Vʋʋgrã yaa zãmsg sẽn tar pãng yãmb zugu
Vʋʋgrã yaa zãmsg sẽn tar pãng yãmb zugu
“Mam tara tẽeb kãng ne Wẽnnaam . . . tɩ kũum fãa na n vʋʋgame, [neb nins sẽn pa tɩrsã, NW ] ne nin-tɩrsa fãa.”—TƲƲMA 24:15.
1. Wãn to la vʋʋgrã lebg no-koeemd bʋ-kaoodbã sull taoore?
TƲM-TƲMD a Poll misioneer so-toak a tãab-n-soabã saa yʋʋmd 56, la rẽ t’a ra bee Zerizalɛm. Rom dãmbã sẽn wa n yõk-a wã poore, b ra kõ-a-la sor t’a kẽng Zʋɩf rãmbã bʋ-kaoor sul-kãseng b sẽn da boond tɩ Sãnedrẽ wã taoore. (Tʋʋma 22:29, 30) A Poll sẽn ges bʋ-kaoodbã, a yãame tɩ kẽer yaa Sadiseẽ rãmb tɩ sãnda yaa Fariziẽ rãmba. Yel-kãseng a to pʋgẽ me la sul-kãensã b yiibã yaa toor ne taaba. Sadiseẽ rãmbã ra pa tẽed vʋʋgrã ye, la Fariziẽ rãmbã ra tẽed-a lame. Sẽn na yɩl n wilg t’a tẽeda vʋʋgrã, a Poll togsa woto: “Raopa la ba-biisi, mam yaa Fariziẽ la Fariziẽ biiga. Mam sẽn tẽed tɩ kũum na n vʋʋgame wã yĩng n kɩt tɩ yãmb bʋʋd ne maam masã.” A sẽn gom woto wã, no-koeemd n yik kʋʋngã sʋka.—Tʋʋma 23:6-9.
2. Bõe yĩng t’a Poll ra segl n na n wilg bũmb ning sẽn kɩt t’a tẽed vʋʋgrã?
2 Yʋʋm wʋsg sẽn deng rẽ, a Poll sẽn da wa n digd Damasã, vẽnegr pʋgẽ, a wʋma a Zezi koɛɛga. A Poll soka a Zezi menga: “Zusoaba, m maan bõe?” T’a Zezi leoke: “Yik n kẽng Damas, la be, b na n wilga foom bũmb nins fãa fo sẽn tog n maane.” A Poll sẽn ta Damasã, kiris-ned a Ananias yã-a lame n sõng-a la a wilg woto: “Tõnd yaab rãmba Wẽnnaam yãka yãmb tɩ y bãng bãmb daabo, la y yã Tɩrg Soabã [a Zezi sẽn vʋʋgã], la y wʋm bãmb noor goama.” (Tʋʋma 22:6-16) Rẽnd pa lingr la a Poll sẽn segl n na n wilg bũmb ning sẽn kɩt t’a tẽed vʋʋgrã ye.—1 Pɩɛɛr 3:15.
A moona vʋʋgrã saagr zãma wã taoore
3, 4. Wãn to la a Poll sɩd teel vʋʋgrã sõma, la bõe la a mak-sõngã tõe n zãms tõndo?
3 Kaoosg poore, b talla a Poll n wa Guvɛrneer a Feligs taoore. Sasa kãnga, a Tɛrtull “sẽn yaa gom-minim soaba” sẽn wa n gomd n sõngd Zʋɩf rãmbã rõda a Poll t’a yaa tũudum will taoor soaba, sẽn wat ne tẽn-dãmbgo. A Poll leoka woto vẽenega: “Mam togsda yãmb vẽenega tɩ bãmb sẽn yet tɩ yaa ne tẽeb toor la mam pʋʋsd tõnd yaab rãmba Wẽnnaama, mam maanda woto.” Rẽ poore, a lebg n goma vʋʋgrã yell n paase: “Mam tara tẽeb kãng ne Wẽnnaam wa mam dõatba me sẽn tarã tɩ kũum fãa na n vʋʋgame, [neb nins sẽn pa tɩrsã, NW ] ne nin-tɩrsa fãa.”—Tʋʋma 23:23, 24; 24:1-8, 14, 15.
