‘B raa yãmb toogo’
‘B raa yãmb toogo’
“B raa yãmb ne raab sẽn yaa toogo. Woto yĩnga, bɩ y waoog Wẽnnaam.”—1 KORẼNT DÃMBA 6:20.
1, 2. a) Sã n yaa ne a Moiiz Tõogã, manesem bʋg la b ra segd n tall ne yembs nins sẽn yaa Israɛll buudã neba? b) Yamb sẽn da nong a zu-soab ra tõe n yãka yam n maan bõe?
“YEMBDÃ ra yaa bũmb sẽn wɛ tẽn-kʋdem wẽndẽ wã, la b ra get-a-la wa bũmb sẽn zemse. Ezipti, Gɛrs la Rom laogã ra tika yembsã leebg zugu. Pipi kiris-nebã wakatẽ wã, Itali tẽngã, neb a tãab sʋka ned a yembr n da yaa yamba, la sã n yaa zĩis a taabẽ wã, neb a nu sʋka, ned a yembr n da yaa yamba.” Woto la bãngr sebr a yembr (Holman Illustrated Bible Dictionary) yeta.
2 Baa ne yembdã sẽn da be pĩnd wẽndẽ Israɛllã pʋgẽ me wã, a Moiiz Tõogã ra kõo noy sẽn da kogend yembs nins sẽn yaa Hebre rãmbã. Wala makre, Tõogã ra wilgdame tɩ Israɛll ned tõe n yɩɩ yamba, la pa segd n yɩɩg yʋʋm a yoob yĩng ye. Yʋʋm a yopoe soabã, a ra segd n “yii ne lohorem zaalem.” La manesem ning b sẽn da segd n tall ne yembsã ra wilgda nimbãan-zoeer hali t’a Moiiz Tõogã togs woto: “Yamba sã n yeel t’a nonga a zu-soabã ne a paga la a kamba la a ka rat n yi, bɩ a zu-soaba tall-a n wa Wẽnnaam taoor n kɩt t’a kolg kʋɩlenga walla lugr sɛɛgẽ t’a zu-soaba vʋdg a tʋbra ne pĩim. La yẽ na n kell n yɩɩ a zu-soaba yamb a yõor tɛka.”—Yikri 21:2-6; Maankʋʋre 25:42, 43; Tõodo 15:12-18.
3. a) Yembd bʋg buud la pipi kiris-nebã sak-yã? b) Yaa bõe n tusd tõnd tɩ d maand Wẽnnaam daabã?
3 Ned sẽn da tõe n kẽes a meng yembd pʋgẽ ne yamleoogã ra yaa bũmb sẽn wilgd yembd buud ning pʋgẽ kiris-neb hakɩkã sẽn be wã. Wala makre, Biibl gʋlsdb a Polle, a Zak, a Pɩɛɛr ne a Ziid wilgame tɩ b yaa Wẽnnaam la Kirist yembse. (Tɩt 1:1; Zak 1:1; 2 Pɩɛɛr 1:1; Ziid 1) A Poll tẽega Tesalonik kiris-nebã tɩ b basa “bõn-naands pʋʋsg n sak Wẽnnaam sẽn vɩya la sẽn yaa sɩd soabã [wa yembse].” (1 Tesalonik rãmba 1:9) Yaa bõe n tus kiris-nin-kãensã tɩ b sak n na n yɩ Wẽnnaam yembse? Yaa bõe n da tusd Israɛll ned sẽn yaa yamb t’a kell n pa a zu-soaba nengẽ n pa looge? Yaa a sẽn nong a zu-soabã yĩnga. Kiris-nebã yembdã tika nonglem ne Wẽnnaamã zugu. D sã n wa bãng sɩd Wẽnnaam sẽn vɩ wã la d nong-a, kɩtdame tɩ d rat n maan a raabã ‘ne d sũyã fãa la ne d yam fãa.’ (Tõodo 10:12, 13) La yɩ Wẽnnaam la Kirist yembs baoodame tɩ d maan bõe? Wãn to la rẽ tar pãn-tusdg tõnd vɩɩmã zug daar fãa?
