A Zezi Kirist tara pãn-tusd-bʋg yãmb zugu?

RẼ YĨNGA d sã n ges bũmb nins d sẽn vaees sõsg ning sẽn loogã pʋgẽ wã, sãmbg beeme t’a Zezi zãmsgã sɩd talla pãng neb wʋsg vɩɩm pʋgẽ dũniyã gill zug sɩda? Dẽnd tõnd ned kam fãa segd n soka a meng sok-kãngã: “Pãn-tusd-bʋg la bũmb nins a Zezi sẽn zãms nebã tar mam vɩɩmã pʋgẽ?”

A Zezi goma yɛl wʋsg yell a zãmsgã pʋgẽ. Zãms-kãsems nins a sẽn zãms nebã tõe n talla yõod tõnd vɩɩmã nens fãa pʋsẽ. Bɩ d ges bũmb toor-toor a Zezi sẽn da zãms nebã, wala makre, yɛl nins d sẽn segd n ning pipi zĩigẽ d vɩɩmã pʋgẽ wã, zood baoob ne Wẽnnaamã, zems-n-taar hakɩk tallg ne neb a taabã, zu-loeesã welgre, la d sẽn tõe n lak d meng ne nen-kɛglem tʋʋm to-to wã.

Yɛl d sẽn segd n ning pipi zĩigẽ d vɩɩmã pʋgẽ

Rũndã-rũndã vɩɩmã sẽn pid ne yɛl wʋsgã rɩkda d sẽkã la d pãngã hal wʋsgo, tɩ rẽ nong n deegd sẽk ning d sẽn da segd n dɩk n tʋm tẽebã  tʋʋmã. D rɩk makr ne rao a yembr yʋʋm sẽn yɩɩd 20 d sẽn na n bool t’a Jerry. Baa a Jerry sẽn nong tẽebã yɛl zut sõsg la a nand bũmb nins a sẽn zãmsd tẽebã yɛl zutã, a yeela woto ne sũ-sãanga: “Mam pa tar sẽk n sõsd ne neb tẽebã yɛl zut wakat fãa ye. Mam tʋmda rasem a yoob semen pʋgẽ. Hat daar bal la m vʋʋsda. La mam sẽn wat n sa m mengã tʋʋmã tɩ m yaa wʋsgo.” Sã n mik tɩ yãmb me tara zu-loe-kãngã, a Zezi sẽn zãms nebã bũmb ning a tãng zug zãmsgã pʋgẽ wã tõe n naf-y lame.

A Zezi yeela kʋʋngã sẽn da tigim n na n kelg-a wã woto: “Bɩ y ra maan yɩɩr ne y vɩɩma yelle, yãmb sẽn na n dɩ bũmb ninga la yãmb sẽn na n yũ bũmb ninga, la yãmb yĩnga yelle yãmb sẽn na n yeelg bũmb ninga ye. Vɩɩm ka yɩɩd dɩɩb laa, bɩ yĩnga ka yɩɩd futu? Bɩ y ges bõn-yɩgdse. Bãmb ka bʋta, la b ka tigisd me ye, la bãmb ka suiid bao pʋsẽ ye. La yãmb Ba sẽn be [saasẽ wã] rɩlgda bãmba. Yãmb ka yɩɩd bãmb wʋsg sɩda? . . . Dẽ yĩnga, bɩ yãmb da maan yɩɩr ye, la y ra yeele: Tõnd na n dɩɩ bõe? Tõnd na n yũu bõe? Tõnd na n yeelga bõe? Tɩ bõe, bõn-kãens la neb sẽn ka pʋʋsd Wẽnnaam baood wakat fãa. Yãmb Ba sẽn be arzãna miimi tɩ yãmb data bõn-kãense. Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Matɩe 6:25-33) Bõe la d zãmsd gom-kãensã pʋsẽ?