4 Sẽn zems yʋʋm a yiib poore, a Porsius Fɛstus sẽn deeg a Feligs zĩigã boola rĩm a Herood Agripa t’a wa tɩ b kelg a Poll b sẽn da ning bãens roogẽ wã. A Fɛstus togsame t’a Poll kɩɩsdbã yeelame t’a sẽn yet tɩ “ned a yembr sẽn boond t’a Zezi sẽn da ki . . . sɩd vɩɩme” wã pa sɩd ye. Sẽn na yɩl n wilg a bʋʋmã, a Poll soka woto: “Yaa toog ne yãmba tɩ y tẽ tɩ Wẽnnaam vʋʋgda kũum bɩ?” Rẽ poore a leokame: “Wẽnnaam sõngr yĩnga, mam ket n taa rũnda n kɩt kaset nin-talse ne nin-kãsems sʋka. La mam ka togsd bũmb a to ye, sã n ka Wẽnnaam no-rɛɛsdba ne a Moiiz sẽn da yeel t’a na n waame wã bala. B yeelame tɩ yaa tɩlae tɩ Kirist namse la b yɩ dẽenem soab n vʋʋge, la bãmb na n kõo Zʋɩf rãmba ne bu-zẽms vẽenem.” (Tʋʋma 24:27; 25:13-22; 26:8, 22, 23) A Poll sɩd ra teenda vʋʋgrã hal sõma! Wala a Polle, tõnd me tõe n moona ne bas-yard tɩ vʋʋgr n na n zĩndi. La d segd n gũume tɩ nebã tall manesem bʋgo? Wala manesem ning nebã sẽn tall ne a Pollã.
5, 6. a) Tʋm-tʋmdbã sẽn gom vʋʋgrã yellã kɩtame tɩ nebã tall manesem bʋgo? b) D sã n wa wilgd d tẽeba sẽn tɩ loe ne vʋʋgrã, bõe n yaa tɩlae ne-do?
5 Ges-y bũmb ning sẽn zĩndi, a Poll misioneer so-toak a yiib-n-soabã sɩngrẽ, (yʋʋmd 49-52 sẽnese), a sẽn kẽng Atɛnnã. A kɩtame tɩ neb sẽn da tẽed wẽnnaam dãmb wʋsg tags neere, la a sagl-b tɩ b bãng tɩ Wẽnnaam na n kaoa dũniyã gill neb bʋʋd ne tɩrlem, ne rao ning a sẽn yãkã maasem. Ra-kãng pa ned a to n zʋʋg a Zezi ye. A Poll wilgame tɩ Wẽnnaam vʋʋga a Zezi sẽn na yɩl n kõ kaset tɩ rẽ yaa waaziba. Nebã manesem yɩɩ wãn to? D karemdame: “Bãmb sẽn wʋm kũum vʋʋgr koɛɛgã, kẽer yaala bãmba. La neb a taaba yeelame: ‘Tõnd na n leb n kelga yãmb nindaar ne koe-kãnga.’ ”—Tʋʋma 17:29-32.
