Kamba, pẽg-y a Zeova!
Kamba, pẽg-y a Zeova!
‘Pẽg-y a Zeova hal dũniyã tẽngre . . . kom-bɩɩs ne kom-pugli.’—YƖƖL SÕAMYÃ 148:7, 12.
1, 2. a) Kamb wʋsg mii gɩdg-bʋs buud tiiri? b) Bõe yĩng tɩ kambã pa segd n sãam b sũyã, b roagdbã sẽn gɩdgd-b tɩ b ra maan bũmb ninsã yĩngã?
KAMBA nong n mii yɛl nins b sẽn pa tar sor n na n maana vẽenega. Bãmb wʋsg tõe n togs-y-la b sẽn segd n paam yʋʋm sõor ning tɩ b yaool n sak tɩ b pɩʋʋg sor b yembre, tɩ b pa yɩng zĩ-sobd tɩ ta lɛɛr ninga, bɩ n wẽn mobilli, bɩ n zomb montɛɛre. Wakat-wakate, biig tõe n tagsame tɩ b leokda yẽ kosg wʋsg woto: “Bas n gũ yʋʋm a wãn n paase.”
2 Kamba, y mens miime tɩ y roagdbã tagsdame tɩ yaa sõma tɩ b yãk noy sẽn gɩdgd-y ne yɛl kẽer maanego. Tõe tɩ b maanda woto yãmb mengã koglg yĩnga. Y leb n miime me tɩ y sã n sakd y roagdbã, nooma a Zeova. (Kolos rãmba 3:20) Rẽ yĩnga yãmb tagsdame tɩ gɩdg-kãens kɩtame tɩ y nan pa rɩt y vɩɩmã yõod bɩ? B gɩdgda yãmb tɩ y ra rɩ vɩɩmã yel-nood fãa yõod hal tɩ y wa bɩ bɩ? Pa woto lae-lae ye. Bãng-y tɩ tʋʋmd n tʋmd rũndã-rũndã, t’a yõodã yɩɩd zu-noog a to buud fãa y sẽn tõe n gẽegdẽ. Kamba, b kõo yãmb sor tɩ y kẽes y meng tʋʋm-kãng pʋgẽ bɩ? B pa kõ-y sor bal ye, Wẽnnaam sẽn ka to Soabã meng sɩd yet-y lame tɩ y maan woto.
3. A Zeova yeta kambã tɩ b sak zu-no-kãseng bʋgo, la sogs-bʋs la d na n leok masã?
3 Yaa tʋʋm-bʋg yell la tõnd sẽn gomdã? Ges-y sõs-kãngã verse yẽgrã: “Pẽg-y [a Zeova] hal dũniyã tẽngre . . . kom-bɩɩs ne kom-pugli me la nin-kẽemba ne b kamba.” (Yɩɩl Sõamyã 148:7, 12) Ad zu-no-kãseng y sẽn tare: Y tõe n pẽga a Zeova. Kamba, y nongẽ lame n kẽes y meng tʋʋm-kãngã pʋgẽ ne y sũur fãa bɩ? Wʋsg nonga woto maanego. Sẽn na yɩl n bãng bũmb ning sẽn kɩt tɩ tags-kãng zemsã, bɩ d ges sogsg a tãabo. Pipi, bõe yĩng tɩ y segd n pẽg a Zeova? Yiib-n-soaba, wãn to la y tõe n pẽg-a sõma? Tãab-n-soaba, wakat bʋg la y segd n sɩng a Zeova pẽgre?
Bõe yĩng tɩ d segd n pẽg a Zeova?
4, 5. a) Sã n yaa ne Yɩɩl Sõamyã 148 soabã, zĩig sẽn be yamleoog bʋg pʋgẽ la tõnd be? b) Wãn to la bõn-naands nins sẽn pa tõe n gom la b pa tõe n tagsã pẽgd a Zeova?
