Maan-y sũ-noog y sẽn yaa kiris-nebã yĩnga

“Ned ninga sẽn maand sũ-noogo, bɩ a maan sũ-noog ne [a Zeova].”—1 KORẼNT DÃMBA 1:31.

1. Bõe n yaa vẽeneg nebã manesem ne tũudmã wɛɛngẽ?

“YAM-KAALOGO.” Sẽn pa kaoos pʋgẽ, kɩba-kõt tũudmã yɛl zut n tũnug ne gom-kãngã n bilg neb wʋsg yel-manesem ne b tẽebã sẽn yaa a soaba. A wilgame: “Manesem kãseng ning sẽn paamd pãng rũndã-rũndã tũudmã pʋgẽ wã pa tɩ loe ne tũudmã meng ye, yaa ‘yam-kaalgo.’ ” A wilga yam-kaalgã wala “f toog sẽn na n kae ne f mengã tũudum.” A paasame tɩ “neb wʋsg tẽeda Wẽnnaam . . . , la b toog kae ne-a ye.”

2. a) Bõe yĩng tɩ nebã sẽn tar yam-kaalg ne tẽebã yɛlã pa lingri? b) Yam-kaalgã wata ne yel-bʋg kiris-nebã zugu?

² Nebã sẽn tar yam-kaalg woto wã pa ling neb nins sẽn zãmsd Biiblã ye. (Luk 18:8) Tũudmã wɛɛngẽ, nebã yam-kaalgã yaa bũmb d sẽn da segd n gũ tɩ wa. Hal sẽn kaoose, ziri tũudmã belga ãdem-biisã la a sãam b sũyã. (Wilgri 17:15, 16) La yam-kaalgã la yẽesmã kaalem sẽn paamd pãngã yaa yell ne kiris-neb hakɩkã. D pa segd n tall yam-kaalg ne d tẽebã n bas yẽesem ning d sẽn tar Wẽnnaam balengã pʋgẽ wã, la yẽesem ning d sẽn tar sɩd ning sẽn yit Biiblã pʋgẽ wã yĩng ye. A Zezi keooga tõnd tɩ d gũus n da yɩ zal-zal tẽebã wɛɛngẽ, a sẽn wa n keoog Laodise kiris-nebã woto pipi yʋʋm kob-gĩndẽ wã: “Mam miimi tɩ yãmb ka maasga, la y ka tʋʋlg me ye. Mam nonga yãmb sã n da yaa maasg walla tʋʋlga. . . . Yãmb . . . yaa zal-zale.”—Wilgri 3:15-18.

D bãng d sẽn yaa neb ninsi

3. Zĩ-bʋs wɛɛngẽ la d tõe n tall zu-zẽkre, d sẽn yaa kiris-nebã yĩnga?

³ Sẽn na yɩl n mao ne tẽebã wɛɛngẽ yam-kaalgã, kiris-nebã segd n bãnga b sẽn yaa neb ninsã vẽenega, la b tall zu-zẽkr sẽn zems ne b sẽn yaa neb ninsã. D sẽn yaa a Zeova sõgen dãmb la Kirist karen-biisã yĩnga, d tõe n yãa b sẽn bilg tõnd sẽn yaa neb nins buudã Biiblã pʋgẽ. Tõnd yaa a Zeova “kaset rãmba,” n yaa “tʋmd-n-taas ne Wẽnnaam,” d sẽn moond ‘koe-noogã’ neb a taabã yĩnga. (Ezai 43:10; 1 Korẽnt dãmba 3:9; Matɩe 24:14) Tõnd yaa neb sẽn “nong taaba.” (Zã 13:34) Kiris-neb hakɩkã yaa neb sẽn ‘mi sõma ne wẽng n bake.’ (Hebre dãmba 5:14) Tõnd yaa wa “fɩtl dãmb dũniyã pʋgẽ.” (Filip rãmba 2:15) D maoodame n na n tall ‘yel-manesem sẽn yaa sõma neb nins sẽn ka pʋʋsd Wẽnnaamã sʋka.’—1 Pɩɛɛr 2:12; 2 Pɩɛɛr 3:11, 14.

