Bʋkaoodb sebrã tags-kãsemse
A Zeova Gomdã vɩɩme
Bʋkaoodb sebrã tags-kãsemse
A ZEOVA nin-buiidã sẽn da wa n bas-a n sɩng ziri wẽnnaam dãmb balengã, a manesem ne-b yɩɩ wãna? A nin-buiidã sẽn kɩɩs-a naoor wʋsg tɩ toog wa tar-b tɩ b lebs n kos-a sõngrã, a manesem ne-b yɩɩ wãna? Dẽ yĩnga baa ne rẽ fãa, a fãag-b lame bɩ? Bʋkaoodb sebrã leokda sogs-kãensã la a taab sẽn tar yõodo. No-rɛɛs a Sãmwɛll sẽn gʋls-a n baas yʋʋmd 1 100 sẽn deng Kirist zãmaanã sẽnesã, a gomda yɛl sẽn zĩnd yʋʋm 330 pʋgẽ yelle, hal a Zozue kũumã tɛk n tall n tãag Israɛll pipi rĩmã naam deegre.
Bʋkaoodb sebrã sẽn be Wẽnnaam gomdã sẽn tar pãngã pʋgẽ wã tara yõod wʋsg ne-do. (Hebre dãmba 4:12) Kɩbay nins a sẽn tar tɩ be yamleoogã sõngda tõnd tɩ d bãng Wẽnnaam sẽn sɩd yaa a soabã sõma. Bũmb ning d sẽn zãmsd kɩba-kãens pʋsẽ wã kengda tõnd tẽebã la sõngd-d tɩ d kell n gãd “vɩɩm hakɩɩkã” sẽn yaa vɩɩmd wakat sẽn-kõn-sa dũni paalg ning Wẽnnaam sẽn kãabã pʋgẽ. (1 Tɩmote 6:12, 19, Kãab-paalgã Koe-noogo; 2 Pɩɛɛr 3:13) Fãagr tʋʋm nins a Zeova sẽn tʋm a nin-buiidã yĩngã yɩɩ fãag-kãseng ning a Biribl a Zezi Kirist sẽn da na n wa fãag-b beoog daarã reng-n-lɛmbga.
BÕE YĨNG TƖ B RA RAT BƲKAOODBA?
A Zozue taoor-sobendã wakat b sẽn tõog Kanaã rĩm dãmbã poore, Israɛll neba reega tẽngã, la buud fãa tɩ zĩnda babg ning b sẽn da kãab-a wã pʋgẽ. La b pa rig tẽngã neb fãa ye. Rẽ kɩtame tɩ nin-kãens wa rat n kʋɩɩb-ba.
Zãmaan ning sẽn pʋgl a Zozue wakatẽ nebã ‘ra ka mi a Zeova, la b ka mi tʋʋm nins a sẽn da maan n kõ Israɛll nebã me ye.’ (Bʋkaoodba 2:10) Sẽn paase, b kẽe kãadem ne Kanaã pagb la b balem b wẽnnaam dãmba. Rẽ kɩtame t’a Zeova bas tɩ Israɛll nebã bɛɛb nams-ba. B namsgã sẽn wa n lebg wʋsgã, b bõosa sɩd Wẽnnaamã sõngre. Yaa yel-kãensã pʋsẽ la a Zeova kõ a nin-buiidã bʋ-kaoodb tɩ b na n fãag-b b bɛɛbã nusẽ.
Sogsg sẽn tik verse rãmb zut n paam leokre:
1:2, 4—Bõe yĩng tɩ b yãk a Zida pipi t’a kẽng n tɩ reeg zĩig ning b sẽn kõ-a wã? Sɩda, yaa a Zakoob bi-kãseng a Rubɛn n da tog n kẽng pipi. La a Zakoob sẽn wa n na n ki wã, a ra reng n togsame t’a Rubɛn sẽn beegã yĩnga, b na n deega bi-kãseng zu-noogã n bas-a. B ra segd n sãeega a Simeõ ne a Levi buudã Israɛll nebã sʋka, b sẽn da maan pʋ-toogã yĩnga. (Sɩngre 49:3-5, 7) Yaa rẽ n kɩt tɩ b yãk a Zida t’a na n kẽng pipi. B yãka zĩis a Zida pʋɩɩrã sẽn da yaa bedrã pʋgẽ n kõ a Simeõ. *—Zozue 19:9.