A Zezi ra pa rat n yeel tɩ d segd n maana yam-kaalg d mensã la d zagsã neb yell gesg wɛɛngẽ ye. Biiblã yeelame tɩ “ned sã n ka ges a neb yelle, la sẽn yɩɩda, a meng zak rãmba, yẽ soab yii tẽeb pʋgẽ, la a yaa wẽng n yɩɩd ned ninga sẽn ka be tẽeb pʋgẽ wã.” (1 Tɩmote 5:8) Baasg zãnga, a Zezi kãabame tɩ d sã n ning yɛl nins sẽn zemsã pipi zĩigẽ n lʋɩɩs tẽebã yɛl taoor d vɩɩmã pʋgẽ, Wẽnnaam na n gesame tɩ d paam bũmb nins fãa sẽn yaa tɩlae ne-dã. Zĩ-kãensã, a Zezi wilgda d sẽn segd n ning yɛl nins pipi zĩigẽ wã. Sagl-kãngã tũub wata ne sũ-noogo, bala, “sũ-noog rãmb la neb nins sẽn mi tɩ b tara tẽeb ratmã.”—Matɩe 5:3, NW.

Bao-y Wẽnnaam zoodo

Neb nins sẽn mi tɩ b tara tẽeb ratmã sak n deegame tɩ b segd n talla zood ne Wẽnnaam. Sẽn na yɩl n yõg zood ne neda, wãn-wãn la d maanda? Rẽ yĩnga d pa rengd n bao n bãng nin-kãng soab sõma sɩda? D tog n dɩka sẽk n bao n bãng a sẽn tagsd to-to, a yel-manesem, a tõogo, a tʋʋmã, bũmb ning a sẽn nong la a sẽn kisi. Sẽn na yɩl n yõg zood ne Wẽnnaam, yaa woto me la d segd n maane. D segd n bao n bãnga a sẽn yaa a soabã takɩ. A Zezi sẽn da wa n pʋʋsd Wẽnnaam a karen-biisã yĩnga, a yeelame: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Zood hakɩk paoong ne Wẽnnaam baoodame tɩ d bãng a sẽn yaa a soabã. Yaa Wẽnnaam Gomdã sẽn yaa Biiblã a sẽn vẽneg tɩ b gʋlsã pʋgẽ bal la d tõe n paam bãng-kãngã. (2 Tɩmote 3:16) D segd n yãka wakat n zãmsd Gʋlsg Sõamyã.

La bãngrã a yen-yen bal pa sek ye. A Zezi yeela woto me a pʋʋsgã pʋgẽ: “Bãmb [a karen-biisã] saka yãmb goama.” (Zã 17:6) D pa segd n bao n bãng Wẽnnaam bal ye, d segdame me n tʋm tɩ zems ne bãng-kãnga. Pa rẽ d yɩta wãn n tõog n paam Wẽnnaam zoodo? Rẽ yĩnga d sɩd tõe n gũume tɩ d zood ne ned kẽng taoore, d sã n maand yɛl nin-kãng  soabã sẽn pa nong ne pʋ-toog sɩda? Dẽnd d segd n tũuda Wẽnnaam noyã d vɩɩmã fãa pʋgẽ. Bɩ d ges d sẽn tõe n tũ a noy a yiib d manesmã ne neb a taabã pʋgẽ to-to.

