Sagls sẽn yaa sõma yikãadbã yĩnga
Sagls sẽn yaa sõma yikãadbã yĩnga
‘Pagba, bɩ y sak y sɩdba wa yãmb sẽn sakd Zusoabã. Rapa, bɩ y nong y pagbã.’—Efɛɛz rãmba 5:22, 25.
1. Tagsg sẽn zems kãadmã wɛɛngẽ la bʋgo?
A ZEZI yeelame tɩ kãadem yaa pag ne rao Wẽnnaam sẽn lagem taaba, tɩ b segd n lebg “yĩng a yembre.” (Matɩe 19:5, 6) Kãadem lagemda neb a yiib zʋg sẽn pa yembr ne taaba, tɩ ned kam fãa baood n na n nong bũmb ning a to wã sẽn nonge, la b tʋmd ne taab sẽn na yɩl n pids b bõn-datɩ wã sẽn yaa a yembrã. Kãadem yaa pʋleng neb a yiib sẽn pʋlem tɩ b na n zĩnda ne taab b yõor tɛka. Pa wala b sẽn zems taab zugẽ-zugẽ bala, tɩ sã n wa lebg yell bɩ b tõe n bas taab nana-nana ye. Tẽns wʋsg pʋsẽ, f tõe n paama sor n kao kãadem faag-faaga. La ne kiris-neda, kãadmã loɛtg pa reem bũmb ye. Sɩd me, yaa yel-kãseng poorẽ bal la b tõe n kao-a.—Matɩe 19:9.
2. a) Sõng-bʋg la yikãadbã tõe n paame? b) Bõe yĩng tɩ tar yõod tɩ d modg n kɩt tɩ d kãadmã yɩ sõma?
2 Pag a yembr sẽn sagend yikãadbã yeela woto: “Kãadem sẽn yaa sõma toeemda wakat fãa a sẽn wat ne yel-paalsã yĩnga, yikãadbã sẽn maood ne b zu-loeesã, n paas b sẽn tʋmd ne sõngr ning b sẽn paamd b vɩɩmã wakat toɛy-toɛy pʋsẽ to-to wã.” La ne yikãadb nins sẽn yaa kiris-nebã, Biiblã saglsã, teelg ning b sẽn paamd b tẽed-n-taasã nengẽ wã la a Zeova pẽnegr wakat fãa pʋʋsg pʋgẽ naaga sõng-kãng pʋgẽ. Yikãadem sẽn yaa sõma pa sãamd zu-loeesã yĩng ye, yʋʋmã sẽn tar loogrã pʋgẽ, a wat n kõo paga ne a sɩdã sũ-noogo. Sẽn yɩɩd fãa, kãadem sẽn yaa sõma waoogda Wẽnnaam a Zeova sẽn yaa kãadmã Lugendã.—Sɩngre 2:18, 21-24; 1 Korẽnt dãmba 10:31; Efɛɛz rãmba 3:15; 1 Tesalonik rãmba 5:17.
Rɩk-y a Zezi ne a tigingã togs-n-taare
3. a) Kʋms-y saglg ning a Poll sẽn kõ yikãadbã. b) Mak-sõng bʋg la a Zezi kõ-yã?
3 Yʋʋm tus a yiib sẽn looge, tʋm-tʋmd a Poll kõo kiris-neb nins sẽn yaa yikãadbã saglg sẽn yaa sõma, a sẽn wa n gʋls woto wã: “Wa a Zezi tẽedba sẽn sakd Kiristã, bɩ pagba me sak b sɩdba woto ne bũmb fãa. Rapa, bɩ y nong y pagba wa Kirist sẽn nong bãmb tẽedbã n kõ bãmb meng bãmb yĩngã.” (Efɛɛz rãmba 5:24, 25) Ad makr ning a Poll sẽn dɩk zĩ-kãensã wã sɩd zemsa kɛpɩ! Pagb nins sẽn yaa kiris-nebã sẽn sakd b sɩdbã ne sik-m-mengã rɩkda tigingã togs-n-taare, n wilgdẽ tɩ b sakda noor ning Wẽnnaam sẽn gãneg zu-sobendã wɛɛngẽ wã. Pʋg-sɩdb nins sẽn yaa tẽedbã sẽn nong b pagbã noog la toog wakatã wilgda ne rẽ tɩ b rɩkda Kirist sẽn nong a tigingã la a get yellã togs-n-taare.
