Kãadem tõe n talla sũ-noog rũndã zãmaanã pʋgẽ
Kãadem tõe n talla sũ-noog rũndã zãmaanã pʋgẽ
“Bɩ y nong taab bala, tɩ nonglem yaa loɛtg sɩd-sɩda.”—Kolos rãmba 3:14,
1, 2. a) Bõe n be kiris-neb tigingã pʋgẽ n noogd sũuri? b) Kãadem sẽn tar sũ-noog yaa wãn-wãna?
RẼ YĨNGA d sã n get kiris-neb tigingã, d sũy pa noom d sẽn ne yikãadb wʋsg sẽn sɩng n be ne taab hal sẽn na maan yʋʋm 10, 20, 30 bɩ sẽn yɩɩd woto mengã sɩda? Kẽed-n-ta-kãensã kell n pelga b pʋs n zĩnd ne taab baa ne zu-loeesã fãa.—Sɩngre 2:24.
2 La yikãadb wʋsg na n sak n deegame tɩ b maoa ne zu-loees b kãadmã pʋgẽ. Pag a yembr sẽn gũus n ges gʋlsa woto: “Kãadem nins sẽn tar sũ-noogã pa põsd sũ-sãams bɩ zu-loees ye. Sũ-noog la sũ-sãams wakat beeme . . . La sẽn sõs n yɩl fãa . . . yikãadb kãensã ket n bee ne taaba, baa ne rũndã-rũndã vɩɩmã sẽn [tar zu-loeesã].” Yikãadb nins sẽn tar sũ-noogã bãnga b sẽn segd n mao ne daar fãa zu-loeesã la tood nins b sẽn pa tõe n põsã to-to, sẽn yɩɩd fãa, b sã n wuba kamba. Yɛl nins b sẽn seg b kãadmã pʋgẽ wã kɩtame tɩ b bãng tɩ nonglem hakɩkã “ka sɛt abada.”—1 Korẽnt dãmba 13:8.
3. Bõe la b mag n yã kãadmã kaoob wɛɛngẽ, la rẽ waa ne sogs-bʋse?
3 La kãadem milyõ rãmb me n yaool n sãame. Kɩbar a yembr n wilg woto: “B tagsdame tɩ kãadem nins sẽn maand Etazĩni rũndã-rũndã wã fãa pʋɩ-sʋk na n kaoome. Yaa yikãadem kãens yʋʋm a 7 bɩ a 8 zugẽ la b na n kao . . . Neb 75 wã koabg zugã bãmb sʋkã sẽn na n lebs n kẽ kãadmã, 60 koabg zug n na n le kao b kãadmã.” Baa tẽns nins pʋsẽ kãadmã kaoob sẽn da pa wʋsgã, yɛlã toeemame. Wala makre, sẽn nan pa kaoos pʋgẽ, Zapõ, b geelgame n yã tɩ kãadmã kaoob sõor paasa naoor a yiibu. Yaa yel-bʋs n wat ne zu-loe-kãngã sẽn mi n paamd baa kiris-neb tigingã neb mengã? Bõe n yaa tɩlae sẽn na yɩl n kɩt tɩ kãadem tall sũ-noogo, baa ne a Sʋɩtãan sẽn maood n dat n sãam-a wã?
Bẽds d sẽn segd n gili
4. Yel-bʋs n tõe n sãam kãadem?
4 Wẽnnaam Gomda sõngda tõnd sẽn na yɩl tɩ d bãng bũmb nins sẽn tõe n wa sãam kãadem. D rɩk makr ne tʋm-tʋmd a Poll goam nins sẽn da reng n wilgd yɛl nins sẽn na n zĩnd yaoolem da-kãensã pʋsẽ wã. A Poll yeelame: “Yaoolem wakate tood na n zĩndame. Tɩ bõe, neba na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba la ma rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere la sũ-to-neba, tẽn-kãn-neba, neb sẽn ka tar yõk-m-menga, pʋto-rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmba sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga. Lak ne bãmb dãmba.”—2 Tɩmote 3:1-5.
