Bas-y tɩ Wẽnnaam goamã yɩ y sor vẽenem
Bas-y tɩ Wẽnnaam goamã yɩ y sor vẽenem
“Yãmb goamã yaa . . . mam sor vẽenem.”—YƖƖL SÕAMYÃ 119:105.
1, 2. Wãn-wãn la a Zeova goamã na n yɩ tõnd sor vẽenem?
KƖT t’a Zeova goamã yɩ d sor vẽenemã bee ne tõnd ned kam fãa. Sẽn na yɩl n dɩ tẽebã vẽenem kãngã yõodo, d segd n zãmsda Wẽnnaam Gomdã wakat fãa la d tũud a saglsã. Yaa rẽ maaneg bal n tõe n kɩt tɩ tõnd me wa yeel wala yɩɩl-gʋlsdã tɩ Wẽnnaam “goama yaa mam naoã fɩtla la mam sor vẽenem.”—Yɩɩl Sõamyã 119:105.
2 Masã, bɩ d vaees Yɩɩl Sõamyã 119:89-176. Ad yaa sagls ka tɛk n be verse kãensã b sẽn tigim yɩɩl sull 11 pʋgẽ wã pʋsẽ! B tõe n sõng-d lame tɩ d kell n kẽn sor ninga sẽn tar n debd vɩɩm sẽn-kõn-saẽ wã zugu.—Matɩe 7:13, 14.
Bõe yĩng tɩ d segd n nong Wẽnnaam goamã?
3. Wãn-wãn la Yɩɩl Sõamyã 119:89, 90 wilgd tɩ d tõe n talla bas-yard ne Wẽnnaam goamã?
3 D sã n nong a Zeova goamã d na n tõog n yalsa kãn-kãe tẽebã pʋgẽ. (Yɩɩl Sõamyã 119:89-96) Yɩɩl-gʋlsdã yɩɩla woto: “Zusoaba, yãmb goama yalsda saasẽ wakat fãa. . . . yãmb yẽbga dũniyã la a yalsda kãn-kãe.” (Yɩɩl Sõamyã 119:89, 90) Yaa Wẽnnaam noor goam n yãk ‘yĩngr todse,’ tɩ wĩndgã, kiuugã la ãdsã yas b zĩisẽ, tɩ tẽngã me yẽbg a zĩigẽ n pa na n tol n dĩms abada wã. (Zoob 38:31-33; Yɩɩl Sõamyã 104:5) D tõe n talla bas-yard ne gomd ning fãa sẽn yit a Zeova noorẽ wã, bala Wẽnnaam gomd pa yit a noorẽ n pa pids bũmb ning a sẽn tʋm-a t’a tɩ maanã ye.—Ezai 55:8-11.
4. Wãn-wãn la Wẽnnaam goamã nonglem tõe n sõng a sõgen dãmb nins sẽn namsdã?
4 Yɩɩl-gʋlsdã sã n da pa nongẽ ‘Wẽnnaam tõogã, a ra na n sãama a toogã pʋgẽ.’ (Yɩɩl Sõamyã 119:92) Yaa Israɛll neb nins sẽn da kɩɩsd Tõogã n da namsd yɩɩl-gʋlsdã, ra pa sãamb ye. (Maankʋʋre 19:17) La a sẽn da nong Wẽnnaam tõodã yĩnga, a sũur pa sãam wʋsg ye. Tʋm-tʋmd a Poll sẽn da wa n be Korẽntã, ‘zãmb ba-biis n bao a sãoongo.’ Tõe tɩ bãmb kẽer da yaa ‘tʋm-tʋmd kãsemsã’ sẽn da baood yell n na n dõd-a wã. (2 Korẽnt dãmba 11:5, 12-14, 26) La a Poll sẽn da nong Wẽnnaam goamã yĩnga, kogla a tẽebã. Tõnd sẽn nong a Zeova Gomdã la d tũud a sẽn yet bũmb ningã yĩnga, d nonga d saam-biisã. (1 Zã 3:15) Baa dũniyã neb sẽn kis-dã pa kɩtd tɩ d yĩm Wẽnnaam tõodã abada. D ket n lagemda d saam-biisã ne nonglem n maand a raabã, n gũud n na n wa balem a Zeova ne sũ-noog wakat sẽn-kõn-sa.—Yɩɩl Sõamyã 119:93.
