Koe-noog tẽnsã fãa neb yĩnga

“Yãmb na n yɩɩ mam kaset dãmb . . . dũniyã tɛk fãa.”—TƲƲMA 1:8.

1. D sẽn yaa Biiblã karen-saam dãmbã, d maanda gũusg ne bõe, la bõe yĩnga?

KAREN-SAAM sõng pa gũusd ne a sẽn yet a karen-biisã bũmb ningã bal ye, a gũusda ne a sẽn yet-a to-to wã me. Tõnd sẽn yaa Biiblã sɩdã karen-saam dãmbã, tõnd me maanda woto. D maanda gũusg ne koɛɛg ning d sẽn moondã, la d gũusd ne d sẽn moond koe-kãngã to-to wã me. Tõnd koɛɛgã sẽn yaa Wẽnnaam Rĩungã koe-noogã  pa toeemd ye, la d kɩtdame tɩ d sẽn moond-a to-to wã zemsd ne nebã. Bõe yĩnga? Yaa sẽn na yɩl n tõog n paam n moon neb wʋsg wa d sẽn tõe tɛka.

2. Tõnd sã n kɩtdẽ tɩ d koe-moonegã zemsd ne nebã, ãnd dãmb togs-n-taar la d rɩkda?

² D sã n kɩtdẽ tɩ d moonegã zemsd ne nebã, d rɩkda Wẽnnaam pĩnd wẽndẽ sõgen dãmbã togs-n-taare. D rɩk makr ne tʋm-tʋmd a Polle. A yeelame: “Ne Zʋɩf rãmba mam lebga wa Zʋɩf . . . La ne neb nins sẽn ka tar tõogã, mam lebga wa ned sẽn ka tar tõogo . . . La ne neb nins sẽn ka pãnga, mam lebga wa ned sẽn ka pãnga tɩ mam tõe n paam neb nins sẽn ka pãnga. Mam lebga bũmb fãa neba yĩnga tɩ mam sẽn sakd bũmb fãa wã yĩnga, mam tõe n fãaga kẽere.” (1 Korẽnt dãmba 9:19-23) A Poll sẽn da kɩtd t’a sẽn moond to-to wã zemsd ne nebã, ra womda bi-sõma. Tõnd me sã n kɩtdẽ tɩ d sẽn moond to-to wã zemsd ne neb nins d sẽn sõsd ne wã, d na n paama bi-sõma.

“Neb nins fãa sẽn be dũniyã zugã”

3. a) Zu-loe-bʋg la d segd d moonegã tʋʋmdẽ? b) Wãn to la Ezai 45:22 goamã paamd pidsg rũndã-rũndã?

³ Zu-loe-kãseng neb nins sẽn moond koe-noogã sẽn segdã yaa moonegã zĩig sẽn yalmã, “dũniyã tɛk fãa.” (Matɩe 24:14) Yʋʋm kob-gĩnd ning sẽn loog-a wã, a Zeova sõgen dãmb wʋsg tʋma wʋsg n ta tẽn-paalsẽ sẽn na yɩl n moon koe-noogã. Rẽ woma bi-bʋse? Waa ne fɩɩgr kãseng dũniyã gill zugu. Yʋʋmd 1900 wã poor bilfu, b wilgame tɩ ra yaa tẽns a wãn pʋsẽ bal la koɛɛgã ra moonda, la masã, a Zeova Kaset rãmbã moonda tẽns 235 pʋsẽ. Sɩd-sɩda, Rĩungã koe-noog moonda “neb nins fãa sẽn be dũniyã zugã.”—Ezai 45:22.

4, 5. a) Ãnd dãmb n sõng wʋsg ne koe-noogã yelgre? b) Bõe la tʋʋm wil kẽer yeel neb nins sẽn yi tẽn-zãrsẽ n wa moond bãmb tẽngẽ wã wɛɛngẽ?