6 Manesem kãng yaa yembr ne manesem ning a Pɩɛɛr la a Zã sẽn da seg yʋʋmd 33 Pãntekotã poor bilfã. Sasa kãng me, Sadiseẽ rãmbã no-koeemd n yɩɩg neb a taabã. Tʋʋma 4:1-4 wilgda bũmb ning sẽn maanã: “A Pɩɛɛr ne a Zã sẽn ket n gomd ne nebã, maan-kʋʋdba ne neb nins sẽn get Wẽnnaam dooga yella kãsma la Sadiseẽ dãmba waa bãmb nengẽ. Bãmb sũy puuga ne a Pɩɛɛr dãmb b sẽn zãmsd neba la b moond kũum vʋʋgr koɛɛga ne a Zezi yʋʋra yĩnga.” La neb a taab saka koɛɛgã. “Neb wʋsg sẽn wʋm Wẽnnaam koɛɛgã, bãmb tẽeme; daop sẽn tẽ kolga tus a nu.” D tõe n gũume tɩ nebã tall manesem toor-toore, d sã n wa gomd vʋʋgrã yelle. Rẽ kɩtame tɩ tar yõod wʋsg tɩ d tẽ vʋʋgrã n paase.
Tẽebã, la vʋʋgrã
7, 8. a) Wala b sẽn wilg lɛtr ning b sẽn taas pipi yʋʋm kob-gĩndẽ Korẽnt tigingã, wãn to la tẽeb tõe n yɩ zaalem? b) Wãn to la vʋʋgrã saagr võor wʋmb sõma welg kiris-neb hakɩkã toore?
7 Pa neb nins fãa sẽn lebg kiris-neb pipi yʋʋm kob-gĩndẽ wã n sak n tẽ vʋʋgrã nana-nana ye. Neb nins sẽn da pa sak n tẽ vʋʋgrã nana wã kẽer da bee Korẽnt tigingã pʋgẽ. A Poll gʋls-b-la woto: “Mam zãmsa yãmb wa mam me sẽn da reegã, tɩ Kirist kii tõnd yel-wẽna yĩnga a wa Gʋlsg Sõamyã sẽn yetã. La b muma bãmba, la dasem a tãab raare bãmb vʋʋga wa Gʋlsg Sõamyã sẽn yeelã.” Rẽ poore, a Poll wilgame tɩ sɩd yɩɩ woto, n yeel tɩ Kirist sẽn vʋʋgã a ‘vẽnega a meng ne ba-biis sẽn yɩɩd kobs-nu,’ la a paas tɩ bãmb wʋsg ra ket n vɩɩme. (1 Korẽnt dãmba 15:3-8) A le kɩtame tɩ b tags woto n paase: “B sã n moondẽ tɩ Kirist vʋʋgame, yaa bõe tɩ yãmb neb kẽer yetẽ tɩ kũum vʋʋgr ka be? Kũum vʋʋgr sã n ka beẽ, dall Kirist me ka vʋʋg ye. La Kirist sã n ka vʋʋge, tõnd koe-moonega yaa zaalem, la yãmb tẽeba me yaa zaalem.”—1 Korẽnt dãmba 15:12-14.
8 Sɩda, vʋʋgrã yaa zãmsg sẽn tar yõod wʋsg hal tɩ kɩt tɩ kiris-nebã sã n da pa sakẽ vʋʋgrã wa yel-sɩda, b tẽebã fãa yaa zaalem. Sɩda, vʋʋgrã võor wʋmb sẽn zemsã welgda kiris-neb hakɩkã toor ne ziri kiris-nebã. (Sɩngre 3:4; Ezekɩɛll 18:4) Woto, a Poll leb n wilgame tɩ vʋʋgrã zãmsg bee kiris-nedemd “koɛɛga tõnd sẽn sɩng n zãms pĩndã” pʋgẽ. Bɩ d rɩk sard sẽn pa vigsd n modg n bɩ tẽebã pʋgẽ. A Poll yeelame tɩ: “La Wẽnnaam sã n sake, tõnd na maan yõwã.”—Hebre dãmba 6:1-3.
Vʋʋgrã saagre
9, 10. Biiblã sã n gomd vʋʋgrã yelle, a rat n yeelame tɩ bõe?