5. Bõe yĩng tɩ yikãad sẽn nong a meng bal tõe n sãam a kãadmã, la sagl-bʋg la Biiblã kõt rẽ wɛɛngẽ?
5 D sã n vaees a Poll goamã, d yãtame tɩ yɛl nins a sẽn sõdgã wʋsg tõe n sãama kãadem. Wala makre, neb nins sẽn yaa ‘beed rãmb’ bɩ neb sẽn nong b mens balã yaa rat-m-yembr dãmba, tɩ neb a taabã yell pa pak-b ye. Pagb la pʋg-sɩdb nins sẽn nong b mens balã rata wakat fãa n maan bũmb ning bãmb sẽn datã bala. Yaa neb sẽn pa viigd b yell lae-lae ye. Rẽ yĩnga manesem kãngã kɩtdame tɩ kãadem tall sũ-noog sɩda? Abada. Tʋm-tʋmd a Poll sagla kiris-nebã ne yikãadbã sõma woto: “Da maan-y bũmb baa a yembr ne zabre walla wilg-m-meng ye, la bɩ ned kam fãa tẽ ne sik-m-meng yam tɩ neba fãa yɩɩda yẽnda. Bɩ yãmb ned kam fãa da ges a meng yell bal ye, bɩ y ges taab yell me.”—Filip rãmba 2:3, 4.
6. Wãn-wãn la ligd nonglem tõe n sãam kãadem?
6 Ligd nonglem tõe n welga pag ne a sɩda. A Poll keooga woto: “Neb nins sẽn dat n yɩ arzɛgs rãmba kẽeda makre la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ. Tɩ bõe, ligd datem yaa bõn-wẽns fãa yẽgre. La ligd datem sẽn so kẽerã, b basa tẽebo n kẽes b mens to-kãseng pʋgẽ.” (1 Tɩmote 6:9, 10) Zu-bʋko, yel-beed nins yell a Poll sẽn da reng n gomã paama yikãadb wʋsg rũndã-rũndã. Yikãadb kẽer sẽn bao n na n yɩ arzɛgs rãmb yĩma b kẽed-n-taas raab yelle, n mong-b bũmb nins sẽn yaa tɩlae wala paam ned sẽn na n kelg-f la a bels-fã, la tũud-n-taar sẽn be yamleoogã.
7. Naoor wʋsgo, manesem bʋg n mi n wa kɩt tɩ yikãad zãmb a to?
7 A Poll leb n yeelame tɩ yaoolem da-kãensã pʋsẽ, neb kẽer na n yɩɩ ‘zɩ-beoog rãmba, neb sẽn ka tar nimbãan-zoeere, la sũ-to-neba, zãmb dãmba.’ Kãadmã kaool yaa pʋleng sẽn pa reem bũmb f sẽn maane, t’a segd n kɩt tɩ kãadmã tall pãng wakat fãa, n pa tog n baas ne zãmb ye. (Malaki 2:14-16) La sãnda n wat n bas b kẽed-n-taagã n tɩ nong rap bɩ pagb a taaba. Pag a yembr sẽn yɩɩd yʋʋm 30 sɩd sẽn bas-a, a bilgame tɩ nand tɩ yẽ sɩda bas-a, a sɩdã reng n minima pagb wʋsg n da tar dolemd manesem ne-ba. A pa ges tɩ manesem ning a sẽn da tarã pa zems ne yikãad ye. Pagã sũur sãamã wʋsg ne a sɩdã manesem hal t’a mak n na n keoog-a t’a sẽn maand bũmb ninga tõe n wa waa ne yelle. A sɩdã wa n baas n yoome. Baa ne b sẽn deng n keoog yikãad kãngã ne nonglmã, a tõdgame t’a kõn deeg ye. A tɩ lʋɩya bẽdgã pʋgẽ faoo.—Yelbũna 6:27-29.
