Roagdba, ges-y y zakã neb yelle

“Ned sã n ka ges a meng zak rãmb yelle, . . . yẽ soab yii tẽeb pʋgẽ.”—1 TƖMOTE 5:8.

1, 2. a) Bõe yĩng tɩ d sã n ne zagsã neb sẽn naag taab n wat kiris-neb tigissã, kengd d raoodo? b) Zu-loe-bʋs la zagsã neb segd n mao ne sẽn na yɩl n wa tigissã lɛɛre?

YÃMB sã n ges kiris-neb tigingã pʋgẽ, nand tɩ tigisgã sɩnge, y tõe n yãa kamb sẽn yaa yɩlem la sẽn ning fu-neeb n zĩ n kɛg b roagdbã. Rẽ yĩnga d sã n get nonglem ning zag-kãens nebã sẽn tar ne a Zeova la ne taabã pa be yamleoog sɩda? La yaa nana tɩ d yĩm tɩ b maana modgr wʋsg n tõog n tall zakã neb n wa tigisgã lɛɛre.

² Naoor wʋsgo, daarã tõre, roagdbã pa tar sẽk ye, la yʋnd nins d sẽn tar tigissã, zakã neba fãa tʋʋm yaa wʋsg n yɩɩd menga. B segd n segla rɩɩbã, n tʋm zakã pʋgẽ tʋʋmã la b baas lekollã devoaar dãmba. Zɩɩbã wʋsg sẽn tɩ yɩɩd zaoa roagdbã zutu. B getame tɩ nebã fãa yɩ yɩlma, tɩ b paam n dɩ, la b segl n sa lɛɛre. Sɩda, ne kambã, yel-lingdem tõe n tiig n waa sasa ning sẽn pa zems lae-lae wã. Tõe tɩ kãsmã reemame t’a fuugã pãrge, tɩ yaoã bidg a rɩɩbã tẽnga, pa rẽ bɩ kambã sɩng n zabd taaba. (Yelbũna 22:15) Zu-loe-kãens wata ne bõe? Baa roagdbã sẽn da maag b yĩns n geel yɛlã neer zaab-kãng yĩngã, yɛlã tõeeme n pa yɩ wa b sẽn magã ye. Baa ne rẽ, wakat fãa la bala, zakã neb fãa taa Rĩungã Roogẽ tɩ tigisgã nan pa sɩng ye. D sã n ne-b tɩ b wat be semen ne a to, la yʋʋmd ne a to fãa, tɩ kambã bɩt a Zeova balengã pʋgẽ, ad sɩd kengda raoodo!

3. Wãn to la d mi t’a Zeova nanda zagsã wʋsgo?

³ Roagdba, baa ne sẽn yaa toog wakat ning tɩ y tʋk y zɩɩbã, bɩ a kõt-y yaams wʋsg mengã, y tõe n kɩsa sɩd t’a Zeova nanda y modgrã hal wʋsgo. Yaa a Zeova n yaa zak lugunda. Rẽ n so t’a Gomdã yetẽ tɩ zak fãa ‘yʋʋre,’ bɩ a belmã meng yita a Zeova nengẽ. (Efɛɛz rãmba 3:14, 15) Woto, roagdba, y sã n pidsd y zɩɩbã zakã pʋgẽ tɩ zemse, y waoogda ãndũniyã Naab la a Soaala. (1 Korẽnt dãmba 10:31) Woto pa zu-no-kãseng sɩda? Rẽnd zemsame tɩ d ges tʋʋmd ning a Zeova sẽn bobl roagdbã. Sõs-kãngã pʋgẽ, d na n tagsame n ges b sẽn tõe n ges b zakã neb yell to-to. Bɩ d ges zĩis a tãab pʋsẽ Wẽnnaam sẽn dat tɩ roagdbã ges b zakã neb yelle.