4. Wãn to la a Zeova balemd tõe n bãng a sẽn pa a soaba?

⁴ A Zeova balemdb hakɩkã mii b sẽn pa neb nins me. B miime tɩ “bãmb ka dũniyã rẽnd” wa b Taoor soab a Zezi Kirist sẽn da pa dũniyã rẽndã. (Zã 17:16) B kell n welga b mens ne dũniyã neb ‘yam sẽn ka likã, la sẽn ka mi Wẽnnaam vɩɩmã.’ (Efɛɛz rãmba 4:17, 18) Rẽ  kɩtame t’a Zezi karen-biisã ‘bas Wẽnnaam kɩɩsgo la dũniyã ratem sẽn yaa wẽnsã, la b gũusd b mens dũniyã ka masã n maand tɩrg la b sakd Wẽnnaam.’—Tɩt 2:12.

5. ‘Maan sũ-noog a Zeova yĩng’ rat n yeelame tɩ bõe?

⁵ Tõnd sẽn mi d sẽn yaa neb nins vẽenegã, n paas zems-n-taar ning d sẽn tar ne ãndũniyã Naab sẽn ka to wã tusda tõnd tɩ d “maan sũ-noog ne [a Zeova].” (1 Korẽnt dãmba 1:31) Tõnd sẽn yaa kiris-neb hakɩkã, d tara zu-zẽkr bɩ sũ-noogo, a Zeova sẽn yaa tõnd Wẽnnaamã yĩnga. D tũuda sagl-kãngã: “Ned sã n dat n maan sũ-noogo, bɩ a maan sũ-noog a sẽn mi maama yĩnga, tɩ m yaa Zusoaba n tar nonglem la m maand tɩrga la sõama dũniyã zugu.” (Zeremi 9:23) D ‘maanda sũ-noogo,’ d sẽn tar zu-noog n mi Wẽnnaam la a sẽn tũnugd ne tõnd n sõngd neb a taabã yĩnga.

Tagsg sẽn zems kɛpɩ tallg yaa toogo

6. Bõe yĩng tɩ neb kẽer getẽ tɩ yaa toog tɩ b tall tagsg sẽn zems kɛpɩ ne b sẽn yaa kiris-nebã?

⁶ D sak n deeg tɩ kell n tall tagsg sẽn zems kɛpɩ ne d sẽn yaa kiris-nebã pa nana wakat fãa ye. Bi-bɩɩg b sẽn wub kiris-nedemdã pʋgẽ tẽrame tɩ wakat n zĩnd t’a ra ka pãng tẽebã wɛɛngẽ ye: “Wakat ninga, m da tagsdame tɩ m da pa mi bũmb ning sẽn kɩt tɩ m yaa a Zeova Kaset soabã ye. B zãmsa maam sɩd ning sẽn be Biiblã pʋgẽ wã hal m yãadem wakate. Wakat ninga m da tagsdame tɩ yaa tũudum wa a taabã.” Tõeeme tɩ kẽer basame tɩ dũniyã pʋgẽ reemã, kɩba-kɩtbã la nebã sẽn nong n tar tagsg ning vɩɩmã wɛɛngẽ tɩ kɩɩsd Wẽnnaam daabã wilg bãmb b sẽn yaa neb ninsi. (Efɛɛz rãmba 2:2, 3) Wakat ninga, kiris-neb kẽer maanda sãmb-sãmb ne b sẽn yaa neb ninsã, n leb n dat n tags b sẽn get tɩ bũmb ning tara yõodã la b bõn-datɩ wã zutu.

7. a) Fees-m-meng bʋg buud n zems ne Wẽnnaam sõgen dãmbã? b) Fees-m-meng bʋg buud n tõe n yɩ yell n kõ-do?

⁷ Fees-m-meng neer wakat-wakatã yaa bũmb sẽn pa zems lae-lae bɩ? Ayo. Tõe tɩ y tẽrame tɩ tʋm-tʋmd a Poll sagla kiris-nebã tɩ b feesd b mens wakat fãa. A yeelame: “Bɩ y fees yãmb mens n ges yãmb sã n bee tẽeb pʋgẽ. Mak-y yãmb mens n gese.” (2 Korẽnt dãmba 13:5) Ka wã tʋm-tʋmdã sagenda tõnd tɩ d modg n fees d meng n yã tẽeb pãn-komsem buud fãa, sẽn na yɩl n maan d sẽn na maaneg n wa ne remsgo. Kiris-ned sã n wa feesd a meng n na n ges a sã n ket n bee tẽebã pʋgẽ, a segd n bao n bãnga a goamã la a tʋʋmã sã n zemsa ne a sẽn yet t’a tẽeda bũmb ninsã. La d sã n feesd d mengã ne manesem sẽn pa zems n na n bãng d sẽn yaa ‘neb ninsã,’ bɩ d sã n bao leoor sẽn pa tik zems-n-taar ning d sẽn tar ne a Zeova wã bɩ ne kiris-neb tigingã zugu, fees-m-mengã pa na n tall yõodo, la a tõe n wa sãama d tẽebã menga. * Tõnd pa tol n dat tɩ d ‘tẽebã sãam’ ye.—1 Tɩmote 1:19.

