Teeg-y a Zeova goamã
Teeg-y a Zeova goamã
“Mam della yãmb goamã.”—YƖƖL SÕAMYÃ 119:42.
1. Bõe la y mi ned ninga sẽn gʋls Yɩɩl Sõamyã 119 soabã zugu, la yam ning a sẽn tallã zugu?
NED ninga sẽn gʋls Yɩɩl Sõamyã 119 soabã ra nonga a Zeova goamã. Wõnda yaa Zida na-biig a Ezekɩas n gʋls yɩɩn-kãngã. Tagsa nins sẽn be yɩɩllã pʋgẽ wã zemsa kɛpɩ ne yam ning a Ezekɩas sẽn tall a sẽn wa n lebg Zida rĩmã, bala a kell n ‘tũu a Zeova.’ (2 Rĩm dãmba 18:3-7) La bũmb sẽn yaa vẽenega, yaa tɩ ned ninga sẽn gʋls yɩɩllã ra miime t’a tara tẽeb ratem.—Matɩe 5:3, NW.
2. Yɩɩll Sõamyã 119 soabã gomda bõe yelle, la wãn-wãn la b gʋls-a?
2 Yaa Wẽnnaam koɛɛgã yõod yell la Yɩɩll Sõamyã 119 soabã gomd n yɩɩda. * A gʋlsdã tũu Hebre goamã gʋls-biis sẽn pʋgd taab to-to wã n gʋls-a. Tõe tɩ yaa sẽn na yɩl t’a tẽegr yɩ nana. A verse rãmbã fãa yaa bãmb 176, n tũud Hebre goamã gʋls-biis tongre. Yɩɩllã sull 22 wã fãa sɩngda ne gʋls-bi-yende. Yɩɩn-kãngã gomda Wẽnnaam goamã, a tõodã, a soayã, a noyã, a raabã, a saglsã la a bʋ-kaoã yelle. Sõs-kãngã la sẽn na n pʋgl-a wã pʋgẽ, d na n vaeesa Yɩɩll Sõamyã 119 soabã b sẽn lebg tɩ zems kɛpɩ ne Hebre wã. D sã n bʋgs yɛl nins a Zeova pĩnd wẽndẽ la a rũndã-rũndã sõgen dãmbã sẽn vɩɩmdã, na n kɩtame tɩ d wʋm yɩɩn-kãngã a sẽn vẽneg tɩ b gʋlsã võor n paase, la kɩt me tɩ nonglem ning d sẽn tar ne Biiblã sẽn yaa Wẽnnaam Gomdã paase.
Sak-y Wẽnnaam goamã n paam sũ-noogo
3. Rɩk-y makr n wilg kẽn ne pʋ-peelmã sẽn dat n yɛɛlga.
3 Yaa Wẽnnaam tõodã tũub n kɩtd tɩ d tall sũ-noog hakɩka. (Yɩɩl Sõamyã 119:1-8) D sã n tũud Wẽnnaam a Zeova noyã, a na n gesame tɩ d ‘kẽnda ne pʋ-peelem.’ (Yɩɩl Sõamyã 119:1) Kẽn ne pʋ-peelem pa rat n yeel tɩ f yɩ ned sẽn pa kongd ye, rẽ wilgdame bal tɩ d maood n maanda Wẽnnaam a Zeova raabã wa d sẽn tõe tɛka. A Nowe yɩɩ ‘nin-tɩrg sẽn ka tar yell yẽ zamaanã neb sʋka,’ a sẽn ‘da tũud Wẽnnaamã’ yĩnga. Yẽ ne a zakã rãmb põsa sãoong sa-kãsengã wakate, a sẽn yɩ sɩd soab sẽn da tũud a Zeova noyã yĩnga. (Sɩngre 6:9; 1 Pɩɛɛr 3:20) Tõnd me sã n dat n põs dũni kãngã sãoongã wakate, d segd n sakda Wẽnnaam noyã neer n maand a raabã.—Yɩɩl Sõamyã 119:4.
