D kell n yɩ kiris-neb hakɩka
D kell n yɩ kiris-neb hakɩka
“[A Zeova] yeelame: Yãmb yaa mam kaset dãmba.”—Ezai 43:10.
1. Yaa nin-bʋs buud la a Zeova boond a nengẽ?
YÃMB sã n wa be Rĩung Roogẽ bɩ y gũus neer n ges neb nins sẽn gũbg yãmbã. Ãnd dãmb la yãmb yãt be? Tõe tɩ y nee kom-bɩɩs sẽn kelgd sagls nins sẽn yit Gʋlsg Sõamyã pʋgẽ wã neere. (Yɩɩl Sõamyã 148:12, 13) Tõe tɩ y yã zak soben dãmb sẽn maood n dat n ta Wẽnnaam yam, baa ne b sẽn vɩ dũni sẽn pa tar waoogr ne zak vɩɩmã pʋgẽ wã. Tõe tɩ y na n yãa neb sẽn kʋʋle, sẽn ket n vɩ tɩ zems ne b sẽn dɩk b mens n kõ a Zeova wã, baa ne bãasã la kʋʋlmã. (Yelbũna 16:31) Bãmb fãa nonga a Zeova wʋsgo, t’a ges tɩ zemsame t’a tall zood ne-ba. Wẽnnaam Biriblã yeelame: “Ned ka tõe n wa mam nengẽ tɩ ka m Ba n bool-a ye.”—Zã 6:37, 44, 65.
2, 3. Bõe yĩng tɩ tõe n yɩ toog tɩ d kell n wilg tɩ d yaa kiris-neb hakɩka?
2 Rẽ yĩnga d sũy pa noome, d sẽn be neb sẽn tat a Zeova yam la sẽn tar a barkã sʋkã sɩda? La pa nana tɩ d kell n wilg tɩ d yaa kiris-neb hakɩk ‘yaoolem wakat tood’ kãensã pʋsẽ ye. (2 Tɩmote 3:1) Sẽn tɩ yɩɩd fãa, yaa woto ne kom-bɩɩs nins b sẽn wub kiris-neb zagsẽ wã. Bi-bɩɩg a yembr sak n deega woto: “Baa ne m sẽn da rabd kiris-neb tigissã, mam da pa tar tẽeb bõn-datɩ sẽn yaa vẽenes ye. M sã n na n togs sɩda, a Zeova raabã maaneg tʋlsem ra pa be m sũurẽ wã ye.”
3 Kẽer sɩd tõe n dat n maana a Zeova raabã, la b taabã manesem sẽn tar pãng b zutã, dũniyã pãn-tusdg la yel-wẽnã tʋlsem tõe n tiisd-b lame. Neb a taabã tõe n wa kɩtame tɩ d wa pa le yaa kiris-neb hakɩk ye. Wala makre, rũndã-rũndã, neb wʋsg geta Biiblã noy sẽn tɩ loe ne vɩɩm manesmã wa no-kʋd tũub sẽn pa leb n tar yõod ne masã zãmaanã neb vɩɩm ye. (1 Pɩɛɛr 4:4) Kẽer tagsdame tɩ pa tɩlae tɩ b balem Wẽnnaam wa a sẽn datã ye. (Zã 4:24) Lɛtr ning a Poll sẽn gʋls Efɛɛz rãmbã pʋgẽ, a yeelame tɩ dũniyã tara ‘sɩɩg’ bɩ yam, sẽn dat n yeel t’a tagsg ning sẽn tar-a pãng n yɩɩdã. (Efɛɛz rãmba 2:2) Yam kãng tusda nebã tɩ b tags wa zãmaanã neb sẽn pa mi a Zeova wã.