1:6, 7—Bõe yĩng tɩ b ra fiuusd rĩm dãmb nins b sẽn tõog zabr pʋgẽ wã nug-raad ne b na-raado? Wõnda ned nug-raad ne a na-raad sã n da yãgse, a pa tõe n yɩ sodaag ye. Sodaag sẽn pa tar nug-raad na n gãda sʋʋg wãn-wãna? Ned na-raad me sã n fiuusi, kɩtdame t’a pa le tõe n yals sõma ye.
Zãmsg tõnd yĩnga:
2:10-12. D segd n talla Biibl zãmsg na-kẽndr d sẽn tũud n pa vaandẽ, sẽn na yɩl n ‘da yĩm bõn-neeb nins fãa a Zeova sẽn maanã ye.’ (Yɩɩl Sõamyã 103:2) Roagdbã segd n zãmsa b kambã sɩd ning sẽn yit Wẽnnaam Gomdã pʋgẽ wã neere.—Tõodo 6:6-9.
2:14, 21, 22. A Zeova mi n basame tɩ yel-beed paam a nin-buiidã sẽn na yɩl n sɩbg-ba, n sagl-b la a kɩt tɩ b lebg n sak-a.
A ZEOVA YÃKA BƲKAOODBA
Kɩbay nins sẽn be yamleoog sẽn gomd bʋkaoodbã sẽn tʋm tʋʋm ninsã yellã sɩngda ne a Otniɛll kɩbarã. Yẽ fãaga Israɛll nebã Mezopotami rĩmã nugẽ, b yʋʋm a nii yembd poore. Bʋkaood a Ehud tʋma ne yam la raood n kʋ Moaab rĩm a Eglõ. A Sãmgaar sẽn tall raoodã kʋʋ Filisti neb 600 yẽ a yembr ne ra-sɩlenga. Ne a Debora sẽn yɩ Wẽnnaam no-rɛɛs la bʋkaoodã raoolgã n paas a Zeova sõngre, a Barak ne a tãb-biis tus piigã sẽn da pa tar zab-teed wʋsgã tõoga a Sizera ne a sodaasã sẽn da tar pãngã. A Zeova yãka a Zedeõ n kɩt tɩ yẽ ne a neb 300 wã tõog Madiã nebã.
A Zeova tũnuga ne a Zɛfte n fãag Israɛll Amon nebã nusẽ. A Tola, a Zayiir, a Ibzã, a Elõ n paas a Abdõ me zĩnda Israɛll bʋ-kaoodb 12 wã sʋka. Bʋ-kaoodbã wakat baasa ne a Samsõ sẽn zab ne Filisti nebã.
Sogsg sẽn tik verse rãmb zut n paam leokre:
4:8—Bõe yĩng t’a Barak pẽdg no-rɛɛs poak a Debora t’a yãag-a zabrẽ wã? Wõnda a Barak ra getame tɩ yẽ pa na n tõog n zab ne a Sizera tãb-biisã a yembr ye. No-rɛɛs poakã sã n da yãag-a, na n kenga yẽ ne a nebã pels tɩ b bãng tɩ Wẽnnaam bee ne-ba, la kɩt tɩ b tall bas-yardo. Dẽnd a Barak sẽn pẽdg a Debora t’a yãag-a wã, pa rat n yeel t’a ra zoeta rabeem ye, rẽ wilgdame t’a ra tara tẽeb wʋsgo.