Zakã neb yell gesg laogã wɛɛngẽ

4. Zakã pʋgẽ, yaa segl-bʋg la a Zeova rɩk sẽn na yɩl tɩ b ges kambã yelle?

⁴ Tʋm-tʋmd a Poll gʋlsa woto: “Ned sã n ka ges a neb yelle, la sẽn yɩɩda, a meng zak rãmba, yẽ soab yii tẽeb pʋgẽ, la a yaa wẽng n yɩɩd ned ninga sẽn ka be tẽeb pʋgẽ wã.” (1 Tɩmote 5:8) A Poll sẽn yeel tɩ “ned” ka wã, yaa ãnd yell la a ra tagsda? A ra tagsda zakã soab yelle, la naoor wʋsgo yaa ba wã. Wẽnnaam leb n kõo pag tʋʋmd sẽn be  waoogre, t’a yaa a sɩdã sõngda. (Sɩngre 2:18) Biiblã gʋlsg wakate, pagbã ra nong n sõngda b sɩdbã tɩ b get b zagsã neb yelle. (Yelbũna 31:13, 14, 16) Rũndã-rũndã, rap bɩ pagb sẽn wubd b kamb b yembrã sõor tara paasgo. * Roagdb wʋsg n yaa b yen-yen n get b zagsã neb yell sõma. Yaa sɩda, sẽn yaa sõma n yɩɩd yaa ba wã ne ma wã sẽn na n lagem n beẽ, tɩ ba wã lʋɩt taoore.

5, 6. a) Neb nins sẽn maood n na n ges b zakã neb yell laogã wɛɛngẽ wã sɛgda zu-loees kẽer bʋse? b) Tags-bʋg nug-tʋʋmdã wɛɛngẽ n na n sõng kiris-nebã tɩ b ket n get b zagsa neb yelle?

⁵ Pipi Tɩmote 5:8 pʋgẽ, yaa bõe yell gesg la a Poll da tagsda? Verse nins sẽn deng verse kãnga la sẽn pʋgd-a wã wilgdame t’a ra gomda zakã laog raab yelle. Dũni kãngã pʋgẽ, zak soab sã n dat n ges a zakã neb yell laogã wɛɛngẽ, a tõe n sega zu-loees wʋsgo. Ligdã kaalma zu-loeese, tʋʋmã kaalem bɩ tʋʋmã sãoongo, la teedã ligd sẽn tar dʋʋbã yaa yɛl sẽn wae dũniyã gill zugu. Bõe n tõe n sõng ned sẽn get a zak neb yell t’a tõog n mao ne zu-loe-kãensã?

⁶ Ned sẽn get a zak neb yell segd n tẽegame t’a tʋmda tʋʋmd a Zeova sẽn bobl-a. Goam nins Wẽnnaam sẽn vẽneg a Poll t’a gʋlsã wilgdame tɩ ned sẽn tar tõog n tõe n tũ no-kãngã la a yaool n zãgsd rẽ maaneg yaa wa ned sẽn “yi tẽeb pʋgẽ.” Kiris-ned na n maana a sẽn tõe tɛk n da yɩ ned a woto Wẽnnaam taoor ye. La zu-bʋko, dũni kãngã pʋgẽ, neb wʋsg ‘ka tar nimbãan-zoeer’ ye. (2 Tɩmote 3:1, 3) Sɩda, ba rãmb wʋsg pa tʋkd b zɩɩb ye. B pa get b zagsã neb yell ye. Sɩdb nins sẽn yaa kiris-nebã pa sakd tɩ b sũyã riglim woto tɩ b pa ges b zagsã neb yell ye. Kiris-neb nins sẽn get b zagsã neb yellã pa maand wa b tʋmd-n-taas wʋsg ye. Bala b sẽn dat n ta Wẽnnaam a Zeova yama, b geta tʋʋm nins nebã sẽn get wa tʋʋm yaalsã wa tʋʋm sẽn be waoogr la sẽn tar yõodo, tʋʋm-kãens sẽn sõngd-b tɩ b ges b nin-nongdsã yell laogã wɛɛngẽ wã yĩnga.

