Tũ-y mak-sõng ning a Zezi sẽn kõ wã
Tũ-y mak-sõng ning a Zezi sẽn kõ wã
“Mam kõo yãmb mamsg tɩ y maan wa mam me sẽn maan yãmbã.”—ZÃ 13:15.
1. Bõe yĩng t’a Zezi yaa mak-sõng kiris-nebã sẽn segd n tũ?
ÃDEM-BIISÃ zãmaan fãa, ned a yembr bal n pa tol n maan yel-wẽnd a vɩɩmã tõre. Yaa a Zezi. A Zezi sẽn yãk a toogo, “ned ka be n ka beegdẽ ye.” (1 Rĩm dãmba 8:46; Rom dãmba 3:23) Yaa rẽ n kɩt tɩ kiris-neb hakɩkã get a Zezi wa mak-sõng sẽn zems zãng b sẽn segd n tũ. Sɩd me, yʋʋmd 33 Nizã rasem 14, a Zezi kũumã ket bilfu, yẽ mengã yeela a karen-biisã tɩ b rɩk a togs-n-taare. A yeelame: “Mam kõo yãmb mamsg tɩ y maan wa mam me sẽn maan yãmbã.” (Zã 13:15) Yaoolem yʋʋn-kãngã, a Zezi wilga kiris-nebã sẽn segd n modg n tall manesem nins n yɩ wa yẽ. Sõs-kãngã pʋgẽ, d na n goma bãmb b wãn yelle.
Sik-m-meng yaa tɩlae
2, 3. Wãn to la a Zezi kõ mak-sõng sẽn zems zãng sik-m-mengã wɛɛngẽ?
2 A Zezi sẽn da wa n sagend a karen-biisã tɩ b tũ mak-sõng ning a sẽn basã, sẽn yɩɩd fãa ra yaa sik-m-mengã yell la a sẽn da gomdã. Naoor yaka, a sagla a karen-biisã tɩ b yɩ sik-m-mens rãmba, la Nizã rasem 14 yʋngã, a wilga a sik-m-mengã n waas a tʋm-tʋmdbã naoã. Rẽ poore a Zezi yeela woto: “Mam sẽn yaa yãmb Zusoab la y karen-saamb n waas yãmb nao wã, yãmb me tog n waasa taab nao wã.” (Zã 13:14) Rẽ poore, a yeela a tʋm-tʋmdbã tɩ b tũ mak-sõng ning a sẽn basã. Ad woto sɩd yɩɩ mak-sõng tɛkẽ sik-m-mengã wɛɛngẽ!
3 Tʋm-tʋmd a Poll yeela tõnd tɩ nand t’a Zezi wa tẽng zugu, a ra tara Wẽnnaam yalẽ. Baasg zãnga, a sika a meng n lebg ninsaal bala. Sẽn paase, ‘a sika a meng halɩ n sak n ki, n ki kũum [da-luk] zugu.’ (Filip rãmba 2:6-8, Kãab-paalgã Koe-noogo) Tags-y n gese. A Zezi sẽn yaa a soab ning sẽn pʋgd Wẽnnaam ãndũniyã fãa pʋgẽ wã sakame n na n lebg ned sẽn pa ta malɛgsã, n yɩ bi-pɛɛlga, n bɩtẽ la a sakd roagdb sẽn pa zems zãnga, n baas n ki wa tʋʋm-wẽns maand b sẽn kisi. (Kolos rãmba 1:15, 16; Hebre dãmba 2:6, 7) Sik-m-meng tek woto! D tõe n talla “yam” kãngã buudu, n tall “sik-m-meng yam” woto bɩ? (Filip rãmba 2:3-5) N-ye, la pa nana ye.