 ⁴ Bõe n kɩt tɩ fɩɩgrã yɩ wʋsg woto? Yaa yɛl wʋsg yĩnga. Misioneer dãmb nins sẽn paam zãmsg Watstawa Biibl lekollẽ b sẽn boond tɩ Gileaadã, la sẽn pa kaoos pʋgẽ, neb sõor sẽn yɩɩd 20000 wã sẽn paam b diplom dãmb Wẽnnaam Tʋʋmdã Zãmsg Lekollẽ wã sõngda wʋsgo. Sẽn paase, a Zeova Kaset rãmb wʋsg sẽn yik n kẽng tẽns Rĩungã koe-moondb raab sẽn yaẽ kãseng n yɩɩdã pʋsẽ, n yiis b mens ligd rẽ yĩnga me sõngda woto. Kiris-nin-kãensã, rap la pagba, kom-bɩɩs la kãsemba, sẽn kẽ-b kãadem la sẽn pa kẽ-b kãadem sẽn tall mong-m-meng yam woto wã sõngda wʋsg ne Rĩungã koe-mooneg dũniyã gill zugu. (Yɩɩl Sõamyã 110:3; Rom dãmba 10:18) D nand-b-la wʋsgo. Ges-y tʋʋm wil kẽer sẽn gʋlse, n gom neb nins sẽn yi zĩ-zãrsẽ n tɩ moond zĩig ning koe-moondbã raab sẽn yaẽ kãseng n yɩɩdã yellã sẽn yete:

⁵ “Kaset rãmb kãensã d sẽn nand wʋsgã lʋɩta taoor n moond zĩis sẽn zãrẽ, n sõngd n lugund tigims paalse, la b sõngd beenẽ saam-biisã tɩ b bɩt tẽebã pʋgẽ.” (Ekoatɛɛr) “Kaset rãmb kobs nins sẽn yaa sãamb sẽn be ka n moond koe-noogã sã n looge, na n yɩɩ toog ne tigimsã tẽebã wɛɛngẽ. B sẽn be ne tõndã yaa bark bũmbu.” (Repibilik dominikɛn) “Tõnd tigims wʋsg pʋsẽ, saam-bi-pogs wʋsg n be be, tɩ wakat ninga b sõora tat 70 kiris-neb koabg zugu. (Yɩɩl Sõamyã 68:12) Bãmb wʋsg yaa nin-paals sɩdã pʋgẽ, la saam-bi-pogs nins sẽn yaa so-pakdb sẽn pa kẽ kãadem la sẽn yit tẽn-zẽmsã sõngda wʋsg ne nin-paals kãensã zãmsgo. Saam-bi-pogs kãens sẽn yi tẽn-zãrsẽ n wa wã yaa sõngr meng n kõ tõndo!” (Erop yaang tẽng a yembre) Yãmb zoe n tagsame n na n tɩ moon koe-noogã tẽn-zẽng bɩ? *—Tʋʋma 16:9, 10.

“Neb piig sẽn gomd goam toɛy-toɛyã”

6. Wãn to la Zakari 8:23 wilgd buud-goamã zu-loɛɛg tõnd koe-moonegã pʋgẽ?

⁶ Zu-loe-kãseng a to yaa buud-goam toɛy-toɛy wʋsgã b sẽn gomd tẽngã zugã. Wẽnnaam Gomdã reng n togsa woto: “Saasẽ pãng soaba yeelame tɩ baraare, bu-zẽms piig sẽn yaa buud toor-toor [la sẽn gomd buud-goam toɛy-toɛy, NW] na n gãda Zʋɩf ned fuug n yeele: ‘Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.’” (Zakari 8:23) Bãngr-gom-kãngã rũndã-rũndã pidsgã pʋgẽ, neb piigã makda kʋʋn-kãsengã, b sẽn gom a yell bãngr-gomd pʋgẽ Wilgr 7:9 wã. La ges-y tɩ sã n yaa ne a Zakari bãngr-gomdã, ‘neb piigã’ ra pa na n yi buudã fãa pʋsẽ bal ye, b ra na n yɩɩ ‘neb sẽn gomd buud-goam toɛy-toɛy’ me. Tõnd yãa bãngr-gomdã nen-kãseng kãngã pidsg bɩ? N-ye.

7. Sõor bʋs n wilgd tɩ neb “sẽn gomd goam toɛy-toɛy” la b moond koe-noogã?

⁷ Ges-y sõor kẽere. Yʋʋm pis-nu sẽn looge, b yiisa tõnd sɛbã buud-goam 90 pʋsẽ. Rũndã-rũndã, yɩɩda buud-goam 400. ‘Tʋm-tʋmd sẽn tũud sɩd la sẽn tar yamã’ modga wʋsg n yiis sɛb ne buud-goam neb sõor bilf sẽn gomd menga. (Matɩe 24:45) Wala makre, Biiblã sɛb bee ne Groelãnd buudã goam (neb 47000 sẽn gomdã), ne Palau (neb 15000 sẽn gomdã), ne Yapese (neb sẽn pa ta 7000 sẽn gomdã).