4. Wãn to la a Zezi wilg sõma-sõma tɩ d segd n kell n yɩɩ kiris-neb hakɩka?
4 La d sẽn dɩk d mens n kõ a Zeova n yaa a sõgen dãmbã, d yaa bi-bɩɩg tɩ d yaa kãsem me, d sã n tall manesem sẽn wilgd tɩ d pa le yaa kiris-ned hakɩka, na n yɩɩ wẽng wʋsg ne-do. Tall tagsg sẽn zems ne d sẽn yaa kiris-nebã segd n tika a Zeova noyã la yɛl nins a sẽn baood tɩ tõnd maana zut bala. Rẽ zemsame, bala a naana tõnd a meng wõnego. (Sɩngre 1:26; Miise 6:8) Biiblã rɩka tõnd zʋg nins sẽn wilgd vẽeneg tɩ d yaa kiris-nebã n mak ne zugẽ fut d sẽn ning tɩ nebã fãa neẽ. A Zezi keooga tõnd woto tõnd wakatã wɛɛngẽ: “Gese, mam wata wa wagdre. Bark bee ned ninga sẽn gũusda zugu, la sẽn talld a [zugẽ] fut n ka rat n kẽn zaal tɩ neba yã a yãndã.” * (Wilgri 16:15) D pa rat n bas d kiris-ned zʋg-sõma wã la d vɩɩm manesem noyã, t’a Sʋɩtãan dũniyã wa toeem tõnd tɩ d yɩ wa a sẽn datã ye. Sã n wa yɩ woto, d menesa d zugẽ ‘futã.’ La woto na n yɩɩ kaeto la yãnde.
5, 6. Bõe yĩng tɩ tar yõod wʋsg tɩ d kɩ yẽg sõma tẽebã wɛɛngẽ?
5 Tõnd sã n kell n wilg vẽeneg tɩ d yaa kiris-neba, na n toeema tõnd vɩɩmã wʋsgo. Wãn to? A Zeova balemd sã n bas n pa leb n tagsd vẽeneg t’a yaa kiris-ned hakɩka, a yamã tõe n yuusame, t’a pa leb n tar bõn-datl vẽeneg ye. Biiblã keoogda tõnd n yɩlemdẽ tɩ d ra tall yam-yuusg woto ye. Karen-biig a Zak keooga tõnd woto: “Ned ninga sẽn sãmbda, a wẽnda ko-pɛma sobg sẽn pengd t’a lengdẽ. Bɩ ada soaba ra tags t’a na n deega bũmb Zusoaba nengẽ ye. Yẽ yaa yam a yiib soaba sẽn yuusd ne a yɛla fãa.”—Zak 1:6-8; Efɛɛz rãmba 4:14; Hebre dãmba 13:9.
6 Wãn to la d tõe n kell n yɩ kiris-neb hakɩka? Bõe n tõe n sõng tõnd tɩ d bãng n paas tɩ d tara zu-no-kãsenga, d sẽn yaa Naab sẽn ka to wã balemdbã yĩnga? D bõos tɩ y vaees yɛl nins sẽn pʋgdã.
Kõ-y kaset vẽeneg n wilg tɩ y yaa kiris-ned hakɩka
7. Bõe yĩng tɩ be nafr tɩ d kos a Zeova t’a fees-do?
7 Ket-y n paasd-y y zoodã ne a Zeova wã pãnga. Bũmb ning kiris-ned sẽn tar tɩ yaa sõma n yɩɩd yaa a zems-n-taarã ne Wẽnnaamã. (Yɩɩl Sõamyã 25:14; Yelbũna 3:32) Tõnd sã n sɩng n sãmbdẽ d sã n yaa kiris-ned hakɩka, yaa sasa kãng la d segd n fees n bãng zems-n-ta-kãng sõmblem la a pãng sẽn ta zĩig ninga. Wa sẽn zemse, yɩɩl gʋlsdã bõosa woto: “Zusoaba, fees-y maam, la y mak maam. Mak-y mam yama ne m sũurã.” (Yɩɩl Sõamyã 26:2) Bõe yĩng tɩ feesg woto yaa tɩlae? Yaa tõnd mensã sẽn pa tõe n fees d mens sũurã tʋlsem tɩ sɩd zemsã yĩnga. Yaa a Zeova bal n tõe n bãng tõnd sẽn sɩd yaa ned ning d sũurã pʋgẽ wã, bũmb nins sẽn kɩtd tɩ tõnd maand yɛlã, d tagsa wã, la sẽn be tõnd sũyã pʋsẽ wã.—Zeremi 17:9, 10.