4. Wãn-wãn la pʋg-sɩdbã tõe n dɩk a Zezi togs-n-taare?
4 Pʋg-sɩdb nins sẽn yaa kiris-nebã yaa b zagsã zu-soben dãmba, la bãmb me tara b zu-soab sẽn yaa a Zezi. (1 Korẽnt dãmba 11:3) Woto yĩnga, wala a Zezi sẽn ges a tigingã yellã, pʋg-sɩdbã me segd n gesa b zagsã neb yell yĩngã la tẽebã wɛɛngẽ ne nonglem, baa ne rẽ sẽn baood tɩ b modg to-to fãa. B lʋɩɩsda b zagsã neb na yɩ neerã taoore. A Zezi yeelame: “Yãmb sẽn dat tɩ neba maan yãmb bũmb ningã, bɩ yãmb me maan bãmb boto.” (Matɩe 7:12) Yaa kãadmã pʋgẽ la b segd n tũ no-kãngã n yɩɩda. A Poll wilga rẽ a sẽn yeel woto wã: “Rapa tog n nonga b pagb wa bãmb mens yĩnsi. . . . Ned na n ka kisg a meng yĩng abada. La a rɩlgd-a lame la a geta a meng yelle.” (Efɛɛz rãmba 5:28, 29) Rao segd n dɩlga a pag la a ges a yell wala a sẽn dɩlgd a meng la a get a meng yell to-to wã.
5. Wãn to la pagbã tõe n dɩk kiris-neb tigingã makre?
5 Pagb nins sẽn balemd Wẽnnaamã rɩkda kiris-neb tigingã makre. A Zezi sẽn da be tẽng zugã, a karen-biisã saka ne sũ-noog n bas tʋʋm nins b sẽn da maandã n pʋg-a. A kũumã poore, b kell n sak-a lame, la baa sẽn na maan yʋʋm 2000 loogr poore, kiris-neb tiging hakɩkã ket n sakda a Zezi zu-sobendã bũmb fãa pʋgẽ. Woto me, pagb nins sẽn yaa kiris-nebã pa paoogd b sɩdbã bɩ noy nins Biiblã sẽn kõt kãadmã pʋgẽ zu-sobendã wɛɛngã wã ye. B pʋd n teenda b sɩdbã la b sakd-ba, tɩ rẽ kengd b sɩdbã pelse. Pagbã ne sɩdbã fãa sã n tall nonglem manesem kãngã, b kãadmã yɩta sõma, la b yiibã fãa na n talla sũ-noog a pʋgẽ.
Kell-y n zĩnd-y ne y pagbã
6. Sagl-bʋg la a Pɩɛɛr kõ pʋg-sɩdbã, la bõe yĩng t’a tar yõodo?
6 Tʋm-tʋmd a Pɩɛɛr me sagla yikãadbã, la a kõo pʋg-sɩdbã sagls sẽn tar pãnga. A yeelame: “Rapa, bɩ y zĩnd ne yãmb pagbã [tɩ zems ne bãngrã] n bãng tɩ bãmb [yaa wa laas sẽn ka pãnga]. La y maan bãmb sẽn zemse, yãmb sẽn yaa pʋɩt-n-taas ne vɩɩm barka kũuna yĩnga. Bɩ a yɩ woto tɩ bũmb da gɩdg yãmb pʋʋsg ye.” (1 Pɩɛɛr 3:7) Bũmb ning sẽn kɩt t’a Pɩɛɛr sagl-kãngã tar yõodã yaa vẽeneg verse wã baasgẽ. Rao sã n pa waoogd a paga, zems-n-taar ning ra-kãng sẽn tar ne a Zeova wã na n sãamame. Wẽnnaam pa na n deeg a pʋʋsgã ye.
7. Wãn-wãn la pʋg-sɩdbã segd n waoog b pagbã?
7 La yaa wãn to masã la pʋg-sɩdbã tõe n waoog b pagbã? Waoog pag rat n yeelame tɩ f ges a yell ne nonglem la ne burkĩndi. Pag yell gesg ne manesem sõng a woto tõe n yɩɩ manesem paalg ne neb wʋsgo. Bãngd a yembr sẽn yaa Gɛrɛs ned gʋlsa woto: “Sã n yaa ne Rom laloa wã, pag ra pa tar dʋrwa ye. B laloa wã taoore, dʋrwa nins a sẽn da tarã ne biig dʋrwa rãmb fãa yaa yembre. . . . A ra sakda a sɩdã zãng-zãnga, t’a sɩda tõe n maan-a a sẽn dat fãa.” Ad woto sɩd yaa lebend fasɩ ne kiris-nebã zãmsgo! Pʋg-sɩd sẽn yaa kiris-ned waoogda a pagã. Manesem ning a sẽn tar ne a pagã tika kiris-nebã sẽn tũud noy ninsã zutu, pa yẽ mengã yam sẽn dat zug ye. Sẽn paase, a segd n zĩnda ne a pagã ‘tɩ zems ne bãngrã,’ n pa yĩmdẽ t’a yaa wa laag sẽn ka pãng ye.
