‘D togs koe-noogo’
‘D togs koe-noogo’
“Neb nins sẽn wat ne koe-nooga nao tara dasãnde. Bãmb . . . togsd[a] koe-noogo.”—EZAI 52:7.
1, 2. a) Yel-be-bʋs n maand daar fãa? b) Wãn to la neb wʋsg tagsda, b sã n wʋmd koe-beedã wakat fãa?
RŨNDÃ-RŨNDÃ, dũniyã gill zugu, yaa kɩba-wẽns woo kɩba-wẽns la nebã wʋmda. D sã n pak radio wã, d wʋmda kɩbay sẽn yɩkd pɛleng sẽn gomd bã-kʋʋds sẽn dat n sãam tẽngã neb yelle. D sã n get televiziõ wã, d yãta kamb sẽn bõosd tɩ b sõng-ba, komã sẽn tar-b wʋsgã yĩnga. D sã n dɩk zʋrnalle, d karemdame tɩ bõmb rãmb n siig ro-bɛda, tɩ kʋ neb ka tɛk sẽn pa tar b toorẽ yelle.
2 N-ye, daar fãa yaa yel-beed n maande. Dũni kãngã yɛlã tara toeeng la zẽnebo. (1 Korẽnt dãmba 7:31) Erop zʋrnall a yembr n wilg tɩ wakat ninga, yaa wa dũniyã na n sãama zãng ka la bilfu. Rẽnd pa lingr la neb nins sũy sẽn sãamdã sõor sẽn tar paasgã ye. Etazĩni, b maana vaeesg televiziõ wã kɩbay wɛɛngẽ. Ned a ye n wilg a sẽn tagsd bũmb ning yel kãngã zugu, la yaa vẽeneg tɩ nin-kãnga sẽn yeel bũmb ninga kell n zemsa ne neb milyõ rãmb sẽn tagsd to-to wã. A yeela woto: ‘M sã n ges kɩbayã n sa, yɩɩr wʋsg n tar-ma. Fãa yaa koe-beedo. Sãamda sũur hal wʋsgo.’
Koɛɛg nebã fãa sẽn segd n wʋme
3. a) Koe-no-bʋg la Biiblã moonda? b) Bõe yĩng tɩ y get Rĩungã koe-noog wa bũmb sẽn tar yõod wʋsgo?
3 D tõe n paama koe-noog dũni kãngã sẽn pid ne sũ-sãamsã pʋgẽ bɩ? N-ye, tõeeme! D sẽn mi tɩ Biiblã moonda koe-noogã kõt-d-la belsgo. Yaa koe-noog ning sẽn wilgd tɩ Wẽnnaam Rĩungã na n kɩtame tɩ bãasã, komã, bi-beerã, zabã la wẽgb buud fãa sa wã. (Yɩɩl Sõamyã 46:10; 72:12) Pa koe-kãngã buud la nebã fãa rat n wʋm sɩda? Sɩd yaa woto la a Zeova Kaset rãmbã tagsda. Woto yĩnga, zĩig fãa, b mii tõnd wa neb sẽn modgd wakat fãa n moond tẽnsã fãa neb Wẽnnaam Rĩungã koe-noogo.—Matɩe 24:14.
4. Tõnd koe-moonegã nen-bʋs la d na n ges sõs-kãngã la sõsg ning sẽn pʋgdã pʋgẽ?
4 La bõe la d tõe n maan sẽn na yɩl n ket n moond koe-no-kãngã wʋsgo, baa zĩis nins nebã sẽn pa kelgd sõma wã? (Luk 8:15) D sã n lebg n tẽeg koe-moonegã nen-kãsems a tãabo, na n sõng-d lame tɩ sãmbg ka be ye. D tõe n gesa 1) bũmb ning sẽn kɩt tɩ d tʋll n moonã, 2) koɛɛg ning tõnd sẽn moondã, la 3) tõnd sẽn moond to-to wã. Tõnd sã n kell n tall yam sẽn zemse, n moond d koɛɛgã t’a yaa vẽenega, la d tũnugd ne soay sẽn womd bi-sõma, d na n sõnga neb buud toor-toor tɩ b wʋm koɛɛg ning sẽn yaa noog n yɩɩdã, sẽn dat n yeel tɩ Wẽnnaam Rĩungã koe-noogo. *
Bũmb ning sẽn kɩt tɩ d moond koe-noogã
5. a) Sẽn yɩɩd fãa, bõe yĩng la d sẽn tʋll n moon koe-noogã? b) Bõe yĩng tɩ d tõe n yeel tɩ tõnd sẽn sakd Biiblã noor ning sẽn yet tɩ d moonã wilgdame tɩ d nonga Wẽnnaam?