8. Bõe n tõe n wa baas n kɩt tɩ yikãad yo?
8 Keoogr ning Biiblã sẽn kõt yikãadbã yoobã wɛɛngẽ wã yaool n yaa vẽenega! A yetame: ‘Yoaad ka tar yam ye. Sẽn maand-a woto baooda a meng sãoongo.’ (Yelbũna 6:32) Naoor wʋsgo, yoobã pa bũmb yikãad sẽn wat n tiig bal n maane, bɩ bũmb a sẽn maand ne lingr ye. Wala Biiblã gʋlsd a Zak sẽn wilg vẽenegã, naoor wʋsgo yoobã sẽn yaa yel-wẽndã ratem dengd n kẽe bɛɛgdã yamẽ, t’a sã n gʋʋl ratem kãng bɩ a wa baas n yo. (Zak 1:14, 15) Yikãad ning sẽn yo wã sɩnga bilf-bilf n zãmbd a sẽn da pʋlem t’a na n vɩɩmda ne ned ning a yõor tɛkã. A Zezi yeelame: “Yãmb wʋmame tɩ b rag n yeelame: ‘Ra yo ye.’ La mam yeta yãmba tɩ ned ninga fãa sẽn get pag ne ratem wẽnga, a maana yoob ne yẽnda a sũur pʋgẽ.”—Matɩe 5:27, 28.
9. Sagl-sõng bʋg n be Yelbũna 5:18-20 pʋgẽ?
9 Rẽ n so tɩ bũmb ning Yelbũna sebr sẽn zãmsd yikãadbã sɩd zemse. A yetame: “Bɩ f bulga zĩnd barka. Maan sũ-noog ne f pag ninga fo sẽn peeg f bi-bɩɩlem wakatã. Yẽ yaa neer wa walga. Ges yẽ a ye bal wakat fãa. Nong yẽ a ye bala. M biiga, yaa bõe tɩ f rat neb a taab pagba? Yaa bõe tɩ f get tẽn-taas pagba?”—Yelbũna 5:18-20.
Ra yɩ-y yãg-yãg n kẽ kãadem ye
10. Bõe yĩng tɩ yaa yam bũmb tɩ d reng n dɩk sẽk wʋsg n bao n bãng ned d sẽn dat n kẽ ne kãadem?
10 Neb a yiib sã n yɩ yãg-yãg n kẽ kãadem ne taaba, zu-loees tõe n wa zĩnda b kãadmã pʋgẽ. Tõe tɩ b paooda wʋsgo, n pa tar minim ye. Wall tõe tɩ b pa reng n dɩk sẽk wʋsg n bao n bãng taab ye. Wala makre, b ned kam fãa sẽn nong la a sẽn kis bũmb ninsi, bõn-datɩ nins a sẽn yãk a vɩɩmã pʋgẽ la wubr ning a sẽn paame. Yɩta yam bũmb tɩ b tall maag-m-menga, tɩ b ned kam fãa rɩk sẽk n bãng ned ning a sẽn dat n kẽ ne kãadmã. Tẽeg-y-yã a Izaak biig a Zakoob yelle. A ra segd n tʋma yʋʋm a yopoe n kõ rao ning sẽn na n wa lebg a rɛɛmbã nanda, n yaool n paam a Rasɛll n maan a paga. A sakame n na n maan dẽ, a sẽn sɩd ra nong a Rasɛll ne nonglem hakɩkã yĩnga, pa a neermã yĩng bal ye.—Sɩngre 29:20-30.
11. a) Nin-bʋs buud la kãadmã lagemd ne taaba? b) Bõe yĩng tɩ tar yõod tɩ d gomd ne yam kãadmã pʋgẽ?
11 Kãadem pa rolemd bal ye. Kãadmã loeta neb a yiib sẽn yit zags toɛy-toɛy pʋsẽ ne taaba. B zʋgã la b tagsgã pa yembre, la b pa paam wubr a yembr me ye. Wakat ninga, kãadem lagemda neb rog-m-migs sẽn pa yembr wall neb sẽn gomd buud goam toor-toor ne taaba. Baa wa n tɩ pa woto me, kãadem lagemda neb a yiib sẽn tõe n tall tagsg sẽn pa yembr yɛl toɛy-toɛy pʋsẽ. Yaa tags-kãens b yiibã sẽn lagem taab la kãadmã. Neb a yiibã sẽn wilgd b tagsa wã to-to wã tõe n yaa ne sãbsg goam bɩ ne yẽgengo, wall tõe n yaa ne goam sẽn be yamleoog la sẽn kengd pɛlga. Yaa sɩda, tõnd tõe n gomame tɩ zab d kẽed-n-taagã, wall d keng a pɛlga. Goam f sẽn gom n pa gũus tõe n waa ne zu-loe-kãsems kãadem pʋgẽ.—Yelbũna 12:18; 15:1, 2; 16:24; 21:9; 31:26.