9 Sẽn na yɩl n paas d tẽebã ne vʋʋgrã, bɩ d lebg n ges sogsg wala bãmbã: Biiblã rat n yeelame tɩ bõe, a sã n gomd vʋʋgrã yelle? Wãn to la vʋʋgrã zãmsg wilgd a Zeova nonglmã sõma? Sogs-kãensã leoor na n pẽnega tõnd ne Wẽnnaam, la sõng-d tɩ d zãms neb a taab tɩ b tẽ vʋʋgrã.—2 Tɩmote 2:2; Zak 4:8.
10 Gɛrk goam pʋgẽ, “vʋʋgrã” yaa gom-biig sẽn dat n yeel tɩ “yik n yals yɛsa.” Gom-kãngã võor yaa bõe? Sã n yaa ne Biiblã, vʋʋgrã saagr yaa tẽ ne kɩs-sɩd tɩ ned sẽn ki tõe n ye vɩɩmdame. Biiblã wilgdame me tɩ neb nins sẽn tar tẽng zug vɩɩmã saagr vʋʋgdame n ket n yaa ninsaalb n tar yĩn-nemse, tɩ sẽn tar b saasẽ vɩɩmã saagr vʋʋgd ne malɛgs yĩnsi. A Zeova nonglmã, a yamã la a pãngã sẽn puk ne vʋʋgrã saagr sẽn yaa bõn-kãsengã sɩd bee yamleoog wʋsg ne tõndo!
11. Vʋʋg-bʋg la Wẽnnaam sõgen dãmb nins sẽn paam vʋʋsem sõng zaeebã na n paame?
11 A Zezi ne a ba-biisã sẽn paam vʋʋsem sõng zaeebã vʋʋga ne malɛgs yĩnsi, tɩ rẽ kɩt tɩ b tõe n tʋm tʋʋmd ning b sẽn tar saasẽ wã. (1 Korẽnt dãmba 15:35-38, 42-53) B na n naaga taab n dɩ naam Mesi Rĩungã sẽn na n wa ne arzãn tẽngã zugã pʋgẽ. Sẽn paam-b vʋʋsem sõng zaeebã na n yɩɩ rĩm dãmb la maan-kʋʋdba, a Zezi sẽn yaa Maankʋʋd Kãsmã sor-wilgr pʋgẽ. B na n kɩtame tɩ Kirist maoongã sẽn yaa rondã naf ãdem-biisã dũni paalgã sẽn yaa tɩrgã pʋgẽ. (Hebre dãmba 7:25, 26; 9:24; 1 Pɩɛɛr 2:9; Wilgri 22:1, 2) La nananda, sẽn paam-b vʋʋsem sõng zaeebã sẽn ket n be tẽng zugã tʋllame n ket n tat Wẽnnaam yam. B sã n wa ki b na n paama b “keoorã,” b sẽn na n vʋʋg n paam yĩng sẽn wõnd malɛgsã rẽnd saasẽ, la b ye pa tõe n ki wã. (2 Korẽnt dãmba 5:1-3, 6-8, 10; 1 Korẽnt dãmba 15:51, 52; Wilgri 14:13) A Poll gʋlsame: “Hakɩɩka, tõnd sã n lebg yembr ne bãmb b kũuma pʋgẽ, tõnd na n lebga yembr ne bãmb b vʋʋgra me pʋgẽ.” (Rom dãmba 6:5) La yaa wãn to ne ninsaalb nins sẽn na n vʋʋg tẽngã zugã? Wãn to la vʋʋgrã saagr tõe n pẽneg-b ne Wẽnnaam n paase? A Abrahaam mak-sõngã tõe n zãmsa tõnd yɛl wʋsgo.
Vʋʋgrã, la zood ne a Zeova wã
12, 13. A Abrahaam da tara tik-bʋg sẽn tar pãng wʋsg n na n tẽ vʋʋgrã?
