sã n yãk yam n na n yũ, bɩ y yãk y sẽn segd n yũ n tek to-to wã, la y ra yũ tɩ zʋʋg rẽ ye. Ra bas-y tɩ kõt-yaar soab tus-y tɩ y yũ tɩ loog ye. La maan-y gũusg ne rãam b sẽn kõt n pa yãkd koak wala mariyaas rãmbã sasa wã. Tẽns wʋsg pʋsẽ, laloa wã kõo kambã sor tɩ b tõe n yũ rãam. Roagdbã tog n zãmsa b kambã sẽn segd rãamã yũub wɛɛngẽ, la b sõng-b tɩ b tall yel-manesem sẽn zems rẽ wɛɛngẽ.—Yelbũna 22:6.
Y tõe n maoa ne rãamã yũub wʋsgã
17. Bõe n tõe n sõng yãmb tɩ y bãng rãamã yũub wʋsgã sã n yaa yell ne yãmba?
17 Rãam la rã-toos wala kutaku wã yũub wʋsgã yaa yell ne yãmb bɩ? Bãng-y vẽeneg tɩ rãamã yũub wʋsgã sã n lebga yãmb yel-wẽnd sẽn solge, sã n wa beẽ-n-beẽ, y na n yãa a biisã. Woto yĩng bɩ y fees y meng neer ne pʋ-peelem. Sok-y y meng woto: ‘Mam yũudame n yɩɩd raasenkam bɩ? Masã mam yũuda rãam pãng sẽn yɩɩd pĩnd rẽndã bɩ? Mam yũuda rãamã sẽn na yɩl n põs yɩɩre, n yĩm m sũ-sãamsã bɩ m zu-loeesã bɩ? Mam zakã ned a ye bɩ m zoa zoe n wilga maam tɩ m gũus ne m dãamã yũub bɩ? Mam rãamã yũub waa ne zu-loees m zakã pʋgẽ bɩ? Mam neeme tɩ yaa toog ne-m tɩ m maan semenne, kiuug bɩ kiis n pa yũ rãam bɩ? Mam solgdame n pa rat tɩ nebã bãng mam sẽn yũud rãamã tɩ tat to-to bɩ?’ Yaa wãn to, sã n mik tɩ sogs-kãensã kẽer leokr yaa n-ye? Ra yɩ-y wa ned sẽn ‘ges a meng nin-gɛtg pʋgẽ, la tao-tao bala, a yĩmd a sẽn wẽnd bũmb ninga’ ye. (Zak 1:22-24) Maan-y bũmb nins fãa sẽn yaa tɩlaeyã sẽn na yɩl n bas minim-wẽngã. Bõe la y tõe n maane?
18, 19. Wãn to la y tõe n bas rãam yũub wʋsgo?
18 Tʋm-tʋmd a Poll sagla kiris-nebã woto: “Da yũ-y rãam n tɩg ye, yõwã sãamda neda. La bɩ y tɩg ne Sɩɩg Sõngo.” (Efɛɛz rãmba 5:18) Bao-y n bãng yãmb sẽn tõe n yũ tɛk tɩ pa yɩ yelle, la y kell n da zʋʋg rẽ ye. Rɩk-y sard sẽn pa vigsd tɩ y pa na n yũ tɩ loog rẽ, la y tall yõk-m-menga. (Galat dãmba 5:22, 23) Yãmb tara tũud-n-taas sẽn tusd-y tɩ y yũ tɩ loog bɩ? Sã n yaa woto bɩ y gũusi. Biiblã yetame: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.”—Yelbũna 13:20.
19 Yãmb sã n yũud rãam sẽn na yɩl n yĩm zu-loɛɛga, bɩ y bas rẽ maaneg la y mao ne zu-loɛɛgã menga. D tõe n maoo ne zu-loeesã, d sã n tũ sagls nins sẽn be Wẽnnaam Gomdã pʋgẽ wã. (Yɩɩl Sõamyã 119:105) Yɩ-y tao-tao n bao kiris-ned sẽn yaa kãsem soab y sẽn kɩs sɩd ne, t’a sõng-yã. Rɩ-y a Zeova seglsã nafa sẽn na yɩl n paas y tẽebã pãnga. Paas-y y zems-n-taarã ne Wẽnnaam. Pʋʋs-y-yã wakat fãa, sẽn yɩɩd fãa yãmb pãn-komsmã wɛɛngẽ. Kos-y Wẽnnaam t’a ‘mak y yamã ne y sũurã.’ (Yɩɩl Sõamyã 26:2) Wala d sẽn yã sõsg ning sẽn loogã pʋgẽ wã, maan-y y sẽn tõe tɛk sẽn na yɩl n kẽn ne burkĩndi.