5 Bɩ d ges pipi nengã. Bõe yĩng tɩ d tʋll n moon koe-noogã? Yaa yembr ne bʋʋm ning sẽn kɩt t’a Zezi moon-a wã. A yeelame: “Mam nonga m Ba.” (Zã 14:31; Yɩɩl Sõamyã 40:9) Sẽn yɩɩd fãa, yaa tõnd sẽn nong Wẽnnaamã n kɩt tɩ d maand woto. (Matɩe 22:37, 38) Biiblã wilgdame tɩ Wẽnnaam nonglem tɩ loee ne koe-moonegã, bala a yetame tɩ: “Wẽnnaam nonglem yaa tɩ tõnd sak bãmb tõogo.” (1 Zã 5:3; Zã 14:21) Noor ning sẽn yet tɩ d ‘kẽng n tɩ maan karen-biisã’ bee Wẽnnaam noyã sʋk bɩ? (Matɩe 28:19) N-ye. Sɩda, yaa a Zezi n togs gom-kãensã, la yita a Zeova nengẽ. Bõe yĩng tɩ d tõe n yeel woto? A Zezi wilgame: “Mam ka maand bũmb ne m meng pãng ye. La yaa m Ba sẽn zãms maam bũmb ninga la m gomda.” (Zã 8:28; Matɩe 17:5) Woto, d sã n tũud noor ning sẽn yet tɩ d moonã, d wilgda a Zeova tɩ d nong-a lame.
6. Wãn to la d sẽn nong Wẽnnaamã kɩtd tɩ d tʋll n moone?
6 Sẽn paase, d sã n nong a Zeova kɩtdame tɩ d tʋll n moone, d sẽn dat n kɩɩs ziri nins Sʋɩtãanã sẽn yelgd a zugã yĩnga. (2 Korẽnt dãmba 4:4) A Sʋɩtãan yeelame t’a Zeova pa rɩt a naamã ne tɩrlem ye. (Sɩngre 3:1-5) D sẽn yaa a Zeova Kaset rãmbã, d rata ne d sũy fãa n wilg t’a Sʋɩtãan yaa munaafɩɩk la d kɩt tɩ Wẽnnaam yʋʋrã paam waoogr ãdem-biisã taoore. (Ezai 43:10-12) Sẽn paase, d moonda koe-noogã, d sẽn bãng a Zeova zʋgã la a soayã yĩnga. D neeme tɩ d tara zood ne-a n leb n dat ne d sũy fãa n togs d taabã tɩ b bãng d Wẽnnaamã. Sɩda, a Zeova sõmblmã la a so-tɩrsã sẽn kõt tõnd sũ-noog wʋsgã, kɩtame tɩ d pa tõe n bas a yell goam ye. (Yɩɩl Sõamyã 145:7-12) D tʋllame n pẽg-a la d togs a “bõn-sõama wã” neb nins sẽn dat n kelgã.—1 Pɩɛɛr 2:9; Ezai 43:21.
7. D sẽn nong Wẽnnaamã toor sẽn ka be, bʋʋm kãseng bʋg n kɩt tɩ d moond koe-noogã?
7 La bʋʋm kãseng a to yĩng n kɩt tɩ d ket n moond koe-noogã. Tõnd moonda koe-noogã, bala d rat n yolsa neb nins sẽn kelgd kɩba-wẽns woo kɩba-wẽns tɩ sãamd b sũyã, la neb nins sẽn namsd yɛl a taab yĩngã. D sẽn yolsd nebã woto wã, d modgdame n na n dɩk a Zezi togs-n-taare. Wala makre, ges-y bũmb ning b sẽn bilg Mark sak a 6 pʋgẽ wã.