4. Yel-bʋs n kɩtd tɩ ninsaalbã wukd b mense, la bõe yĩng tɩ wuk-m-meng yaa yelle?
4 Sik-m-meng yaa lebend ne wuk-m-menga. (Yelbũna 6:16-19) Yaa wuk-m-mengã n wa ne a Sʋɩtãan lʋɩɩsã. (1 Tɩmote 3:6) Wuk-m-mengã kɩɩda yẽg ninsaalbã sũyẽ nana-nana, la a sã n vigl be n sa, a vikr lebgda toogo. Nebã wukda b mens b tẽngã, b buudã, b paoongã, b sẽn karem n ta zĩig ningã, yel-bɛd nins b sẽn tõog n maanã, b ziir bɩ b naam, b neerem, b tõog ɛspoorã wɛɛngẽ wã la yɛl a taab wʋsg yĩnga. Ne rẽ fãa, a Zeova pa get tɩ bõn-kãensã baa a yembr tara yõod ne-a ye. (1 Korẽnt dãmba 4:7) La bõn-kãens sã n kɩt tɩ tõnd yɩ wuk-m-mens rãmba, b sãamda zems-n-taar ning d sẽn tar ne-a wã. “[A Zeova] yaa kãsenga; la baoosgo, bãmb nanda sik-m-mens rãmba la b geta tɩtaam dãmba yɩɩga.”—Yɩɩl Sõamyã 138:6; Yelbũna 8:13.
D tall sik-m-meng d saam-biisã sʋka
5. Bõe yĩng tɩ yaa tɩlae tɩ kãsem dãmbã tall sik-m-menga?
5 Baa tõnd sẽn sõngd ne a Zeova tʋʋmdã, bɩ bũmb nins d sẽn tõog n pids a tʋʋmdã pʋgẽ wã pa segd n kɩt tɩ d wuk d mens ye. Taoor sobend toɛy-toɛy nins d sẽn tar tigingã pʋgẽ wã me pa segd n kɩt tɩ d wuk d mens ye. (1 Kɩbaya 29:14; 1 Tɩmote 6:17, 18) Sɩda, tõnd zɩɩb toɛy-toɛyã sã n yaa kãsems n yɩɩda, d segd n yɩɩ sik-m-mens rãmb n yɩɩg me. Tʋm-tʋmd a Pɩɛɛr sagla kãsem dãmbã tɩ b ra ‘soog Wẽnnaam nebã ne pãng ye, tɩ b yɩ mamsg bãmb yĩnga.’ (1 Pɩɛɛr 5:3) B yãka kãsem dãmbã sẽn na yɩl tɩ b yɩ sõgen dãmb la mak-sõma, la pa nanambs la patrõ rãmb ye.—Luk 22:24-26; 2 Korẽnt dãmba 1:24.
6. Kiris-ned vɩɩmã nen-bʋs pʋsẽ la d segd n tall sik-m-menga?
6 Pa kãsem dãmbã bal n segd n tall sik-m-meng ye. B sã n mak rap nins sẽn yaa kom-bɩɩsã ne neb nins sẽn kʋʋlã, kom-bɩɩsã tõe n tagsa tʋʋll-tʋʋlle, la b tara yãoog pãng n yɩɩda, tɩ rẽ tõe n kɩt tɩ b wuk b mense. Rẽ n so t’a Pɩɛɛr gʋls kom-bɩɩsã woto: “Bɩ yãmb fãa sak taab ne sik-m-menga, tɩ bõe, ‘Wẽnnaam kɩɩsda tɩtaam dãmba, la bãmb ningda sik-m-mens rãmba zut barka.’ ” (1 Pɩɛɛr 5:5) N-ye, tall sik-m-meng wala Kirist yaa bũmb sẽn yaa tɩlae ne tõnd ned kam fãa. Rẽndame tɩ d tall sik-m-meng sẽn na yɩl n moon koe-noogã, sẽn tɩ yɩɩd fãa, yam-kaalgã la d bɛɛbã kisgr taoore. Rẽndame tɩ d tall sik-m-meng sẽn na yɩl n sak saglg bɩ n gĩdg d vɩɩmã sẽn na yɩl n kẽes d mens koe-moonegã pʋgẽ n paase. Sẽn paase, d segd n talla sik-m-meng la raood sẽn naag ne tẽebo, b sã n wa kãnegd tõnd zãma wã taoore, la b sã n wa boond tõnd bʋʋdo, bɩ b sã n wa namsd tõnd wʋsg d tẽebã yĩnga.—1 Pɩɛɛr 5:6.