7. Bõe yĩng tɩ zems tɩ roagdbã tags a Zezi mak-sõngã zug neere?

⁷ Zak-sobend dãmbã tõeeme me n tags a Zezi mak-sõngã sẽn zems zãngã zug neere. Tẽeg-y tɩ Biiblã ra pĩnd n goma a Zezi yell n yeel t’a yaa “Ba sẽn-ka-kiida.” (Ezai 9:5, 6) A Zezi sẽn yaa ‘yaoolem Ãdmã’ sɩd ledga ‘pipi Ãdmã’ n yaa ãdem-biis nins sẽn wilgd tɩ b tara tẽebã ba. (1 Korẽnt dãmba 15:45) A Zezi yaa ba sẽn zems zãnga, a pa maan wa a Ãdem sẽn yɩ ba sẽn yaa rat-m-yembr soabã ye. Biiblã gomda a Zezi yell n yetẽ tɩ: “Ne bõn-kãnga tõnd bãnga nonglem sẽn yaa bũmb ninga, a yaa tɩ bãmb kõo bãmb vɩɩm tõnd yĩnga.” (1 Zã 3:16) N-ye, a Zezi sak n kõo a mengã vɩɩm neb a taabã yĩnga. La wakat fãa, yel-bõones pʋsẽ me a rɩka neb a taabã raab n lʋɩɩs taoore. Roagdba, yaa sõma tɩ y rɩk togs-n-taar ne a Zezi n tall mong-m-meng yam kãngã.

8, 9. a) Liuuli wã sẽn get b kambã yell to-to wã tõe n zãmsa roagdbã bõe? b) Wãn to la roagdb wʋsg sẽn yaa kiris-neb wilgd tɩ b tara mong-m-meng yam?

⁸ Roagdbã tõe n zãmsa yɛl wʋsg nonglem hakɩkã wɛɛngẽ, b sã n ges goam nins a Zezi sẽn taas Wẽnnaam nin-buiidã sẽn bʋdgã. A yeelame: “Naoor wʋsgo mam da rat n tigma fo kamba wa no-yãang sẽn põgend a kamba a pɩgsẽ.” (Matɩe 23:37) Ka wã, a Zezi ra bilgda no-yãang sẽn tẽeg a pɩgs n põgend a kamba. Sɩd-sɩda, roagdbã tõe n zãmsa yɛl wʋsg ne no-yãang sẽn nong n kogend a kambã, n sak n na n gẽneg a yõor n kogl-bã. La liuuli wã sẽn maand bũmb ning daar fãa wã me gesg bee yamleoogo. B yɩgdame n yit la b wat n pa satẽ, n na n tɩ bao rɩɩbo. Baa b yaamsã sã n yaa wʋsgo, b ningda rɩɩbã b kambã noyẽ tɩ b vonda, la b kambã ye nong n dat n paasame. A Zeova bõn-naands wʋsg ‘tara yam’ b sẽn dog ne, b sẽn get b kambã yell to-to wã pʋgẽ.—Yelbũna 30:24.

⁹ Wala woto, roagdb nins sẽn yaa kiris-neb n be dũniyã gill zugã wilgda mong-m-meng  yam tɩ be yamleoogo. Yãmb na n sak n namsame tɩ bũmb da maan y kambã ye. Sẽn paase, daar fãa, y maanda modgr wʋsg sẽn na yɩl n ges y zakã neb yelle. Yãmb neb wʋsg yikda pĩnd n na n tʋm tʋʋmd sẽn wat ne yaams wʋsgo. Yãmb tʋmda wʋsg sẽn na yɩl n paam n dɩlg y zakã. Y maoodame n dat tɩ y kambã paam fut sẽn zemse, ro-gãag sẽn yaa sõma la karengo. La yãmb ket n maanda woto daar ne a to la yʋʋmd ne a to fãa. Sɩd-sɩda, mong-m-meng la sũ-mar woto tata a Zeova yam! (Hebre dãmba 13:16) La sasa kãng pʋgẽ me, y tẽrame tɩ yɛl a taab sẽn yaa kãsems n yɩɩd woto la y segd n maan n ges y zakã neb yelle.

Ges-y y zakã neb tẽeb yelle

10, 11. Bõe la ninsaalbã rat n yɩɩda, la bõe la roagdb nins sẽn yaa kiris-nebã segd n maan pipi sẽn na yɩl n pids raab kãng b kambã nengẽ?

¹⁰ Zakã neb tẽebã yell gesg tara yõod n yɩɩd b yell gesg laogã wɛɛngẽ. A Zezi yeelame: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:4; 5:3) Roagdba, bõe la y tõe n maan n ges y zakã neb tẽeb yelle?