5. Wãn-wãn la rĩm a Aza bao a Zeova?
5 D sã n dat n wilg tɩ d sakda a Zeova, d tõe n pʋʋs-a lame n yeel woto: “Mam yaa yãmb dẽnda, bɩ y fãag maam tɩ m baooda yãmb tõodo.” (Yɩɩl Sõamyã 119:94) Rĩm a Aza baoa Wẽnnaam la a kɩt tɩ wẽn-kɩɩsgã sa Zida. A Aza sẽn deeg naamã tɩ yʋʋm piig la a nuunẽ sẽn dat n yeel tɩ yʋʋmd 963 sẽn deng Kirist zãmaanã, Zida nin-buiidã tigma taab ‘n wẽen tɩ b na n baoa a Zeova.’ Wẽnnaam basame tɩ b ‘yã-a,’ la a “kõo bãmb laafɩ zĩiga fãa.” (2 Kɩbaya 15:10-15) Mak-kãngã segd n sõnga ned ning fãa sẽn bas kiris-neb tigingã t’a lebg n bao Wẽnnaam. A na n ninga neb nins sẽn lebg n wa a nin-buiidã sʋkã bark la a kogl-ba.
6. Bõe maaneg n na n kogl tõnd tẽebã?
6 A Zeova goamã kõta yam sẽn tõe n kogl tõnd tẽebã. (Yɩɩl Sõamyã 119:97-104) Wẽnnaam noyã kɩtdame tɩ d yɩ yam dãmb n yɩɩg d bɛɛbã. A saglsã tũub kõta tõnd yam, la ‘a tõodã sakr kɩtdame tɩ tõnd bãngr yɩɩg nin-kẽemba.’ (Yɩɩl Sõamyã 119:98-100) A Zeova koɛɛgã sã n noom ‘tõnd dagsendakã n yɩɩd sɩɩdo,’ d na n kisga “ziri-n-be-soɛya fãa” la d gil-ba. (Yɩɩl Sõamyã 119:103, 104) Rẽ na n kogla d tẽebã ne yaoolem da-kãensã tɩ-ta-nebã, a nin-wẽnsã la a wẽn-kɩɩsdbã.—2 Tɩmote 3:1-5.
Tõnd naoã fɩtla
7, 8. D sã n dat n tũ Yɩɩl Sõamyã 119:105 goamã, bõe la d segd n maane?
7 Wẽnnaam goamã n kõt tẽebã vẽenem wakat fãa. (Yɩɩl Sõamyã 119:105-112) Tõnd yaa kiris-ned sẽn paam vʋʋsem sõngã zaeeb tɩ d yaa ‘piis a taabã’ sẽn yaa b tʋmd-n-taasã sʋk ned me, d yeta woto: “Yãmb goama yaa mam naoã fɩtla la m sor vẽenem.” (Zã 10:16; Yɩɩl Sõamyã 119:105) Wẽnnaam goamã yaa wa fɩtl sẽn vẽnegd tõnd sor sẽn na yɩl tɩ d ra lak n bas d tẽebã ye. (Yelbũna 6:23) La yaa tõnd ned kam fãa n segd n bas tɩ Wẽnnaam goamã yɩ a nao fɩtla.
8 D segd n dɩka Yɩɩl Sõamyã 119 soab gʋlsdã togs-n-taare. A ra rɩka sard ne a sũur fãa t’a pa na n bʋdg n bas Wẽnnaam noyã ye. A yeelame: ‘Mam kãabame la m na n pidsame n sak fo [a Zeova] tɩrlma bʋʋd kaoobo.’ (Yɩɩl Sõamyã 119:106) Bɩ d ra wa tol n deem ne Biiblã zãmsg wakat fãa wã la kiris-neb tigissã kẽnd ye.
9, 10. Wãn to la d mi tɩ neb sẽn dɩk b mens n kõ a Zeova tõe n wa ‘bʋdg n basa a tõodã,’ la wãn-wãn la d tõe n gil yel-kãngã?