Zĩ-bʋg wɛɛngẽ la pag yaa wa ‘laag sẽn ka pãnga’?
8, 9. Zĩ-bʋs wɛɛngẽ la pagbã zem dapã?
8 A Pɩɛɛr sẽn yeel tɩ pag yaa wa ‘laag sẽn ka pãngã,’ pa rat n yeel tɩ pag pãng pa ta rao tẽebã bɩ yĩngã wɛɛngẽ ye. Yaa sɩd tɩ kiris-neb tigingã pʋgẽ, rapã tõe n paama zu-noog tʋʋm pagbã sẽn pa segd n bao, la tɩ zagsã pʋsẽ, pagbã segd n sakda b sɩdbã. (1 Korẽnt dãmba 14:35; 1 Tɩmote 2:12) Baasg zãnga, b baoodame tɩ pagbã la rapã fãa tall tẽeb a yembre, tɩ b tõog toog la b tũ vɩɩm manesem noy sẽn yaa sõma wʋsgo. La wala a Pɩɛɛr sẽn yeelã, rapã la pagbã fãa yaa “pʋɩt-n-taas ne vɩɩm barka kũuna.” Sẽn tɩ loe ne fãagrã, b fãa yaa a yembr Wẽnnaam a Zeova nifẽ. (Galat dãmba 3:28) A Pɩɛɛr sẽn da gʋls neb ninsã yaa pipi kiris-nebã sẽn paam vʋʋsem sõngã zaeebã. Dẽnd a goamã ra tẽegda pʋg-sɩdb nins sẽn yaa kiris-nebã tɩ b sẽn ‘yaa pʋɩt-n-taas ne Kiristã,’ bãmb ne b pagbã fãa ra tara saasẽ vɩɩmã saagre. (Rom dãmba 8:17) Rap ne pagb fãa na n wa yɩɩ maan-kʋʋdb la rĩm dãmb Wẽnnaam saasẽ Rĩungã pʋgẽ!—Wilgri 5:10.
9 Sãmbg sẽn ka be, pʋg-sɩdb nins sẽn yaa kiris-neb sẽn paam vʋʋsem sõngã zaeebã ra pa tẽed tɩ b yɩɩda b pagbã ye. Dẽnd yikãadb nins sẽn tar tẽng zug vɩɩmã saagrã me pa segd n tẽ tɩ bãmb yɩɩda b pagbã ye. Pagb la rap nins fãa sẽn yaa kʋʋn-kãsengã nebã peka b fut ne Pebilã zɩɩm tɩ lebg peelse. B fãa lagemda b koees n pẽgd a Zeova ‘wĩntoog ne yʋng’ dũniyã gill zugu. (Wilgri 7:9, 10, 14, 15) Pagbã la rapã fãa gũudame n na n wa paam “Wẽnnaam kambã paam-m-meng sẽn be ziirã,” wakat ning b sẽn na n wa maand sũ-noog “vɩɩm hakɩkã” pʋgẽ wã. (Rom dãmba 8:21, NW; 1 Tɩmote 6:19, Kãab-paalgã Koe-noogo) Kiris-neb nins sẽn paam-b vʋʋsem sõngã zaeebã la piis a taabã fãa naaga taab n balemd a Zeova wa “yãgr a yembr” sẽn tar “pe-kɩɩm a yembre.” (Zã 10:16) Ad wã sɩd yaa bũmb sẽn segd n kɩt tɩ yikãadb nins sẽn yaa kiris-nebã waoog taaba!