“Bɩ y maan fãa Wẽnnaam waoogr yĩnga”
4. Wãn to la tõnd lebgd Wẽnnaam la Kirist yembse?
4 B wilgame tɩ yamb yaa “neda, ned a to bɩ neb a taab sẽn so laloa wã taoore, t’a segd n sak ne sakr zãng-zãnga.” Woto me, d sã n wa rɩk d vɩɩmã n kõ a Zeova n deeg lisgu, d lebgda neb a sẽn so wa sẽn segde. Tʋm-tʋmd a Poll wilga woto: ‘Yãmb ka so yãmb mens ye. Tɩ bõe, b raa yãmb ne raab sẽn yaa toogo.’ (1 Korẽnt dãmba 6:19, 20) Yaa vẽeneg tɩ yaoodã yaa a Zezi Kirist maoongã sẽn yaa rondã, bala yaa yẽ zug la Wẽnnaam tikd n sak tõnd wala a sõgen dãmba, d yaa kiris-neb sẽn zae ne vʋʋsem sõngo, tɩ d yaa b tũud-n-taas n saagd n na n vɩɩmd tẽngã zug wakat sẽn pa sate. (Efɛɛz rãmba 1:7; 2:13; Wilgri 5:9) Rẽnd tõnd lisgã reegr tɛka, “tõnd yaa [a Zeova] rẽnda.” (Rom dãmba 14:8) B sẽn da tõnd ne a Zezi Kirist zɩɩmã sẽn tar yõod wʋsgã yĩnga, tõnd me lebgda a yembse, la yaa tɩlae tɩ d ket n tũud a noyã.—1 Pɩɛɛr 1:18, 19.
5. D sẽn yaa a Zeova yembsã, zɩɩb bʋg n zao d zug pipi, la wãn to la d tõe n tʋk-a?
5 Yembs segd n saka b zu-soaba. Tõnd yembdã yaa yamleoog yĩnga, la yaa tõnd nonglmã ne d Zusoabã n kɩt tɩ d sak woto. Pipi Zã 5:3 yeta woto: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” Rẽnd sã n yaa ne tõndo, d sẽn tũud a noyã wilgda d nonglem la d sakrã me. Rẽ yaa vẽeneg bũmb nins fãa tõnd sẽn maandã pʋgẽ. A Poll yeelame: “Yãmb sẽn dɩta walla yãmb sẽn yũuda walla yãmb sẽn maand bũmb a taaba, bɩ y maan fãa Wẽnnaam waoogr yĩnga.” (1 Korẽnt dãmba 10:31) Daar fãa, baa yel-bõones pʋsẽ, d segd n wilgame tɩ d ‘tʋmda Zusoaba yĩng ne d sũyã fãa’ wa yembse.
6. Wãn to la tõnd sẽn yaa Wẽnnaam yembsã tõe n tall pãn-tusdg sard nins d sẽn dɩkd vɩɩmã pʋgẽ wã zutu? Rɩk-y makr n wilg y leokrã võore.