“Kʋɩlen-kãseng” pakame tɩ d tõe n moon neb wʋsgo

8, 9. Yel-bʋg n pak “kʋɩlen-kãseng” n kõ-do, la Kaset rãmb tusa talla manesem bʋgo?

⁸ La rũndã-rũndã, tõe tɩ pa tɩlae tɩ d kẽng tẽn-zẽng n yaool n yã neb sẽn gomd buud-goam toɛy-toɛy n moon-b koe-noogã ye. Yʋʋm sẽn pa kaoos pʋgẽ, sãamb sẽn wa ne yamleoog la neb milyõ rãmb sẽn zoe n yi b tẽnsẽ n tɩ be tẽns nins sẽn yidgã pʋsẽ wã kɩtame tɩ tẽn-kãens pʋsẽ, sãamb wʋsg be n gomd buud-goam toɛy-toɛy wʋsgo. Wala makre, Paari sẽn yaa Fãrens na-tẽngã pʋgẽ,  yaa buud-goam 100 la b gomda. Torõnto sẽn be Kanada wã pʋgẽ, yaa buud-goam 125, tɩ Lõndr sẽn yaa Ãngeletɛɛr na-tẽngã pʋgẽ, yɩɩd buud-gom-zẽms 300. Sãamb wʋsg sẽn wa tigimsã mooneg zĩis wʋsg pʋsẽ wã paka ‘kʋɩlen-kãseng’ sẽn kɩt tɩ d tõe n moon buudã fãa neb koe-noogã.—1 Korẽnt dãmba 16:9.

⁹ Kaset rãmb tusa sakdame n na n zãms buud gom-zẽnga, sẽn na yɩl n tɩ moon tẽnsã fãa neba. Yaa toog ne bãmb wʋsgo, la b modgrã paamda keoobo, b paamda sũ-noogo, b sẽn sõngd sãambã, sẽn wa-b ne yamleoogã la neb nins meng sẽn zoe b tẽns n wa soond be wã tɩ b bãngd sɩd ning sẽn be Wẽnnaam Gomdã pʋgẽ wã yĩnga. Sẽn pa kaoos pʋgẽ, sẽn deeg-b lisg rasem a tãab tigis-kãsengẽ wã Erop tẽng a yembrẽ, bãmb 40 koabg zug ra yii tẽn-zẽmse.

10. Wãn to la y tʋmd ne Une bonne nouvelle pour des gens de toutes nations seb-bilã? (Ges-y zĩ-gũbr sẽn wilgd “Une bonne nouvelle pour des gens de toutes nations seb-bilã nens kẽere,” sẽn be seb-neng 32 pʋgẽ wã.)

¹⁰ Yaa sɩd tɩ tõnd sʋkã, neb wʋsg pa tõe n zãms buud-gom-sãang ye. Baa ne rẽ, d tõe n sõnga sãambã, n tʋm sõma ne seb-bi-paall ning gom-zug sẽn yaa: Une bonne nouvelle pour des gens de toutes nations, * sẽn tar Biiblã koɛɛg sẽn be yamleoog buud-goam toɛy-toɛy pʋsẽ wã. (Zã 4:37) Yãmb rɩkda seb-bi-kãngã n tʋmd koe-moonegã pʋgẽ bɩ?

Nebã sã n pa rat n kelge

11. Zu-loe-bʋg la b segd mooneg zĩis kẽer pʋsẽ?

¹¹ A Sʋɩtãan pãn-tusdgã sẽn tar paasg tẽngã zugã yĩnga, zu-loɛɛg a to la d nong n segda. Yaa zĩis kẽer nebã sẽn pa rat n kelg koɛɛgã sõma wã. Yaa sɩd tɩ rẽ pa ling tõnd ye, bala a Zezi reng n togsame tɩ nebã na n talla manesem kãngã. A goma tõnd wakatã yell n yeel woto: “Neb wʋsg nonglem na n lebga maasga.” (Matɩe 24:12) Sɩda, Wẽnnaamã tẽeb la Biiblã waoogr boogda neb wʋsg nengẽ. (2 Pɩɛɛr 3:3, 4) Woto yĩnga, dũniyã babs sãnda pʋsẽ, pa neb wʋsg n lebgd Kirist karen-biis ye. La rẽ pa rat n yeel tɩ tõnd kiris-nin-taasã sẽn yaa d saam-biisã sẽn moond zĩ-kãens buud pʋsẽ wakat fãa wã, b moonda zaalem yĩng ye. (Hebre dãmba 6:10) Bõe yĩng tɩ pa woto? Bɩ d ges sẽn pʋgdã.