4 Bʋʋm-kãseng ning sẽn kɩt tɩ d segd n pẽg a Zeova wã yaa a sẽn yaa Naandã yĩnga. Yɩɩl Sõamyã 148 soabã sõngda tõnd tɩ d maan woto wakat fãa. Mams-y n ges y sẽn na n pẽneg neb kʋʋng sẽn lagem taab n yɩɩnd yɩɩn-noogo, y manesem na n yɩɩ wãn to? Y sã n miẽ tɩ yɩɩlã goam yaa sɩda, la tɩ b võorã tara yõodo, tɩ b kõta sũ-noog la b kengd tẽebo, y kõn dat n zãms a goamã la y naag n yɩɩl sɩda? Tõnd wʋsg ra na n maanẽ-la woto. Be neere, Yɩɩl Sõamyã 148 soabã wilgdame tɩ y bee zĩig sẽn wõnd woto pʋgẽ, la a bee yamleoog n yɩɩd rẽ zĩig sẽn zãre. Yɩɩl kãngã bilgda neb kʋʋng-kʋʋng sẽn lagem taab n pẽgd a Zeova. La y sã n wa karemd yɩɩn-kãngã, y na n yãa bõn-sãanga. Bõe la rẽ?
5 Bõn-yood wʋsg nins sẽn pẽgd Wẽnnaam tɩ b bilg-b Yɩɩl Sõamyã 148 pʋgẽ wã pa tõe n gome, b pa tõe n tags me. Wala makre, d karemdame tɩ wĩntoogã, ãdsã, sa-lamdã, sebgã, la tãensã pẽgda a Zeova. Wãn to la bõn-kãensã sẽn pa vɩyã tõe n pẽg a Zeova? (Verse a 3, a 8, a 9) Sɩda, yaa woto me la tɩɩsã, mogrã pʋgẽ bõn-naands la rũmsã maanda. (Verse a 7, a 9, 10) Yãmb zoe n gesa wĩndg lʋɩɩs sẽn be rasãnde, bɩ kiuugã sẽn wat n yaa pɛɛlg faga sẽn kẽnde, bɩ rũms sẽn deemde, bɩ zĩ-neer sẽn be yamleoog sɩda? Sã n yaa woto, dẽnd yãmb wʋma pẽgr yɩɩll sẽn yit naanegã pʋgẽ. Bũmb nins fãa a Zeova sẽn naana tẽegda tõnd tɩ yaa yẽ la Naand sẽn tõe fãa wã, tɩ ãndũniyã fãa zugu ned baa a ye ka be n tar pãnga, yam la nonglem wa yẽ ye.—Rom dãmba 1:20; Wilgri 4:11.
6, 7. a) Yɩɩl Sõamyã 148 soabã wilgdame tɩ bõn-naands bʋs sẽn tar yam n pẽgd a Zeova? b) Bõe yĩng tɩ d rat n pẽg a Zeova? Rɩk-y makr n wilgi.
6 Yɩɩl Sõamyã 148 soabã leb n wilgdame tɩ malɛgsã la ninsaalbã me pẽgda a Zeova. Verse a 2 wã pʋgẽ, d yãta Wẽnnaam a Zeova saasẽ “pãens rãmba” sẽn yaa malɛgsã sẽn pẽgd-a. Verse 11 wã pʋgẽ, b boonda ninsaalb sẽn yaa pãens rãmb wala rĩm dãmb la bʋ-kaoodb tɩ b naag pẽgrã pʋgẽ. Malɛgsã sẽn tar pãngã sã n pẽgd a Zeova ne sũ-noogo, ninsaan-bʋg n tõe n yeel tɩ yẽ yaa kãseng wʋsg n pa tõe n maan woto? Sẽn paase, verse 12 la 13 wã pʋgẽ, b yeta kom-bɩɩsã me tɩ b naag n pẽg a Zeova. Yaa woto la yãmb dat n maan bɩ?