6 Wala makre, d sã n wa rɩkd sardo, d segdame n tẽeg tõnd saasẽ Zusoab a Zeova raabã yelle. (Malaki 1:6) Sard dɩkr sẽn pa nana tõe n maka tõnd wẽn-sakrã. D na n tũu Wẽnnaam saglsã bɩ d na n tũu tõnd sũurã sẽn yaa “ziri” soab la a yaa ‘wẽng wʋsgã’? (Zeremi 17:9) A Melisa sẽn yaa kiris-ned sẽn pa kẽ kãadmã ra reega lisg sẽn pa kaoose, tɩ bi-bɩɩg sɩng n nong-a. Bi-bɩ-kãng ra wõnda nin-sõngo, la a ra zoe n zãmsda Biiblã ne a Zeova Kaset rãmbã. Baasg zãnga, kãsem soab n gom ne a Melisa n wilg-a tɩ yaa yam tʋʋmd t’a tũ a Zeova noor ning sẽn yet tɩ d kẽ kãadem ne “ned sẽn tũud Zusoaba balã.” (1 Korẽnt dãmba 7:39; 2 Korẽnt dãmba 6:14) A Melisa sak n deega woto: “Ra pa nana ne-m tɩ m tũ sagl-kãngã ye. La m yeela m meng tɩ m sẽn dɩk m mengã n kõ Wẽnnaam n na n maan a raabã yĩnga, m segd n saka a noyã sẽn yaa vẽenesã.” A sẽn lebg n tags yɛlã sẽn yɩ to-to wã zugu, a yeelame: “M sũur yaa noog m sẽn tũ sagl-kãngã wã. Raoã basa Biiblã zãmsgo. Mam sã n da kellẽ lame n kẽng taoor ne zood-kãngã, masã tɩ m kẽẽ-la kãadem ne ned sẽn pa tẽeda.”
7, 8. a) Bõe yĩng tɩ d pa segd n bao n ta nebã yam tɩ loog nugu? b) Rɩk-y makr n wilg d sẽn tõe n tõog ninsaal zoees to-to.
7 Tõnd sẽn yaa Wẽnnaam yembsã yĩnga, d pa segd n yɩ ninsaalbã yembs ye. (1 Korẽnt dãmba 7:23) Yaa sɩda, tõnd ned ba a yembr pa rat tɩ nebã kisg-a ye, la d segd n ninga d yamẽ tɩ kiris-nebã tara noy sẽn yaa toor ne dũniyã rãmb rẽnda. A Poll sokame: “Mam baooda neb pẽgr bɩ?” La a baasa a goamã woto: “Mam sã n ket n baoodẽ tɩ noom nebã, dall mam ka Kirist nonglem yamb ye.” (Galat dãmba 1:10) D pa segd n bas tɩ d taabã tus-d tɩ d maan sẽn pa segd sẽn na yɩl n ta b yam ye. La bõe la d tõe n maane, nebã sã n wa tusd tõnd tɩ d maan wa bãmba?
8 Tags-y pʋg-sad a Elena sẽn yaa kiris-ned n be Ɛspayn tẽngã makrã yelle.A ra tara karen-bi-taas sẽn da kõt b zɩɩm. B ra miime t’a Elena sẽn yaa a Zeova Kaset soabã ra pa na n kõ a zɩɩmã bɩ n sak tɩ b ning-a zɩɩm ye. A sẽn wa n paam n na n wilg a sẽn maand woto wã võor karen-doogã tõrã, a Elena sakame n na n sõs rẽ zugu. A Elena wilga woto: “M sã n na n togs sɩda, rabeem wʋsg ra tar-m lame. La m segla m meng sõma, hali tɩ yɩ neer wʋsg n yɩɩd mam sẽn da tagsdã. Kɩtame tɩ m karen-bi-taas wʋsg waoogd-ma, tɩ karen-saambã yeel maam t’a pẽgda m tʋʋmdã. Sẽn yɩɩd fãa, m sũur yɩɩ noogo, m sẽn gom n teel a Zeova yʋʋrã, la m tõog n wilg m manesmã sẽn tik Gʋlsg Sõamyã zugã võor vẽenegã.” (Sɩngre 9:3, 4; Tʋʋma 15:28, 29) N-ye, d sẽn yaa Wẽnnaam la Kirist yembsã, d yaa toore. Baasg zãnga, d tõe n paamame tɩ nebã waoog tõndo, d sã n segl n na n teel d tẽebã ne waoogre.—1 Pɩɛɛr 3:15.