12 A Abrahaam b sẽn bilg wa ‘a Zeova zoa’ wã ra yaa rao sẽn da tar tẽeb wʋsgo. (Zak 2:23) A Poll goma a Abrahaam tẽebã yell naoor a tãabo, a sẽn wa n gomd tẽeb rap la pagb kɩbar sẽn gʋls Hebre sak 11 soabã pʋgẽ wã yellã. (Hebre dãmba 11:8, 9, 17) Tãab-n-soabã, a goma a Abrahaam sẽn wilg tẽeb ningã yelle, a sẽn sak n dɩk a biribl a Izaak n na n maan maoongã. A Abrahaam da kɩsa sɩd t’a Zeova sẽn kãab tɩ yageng n wat ne a Izaak maasmã ra yaa waaziba. Baa a Izaak sã n da segd n ki tɩ yɩ maoongo, a Abrahaam “tẽeme tɩ Wẽnnaam tara pãng [n tõe n] vʋʋg kũum.”
13 Wala yɛlã sẽn yɩ to-to wã, a Zeova sẽn wa n yã a Abrahaam tẽebã pãng sẽn ta zĩig ningã, a kõ-a-la rũng t’a kʋ maoongã n ledg biigã zĩigẽ. Baasg zãnga, a Izaak sẽn vɩɩmd yell ningã ra makda vʋʋgrã wa a Poll sẽn wilgã: “Yẽ [a Abrahaam] sẽn leb n deeg a biigã [a Izaakã], wẽnda wa kũum vʋʋgre.” (Hebre dãmba 11:19) Sẽn paase, a Abrahaam da zoe n tara tikr sẽn tar pãng n na n tẽ vʋʋgrã. Rẽ yĩnga a Zeova ra pa zoe n kɩt t’a Abrahaam le tõog n paam dogem, yẽ ne a pag a Saara sẽn da kʋʋlã sẽn wa n lagem taab n dog b biribl a Izaakã sɩda?—Sɩngre 18:10-14; 21:1-3; Rom dãmba 4:19-21.
14. a) Sã n yaa ne Hebre dãmba 11:9, 10, bõe la a Abrahaam da gũuda? b) Sẽn na yɩl n paam Rĩungã bark dũni paalgã pʋgẽ, bõe la a Abrahaam le segd n paame? d) Segd n tũu ne bõe tɩ tõnd paam Rĩungã barka?
14 A Poll bilga a Abrahaam wala sãan sẽn da tɩ tilg tẽn-zẽng n be fu-rotẽ, n da ‘gũud galʋ-tẽng sẽn tar yẽbgr sõma, a tãn-meta ne a naanda sẽn yaa Wẽnnaam.’ (Hebre dãmba 11:9, 10) Ra pa galʋ-tẽng sɩd-sɩd wala Zerizalɛm Wẽnnaam doogã sẽn da beẽ wã ye. Ayo, galʋ-tẽn-kãngã ra yaa makr wɛɛngẽ galʋ-tẽngã. Ra yaa Wẽnnaam saasẽ Rĩungã, t’a nanambsã yaa a Zezi Kirist ne neb 144 000. Neb 144 000 sã n wa be b ziirã pʋgẽ saasẽ, b yetame me tɩ b yaa “tẽn-sõngo sẽn yaa Zerizalɛm paalga,” sẽn yaa Kirist ‘pʋg-paalã.’ (Wilgri 21:2) Yʋʋmd 1914, a Zeova zĩniga a Zezi t’a yaa Rĩm sẽn yaa Mesi saasẽ Rĩungã pʋgẽ, la a kõ-a noor t’a rɩ naam a bɛɛbã sʋka. (Yɩɩl Sõamyã 110:1, 2; Wilgri 11:15) Sẽn na yɩl n paam Rĩungã naam barka, na n yɩɩ tɩlae tɩ “Wẽnnaam zoa” a Abrahaam le vɩɩmde. Woto me, sẽn na yɩl tɩ tõnd paam Rĩungã barka, d segd n zĩnda Wẽnnaam dũni paalgã pʋgẽ kʋʋn-kãsengã neb sẽn põs Armagedõ wã sʋka, bɩ neb nins b sẽn na n vʋʋgã sʋka. (Wilgri 7:9, 14) La vʋʋgrã saagr tika bõe zugu?