5:20—Wãn to la ãdsã sẽn be yĩngrã zab n sõng a Barake? Biiblã pa yeel tɩ rẽ wilgdame tɩ malɛgsã sõng-b lame, bɩ t’a Sizera bagbã yãa ãdsã lʋɩɩsã n wilg tɩ rẽ makda yel-beed sẽn wate, wall bũmb b sẽn da reng n togs tɩ pa pids ye. La yaa vẽeneg tɩ Wẽnnaam kẽesa a toog zabrẽ wã.
7:1-3; 8:10—Bõe yĩng t’a Zeova yeel tɩ neb 32 000 wã sẽn da be ne a Zedeõ n dat n zab ne b bɛɛbã tãb-biis 135 000 wã sõor yaa wʋsgo? Yaa a Zeova sẽn na n sõng t’a Zedeõ ne a nebã tõog zabrã yĩnga. Wẽnnaam da pa rat tɩ b wa yeel tɩ bãmb tõoga Madiã nebã ne b mens pãng ye.
11:30, 31—Rẽ yĩnga a Zɛfte sẽn wa n maand a pʋlengã, yaa ned la a ra rat n wa kʋ n maan maoong bɩ? A Zɛfte ra pa tõe n tags woto lae-lae ye. Bala Tõogã ra yeelame tɩ “ned baa a ye ra rɩk a biig n kɩt tɩ b yõog bugum ye.” (Tõodo 18:10) Baasg zãnga, yaa ned la a Zɛfte sẽn da pʋlem t’a na n kõo a Zeova wã, ra pa rũng ye. Wõnda rũms nins Israɛll nebã sẽn tar n kʋʋd maandã ra pa vɩ b zagsã pʋsẽ ye. La sã n pʋd n da yaa rũng maoong meng la a Zɛfte sẽn na n maanã, pa sek pʋleng ye. A Zɛfte ra miime tɩ ned ning sẽn da na n yi a zakẽ wã pipi n seg yẽ wã ra tõe n yɩɩ yẽ meng bipuglã. B sẽn da na n dɩk-a n maan ‘maoong sẽn yõogd bugmã’ makda b sẽn da na n kɩt t’a tɩ maan a Zeova sɛk-roogã tʋʋm bal wakat fãa yĩngã.
Zãmsg tõnd yĩnga:
3:10. Tẽebã tʋʋm pidsg tũuda ne a Zeova vʋʋsem sõngã sõngre, pa ne ninsaal tõog ye.—Yɩɩl Sõamyã 127:1.
3:21. A Ehud tʋma ne a sʋʋgã ne minim la raoodo. Tõnd me segd n zãmsa d sẽn na n tʋm ne ‘vʋʋsem sõngã sʋʋg sẽn yaa Wẽnnaam gomdã’ sõma to-to. Rẽ rat n yeelame tɩ d segd n talla Gʋlsg Sõamyã n tʋm ne raood d koe-moonegã pʋgẽ.—Efɛɛz rãmba 6:17; 2 Tɩmote 2:15.
6:11-15; 8:1-3, 22, 23. A Zedeõ sẽn yɩ sik-m-meng soabã zãmsda tõnd yɛl a tãab sẽn tar yõod wʋsgo: 1) B sã n wa kõ-d zu-noog tʋʋmde, d segd n tagsa a sẽn wat ne zɩɩb ningã yell n yɩɩda, la d ra ges a sẽn wat ne yʋʋr la zu-zẽkr ningã ye. 2) D sã n wa tar yell ne neb nins sẽn nong no-koɛɛmã, yaa yam tʋʋmd tɩ d tall sik-m-mengã. 3) Sik-m-mengã sõngd-d lame tɩ d ra yɩ ned sẽn baood n lʋɩ taoor ye.