8. Bõe la kɩbar ning sẽn be Mark sak a 6 pʋgẽ wã wilgd a Zezi tagsg sẽn yaa a soab ne nebã?
8 Tʋm-tʋmdbã yii moonegã weoog n wa togsd a Zezi bũmb nins fãa b sẽn da maane, la b sẽn zãms nebã. A Zezi sẽn yã tɩ tʋm-tʋmdbã yaame wã, a yeel-b lame tɩ b wa tɩ b tɩ “vʋʋs bilfu.” Rẽ n so tɩ b kẽ koom koglg n na n kẽng zĩig neb sẽn kaẽ. La nebã tũu bãmba, n zoe n yɛg mogrã, la pa yã n kaoos la b tɩ paam-b be ye. Bõe la a Zezi maan-yã? Biiblã yetame: ‘A Zezi yãa neb kʋʋngã, la b nimbãanegã yõka [yẽnda]; tɩ bõe, bãmb wẽnda wa piis sẽn ka tar pe-kɩɩm ye, la [a] sɩngame n zãms bãmb bũmb wʋsgo.’ (Mark 6:31-34) Rẽnd baa ne a Zezi sẽn da ya wã, a kell n moona nebã koe-noogã, b nimbãaneg sẽn yõk-a wã yĩnga. N-ye, a Zezi zoeya nin-kãensã nimbãanega.
9. Kɩbar ning sẽn be Mark sak a 6 pʋgẽ wã zãmsda tõnd bõe yam ning sẽn kɩtd tɩ d moondẽ wã wɛɛngẽ?
9 Bõe la kɩba-kãngã zãmsd tõndo? D sẽn yaa kiris-nebã, koe-noogã mooneg la karen-biisã maaneg yaa zɩɩb sẽn zao d zugu. D neeme tɩ d segd n moona nebã koe-noogã, bala Wẽnnaam daab yaa tɩ “neba [buud] fãa paam fãagre.” (1 Tɩmote 2:4) Baasg zãnga, tõnd pa get d koe-moonegã wala zɩɩb bal ye, la d get-a-la wala nimbãan-zoeer tʋʋmd me. D sã n sɩd zoet nebã nimbãaneg wa a Zezi sẽn da zoet b nimbãaneg to-to wã, d na n data ne d sũy fãa n maan d sẽn tõe tɛk n ket n moond-b koe-noogã. (Matɩe 22:39) Sɩda, sã n yaa yam-sõng woto n kɩt tɩ d moond koe-noogã, d na n ket n moond-a lame n pa basdẽ ye.
Tõnd sẽn moond koɛɛg ningã yaa Wẽnnaam Rĩungã koe-noogo
10, 11. a) Wãn to la a Ezai bilg koɛɛg ning tõnd sẽn moondã? b) Wãn to la a Zezi wa ne koe-noogo, la wãn to la Wẽnnaam sõgen dãmbã sẽn vɩ yaoolem wakat kãngã wã tũud a Zezi mak-sõngã?
10 Yaa wãn to masã ne tõnd koe-moonegã neng a yiib-n-soabã. Yaa bõe la d moonda? No-rɛɛs a Ezai bilga koɛɛg ning tõnd sẽn moondã tɩ be rasãnde, n yeel woto: “Neb nins sẽn wat ne koe-nooga nao tara dasãnde. Bãmb kẽnda tãensa zut n moond laafɩ koɛɛga la b togsd koe-noogo la b moond fãagr koɛɛga n yet Siõ neba tɩ: ‘Yãmb Wẽnnaam dɩta naam.’”—Ezai 52:7.
11 Verse kãngã gom-yẽgrã sẽn yaa: “Yãmb Wẽnnaam dɩta naam” bɩ a lebga rĩmã tẽegda tõnd koɛɛg ning tõnd sẽn segd n moona, sẽn yaa Wẽnnaam Rĩungã koe-noogã. (Mark 13:10) Ges-y verse kãngã me sẽn wilgd tõnd koɛɛgã neng ning sẽn be yamleoogã. A Ezai togsa goam nins sẽn yaa ‘fãagre,’ ‘koe-noogo,’ la “laafɩ.” Yʋʋm kobs a Ezai loogr poore, a Zezi Kirist pidsa bãngr-gom-kãngã hal sõma n kõ mak-sõng n moon Wẽnnaam Rĩungã sẽn watã koe-noog ne yẽesem. (Luk 4:43) Yaoolem wakat kãngã, sẽn yɩɩd fãa yʋʋmd 1919 tɛkã, a Zeova Kaset rãmbã tũu a Zezi mak-sõngã n moon Wẽnnaam Rĩungã sẽn luglã koe-noog ne yẽesem, la b wilg bark nins Rĩung kãng sẽn na n wa ne n kõ nebã.