Vʋʋgrã saagr tika Wẽnnaam nonglmã zugu
15, 16. a) Wãn to la Biiblã pipi bãngr-gomd yaa tikr ning sẽn kɩt tɩ d tõe n tẽ vʋʋgrã saagrã? b) Tõnd sã n tẽed vʋʋgrã, wãn to la rẽ tõe n pẽneg tõnd ne a Zeova n paase?
15 Tõnd zems-n-taarã sẽn tar pãng ne d saasẽ Ba wã sẽn tar nonglmã, tõnd tẽebã sẽn tar pãng wala a Abrahaam tẽebã buudã, la tõnd sẽn sakd Wẽnnaam noyã kɩtdame t’a Zeova tõe n yeel tɩ d yaa tɩrse, la a tõe n get-d wa a zo-rãmba. Rẽ kɩtame tɩ d tõe n paam n dɩ Rĩungã naam nafa. Sɩda, pipi bãngr-gomd ning b sẽn gʋls Wẽnnaam Gomdã pʋgẽ Sɩngre 3:15 pʋgẽ wã kõta tikr ning sẽn kɩt tɩ d tõe n tẽ kũum vʋʋgrã, la d tall zood ne Wẽnnaamã. Bãngr-gom-kãng togsdame tɩ b na n pogla a Sʋɩtãan zugã, la tɩ b na n pogla Wẽnnaam makr wɛɛngẽ pagã yageng me a na-kãsenkãarẽ wã. A Zezi sẽn ki ra-luk zugã ra makda b sẽn pogl-a a na-kãsenkãarẽ wã. A vʋʋgrã rasem a tãab-n-soab daarã maaga sãmpog-kãngã, la kɩt t’a na n zab ne “Sʋɩtãana sẽn so kũuma pãnga.”—Hebre dãmba 2:14.
16 A Poll tẽegda tõnd tɩ “Wẽnnaam wilga bãmb nonglem tõnd yĩnga, tɩ tõnd sẽn da ket n yaa yel-wẽna rãmba Kirist kii tõnd yĩnga.” (Rom dãmba 5:8) D sã n nand lohorem kãngã d sẽn pa segd ne wã, sɩd pẽnegda tõnd ne a Zezi la ne d saasẽ Ba sẽn tar nonglmã n paase.—2 Korẽnt dãmba 5:14, 15.
17. a) A Zoob wilgame t’a tara saag-bʋgo? b) Bõe la Zoob 14:15 wilgd a Zeova zugu, la rẽ kɩtdame tɩ d tagsg yɩ wãn to?
17 A Zoob sẽn yɩ wẽn-sakd sẽn deng kiris-nebã zãmaanã me ra gẽegda vʋʋgrã. A namsa wʋsg a Sʋɩtãan nugẽ. A Zoob pa maan wala a ziri zo-rãmbã sẽn pa gom vʋʋgrã yell lae-lae wã ye. A paama belsg ne saag-kãng n sok woto: “Ned sã n ki, a tõe n le vʋʋgame bɩ?” A Zoob leoka a meng n yeele: “A sã n da yaa woto, mam da na n yaasame hal tɩ m tooga sɛ.” A goma ne a Wẽnnaam a Zeova n yeel woto: “Yãmb sã n bool maam, mam na n sakame.” A Zoob yeela tõnd Wẽnnaam sẽn tar nonglmã tagsg sẽn ki-bã wɛɛngẽ woto: “La y na n nonga maam tɩ m yaa y nug-tʋʋmde.” (Zoob 14:14, 15) N-ye, a Zeova sɩd rata ne a sũur fãa tɩ wẽn-sakdbã vʋʋge. Ad rẽ sɩd pẽnegda tõnd ne-a, d sã n bʋgsd nonglem ning a sẽn wilg ne tõnd la lohorem ning d sẽn pa segd ne wã a sẽn maan tõndã, baa ne d sẽn pa zems zãngã!—Rom dãmba 5:21; Zak 4:8.