12. Tõnd koe-moonegã bõn-datɩ a yiib la bʋse?

¹² A Matɩe Evãnzillã wilgda tõnd koe-moonegã bõn-datɩ kãsems a yiibu. A yembr yaa d “maan neba buud fãa tɩ b yɩ . . . karen-biisi.” (Matɩe 28:19) A to wã yaa tɩ Rĩungã koɛɛg yɩ ‘kaseto.’ (Matɩe 24:14) Bõn-datɩ a yiibã fãa tara yõodo, la yaoolem soabã tara yõod wʋsgo. Bõe yĩnga?

13, 14. a) Kirist belmã bãnd nen-kãseng a yembr yaa bʋgo? b) Bõe la d segd n ning d yamẽ, sẽn tɩ yɩɩd fãa d sã n wa moond zĩis nins nebã sẽn pa rat n kelgẽ wã?

¹³ Biibl gʋlsd a Matɩe gʋlsame n wilg tɩ tʋm-tʋmdbã kosa a Zezi woto: “Bɩ y togs tõnd . . . bãnd ninga sẽn na n wilg yãmb waoongo la dũniyã sɛɛb wakate.” (Matɩe 24:3) A Zezi leokame n yeel tɩ bãndã nen-kãseng a yembr yaa koe-moonegã dũniyã gill zugu. A ra gomda karen-biis maaneg yell bɩ? Ayo. A yeelame: ‘Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga.’ (Matɩe 24:14) Woto, a Zezi wilgame tɩ Rĩungã koe-mooneg meng ra na n yɩɩ bãndã nen-kãsenga.

¹⁴ Rẽnd d sẽn moond Rĩungã koe-noogã, d tẽrame tɩ baa d sã n pa tõogd n maand karen-biis wakat fãa, d tõogd n kõta ‘kaseto.’ Baa nebã manesem sẽn yaa to-to ne koɛɛgã, b mii tõnd sẽn maand bũmb ningã, la woto d sõngd n pidsda a Zezi bãngr-gomdã. (Ezai 52:7; Wilgri 14:6, 7) A Jordy sẽn yaa a Zeova Kaset soab sẽn yaa bi-bɩɩg n be Eropã yeelame: “M sẽn mi t’a Zeova tũnugda ne-m n pidsd Matɩe 24:14 kõta maam sũ-noog wʋsgo.” (2 Korẽnt dãmba 2:15-17) Sãmbg sẽn ka be, yãmb me tagsda woto.

 B sã n wa kɩɩsd tõnd koɛɛgã

15. a) A Zezi pĩnd n keooga a karen-biisã ne bõe? b) Baa ne kɩɩsgã sẽn be wã, bõe n sõngd tõnd tɩ d moondẽ?

¹⁵ Gɩdgrã wata ne zu-loɛɛg a to Rĩungã koe-noog mooneg taoore. A Zezi pĩnd n keooga a karen-biisã woto: “Buud fãa na n kisga yãmb mam yʋʋra yĩnga.” (Matɩe 24:9) Wala pipi kiris-nebã, rũndã-rũndã, b kisga a Zezi karen-biisã, n kɩɩs-b la b nams-b b tẽebã yĩnga. (Tʋʋma 5:17, 18, 40; 2 Tɩmote 3:12; Wilgri 12:12, 17) Tẽns sãnda pʋsẽ, tẽn-soaadbã yiisda noy n yetẽ tɩ b pa segd n moon ye. Ne rẽ fãa, kiris-neb hakɩkã sakda Wẽnnaam tẽn-kãensã pʋsẽ n ket n moond Rĩungã koe-noogo. (Amos 3:8; Tʋʋma 5:29; 1 Pɩɛɛr 2:21) Yaa bõe n sõng bãmba la Kaset rãmb a taab sẽn be dũniyã gill zugã tɩ b maan woto? A Zeova kõt-b-la pãng ne a vʋʋsem sõngã maasem.—Zakari 4:6; Efɛɛz rãmba 3:16; 2 Tɩmote 4:17.