¹¹ Rẽ wɛɛngẽ wã, tõe tɩ b pa lebg n togs Gʋlsg Sõamyã verse a to n yɩɩd Tõodo 6:5-7 ye. D bõos tɩ y lak y Biiblã tɩ d karem verse kãensã. Ges-y tɩ b yeta roagdbã tɩ b reng n paas b mensã tẽeb ne Wẽnnaam, tɩ b paas b nonglmã ne a Zeova la b sak a goamã ne b sũyã fãa. N-ye, y segd n yɩɩ ned sẽn zãmsd Wẽnnaam Gomdã neere, n karemd Biiblã la y bʋgsd a zugu, sẽn na yɩl n sɩd bãng a Zeova soyã, a noyã la a tõodã sõma la y nong-ba. Rẽ na n kɩtame tɩ y nong sɩd nins sẽn be Biiblã pʋgẽ n be yamleoog wʋsgã, la rẽ na n kõ-y-la sũ-noog wʋsgo, waoogr kãseng la nonglem ne a Zeova. Y na n paama bõn-sõma wʋsg n taas y kambã.—Luk 6:45.

12. Wãn to la roagdbã tõe n dɩk togs-n-taar ne a Zezi, sã n yaa ne zãms b kambã sɩd nins sẽn yit Biiblã pʋgẽ neerã wɛɛngẽ?

¹² Roagdb nins sẽn tar pãng tẽebã pʋgẽ wã na n tõog n tũu saglg ning sẽn be Tõodo 6:7 pʋgẽ wã, sẽn yet tɩ b zãms b kambã a Zeova goamã neer sor sẽn paam fãa wã. ‘Zãms neer’ dat n yeelame tɩ zãms ned sõma la togs-a yɛl n yɩlem tɩ kẽ a pʋ-tẽerẽ wã. A Zeova mii vẽeneg tɩ tõnd fãa, sẽn yɩɩd fãa kambã, ratame tɩ b togs yɛlã n yɩlem sẽn na yɩl tɩ tõog n pa b yamẽ wã. Yaa woto yĩng la a Zezi sẽn togs yɛl wʋsg n yɩlem a koe-moonegã wakatã. Wala makre, a sẽn da wa n zãmsd a karen-biisã tɩ b tall sik-m-meng la b ra yɩ wuk-m-mens rãmb la b ra wags taabã, a yãa soay toɛy-toɛy n togs no-kãng n yɩlem. A zãms-b lame n kɩt tɩ b mensã tagse, n dɩk makr n bilg-ba, la a tũ zãmsga vẽeneg-vẽeneg tɩ  b yã menga. (Matɩe 18:1-4; 20:25-27; Zã 13:12-15) La bãng-y t’a Zezi zɩ n yɩ yãg-yãg soab ye. Woto me, roagdbã segd n yãa soay n zãms b kambã sɩd-kãsemsã, n maag b yĩns n togs-b a Zeova noyã n yɩlem hal tɩ kambã wa tõog n wʋm b võor la b sak n tũ.

13, 14. Yaa segb bʋs la roagdbã tar n tõe n zãms b kambã sɩd nins sẽn be Biiblã pʋgẽ wã tɩ kẽ-ba, la b na n tũnuga ne bõe?

¹³ Zak pʋgẽ zãmsgã yaa sasa sẽn zems sõma sẽn na yɩl n zãms kamba bõn-kãensa. Sɩda, zak pʋgẽ Biibl zãmsg sẽn maand wakat fãa, sẽn kengd tẽeb la sẽn kõt zakã neb sũ-noog tara yõod wʋsg ne zakã neb tẽebo. Dũniyã gill zugu, kiris-neb zagsã maanda sũ-noog ne zãms-kãense, n tũnugd ne sɛb nins a Zeova siglgã sẽn kõtã, la b zemsd zãmsgã ne kambã ratem. Écoute le grand Enseignant wã yaa sebr sẽn tar yõod wʋsg rẽ wɛɛngẽ, wala sẽn yɩ to-to me ne Les jeunes s’interrogent—Réponses pratiques * sebrã. La pa zak pʋgẽ zãmsgã wakat bal la b tõe n zãms kambã ye.