7 D rɩk makre. Yãmb sã n tar y zo-nongr sẽn tar minim, wala makre, ɛspoorã, te-neeb maaneg bɩ mizikã wɛɛngẽ, y kõn gom a yell ne y zakã neb la y zo-rãmb a taab sɩda? Sãmbg sẽn kae, yaa woto la y na n maane. Rẽnd d sã n wa bãng a Zeova sẽn maan bũmb ning fãa wã, na n kɩtame tɩ d gomd a yell woto me. Wala makre Yɩɩl Sõamyã 19:2, 3 yetame tɩ ãdsã sẽn be yĩngrã kõta kaseto. Tõnd sã n tags bõn-kãsems nins a Zeova sẽn maanã yelle, d pa tõe n pa gom ne neb a taabã d Wẽnnaamã yell ye.
8, 9. Yaa bʋʋm bʋs yĩng la a Zeova sẽn dat tɩ d pẽg-a wã?
8 Bʋʋm-kãseng a to sẽn kɩt tɩ d segd n pẽg a Zeova yaa tɩ yẽ mengã ratame tɩ d maan woto. Bõe yĩnga? Yaa t’a rata tɩlae tɩ ninsaalbã pẽg-a bɩ? Ayo. Tõnd sẽn yaa ninsaalbã, d ratame tɩ b pẽgd-d wakat-wakate, la pa woto ne a Zeova sẽn yaa kãseng wʋsg n yɩɩd tõnd zĩig sẽn zãrã ye. (Ezai 55:8) A pa maand yam-yoog ne a mengã la a zʋg-sõma wã ye. (Ezai 45:5) Baasg zãnga a ratame tɩ d pẽg-a, la d sã n maand woto, noom-a lame. Bõe yĩnga? D ges bʋʋm a yiibu. Pipi, a miime tɩ d segd n pẽg-a lame. A naana tõnd ne tẽeb ratem, tɩ d tʋll n balem sẽn yɩɩd-do. (Matɩe 5:3, NW) A Zeova sã n ne tõnd sẽn pidsd ratem kãngã, noom-a-la wala y roagdbã sũy sẽn noome, b sã n get-y tɩ y rɩt rɩɩb sẽn paasd laafɩ.—Zã 4:34.
9 Yiib-n-soaba, a Zeova miime tɩ tara yõod ne neb a taabã tɩ b wʋmd tõnd sẽn pẽgd-a. Tʋm-tʋmd a Poll gʋlsa bi-bɩɩg a Tɩmote gom-kãensã: “Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga la neb nins sẽn kelgd foomã.” (1 Tɩmote 4:16) N-ye, yãmb sã n zãmsd neb a taabã Wẽnnaam a Zeova zugu, n pẽgd-a, bãmb me tõe n wa bãnga a Zeova. Bãng-kãng tõe n wa kõ-b-la fãagr wakat sẽn pa sat yĩnga!—Zã 17:3.
10. Bõe n kɩt tɩ d pẽgd d Wẽnnaamã?
10 La bʋʋm a to yĩng me n kɩt tɩ d segd n pẽg a Zeova. Tẽeg-y makr ning d sẽn dɩk y zo-nongrã sẽn tar tõogã zugã yelle. Yãmb sã n wʋm ned sẽn togsd ziri y zoa kãng zug n sãamd a yʋʋre, y kõn kɩɩs a soabã la y pẽg y zoa wã sɩda? Bɩ y bãng tɩ b rõda a Zeova wʋsg dũni kãngã pʋgẽ. (Zã 8:44; Wilgri 12:9) Woto n kɩt tɩ neb nins sẽn nong-a wã togsd sɩd a zugu, n wilgdẽ tɩ bɛɛbã sẽn yetã yaa ziri. Yãmb me rat n wilga y nonglem la y mi-beoog ne a Zeova, n wilg tɩ y ratame t’a yɩ y Naaba, la pa a bɛ kãseng a Sʋɩtãan la y rat t’a yɩ y naab bɩ? Y tõe n maana woto fãa, y sã n pẽgd a Zeova. Sokrã masã la woto: wãn to la y tõe n pẽg-a?