10. Zĩ-bʋg wɛɛngẽ la pagbã yaa wa ‘laas sẽn ka pãnga?’
10 Zĩ-bʋg wɛɛngẽ masã la pagbã yaa wa laas pãng sẽn paooda? Tõe t’a Pɩɛɛr da gomda pagbã fãa la bal yagd sẽn pa ta rapã yagdo, la b pãngã sẽn pa ta-bã yelle. Sẽn paase, ninsaalbã sẽn pa zems zãnga yĩng kɩtame tɩ rogmã tõog sẽn yaa Wẽnd barkã boogd pagbã laafɩ. Pagb nins sẽn ket n dogdẽ wã mi n bẽedame. Sãmbg sẽn ka be, segdame tɩ b ges b yell neer ne waoogre, pʋgã zãab la rogmã wakat sẽn yaa tood la wat ne yaamsã sasa. Pʋg-sɩd sã n waoogd a pag la a mi sõngr buud ning a pagã sẽn datã, a tõe n sõnga wʋsg n kɩt t’a kãadmã yɩ sõma.
Kẽed-n-taasã tũudum sã n pa yembre
11. Zĩ-bʋg wɛɛngẽ la kãadem tõe n yɩ sõma baa pagã ne a sɩdã tũudum pa yembre?
11 La yaa wãn to masã, raoã ne pagã tũudum sã n pa yembre, b nin-yend sã n wa saka kiris-neb tũudmã b kãadmã zugẽ t’a to wã yaool n pa sake? Rẽ yĩnga b kãadmã tõe n yɩɩ sõma bɩ? Yikãadb wʋsg kãadem sẽn yaa woto wilgame tɩ tõeeme. Kẽed-n-taas tũudum sẽn yaa toor-toor kãadem tõe n baas n yɩɩ sõma, a sẽn na n kaoos la a kõ b yiibã fãa sũ-noogã yĩnga. Sẽn paase, b kãadmã ket n yaa sõma a Zeova nifẽ. B ket n yaa “yĩng a yembre.” Rẽ n so tɩ b sagl yikãadb nins sẽn yaa kiris-nebã tɩ sã n mik tɩ kẽed-n-taag ning sẽn pa tẽedã sakame n na n zĩnd bɩ b kell n zĩnd ne-a. B sã n tar kamba, roagd ning sẽn yaa kiris-nedã wẽn-sakr nafda kambã.—1 Korẽnt dãmba 7:12-14.
12, 13. Sã n yaa ne a Pɩɛɛr saglgã, wãn to la pagb nins sẽn yaa kiris-nebã tõe n sõng b sɩdb sẽn pa tẽedbã?
12 A Pɩɛɛr kõo pagb nins sẽn yaa kiris-neb n vɩ ne kẽed-n-taas tũudum sẽn yaa toorã sagl-sõma. La a goamã tõe n nafa pʋg-sɩdb nins me sẽn yaa kiris-neba, tɩ b pagbã tũudum yaa toorã. A Pɩɛɛr gʋlsa woto: “Pagba, bɩ y sak yãmb mens sɩdba, tɩ kẽer sẽn ka sakd Wẽnnaam koɛɛga na sak Wẽnnaam bãmb pagba yel-manesem yĩnga, tɩ goam toor kaẽ ye, tɩ bõe, bãmb na n yãame tɩ yãmb maanda neere la y yõkda y mense.”—1 Pɩɛɛr 3:1, 2.
13 Pag sã n tõe n wilg a sɩd a tẽebã ne yam, yaa sõma. La yaa wãn to masã, a sɩdã sã n pa rat n kelg-a? Rẽ bee ne a sɩdã yam-yãkre. Baasgo, rẽ pa sãam bũmb ye, bala kiris-ned yel-manesmã me kõta kaset sẽn tar pãnga. Pʋg-sɩdb wʋsg sẽn da pa nong sɩdã bɩ sẽn da kɩɩsd b pagbã tẽeb meng wa n talla “yam-sõng vɩɩm sẽn-kõn-sa wã yĩnga,” b sẽn wa n yã tɩ b pagbã yel-manesem yaa sõma wã. (Tʋʋma 13:48, NW ) Baa pʋg-sɩd sã n pa sak kiris-neb tũudmã, a pagã manesem sõng tõe n yɩ-a-la noogo, tɩ paas b kãadmã pãnga. Pag a ye sẽn yaa a Zeova Kaset soab sɩd sak n deegame tɩ yẽ pa tol n tõe n tũ no-tɩrs nins a Zeova Kaset rãmbã sẽn tũudã ye. Baasg zãnga, a yeelame tɩ “yẽ sũur yaa noog a sẽn kẽ kãadem ne pʋg-sõngã,” la a pẽga a pagã ne a tẽed-n-taasã lɛtr a sẽn gʋls n tool zʋrnall a ye pʋgẽ.