16. Wãn to la a Zezi wilg tɩ loees n be koe-moonegã la Wẽnnaam vʋʋsem sõngã sʋka?

¹⁶ A Zezi wilga vẽeneg tɩ loees n be Wẽnnaam vʋʋsem sõngã la koe-moonegã sʋka, a sẽn wa n yeel a karen-biisã tɩ: “Sɩɩg Sõng sã n wa yãmb zutu, yãmb na reeg pãnga. La yãmb na n yɩɩ mam kaset dãmb dũniyã tɛk fãa.” (Tʋʋma 1:8; Wilgri 22:17) Verse kãngã pʋgẽ, yɛlã sẽn pʋg taab to-to wã tara yõodo. Pipi, karen-biisã paama vʋʋsem sõngã, la rẽ poore, b moona koe-noogã dũniyã gill zugu. Ra yaa Wẽnnaam vʋʋsem sõngã sõngr bal n da tõe n kɩt tɩ b paam pãng n ket n kõt ‘buuda fãa kaseto.’ (Matɩe 24:13, 14; Ezai 61:1, 2) Rẽnd wa sẽn zemse, a Zezi yeelame tɩ vʋʋsem sõngã yaa “Sõangda.” (Zã 15:26) A yeelame tɩ Wẽnnaam vʋʋsem sõngã ra na n zãmsa a karen-biisã la a wilg-b sore.—Zã 14:16, 26; 16:13.

17. D sã n wa segd kɩɩsgo, wãn to la vʋʋsem sõngã sõngd tõndo?

¹⁷ Wãn to la Wẽnnaam vʋʋsem sõngã sõngd tõnd rũndã-rũndã, d sã n wa segd kɩɩsg wʋsg koe-noogã mooneg pʋgẽ? Wẽnnaam vʋʋsem sõngã kõta tõnd pãnga, la a gɩdgd neb nins sẽn namsd tõndã. D rɩk makr sẽn wilgd rẽ rĩm a Sayull vɩɩmã pʋgẽ.

Wẽnnaam vʋʋsem sõngã gɩdg-a lame

18. a) Wãn to la a Sayull toeem n lebg wẽnga? b) Wãn to la a Sayull maan n nams a Davɩɩde?

¹⁸ A Sayull sẽn yɩ Israɛll pipi rĩmã, a sɩngrã yɩɩ sõma, la kaoosg zugẽ, a kɩɩsa a Zeova noore. (1 Sãmwɛll 10:1, 24; 11:14, 15; 15:17-23) Rẽ kɩtame masã tɩ Wẽnnaam vʋʋsem sõngã bas rĩmã sõngre. A Sayull sũur puuga wʋsg ne a Davɩɩde, Wẽnnaam sẽn yãk t’a na n wa yɩ rĩm la a sẽn tar Wẽnnaam vʋʋsem sõngã sõngr masã wã. (1 Sãmwɛll 16:1, 13, 14) Ra wõnda a Davɩɩd kʋʋb yaa nana. Ra yaa pɛndg bal la a ra zãada, t’a Sayull da tar kãnde. Rẽnd daar a yembr a Davɩɩd sẽn da wẽed a pɛndgã, “a Sayull zẽka a kãndã n dat n dɩdg a Davɩɩd ne roogã n tão. La a Davɩɩd kekame tɩ kãnda ka paam-a ye.” (1 Sãmwɛll 18:10, 11) Rẽ poore, a Sayull kelga a biribl a Zonatã sẽn da yaa a Davɩɩd zoa wã n wẽen ‘ne a Zeova t’a ka na n kʋ a Davɩɩd ye.’ La rẽ poore, a Sayull wa n leb n “dat n tãoã a Davɩɩd ne kãndã n dɩdg ne rooga lalg n kʋ.” La a Davɩɩd “sergame tɩ kãndã yõg roogã.” A Davɩɩd zoeeme, la a Sayull rig-a lame. Wakat toog kãngã, Wẽnnaam vʋʋsem sõngã lebga a Sayull bɛ. Wãn to?—1 Sãmwɛll 19:6, 10.