9. Bõe la malɛk a yembr sẽn vẽneg a meng ne tʋm-tʋmd a Zã wã goam zãmsd tõndo?
9 D sã n tẽeg tɩ d yaa Wẽnnaam yembse, tõeeme me n sõng-d tɩ d kell n yɩ sik-m-mens rãmba. Vugri, tʋm-tʋmd a Zã sẽn paam vẽneg-kãseng saasẽ Zerizalɛmã wɛɛngẽ, a yɛɛsa wʋsgo, hali tɩ kɩt t’a wõgemd n na n balem malɛk sẽn wa n na n gom Wẽnnaam yʋʋr yĩnga. La malɛkã yeel-a lame: “Ayoo! Gũus tɩ mam me yaa Wẽnd yamba wa foo la bãngdbã, f ma-bi-taasã; m yaa wa neb nins sẽn deeg-b sebr kãnga goama. Yaa Wẽnnaam bal n tog ne waoogre.” (Wilgri 22:8, 9, Sebr Sõngo) Ad sɩd yaa mak-sõng la malɛkã kõ Wẽnnaam yembsã fãa! Kiris-neb kẽer tõe n tara taoor sobend tigingã pʋgẽ. Baasg zãnga a Zezi yeelame: “Ned ninga fãa sẽn dat n yɩ yãmb nin-kãsenga, bɩ a yɩ yãmb sõangda. La ned ninga fãa sẽn dat n yɩ yãmb kãsma bɩ yẽ yɩ yãmb yamba.” (Matɩe 20:26, 27) Tõnd sẽn yaa a Zezi karen-biisã, d fãa yaa yembse.
“Tõnd maana tʋʋmd ninga d sẽn tog n maanã bala”
10. Rɩk-y makr sẽn yit Gʋlsg Sõamyã pʋgẽ sẽn wilgd tɩ Wẽnnaam sõgen sakdbã pa ges tɩ yaa nana wakat fãa ne-b tɩ b maan a raabã ye.
10 Wẽnnaam daabã maaneg pa nana wakat fãa ne ninsaalb sẽn pa zems zãng ye. A Zeova sẽn da wa n yeel no-rɛɛs a Moiiz t’a tɩ yiis Israɛll kambã Ezipt yembdẽ wã, a ra pa rat n sak ye. (Yikri 3:10, 11; 4:1, 10) A Zeova sẽn yeel a Zonas t’a tɩ moon bʋ-kaoor koɛɛgã Niniiv nebã, a Zonas “yikame n zoe n na n kẽng Tarsis n bas Zusoabã.” (Zonas 1:2, 3) A Baruk sẽn yaa no-rɛɛs a Zeremi seb-gʋlsã yẽgmame n yeel t’a yaame. (Zeremi 45:2, 3) D manesem segd n yɩɩ wãn to, tõnd mengã tʋlsem sã n kɩɩsd Wẽnnaam daabã? A Zezi kɩbar a ye n leokd sok-kãngã.
11, 12. a) Koɛɛg-koɛɛga, togs-y a Zezi kɩbar ning sẽn be Luk 17:7-10 pʋgẽ wã. b) A Zezi kɩbarã zãmsda tõnd bõe?
11 A Zezi goma yamb sẽn da sõs n gũ a zu-soabã rũms yelle. Yambã sẽn ta yirã t’a yaame, a sẽn tʋm wʋsg lɛɛr 12 pʋgẽ wã yĩnga, la a zu-soabã pa bool-a t’a zĩnd n dɩ ye. A zusoabã yeel-a lame: “Segl dɩɩb yʋngã n sẽbg f sɛɛg n kõ maam dɩɩb tɩ m dɩ la m yũ tɩ fo yaool n dɩ la f yũ.” Yaa yambã sẽn da na n kõ a zu-soabã rɩɩb n sa poor la a ra tõe n ges a meng yelle. A Zezi baasa kɩbarã n yeele: “Yaa woto ne yãmb me yãmb sã n maan bũmb nins fãa b sẽn yeel yãmb tɩ y maanã n sɛ, bɩ y yeele: Tõnd yaa tʋm-tʋmdb sẽn ka yõodo. Tõnd maana tʋʋmd ninga d sẽn tog n maanã bala.”—Luk 17:7-10.