9 Yɩɩl-gʋlsdã yẽ pa ‘bʋdg n bas Wẽnnaam tõodã ye,’ la ned sẽn dɩk a meng n kõ a Zeova tõe n wa bʋdgame. (Yɩɩl Sõamyã 119:110) Baa ne rĩm a Salomo sẽn da yit nin-buiid sẽn dɩk b mens n kõ a Zeova sʋk la a ra tʋmd ne yam ning Wẽnnaam sẽn kõ-a sɩngrẽ wã, a wa n bʋdgame. A Salomo ‘pʋg-sãamsã kɩtame t’a maan yel-wẽna,’ b wẽnemda a yamã t’a tũ buud a taab wẽnnaam dãmba.—Nehemi 13:26; 1 Rĩm dãmba 11:1-6.
10 A Sʋɩtãan ningda bẽds wʋsg tõnd taoor wala ‘tãoog ned sẽn bẽta.’ (Yɩɩl Sõamyã 91:3) Wala makre, ned sẽn da yɩ tõnd tẽed-n-taag tõe n makame n na n kɩt tɩ d yi tẽebã vẽenemẽ n tɩ kẽ kɩɩsgã likẽ. Tiyatiir kiris-nebã sʋka, “pag a Zezabɛll” n da be beenẽ. Tõe tɩ yaa pagb sull sẽn da zãmsd nebã tɩ b pʋʋsd bõn-naands la b yooda. A Zezi pa sak tʋʋm-kãensã sẽn yaa wẽnsã maaneg ye, la tõnd me pa segd n sak ye. (Wilgri 2:18-22; Ziid 3, 4) Bɩ d kos a Zeova pʋʋsg pʋgẽ sẽn na yɩl n kell n paa a vẽenemã pʋgẽ, n da wa bʋdg n bas a noyã ye.—Yɩɩl Sõamyã 119:111, 112.
Wẽnnaam goamã sõngda tõndo
11. Sã n yaa ne Yɩɩl Sõamyã 119:119, wãn-wãn la Wẽnnaam get nin-wẽnsã?
11 Tõnd sã n pa bʋdg n bas Wẽnnaam tõogã, a na n sõng-d lame. (Yɩɩl Sõamyã 119:113-120) Wala a Zezi sẽn pa sakd neb nins sẽn yet tɩ b yaa kiris-neb rũndã-rũndã n yaool n yaa zal-zalã, tõnd me pa sakd ‘yam a yiib’ rãmbã ye. (Yɩɩl Sõamyã 119:113; Wilgri 3:16) D sẽn maand a Zeova raabã ne d sũur fãa wã, a yaa ‘tõnd zĩ-soalgdga,’ la a na n sõng-d lame. A na n fãeega neb nins ‘sẽn basd a raabã’ maanegã, bala bãmb yam yaa belgr yam. (Yɩɩl Sõamyã 119:114, 117, 118; Yelbũna 3:32) A geta bãmb dãmba sẽn yaa nin-wẽnsã wa “rʋk puudu,” sẽn yaa rẽgd ning b sẽn yẽnegd wanzuri la sãnem n zolg n lobã. (Yɩɩl Sõamyã 119:119; Yelbũna 17:3) D segd n nonga Wẽnnaam saglsã wakat fãa, bala, yaa vẽeneg tɩ d pa rat t’a wa lagem tõnd ne nin-wẽnsã n sãam ye.
12. Bõe yĩng tɩ d segd n zoe a Zeova?
12 Yɩɩl-gʋlsdã yeela woto: ‘Mam yĩns fãa rigda fo [a Zeova] yɛɛsg yĩnga.’ (Yɩɩl Sõamyã 119:120) Tõnd sẽn yaa Wẽnnaam sõgen dãmbã, d wilgdame tɩ d zoeta Wẽnnaam, n pa rat n maan bũmb a sẽn kis tɩ sãam a sũur ye. Yaa woto la d segd n zoe-a, d sã n dat t’a sõng-do. A Zoob paama yõ-wok a sẽn da zoet a Zeova wã yĩnga. (Zoob 1:1; 23:15) Wẽn-zoeer tõe n kɩtame tɩ d kell n ta Wẽnnaam yam baa ne makr nins fãa d sẽn segdã. Baasg zãnga, d sã n dat n yals kãn-kãe mak-kãens taoore, d tog n pʋʋsa ne d sũur fãa la ne tẽebo.—Zak 5:15.