8. a) A Zeova sã n mak tõndo, wãn to la rẽ nafd-do? b) Wãn to la b sõng-y tɩ y yɩ kiris-ned sẽn bɩ tẽebã pʋgẽ?
8 Tõnd sã n kot a Zeova t’a fees-do, d kot-a lame t’a mak-d n gese. A tõe n basa yɛl tɩ puk n wilg bũmb nins sẽn sɩd tusd tõnd tɩ d maand yɛlã la tõnd sũurã halhaal menga. (Hebre dãmba 4:12, 13; Zak 1:22-25) D segdame n sak mak-kãense, bala b kõta tõnd sor tɩ d wilg d wẽn-sakrã ne a Zeova sẽn ta zĩig ninga. Mak-kãens tõe n wilga tõnd sã n ‘zemsa zãnga tɩ bũmb pa paoog tõnd ye.’ (Zak 1:2-4) La d sã n wa paam makr a woto, tõe n bɩɩsa d tẽebã.—Efɛɛz rãmba 4:22-24.
9. Rẽ yĩnga, bao n kɩs sɩd tɩ Biiblã sẽn yetã yaa sɩdã yaa f yam sẽn na n dat bal bɩ? Wilg-y-yã.
9 Zãms-y Biiblã n wa tõog n kɩs sɩd t’a togsda sɩda. Tõnd tõeeme n ye pa tagsd wa pĩndã tɩ d yaa a Zeova sõgen dãmb hakɩka, d tagsgã sã n pa tik Gʋlsg Sõamyã bãngr zug kãn-kãe. (Filip rãmba 1:9, 10) Kiris-nebã fãa, kom-bɩɩs la kãsemb segdame n wa kɩs sɩd zãng tɩ b sẽn tẽed bũmb ninsã sɩd bee Biiblã pʋgẽ. A Poll sagla a tẽed-n-taasã woto: “Bɩ y mak bũmb fãa; la sẽn yaa neere, bɩ y gãd kãn-kãe.” (1 Tesalonik rãmba 5:21) Kiris-neb nins sẽn yaa kom-bɩɩs sẽn be wẽn-zoɛtb zagsẽ wã segd n bãngame tɩ b pa tõe n yeel tɩ b yaa kiris-neb hakɩka, b roagdbã sẽn be tẽebã pʋgẽ wã yĩng bal ye. A Salomo meng ba a Davɩɩd sagl-a lame t’a modg n ‘bãng a ba wã Wẽnnaam la a sak-a ne a sũur fãa.’ (1 Kɩbaya 28:9) Ra pa sek tɩ bi-bɩɩg a Salomo ges a mengã ba sẽn tall tẽeb to-to ne a Zeova wã bal ye. A ra segd n bao n bãnga a Zeova a toore, la a maana woto. A Salomo kosa Wẽnnaam woto: “M kotame tɩ y kõ-m yam ne bãngr masã tɩ m tõog n zã y nebã.”—2 Kɩbaya 1:10.
10. Bõe yĩng tɩ sogsg maaneg ne pʋ-peelem pa wẽnga?
10 Yaa bãngr zug la d tikd n paam tẽeb sẽn tar pãnga. A Poll yeelame: “Kelgr wata ne tẽebo.” (Rom dãmba 10:17) Bõe la a ra rat n yeel ne gom-kãngã? A ra rat n yeelame tɩ d sã n dɩlg d tẽebã ne Wẽnnaam Gomdã, d kengda d tẽebã la d paasd d bas-yardã ne a Zeova, ne a kãabsã la ne a siglgã. D sã n maan sogsg ne pʋ-peelem Biiblã zugu, d tõe n paama leoor sẽn kõt bas-m-yam. Sẽn paase, Rom dãmba 12:2 pʋgẽ, d yãta a Poll sagl-kãngã: “[Bɩ] y bãng Wẽnnaam daab sẽn yaa sõama, la sẽn tat bãmb yam, la sẽn zems zãnga.” Wãn to la d tõe n maan woto? Yaa d sẽn na n bao n “bãng sẽn yaa sɩda.” (Tɩt 1:1) A Zeova vʋʋsem sõngã tõe n sõnga tõnd tɩ d wʋm gom-zut nins sẽn yaa toogã meng võore. (1 Korẽnt dãmba 2:11, 12) Sã n yaa toog ne-d tɩ d wʋm bũmb võore, d segd n pʋʋs n kosa Wẽnnaam sõngre. (Yɩɩl Sõamyã 119:10, 11, 27) A Zeova ratame tɩ d wʋm a Gomdã võore, n tẽ la d sake. A pa zabd tɩ d ra maan sogsg ne pʋ-peelem ye.