19. Wãn to la Wẽnnaam vʋʋsem sõngã kogl a Davɩɩde?

¹⁹ A Davɩɩd zoe n kẽnga no-rɛɛs a Sãmwɛll  nengẽ, la a Sayull tʋma rap tɩ b tɩ yõk a Davɩɩde. La b sẽn ta a Davɩɩd solgrã zĩigẽ wã, “Zusoaba sɩɩga kẽe bãmb me tɩ b togs bãngr goama.” Wẽnnaam vʋʋsem sõngã kẽ-b-la wʋsg hali n kɩt tɩ b yĩm b sẽn tʋm-b tɩ b tɩ maan bũmb ningã. Rẽ zugẽ, naoor a yiibu, a Sayull le tʋma rapa, la bãmb me maana wa pipi rãmbã. Sẽn na n baase, rĩm a Sayull meng kẽnga a toore, la yẽ me pa tõog n kɩɩs Wẽnnaam vʋʋsem sõngã ye. Sɩda, vʋʋsem sõngã kɩtame t’a pa zĩ-yend “wĩntoog ne yʋnga tõre,” tɩ rẽ kõ a Davɩɩd sẽk t’a tõog n zoe.—1 Sãmwɛll 19:20-24.

20. Kɩbar ning sẽn wilgd a Sayull sẽn nams a Davɩɩdã zãmsda tõnd bõe?

²⁰ A Sayull ne a Davɩɩd kiba-kãngã tara zãmsg sẽn kengd pɛlga: Wẽnnaam vʋʋsem sõngã sã n wa gɩdgd neb nins sẽn namsd Wẽnnaam sõgen dãmbã, nin-kãens pa tõe n tõog ye. (Yɩɩl Sõamyã 46:12; 125:2) A Zeova ra ratame t’a Davɩɩd yɩ Israɛll rĩma. Ned baa a yembr da pa tõe n toeem dẽ ye. Tõnd wakatã, a Zeova meng yeelame tɩ ‘rĩungã koe-noog na n mooname.’ Ned baa a ye pa tõe kɩt tɩ rẽ pa maan ye.—Tʋʋma 5:40, 42.

21. a) Wãn to la rũndã-rũndã kɩɩsdb kẽer maanda? b) Tõnd kɩsa sɩd ne bõe?

²¹ Tũudum la politik taoor dãmb kẽer yagda ziri la b tʋmd nen-kɛglem tʋʋm meng n dat n gɩdg tõndo. La wala a Zeova sẽn kogl a Davɩɩd tẽebã wɛɛngẽ wã, a na n kogla a nin-buiidã woto me rũndã-rũndã. (Malaki 3:6) Rẽnd wala a Davɩɩde, d yeta ne bas-m-yam tɩ: “Mam dellda Wẽnnaam n ka zoet rabeem ye. Ninsaalba na n maana maam bõe?” (Yɩɩl Sõamyã 56:12; 121:1-8; Rom dãmba 8:31) Ne a Zeova sõngre, bɩ d ket n maood ne zu-loeesã fãa, la d pidsd tʋʋmd ning Wẽnnaam sẽn bobl-d sẽn yaa moon Rĩungã koe-noog tẽnsã fãa nebã.

[Tẽngr note rãmbã]

Y tẽrame bɩ?

• Bõe yĩng tɩ d zemsd d koe-moonegã ne nebã?

• “Kʋɩlen-kãseng” n pak tɩ d tõe n maan bõe?

• Bõe la tõnd koe-moonegã pidsda, baa zĩis nins nebã sẽn pa rat n kelgã?

• Bõe yĩng tɩ kɩɩsd baa a yembr pa tõe n yals Rĩungã koe-noog moonego?

[Zãmsgã sogsgã]

[Zĩ-gũbri, seb-​neng 28]

B tara sũ-noog wʋsgo

“B tara sũ-noog la zems-n-taar a Zeova tʋʋmdã pʋgẽ.” Woto bilgda zak sẽn yi Ɛspayn n kẽng Bolivi. Zakã biribl n kẽng be sẽn na yɩl n sõng koe-moondb sull sẽn be yɩɩga. A sũ-noogã talla pãng a roagdbã zut hal tɩ pa kaoos la zakã neb tõre, komdibli a naas sẽn zems yʋʋm 14 n digd 25 sẽn naag wa kẽng be n tɩ moond koɛɛgã ye. Masã wã, yaa komdibli a tãab n yaa so-pakdba, la biribl ning sẽn pak sorã kẽnga Wẽnnaam Tʋʋmdã Zãmsg Lekollẽ (Ekoll de formasiõ ministɛriɛll) sẽn pa kaoose.