4. Bõe la d segd n maane, d sã n dat n paam sũ-noog la d tõog d tʋʋmã pʋgẽ?
4 D sã n pẽgd a Zeova ne ‘pʋ-peelem la d sakd a raabã,’ a pa na n tol n bas-d ye. (Yɩɩl Sõamyã 119:7, 8) Wẽnnaam pa bas Israɛll taoor-lʋɩt a Zozue sẽn tũ a saglgã n da karemd a ‘tõogã sebr wĩntoog ne yʋng la a maand bũmb nins fãa sẽn gʋls a pʋgẽ wã’ ye. Rẽ kɩtame t’a Zozue paam yam n tõog n maan a tʋʋmdã neere. (Zozue 1:8) A Zozue sẽn da wa n kolg kũumã a ra ket n pẽgda Wẽnnaam, rẽ n kɩt t’a tõog n tẽeg Israɛll nebã woto: “Yãmb bãngame la y miimi tɩ yãmb Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas ba a ye tɩ vaal ye.” (Zozue 23:14) Wala a Zozue la ned ning sẽn gʋls Yɩɩll Sõamyã 119 soabã, tõnd me sã n dat n paam sũ-noog la d tõog d tʋʋmã pʋgẽ, d segd n pẽgda a Zeova la d relld a goamã.
A Zeova goamã kogenda d tẽebã yɩlemde
5. a) Wilg-y d sẽn tõe n maan to-to n kell n tall d tẽebã yɩlemde. b) Bi-bɩɩg sã n wa maan yel-wẽn-kãsenga, sõng-bʋg la a tõe n paame?
5 D sã n kẽnd wa sẽn zems Wẽnnaam goamã, d tõe n kell n talla d tẽebã yɩlemde. (Yɩɩl Sõamyã 119:9-16) D tõe n maana woto, baa tõnd roagdbã sã n pa kõt mak-sõngo. Baa a Ezekɩas ba wã sẽn da balem bõn-naandsã, a Ezekɩas yẽ kɩtame ‘t’a sor zemse,’ tɩ tõe tɩ yaa a sẽn da pa sak n balem bõn-naandsã yĩnga. D rɩk makr wa bi-bɩɩg sẽn balemd Wẽnnaam rũndã-rũndã sã n maan yel-wẽn-kãsenga. Tek yam n kos sugri, pʋʋsgã, a roagdbã la tigingã kãsem dãmb sõngr b sẽn kõt ne nonglmã tõe n sõngame t’a yɩ wa a Ezekɩase, la kɩt t’a sor zemse, t’a kẽn wa sẽn zems Wẽnnaam goamã.—Zak 5:13-15.
6. Pʋg-bʋs n kɩt tɩ b sor zems la b kẽn wa sẽn zems Wẽnnaam goamã?
6 Baa ne a Rahaab la a Rut sẽn vɩɩmd yʋʋm wʋsg sẽn deng tɩ b gʋls Yɩɩll Sõamyã 119 soabã, b kɩtame tɩ b sor zemse. A Rahaab ra yaa Kanaã pʋg-yoodre, la b wa n bãng-a-la wa ned sẽn tall tẽeb wʋsg ne a Zeova n lebg a balemda. (Hebre dãmba 11:30, 31) Moaab poak a Rut basa a wẽnnaam dãmbã n balem a Zeova la a tũ a Tõogã a sẽn da kõ Israɛll nebã. (Rut 1:14-17; 4:9-13) Pʋg-kãensã b yiibã fãa sẽn da pa Israɛll buudã nebã ‘kẽna wa sẽn zems ne Wẽnnaam goamã,’ tɩ kɩt tɩ b paam zu-no-kãseng n lebg a Zezi Kirist yaab rãmba.—Matɩe 1:1, 4-6.