6:17-22, 36-40. Tõnd me segd n gũusame n da yɩ tao-tao n tẽ gomd ning fãa b sẽn yet tɩ yita Wẽnnaam nengẽ ye. D tog n deng n mak-a lame n bãng a sã n sɩd yita Wẽnnaam nengẽ. (1 Zã 4:1) Kiris-ned sẽn nan lebg kãsem soab paalem sã n dat n bãng sagls nins a sẽn dat n kõ wã sã n sɩd tika Wẽnnaam Gomdã zugu, a segd n kosa kãsem soab sẽn tar minim sõngre.
6:25-27. A Zedeõ gũusame n pa yik a kɩɩsdbã sũy zaalem ye. Tõnd me sã n moond koe-noogã d segd n gũusa d goamẽ wã n da yik nebã sũy zaalem ye.
7:6. A Zeova balengã pʋgẽ, d segd n gũusa wʋsg wa a Zedeõ neb 300 wã.
9:8-15. Ad sɩd yaa yalemd tɩ d zẽk d meng la d bao n dɩ naam neb a taabã zugu!
11:35-37. Sãmbg sẽn ka be, a Zɛfte mak-sõngã kɩtame t’a bipuglã tall tẽeb wʋsg la mong-m-meng yam. Rũndã-rũndã, roagdbã me segd n kõo b kambã mak-sõngo.
11:40. F sã n pẽg ned sẽn tar yam-sõng ne a Zeova tʋʋmdã, kengda a pɛlga.
13:8. Roagdbã sã n zãmsd b kambã Wẽnnaam Gomdã, b segd n pʋʋsa a Zeova n kos a sõngre.—2 Tɩmote 3:16.
14:16, 17; 16:16. F sã n pẽdgd ned yell poorẽ n fĩind ne nintãm n pa satẽ sãamda lagem-n-taare.—Yelbũna 19:13; 21:19.
ISRAƐLL NEBÃ BEEGR A TAABA
Bʋkaoodb sebrã yaoolem sags tara kɩba-kãsems a yiibu. Pipi kɩbarã gomda ned yʋʋr sẽn boond t’a Mika yelle. A ra maana bõn-naand n bĩng a roogẽ wã n dɩk Levi ned a ye t’a yɩ a maan-kʋʋda. Dan nebã sẽn sãam Layis b sẽn boond me tɩ Lesɛmmã poore, b reega tẽngã n soog n pʋd a yʋʋr tɩ Dan. Bãmb deega a Mika bõn-naandã ne a maan-kʋʋdã n sigl baleng buud a to Dan. Vẽenega yaa sẽn deng a Zozue kũumã la b reeg Layis.—Zozue 19:47.
Yell ning sẽn maan yaoolmã yɩɩ a Zozue kũumã poor bilf bala. Yaa Bẽnzame neb sẽn yit Gibeya n sũ taab n gãand pag a ye t’a ki, tɩ rẽ kɩt tɩ b kʋ Bẽnzame buuda fãa la bala. Yɩɩ neb 600 bal n põse. La wa n tũu ne manesem sẽn pa wõnd a taab tɩ nin-kãens na n paam pagb n dog kamba, tɩ b sõorã fɩɩge, t’a Davɩɩd naamã wakat mik tɩ b ra taa sẽn yɩɩd sodaas 60 000.—1 Kɩbaya 7:6-11.
Sogsg sẽn tik Biiblã zug n paam leokre:
17:6; 21:25—‘Ned kam fãa sẽn da maand a sẽn datã’ kɩtame tɩ tẽngã pʋgẽ da yaa zũnd-zãnd bɩ? Pa tog n da yaa woto tɩlae ye. Bala a Zeova ra sigla yɛl wʋsg sẽn na yɩl n wilg a nin-buiidã sore. A ra kõ-b-la Tõogã la maan-kʋʋdb sẽn na yɩl n zãms-b tɩ b tũ a soayã. Ne Urimmã la Tumimmã maasem, maan-kʋʋd kãsmã ra tõe n soka Wẽnnaam a tagsg yel-kãsems wɛɛngẽ. (Yikri 28:30) Galʋ-tẽng fãa leb n da tara kãsem dãmb sẽn tõe n sagl nebã sõma. Israɛll ned sã n da tũud sagl-kãense, a paamda sor-wilgr sẽn yaa sõma. Dẽnd a sã n da ‘maand a sẽn dat’ tɩ pa kɩɩsd Tõogã, nafd-a lame. La ned sã n da rɩk a sard a toor vɩɩm manesmã wɛɛngẽ la balengã wɛɛngẽ tɩ kɩɩsd Tõogã, baasda wẽnga.