Kamb kẽer sẽn pẽg a Zeova to-to
11. Biiblã mak-bʋs n wilgd tɩ kambã tõe n pẽga a Zeova sõma?
11 Biiblã wilgdame tɩ kambã nong n pẽgda a Zeova sõma. Wala makre, Israɛll bipugl a yembr la Siri nebã tall n kẽng yembdo. A kõo a zu-soben-poakã kasetã ne raood n gom a Zeova no-rɛɛs a Elize yelle. Bipuglã goam yɩɩ sabab tɩ yel-solemd maane, la rẽ kõo kaset sẽn tar pãnga. (2 Rĩm dãmba 5:1-17) A Zezi me sẽn da wa n yaa biiga, a kõo kasetã ne raoodo. Yɛl nins fãa a sẽn maan a sẽn da wa n yaa biig tɩ b ra tõe n gʋls Gʋlsg Sõamyã pʋgẽ wã sʋka, a Zeova yãka yel-yɛng n kɩt tɩ b gʋlse. Yaa a Zezi sẽn da wa n tar yʋʋm 12, n da kẽ Zerizalɛm wẽn-doogẽ wã n sokd tũudmã karen-saam dãmb ne raoodã, hali t’a sẽn da mi a Zeova soayã to-to wã ling-b wʋsgã.—Luk 2:46-49.
12, 13. a) Bõe la a Zezi maan wẽn-doogẽ wã bilf sẽn deng a kũumã, la neb nins sẽn da be be wã talla manesem bʋgo? b) A Zezi tagsg yɩɩ bõe ne pẽgr goam nins kambã sẽn togsã?
12 A Zezi sẽn wa n bɩ wã, a kɩtame me tɩ kambã pẽg a Zeova. Wala makre, rasem a wãn bal sẽn deng a kũumã, a kẽnga Zerizalɛm wẽn-doogẽ wã. Biiblã yeelame t’a maana “bõn-kãsems” be. A riga neb nins sẽn da rɩk zĩ-sõng kãngã n maan tɩ lebg wagda zĩigã n yiisi. A leb n maaga zoens la põeyã. Nebã fãa sẽn da be beenẽ wã, sẽn yɩɩd fãa tũudmã taoor dãmb ra segd n pẽga a Zeova ne a Biriblã sẽn yaa Mesi wã. La zu-bʋko, neb wʋsg sẽn zĩnd be wakat kãngã wã pa pẽg-b ye. B ra miime tɩ yaa Wẽnnaam n tʋm a Zezi, la b ra zoeta tũudmã taoor dãmba. La neb n pẽg-a ne raoodo. Yãmb mi sẽn da yaa neb ninsi? Biiblã yetame: “Maan-kʋʋdba kãsem dãmba ne gʋlsdba sũyã sãamame bãmb sẽn yã bõn-kãsems nins a Zezi sẽn maana, la kamba sẽn kelemd Wẽnnaam dooga pʋgẽ n yetẽ: ‘Hosanna! a Davɩɩd Biiga.’ Bãmb soka [a Zezi]: ‘Yãmb wʋmda kamba sẽn yeta bɩ?’”—Matɩe 21:15, 16; Zã 12:42.
13 Maan-kʋʋdb kãensã ra tẽedame t’a Zezi ra na n yeela kamb nins sẽn pẽgd-a wã tɩ b sĩndi. La a Zezi maana woto bɩ? Ayo! A leoka maan-kʋʋdbã tɩ: “N-yẽe, yãmb nan ka karem gom-kãens sẽn yeta: ‘Yãmb paama pẽgre sẽn yit kom-bõonego la kamb sẽn ket n yẽsemda noe pʋsẽ bɩ’?” Vẽenega, a Zezi ne a Ba wã sũy ra nooma ne kambã pẽgrã. Kom-kãensã ra maanda bũmb kãsembã fãa sẽn da segd n maandẽ. Kambã yamẽ wã, yɛlã fãa ra yaa vẽeneg ne-ba. B yãa ra-kãngã sẽn maand bõn-kãsemse, n gomd ne raood la tẽebo, la a wilgd nonglem wʋsg ne Wẽnnaam la ne a nebã. A sẽn da yet t’a yaa “a Davɩɩd Biigã” bɩ Mesi wã, b sẽn kãab t’a watame wã sɩd yaa sɩda. Kambã paama bark b tẽebã yĩnga, n paam zu-noog meng n pids bãngr-gomde.—Yɩɩl Sõamyã 8:3.