Yõg-y zood hakɩk ne neb a taabã

Daar a yembre, a Zezi togsa nebã kiba-koɛɛg sẽn na yɩl n zãms-b bũmb sẽn tar yõod ãdem-biisã ne taab zems-n-taar pʋgẽ. A goma rĩm a yembr sẽn da rat n sok a tʋm-tʋmdb a yiib a samd yelle. B yiibã sʋka, a yembr samd n da yaa wʋsg tɩ loog t’a pa tar fʋɩ n na n yao ye. Rĩmã kõo noor tɩ b koos rao wã ne a pagã la a kambã n yao samdã. Sam-soabã wõgemda rĩmã taoor n wẽ kãntɩɩg n yeele: “Zu-soaba, maan-y sũmar ne maam tɩ m na n yaoa y samda zãnga.” Rao wã nimbãaneg yõka a zu-soabã t’a bas a samdã taale. La tʋm-tʋmd kãng sẽn yi wã, a sega a tʋmd-n-taag sẽn tar a sam-bil n sok-a a samdã. Baa a tʋmd-n-taagã sẽn kos-a t’a zoe a nimbãanegã, a kɩtame tɩ b suy-a bi-bees-roogẽ t’a sã n pa yao, a kõn yi ye. La a zusoabã sẽn wʋm kɩbarã, a sũur yikame t’a bool-a n soke: “A ka zems tɩ fo me zoe fo tʋmd-n-taaga ninbãaneg wa mam sẽn zoe fo ninbãanega bɩ?” Rẽ poore, a kẽesa tʋm-tʋmd kãngã sẽn pa kõt a taab sugrã bi-bees roogẽ hal t’a wa yao a samdã fãa. A Zezi wilga kibarã sẽn zãmsd tõnd bũmb ningã n yeele: “Mam [saasẽ] Ba na n maana yãmb woto, yãmb ned kam fãa sã n ka kõ a ba-biis sugr ne a suur fãa.”—Matɩe 18:23-35.

Tõnd sẽn yaa ninsaalb sẽn pa zems zãngã yĩnga, d kongda yɛl wʋsg pʋsẽ. D pa tol tõe n yao Wẽnnaam beegr nins fãa d sẽn beeg-a tɩ yaa sam-bedr n zao d zutã yĩng ye. D sẽn tõe n maan bal yaa d kos-a sugri. La Wẽnnaam a Zeova na n sak n basa d beegrã fãa taale, tõnd me sã n sakd n basd beegr nins d tẽed-n-taasã sẽn beegd-dã taale. Ad yãoã sɩd yaa zãmsg sẽn yaa kãsenga! A Zezi zãmsa a karen-biisã tɩ b pʋʋs woto: “Bɩ y kõ tõnd sugr tõnd beegra yĩnga, a wa tõnd me sẽn kõt d bɛɛgdba sugrã.”—Matɩe 6:12.

D maneg d yɛlã b yẽgrẽ wã

A Zezi ra mii ninsaal halhaalã hal sõmbo. A sẽn wa n wilgd b sẽn segd n welg yɛlã to-to wã, a yeelame tɩ b segd n welg-b-la b yẽgrẽ wã menga. D ges rẽ makr a yiibã sẽn pʋgdã pʋsẽ.

A Zezi yeelame: “Yãmb wʋmame tɩ b rag n yeela kʋdemd dãmbã: Ra kʋ ye, la ned sã n kʋ a to, a zemsame tɩ bʋ-kaoodba kao yẽ buudo. La mam yeta yãmba tɩ ned sũur sã n yik ne a ba-biiga, a zemsame tɩ bʋ-kaoodba kao a buudo.” (Matɩe 5:21, 22) Zĩ-kãngã, a Zezi wilgame tɩ ned sã n wa kʋ a to, yellã yẽgr meng yaa tagsg ning kʋʋdã sẽn deng n bɩɩs a sũurẽ wã. Nebã sã n da pa basdẽ tɩ sũ-kẽk bɩ sũ-yikr paamd pãng b sũyẽ wã, yãk yam n maan f to wẽngã ra satẽ lame. Ãdem-biisã sã n da tũudẽ no-kãngã, hakɩka, b ra kõn kʋẽ neb wʋsg ye.