Pʋʋs-y ne tẽebo
13-15. a) Bõe yĩng tɩ d tõe n tẽ tɩ d pʋʋsgã na n deegame? b) Sõng-bʋg la d tõe n paame, tõnd sã n wa pa mi bũmb ning d sẽn na n yeel d pʋʋsg pʋgẽ? d) Rɩk-y makr n wilg Yɩɩl Sõamyã 119:121-128 sẽn tõe n zems to-to ne bũmb nins tõnd sẽn dat n yeel d pʋʋsg pʋgẽ ‘n pa tõe n togsã.’
13 D tõe n pʋʋsa ne tẽeb tɩ d na n paama Wẽnnaam sõngre. (Yɩɩl Sõamyã 119:121-128) Wala yɩɩl-gʋlsdã, d kɩsa sɩd tɩ Wẽnnaam na n deega d pʋʋsgã. Bõe yĩnga? Bala d nonga a ‘tõodã n yɩɩd sãnem, n yɩɩd sãnem halaal’ menga. Sẽn paase, d sak n deegame tɩ Wẽnnaam tõodã fãa yaa tɩrse.—Yɩɩl Sõamyã 119:127, 128.
14 A Zeova kelgda tõnd pʋʋsgã, d sẽn pʋʋsd-a ne tẽebã yĩnga, la d sẽn tũud a tõodã neerã. (Yɩɩl Sõamyã 65:3) La yaa wãn to masã, d sã n wa maood ne zu-loees n pa mi d sẽn na n yeel bũmb ning d pʋʋsgã pʋgẽ? Wakat kãnga, ‘vʋʋsem sõngã meng wẽeda sir ned sẽn ka tõe n togse, n yõkd Wẽnnaam sɛɛg tõnd yĩnga.’ (Rom dãmba 8:26, 27) Sasa kãense, Wẽnnaam geta goam nins sẽn be a Gomdã pʋgẽ wã wa pʋʋsg tõnd sẽn taasd-a n dat a sõngre.
15 Gʋlsg Sõamyã pida ne pʋʋsg toor-toor la tagsa sẽn tõe n wõnd goam nins tõnd sẽn dat n yeel d pʋʋsg pʋgẽ n ‘pa tõe n togsã.’ Wala makre, d ges Yɩɩl Sõamyã 119:121-128 wã. Tõe tɩ goam nins sẽn be zĩ-kãensã wã zemsa ne tõnd yɛlã sẽn yaa to-to wã. D sã n zoet b na n wa zãmb-do, d tõe n kosa Wẽnnaam sõngr wala yɩɩl-gʋlsdã sẽn kos-a to-to wã. (Verse 121-123) La d sã n wa rat n dɩk sard sẽn yaa toogo? Sã n yaa woto, d tõe n pʋʋsa a Zeova n kos t’a kõ-d vʋʋsem sõngã t’a tẽeg-d a noyã tɩ d tũ. (Verse 124, 125) Yaa sɩd tɩ d ‘kisa ziri-n-be-soayã,’ la bũmb sã n wa rat n kʋɩɩb-do, d tõe n kosa Wẽnnaam t’a sõng-d tɩ d ra kɩɩs a tõogã ye. (Verse 126-128) Tõnd sã n karemd Biiblã daar fãa, na n kɩtame tɩ d sã n wa pʋʋsd a Zeova n bõosd a sõngre, bɩ d tẽeg zĩis sẽn tõe n sõng-do, wala sẽn be verse kãensã pʋsẽ wã.
A Zeova saglsã sõngd-d lame
16, 17. a) Bõe yĩng tɩ d rat tɩ Wẽnnaam tẽeg-d a tõodã, la wãn-wãn la d segd n ges-ba? b) Wãn to la nebã tõe n get tõndo, la yaa bõe n pak-d n yɩɩda?