Bao-y ne y sũur fãa n ta Wẽnnaam yam
11. a) Tʋlsem bʋg d fãa sẽn tar n tõe n yɩ bẽdg ne-do? b) Wãn to la d tõe n paam daood n zãgs neb a taabã sẽn dat n kʋɩɩb-dã?
11 Bao-y n ta Wẽnnaam yam, pa ninsaal yam ye. Zemsame me tɩ d bao n tɩ naag neb sull n wilg d sẽn yaa a soabã. Ned fãa rata zo-rãmba, la b sã n sak-fo, kõt-f-la sũ-noog la bas-m-yam. Bi-bɩɩlmã wakat la a poor me, d reem-n-taasã yel-manesem tõe n talla pãng wʋsg d vɩɩmã zugu, tɩ rẽ tõe n kɩt tɩ d rat n dɩk b togs-n-taar bɩ n ta b yam. La pa wakat fãa la d zo-rãmbã la d reem-n-taasã sɩd rat tõnd neer ye. Wakat ninga b rata neb bal sẽn na n naag-b n maan wẽnga. (Yelbũna 1:11-19) Kiris-ned sã n wa bas tɩ neb a taab tus-a n kẽes wẽng pʋgẽ, naoor wʋsgo a pa rat tɩ nebã bãng t’a yaa kiris-ned ye. (Yɩɩl Sõamyã 26:4) Tʋm-tʋmd a Poll keooga woto: “Bɩ y ra yɩ wa dũniyã rãmb ye.” (Rom dãmba 12:2) A Zeova kõta tõnd tẽeb pãng ning d sẽn datã sẽn na yɩl n zãgs dũniyã neb sẽn dat tɩ d maan wa bãmba wã.—Hebre dãmba 13:6.
12. No-bʋg la mak-sõng bʋg n tõe n kɩt tɩ d yals kãn-kãe d tẽebã pʋgẽ, d sã n wa segd n wilg d bas-yardã ne Wẽnnaam?
12 Dũniyã rãmb sã n dat n kɩt tɩ d ra wilg tɩ d yaa kiris-neb hakɩka, yaa sõma tɩ d tẽeg tɩ tõnd burkĩndã Wẽnnaam taoorã tara yõod wʋsg n yɩɩd zãma wã tagsg bɩ b manesem zĩig sẽn zãre. Yikri 23:2 goamã yaa sor-wilgr sẽn yaa sõma: “Da lagem neb n maan wẽnga b sẽn yaa wʋsga yĩng ye.” Israɛll neb wʋsg sẽn da pa tẽ t’a Zeova na n tõog n pidsa a kãabsã sasa, a Kalɛɛb zãgsa ne raood t’a kõn maan wa zãma wã ye. A ra kɩsa sɩd tɩ Wẽnnaam kãabsã na n pidsame, la a paama keoob wʋsg a sẽn tall yam-yãkr kãngã wã yĩnga. (Sõdbo 13:30; Zozue 14:6-11) Yãmb me sakame n na n zãgs zãma wã sẽn pẽdgd-y tɩ y maan wẽngã, sẽn na yɩl n kogl zems-n-taarã y sẽn tar ne Wẽnnaamã bɩ?
