‘Tall-y sũ-mar’ wẽng taoore
‘Tall-y sũ-mar’ wẽng taoore
‘Zusoaba tʋm-tʋmd ka tog n maan zabr ye. A tog n yɩɩ sũ-bʋgsem soab ne neba fãa . . . la a maand sũ-mare.’—2 TƖMOTE 2:24.
1. Bõe yĩng tɩ d koe-moonegã sasa d mi n segd neb sẽn gomd-d ne sũ-yikri?
NEB sã n pa nong yãmb wall b pa nong y sẽn yaa bũmb ningã, y maanda wãna? Tʋm-tʋmd a Poll sẽn deng n bilg yaoolem dayã sẽn na n yɩ to-to wã, a yeelame tɩ nebã na n yɩɩ “Wẽnnaam tʋʋsdba, . . . tẽn-kãn-neba, neb sẽn ka tar yõk-m-menga, pʋto-rãmba.” (2 Tɩmote 3:1-5, 12) Y tõe n sɛga nin-kãensã buud y koe-moonegã wakat wall zĩis a taaba.
2. Verse bʋs n tõe n sõng-d tɩ d bãng manesem ning d sẽn na n tall ne neb nins sẽn gomd-d ne sũ-yikrã?
2 La pa neb nins sẽn gomd tõnd ne sũ-yikrã fãa n pa nong tɩrlem ye. Zu-loees bɩ sũ-sãams sẽn loog nug tõe n kɩtame tɩ ned tiig n gom a taab ne sũ-yikri. (Koɛɛg Soaba 7:7) Wʋsg sẽn gomd b taab ne sũ-yikrã yaa b sẽn beẽ wã la b tʋʋmã zĩisẽ neb sẽn nong n gomd taab woto wã. Rẽ pa kɩtd tɩ kiris-nebã ges gom-kãensã buud wala bũmb sẽn zems ye, la sõngd-d lame tɩ d wʋm neb kẽer sẽn gomd woto wã võore. Ned sã n wa gomd-d ne sũ-yikri, d segd n maana wãn to? Yelbũna 19:11 yeelame tɩ “yam soab sũur ka yikd tao-tao ye.” Tɩ Rom dãmba 12:17, 18 sagend-d woto: “Da lebs ned wẽng wẽng yĩng ye. . . . Bɩ y maan yãmb sẽn tõe tɛka, t’a sã n tõe, bɩ laafɩ zĩnd yãmb ne neba fãa sʋka.”
3. Wãn-wãn la d wilgd tɩ koɛɛg ning tõnd sẽn moondã yaa laafɩ koɛɛga?
3 Tõnd sã n yaa ned sẽn sɩd baood laafɩ, rẽ na n yɩɩ vẽeneg d manesmã pʋgẽ. A na n yɩɩ vẽeneg d goamã la d tʋʋmã pʋgẽ. Tõe tɩ na n yɩɩ vẽeneg d nen-wamdã zug la d koe-zomẽ wã. (Yelbũna 17:27) A Zezi sẽn wa n na n tʋm a tʋm-tʋmdbã tɩ b tɩ moonã, a sagl-b-la woto: “Y sã n kẽ yi-kãnga, [“bɩ y kãab-a laafɩ,” Sebr Sõngo]. La yirã sã n zemse, bɩ y kɩt tɩ yãmb laafɩ wa a pʋgẽ, la a sã n ka zemse, bɩ y le reeg y laafɩ.” (Matɩe 10:12, 13) Koɛɛg ning tõnd sẽn taasd nebã yaa koe-noogo. Biiblã boond-a lame tɩ ‘laafɩ Koe-noogo,’ “Wẽnnaam barka koe-noogã,” la ‘Wẽnnaam soolem koe-noogo.’ (Efɛɛz rãmba 6:15; Tʋʋma 20:24; Matɩe 24:14) Tõnd pa rat n wɩd neb a taabã tẽeb wall d wẽ no-koeemd ne-b b sẽn tagsd bũmb ningã zug ye. D rat n taas-b-la Wẽnnaam Gomdã koe-noogo.