14. Wãn to la tõod nins kambã sẽn tarã tõe n sõng-b tɩ b pẽg Wẽnnaam?
14 Bõe la mak-kãensã tõe n zãms tõndo? Tɩ kambã tõe n pẽga a Zeova sõma. Naoor wʋsgo b nee sɩdã vẽeneg la nana-nana, n wilgd b tẽebã ne b sũy fãa la ne yẽesem. B leb n tara bũmb ning yell b sẽn gom Yelbũna 20:29 pʋgẽ wã. Be b yeta woto: “Kom-bɩɩs pãng la b waoogre.” N-ye, kamba, y tara pãng y sẽn sɩd tõe n dɩk n pẽg a Zeova. Wãn to masã la y tõe n dɩk y pãngã n tʋm sõma?
Wãn to la y tõe n pẽg a Zeova?
15. Sẽn na yɩl n pẽg a Zeova sõma, yam bʋg n yaa tɩlae?
15 Tõog n pẽg Wẽnnaam sõma wã yaa bũmb sẽn sɩngd sũurẽ. Yãmb sã n pẽgd a Zeova sẽn na yɩl n ta neb a taabã yam bala, y pa tõe n maan woto sõma ye. Tẽeg-y tɩ noor ning sẽn yaa kãseng n yɩɩd a taabã fãa wã yaa: “Nong Zusoaba fo Wẽnnaam ne f sũur fãa, la ne f sɩɩga fãa, la ne f yam fãa.” (Matɩe 22:37) Yaa yãmb mengã Biibl zãmsgã n kɩt tɩ y wa bãng a Zeova sõma bɩ? Zãmsg a woto segd n kɩtdame tɩ f tall nonglem ne a Zeova. F sã n tar nonglem kãnga, f na n pẽgd-a lame. Yãmb tʋlsmã sã n wa lebg vẽeneg la a tar pãnga, y na n pẽga a Zeova ne yẽesem.
16, 17. Wãn to la tõnd yel-manesmã tõe n kɩt tɩ b pẽg a Zeova? Rɩk-y makr n wilgi.
16 Masã, nand meng tɩ d ges yãmb sẽn na n yeel bũmb ning n pẽg-a wã, bɩ y ges y sẽn na n tall manesem ningã. A Elize wakatẽ Israɛll bipugl kãngã sã n da nong n pa waoogd neb bɩ n pa pʋ-peelem soaba, yãmb tagsdame t’a Siri zu-soben dãmbã ra na n kelg-a lame, a sẽn wa n gom a Zeova no-rɛɛsã yellã bɩ? Ayo. Woto me, nebã na n kelga yãmb neere, b sã n neẽ tɩ y waoogda nebã, tɩ y tara pʋ-peelem la y tara yel-manesem sẽn yaa sõma. (Rom dãmba 2:21) D rɩk makre.