18, 19. a) Saag-bʋg la a Daniɛll da tara? b) Bõe la d na n leb n yã sõsg ning sẽn pʋgdã pʋgẽ?
18 No-rɛɛs a Daniɛll Wẽnnaam malɛkã sẽn bool tɩ ‘nin-nongrã’ yõor yɩɩ wok la a kell n yɩɩ wẽn-sakda. (Daniɛll 10:11, 19) A kell n talla a burkĩndã a Zeova taoore, hal a sẽn kẽng yembdã wakat yʋʋmd 617 sẽn deng Kirist zãmaanã n tɩ tõk a kũumã yʋʋmd 536 sẽn deng Kirist zãmaanã a sẽn wa n paam vẽnegrã poore, Pɛrs rĩm a Sirus naamã yʋʋm a tãab-n-soabã sasa. (Daniɛll 1:1; 10:1) A Sirus naamã reegr yʋʋm a tãab-n-soabã sasa, a Daniɛll paama vẽnegr sẽn tɩ loe ne dũni gill pãn-soaadbã sẽn led taab tɩ na n tɩ baas ne to-kãsengã sẽn watã. (Daniɛll 11:1–12:13) A Daniɛll sẽn da pa tõe n wʋm yãabã võor sõma wã, a soka malɛk ning sẽn taas-a koɛɛgã woto: “M soaba, bõn-kãens baasg na n yɩɩ bõe?” Malɛkã leok-a lame n gom ‘sɛɛba wakat’ yelle, la a wilg-a tɩ yaa ‘yam dãmbã n na n bãnge.’ A Daniɛll mengã saagr da yaa bõe? Malɛkã sak n deega woto: “Bɩ f kẽng n ta f tɛk raar n vʋʋse. La fo na n vʋʋgame n deeg f zĩig wakata sɛɛb raare.” (Daniɛll 12:8-10, 13) A Daniɛll na n lebg n waa “nin-tɩrsa vʋʋgr wakate,” Kirist yʋʋm tusr Naamã sasa.—Luk 14:14.
19 Tõnd pẽnega saabã, la d kolga Kirist yʋʋm tusr Naamã sɩngr n yɩɩd sasa ning tõnd sẽn wa n lebg tẽedbã. Woto yĩnga, d segd n soka d mense: ‘M na n kẽe dũni paalgã pʋgẽ n paam n zĩnd ne a Abrahaam, a Zoobe, a Daniɛll la rap la pagb a taab sẽn yɩ wẽn-sakdbã bɩ?’ D na n zĩnda be, d sã n ket n pẽ a Zeova la d sakd a noyã. D sõsg ning sẽn pʋgdã pʋgẽ, d na n lebg n gesa vʋʋgrã saagr n paase, sẽn na yɩl n bãng neb nins sẽn na n vʋʋgã.
Y tẽrame bɩ?
• A Poll sẽn wa n wilg t’a tẽeda vʋʋgrã, nebã talla manesem bʋgo?
• Bõe yĩng tɩ vʋʋgrã saagr welgd kiris-neb hakɩkã toor ne ziri kiris-nebã?
• Wãn to la d mi t’a Abrahaam, a Zoob la a Daniɛll da tẽeda vʋʋgrã?
[Zãmsgã sogsgã]
[Foto, seb-neng 15]
Naab a Feligs taoore, a Poll moona vʋʋgrã saagr ne kɩs-sɩda
[Foto, seb-neng 16]
Bõe yĩng t’a Abrahaam da tẽed vʋʋgrã?
[Foto, seb-neg 18]
Vʋʋgrã saagr kõo a Zoob belsgo
[Foto, seb-neng 18]
A Daniɛll na n leb n vɩɩmda nin-tɩrsã vʋʋgr wakate