20:17-48—Bõe yĩng t’a Zeova bas tɩ Bẽnzame buudã sẽn da segd ne sɩbgrã tõog buud a taabã naoor a yiibu? A Zeova sẽn bas tɩ b tõog buud nins sẽn da tar kɩs-sɩdã, yaa sẽn na yɩl n bãng bu-kãensã sã n sɩd da rata ne b sũy fãa n yiis wẽngã Israɛlle.
Zãmsg tõnd yĩnga:
19:14, 15. Gibeya nebã sẽn da pa rat n sak n deeg sãambã, wilgdame tɩ b basa Wẽnnaam noyã tũubu. B sagenda kiris-nebã tɩ b “maan sãamba sãando.”—Rom dãmba 12:13.
Fãagr ning sẽn watã
Ka la bilfu, Wẽnnaam Rĩungã b sẽn bobl a Zezi Kiristã na n sãama dũni-wẽngã la a fãag nin-tɩrsã la pʋ-peelem dãmbã. (Yelbũna 2:21, 22; Daniɛll 2:44) ‘A Zeova bɛɛba fãa na n sãamame, tɩ neb nins sẽn nong-a wã yãg wa sõor sẽn pukdi.’ (Bʋkaoodba 5:31) Bɩ d modg n tũ bũmb nins d sẽn zãms Bʋkaoodb sebrã pʋgẽ wã, n wilg tɩ d bee neb nins sẽn nong a Zeova wã sʋka.
Sɩd ning sẽn yaa kãseng b sẽn togsd Bʋkaoodb sebrã kɩbay pʋsẽ naoor wʋsgã yaa t’a Zeova sakr wata ne bark wʋsgo, la a kɩɩsg wata ne yel-beedo. (Tõodo 11:26-28) Sɩd tara yõod wʋsg tɩ d sak n maan Wẽnnaam daabã a sẽn vẽneg-dã ne d sũy fãa.—Rom dãmba 6:17; 1 Zã 2:17.
[Tẽngr note]
^ sull 10 B pa kõ Levi nebã zĩig Kãabg Tẽnga pʋgẽ ye. B zĩnig-b-la galʋ-tẽns 48 pʋsẽ Israɛll soolmẽ wã.
[Karte, seb-neng a 9]
(Yaa sebrã meng pʋgẽ la y tõe n yã fãa)
‘A Zeova kõo bãmb bʋ-kaoodb tɩ b soog-ba n fãag-b ne neb nins sẽn fãad-bã.’—Bʋkaoodba 2:16
BƲKAOODBA
1. A Otniɛll (Manase)
2. A Ehud (Zida)
3. A Sãmgaar (Zida)
4. A Barak (Neftali)
5. A Zedeõ (Isakaar)
6. A Tola (Manase)
7. A Zayiir (Manase)
8. A Zɛfte (Gaad)
9. A Ibzã (Asɛɛr)
10. A Elõ (Zabulõ)
11. A Abdõ (Efrayim)
12. A Samsõ (Zida)
DAN
MANASE
NEFTALI
ASƐƐR
ZABULÕ
ISAKAAR
MANASE
GAAD
EFRAYIM
DAN
BẼNZAME
RUBƐN
ZIDA
Foto, seb-neng 10]
Bõe la a Barak sẽn pẽdg a Debora t’a wa yãag-a zabrẽ wã zãms yãmba?