17 Portigalle, lekollẽ wã, b da rat n modga yʋʋm 11 bipugl t’a maan kibs rãmb sẽn da kɩɩsd a sũur kasetã sẽn paam Biiblã zãmsgã. Ne waoogre, a wilga a karen-saambã bũmb ning sẽn kɩt t’a pa tõe n maan rẽ wã, la a karen-saambã yaal-a lame. Kell n yɩɩ woto n kaoose, tɩ karen-saambã ye mak naoor wʋsg n na n ning-a yãnde, n paoog a tũudmã. La bipuglã kell n talla waoogr manesem. Maana yʋʋma, tɩ bipugl kãng wa lebg wakat fãa so-pakda, bɩ wakat fãa koe-moonda. Tigis-kãseng a yembrẽ, neb nins sẽn deegd lisgã sʋka a bãnga ned a yembre. Ra yaa yẽ pĩnd karen-saam-poakã. B mobga taab n daag nintãm, t’a karen-saambã yeel-a t’a zɩ n yĩm t’a ra yaa karen-biig sẽn waoog neb ye. A Zeova kaset soab n da moon-a koe-noogã, tɩ karen-saambã gom bipugl kãngã sẽn da yɩ a karen-biigã manesmã yelle. Yaa rẽ n yɩ sabab tɩ Biibl zãmsg sɩnge, tɩ pʋg-kãngã sak sɩd ning sẽn be Biiblã pʋgẽ wã. N-ye, yãmb manesmã tõe n talla pãng wʋsg n kɩt tɩ neb pẽg a Zeova!
18. Bõe la biig tõe n maane, a yam sã n yood ne a sɩng sõsg Biiblã la Wẽnnaam a Zeova zugu?
18 Wakat ninga yãmb getame tɩ yaa toog tɩ y sɩng sõsg y tẽebã zug lekollẽ wã bɩ? Pa ne yãmb bal la yaa toog ye. La y tõe n kɩtame tɩ neb a taabã sok yãmb bũmb y tẽebã zugu. Wala makre, sã n pa kɩɩsd laloa wã, la sã n sakd maanego, bõe yĩng tɩ y pa na n tall sɛb sẽn tik Biiblã zug n wa karem rɩɩbã bɩ sasa a taab sẽn zemse? Yãmb karen-bi-taasã tõe n sogsa yãmb y sẽn karemd bũmb ningã zugu. Y sã n leok-b la y yeel-b bũmb ning y sẽn get tɩ bee yamleoog sõsgã bɩ sebr ning y sẽn zãadã pʋgẽ wã, tõe tɩ sõsg sẽn be yamleoog n na n sɩng zĩig pʋgẽ. Tẽeg-y n sogs-y y karen-bi-taasã n bãng b sẽn tagsd bũmb ningã. Kelg-y b ne waoogre, n togs-b yãmb sẽn zãms bũmb ning Biiblã pʋgẽ wã. Kamb wʋsg pẽgda Wẽnnaam lekollẽ wã. Rẽ kõt-b-la sũ-noog wʋsgo, la sõngd neb wʋsg tɩ b bãngd a Zeova.
19. Wãn to la kambã tõe n moon koɛɛgã tɩ yɩ sõma n paas zak-zak koe-moonegã sasa?
19 Sor sẽn yaa sõma wʋsg sẽn na yɩl n pẽg a Zeova yaa zak-zak koe-moonegã. Y sã n nan pa moond koe-noogã, bõe yĩng tɩ y pa na n yãk rẽ tɩ yɩ y bõn-datla? Y sã n zoe n yaa koe-moonda, bõn-datɩ a taab n be y sẽn tõe n yãk bɩ? Wala makre, y tõeeme n pa togsd bũmb a yembr zak fãa pʋgẽ, y sẽn na n bao soay n maneg y koɛɛgã wilgri, la y kos y roagdbã wall neb a taab sẽn tar minim saglse. Zãms-y y sẽn tõe n tʋm ne Biiblã to-to n paase, la y bao n bãng y sẽn na n maan lebg-n-tɩ-ges rãmb sẽn yaa sõma, la y sɩng Biibl zãmsg ne ned to-to. (1 Tɩmote 4:15) Yãmb sã n pẽgd a Zeova woto n paasdẽ, y na n tʋmame tɩ yɩ sõma n paase, la y na n paama sũ-noog n paas koe-moonegã pʋgẽ.
Wakat bʋg la y segd n sɩng a Zeova pẽgre?