4. Y sã n pa yã n wilg ned y kaagrã võor t’a tol n yeel t’a pa rat n kelge, bõe la y tõe n yeele?
4 Zak ning pʋgẽ, ned tõeeme n pa yã n kelg la a tol n yeel t’a pa rat n kelg ye. Naoor wʋsgo, y tõe n yeela woto: “Sã n pa rẽ, m da tʋll n karma Biiblã verse kãngã sẽn yaa koɛɛgã bal tɩ y kelge.” Woto, tõeeme t’a pa tõdg ye. Tõe tɩ ne neb a taaba, zemsame tɩ y leok-b woto: “Mam da tʋll n goma ne-y wakat sẽn wat yelle, wakat ned sẽn pa na n le maan a to kɛgre, la nebã fãa sẽn na n wa nong taaba.” Kɛlgdã sã n pa wilg t’a rat n bãngame n paase, y tõe n yeela woto: “La m neeme tɩ y pa tar sẽk n na n kelg-m masã ye.” La baa kɛlgdã sã n leok tõnd ne zabr goamã, d segd n tagsame t’a ‘ka zems’ ne koɛɛgã bɩ? Baa a soabã manesem sẽn yaa to-to fãa, tẽeg-y tɩ Biiblã sagend-d lame tɩ d ‘yɩ sũ-bʋgsem dãmb ne neba fãa la d maan sũ-mar’ wẽng taoore.—2 Tɩmote 2:24.
A Soll da yaa tɩtaam soaba, la ra yaa zɩɩlem yĩnga
5, 6. Manesem bʋg la a Soll da tall ne a Zezi karen-biisã, la bõe yĩng t’a maan woto?
5 Pipi kiris-nebã wakatẽ, rao a yembr b sẽn da boond t’a Soll yʋʋr da yii wʋsgo, a sẽn da yaa tɩtaam soaba, la a sẽn da tʋmd nen-kɛglem tʋʋmã yĩnga. Biiblã yeelame t’a ra ‘namsda Zusoaba karen-biis n dat n kʋ bãmba.’ (Tʋʋma 9:1, 2) Kaoosg zugẽ, a sak n deegame tɩ yẽ ra ‘tʋʋsame la a nams [Wẽnnaam] nebã’ ne tɩtaam. (1 Tɩmote 1:13) Baa sẽn tõe t’a Soll roagdb kẽer da zoe n lebga kiris-nebã, a yeela yẽ meng sẽn da tall manesem ning ne Kirist karen-biisã wɛɛngẽ woto: “Mam sũur sẽn puug wʋsg ne bãmba, mam kẽnga tẽns sẽn be soolem a taab me n tɩ nams bãmba.” (Tʋʋma 23:16; 26:11; Rom dãmba 16:7, 11) Kaset pa be sẽn wilgd tɩ karen-biisã baoome n na n wẽ no-koɛɛm ne a Soll zãma sʋka, a sẽn da wa n maand-b woto wã ye.