Kiris-nebã me mi n tara sãmbse

8, 9. a) Wãn to la a Moiiz wilg t’a ra maanda sãmb-sãmbe? b) A Zeova talla manesem bʋgo, a Moiiz sẽn da tagsd t’a pa tar tõogã taoore? d) Yãmb tagsg yaa bõe ne a Zeova sẽn kõt a sõgen dãmbã bas-m-yam n yɩlemdẽ wã?

⁸ Kiris-neb nins sẽn tar sãmb-sãmb wakat-wakatã segd n tagsame tɩ b yaa kɩɩsdb bɩ? Ayo. Sɩda, b tõe n paama belsgo, b sã n bãng tɩ tags-kãensã pa sɩng masã ye. Wẽnnaam kaset rãmb sẽn yɩ wẽn-sakdb pĩnd wẽndẽ wã sega yel-kãensã buudu. Wala makre, yɩɩ woto ne a Moiiz sẽn tall tẽeb kãseng la wẽn-sakr wʋsgã. B sẽn wa n bobl a Moiiz tʋʋmd sẽn wõnd yɩɩda a pãngã, a soka woto ne sãmb-sãmbe: “Maam la ãnda?” (Yikri 3:11) Yaa wa a tagsa woto: ‘Mam pa baa fʋɩ ye!’ bɩ ‘M pa tar tõog ye!’ A Moiiz vɩɩmã nens kẽer n da tõe n kɩt t’a tags t’a pa tõe tʋʋmdã ye. A buuda neb ra yaa yembse. Israɛll nebã ra zãgs-a lame. A ra pa gom-minim soab ye. (Yikri 1:13, 14;  2:11-14; 4:10) A ra yaa rũm-kɩɩma, tɩ Ezipt nebã ra kis tʋʋm-kãngã. (Sɩngre 46:34) Rẽnd pa lingr la a sẽn da pa get t’a tõe n yɩɩ Wẽnnaam nin-buiidã sẽn da be yembd pʋgẽ wã fãagdã ye!

⁹ A Zeova kõo a Moiiz bas-m-yam n maan-a kãab-kãsems a yiib woto: “M na n zĩnda ne foo la ad kaset ning m sẽn kõt-f tɩ f bãng tɩ yaa maam n tʋmd foo: f sã n wa yiis m neba Ezipt tẽnga, y na rʋ tãn-kãnga zug n waoog-ma.” (Yikri 3:12, Sebr Sõngo) Wẽnnaam yeela a sõgna sẽn da maand sãmb-sãmbã t’a na n zĩnda ne-a wakat fãa. Sẽn paase, a Zeova ra wilgdame t’a sɩd ra na n fãaga a nin-buiidã. Yʋʋm kobsã sẽn pʋg taabã pʋsẽ, Wẽnnaam maana kãabs woto buud sẽn wilgd t’a na n sõnga a sõgen dãmbã. Wala makre, a tũnuga ne a Moiiz n yeel Israɛll buudã, b sẽn da wa n segl n na n kẽ Kãabg Tẽngã tɩ: “Nang-y pãnga, keng-y y sũyã. . . . Zusoab a Wẽnnaam yãagda yãmba. Bãmb sõngra ka na n vaal ye, b ka na n bas yãmb ye.” (Tõodo 31:6) A Zeova kõo a Zozue me bas-m-yam woto: “Ned ka be sẽn na n tõog n yals fo taoor ye. Mam na n zĩnda ne foom . . . , mam ka na n bas foom lɛ-lɛ ye.” (Zozue 1:5) A kãaba kiris-nebã me woto: “Mam kõn bas yãmb walla m mong yãmb abada.” (Hebre dãmba 13:5) D sẽn tar sõng-kãseng kãngã wã segd n kɩtame tɩ d maan sũ-noogo, d sẽn yaa kiris-nebã yĩnga!