20. Bõe yĩng tɩ kambã pa segd n tags tɩ b yaa yãas wʋsg ne b na tõog n pẽg a Zeova?
20 Sogsg a tãabã tõnd sẽn sogs sõs-kãngã pʋgẽ wã sʋka, yaa yaoolem sok-kãngã leokr n yaa nana n yɩɩda. Ges-y Biiblã meng leokre: “Tẽeg f naanda yell f bi-bɩɩlem wakate.” (Koɛɛg Soaba 12:1) N-ye, yaa masã la y segd n sɩng a Zeova pẽgre. Yaa nana tɩ y yeel tɩ: “M yaa yãag wʋsg ne m tõog n pẽg a Zeova. M pa tar minim ye. Rẽnda m bas tɩ m sã n wa bɩ.” Bɩ y bãng tɩ y sã n tagsd woto, pa sɩng ne yãmb ye. Wala makre, bi-bɩɩg a Zeremi yeela a Zeova: “Zusoab a Wẽnnaam, mam ka mi goam ye, mam nan yaa biig bala.” A Zeova kenga a pɛlg n yeel t’a pa segd n zoe rabeem ye. (Zeremi 1:6, 7) Tõnd me sã n wa pẽgd a Zeova d pa segd n zoe rabeem ye. Wẽng pa be sẽn tõe n maan tõnd t’a Zeova pa tõog n maneg-a zãng ye.—Yɩɩl Sõamyã 118:6.
21, 22. Bõe yĩng tɩ b rɩk kamb nins sẽn pẽgd a Zeova wã n mak ne meenem, la bõe yĩng tɩ mak-kãng kengd raoodo?
21 Rẽnd kamba, tõnd sagenda yãmb tɩ y ra maan yam-yoog la y pẽg a Zeova ye. Yaa yãmb sẽn yaa kamb masã wã la sasa ning sẽn zems n yɩɩd ne yãmb tɩ y na n tʋm tʋʋmd ning sẽn tara yõod n yɩɩd tẽngã zug rũndã-rũndã wã. Y sã n maan woto, y na n lebga ãndũniyã gill zak ning sẽn be yamleoogã neb nins sẽn pẽgd a Zeova wã neda. A Zeova sũur noomame, yãmb sẽn be zag-kãng pʋgẽ wã yĩnga. Ges-y gom-kãensã vʋʋsem sõng sẽn vẽneg yɩɩl gʋlsdã t’a taas a Zeova wã: “Yãmb neba na n dɩka b mens n kõ yãmb ne yamleoog daar ninga yãmb kʋʋnga sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.”—Yɩɩl Sõamyã 110:3.
22 Meenem sẽn pɩnd yibeoog bee rasãnde. A maagda zĩigã, n yãgda, n yaa wʋsg-wʋsgo. Yaa woto la a Zeova get yãmb sẽn yaa kamba, sẽn pẽgd-a wakat fãa wakat tood kãensã sasa wã. Vẽenega, yãmb sẽn yãk yam n pẽgd a Zeova wã noogda a sũuri. (Yelbũna 27:11) Kamba, maan-y y sẽn tõe fãa n pẽg a Zeova!
Wãn to la y na n leoke?
• Bʋʋm kãsems kẽer bʋs yĩng la d segd n pẽg a Zeova?
• Biiblã mak-bʋs n wilgd tɩ kambã tõe n pẽga a Zeova sõma?
• Wãn to la kambã tõe n pẽg a Zeova rũndã-rũndã?
• Wakat bʋg la kambã segd n sɩng a Zeova pẽgre, la bõe yĩnga?
[Zãmsgã sogsgã]
[Foto, seb-neng 18]
Yãmb zoa sã n tar minim wʋsgo, y kõn gom dẽ yell ne neb a taabã sɩda?
[Foto, seb-neng 21]
Y sã n dat tɩ y koe-moonegã yɩ sõma n paase, bɩ y kos Kaset soab sẽn tar minim saglse