7, 8. Yɛl kẽer bʋs pʋsẽ la d segd n tall sik-m-menga?
7 Wãn to la ned tõe n bas wuk-m-meng la a “tẽ ne sik-m-meng yam tɩ neba fãa yɩɩda yẽnda”? (Filip rãmba 2:3) A segdame n ges a meng wa a Zeova sẽn get-a to-to wã. A Zezi wilga d sẽn segd n ges d meng to-to a sẽn wa n yeel tɩ: “Yaa woto ne yãmb me yãmb sã n maan bũmb nins fãa b sẽn yeel yãmb tɩ y maana n sɛ, bɩ y yeele: ‘Tõnd yaa tʋm-tʋmdb sẽn ka yõodo. Tõnd maana tʋʋmd ninga d sẽn tog n maana bala.’ ” (Luk 17:10) Tẽeg-y t’a Zezi sẽn maan bũmb ninsã yɩɩda bũmb nins fãa tõnd sẽn maanã. Ne rẽ fãa, a Zezi kell n yɩɩ sik-m-meng soaba.
8 Sẽn paase, d tõe n kosa a Zeova t’a sõng-d tɩ d tall tagsg sẽn zems d mengã zugu. Wala yɩɩl-gʋlsdã, d tõe n pʋʋsa woto: “Bɩ y zãms maam yẽesem ne bãngre, tɩ bõe, mam tẽeda yãmb tõodo.” (Yɩɩl Sõamyã 119:66) A Zeova na n zãmsa tõnd tɩ d tall tagsg sẽn zems ne tõnd mensã, la a ning-d barka, d sẽn tar sik-m-mengã yĩnga. (Yelbũna 18:12) A Zezi yeelame: “Ned sã n waoog a menga, a na n paama paoogre, la ned sã n sik a menga, a na n paama waoogre.”—Matɩe 23:12.
Tagsg sẽn zems sõma la wẽngã wɛɛngẽ
9. Wãn to la a Zezi ra get sõma la wẽnga?
9 Baa ne a Zezi sẽn vɩɩmd yʋʋm 33 neb sẽn pa zems zãng sʋkã, a kell n pa “maan yel-wẽn baa bilf ye.” (Hebre dãmba 4:15) Sɩda, yɩɩl-gʋlsdã sẽn wa n togsd bãngr-gomd Mesi wã wɛɛngẽ wã, a yeelame: “Yãmb nonga tɩrlem n kis wẽnga.” (Yɩɩl Sõamyã 45:8; Hebre dãmba 1:9) Zĩ-kãngã wɛɛngẽ me kiris-nebã leb n maoodame n dɩkd a Zezi togs-n-taare. B mii sõma la wẽng n bake, la sẽn paase, b kisa wẽng la b nong sẽn yaa sõma. (Amos 5:15) Rẽ sõngd-b lame tɩ b mao ne yel-wẽnã tʋlsem b sẽn dog ne wã.—Sɩngre 8:21; Rom dãmba 7:21-25.
10. Tõnd sã n maand ‘wẽng’ n pa tekd yam n kos sugri, yaa bõe la d wilgda?
10 A Zezi yeela Fariziẽ a Nikodɛm tɩ: “Ned ninga fãa sẽn maand wẽnga, a kisgda vẽenem, la a ka wat vẽenemẽ, t’a tʋʋma puk ye. La ned ninga sẽn maand sɩda, a wata vẽenemẽ, tɩ vẽenemã wilg t’a maana a tʋʋma Wẽnnaam yĩnga.” (Zã 3:20, 21) Bãng-y t’a Zã yeelame t’a Zezi yaa “vẽenem sɩd-sɩda sẽn wa dũniyã pʋgẽ n vẽnegd neba fãa.” (Zã 1:9, 10) La a Zezi yeelame tɩ d sã n maand “wẽnga,” sẽn yaa bũmb Wẽnnaam sẽn kisã, d kisa vẽenem. Mams-y yãmb sẽn na n kis a Zezi la a noyã. Yaa woto la neb nins sẽn maand yel-wẽnã n pa tekd yam n kos sugrã maanda. Tõe tɩ b pa get yɛlã woto ye, la a Zezi getame tɩ b kisa yẽ ne a noyã.