6 Bõe yĩng t’a Soll da maand woto? Yʋʋm wʋsg poore, a gʋlsame: ‘Mam maana bõn-kãens ne zɩɩlem la ka tẽeb yĩnga.’ (1 Tɩmote 1:13) A ra yaa Fariziẽ tɩ b zãms-a a “yaab rãmba tõod neere.” (Tʋʋma 22:3) Baa ne sẽn wõnd a Soll karen-saamb a Gamaliɛll ra pa kis tũudum zẽng nebã, maan-kʋʋdb kãsem a Kayɩf yẽ sẽn da teend a Sollã ra kisa tũudum a taabã neba. A Kayɩf n da lʋɩ kʋʋngã sẽn maan sɩlem n dõd a Zezi Kirist tɩ b wa baas n kʋ-a wã taoore. (Matɩe 26:3, 4, 63-66; Tʋʋma 5:34-39) Rẽ zugẽ, a Kayɩf kɩtame tɩ b pãb a Zezi tʋm-tʋmdbã ne kalwaase, la a sõog-b nug tɩ b ra le kõ kasetã ne a Zezi yʋʋr ye. Yaa a Kayɩf n lʋɩ Sãnedrẽ wã neb taoor a Etɩɛn bʋʋdã kaoobẽ sẽn yɩ rãmbg tɩ b wa yiis a Etɩɛn tẽnga pʋgẽ n lob-a ne kug n kʋ wã. (Tʋʋma 5:27, 28, 40; 7:1-60) A Soll yãa b sẽn lob a Etɩɛn ne kug n kʋ wã, t’a Kayɩf tʋm-a Damas t’a tɩ yõg a Zezi karen-biisã n wa sẽn na yɩl tɩ b menems b fãa. (Tʋʋma 8:1; 9:1, 2) A Soll sẽn da paam t’a Kayɩf sõngd-a wã, a ra tagsdame tɩ yẽ tʋmda Wẽnnaam tʋʋmd ne yẽesem, la sɩd-sɩda, a tẽebã ra pa tik sɩd zug ye. (Tʋʋma 22:3-5) Rẽ kɩtame t’a Soll ra pa mi tɩ yaa a Zezi la Mesi hakɩkã ye. La a wa n bãngame t’a manesmã ra yaa wẽnga, a Zezi sẽn vʋʋgã sẽn gom ne-a ne yel-solemd Damas sorã zugã.—Tʋʋma 9:3-6.
7. A Ananias sẽn tɩ kaag a Sollã nafr yɩɩ bõe?
7 Rẽ poor bilf bala, b tʋma karen-biig a Ananias t’a tɩ kõ a Soll kasetã. Sã n da yaa yãmba, y ra na n sak n tɩ moona a Soll bɩ? A Ananias ra yeesdame, la ne rẽ fãa a goma ne a Soll ne nonglem. A Soll manesmã toeema a Zezi sẽn seg-a Damas sorã zugã yĩnga. (Tʋʋma 9:10-22) Kaoosg poore, b wa n bãng-a-la wa kiris-ned sẽn yɩ misioneer sẽn tall yẽesem tɩ b boond-a tɩ tʋm-tʋmd a Polle.
A Zezi ra yaa sũ-bʋgsem soaba, la a ra tara raoodo
8. Wãn-wãn la a Zezi tall a Ba wã manesem buud ne neb nins sẽn da maan tʋʋm wẽns pĩndã?
8 A Zezi yɩɩ Rĩungã koe-moond sẽn tall sũ-bʋgsem, la a talla raood a manesmã ne nebã pʋgẽ. (Matɩe 11:29) A ra tara a saasẽ Ba wã sẽn sagl nin-wẽnsã tɩ b bas b so-wẽngã tagsgo. (Ezai 55:6, 7) A Zezi sã n da yã yel-wẽn-maandb sẽn toeemd b vɩɩmã tɩ manegd n paasdẽ, a ra kengda b raoodo. (Luk 7:37-50; 19:2-10) A ra rɩkda a Ba wã togs-n-taar n pa tikd nif sẽn ne bal zug n kaood nebã bʋʋd ye, la wala a Ba wã a ra tara sõmblem la sũ-mar ne-ba, n saagdẽ tɩ rẽ tõe n kɩtame tɩ b tek yam n kos sugri. (Rom dãmba 2:4) A Zeova ratame tɩ nebã buud fãa tek yam n kos sugr n paam fãagre.—1 Tɩmote 2:3, 4.