16 Sẽn na yɩl tɩ Wẽnnaam kelg d pʋʋsgã la d paam a lohorem, d segd n saka a tõodã. (Yɩɩl Sõamyã 119:129-136) D sẽn yaa yĩmdbã yĩnga, d ratame t’a Zeova tẽegd tõnd tõod kãens sẽn yaa sõma wʋsgã. D sã n wa paam vẽnegr Wẽnnaam goamã zug fãa, d nonga rẽ wʋsgo. (Yɩɩl Sõamyã 119:129, 130) D leb n tara mi-beoog ne a Zeova, a sẽn kɩt t’a ‘nengã vẽenem yãgd’ tõnd zut n wilgdẽ tɩ d tata a yam, baa ne tõnd ‘nin sẽn daagd ne nin-tãm nebã sẽn pa sakd a tõogã yĩnga.’—Yɩɩl Sõamyã 119:135, 136; Sõdbo 6:25.
17 D kɩsa sɩd tɩ d na n ket n paamda Wẽnnaam lohorem, d sã n tũud a tõodã sẽn yaa tɩrsã. (Yɩɩl Sõamyã 119:137-144) D sẽn yaa a Zeova sõgen dãmba yĩnga, d sak n deegame t’a tara sor n na n tẽeg tõnd a tõodã sẽn yaa tɩrsã la a kõ-d noor tɩ d tũ-ba. (Yɩɩl Sõamyã 119:138) Sẽn mik tɩ yɩɩl-gʋlsdã ra tũuda Wẽnnaam noyã, bõe yĩng t’a wa yeel tɩ yẽ ‘yaa bilfu la a paamda paoogre’? (Yɩɩl Sõamyã 119:141) Wõnda yaa a bɛɛbã sẽn da get-a to-to wã yell la a sẽn gomdã. Tõnd me sã n ket n tũud Wẽnnaam no-tɩrsã ne d sũur fãa, nebã tõe n paoog-d lame. La sẽn pak tõnd n yɩɩdã yaa d paam a Zeova lohorem d sẽn tũud a no-tɩrsã yĩnga.
Laafɩ la koglgo
18, 19. Bõe la d paamd d sẽn tũud Wẽnnaam noyã?
18 Wẽnnaam noyã tũub kɩtdame tɩ d pẽ-a wakat fãa. (Yɩɩl Sõamyã 119:145-152) D sẽn sakd a Zeova noyã yĩnga, d miime tɩ d tõe n bool-a lame n kos a sõngr ne d sũur fãa la d tẽ t’a na n kelg-d lame. D tõe n yika ‘sẽn deng zĩ-yẽegr’ n kelem n kos sõngre. Yaa wakat sẽn zems kɛpɩ ne pʋʋsgo! (Yɩɩl Sõamyã 119:145-147) Wẽnnaam leb n pẽe tõnd d sẽn lakd d mens ne manesem wẽng buud fãa la d sẽn get t’a goamã yaa sɩd wala a Zezi me sẽn da get-a to-to wã. (Yɩɩl Sõamyã 119:150, 151; Zã 17:17) Zood ning tõnd sẽn tar ne a Zeova wã kengda tõnd raood dũni kãngã sẽn gudgã pʋgẽ, la a na n kell n sõng-d tɩ d põs a zab-kãsengã sẽn yaa Armagedõ wã wakate.—Wilgri 7:9, 14; 16:13-16.
19 D sẽn nand Wẽnnaam goamã ne d sũur fãa wã yĩnga, d paamda koglg hakɩka. (Yɩɩl Sõamyã 119:153-160) Tõnd pa ‘bʋdg n bas a Zeova kasetã’ bɩ a saglsã wala nin-wẽnsã ye. D nonga Wẽnnaam tõodã tɩ kɩt tɩ d paamd a koglgo, a sẽn nong-dã yĩnga. (Yɩɩl Sõamyã 119:157-159) A Zeova saglsã sõngda tõnd tɩ d tẽegd bũmb nins a sẽn baood tɩ d maan yɛl takɩ pʋsẽ wã. Sẽn paase, Wẽnnaam tõodã yaa sor-wilgri, la d sak n deegame tɩ zemsame tɩ d Naandã wilg tõnd sore. Tõnd sẽn mi tɩ Wẽnnaam ‘goamã gill yaa sɩda,’ la tɩ d pa tõe n bãng sor ning d sẽn segd n tũ wã d toorã, d sakda ne sũ-noog tɩ Wẽnnaam wilg-d sore.—Yɩɩl Sõamyã 119:160; Yelbũna 20:24.