D sẽn na n tall a Zezi tagsg sõma la wẽngã zug to-to
11. Bõe n yaa tɩlae, d sã n dat n tall a Zezi tagsg sõma la wẽngã zugu?
11 D segdame n bãng sẽn yaa sõma la sẽn yaa wẽng a Zeova nifẽ wã vẽenega. Yaa ne Wẽnnaam Gomdã sẽn yaa Biiblã zãmsg bal la d bãngd rẽ. D sã n wa na n zãms Biiblã d segd n pʋʋsa wa yɩɩl-gʋlsdã. A pʋʋsa woto: “Zusoaba, kɩt-y tɩ mam bãng yãmb soɛya. Bɩ y zãms maam tɩ m tũ yãmba.” (Yɩɩl Sõamyã 25:4) La tẽeg-y t’a Sʋɩtãan yaa bɛlgda. (2 Korẽnt dãmba 11:14) A tõe n solga wẽngã n maan t’a wõnd bũmb sẽn sakd reegr ne kiris-ned sẽn pa gũusdi. Yaa rẽ n so tɩ d segd n bʋgs d sẽn karemd bũmb ningã zug neere, la d tũ ‘tʋm-tʋmd sẽn tũud sɩd la sẽn tar yamã’ sagls neere. (Matɩe 24:45-47) Biiblã zãmsgo, pʋʋsgã la bũmb ning tõnd sẽn zãmsdã zug bʋgsg na n sõnga tõnd tɩ d bɩ tẽebã pʋgẽ n zĩnd neb nins “sẽn bɩ la sẽn mi sõama ne wẽng n baka” sʋka. (Hebre dãmba 5:14) Yaa rẽ la d na n kisg sẽn yaa wẽng la d nong sẽn yaa sõma.
12. Biiblã sagl-bʋg n sõngd tõnd tɩ d ra yɩ wẽng maandba?
12 Tõnd sã n kis wẽnga, d pa na n bas bõn-wẽns tʋlsem tɩ bɩ d sũyã pʋsẽ ye. Yʋʋm wʋsg a Zezi kũumã poore, tʋm-tʋmd a Zã gʋlsa woto: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye. Tɩ bõe, bũmb nins fãa sẽn be dũniyã n yaa yĩng ratem wẽnga la nin datem wẽnga ne tɩtaama ka yit tõnd Ba nengẽ ye. Bãmb yaa dũniyã rẽnda.”—1 Zã 2:15, 16.
13, 14. a) Bõe yĩng tɩ kiris-nebã sã n nong bũmb nins sẽn be dũniyã pʋgẽ wã, yaa yelle? b) Wãn to la d tõe n da nong bũmb nins sẽn be dũniyã pʋgẽ wã?