9. Bõe la d tõe n zãms Ezai 42:1-4 sẽn pids a Zezi zug to-to wã pʋgẽ?
9 Evãnzill gʋlsd a Matɩe wilga a Zeova tagsg a Zezi Kirist zug n lebg n togs bãngr-gom-kãensã: “Ad mam tʋm-tʋmda mam sẽn yãke. Mam nonga yẽ wʋsgo, la a taa mam yam. Mam na n ninga m sɩɩgã a zugu, la yẽ na n wilga bʋʋd kaoob buud wʋsg sʋka. Yẽ kõn wẽ no-koeemd walla a zẽk a koɛɛg ye, la b kõn wʋm a koɛɛg soay zut ye. Yẽ kõn kaoog tã-wĩig sẽn zẽgemd ye. La yẽ kõn kiis fɩtl peend sẽn wisd ye, hal t’a na kɩt tɩ tɩrlem tõoge. La buud wʋsg na n tẽe yẽ yʋʋre.” (Matɩe 12:17-21; Ezai 42:1-4) Sẽn zems ne bãngr-gom-kãensã, a Zezi ra pa wẽed no-koɛɛm ne nebã tɩ yaa bʋrg ye. Baa b sã n da weoogd-a, a ra togsda sɩdã ne manesem sẽn be yamleoog ne pʋ-peelem dãmbã.—Zã 7:32, 40, 45, 46.
10, 11. a) Baa sẽn yaa Fariziẽ rãmbã n da kɩɩsd a Zezi n yɩɩdã, bõe yĩng t’a kõ bãmb kẽer kasetã? b) Wakat kẽere, wãn-wãn la a Zezi leok a kɩɩsdbã, la bõe la a pa maane?
10 A Zezi koe-moonegã wakate, a goma ne Fariziẽ rãmb wʋsgo. Baa bãmb kẽer sẽn mao n na n bẽd-a a goamẽ wã n yõkã, rẽ pa kɩt t’a tags tɩ b fãa tara yam wẽns ye. Wõnda Fariziẽ a Sɩmo sẽn da tar tags-kɛg neb a taabã zuta bao n na n bãnga a Zezi sõma, n bool-a t’a wa rɩ a zakẽ wã. A Zezi sak n kẽngame la a kell n kõ neb nins sẽn zĩnd be wã kasetã. (Luk 7:36-50) Sasa a to, Fariziẽ kãseng a ye yʋʋr sẽn boond t’a Nikodɛm soos n kẽnga a Zezi nengẽ ne yʋngo. A Zezi pa zab-a a sẽn bas tɩ zĩigã sobg t’a yaool n wa wã ye. A pʋd n kõo a Nikodɛm kasetã n wilg nonglem ning Wẽnnaam sẽn tall ne ninsaalbã, n tʋm a Biriblã t’a wa tuk fãagr sor n kõ neb nins sẽn na n tẽ-a wã. A Zezi leb n wilg-a-la ne nonglem tɩ tara yõod wʋsg t’a sak Wẽnnaam segl-kãnga. (Zã 3:1-21) Kaoosg zugẽ, neb sẽn wa n pẽg a Zezi tɩ Fariziẽ rãmb a taabã paoog-bã, a Nikodɛm gom n sõnga a Zezi.—Zã 7:46-51.
11 A Zezi ra mii neb nins sẽn maand sɩlem n dat n bẽd-a wã. A ra pa basd t’a kɩɩsdbã kɩt t’a wẽ no-koɛɛm sẽn ka yõod ye. La sã n da zemse, koɛɛg-koɛɛga, a kõta leokr sẽn tar pãng n wilg no-kãseng, wall a rɩk makre, bɩ a tik Gʋlsg Sõamyã zug n leok-ba. (Matɩe 12:38-42; 15:1-9; 16:1-4) Wakat kẽere, sã n da yaa vẽeneg tɩ pa tar yõod t’a leok gomde, a sĩndedame n pa leok ye.—Mark 15:2-5; Luk 22:67-70.