¹⁴ Wala Tõodo 6:7 sẽn wilgdã, segb wʋsg la yãmb sẽn yaa roagdbã tõe n tũnug ne n sõs ne y kambã tẽebã yɛl zutu. Y togda sor ne taaba, tɩ y tʋmda ne taab bɩ y kokda pemsem ne taab me, y tõe n paama soay n pids y kambã tẽeb ratem. Yaa sɩda, y pa segd n zãmsd y kambã sɩd nins sẽn be Biiblã pʋgẽ wã n pa satẽ ye. La y na n modgame n kɩt tɩ zakã pʋgẽ sõssã yɩ sõma la b keng zakã neb tẽebo. Wala makre, Réveillez-vous ! wã tara sõss wʋsg yɛl toɛy-toɛy zutu. Sõs-kãensã tõe n paka sor tɩ y paam n sõs rũmsã a Zeova sẽn naanã, zĩ-neeb sẽn be dũniyã gill zugu, la buud toɛy-toɛy neb vɩɩm zutu. Sõs-kãens tõe n kɩtame tɩ kambã bao n karem sɛb nins tʋm-tʋmd sẽn tũud sɩd la sẽn tar yamã sẽn kõtã n paase.—Matɩe 24:45-47.

15. Wãn to la roagdbã tõe n sõng b kambã tɩ b ges koe-moonegã wala tʋʋmd sẽn be yamleoog la sẽn tar barka?

¹⁵ Y sã n sõs sõss sẽn kẽngd tẽeb ne y kambã, na n sõng-y lame tɩ y pids tẽebã ratem a to. Kamb nins sẽn yaa kiris-nebã segd n bãngã b sẽn na n togs b tẽebã neb a taabã tɩ yɩ sõma to-to. Y sã n wa sõsd sõsg sẽn be yamleoog sẽn yit Gũusg Gasgã la Réveillez-vous ! wã pʋgẽ, y tõe n tags n gesa wãn to la y tõe n tik b zut n moon koe-noogã. Wala makre, y tõe n sokame: “Kõn yɩẽ sõma wʋsgo, neb wʋsg sã n da miẽ woto a Zeova zug sɩda? Fo tagsdame tɩ yaa wãn to la d tõe n maan tɩ ned tʋlg n bãng wã võore?” Woto tõe n sõnga kambã tɩ b tʋlg n dɩk bũmb ning b sẽn zãmsdã n sõng b taabã n paase. Rẽ, yãmb kambã sã n yãag-y koe-moonegẽ wã, b na n yãa sõs-kãens buud y sẽn sɩd maand ne neba.  B tõe n bãngmae tɩ koe-moonegã yaa tʋʋmd sẽn kõt sũ-noogo, la sẽn tar yamleoogo.—Tʋʋma 20:35.

16. Bõe la kambã tõe n bãnge, b sã n kelgd b roagdbã pʋʋsgo?

¹⁶ Roagdbã pidsda b kambã tẽeb ratem me, b sã n wa pʋʋsdẽ. A Zezi zãmsa a karen-biisã pʋʋsgo, la a pʋʋsa ne-b naoor wʋsgo. (Luk 11:1-13) Tags-y n ges b sẽn bãng yɛl wʋsg ninsi, b sẽn kelg a Zeova meng Biriblã pʋʋsgã! Woto me, yãmb kambã tõe n zãmsa yɛl wʋsg ne yãmb pʋʋsgã. Wala makre, b tõe n bãngame t’a Zeova ratame tɩ tõnd gom ne-a ne bas-m-yam n togs-a sẽn be d sũurẽ, n togs-a zu-loɛɛg ning fãa sẽn be ne-do. N-ye, yãmb pʋʋsgã tõe n sõnga y kambã tɩ b bãng tɩ b tõe n paama zems-n-taar ne b saasẽ Ba wã. La woto yaa bũmb sẽn tar yõod wʋsgo. —1 Pɩɛɛr 5:7.

Nong-y y zakã neba

17, 18. a) Wãn to la Biiblã wilgd tɩ tara yõod tɩ roagdbã wilg b kambã tɩ b nong-b lame? b) Wãn to la ba rãmbã segd n dɩk a Zeova togs-n-taar n wilg b kambã tɩ b nong-b lame?