12, 13. Tags-bʋg sẽn zems la b sagend-d tɩ d tall kãadmã wɛɛngẽ?
12 Woto yĩnga, sɩd yɩta yam bũmb tɩ d reng n dɩk sẽk n bao n bãng ned ning d sẽn dat n kẽ ne kãadmã sõma. Vugri, kiris-nin-poak a yembr sẽn kẽ kãadem hal yʋʋm sẽn zãr yeela woto: “Y sã n wa yã ned y sẽn dat n kẽ ne kãadem, bɩ y tags yɛl piig y sẽn baood tɩ nin-kãng tall tɩlae yelle. Y sã n yã bãmb b yopoe bal a soabã nengẽ bɩ y sok y meng woto: ‘Rẽ yĩnga m na n sak n basa a tãabã a sẽn pa pidsdã taal bɩ? Rẽ yĩnga daar ne a to fãa, m na n tõogd n yaafd-a-la bõn-kãensã sẽn paoog-a wã yĩng sɩda?’ Y yam sã n yood bɩ y maneg n tags neere.” Yaa vẽeneg tɩ y segd n mag n zemsame. Y sã n dat n kẽ kãadem bɩ y bãng tɩ y pa tol n tõe n yã kẽed-n-taag sẽn zems zãng ye. La bɩ y bãng tɩ yãmb me pa tol n tõe n yɩ kẽed-n-taag sẽn zems zãng ned ning y sẽn na n dɩkã nifẽ ye!—Luk 6:41.
13 Kãadem baoodame tɩ ned mong a meng yɛl wʋsgo. A Poll wilga rẽ a sẽn wa n yeel woto wã: “Mam datame tɩ yãmb da maan yɩɩr ye. Ned sã n ka tar paga, a geta Zusoaba yelle t’a tõe n maan sẽn noom Zusoabã. La ned ninga sẽn tar paga a geta dũniyã yelle t’a tõe n maan sẽn noom a paga. Woto me, pag sẽn kuil sɩda ne pag sẽn ka kuil sɩda yaa toor-toore. Pag sẽn ka kuil sɩd geta Zusoaba yelle t’a tõe n yɩ sõama ne a yĩnga yelle la ne a sɩɩga yell me. La pag sẽn kuil sɩd geta dũniyã yelle t’a tõe n maan sẽn noom a sɩdã.”—1 Korẽnt dãmba 7:32-34.
Kãadem kẽer sẽn sãamdã võore
14, 15. Yel-bʋs n tõe n koms kãadmã pãnga?
14 Sẽn pa kaoos pʋgẽ, kiris-nin-poak a yembr n namse, a sɩdã sẽn bas-a b kãadmã yʋʋm 12 poor n tɩ rɩk pag a to yĩnga. A reng n yãa yɛl a sɩdã nengẽ sẽn da wilgd tɩ b kãadmã na n sãamame bɩ? A bilga woto: “A wa n pa le pʋʋsdẽ ye. A wa n sɩnga kiris-neb tigissã la koe-moonegã yiib vaalg yel-yals yĩnga. A ra nong n yetame tɩ yẽ yaa wʋsgo, bɩ t’a pa tar sẽk n na n zĩnd ne maam ye. Wakat ninga, a pa gomd ne maam ye. A wa n le pa sõsd ne maam tẽebã yɛl zut ye. Ad yaa kaeto menga! A pa tol n wõnd mam sẽn kẽ kãadem ne rao ningã lae-lae ye.”
15 Neb a taab me wilga bãn sẽn wõnd n paas yam-kaalg maaneg ne meng Biibl zãmsgã, pʋʋsgã wall ne kiris-neb tigissã kẽnde. Sẽn dat n yeel tɩ nand tɩ neb wʋsg wa bas b kẽed-n-taasã, b reng n basame tɩ zems-n-taar ning b sẽn da tar ne a Zeova wã sãame. Rẽ kɩtame tɩ tẽebã yɛl wa pa ye pak-b ye. B wa n pa le get a Zeova wa Wẽnnaam sẽn vɩ ye. Dũni paalgã b sẽn kãab tɩ tɩrlem na n zĩnd a pʋgẽ wã wa n pa le yaa yel-sɩd ne-b ye. Kãadem kẽer pʋsẽ, kẽed-n-taag ning sẽn wa n beegã tẽeb reng n komsa woto meng t’a nan pa sɩng ned a to pʋgb ye—Hebre dãmba 10:38, 39; 11:6; 2 Pɩɛɛr 3:13, 14.