12. Wãn to la Rĩungã koe-noog sõngd neb nins sẽn sakd-a wã?
12 Wãn to la Rĩungã koe-noog sõng neb nins sẽn sakd-a wã? Wala a Zezi wakatã, rũndã-rũndã, koe-noogã kõta saagr la belsgo. (Rom dãmba 12:12; 15:4) A kõta pʋ-peelem dãmbã saagre, bala b bãngdame tɩ noog wakat n wate. (Matɩe 6:9, 10; 2 Pɩɛɛr 3:13) Saag-kãngã sõngda wẽn-zoɛtbã wʋsg tɩ b ket n gẽegd beoog-daarã ne sũ-noogo. Yɩɩl gʋlsdã yeelame tɩ ‘rabeem ka tar-b koe-beed yĩng ye.’—Yɩɩl Sõamyã 112:1, 7.
Koɛɛg sẽn na n ‘vil sũ-sãoong rãmbã noada’
13. Wãn to la no-rɛɛs a Ezai bilg bark nins neb nins sẽn sakd koe-noogã sẽn paamd masã mengã?
13 Sẽn paase, neb nins sẽn sakd koe-noogã paamda belsg la bark masã menga. Wãn to? No-rɛɛs a Ezai bilga a nafa kẽer a sẽn wa n deng n togs tɩ: “Zusoab a Wẽnnaam sɩɩga bee ne maam. Tɩ bõe, bãmb yãka maam n tʋm maam tɩ m togs naong rãmba koe-noogo, la m bels sũ-sãoong rãmba [“la m vil sũ-sãoong rãmbã noada,” NW]. La m togs yembs lohorem koɛɛga. La m wilg bi-bees fãagr koɛɛga; la m moon Zusoaba bark koɛɛga, la m togs tõnd Wẽnnaam sũ-dokr daar koɛɛga, la m bels sũ-sãoong rãmba fãa.”—Ezai 61:1, 2; Luk 4:16-21.
14. a) Gomd ning sẽn yaa ‘vil sũ-sãoong rãmbã noada’ wilgda bõe Rĩungã koɛɛg wɛɛngẽ? b) Wãn to la d rɩkd togs-n-taar ne a Zeova sẽn get sũ-sãoong rãmbã yellã?
14 Sã n yaa ne bãngr-gom-kãngã, a Zezi sẽn moon koe-noogã, a ‘vila sũ-sãoong rãmbã noada.’ Ad a Ezai bilgrã sɩd be yamleoogo. Sã n yaa ne Biiblã gom-biis võor sebr a yembre, “b nong n dɩkda hebre gom-biig ning b sẽn lebg tɩ ‘vil bũmbã,’ n bilgd ‘nodr vilb sẽn na yɩl n tɩp-a t’a maage.’” Logtor sẽn dat n tɩp bãad tõe n vila a zĩig ning sẽn poglã sẽn na yɩl tɩ sõng-a. Woto me, koe-moondb nins sẽn tagsd b taabã yellã sã n moond Rĩungã koɛɛgã, b sõngda neb nins fãa sẽn namsde, la b rat koɛɛgã. La b sẽn sõngd sẽn dat-b sõngrã, b rɩkda togs-n-taar ne a Zeova sẽn get nebã yellã. (Ezekɩɛll 34:15, 16) Yɩɩl-gʋlsdã gomda Wẽnnaam yell n yet woto: “Bãmb maagda neb nins sẽn tar sũ-sãoongã n tɩpd bãmb toodo.”—Yɩɩl Sõamyã 147:3.
Rĩungã koɛɛg sẽn wat ne nafa to-to
15, 16. Kiba-bʋs n wilgd tɩ Rĩungã koɛɛg kõta neb nins sẽn be zu-loees pʋsẽ wã sõngr la raoodo?