12. Bõe yĩng t’a Zezi ra tõogd n sõngd nebã baa b sã n da zẽkd b koees ne-a?
12 Sasa kẽere, neb zĩn dãmb sẽn da tar zẽka b koees a Zezi taoore. La sasa kãense,, a yõka a menga, n tʋm ne pãng ning Wẽnnaam sẽn kõ-a wã meng n sãoog-ba. (Mark 1:23-28; 5:2-8, 15) Rẽnd neb sũy sã n wa yik ne tõnd me d koe-moonegã pʋgẽ tɩ b zẽkd b koees ne-do, tõnd me segd n yõka d mens n bãng n leok-b ne bʋgsem la yam.—Kolos rãmba 4:6.
Sũ-mar tallg zakã pʋgẽ
13. Bõe yĩng tɩ nebã mi n gɩdg b zak ned sẽn sɩng Biiblã zãmsg ne a Zeova Kaset rãmbã?
13 Naoor wʋsgo, yaa zakã pʋgẽ la a Zezi karen-biisã segd n yõk b mens n yɩɩda. Ned sẽn sak sɩd ning sẽn be Biiblã pʋgẽ wã ne a sũur fãa tʋllame t’a zaka rãmb me sak-a. La wala a Zezi sẽn yeelã, nedã zak neb tõe n kisg-a lame. (Matɩe 10:32-37; Zã 15:20, 21) Kisg-kãng tõe n yɩɩ yɛl toor-toor yĩnga. Wala makre, Biiblã zãmsg tõe n sõng-d lame tɩ d lebg pʋ-peelem soaba, tɩ d tʋmd d tʋʋmã sõma, la d waoogd nebã. La Gʋlsg Sõamyã wilgdame tɩ sẽn yaa yell ning fãa taoore, d segd n saka d Naandã n yɩɩda. (Koɛɛg Soaba 12:1, 13; Tʋʋma 5:29) D zak ned sã n tagsdẽ tɩ d sẽn sak a Zeova wã yĩng kɩtame tɩ yẽ sẽn tar tõog ning zakã neb zugã booge, a sũur tõe n sãamame. Yel-kãngã taoore, sɩd tara yõod wʋsg tɩ d rɩk a Zezi togs-n-taar yõk-m-mengã wɛɛngẽ.—1 Pɩɛɛr 2:21-23; 3:1, 2.
14-16. Bõe n kɩt tɩ neb sẽn da gɩdgd b zags neb wa toeem yam?
14 Neb wʋsg sẽn balemd a Zeova masã tara kẽed-n-taag wall b zak ned a to sẽn da gɩdgd-ba, b sẽn wa n sɩng Biiblã zãmsg n toeemd b vɩɩmã yĩnga. Tõe tɩ kɩɩsdb kãensã ra wʋma b sẽn sãbsd a Zeova Kaset rãmbã, tɩ kɩt tɩ b yeesdẽ tɩ na n sãama b zakã vɩɩm. La bõe n kɩt tɩ b wa toeem yam? Naoor wʋsgo, yɩɩ mak-sõng ning tẽedã sẽn kõ wã. Tẽedã sẽn tũ Biiblã sagls wakat fãa, n kẽnd kiris-neb tigissã n pa vaandẽ wã, n kẽesd a meng koe-moonegã pʋgẽ la a tʋkd a zakã pʋgẽ zɩɩbã, la a sẽn talld sũ-mar gom-põos buud fãa taoorã kɩtame tɩ wakat ninga zakã neb boog b kɩɩsgã.—1 Pɩɛɛr 2:12.