13 Neb kẽer tõe n tagsame tɩ pa bũmb nins fãa sẽn be dũniyã pʋgẽ wã n yaa wẽng ye. Baa ne rẽ sẽn yaa sɩdã, dũniyã ne a yamle-yɛlã tõee nana-nana n kɩt tɩ d bas a Zeova raabã maanego. La dũniyã bũmb ba a yembr pa kɩtd tɩ tõnd pẽneg Wẽnnaam n paas ye. Woto yĩnga, tõnd sã n nong bũmb nins sẽn be dũniyã pʋgẽ wã, baa bũmb nins sẽn pa wẽnsã, yaa yell n yɛgd-do. (1 Tɩmote 6:9, 10) Rẽ toor sẽn ka be, bũmb wʋsg sẽn be dũniyã pʋgẽ sɩd yaa wẽnse, n tõe n kʋɩɩb tõndo. Tõnd sã n nong n get filim dãmb bɩ televiziõ emisiõ rãmb sẽn wilgd nen-kɛglem tʋʋma, laog nonglem, bɩ yoob ne raglem tʋʋm a taaba, tõnd tõe n wa sakda bõn-kãensã, tɩ lebg makr n kõ-do. Tõnd sã n nong n maand tũud-n-taar ne neb sẽn baood n na n paam naar vɩɩm bɩ n bao n maan afɛɛr dãmb n paas n paam ligdi, bõn-kãensã tõe n wa lebga bũmb sẽn tar yõod n yɩɩd tõnd nifẽ.—Matɩe 6:24; 1 Korẽnt dãmba 15:33.
14 La tõnd sã n nong a Zeova Gomdã, ‘yĩng ratem wẽnga la nin datem wẽnga ne tɩtaamã’ sẽn be dũniyã pʋgẽ wã pa na n leb n tall yamleoog wʋsg ne-d ye. Sẽn paase, d sã n maan lagem-n-taar ne neb nins sẽn lʋɩɩsd Wẽnnaam Rĩungã yɛl taoorã, d na n yɩɩ wa bãmba, n nong bũmb nins b sẽn nongã, la d zãagd d mens ne bũmb nins b sẽn zãagd b mens ne wã.—Yɩɩl Sõamyã 15:4; Yelbũna 13:20.
15. Wala sẽn yɩ to-to ne a Zezi wã, d sã n nong sẽn yaa tɩrg la d kis sẽn yaa wẽnga, wãn to la rẽ kengd tõnd tẽebo?
15 A Zezi sẽn da kis wẽngã la a nong sẽn yaa tɩrgã sõng-a lame t’a kell n tags ‘sũ-noog ning sẽn da be a taoorã’ yelle. (Hebre dãmba 12:2) Tõe n yɩɩ woto ne tõnd me. Tõnd miime tɩ “dũniyã ne a ratem wẽnga me loogdame.” Sũ-noog buud fãa dũni kãngã sẽn kõt tõnd yaa wakat bilf yĩng bala. La “ned ninga sẽn maand Wẽnnaam daab paada wakat sẽn ka sɛta.” (1 Zã 2:17) A Zezi sẽn maan Wẽnnaam daabã yĩnga, a paka sor n kõ ninsaalbã tɩ b tõe n paam vɩɩm sẽn pa satã. (1 Zã 5:13) Bɩ d fãa rɩk a togs-n-taare, n dɩ a burkĩndã nafa.
D tall sũ-mare, b sã n namsd tõnd d tẽebã yĩnga
16. Bõe yĩng t’a Zezi sagl a karen-biisã tɩ b nong taaba?
16 A Zezi leb n wilga bũmb a to a karen-biisã sẽn tõe n maan n dɩk a togs-n-taare. A yeelame: “Ad mam tõogo: Bɩ y nong taab wa mam sẽn nong yãmbã.” (Zã 15:12, 13, 17) Yɛl wʋsg n kɩt tɩ kiris-nebã nong b saam-biisã. A Zezi sẽn da wa n gomd woto wã, sẽn da be a yamẽ n yɩɩd yaa dũniyã sẽn da na n kisg a karen-biisã. A yeelame: “Dũniyã sã n kisg yãmba, bɩ y bãng t’a reng n kisga maam. . . . Tʋmd-tʋmd ka yɩɩd a zu-soab ye. Bãmb sã n nams maam, b na n namsa yãmb me.” (Zã 15:18, 20) N-ye, baa b sã n namsd kiris-nebã b tẽebã yĩng me, b yaa wala a Zezi. B segd n talla nonglem sẽn tar pãng ne taab n paase, tɩ sõng-b tɩ b yals kãn-kãe kisg-kãng taoore.