13. Bõe yĩng tɩ yaa yam tʋʋmd tɩ d kɩt tɩ b bãng tɩ d yaa kiris-neba?
13 Kɩt-y tɩ neba bãng tɩ y yaa kiris-neda. Sẽn na yɩl tɩ neba bãng tɩ tõnd yaa kiris-neba, sẽn yaa sõma n yɩɩd yaa d sẽn na n wilg tɩ d yaa kiris-neba. A Ɛsdras wakatã, b sẽn da wa n dat n gɩdg Israɛll neb nins sẽn yaa wẽn-sakdbã tɩ b ra maan a Zeova raabã, b yeela woto: “Tõnd yaa Wẽnnaam sẽn so yĩngr ne dũniyã tʋm-tʋmdba.” (Ɛsdras 5:11) Tõnd sã n bas tɩ d bɛɛbã manesem la b sãbsg goam kẽ-d wʋsgo, rabeemã tõe n kɩtame tɩ d gɩmbe. Tõnd sã n dat n ta nebã yam wakat fãa, d pa na n tõog n maan bũmb ye. Rẽ wã yĩng bɩ y ra bas tɩ b kẽes-y rabeem ye. Wakat fãa yaa sõma tɩ y kɩt tɩ neb a taabã bãng vẽeneg tɩ y yaa a Zeova Kaset soaba. Ne waoogr la ne manesem sẽn yaa vẽenega, bɩ y wilg neb a taabã bũmb nins sẽn tar yõod ne-yã, y tẽebã la y tagsg sẽn yaa a soab vẽeneg ne yɛlã, y sẽn yaa kiris-nedã yĩnga. Kɩt-y tɩ neb a taabã bãng tɩ y yãka yam ne y sũur fãa n na n ket n tũud a Zeova noyã sẽn yaa sõma wʋsgã vɩɩm manesmã la yoobã wɛɛngẽ. Kɩt-y tɩ b bãng vẽeneg tɩ y pa barsd y burkĩndã ye. Wilg-y tɩ y sũy yaa noog ne vɩɩm manesem noy nins y sẽn tũudã. (Yɩɩl Sõamyã 64:11) Y sã n wilgd vẽeneg tɩ y yaa kiris-neda, tõe n keng-y lame, n kogl-y la tus neb kẽer meng tɩ b bao n bãng a Zeova ne a nin-buiidã.
14. Yaalgã la kɩɩsgã segd n komsa tõnd raood bɩ? Wilg-y-yã.
14 N-ye, tõe tɩ kẽer yaal-y wall b kɩɩs-yã. (Ziid 18) Yãmb sẽn modgd n na n wilg neb a taabã noy nins y sẽn tũudã, b sã n pa sak bɩ y ra koms raood ye. (Ezekɩɛll 3:7, 8) Baa yãmb sẽn dɩk sard kãn-kãe to-to fãa, y pa na n tol n kɩt tɩ neb nins sẽn pa rat n sakã sak ye. Tẽeg-y a Faraõ kɩbarã. Toog bɩ yel-solemd ba a yembre, baa a biribl kãsengã kũum pa kɩt t’a sak n deeg t’a Moiiz ra gomda a Zeova yʋʋr yĩng ye. Rẽ wã yĩng bɩ y ra bas tɩ rabeem gɩdg-y ye. Tall-y bas-yard la tẽeb ne Wẽnnaam tɩ rẽ tõe n kɩtame tɩ y tõog rabeemã.—Yelbũna 3:5, 6; 29:25.
Rɩk-y yam ne sẽn looge, mao-y beoog-daar yĩnga
15, 16. a) Tõnd tẽeb rogem pʋɩɩrã yaa bõe? b) Wãn to la d sẽn na n tik Wẽnnaam Gomdã zug n tags d tẽeb rogem pʋɩɩrã yellã tõe n naf-do?