14. Wãn to la pʋg-sɩdbã tõe n sõng b pagb nins sẽn pa tẽedbã?
14 Pʋg-sɩdb me sẽn yaa kiris-neb sẽn tũ a Pɩɛɛr saglgã tõoga ne b yel-manesmã n kɩt tɩ b pagbã lebg tẽedba. Pagb sẽn da pa tẽedb wa n yãame tɩ b sɩdbã tʋkda b zɩɩbã zakã pʋgẽ neere, tɩ b le pa sãamd b ligd sɩgaare, rãam la reem n bao ligdã pʋgẽ, la tɩ b pa le tʋʋd-b ye. Pʋg-kãens kẽer wa n bãnga kiris-neb tigingã neb a taaba. B sẽn yã kiris-nebã sẽn nong taab to-to wã, la bũmb ning b sẽn yã saam-biisã sʋkã tak-b lame n pẽneg a Zeova.—Zã 13:34, 35.
Sũur pʋgẽ nedemdã
15, 16. Manesem bʋg la pag sẽn yaa kiris-ned tõe n tall n kɩt t’a sɩd sẽn da pa tẽed lebg tẽeda?
15 Manesem bʋg buud n tõe n kɩt tɩ pʋg-sɩd lebg tẽeda? Vẽenega, yaa manesem ning pagb nins sẽn yaa kiris-nebã sẽn tarã. A Pɩɛɛr yeelame: “Yãmb sã n na n maneg y mense, a ka tog n yɩ nagem zut pãnengo walla sãnem fan-teed ningr walla nagem fut yeelgr ye. La a tog n yɩɩ sũur dẽnda sẽn lilli, [bɩ nedemd ning sẽn solg sũurã pʋgẽ n pa sãamdẽ wã,] sẽn yaa sũ-bʋgsem la sũ-maasem, sẽn yaa paoong kãseng Wẽnnaam nifẽ. Kʋdemd wakate, pʋg-sõama sẽn teeg Wẽnnaam da yaa woto, la b saka b mens sɩdba wa a Saara sẽn sak a Abrahaam n boond-a t’a zu-soabã. La yãmb lebga yẽ kamba, yãmb sã n maan tʋʋm sõama n ka sak tɩ bũmb baa a ye kẽes yãmb dabeem ye.”—1 Pɩɛɛr 3:3-6.
16 A Pɩɛɛr sagla pagb nins sẽn yaa kiris-nebã tɩ b ra teeg b neermã ye. Yaa ne kiris-nin-poak manesmã la a segd n kɩt t’a sɩdã yã Biiblã zãmsg sẽn maneg a zʋgã. A manesmã segd n kɩtame t’a sɩdã bãng t’a tara nin-paalgã zʋgo. Tõe t’a sɩdã na n maka rẽ ne a pagã manesem sẽn da yaa to-to pĩndã n gese. (Efɛɛz rãmba 4:22-24) Sãmbg sẽn ka be, a na n yãame t’a pagã sẽn tar “sũ-bʋgsem” ningã kengda pɛlg la be yamleoogo. Manesem kãng pa noom pʋg-sɩd bal ye, a tara yõod wʋsg “Wẽnnaam nifẽ” me.—Kolos rãmba 3:12.
17. Wãn to la a Saara yaa mak-sõng n kõ pagb nins sẽn yaa kiris-nebã?
17 B yeelame tɩ pagbã rɩk a Saara makrã, la kiris-nin-pogsã segd n sɩd rɩka a mak-sõngã, baa b sɩdbã sã n pa tẽedba. A Saara sɩd ra geta a Abrahaam wala a zu-soaba. A ra boola a Abrahaam a sũur pʋgẽ meng t’a “soaala.” (Sɩngre 18:12, NW ) Baasgo, rẽ pa paoogr ne-a ye. Sãmbg sẽn ka be, a Saara ra yaa pag sẽn da tar tẽeb sẽn tar pãnga, sẽn da tẽed a Zeova ne a sũur fãa. Vẽenega, a bee “kaset dãmb wʋsg” nins tẽeb sẽn segd n kɩt tɩ d “zoe zoees ninga sẽn be tõnd taoorã n da yɛ” wã sʋka. (Hebre dãmba 11:11; 12:1) Pa paoogr ne pag sẽn yaa kiris-neda, a sã n dɩk a Saara togs-n-taar ye.