20. Bõe n tõe n wa yɩ tɩlae tɩ y maan sẽn na yɩl n mao n tõog rãamã yembdo?
20 Yaa wãn to, sã n mik tɩ baa ne y modgrã fãa, y ket n yũuda wʋsgo? Rẽnd y segd n tũu a Zezi sagl-kãngã: ‘Fo nug sã n dat n maan foo tɩ f lʋɩ, bɩ f fiuug-a. Yaa neere tɩ fo yɩ nug-yende n paam vɩɩm, n yɩɩd fo sẽn na n paam nus a yiibu n kẽ [Zeyɛnnẽ].’ (Mark 9:43) Yellã tɩɩm yaa: Bɩ y ra yũ rãam baa bilf ye. Yaa woto la pag a yembr d sẽn na n bool t’a Irɛn yãk yam n maane. A yeelame: “M sẽn bas rãamã yʋʋm a yiib la pʋɩ-sʋk la bal poore, m sɩngame n tagsdẽ tɩ m sã n yũ rãam baa yaa bilfu pa na n yɩ yell ye, sẽn na yɩl bal n ges sã n sakda ne-ma. La m sẽn tags woto wã poor bala, zĩig pʋgẽ m pʋʋsa a Zeova yellã wɛɛngẽ. M dɩka sard tɩ m pa na n ye yũ rãam hal tɩ ta dũni paalgã pʋgẽ, pa gũus meng bɩ kell n yɩ woto beenẽ menga.” Sẽn na yɩl n paam vɩɩmã Wẽnnaam dũni paalgã sẽn yaa tɩrgã pʋgẽ, rãam basg zãng-zãng pa bũmb sẽn yaa toog tɩ loog noor ye.—2 Pɩɛɛr 3:13.
‘Bɩ yãmb zoe zoeesa sõama sẽn na yɩl n paam kũunã’
21, 22. Bõe n tõe n gɩdg tõnd tɩ d pa baas zoees ning d sẽn zoet vɩɩmã yĩngã, la wãn to la d tõe n gũus tɩ rẽ ra paam-do?
21 Tʋm-tʋmd a Poll rɩka kiris-ned vɩɩmã n mak ne wags-taab zoeese, n yeele: “Yãmb ka mi tɩ neb sẽn zoet zoeese, bãmb fãa zoetame, la yaa ned a ye n deegd kũun bɩ? Bɩ yãmb zoe zoees sõama tɩ yãmb tõe n paam kũuni. La neb nins fãa sẽn maood tɩ tõogã, b modgda b mens n maand bũmb fãa tɩ zemse. La bãmb maanda woto tɩ paam maanf sẽn na n sãam, la tõnd maandame tɩ paam maanf sẽn ka sãamd ye. Dẽ yĩnga, mam zoetame, la mam ka zoet yaar ye; mam pãbda nug-gila, la mam ka wẽed pemsem ye. La mam modgda m menga n tõogd m yĩnga, tɩ mam sẽn moond koɛɛgã n togsd neb a taabã, Wẽnnaam kõn yaool n zãgs maam ye.”—1 Korẽnt dãmba 9:24-27.
22 Yaa neb nins sẽn tõogd n baas zoeesã bal n paamd keoorã. Zoees ning d sẽn zoet vɩɩmã yĩngã pʋgẽ, rãamã yũub wʋsgã tõe n gɩdga tõnd tɩ d pa baas-a ye. D segd n talla yõk-m-menga. D sã n dat n sɩd baas zoeesã, rẽnda d lak d mens ne “rã-tɩgre.” (1 Pɩɛɛr 4:3) D segd n talla yõk-m-meng bũmba fãa pʋgẽ. Rãamã yũub wɛɛngẽ, yaa yam tʋʋmd ne-d tɩ d “bas Wẽnnaam kɩɩsgo la dũniyã ratem sẽn yaa wẽnsã, la d gũus d mens dũniyã ka masã n maan tɩrga la d sak Wẽnnaam.”—Tɩt 2:12.
[Tẽngr note]
^ sull 2 Sõs-kãngã pʋgẽ, ‘rãamã’ yaa rã-moaaga, bɩɛɛre, divẽ, la nasaar dã-toos wala wiski wã.
Y tẽrame bɩ?
• Rãamã yũ tɩ loogã yaa bõe?
• Rãam yũub wʋsgã wata ne yel-bʋgo?
• Wãn to la y tõe n põs yɛl nins rãam yũub wʋsgã sẽn tõe n wa ne wã?
• Wãn to la ned tõe n mao ne rã-yũuri?
[Zãmsgã sogsgã]
[Foto, seb-neng 29]
Reng-y n yãk-y y sẽn na n yũ n tekẽ
[Foto, seb-neng 30]
Pʋʋs-y a Zeova wakat fãa y pãn-komsmã wɛɛngẽ