15 Ges-y y tẽebã rogem pʋɩɩr wa bũmb sẽn tar yõod wʋsgo. Ne Wẽnnaam Gomdã maasem, kiris-nebã sã n tags b tẽeb rogem pʋɩɩrã sẽn yaa bark bũmbã zugu, na n naf-b lame. Sɩd ning sẽn be a Zeova Gomdã pʋgẽ wã, vɩɩm sẽn pa satã saagre, la zu-noog ning d sẽn tar n moond koe-noogã n gomd Wẽnnaam yʋʋr yĩngã naaga rogem pʋɩɩr kãng pʋgẽ. Yãmb nee tʋʋmd ning yãmb mengã sẽn tar a Kaset rãmbã sẽn yaa neb sull sẽn paam tɩ b kõ-b Rĩungã mooneg tʋʋmd sẽn fãagd yõyã sʋk bɩ? Tẽeg-y tɩ pa ned a to n zʋʋg a Zeova la sẽn yeel woto wã ye: “Yãmb yaa mam kaset dãmba.”—Ezai 43:10.
16 Y tõe n soka y mens woto: ‘Sã n yaa ne maam, tẽeb rogem pʋɩɩr kãngã yõod taa zĩ-bʋgo? Mam get-a-la wa bũmb sẽn tar yõod tɩ seke, hali tɩ kɩt tɩ Wẽnnaam daabã maaneg yaa pipi bũmb mam vɩɩmã pʋgẽ bɩ? Mam nand-a-la wʋsg hal tɩ rẽ kõt maam pãng tɩ m yals kãn-kãe makr fãa sẽn tõe n kɩt tɩ m kong-a taoor bɩ?’ Tõnd tẽeb rogem pʋɩɩrã leb n tõe n kõo tõnd bãan wʋsg tẽebã wɛɛngẽ, sẽn yaa a Zeova siglgã pʋgẽ bal la d tõe n paame. (Yɩɩl Sõamyã 91:1, 2) D sã n lebg n ges yel-kãsems nins sẽn maan a Zeova siglgã pʋgẽ yaoolem wakatã pʋgẽ wã, tõe n kɩtame tɩ d bãng vẽeneg tɩ ned bɩ bũmb baa a yembr pa tõe n sãam a Zeova nin-buiidã tẽngã zug ye.—Ezai 54:17; Zeremi 1:19.
17. Bõe me la d segd n maane, n da teeg d tẽeb rogem pʋɩɩrã bala?
17 Yaa sɩda, d pa segd n teeg d tẽeb rogem pʋɩɩrã bal ye. Tõnd ned kam fãa segdame n bao zems-n-taar sẽn tar pãng ne Wẽnnaam. A Poll sẽn modg wʋsg n kɩt t’a kiris-nin-taasã sẽn be Filipã tẽeb paas poore, a gʋls-b-la woto: “Woto, mam zo-nongdse, a wa yãmb sẽn da sak wakat fãa wã, bɩ y maan bũmb nins sẽn zems yãmb fãagra ne dabeem la rigbu, ka mam sẽn be yãmb sʋka bal ye, la bɩ y maan masã n yɩɩda, mam sẽn ka be yãmb sʋkã.” (Filip rãmba 2:12) D pa tõe n teeg ned a to n paam fãagr ye.
18. Wãn to la kiris-neb tʋʋmã tõe n kɩt tɩ d wilg n paas tɩ d yaa kiris-neba?
18 Kẽes-y y meng kiris-neb tʋʋmã pʋsẽ wa y sẽn tõe tɛka. B wilgame tɩ “tʋʋmd tara pãn-tusdg ned sẽn yaa a soabã zugu.” Rũndã-rũndã, b bobla kiris-nebã tʋʋmd sẽn tar yõod wʋsgo, sẽn yaa moon Wẽnnaam Rĩungã sẽn luglã koe-noogo. A Poll togsame: “Mam sẽn yaa bu-zẽms tʋm-tʋmda. . . . Mam waoogda m tʋʋmde.” (Rom dãmba 11:13) Tõnd moonegã tʋʋmd welga tõnd ne dũniyã, la tõnd sẽn kẽesd d meng a pʋgẽ wã kɩtdame tɩ nebã bãng n paas tɩ tõnd yaa kiris-neba. Tõnd sã n kẽes d mens Wẽnnaam tʋʋm a taab pʋsẽ wala kiris-neb tigissã kẽnde, tõnd Wẽnnaamã rot meebo, la d modgd n sõngd neb nins sẽn dat sõngrã la d maand yɛl a taaba, tõe n kɩtame tɩ d kɩs sɩd n paas tɩ d yaa kiris-neb hakɩka.—Galat dãmba 6:9, 10; Hebre dãmba 10:23, 24.