17. Bõe yĩng tɩ dũniyã kis kiris-neb hakɩkã?
17 Bõe yĩng tɩ dũniyã na n kisg kiris-nebã? Yaa b sẽn ‘ka dũniyã rẽnd’ wa a Zezi me sẽn pa dũniyã rẽndã yĩnga. (Zã 17:14, 16) B pa kẽesd b toog zabã la politikã yɛl pʋsẽ ye. B tũuda Biiblã noyã, n tar waoogr ne vɩɩmã sẽn yaa bõn-sõng Wẽnnaam nifẽ wã la b tũud vɩɩm manesem noy sẽn yaa sõma wʋsgo. (Tʋʋma 15:28, 29; 1 Korẽnt dãmba 6:9-11) Sẽn pak-b n yɩɩd b vɩɩmã pʋgẽ yaa tẽebã yɛla, pa arzɛgsã ye. B vɩɩ dũniyã neb sʋka, la wala a Poll sẽn gʋlsã, b ‘maanda wa b ka baood-a’ ye. (1 Korẽnt dãmba 7:31) Yaa sɩda, kẽer wilgame tɩ b nanda no-sõma nins a Zeova Kaset rãmbã sẽn tũudã hal wʋsgo. La a Zeova Kaset rãmbã pa kɩɩsd no-tɩrsã sẽn na yɩl n bao nebã pẽgr bɩ sẽn na yɩl tɩ b sak-b ye. Rẽ kɩtame tɩ dũniyã neb wʋsg pa wʋmd b võore, la tɩ neb wʋsg kis-ba.
18, 19. Wãn to la kiris-nebã maand bɛɛbã kɩɩsg la namsgã b sẽn paamd b tẽebã yĩngã taoor n tũud a Zezi makre?
18 A Zezi tʋm-tʋmdbã yãa dũniyã kisg-kãsengã, b sẽn wa n yõk a Zezi n kʋ wã, la b yãa a Zezi sẽn tall manesem ning kisg-kãng taoorã. Gɛtsemane zẽedẽ wã, a Zezi bɛɛb sẽn yaa tũudum nebã waame n na n yõk-a. A Pɩɛɛr wõoga sʋʋg n na n zab n sõng-a. La a Zezi yeela a Pɩɛɛre: “Sui f sʋʋga a wʋʋgẽ, tɩ bõe, neb nins fãa sẽn zãad sʋʋsã, yaa sʋʋg n na n kʋ-ba.” (Matɩe 26:52; Luk 22:50, 51) Sẽn deng bãmb sasa wã, Israɛll nebã talla sʋʋs n zab ne b bɛɛbã. La masã yɛlã ra toeemame. Wẽnnaam Rĩungã pa “dũniyã rẽnd ye,” rẽnd a pa tar toadg tɩ b ra segd n zab n kogl ye. (Zã 18:36) Ra pa na n kaoos la a Pɩɛɛr zĩnd buud sẽn yaa tẽeb buud pʋgẽ ye. Bu-kãng nebã ra na n vɩɩmda saasẽ. (Galat dãmba 6:16; Filip rãmba 3:20, 21) La a Zezi Kirist waoongã tɛka, a karen-biisã ra na n talla a manesmã buud kisgrã la namsgã b tẽebã yĩngã taoore, ne raoodo, la laafɩ pʋgẽ me. B ra na n dɩkda yɛlã fãa n ning a Zeova nugẽ la b teegd-a sẽn na yɩl n paam pãng n tall sũ-mare.—Luk 22:42.