12 A Zezi pa taas kɩba-kãngã sẽn na yɩl n wilg t’a Zeova pa nand tõnd sẽn maand bũmb ning a tʋʋmdã pʋgẽ wã ye. Biiblã yeta woto vẽenega: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga” ye. (Hebre dãmba 6:10) A Zezi kɩbarã rat n wilgame tɩ yamb pa tõe n bao n noog a meng sũur bɩ n bao a meng sũ-noog bal ye. Tõnd sã n dɩk d mensã n kõ Wẽnnaam la d yãk n na n yɩ a yembse, d sakame n na n lʋɩɩs a raabã taoore. D segd n basa d mengã raab la d maan Wẽnnaam daabã.
13, 14. a) Zĩ-bʋs wɛɛngẽ la tõe n yaa tɩlae tɩ d kɩɩs d mensã tʋlsem? b) Bõe yĩng tɩ d segd n bas tɩ Wẽnnaam daabã lʋɩ taoore?
13 Wẽnnaam Gomdã la ‘tʋm-tʋmd sẽn tũud sɩd la sẽn tar yamã’ sɛb zãmsg wakat fãa tõe n baoodame tɩ d modg wʋsgo. (Matɩe 24:45) Tõe n yɩɩ woto, sã n mik tɩ tõnd pa nong karengo, bɩ sã n mik tɩ sebrã gomda Wẽnnaam yel-zulumsã yelle. (1 Korẽnt dãmba 2:10) La d segd n baoa sẽk n maan d meng Biibl zãmsgo. Tõe tɩ d segd n kibla d mens sẽn na yɩl n dɩk sẽk n zĩnd n maan d zãmsgã. La d sã n pa maan woto, d yɩta wãn n paam tʋlsem sẽn yaa kãseng ne ‘rɩɩb sẽn yaa taok sẽn yaa neb nins sẽn bɩ’ wã yĩngã?—Hebre dãmba 5:14.
14 La d sã n sõs n tʋm n lebg n wa yir ne yaamse? Wakat kãngã, rẽnda d modg d mens n kẽng kiris-neb tigissã. Tõnd sẽn segd n moon nin-sãamsã tõe n yɩɩ bũmb d sẽn pa nong wʋsg ye. A Poll mengã sak n deegame tɩ wakat kẽere, a pa togsd koe-noogã ‘ne sũ-noog ye.’ (1 Korẽnt dãmba 9:17) La tõnd maanda bõn-kãense, a Zeova sẽn yaa tõnd saasẽ Zusoabã tõnd sẽn nongã sẽn yet tõnd tɩ d segd n mooname wã yĩnga. La sɩd-sɩda d sũur yaa noog la d paamda pãng n paase, d sẽn modgd n na n zãmse, n kẽng tigissã la d moonã yĩnga!—Yɩɩl Sõamyã 1:1, 2; 122:1; 145:10-13.
Ra wẽnemd-y ‘n ges y poorẽ ye’
15. Wãn to la a Zezi kõ mak-sõng Wẽnnaam sakrã wɛɛngẽ?
15 A Zezi Kirist wilga a sakr zãng-zãng ne a saasẽ Ba wã. A Zezi yeela a karen-biisã tɩ: “Mam ka yi [saasẽ] n na n wa maan m meng ratem ye, la yaa tɩ maan sẽn tʋma maama ratem.” (Zã 6:38) A sẽn da wa n be yɩɩr pʋgẽ Gɛtsemane zẽedẽ wã a pʋʋsa woto: “M Ba, a sã n tõe, bɩ y kɩt tɩ bõn-yũudl kãnga loog n bas maam. La baasgo, ka sẽn zems mam daab ye, la sẽn zems yãmb daabo.”—Matɩe 26:39.