7. Wãn-wãn la a Daniɛll ne a kom-bɩ-taas a tãabã kell n tall b tẽebã yɩlemd tɩ yaa mak-sõngo?
7 Yaa sɩd tɩ “ninsaalba sũya tagsg yaa wẽns hal b yãadem wakate,” la tɩ dũni wẽng kãnga bee a Sʋɩtãan nugẽ. La baa ne rẽ fãa, kom-bɩɩsã tõe n tũu sor sẽn zemse. (Sɩngre 8:21; 1 Zã 5:19) A Daniɛll ne a kom-bɩ-taas a tãabã sẽn yaa Hebre rãmbã sẽn da wa n be yembd Babilonnã, b kell n ‘kẽna wa sẽn zems Wẽnnaam goamã.’ Wala makre, b pa sak n dɩ ‘na-yira rɩɩbã’ n dẽgem b mens ye. (Daniɛll 1:6-10) Babilon nebã ra wãbda rũms a Moiiz Tõogã sẽn da gɩdg tɩ b ra rɩ ye. (Maankʋʋre 11:1-31; 20:24-26) B ra pa nong n koot rũms nins b sẽn kʋʋdã ye, la b sẽn da rɩt gɩfã kɩɩsda noor ning Wẽnnaam sẽn kõ zɩɩmã wɛɛngẽ wã. (Sɩngre 9:3, 4) Dẽnd pa lingr la Hebre rãmb a naasã sẽn da tõdg tɩ b pa na n dɩ na-yirã rɩɩbã ye. Kom-bɩ-kãensã sẽn yaa wẽn-sakdbã kell n talla b tẽebã yɩlemd tɩ yɩ mak-sõngo.
Wẽnnaam goamã sõngdame tɩ d kell n sak a Zeova
8. Manesem bʋgo, la bãng-bʋg la d segd n talle, d sã n dat n wʋm la d tũ Wẽnnaam tõodã?
8 Sẽn na yɩl n kell n sak a Zeova, d segd n nonga a goamã. (Yɩɩl Sõamyã 119:17-24) Tõnd sã n yaa wa ned ning b sẽn vẽneg t’a gʋls yɩɩn-kãngã wã, d na n data ne d sũur fãa n wʋm Wẽnnaam tõogã pʋgẽ ‘bõn-bãna’ võore. D na n data ‘a Zeova tõodã’ wakat fãa la d ‘nong a kasetã’ bɩ a saglsã. (Yɩɩl Sõamyã 119:18, 20, 24) Baa d sã n dɩka d meng n kõ a Zeova tɩ nan pa kaoose, rẽ yĩnga d ‘nonga Wẽnnaam koɛɛgã sẽn wẽnd wa bĩisim sẽn ka pulã’ bɩ? (1 Pɩɛɛr 2:1, 2) D segd n wʋma Biiblã zãms-yẽgã võor sẽn na yɩl n tõog n wʋm Wẽnnaam tõodã sõma la d tũ-ba.
9. D manesem segd n yɩɩ wãn to, ninsaalbã sã n kõ noor tɩ kɩɩsd Wẽnnaam noyã?
9 D tõe n nonga Wẽnnaam saglsã, la yaa wãn masã, “nanambs” sã n gomd tõnd yell wẽng bũmb poorẽ? (Yɩɩl Sõamyã 119:23, 24) Rũndã-rũndã, nanambs n mi n makd n dat n modg tõnd tɩ d lʋɩɩs ninsaalb noy taoore, tɩ Wẽnnaam noyã leb poorẽ. D manesem segd n yɩɩ wãn to, ninsaalbã sã n kõ noor tɩ kɩɩsd Wẽnnaam noyã? D sã n nong Wẽnnaam goamã, d na n kell n saka a Zeova. Wala a Zezi Kirist tʋm-tʋmdbã b sẽn da namsã, d na n yeela woto: “A zemsame tɩ tõnd sak Wẽnnaam n yɩɩd nebã.”—Tʋʋma 5:29.
10, 11. Rɩk-y makr n wilg d sẽn tõe n kell n sak a Zeova toog wʋsg pʋgẽ to-to.
10 Baa toog wʋsg pʋgẽ, d tõe n kell n saka a Zeova. (Yɩɩl Sõamyã 119:25-32) Sẽn na yɩl n tõog n kell n tall d burkĩndã ne Wẽnnaam, d segd n sakd n zãmsda Biiblã la d pʋʋsd-a ne d sũur fãa n kot a sor-wilgri. D leb n segd n yãka ‘sɩdã sore.’—Yɩɩl Sõamyã 119:26, 30.