19 Yʋʋm loogr poore, a Pɩɛɛr gʋlsa woto: “Kirist me namsa yãmb yĩnga n bas mamsg ne yãmb tɩ y tũ bãmb naowã. . . . Neb sẽn gom bãmb wẽnga, bãmb ka lebs wẽng ye. Neb sẽn maan bãmb wẽnga, bãmb ka zab ne bãmb ye, la bãmb basa bãmb yɛla fãa sẽn kaood-a bʋʋd tɩrga nugẽ.” (1 Pɩɛɛr 2:21-23) Wala a Zezi sẽn da keoogã, kiris-nebã paama nams-toaag b tẽebã yĩng yʋʋma sẽn pʋg taabã pʋsẽ. Pipi yʋʋm kob-gĩndẽ wã la tõnd wakatã me, b tũu a Zezi makrã n tall sũ-mar wʋsg wẽn-sakr pʋgẽ, tɩ rẽ wilgdẽ tɩ b yaa burkĩmb sẽn baood laafɩ. (Wilgri 2:9, 10) Bɩ tõnd ned kam fãa maan woto, d sã n wa segd yel-kãensã buudu.—2 Tɩmote 3:12.
“Bɩ y yeelg Zusoab a Zezi Kirist”
20-22. Wãn to la kiris-nebã “yeelgd Zusoab a Zezi Kirist”?
20 A Poll gʋlsa Rom tigingã woto: “Bɩ y yeelg Zusoab a Zezi Kirist n da maan weer yĩnga ratem yĩnga t’a ratma tõog ye.” (Rom dãmba 13:14) Sã n yaa ne makr wɛɛngẽ, kiris-nebã yeelgda a Zezi wa fuugu. B modgdame n na n dɩk a togs-n-taar n tall a zʋg-sõma wã la a yel-manesmã, hali n wa lebg wa b Soaalã sẽn yaa a soabã, baa ne b sẽn pa zems zãngã.—1 Tesalonik rãmba 1:6.
21 D tõeeme n “yeelg Zusoab a Zezi Kirist,” d sã n bãng a vɩɩmã sẽn yɩ to-to wã sõma la d modg n vɩɩmd wa yẽ. D rɩkda a togs-n-taar zĩis nins sẽn pʋgdã pʋsẽ: A sẽn da nong tɩrlmã, a sẽn da kis wẽngã, a sẽn da nong a saam-biisã, a sẽn pa yɩ dũniyã rẽndã, a sẽn tall sũ-mar toog la namsg pʋgẽ wã. D pa maand magb ‘yĩnga ratem yĩnga,’ sẽn dat n yeel tɩ d pa maand tɩ sẽn pak tõnd n yɩɩd vɩɩmã pʋgẽ yaa dũniyã bõn-datɩ bɩ yĩngã ratem pidsg ye. Walla tɩ yɩ woto wã, d sã n wa rɩkd sard bɩ n welgd zu-loɛɛga, d sokdame: ‘Bõe la a Zezi ra na n maan yel-kãngã pʋgẽ? Bõe la a ra na n tʋlg tɩ mam maane?’
22 Sẽn na n baase, d rɩkda a Zezi togs-n-taar n ‘moond Wẽnnaam soolem Koe-noogã.’ (Matɩe 4:23; 1 Korẽnt dãmba 15:58) Rẽ wɛɛngẽ me, kiris-nebã tũuda makr ning a Zezi sẽn basã, la sõsg ning sẽn pʋgdã na n goma d sẽn na n maan dẽ to-to wã yelle.
Y tõe n wilga a võor bɩ?
• Bõe yĩng tɩ yaa tɩlae tɩ kiris-ned tall sik-m-menga?
• Wãn to la d tõe n tall tagsg sẽn zems sõma la wẽnga wɛɛngẽ?
• Wãn to la kiris-nebã rɩkd a Zezi togs-n-taar bɛɛbã kɩɩsg la namsgã b sẽn paamd b tẽebã yĩngã taoore?
• Wãn to la d tõe n “yeelg Zusoab a Zezi Kirist”?
[Zãmsgã sogsgã]
[Foto, seb-neng 19]
A Zezi kõo mak-sõng sẽn zems zãng sik-m-mengã wɛɛngẽ
[Foto, seb-neng 20]
Sik-m-menga yaa tɩlae kiris-ned vɩɩmã nens fãa la moonegã pʋgẽ
[Foto, seb-neng 21]
A Sʋɩtãan tõe n kɩtame tɩ reem sẽn pa zems wõneg bũmb sẽn sakd ne kiris-neda