Wilg vẽeneg tɩ d yaa kiris-ned tara nafa
19, 20. a) Nafa bʋs la yãmb mengã paam-yã, y sẽn yaa kiris-nedã yĩnga? b) Bõe n wilgd tõnd sẽn sɩd yaa a soabã?
19 Rɩk-y sẽk n tags nafa toɛy-toɛy nins d sẽn paamde, d sẽn yaa kiris-neb hakɩkã. A Zeova sẽn sak tõnd ned kam fãa wã yaa zu-noog menga. No-rɛɛs a Malaki yeelame: “Neb nins sẽn zoet Zusoaba [a Zeova wã] yẽsa ne taaba. La Zusoaba kɩlla b tʋbr n wʋm. La b gʋlsa sebr Zusoaba nengẽ neb nins sẽn zoet bãmb la b waoogd bãmb yʋʋra tẽegr yĩnga.” (Malaki 3:16) Wẽnnaam tõe n gesa tõnd wa a zo-rãmba. (Zak 2:23) Tõnd sẽn ne vẽeneg tɩ d vɩɩmã tara võorã, la d sẽn tar bõn-datɩ sẽn yaa sõma la sẽn womd biisã kɩtdame tɩ d vɩɩmã tar barka. Sẽn paase, d tara vɩɩm sẽn pa satã saagre.—Yɩɩl Sõamyã 37:9.
20 Tẽeg-y tɩ yãmb sẽn sɩd yaa a soabã la y yõodã bee ne Wẽnnaam sẽn get yãmb to-to wã, la a pa be ne neb a taabã sẽn tagsd to-to yãmb zugã ye. Tõe tɩ neb a taabã mag tõnd yõodã tɩ zems ne ninsaalbã noy sẽn pa zemsã. La Wẽnnaam sẽn nong tõnd la a get tõnd yell neerã kɩtame tɩ tõnd tar yõodo, yẽ sẽn so-dã yĩnga. (Matɩe 10:29-31) La tõnd me nonglmã ne Wẽnnaamã tõe n kɩtame tɩ d wilg tɩ d yaa kiris-neb hakɩk n paase, la a wilg d vɩɩmã sor tɩ yɩ vẽeneg n yɩɩda. “Ned sã n nong Wẽnnaam, Wẽnnaam mii a soaba.”—1 Korẽnt dãmba 8:3.
[Tẽngr note]
^ sull 4 Tõe tɩ gom-kãensã tɩ loee ne wẽn-doogã sẽn da be Zerizalɛmã yel-gɛt tʋʋmde. Yʋng gũubã wakate, a gilgda wẽn-doogẽ wã n get Levi neb nins sẽn yaa gũudbã sã n da gõeyã b gũubã zĩisẽ bɩ b pa gõe. B sã n da yã gũud t’a gõe fãa b pãbd-a-la ne rasaare, la b tõeeme me n yõog a zugẽ futã tɩ yɩ yãnd la sɩbgr n kõ-a.
Y tẽrame bɩ?
• Bõe yĩng tɩ tar yõod wʋsg ne kiris-nebã tɩ b ket n wilgdẽ tɩ b yaa kiris-neb hakɩka?
• Wãn to la d tõe n wilg vẽeneg tɩ d yaa kiris-neb hakɩka?
• D sã n wa tog n yãk d sẽn segd n ta a soab yamã, yel-bʋs n tõe n sõng tõnd tɩ d rɩk sard tɩ zemse?
• Wãn to la tõnd sẽn na n sɩd wilg tɩ d yaa kiris-neb hakɩkã tõe n toeem d beoog-daarã?
[Zãmsgã sogsgã]
[Foto rãmba, seb-neng 21]
D sã n kẽesd d mens kiris-neb tʋʋmã pʋsẽ, tõe n wilgame n paas tɩ d yaa kiris-neba