16, 17. a) Wãn to la d segd n ges yɛl nins d sẽn basã? b) Wilg-y t’a Poll da togsda sɩda, a sẽn da wa n yetẽ tɩ bũmb nins fãa a sẽn bas dũniyã pʋgẽ wã yaa ‘wa sagdã.’
16 A Zezi Kirist ratame tɩ d kell n pa sard ning d sẽn dɩk n na n yɩ Wẽnnaam yembsã zugu. A yeelame: “Ned sã n zãad wãk n kood la a rat n wẽnemd n ges a poorẽ, a ka zems tɩ kẽ Wẽnnaam soolmẽ ye.” (Luk 9:62) D sã n tagsd d sẽn bas bũmb ning poorẽ wã yell wakat fãa, rẽ pa zems ne ned sẽn yaa Wẽnnaam yamb ye. La d segd n geta bũmb ning d sẽn paame, d sẽn yãk n na n yɩ Wẽnnaam yembsã wa bũmb sẽn tar yõod wʋsgo. A Poll gʋlsa Filip rãmbã woto: “Sɩda, mam geelgda bũmb fãa wa bõn-zaalse mam sẽn bãng Kirist Zezi mam Zusoaba sẽn yɩɩd bũmb fãa wã yĩnga. Yaa bãmb yĩng la mam bas bũmb fãa n geelgd bãmb wa sagdo tɩ mam tõe n paam Kirist.”—Filip rãmba 3:8.
17 Tags-y bũmb nins fãa a Poll sẽn ges wa sagd n bas-b n na n bao tẽebã keoor a sẽn yaa Wẽnnaam yambã yĩng yelle. A pa bas naar ning sẽn be dũniyã pʋgẽ wã bal ye, la a basa zu-noog ning a sẽn da tar n tõe n wa yɩ Zʋɩf rãmbã tũudum taoor soab a ye wã me. A Poll sã n da kellẽ lame n tũ Zidaismã, a ra tõe n paama naam zĩig wa yẽ meng karen-saamb a Gamaliɛll biribl a Simeõ sẽn da tarã. (Tʋʋma 22:3; Galat dãmba 1:14) A Simeõ lebga Fariziẽ rãmbã taoor soaba, la baa ne a sẽn tall sãmbsã, a talla tʋʋm kãseng Zʋɩf rãmbã sẽn tõdg Rom soogrã yʋʋmd 66-70 Kirist zãmaanã pʋgẽ wã sasa. A kii tẽn-kũum kãngã pʋgẽ, tõe tɩ yaa Zʋɩf rãmb nins sẽn da yaa tẽng-n-biis yẽesem sẽn looga nusẽ, bɩ Rom tãb-biisã nusẽ.
18. Rɩk-y makr n wilg tẽeb bõn-datɩ pidsg sẽn be bark to-to.
18 A Zeova Kaset rãmb wʋsg tũu a Poll makre. A Zan yeela woto: “Mam sẽn yi lekollã yʋʋm a wãn poore, m paamame n yɩ Lõndr bʋ-kaood kãseng a yembr sekertɛɛre. Mam da nonga m tʋʋmdã, sẽn paase, m da paamda ligd wʋsgo, la m sũurẽ wã, m da miime tɩ m da tõe n maana yɛl wʋsg n paas a Zeova raabã maaneg pʋgẽ. La m wa n baas n basa m tʋʋmã n sɩng so-pakrã tʋʋmde. M sũur yaa noog wʋsg m sẽn maan woto yʋʋm 20 la bal sẽn loogã. Mam sẽn tʋm so-pakrã tʋʋmdã waa ne bark n kõ-m m vɩɩmã pʋgẽ, n yɩɩd sekertɛɛremdã. Bũmb pa be n kõt maam sũ-noog n yɩɩd m sẽn na n wa ne a Zeova Gomdã sẽn toeemd ned vɩɩmã ye. M sẽn kẽesd m meng a pʋgẽ wã sɩd bee yamleoog wʋsgo. Tõnd sẽn kõt a Zeova bũmb ningã pa baa fʋɩ, d sã n mak rẽ ne tõnd sẽn paamd bũmb ning yẽ nengẽ wã ye.”