15 Kɩɩsd ning me tõe n tõdgame tɩ b ra wilg-a bũmb sẽn be Biiblã pʋgẽ, a sẽn yãgd n sãbsd neb a taabã, wall wuk-m-meng yĩnga. Sɩd yɩɩ woto ne Etazĩni rao a yembr sẽn da yet t’a nonga a tẽngã ne a sũur fãa. Vugri, a pagã sẽn da wa n be tigis-kãsengẽ, a yõd n wʋka a futã fãa n yi n toeem zĩiga. Daar a to me, a rɩka bug-raoog n yi n yeel t’a na n tɩ kʋʋ a menga. A yeelame tɩ yaa a pagã tũudum n kɩt tɩ yẽ tall manesem yood nins fãa a sẽn tallã. La pagã kell n modg n tũu Biiblã saglse. A pagã sẽn lebg a Zeova Kaset soabã yʋʋm pisi loogr poore, yẽ me lebga a Zeova Kaset soaba. Albani, pag a ye sũur puuga ne a bi-pugl a sẽn zãms Biiblã ne a Zeova Kaset rãmbã n deeg lisgã yĩngã. A bi-puglã Biibl woo Biibl a sẽn sãam yɩɩ bãmb 12. La daar a yembre, a biigã basa Biibl-paall taabl zugu, t’a lak n na n karme. Zĩig ning a sẽn lakã yɩɩ Matɩe 10:36, t’a mik tɩ bũmb ning b sẽn yet zĩ-kãngã wã pidsda yẽ zugu. La pagã bi-pugl yell sẽn ket n pak-a wã yĩnga, a yãag-a lame t’a na n tɩ kẽ batayo yẽ ne Kaset rãmb a taab sẽn na n kẽng tigis-kãsengẽ Itali. A ma wã sẽn yã nonglem ning sẽn be b sullã neb ne taab sʋkã, la b sẽn mobgd taab n kɩdemd sũ-noogã, a tagsgã sɩnga toeengo. Rẽ loogr poor bala, a sak n na n zãmsa Biiblã. Rũndã-rũndã, a maoodame n na n sõng neb nins sẽn gɩdgd b taab tɩ b ra zãms Biiblã.
16 Vugri, rao a ye sẽn da welg ne a pag yika ne sʋʋg n yek a pagã, n kaasd n dõt-a ne tʋʋm-beedo, a sẽn wa n kolgd Rĩungã Roogo. A pagã leok-a-la ne sũ-bʋgsem n yeel yaa: “Wa loog n kẽ Rĩungã Roogẽ tɩ f na bãng bũmb ning b sẽn maand be wã f toore.” A sak n kẽeme. Sẽn beẽ-beẽ, a wa n lebga kiris-ned n yaa kãsem soaba.
17. Mo-yõsr sã n wa zĩnd kiris-neb zak pʋgẽ, sagl-bʋs sẽn be Gʋlsg Sõamyã pʋgẽ n tõe n sõng-ba?
17 Baa y zakã neb fãa sã n yaa kiris-neba, d sẽn yaa pãn-komsem dãmba yĩnga, wakat-wakate mo-yõsr tõe n zĩnda y sʋk n kɩt tɩ y gom taab sũ-to-goamã. D bãng tɩ b ra sagla pĩnd wẽndẽ Efɛɛz kiris-nebã woto: “Bɩ y bas sũ-toog ne kisgr la sũ-yikr la no-koɛɛma la kãnegre la pʋ-toog fãa.” (Efɛɛz rãmba 4:31) Wõnda Efɛɛz kiris-nebã sẽn da vɩ ne neb ninsã, bãmb mensã pãn-komsem, la wakat kẽere b pĩnd vɩɩmã manesem meng lebg n talla pãng b zutu. Bõe n da na n sõng-b tɩ b toeeme? B ra segd n ‘paama tagsg manegre.’ (Efɛɛz rãmba 4:22-24) B sã n da zãmsd Wẽnnaam Gomdã, n bʋgsd a sẽn segd n toeem b vɩɩmã to-to wã zugu, n naagd b tẽed-n-taasã la b pʋʋsd ne b sũy fãa, Wẽnnaam vʋʋsem sõngã biis ra na n pukda vẽeneg b vɩɩmã pʋgẽ. B na n tõogame n ‘maan taab neere, la b paam sũ-bʋgsem, la b kõt taab sugr wa Wẽnnaam sẽn kõ-b sugr Kirist yĩngã.’ (Efɛɛz rãmba 4:32) Baa neb a taabã manesem ne-d sẽn yaa to-to fãa, d segd n yõka d mens n yɩ nin-bʋgsga, n zoet nebã nimbãaneg la d kõt sugri. Yaa vẽeneg tɩ d pa segd n “lebs ned wẽng wẽng yĩng ye.” (Rom dãmba 12:17, 18) Yaa sõma tɩ d rɩkd Wẽnnaam togs-n-taar wakat fãa n tar nonglem hakɩk ne nebã.—1 Zã 4:8.