Ges-y yell a to me sẽn wat ne sũ-sãams wʋsg t’a Zezi wilg tɩ b tõe n welg-a-la a yẽgrẽ wã. A yeela kʋʋngã: “Yãmb wʋmame tɩ b rag n yeelame: ‘Ra yo ye.’ La mam yeta yãmba tɩ ned ninga fãa sẽn get pag ne ratem wẽnga, a maana yoob ne yẽnda a sũur pʋgẽ. Fo rɩtg nif sã n dat n maan foom tɩ f lʋɩ, bɩ f feoog-a n lob yɩɩga; tɩ bõe, yaa neer fo yĩnga tɩ fo yĩnga will a yembr sãam n yɩɩd [b sẽn na n] lob fo yĩnga tõr bug-tẽnga.” (Matɩe 5:27-29) A Zezi wilgame tɩ yoobã yẽgr yaa bũmb ning sẽn dengd taoor tɩ ned yaool n yo wã. Yaa yoobã tʋlsem. Ned sã n zãgs t’a kõn bas tʋlsem wẽns tɩ kaoos a sũurẽ n ‘feoos-b’ n yiis a yamẽ, a tõogd n gila yoobã.

“Sui f sʋʋgã a wʋʋgẽ”

Yʋng ning b sẽn zãmb a Zezi tɩ b yõk-a wã, a karen-biig a yembr n wõog a sʋʋg t’a na n sõng-a, la a Zezi kõ-a-la noor n yeele: “Sui f sʋʋgã a wʋʋgẽ.” (Matɩe 26:52) Vẽkembeoogã yibeoogo, a Zezi yeela a Põns Pɩlat woto: “Mam soolem ka dũniyã rẽnd ye. Mam soolem  sã n da yaa dũniyã rẽnda, mam tʋm-tʋmdba ra na n zabame tɩ b ra yõk maam n kõ Zʋɩf rãmba ye. La masã mam soolem ka dũniyã ka rẽnd ye.” (Zã 18:36) A Zezi sẽn yeel ka wã yaa bũmb sẽn pa sakd tũub bɩ?

A Zezi sẽn zãms nebã tɩ b ra maan b taabã wẽngã, manesem bʋg la pipi kiris-nebã tall-yã? Sebr a yembr (La position des premiers chrétiens à l’égard de la guerre [angl.] ) yeelame: “[A Zezi zãmsgã] sẽn wilg tɩ tũnug ne nen-kɛglem bɩ ne manesem zẽms n maan f to wẽng pa zemsã, rat n yeela vẽeneg tɩ kẽes-m-meng zabr pʋgẽ pa sõma ye . . . Pipi kiris-nebã tũu a Zezi sẽn da rat n yeel bũmb ningã bal takɩ, la b wʋma a zãmsgã sẽn da rat tɩ b yɩ sũ-bʋgsem dãmb la b ra yɩ zab-zabdbã võore. B ra geta b tũudmã wa neb sẽn baood laafɩ tũudum, la b kisga zabr ne b sũy fãa, a sẽn wat ne zɩɩm daagrã yĩnga.” Dũniyã neb nins fãa sẽn yet tɩ b yaa kiris-nebã sã n da sɩd tũudẽ no-kãngã, hal pĩndã n tãag masã, yel-beed wʋsg sẽn maan kʋdemdã pʋgẽ da kõn zĩndẽ ye.

Y tõe n dɩɩ a Zezi zãmsgã fãa nafa

A Zezi zãmsg nins d sẽn vaeesã yaa sõma, nana, la b tar pãnga. Ãdem-biisã tõe n dɩɩ zãms-kãens nafa, b sã n mi-b sõma la b tũud-ba. *

Yaa ne sũ-noog la a Zeova Kaset rãmbã sẽn be yãmb babgẽ wã na n wa sõng-y tɩ y bãng y sẽn tõe n maan to-to n dɩ a Zezi zãmsgã sẽn kõt yamã nafa. Yaa ne sũ-noog la d kot-y tɩ y bao n sɛg-ba, wall y ges adɛrs rãmbã sẽn be seb-kãngã seb-neng a 2 wã n yãk a ye n gʋls-ba.

[Tẽngr note]

[Foto, seb-neng a 5]

“Yãmb Ba sẽn be [saasẽ wã] rɩlgd-b lame”

[Foto, seb-neng a 7]

A Zezi zãmsgã tõe n talla pãn-tusd-sõng y vɩɩmã zugu