10, 11. Wãn to la Levi ned a Azaf paam sõngr n kell n ges a Zeova balengã wa bũmb sẽn tar yõodo?

¹⁰ Sẽn zems yʋʋm kobs-nu a Moiiz loogr poore, Levi buudã ned a Azaf sẽn yaa wẽn-sakdã gʋlsame n sãmbd sã n tara yõod t’a ket n maand sẽn yaa tɩrga. A Azaf sẽn da wa n maood n maand Wẽnnaam daabã baa ne zu-loees la makr toɛy-toɛyã, a yãame tɩ neb kẽer sẽn laad Wẽnnaam paamda pãng la arzɛk n paasdẽ. Rẽ maana a Azaf bõe? A sak n deega woto: “Kella bilf bala tɩ mam naoã yõsge; mam naoã da rat n salgame. Tɩ bõe, mam da maanda sũ-kiir ne wuk-m-mens rãmba mam sẽn yã nin-wẽns zu-nooga yĩnga.” A sɩngame n sãmbd sã n tara yõod t’a ket n balemd a Zeova. A Azaf tagsa woto: “Sɩda, yaa zaalem tɩ mam zĩnd ne pʋ-peelem n nudg m nus ne bʋʋm. La mam paamda pãbr daar fãa.”—Yɩɩl Sõamyã 73:2, 3, 13, 14.

¹¹ Wãn to la a Azaf mao ne sãmb-sãmb kãense? A kɩɩsame t’a pa maand sãmb-sãmb bɩ? Ayo. Wala d sẽn yãt Yɩɩl Sõamyã 73 soabã pʋgẽ wã, a pʋʋsa Wẽnnaam n wilg sãmbs nins a sẽn da tarã. Bũmb ning sẽn wa ne a Azaf tagsgã toeengã yaa a sẽn kẽng wẽn-doogẽ wã. A sẽn da wa n be be wã, a bãngame tɩ wẽn-sakr vɩɩm n yaa sõma n yɩɩda. A sẽn leb n tall naneb ne tẽebã yɛlã, a bãngame t’a Zeova kisa wẽnga, la tɩ wakat sã n ta, nin-wẽnsã na n paama sɩbgre. (Yɩɩl Sõamyã 73:17-19) A Azaf tagsgã sẽn paam demsg woto wã, a bãngame n paas t’a sẽn yaa a Zeova sõgna yaa zu-noog menga. A yeela Wẽnnaam woto: “Mam bee ne yãmb wakat fãa. Yãmb gãta mam nug rɩtgo. Yãmb na n tɛɛ maam ne y saglgo n yaool n deeg maam ne ziiri.” (Yɩɩl Sõamyã 73:23, 24) A Azaf wa n maana  sũ-noog ne a Wẽnnaamã yɛsa.—Yɩɩl Sõamyã 34:3.

B ra mii b sẽn da yaa b rãmbã vẽenega

12, 13. Kõ-y makr sẽn yit Biiblã pʋgẽ sẽn tɩ loe ne neb sẽn da ges zems-n-taar ning b sẽn da tar ne Wẽnnaamã wala zu-zẽkre.

¹² Manesem a yembr d sẽn tõe n tũnug ne n wilg sõma tɩ d yaa kiris-neb yaa d sẽn na n bao n bãng Wẽnnaam pĩnd wẽndẽ balemdb hakɩkã sẽn tall tẽeb ningã, la d rɩk b togs-n-taare. Baa toog pʋgẽ, nin-kãensã kell n gesame tɩ b sẽn tar zems-n-taar ning ne Wẽnnaamã yaa zu-zẽkr ne-ba. D rɩk makr ne a Zakoob biribl a Zozɛfe. B zãmb-a lame n koos t’a ket n yaa bi-bɩɩga, tɩ b tall-a n kẽng Ezipt sẽn zãr wʋsg ne a ba wã sẽn yaa wẽn-zoɛtã sẽn beẽ wã, la sẽn yaa toor wʋsg ne a ba wã zak neb sẽn da teend taab ne nonglmã. A Zozɛf sẽn da wa n be Eziptã, a ra pa tar ned a sẽn na n kolg n kos sagls sẽn zems ye, la a ra segdame n mao ne yel-tood sẽn da rat n sãam a vɩɩm manesmã la a bas-yardã ne Wẽnnaamã. La vẽenega a modga ne a sũur fãa n kell n wilg t’a yaa Wẽnnaam sõgen hakɩka, la a kell n saka noy nins a sẽn da mi tɩ yaa tɩrsã. Baa ne a sẽn da be kɩɩsdb sʋkã, a ra getame tɩ yaa zu-zẽkr ne-a, a sẽn da yaa a Zeova balemdã, la a yam pa yo la a wilg a sẽn tagsd bũmb ningã ye.—Sɩngre 39:7-10.