Saglg b sẽn kõ kiris-nebã fãa
18. Bõe yĩng tɩ saglg ning sẽn be 2 Tɩmote 2:24 pʋgẽ wã ra zems ne pĩnd wẽndẽ Efɛɛz kãsem soab a yembre, la wãn-wãn la a tõe n naf kiris-nebã fãa?
18 Yaa kiris-nebã fãa la b sẽn sagl tɩ b ‘tall su-marã.’ (2 Tɩmote 2:24) La reng n yɩɩ a Tɩmote la b kõ sagl-kãngã sẽn yɩ tɩlae ne-a, a sẽn da wa n yaa kãsem soab Efɛɛzã. Neb kẽer n da be tigingã pʋgẽ n zãmsd nebã b mens tagsa, la yɛl sẽn pa sɩda. B sẽn da pa wʋmd a Moiiz Tõogã võor sõma wã yĩng kɩtame tɩ b ra pa ne tẽebã, nonglmã la sũur kaset sẽn yaa sõma tallgã yõod ye. B tɩtaamã ra kɩtame tɩ b wẽed no-koɛɛm goam sẽn pa nafd-b poorẽ, tɩ kɩt tɩ b pa ne Kirist zãmsgã la Wẽnnaam sakrã yõod sõma ye. Sẽn na yɩl n welg yel-kãngã a saam-biisã sʋka, a Tɩmote ra segd n tũu Biiblã sɩdã neere, la a tall sũ-bʋgsem ne a saam-biisã. Wala rũndã-rũndã kãsem dãmbã, a Tɩmote ra miime tɩ pa yẽ n so bãgrã, la t’a tog n talla manesem sẽn na n kɩt tɩ kiris-neb nonglem la lagem-n-taar zĩndi.—Efɛɛz rãmba 4:1-3; 1 Tɩmote 1:3-11; 5:1, 2; 6:3-5.
19. Bõe yĩng tɩ tõnd fãa segd n “bao sik-m-menga”?
19 Wẽnnaam sagla a nin-buiidã tɩ b bao “sik-m-menga.” (Sofoni 2:3) Hebre gom-biig ning b sẽn lebg tɩ “sik-m-mengã” makda zʋg sẽn kɩtd tɩ ned kell n tall sũ-mar wẽng b sẽn maand-a taoore, n pa kãbg a sũuri, bɩ n maan wẽng n lebs ye. Bɩ d pʋʋs a Zeova n kos-a ne d sũur fãa t’a sõng-d tɩ d tall sũ-mar la d zã a yʋʋrã ne
Bõe la y zãms-yã?
• Ned sã n wa gomd-y ne paoogre, yaa verse bʋs n tõe n sõng-yã?
• Bõe yĩng t’a Soll ra yaa tɩtaam soaba?
• Wãn-wãn la a Zezi makrã sõngd tõnd tɩ d tall manesem sõng ne neba buud fãa?
• D zakã pʋgẽ, d sã n wilgd d goamẽ wã tɩ d tara yõk-m-menga, nafa bʋs la d tõe n paame?burkĩndi, baa toog pʋgẽ.
[Zãmsgã sogsgã]
[Foto, seb-neng 15]
Baa ne a Soll sẽn da pa tar yʋ-noogã, a Ananias tɩ goma ne-a ne nonglem
[Foto, seb-neng 17]
Kiris-ned sã n tʋkd a zɩɩbã sõma wakat fãa, tõe n booga a zaka neb kɩɩsgo