19. Bõe la tõnd segd n yãk yam n maane, la bõe yĩnga?
19 Tõe tɩ sã n wa beẽ-beẽ bɩ d vɩɩmã yɛl toeeme. La tõnd sẽn dɩk d mens n kõ Wẽnnaamã pa toeemd ye. D ket n yaa a Zeova yembse, la a basda tõnd tɩ d yãke, d sẽn tõe n dɩk d sẽkã, d pãngã, d tõodã la d bõn-sõma a taabã n tʋm sõma to-to. Woto yĩnga, sard nins d sẽn dɩkd rẽ wɛɛngẽ wã tõe n wilga tõnd nonglmã ne Wẽnnaam sẽn yaa to-to. B leb n wilgda hal sẽn ta zĩ-bʋg la d tʋll n mong d mense. (Matɩe 6:33) Baa tõnd yɛlã sẽn yaa to-to fãa, d pa segd n dɩk sard sẽn pa vigsd n kõ d mengã a Zeova wa d sẽn tõe tɛk sɩda? A Poll gʋlsame: “Ned sã n kõ ne sũ-noogo, sẽn zems a sẽn tara, la ka bũmb ning a sẽn ka tara, yẽ tata Wẽnnaam yam.”—2 Korẽnt dãmba 8:12.
“Yãmb womda biisi”
20, 21. a) Bi-bʋs la Wẽnnaam yembsã womda? b) Wãn to la a Zeova keood neb nins sẽn maand a raabã ne b pãng tɛkã?
20 Yɩ Wẽnnaam yembs pa wat ne weoogr f zug ye. Sẽn yaa lebende, a kɩtdame tɩ d põs yembd buud sẽn sãamd tõnd sũ-noogã. A Poll gʋlsame: “Yãmb sẽn paam lohorem ne yel-wẽna yembd n lebg Wẽnnaam yembsã, yãmb womda biis sẽn yaa sõmblem, la a baasg yaa vɩɩm sẽn ka sɛta.” (Rom dãmba 6:22) Tõnd sẽn tʋmd Wẽnnaam yĩng wa yembsã womda sõmblem biisi, bala d tara manesem sẽn yaa sõngo, bɩ vɩɩm manesem sẽn yaa tɩrg la yɩlemde. Sẽn paase, rẽ wat n baasa ne vɩɩm sẽn pa sat beoog-daare.
21 A Zeova kõta a yembsã bũmb wʋsgo. Tõnd sã n maand d pãng sẽn tõe tɛk a tʋʋmdã pʋgẽ, a pakda ‘saag t’a ni-du,’ la a kiigd-d ‘bark wʋsg tɩ sek-do.’ (Malaki 3:10) Ad sɩd na n yɩɩ sũ-noogo, tɩ d ket n maand a Zeova raabã wa yembs wakat sẽn pa sat yĩnga!
Y tẽrame bɩ?
• Bõe yĩng tɩ d lebgd Wẽnnaam yembse?
• Wãn to la d wilgd tɩ d sakda Wẽnnaam daabã?
• Bõe yĩng tɩ d segd n sak n lʋɩɩs a Zeova raabã taoore?
• Bõe yĩng tɩ d pa segd n ‘ges poorẽ’?
[Zãmsgã sogsgã]
[Foto, seb-neng 14]
Ned sẽn da tõe n kẽes a meng yembd pʋgẽ ne yamleoog Israɛllã ra makda kiris-nebã yembdo
[Foto, seb-neng 15]
D sã n deeg lisgu, d lebgda Wẽnnaam yembse
[Foto rãmba, seb-neng 15]
Kiris-nebã lʋɩɩsda Wẽnnaam daabã taoore