11 A Ezekɩas b sẽn tẽed t’a yaa Yɩɩll Sõamyã 119 soabã gʋlsdã ra yãka ‘sɩdã sore.’ A yãka sɩdã sore, baa a sẽn da vɩ ne neb sẽn balemd ziri wẽnnaam dãmba. Tõe tɩ woto ra kɩtame tɩ na-yirã neb yaand-a. Wõnda yel-kãens n kɩt t’a ‘sũ-sãangã yĩnga, a ra pa tõe n gũsã.’ (Yɩɩl Sõamyã 119:28, NW ) La a Ezekɩas teega Wẽnnaam, a yɩɩ rĩm-sõngo, la a maana sẽn ‘tat a Zeova raabo.’ (2 Rĩm dãmba 18:1-5) Tõnd me sã n teeg Wẽnnaam, d tõe n kell n sak-a-la makr taoore.—Zak 1:5-8.
A Zeova goamã kõta raoodo
12. Wãn to la tõnd ned kam fãa tõe n tũ Yɩɩl Sõamyã 119:36, 37 wã?
12 D sã n tũud Wẽnnaam goamã sor-wilgri d paamda raood sẽn na yɩl n mao ne d daar fãa zu-loeesã. (Yɩɩl Sõamyã 119:33-40) D baooda ne sik-m-meng n na n bãng a Zeova raabã sẽn na yɩl n sak-a ‘ne d sũur fãa.’ (Yɩɩl Sõamyã 119:33, 34) Wa yɩɩl-gʋlsdã, d kota Wẽnnaam woto: ‘Kɩt-y tɩ m sũur datem zĩnd ne yãmb [saglgo], la ka ne paoong paasg sẽn paamd ne pãng ye.’ (Yɩɩl Sõamyã 119:36) Wala tʋm-tʋmd a Polle, d ‘rat n maana bũmb fãa tɩ zemse.’ (Hebre dãmba 13:18) Tʋʋmd taoor soab sã n wa rat tɩ d maan zãmbo, d modgdame n tũ Wẽnnaam noyã ne raoodo, bala a Zeova ningda manesem kãngã bark wakat fãa. A sõngd-d lame tɩ d tõe n mao ne d tʋls-wẽnsã. Rẽ yĩng bɩ d pʋʋs woto: “Bɩ y kɩt tɩ m wẽneg n da ges bõn-zaals ye.” (Yɩɩl Sõamyã 119:37) D pa tol n dat n ges bõn-zaalg Wẽnnaam sẽn kis wa bõn-sõng ye. (Yɩɩl Sõamyã 97:10) Yɛl a yiib pʋʋs-kãngã sẽn na n sõng-d tɩ d gil yaa yoobã la sʋɩtãan-tɩtã.—1 Korẽnt dãmba 6:9, 10; Wilgri 21:8.
13. Wãn to la a Zezi karen-biisã b sẽn da namsã paam raood n kõ kasetã n pa zoe rabeem?
13 D sã n bãng Wẽnnaam goamã sõma kengda d pɛlg tɩ d tõe n kõ kasetã ne raoodo. (Yɩɩl Sõamyã 119:41-48) La d sɩd rata raood sẽn na yɩl n ‘leok ned ninga sẽn kãnegd tõndo.’ (Yɩɩl Sõamyã 119:42) Wakat kãense, d tõe n yɩɩ wa a Zezi karen-biisã b sẽn namsã sẽn pʋʋs woto wã: ‘Zeova, . . . kõ-y yãmb tʋm-tʋmdba raood kãsenga tɩ b togs yãmb koɛɛgã.’ B sẽn pʋʋs woto wã, bõe n maane? ‘Bãmb fãa pida ne vʋʋsem sõngo. La bãmb togsa Wẽnnaam koɛɛga ne raoodo.’ Wala woto, a Zeova tõe n kõo tõnd me raood tɩ d moon a koɛɛgã n pa zoe rabeem ye.—Tʋʋma 4:24-31.