18. Yaa no-bʋs la b segd n tũ zak pʋgẽ, kẽed-n-taasã tẽeb sã n yaa toor-toore?
18 Zak pʋgẽ, baa kẽed-n-taasã tẽeb sã n yaa toor-toore, ket n yaa raoã la zakã soaba. A sã n bee sɩda pʋgẽ, a segd n waooga a pagã tẽebo, la a gũus n da wa kɩɩs a meng tẽebã ye. Sã n yaa pagã n be sɩdã pʋgẽ, yẽ me na n gũusame n da wa kɩɩs a mengã tẽeb ye. (Tʋʋma 5:29) Baasg zãnga, a pa na n kɩɩs a sɩdã zu-sobend ye. A na n waooga a zu-sobendã la a kell n sak ‘tõog sẽn loe yẽ ne a sɩdã.’.—Rom dãmba 7:2.
Biiblã sor-wilgr sẽn yaa sõma wã
19. Yel-bʋs kẽer n tõe n koms kãadem pãnga, la wãn to la b tõe n mao ne yel-kãense?
19 Rũndã-rũndã, yɛl wʋsg n tõe n wa ne zu-loees kãadem pʋgẽ. Rap kẽer n be n pa tʋkd b zɩɩb zaka pʋgẽ ye. Pagb kẽer me n be n pa sakd b sɩdbã zu-sobend ye. Yikãadem sãnda pʋsẽ, kẽed-n-taag a yembr namsda a to wã. Kiris-nebã nengẽ, laogã zu-loeese, ninsaal sẽn pa zems zãngã la dũniyã yam ne a vɩɩm manesem yookã tõe n wa rat n sãama b kɩs-sɩdã. Baasg zãnga, yikãadb nins sẽn yaa kiris-neb n tũud Biiblã noyã paamda a Zeova barka, baa b yɛlã sẽn sõs n yaa to-to. Kãadem pʋgẽ, baa yaa kẽed-n-taag a yembr n tũud Biiblã noyã, yɛlã yɩta sõma n sãoog b yiibã fãa sẽn na n pa tũud no-kãense. Sẽn paase, a Zeova nongame la a teend a sõgen dãmb nins sẽn kelld n pidsd b kãadmã pʋleng baa zu-loe-kãsems pʋsẽ wã. A pa yĩmd kɩs-sɩd ning b sẽn tar ne-a wã ye.—Yɩɩl Sõamyã 18:26; Hebre dãmba 6:10; 1 Pɩɛɛr 3:12.
20. Sagl-bʋg la a Pɩɛɛr kõ kiris-neba fãa?
20 Tʋmd-tʋmd a Pɩɛɛr sẽn sagl pagb la rap nins sẽn yaa yikãadbã poore, a baasa a saglsã ne goam sẽn kengd pɛlga. A yeelame: “La koɛɛg sẽn keta, a yaa tɩ yãmb fãa paam tagsg a yembre la yam a yembre, la y paam nonglem ba-biis yĩnga, la sũ-bʋgsem la sik-m-menga. Bɩ y ra lebs wẽnga wẽng yĩng ye, walla tʋʋsgo tʋʋsg yĩng ye. Bɩ y ra lebs bãmb woto ye. La bɩ y lebs barka. Tɩ bõe, yaa yãoã yĩng la b bool yãmb tɩ y tõe n paam barka.” (1 Pɩɛɛr 3:8, 9) Ad woto sɩd yaa saglg sẽn yaa sõma nebã fãa yĩnga, la sẽn yɩɩd fãa, yikãadbã!
Y tẽrame bɩ?
• Wãn-wãn la pʋg-sɩdb nins sẽn yaa kiris-nebã rɩkd a Zezi togs-n-taare?
• Wãn-wãn la pagb nins sẽn yaa kiris-nebã rɩkd tigingã togs-n-taare?
• Ne manesem bʋg la pʋg-sɩdbã tõe n waoog b pagbã?
• Manesem bʋg sẽn yaa sõma la kiris-nin-poak segd n tall ne a sɩd sẽn pa tẽeda?
[Zãmsgã sogsgã]
[Foto, seb-neng 29]
Pʋg-sɩd sẽn yaa kiris-ned nonga a pag la a get a yelle
Pag sẽn yaa kiris-ned waoogda a sɩd la a sakd-a
[Foto, seb-neng 31]
Pagb la rap nins fãa sẽn yaa kʋʋn-kãsengã nebã gũudame n na n vɩɩmd wakat sẽn-kõn-sa Arzãnã pʋgẽ
[Foto, seb-neng 32]
A Saara ra boonda a Abrahaam t’a soaala