20. Bõe yĩng tɩ d tar “laafɩ kãsenga”?
20 Tõnd sẽn nong a Zeova tõodã yĩnga, d tara laafɩ wʋsgo. (Yɩɩl Sõamyã 119:161-168) Namsg tõnd tẽebã yĩng pa kɩtd tɩ “Wẽnnaam laafɩ” wã d sẽn tarã menem ye. (Filip rãmba 4:6, 7) D nonga a Zeova bʋʋdã kaoob hal wʋsg tɩ kɩt tɩ d pẽgd-a daar fãa “naoor a yopoe,” sẽn dat n yeel tɩ naoor wʋsgo. (Yɩɩl Sõamyã 119:161-164) Yɩɩl-gʋlsdã ra yɩɩla woto: “Neb nins sẽn nong yãmb tõoga tara laafɩ kãsenga, la bũmb ka be sẽn lakd bãmb ye.” (Yɩɩl Sõamyã 119:165) Tõnd ned kam fãa sã n nong a Zeova tõodã la d sakd-ba, ned manesem bɩ bũmb a to pa na n sãam d tẽebã ye.
21. Mak-bʋs n be Biiblã pʋgẽ n wilgdẽ tɩ d pa segd n bas tɩ tigingã pʋgẽ zu-loees kɩt tɩ d bas d tẽebã?
21 Neb wʋsg b sẽn gomd b yell Biiblã kibay pʋsẽ pa bas tɩ baa fʋɩ sẽn da tõe n yɩ kug-lakdg n kõ-b tẽebã pʋgẽ lak-b ye. Wala makre, kiris-ned a Gaiyus ra ket n ‘kẽnda sɩdã pʋgẽ’ baa ne a Diotrɛf sẽn da tar wẽn-kɩɩsg manesmã. (3 Zã 1-3, 9, 10) A Poll sagla a Evodi ne a Sẽntis sẽn da yaa kiris-nebã “tɩ b paam yam a yembr Zusoaba tũudum pʋgẽ,” tɩ wilgdẽ tɩ tõe tɩ yell n da be pʋg-kãensã sʋka. Wõnda b paama sõngr n welg b yellã n kell n tũ a Zeova. (Filip rãmba 4:2, 3) Dẽnd d pa segd n bas tɩ tigingã pʋgẽ zu-loɛɛg baa a yembr kɩt tɩ d bas d tẽebã ye. Bɩ d ket n sakd a Zeova tõodã la d tẽegdẽ tɩ ‘tõnd manesmã fãa bee a taoore.’ (Yɩɩl Sõamyã 119:168; Yelbũna 15:3) Woto, baa fʋɩ pa na n sãam ‘laafɩ kãseng’ ning tõnd sẽn tarã ye.
22. a) D sã n sakd Wẽnnaam, zu-no-bʋg la d na n paame? b) Tags bʋg la d segd n tall neb nins sẽn bas kiris-neb tigingã zugu?
22 Tõnd sã n sakd a Zeova wakat fãa, d na n paama zu-noog n ket n pẽgd-a. (Yɩɩl Sõamyã 119:169-176) D sã n tũud Wẽnnaam noyã, kogenda d tẽebã, la leb n kɩtdame tɩ ‘pẽgr bund n yit d noorẽ’ n pẽgd a Zeova. (Yɩɩl Sõamyã 119:169-171, 174) Rẽ yaa zu-noog ning d sẽn tõe n paam yaoolem da-kãensã pʋgẽ tɩ yɩ kãseng n yɩɩg a taaba fãa. Yɩɩl-gʋlsdã ra tʋll n kell n vɩɩmdame n pẽgd a Zeova, la a ra wa n ‘gõoda wa pesg sẽn meneme,’ tɩ d pa mi rẽ sẽn yɩ to-to ye. (Yɩɩl Sõamyã 119:175, 176) Kiris-neb kẽer sẽn bas tigingã tõe n ket n nonga Wẽnnaam la b rat n pẽg-a. Woto yĩng bɩ d maan d sẽn tõe fãa n sõng-b tɩ b lebg n paam tẽeb sẽn yaa kãn-kãe, la b naag a Zeova nin-buiidã n pẽg-a ne sũ-noogo.—Hebre dãmba 13:15; 1 Pɩɛɛr 5:6, 7.