A Angelica sẽn tar yʋʋm 30, n yit Kanada wã sẽn moond Erop Yaangã yeelame: “Zu-loeesã yaa wʋsgo, la m sũur yɩɩ noog m sẽn sõng nebã koe-moonegẽ wã. La Kaset rãmb nins sẽn be be wã sẽn wilgd b mi-beoog n nong n pʋʋsd maam bark m sẽn wa n na n sõng-bã me kõta maam sũ-noog wʋsgo.”

Saam-bi-pogs a yiib sẽn yaa ned ne a yao tɩ b ned kam fãa kolg yʋʋm pis-tã n yit Etazĩni wã yeelame: “Rog-n-migs wʋsg la d ra segd n minim. La tõnd pẽdga d tʋʋmdã pʋgẽ tẽn-kãngã, la masã tõnd Biibl zãms rãmb a yopoe n wat tigissã.” B yiibã sõng n sigla Rĩungã koe-moondb sull tẽng sẽn da pa tar tiging pʋgẽ.

A Laura sẽn yaa saam-bi-poak sẽn kolg yʋʋm pis-tã wã moonda koe-noogã tẽn-sãangẽ sẽn yɩɩd yʋʋm a naase. A yeelame: “Mam yãka yam n pa na n tol n gĩd m vɩɩmã ye. Rẽ sõngda koe-moondbã tɩ b yã tɩ vɩɩmd ne bũmb bilf yaa yam-yãkr la yam bũmbu, pa f sẽn yaa naong soabã yĩng ye. M sẽn tõe n sõng neb a taabã, sẽn yɩɩd fãa kom-bɩɩsã, kõo maam sũ-noog n kɩt tɩ m le pa ne zu-loees nins m sẽn paam tẽn-zẽngẽ moonegã pʋgẽ ye. Mam pa na n dɩk m tʋʋmdã kaanẽ wã n tek ne bũmb baa a ye, la m na n kell n paa ka tɩ kaoos wa a Zeova sẽn dat to-to wã.”

[Zĩ-gũbri/Foto, seb-​neng 32]

Une bonne nouvelle pour des gens de toutes nations seb-bilã nens kẽere

Seb-bil ning sẽn yaa Une bonne nouvelle pour des gens de toutes nations wã tara koe-yɛng a sẽn togsd buud-goam 92 pʋsẽ. Buud-gomd fãa rɩkda seb-neng tõre. B tũnuga ne gom-biis sẽn yaa “m, mam, bɩ maam” n gʋls koɛɛgã. Rẽnd nedã sã n karemd koɛɛgã, yaa wa yãmb mengã n gomd ne-a.

Dũniyã gill kart n be sebrã pʋgẽ. Tũnug-y ne kart kãngã n bao zood ne nedã. Y tõe n teesa yãmb sẽn yit tẽng ningã, la y wilg tɩ y rat n bãnga yẽ me sẽn yit tẽng ningã. Woto, y tõe n kɩtame t’a sak n na n gom ne-yã, tɩ kɩt tɩ sõsg sẽn be yamleoog zĩndi.

Seb-bilã sɩngr-goam wilga yɛl toɛy-toɛy d sẽn segd n maan sẽn na yɩl n kõ neb nins sẽn gomd buud gomd tõnd sẽn pa wʋmdã sõngr sẽn yaa sõma. D bõos tɩ y karem bõn-kãens neere, la y tũ-b sõma.

Sebrã sags zĩigẽ, b wilgda buud-goamã, la b leb n wilgda buud-gomd fãa bãnde. Rẽ na n sõnga yãmb tɩ y bãng buud-goamã bãn sẽn gʋls tõnd seb-vãadã la sɛb a taab zut buud-goam toɛy-toɛy pʋsẽ wã.

[Fotã]

Yãmb tʋmda ne seb-bi-kãngã koe-moonegã pʋgẽ bɩ?