15 Yɛl neb sẽn sɩd vɩɩmd kibay n wilgd Rĩungã koɛɛg sẽn sɩd sõngd la a kõt neb nins sẽn be sũ-sãoong pʋgẽ wã raood to-to. Wala makre, a Oreanna sẽn yaa pʋg-yãang n be Amerikdisiidã yam da yii ne vɩɩmã. A Zeova Kaset soab n sɩng a Oreanna kaagre, n karemd Biiblã la Mam Biibl kɩbay sebrã t’a kelgdẽ. * Sɩngrẽ wã, pagã sẽn da be yam-ka-m-meng pʋgẽ wã ra gãeyã a gãagẽ wã n mum a ninã n kelgdẽ, wakat ninga t’a wẽ sir wʋsgo. La pa kaoos la a sɩng n maand modgr n zĩ a gãagã zug karengã wakat ye. Wakat a wãn poore, a ra zĩi sɛɛs zug salõ wã pʋgẽ, n gũudẽ t’a Biiblã karen-saamb wa. Rẽ poore, pagã sɩngame n wat kiris-neb tigissẽ wã Rĩungã Roogẽ. Tigis-kãens kenga a raoodo, t’a sɩng n kãabd sɛb nins sẽn tik Biiblã zugã ned ning fãa sẽn loogd a zakã noore. A Oreanna sẽn da wa n tar yʋʋm 93, a reega lisg n lebg a Zeova Kaset soaba. Rĩungã koɛɛg kɩtame t’a vɩɩmã lebg noog yɛsa.—Yelbũna 15:30; 16:24.
16 Rĩungã koɛɛg sõngda neb nins sẽn bẽed b yõor bãagã ne sõngr sẽn yaa kãsenga. D rɩk makr ne a Maria sẽn yit Eropã. A ra bẽeda a yõor bãaga, n da pa leb n tar saagr ye. A Zeova Kaset rãmbã sẽn wa a nengẽ wã t’a ra bee yam-ka-m-meng pʋgẽ. La a sẽn bãng Wẽnnaam daabã, a vɩɩmã wa n tara võor yɛsa. A reega lisg n lebg a Zeova Kaset soaba, n tall yẽesem koe-moonegã pʋgẽ. A vɩɩmã yaoolem yʋʋm a yiibã sasa, a saagrã la a sũ-noogã ra pukda a nen-wamdẽ wã. A Maria sẽn da wa n kiidẽ wã a ra tara saagr sẽn tar pãng ne vʋʋgrã.—Rom dãmba 8:38, 39.
17. a) Wãn to la Rĩungã koɛɛg sõngd neb nins sẽn sakd-a wã? b) Wãn to la yãmb mengã yã t’a Zeova ‘roosda neb nins fãa sẽn kɩllã’?
17 Kiba-kãensã wilgdame tɩ Rĩungã koɛɛg tõe n sɩd sõnga neb nins sẽn dat sɩd nins sẽn be Biiblã pʋgẽ wã ne b sũy fãa wã. Neb nins sẽn yãbd b nin-nongr kũumã paamda raoodo, b sã n wa bãng kũum vʋʋgrã saagre. (1 Tesalonik rãmba 4:13) Neb sẽn vɩ naong pʋgẽ n modgd n na n dɩlg b zags nebã leb n nanda b mens masã la b tar daoodo, b sẽn wa n bãng tɩ b sã n ket n sakd a Zeova a pa na n tol n bas-bã. (Yɩɩl Sõamyã 37:28) Ne a Zeova sõngre, neb nins yam-ka-m-mengã sẽn namsd wʋsgã paamda sũ-keelem ning b sẽn dat sẽn na yɩl n mao ne yel-kãngã bilf-bilfu, la b kẽer meng tõogdame n yi sũ-sãams kãensã pʋsẽ. (Yɩɩl Sõamyã 40:2, 3) Sɩda, ne pãng ning a Zeova sẽn kõt ne a Gomdã maasmã, a sɩd “doosda neb nins fãa sẽn kɩllã.” (Yɩɩl Sõamyã 145:14) N-ye, d sã n get Rĩungã koe-noog sẽn wat ne belsg ning n kõt neb nins sũy sẽn sãam wʋsg tõnd moonegã zĩigẽ la kiris-neb tigingã pʋgẽ wã, tẽegda tõnd n yɩlemdẽ tɩ d tara koɛɛg ning sẽn yaa noog n yɩɩdã rũndã-rũndã!—Yɩɩl Sõamyã 51:19.