¹³ Yʋʋm kobs-nii poore, Israɛll bipugl sẽn lebg Siiri sodaas naab a Naamã yemb-poak pa yĩm t’a yaa a Zeova balemd ye. Bipugl kãng sẽn wa n paam sore, a kõo kaset sẽn yaa sõma a Zeova zugu, a sẽn wilg t’a Elize yaa sɩd Wẽnnaamã no-rɛɛsã. (2 Rĩm dãmba 5:1-19) Yʋʋm loogr poore, rĩm a Zozɩas sẽn da yaa bi-bɩɩgã rɩka wakat wok n wa ne remsg tũudmã yɛl wɛɛngẽ, n lebs n maneg Wẽnnaam doogã,  n kɩt tɩ buudã le balemd a Zeova, baa ne a sẽn da vɩ wẽn-kɩɩsdb sʋkã. A ra geta a tẽebã la a sẽn da balemd Wẽnnaamã wa zu-zẽkr bũmbu. (2 Kɩbaya, sak 34, 35) A Daniɛll ne a tũud-n-taas a tãabã sẽn yaa Hebre buud nebã ra zɩ n yĩm tɩ b yaa a Zeova sõgen dãmb ye. La baa neb a taabã sẽn da tusd-b n dat tɩ b kɩɩs Wẽnnaam la b ra baood n na n kʋɩɩb-bã, b kell n saka Wẽnnaam. Vẽenega, b ra maanda sũ-noog b sẽn yaa a Zeova sõgen dãmbã yĩnga.—Daniɛll 1:8-20.

Ges-y y sẽn yaa kiris-nebã wala zu-zẽkre

14, 15. Maan sũ-noog d sẽn yaa kiris-nebã yĩng baooda bõe maanego?

¹⁴ Wẽnnaam sõgen kãensã ra tõoga b vɩɩmã pʋgẽ, b sẽn da ges tɩ b zems-n-taarã ne Wẽnnaamã yaa zu-zẽkr ne-bã yĩnga. Yaa wãn to yẽ ne tõnd rũndã-rũndã? Ges d sẽn yaa kiris-nebã wala zu-zẽkrã baoodame tɩ d maan bõe?

¹⁵ Pipi, rẽ baoodame tɩ d ned kam fãa tall mi-beoog wʋsgo, a sẽn yaa ned sẽn zãad a Zeova yʋʋrã, n tar a bark la a tat a yamã yĩnga. Wẽnnaam mii neb nins sẽn yaa a rẽndã tɩ sãmb-sãmb kaẽ ye. Tʋm-tʋmd a Poll sẽn vɩɩmd wakat sẽn tall zũnd-zãnd wʋsg tũudmã wɛɛngẽ wã sasa gʋlsa woto: “Zusoaba mii bãmb menga neba.” (2 Tɩmote 2:19; Sõdbo 16:5) A Zeova sũur nooma ne a nebã. A togsame tɩ ‘ned sã n sɩɩs yẽ neda, yaa wa a sẽn tuk a nifu.’ (Zakari 2:12) Vẽenega, a Zeova nonga tõndo. Tõnd me zems-n-taarã ne yẽ wã segd n tika nonglem kãseng ning d sẽn tar ne-a wã zugu. A Poll yeelame: “Ned sã n nong Wẽnnaam, Wẽnnaam mii a soaba.”—1 Korẽnt dãmba 8:3.

16, 17. Bõe yĩng tɩ kiris-nebã, kamb la kãsemb tõe n paam zu-zẽkre, b tẽebã rogem pʋɩɩr yĩnga?