16. Bõe n paasd kãadem pãnga?
16 Sẽn yaa lebend ne woto, rao a ye ne a pag sẽn tar sũ-noog b kãadma pʋgẽ yeelame tɩ yaa b tẽebã sẽn tar pãngã n kɩt tɩ bãmb kãadmã tar sũ-noogã. B naagda taab n pʋʋsdẽ la b zãmsd Biiblã. Sɩdã yeelame: “Tõnd naagda taab n karemd Biiblã. D tũuda taab n yit koe-moonegã. Tõnd nong n naagda taab n maand bũmba fãa.” Woto sẽn zãmsd tõnd bũmb ninga yaa vẽenega: Zems-n-taar sẽn yaa sõma tallg ne a Zeova wakat fãa kɩtdame tɩ kãadem tall pãnga.
Tall-y tagsg sẽn zemse, la y yẽsd ne taaba
17. a) Yɛl a yiib bʋs n sõngd tɩ kãadem tall sũ-noogo? b) Wãn to la a Poll bilgd kiris-neb nonglmã?
17 Yɛl a yiib me n be n tõe n kɩt tɩ kãadem tall barka: yaa kiris-neb nonglmã, la yẽsgo. Neb a yiib sã n nong taaba, b wae n basda a taab kongr taale. Kẽed-n-taasã sẽn da wa n kẽed kãadmã, tõe tɩ b ra tika yɛl b sẽn yã filim dãmbẽ bɩ b sẽn karem sɛb pʋsẽ n mag mag-bɛd sẽn pa zemse. La b na n wa mikame tɩ yɛlã pa wa b sẽn da mag to-to wã ye. Rẽ masã, b ned kam fãa beeg-bõonegã bɩ a raasenkam manesem sẽn da kãbgd sũur bilf wat n lebga yel-kãsemse. La sã n wa yaa woto, kiris-nebã segd n talla vʋʋsem sõngã biisi. Nonglmã bee bi-kãens sʋka. (Galat dãmba 5:22, 23) Sɩd-sɩda, nonglem ning kiris-nebã sẽn tarã tara pãnga, a pa wa ned ne a roll sẽn nong taab to-to wã ye. A Poll bilga nonglem ning kiris-nebã sẽn tarã woto: “Nonglem maanda sũ-mare, la a pida ne neerlem. . . . A ka baood a meng sõngr bal ye, la a ka maand sũ-yikr ye, la a ka tagsd wẽng ye. . . . A maanda sugr ne bũmb fãa, la a tẽeda bũmb fãa, a gũuda a tẽeb pidsg ne bũmb fãa, la a tõe n tõoga toog fãa pʋgẽ.” (1 Korẽnt dãmba 13:4-7) Vẽenega, nonglem hakɩkã kɩtdame tɩ f basd beeg-bõonesã taale. Sɩda, a kɩtdame tɩ f pa gũudẽ tɩ neb a taabã maan bũmba fãa tɩ zems zãng ye.—Yelbũna 10:12.
18. Wãn-wãn la yẽsg tõe n paas zood pãnga?
18 Yẽsg me tara yõodo. Baa ne yikãadb sẽn zĩnd ne taab n maan yʋʋm sõor ninga, b segd n ket n yẽsda ne taab la b kelgd taab sõma-sõma. Sɩd a yembr yeela woto: “Tõnd pelgda d pʋs n togsd taab d tagsa, la d maanda rẽ ne zood manesem.” Pag ne a sɩd sã n zĩnd ne taab sõma n kaoose, b wat n wʋmda taab sõma-sõma, baa bũmb nins kẽed-n-taag fãa sẽn dat la a pa yaag a noor n yeelã. Sẽn dat n yeel tɩ yʋʋmã sẽn tar loogrã, yikãadb sẽn tar sũ-noog b kãadem pʋgẽ wat n tõe n bãnga taab tagsg la b raab tɩ pa tũ ne goam ye. Pagb kẽer n yeel tɩ bãmb sɩdbã pa kelgd-b sõma ye. Pʋg-sɩdb kẽer yeta ne sũ-sãang tɩ yaa wakat ning bãmb sẽn wat n pa rat goamã la bãmb pagbã tʋll n gom ne bãmba. Sẽn na yɩl n tõog n yẽs ne neda, f segd n talla nimbãan-zoeer la f yɩ wʋmda. Kẽed-n-taasã sã n yẽsd ne taab sõma, nafda bãmb b yiibã fãa.—Zak 1:19.