Tõnd sor vẽenem wakat fãa yĩnga
23, 24. Nafa bʋs la y paam Yɩɩl Sõamyã 119 pʋgẽ?
23 Yɩɩl Sõamyã 119 soabã tõe n nafa tõnd zĩis toɛy-toɛy pʋsẽ. Wala makre, a sẽn wilgd tɩ yaa ‘a Zeova tõodã tũub’ n wat ne sũ-noog hakɩkã tõe n kɩtame tɩ d teeg Wẽnnaam wʋsg n paase. (Yɩɩl Sõamyã 119:1) Yɩɩl-gʋlsdã tẽegda tõnd tɩ ‘Wẽnnaam goama gill yaa sɩda.’ (Yɩɩl Sõamyã 119:160) Sãmbg sẽn ka be, rẽ segd n kɩtame tɩ d nand Wẽnnaam Gomdã zãng n paase. Yɩɩl Sõamyã 119 soabã zug bʋgsg segd n kɩtame tɩ d zãms Gʋlsg Sõamyã neere. Yɩɩl-gʋlsdã pʋʋsa Wẽnnaam naoor wʋsg n kos-a yaa: “Bɩ y zãms maam y raabã.” (Yɩɩl Sõamyã 119:12, 68, 135) A leb n kosa Wẽnnaam pʋʋsg pʋgẽ woto: “Bɩ y zãms maam yẽesem ne bãngre, tɩ bõe, mam tẽeda yãmb tõodo.” (Yɩɩl Sõamyã 119:66) Tõnd me segd n pʋʋsa Wẽnnaam woto.
24 Zãmsg ning sẽn yit Wẽnnaam nengẽ wã kɩtdame tɩ d tõog n lebg a Zeova zoa. Naoor wʋsgo, yɩɩl-gʋlsdã boola a meng tɩ Wẽnnaam tʋm-tʋmda. Sɩd me, a sẽn gom ne a Zeova to-to wã sɩd bee yamleoogo. A yeelame tɩ: “Mam yaa yãmb dẽnda.” (Yɩɩl Sõamyã 119:17, 65, 94, 122, 125; Rom dãmba 14:8) F sã n yaa a Zeova Kaset soab n sakd-a la f pẽgd-a, sɩd yaa zu-noog tɛkẽ. (Yɩɩl Sõamyã 119:7) Rẽ yĩnga yãmb yaa Wẽnnaam Rĩungã koe-moond n sakd Wẽnnaam ne sũ-noog bɩ? Sã n yaa woto, bɩ y tall bas-m-yam tɩ y sã n teegd a goamã wakat fãa tɩ b yaa y sor vẽenem, a Zeova na n ket n sõngd-d-y lame la a ningd-y barka.
Wãn to la y na n leoke?
• Bõe yĩng tɩ d segd n nong Wẽnnaam goamã?
• Wãn to la Wẽnnaam goamã sõngd tõndo?
• Wãn to la a Zeova saglsã sõngd tõndo?
• Bõe yĩng t’a Zeova nin-buiidã tar laafɩ la koglgo?
[Zãmsgã sogsgã]
[Foto, seb-neng a 9]
Wẽnnaam goamã n kõt tẽebã vẽenem
[Foto, seb-neng 10]
D sã n nong a Zeova saglsã, a pa na n tol n ges-d wala “rʋk puud” ye
[Foto rãmba, seb-neng 11]
D sã n karemd Biiblã daar fãa, d sã n wa pʋʋsdẽ d na n tẽega verse rãmb sẽn tõe n sõng-do