¹⁶ Kom-bɩɩs nins b sẽn wub a Zeova Kaset rãmb zak pʋgẽ wã segd n gesa b sã n neeme tɩ b lebgda kiris-neb hakɩk n paasdẽ, b sẽn tar zems-n-taar ne Wẽnnaamã yĩnga. B pa segd n teeg b roagdbã tẽeb bal ye. A Poll gʋlsa woto Wẽnnaam sõgen fãa wɛɛngẽ n yeel tɩ yẽ “sã n yalsdẽ walla a sã n lʋɩ” yaa a zu-soabã taoore. Rẽ n so t’a Poll paase: “Tõnd ned kam fãa na n togsa a meng yell Wẽnnaam taoore.” (Rom dãmba 14:4, 12) Vẽenega, y sã n be y roagdbã sẽn yaa a Zeova balemdbã tũudum pʋgẽ tɩ pa ne y sũur fãa, rẽ pa tõe n kɩt tɩ y tall zood sẽn tar pãng la sẽn kaoosd ne a Zeova ye.

¹⁷ Ãdem-biisã zãmaan dãmb sẽn pʋg taabã pʋsẽ, a Zeova kaset rãmb n zĩndi. B sɩnga ne wẽn-sakd a Abɛlle, sẽn zems yʋʋm 6 000 sẽn loogã, n wa tõk rũndã-rũndã kaset rãmb ‘kʋʋn-kãsengã,’ t’a Zeova balemdb sõor wʋsg na n wa paase, n paam bark sẽn ka saab beoog-daarã. (Wilgri 7:9; Hebre dãmba 11:4) Yaa tõnd la balemdb sẽn yaa wẽn-sakdbã sõor sẽn yaa wʋsgã yaoolem dãmba. Ad sɩd yaa tẽeb rogem pʋɩɩr sẽn be bark wʋsg la d tara!

18. Wãn to la tõnd sẽn get tɩ bũmb nins tara yõodã la noy nins tõnd sẽn tũudã welg tõnd toor ne dũniyã?

¹⁸ Tõnd sẽn yaa kiris-nebã me, baoodame tɩ d tũ vɩɩm manesem noyã, tɩ d tall zʋg-sõma, la d maan yɛl a taab sẽn kɩtd tɩ b bãng tɩ tõnd yaa kiris-neba. Yaa ‘sorã’ la vɩɩm so-yɛng ning sẽn nafd ned la sẽn tat Wẽnnaam yamã. (Tʋʋma 9:2, Kãab-paalgã Koe-noogo; Efɛɛz rãmba 4:22-24) Kiris-nebã ‘makda bũmb fãa’ la ‘b gãt sẽn yaa neer kãn-kãe.’ (1 Tesalonik rãmba 5:21) D mii welg-kãseng ning sẽn be kiris-nedemdã ne dũniyã sẽn zãr ne Wẽnnaamã sʋk vẽenega. A Zeova kɩtame tɩ d mi sɩd balengã ne ziri balengã vẽeneg n bake. A tũnuga ne no-rɛɛs a Malaki  n togs woto: “Yãmb na n le tõog n bãnga nin-sõng ne nin-wẽng n bake, la ned sẽn sakd maam ne ned sẽn ka sakd maam n bake.”—Malaki 3:18.

19. Bõe n pa na n tol n paam kiris-neb hakɩkã tẽebo?

¹⁹ Sẽn mik tɩ maan sũ-noog a Zeova yĩngã tara yõod wʋsg dũni kãngã sẽn pid ne zũnd-zãndã pʋgẽ wã yĩnga, yaa bõe n tõe n sõng tõnd tɩ d tall zu-zẽkr ne d Wẽnnaamã, la d bãng vẽeneg tɩ d yaa kiris-neba? Sagl-sõma n be sõsg ning sẽn pʋgdã pʋgẽ. Y sã n wa vaeesd-b bɩ y kɩs sɩd ne woto: ‘Yam-kaalgã’ pa na n tol n sãam kiris-neb hakɩkã tẽeb ye.

[Tẽngr note]

Y tẽrame bɩ?

• Wãn to la kiris-nebã tõe n ‘maan sũ-noog a Zeova yĩnga’?

• Bõe la a Moiiz la a Azaf makrã zãmsd yãmba?

• Nin-bʋs Biiblã sẽn gom b yell n maan sũ-noog b sẽn da tʋmd Wẽnnaam tʋʋmdã yĩnga?

• Maan sũ-noog d sẽn yaa kiris-nebã yĩng baooda bõe maanego?

[Zãmsgã sogsgã]

[Foto, seb-neng 14]

Wakat n zĩnd t’a Moiiz ra tar sãmb-sãmbe

[Foto rãmba, seb-neng 15]

A Zeova pĩnd wẽndẽ sõgen dãmb wʋsg pa zoe yãnd ne b sẽn da yaa neb nins buudã ye