19. a) Bõe yĩng tɩ sugr kosg tõe n yɩ toogo? b) Bõe n na n kɩt tɩ d tʋlg n kos sugri?
19 Wakat-wakate, yẽsg mi n baoodame tɩ f kos sugri. Pa wakat fãa la rẽ maaneg yaa nana ye. Rẽndame tɩ f tall sik-m-meng n tõog n sak n deeg f kongre. La rẽ tõe n sõngame n kɩt tɩ kãadem tall pãnga. Sugr f sẽn pelg f pʋg n kos tõe n gɩdga bũmb sẽn da na n wa ne mo-yõsre, la a kɩt tɩ b sɩd kõ sugri, la a welg yellã zãnga. A Poll yeelame: “Bɩ y maan sũ-mar ne taaba la y kõ taab sugri, ned sã n tar yell ne a to, a wa [a Zeova] sẽn kõ yãmb sugrã, bɩ yãmb me kõ taab sugr woto. La sẽn paas bõn-kãens fãa, bɩ y maan nonglem sẽn yaa bũmb fãa loɛtg sɩd-sɩdã.”—Kolos rãmba 3:13, 14.
20. Manesem bʋg la yikãad sẽn yaa kiris-ned segd n tall ne a kẽed-n-taagã, b sã n wa yaa b yen-yen, la b sã n wa be neb sʋka?
20 Bũmb a to me sẽn yaa tɩlae kãadem pʋgẽ, yaa teel taaba. Kẽed-n-taas sẽn yaa kiris-neb segdame n tõe n teeg taab la b tall bas-yard ne taaba. B pa segd n komsd taab raood wall b paoogd taab ye. Yikãadb nins sẽn yaa kiris-nebã pẽgda taaba, b pa sãbsd taab ye. (Yelbũna 31:28b) Sãmbg kae tɩ d pa na n paoogd d kẽed-n-taasã, n gomd n yaand taab ye. (Kolos rãmba 4:6) Teel taab a woto paamda pãng n paasdẽ, b sã n wilgd taab wakat fãa ne b manesmã tɩ b nonga taaba. Nug palgr wall nonglem gomd f sẽn togs ne bʋgsem tõe n dat n yeelame tɩ: “M ket n nong-f lame. M sũur nooma f sẽn be ne-ma.” Woto yaa yɛl kẽer sẽn tõe n paas zood pãng la kɩt tɩ kãadem tall sũ-noog rũndã zãmaanã pʋgẽ. Yɛl a taab me n be, tɩ sõsg ning sẽn pʋgdã na n kõ-d sagls sẽn yit Gʋlsg Sõamyã pʋgẽ n paase, sẽn wilgd d sẽn tõe n kɩt tɩ kãadem tall sũ-noog to-to. *
[Tẽngr note]
^ sull 20 Sẽn na yɩl n paam kɩbay a taab n paas bɩ y ges sebr ning gom-zug sẽn yaa: Zak pʋgẽ sũ-noogã kʋɩlen-biiga pʋgẽ. A Zeova Kaset rãmbã n yiis-a.
Y tõe n wilga a võor bɩ?
• Yel-bʋs n tõe n sãam kãadem?
• Bõe yĩng tɩ pa sõma tɩ d yɩ yãg-yãg n kẽ kãadem?
• Wãn to la tẽeb sẽn tar pãng tõe n maneg kãadem?
• Yel-bʋs n tõe n kɩt tɩ kãadem tall pãnga?
[Zãmsgã sogsgã]
[Foto rãmba, seb-neng 26]
Zems-n-taar sẽn tar pãng tallg ne a Zeova wakat fãa kɩtdame tɩ kãadem tall pãnga