14. Bõe n sõngd tõnd tɩ d kõt kasetã ne raood wala a Polle?
14 D na n paama raood sẽn na yɩl n kõ kasetã n pa zoe yãnde, d sã n nong “sɩd goama” la d ‘sakd Wẽnnaam tõoga wakat fãa.’ (Yɩɩl Sõamyã 119:43, 44) Wẽnnaam Gomdã zãmsg wakat fãa na n sõnga tõnd tɩ d tõog n kɩs ‘kasetã rĩm dãmb taoore.’ (Yɩɩl Sõamyã 119:46) Pʋʋsgã la a Zeova vʋʋsem sõngã me na n sõng-d lame tɩ d bãng d sẽn na n leok ned kam fãa to-to tɩ zemse. (Matɩe 10:16-20; Kolos rãmba 4:6) A Poll wakatẽ wã, a kõo rĩm dãmb Wẽnnaam kasetã ne raoodo. Wala makre, a kõo Rom guvɛrneer a Feligs kasetã, t’a “kelg yẽ sẽn togs tẽeb ne Kirist Zezi wã sẽn yaa bũmb ninga.” (Tʋʋma 24:24, 25) A Poll leb n kõo kasetã guvɛrneer a Fɛstus la Rĩm a Agripa taoore. (Tʋʋma 25:22–26:32) Ne a Zeova sõngre, tõnd me tõe n yɩɩ koe-moondb sẽn tar daoodo, sẽn pa “zoet yãnd ne Koe-nooga ye.”—Rom dãmba 1:16.
Wẽnnaam goamã belsda tõndo
15. Nebã sã n wa yaand-d tɩ looge, wãn-wãn la Wẽnnaam Gomdã tõe n bels-do?
15 A Zeova goamã belsda tõnd wakat fãa. (Yɩɩl Sõamyã 119:49-56) Sasa n be tɩ yaa belsg bal la d rata. Baa d sẽn yaa a Zeova Kaset rãmb n kõt kasetã ne raoodã, “tɩtaam dãmba” bɩ neb nins sẽn wukd b mens Wẽnnaam taoorã mi n ‘yaanda tõnd tɩ looge.’ (Yɩɩl Sõamyã 119:51) La d sã n wa pʋʋsdẽ, d tõe n tẽega bõn-sõma nins yell b sẽn gomd Wẽnnaam Gomdã pʋgẽ wã n ‘paam belsgo.’ (Yɩɩl Sõamyã 119:52) D sã n wa tar zu-loɛɛga, d pʋʋsgã pʋgẽ d tõe n tẽega Biiblã noor sẽn kõt-d belsg la raood ning d sẽn datã.
16. Bõe la Wẽnnaam sõgen dãmba pa maand baa b sã n namsd-b b tẽebã yĩnga?
16 Tɩtaam dãmb nins sẽn da yaand yɩɩl-gʋlsdã ra yaa Israɛll sẽn yaa tẽng sẽn dɩk a meng n kõ Wẽnnaamã neba. Yãnd tek woto! Bɩ d ra maan wa bãmb ye, d ra bʋdg n bas Wẽnnaam tõogã lae-lae ye. (Yɩɩl Sõamyã 119:51) Wẽnnaam sõgen dãmb tusa sẽn nams Nazi rãmbã nusẽ la b reeg namsg a taab yʋʋm wʋsg pʋgẽ wã tõdgame tɩ b kõn bas Wẽnnaam tõodã la a noyã sẽn be a Gomdã pʋgẽ wã tũub ye. (Zã 15:18-21) A Zeova sakr pa zɩɩb ye, bala ne tõndo, a noyã yaa wa yɩɩn-noodo.—Yɩɩl Sõamyã 119:54; 1 Zã 5:3.
D tall mi-beoog ne a Zeova a goamã yĩnga
17. D sẽn nong Wẽnnaam goamã, kɩtame tɩ d maand bõe?
17 D wilgdame tɩ d tara mi-beoog d sẽn tar Wẽnnaam goamã, d sã n tũud-ba. (Yɩɩl Sõamyã 119:57-64) Yɩɩl-gʋlsdã ra yeelame t’a na n ‘saka a Zeova goamã,’ la tɩ baa ‘yʋʋn-sʋka yẽ yikdame n pʋʋsd Wẽnnaam bark a bʋʋda kaoob sẽn yaa tɩrga yĩnga.’ Tõnd me sã n wa nek yʋngo, yaa wakat sẽn zems d sẽn tõe n pʋʋs Wẽnnaam barka. (Yɩɩl Sõamyã 119:57, 62) D sẽn nong Wẽnnaam goamã yĩng kɩtame tɩ d baoodẽ t’a zãms-do, la d lebgd ‘neb nins fãa sẽn zoet Wẽnnaam a Zeova wã tũud-n-taase,’ tɩ rẽ wat ne sũ-noogo. (Yɩɩl Sõamyã 119:63, 64) D pa tõe n paam tũud-n-taas sẽn yaa sõma n yɩɩd nin-kãensã tẽngã zug ye.