‘Mam pʋʋsda Wẽnnaam bãmb yĩnga’
18. Zʋɩf rãmbã sẽn zãgs koe-noogã, a Poll talla manesem bʋgo, la bõe yĩnga?
18 Baa ne sẽn yaa koɛɛg ning sẽn yaa noog n yɩɩdã la d togsdã, neb wʋsg zãgsd-a lame. Rẽ tõe n kɩtame tɩ d tall manesem bʋgo? D tõe n maana wa tʋm-tʋmd a Polle. Naoor wʋsgo, a moona Zʋɩf rãmbã, la bãmb wʋsg zãgsa fãagr koɛɛgã. B sẽn zãgs-a wã sãama a Poll sũur wʋsgo. A sak n deegame: “Mam tara sũur zɩɩb kãsenga la sũ-sãoong wakat fãa.” (Rom dãmba 9:2) A Poll da zoeta Zʋɩf rãmb nins a sẽn moona nimbãanega. B sẽn zãgs koe-noogã sãama a sũuri.
19. a) Bõe yĩng tɩ d tõe n koms raood wakat-wakate? b) Bõe n sõng a Poll t’a kell n moon koe-noogã?
19 Yaa nimbãan-zoeer yĩng la tõnd me moond koe-noogã. Rẽnd neb wʋsg sã n zãgs Rĩungã koɛɛga, yaa vẽeneg tɩ d tõe n komsa raoodo. Manesem kãng wilgdame tɩ neb nins d sẽn moondã tẽeb neer sɩd pak-d lame. La d segd n tẽega tʋm-tʋmd a Poll makrã yelle. Yaa bõe n sõng-a t’a kell n moon koe-noogã? Baa ne Zʋɩf rãmbã sẽn zãgs tɩ b kõn sak koe-noogã tɩ sãam a sũurã, a Poll pa koms raood n tags t’a pa tõe n sõng Zʋɩf ba a yembr ye. A ra saagdame tɩ kẽer n da ket n tõe n sak Kirist. Woto yĩnga, a Poll gʋlsa woto n wilg a tagsg ne Zʋɩf rãmbã yembr-yembre: “Mam sũur datem la mam sẽn pʋʋsd Wẽnnaam Israɛll yĩnga yaa tɩ bãmb tõe n paam fãagre.”—Rom dãmba 10:1.
20, 21. a) Tõnd koe-moonegã wɛɛngẽ, wãn to la d tõe n tũ a Poll makrã? b) Tõnd koe-moonegã nen-bʋg la d na n ges sõsg ning sẽn pʋgdã pʋgẽ?
20 Ges-y yɛl a yiib a Poll sẽn wilgi. A ra tʋlla ne a sũur fãa tɩ neb kẽer paam fãagre, la a pʋʋsa Wẽnnaam dẽ yĩnga. Rũndã-rũndã d tũuda a Poll makrã. D tʋlla ne d sũy fãa n yã ned ning fãa sẽn tar yam-sõng koe-noogã yĩngã. D ket n pʋʋsda a Zeova sẽn na yɩl n tõog n yã nin-kãensã, sẽn na yɩl n tõog n sõng-b tɩ b tall yel-manesem ning sẽn na n wa ne b fãagrã.—Yelbũna 11:30; Ezekɩɛll 33:11; Zã 6:44.
21 La sẽn na yɩl n paam n sõs ne neb wʋsg n taas-b Rĩungã koɛɛga, pa bũmb ning sẽn kɩt tɩ d moondẽ wã, la koɛɛg ning d sẽn moondã bal yell n segd n pak tõnd ye, la yaa d sẽn moond to-to wã me. D na n wɛgsa gom-zu-kãngã sõsg ning sẽn pʋgdã pʋgẽ.
[Tẽngr note rãmbã]
^ sull 4 Sõs-kãngã na n wɛgsa pipi nens a yiibã, tɩ sẽn na n pʋglã soabã wɛgs neng a tãab-n-soabã.
^ sull 15 Yaa a Zeova Kaset rãmbã n yiis seb-kãngã.
Bõe la y zãms-yã?
• Yaa bʋʋm bʋs yĩng la d sẽn moond koe-noogã?
• Sẽn yɩɩd fãa, yaa koe-bʋg la tõnd sẽn moondã?
• Bark bʋs la neb nins sẽn sakd Rĩungã koɛɛgã paamda?
• Bõe n na n sõng tõnd tɩ d ket n moond koe-noogã?
[Zãmsgã sogsgã]
[Foto rãmba, seb-neng 26]
Pʋʋsgã sõngda tõnd tɩ d ket n moond koe-noogã