18. Wãn to la a Zeova leokd tõnd pʋʋsgã, ‘nin-wẽnsã tãoos sã n wa gũbg tõndo’?
18 D sã n wa pʋʋsd ne d sũur fãa la ne sik-m-meng t’a Zeova zãms-do, ‘d kot-a a barka,’ n saagdẽ tɩ d na n paama a lohorem. Sẽn yɩɩd fãa, ‘nin-wẽnsã tãoos sã n wa gũbg tõndo’ d segd n pʋʋsame. (Yɩɩl Sõamyã 119:58, 61) A Zeova tõe n yiisa tõnd d bɛɛbã tãoos sʋka, sẽn na yɩl tɩ d ket n moond a Rĩungã koe-noog la d maand karen-biisã. (Matɩe 24:14; 28:19, 20) D yãa a Zeova sẽn maan rẽ naoor wʋsg tẽns nins pʋsẽ b sẽn da gɩdg tõnd tʋʋmdã.
Tẽ-y Wẽnnaam goamã
19, 20. Bõe yĩng tɩ tõe n yɩ sõma tɩ d namse?
19 D sã n tẽed Wẽnnaam la a goamã, sõng-d lame tɩ baa toog pʋgẽ bɩ d ket n maand a raabã. (Yɩɩl Sõamyã 119:65-72) Baa tɩtaam dãmbã sẽn da yagd ziri n sãamd yɩɩl-gʋlsdã yʋʋrã, a yɩɩla woto: “Yaa sõama tɩ mam namse.” (Yɩɩl Sõamyã 119:66, 69, 71) Bõe yĩng tɩ tõe n yɩ sõma t’a Zeova sõgen namse?
20 D sã n wa namsdẽ, yaa vẽeneg tɩ d na n pʋʋsa a Zeova ne d sũur fãa, la rẽ na n kɩtame tɩ d pẽneg-a n paase. D leb n tõe n dɩka sẽk wʋsg n paas n zãms Wẽnnaam Gomdã la d mao n tũ bũmb ning d sẽn zãmsã, tɩ rẽ maaneg kõt-d sũ-noogo. La yaa wãn to masã, namsgã sã n kɩt tɩ d bãng tɩ d tara zamse, wala maag-m-meng kaalem la wuk-m-mengã? D sã n pʋʋs ne d sũur fãa n paam Wẽnnaam Gomdã la a vʋʋsem sõngã sõngre, d tõe n tõoga pãn-komsem kãense, la d tall kiris-ned zʋg-sõmã wã n paase. (Kolos rãmba 3:9-14) Sẽn paase, tõnd sã n mao ne makre, d tẽebã paasdame. (1 Pɩɛɛr 1:6, 7) Namsgã nafa a Polle, bala kɩtame t’a teeg a Zeova n paase. (2 Korẽnt dãmba 1:8-10) Rẽ yĩnga tõnd me maandame tɩ d namsgã nafd-d bɩ?
Rell-y a Zeova wakat fãa
21. Wẽnnaam sã n ningd tɩtaam dãmbã yãnde, wata ne bõe?
21 Wẽnnaam goamã kõt-d-la bas-yard hakɩk tɩ d tõe n teeg a Zeova. (Yɩɩl Sõamyã 119:73-80) Tõnd sã n sɩd teega d Naandã, d pa tog n zoe yãnd ye. Baasg zãnga, nebã sẽn maan-d to-to wã kɩtame tɩ d rat belsgo, tɩ d tõe n wa rat n pʋʋs n kos tɩ ‘tɩtaam dãmbã paam yãnde.’ (Yɩɩl Sõamyã 119:76-78) A Zeova sã n ningd nin-kãensã yãnde, kɩtdame tɩ b tʋʋm-wẽnsã lebgd vẽenega, t’a yʋʋrã paamd waoogre. D tõe n kɩsa sɩd tɩ neb nins sẽn namsd Wẽnnaam nin-buiidã sɩd pa nafd ye. Wala makre, b pa tõoge, la b pa na n tol n tõog n menems a Zeova Kaset rãmbã sẽn teeg Wẽnnaam ne b sũur fãa wã abada.—Yelbũna 3:5, 6.
22. Wãn to la yɩɩl-gʋlsdã yɩ wa “ko-waoog sẽn yag bug-zõosẽ”?
22 Wẽnnaam goamã kɩtdame tɩ b sã n wa namsd tõnd d tẽebã yĩng bɩ d teegd Wẽnnaam n paasdẽ. (Yɩɩl Sõamyã 119:81-88) Tɩta-nebã sẽn da wa n namsd yɩɩll-gʋlsdã, kɩtame t’a ra wõnd “ko-waoog sẽn yag bug-zõosẽ.” (Yɩɩl Sõamyã 119:83, 86) Pĩnd wẽndẽ wã, b ra tara ko-waoosã n suiid koom, divẽ, la yɛl a taaba. B sã n da wa pa tʋmd ne ko-waoog n yagl-a roog pʋgẽ n pẽneg bugum, bug-zõosã wusd-a lame t’a wẽgme. Rẽ yĩnga zu-loeesã bɩ namsgã zɩ n kɩt tɩ yãmb wõnd “ko-waoog sẽn yag bug-zõosẽ” sɩda? Sã n wa yaa woto bɩ y teeg a Zeova la y pʋʋs woto: “Bɩ y kõ maam vɩɩm wa sẽn zems yãmb nonglma, la mam na n saka yãmb noora kaseto.”—Yɩɩl Sõamyã 119:88.
23. Yel-bʋs la d vaees Yɩɩl Sõamyã 119:1-88 pʋgẽ, la d sẽn na n wa vaees Yɩɩl Sõamyã 119:89-176 wã yinga, bõe la tõnd ned kam fãa segd n soka a menga?
23 Tõnd sẽn vaees Yɩɩl Sõamyã 119 soabã verse a 1 n tɩ ta 88 wã, d yãame t’a Zeova wilgda a nonglmã a sõgen dãmbã, b sẽn teegd a goamã la b nong a noyã, a soayã la a tõodã. (Yɩɩl Sõamyã 119:16, 47, 64, 70, 77, 88) A sũur yaa noogo, neb nins sẽn kɩs sɩd ne-a wã sã n kẽnd wa sẽn zems a goamã. (Yɩɩl Sõamyã 119:9, 17, 41, 42) D sẽn gẽegd n na n vaees yɩɩn-kãngã sẽn kengd raoodã n baasã, tõnd ned kam fãa segd n soka a meng woto: ‘Rẽ yĩnga mam basdame t’a Zeova goamã yɩ m sor vẽenem bɩ’?
[Tẽngr note]
^ sull 2 Yaa a Zeova koees nins sẽn be yɩɩn-kãngã pʋgẽ wã bal yell la b sẽn gomd zĩ-kãensã wã, pa Wẽnnaam Gomdã sẽn yaa Biiblã tõrã yell ye.
Wãn to la y na n leoke?
• Bõe n kõt ned sũ-noog hakɩkã?
• Wãn to la a Zeova goamã kɩtd tɩ tõnd kell n yɩ yɩlem tẽebã wɛɛngẽ?
• Wãn to la Wẽnnaam goamã kõt tõnd raood la belsgo?
• Bõe yĩng tɩ d segd n tẽ a Zeova la a goamã?
[Zãmsgã sogsgã]
[Foto rãmba, seb-neng a 4]
A Rut, a Rahaab, la Hebre kom-bɩɩsã sẽn da be yembd Babilonnã ‘kẽna wa sẽn zems ne Wẽnnaam goamã’
[Foto, seb-neng a 5]
A Poll kɩsa kaset n gom Wẽnnaam tõoda yell ne raood rĩm dãmb taoore