¹⁷ Yaa sɩda, kambã ratame tɩ b nong-b wʋsgo. Wẽnnaam Gomdã wilgda roagdbã tɩ tara yõod wʋsg tɩ b nong b kamba. Wala makre, a sagenda pʋg-bi wã tɩ b ‘nong b kambã.’ Sẽn na yɩl tɩ pʋg-bi wã maan rẽ, rɩlla b sõng-b tɩ b paam yam-sõngo. (Tɩt 2:4) Sɩda, wilg biig nonglem yaa yam bũmbu. Rẽ zãmsda biig t’a tall nonglem, la rẽ na n naf-a-la a yõor tɛka. La roagd sã n pa wilg a biig nonglem, yaa yalemdo. Woto wata ne toog wʋsgo, la wilgdẽ tɩ d pa rɩk togs-n-taar ne a Zeova sẽn wilgd tõnd nonglem wʋsgo, baa ne tõnd pãn-komsmã ye.—Yɩɩl Sõamyã 103:8-14.

¹⁸ A Zeova yɩɩ pipi meng n nong a tẽng zug kambã. Wala 1 Zã 4:19 sẽn yetã, yaa ‘yẽ n deng n nong tõndo.’ Ba rãmbã, sẽn yɩɩd fãa yãmb segd n dɩka a Zeova togs-n-taare, n bao n kɩt tɩ nonglem zĩnd yãmb ne y kambã sʋka. Biiblã sagenda ba rãmbã tɩ b ra maan tɩ b kambã sũy sãame, tɩ b wa koms raood ye. (Kolos rãmba 3:21) Bũmb pa be n komsd kambã raood n yɩɩd b sẽn na n tagsdẽ tɩ b roagdbã pa nong-b bɩ tɩ b pa nand-b ye. Ba rãmb nins sẽn pa rat n wilg b kambã tɩ b nong-b lame wã segd n tẽega a Zeova mak-sõngã yelle. A Zeova zĩnda saasẽ meng n gom n wilg t’a nanda a Biriblã, la t’a nong-a lame. (Matɩe 3:17; 17:5) Ad woto sɩd ra segd n kenga a Zezi raood wʋsgo! Woto me, kambã paamda pãng la raood wʋsgo, b roagdbã sã n togs-b ne pʋ-peelem tɩ b nong-b lame la tɩ b nand-b lame.

19. Bõe yĩng tɩ kiblgã tar yõod wʋsgo, la wãn to la roagdb nins sẽn yaa kiris-nebã segd n maan rẽ?

¹⁹ Yaa sɩda, roagdbã nonglem pa ne no-goam bal ye. Pipi, nonglem pukda ne tʋʋma. Roagdbã sã n get b kambã yell laogã la tẽebã wɛɛngẽ, tõe n wilgame tɩ b nong-b lame, sẽn tɩ yɩɩd fãa, roagdbã sã n maan dẽ tɩ wilgdẽ tɩ pipi yaa b sẽn nong-ba yĩnga. Sẽn paase, kiblgã wilgdame tɩ roagdbã nonga b kambã wʋsgo. Sɩda, a Zeova “sɩbgda bãmb sẽn nong a soaba.” (Hebre dãmba 12:6) La roagdbã sã n pa kibind b kambã, wilgdame tɩ b kis-b lame. (Yelbũna 13:24) Wakat fãa, a Zeova maanda yɛlã tɩ zemsdẽ, n kibind “ne tɩrlem.” (Zeremi 46:28) Pa nana wakat fãa ne roagdbã sẽn pa zems zãngã tɩ b kibl b kambã ne zemsg woto ye. La modgr ning fãa yãmb sẽn maand n na n kibl kambã tɩ zemsã pa zaalem ye. Kiblgã sã n yɩ ne pa vigsd la ne nonglem sõngda biig t’a  bɩ n yɩ beoog ned sẽn tar sũ-noogo. (Yelbũna 22:6) Pa woto la roagd fãa sẽn yaa kiris-ned rat ne a biig sɩda?

20. Wãn to la roagdbã tõe n sõng b kambã sõma tɩ b ‘yãk vɩɩmã’?

²⁰ Roagdba, yãmb sã n wa tʋm tʋʋm-kãseng ning a Zeova sẽn kõ-yã, sẽn yaa y nong y kambã la y get-b yell laogã la tẽebã wɛɛngẽ wã, a nafa wã yaa wʋsgo. Woto, y wilgda y kambã sor ning sẽn yaa sõma n yɩɩd sẽn na yɩl tɩ b ‘yãk vɩɩmã’ n wa tõog n kell n ‘vɩɩndã.’ (Tõodo 30:19) Kamb nins sẽn yãkd yam n na n balem a Zeova la b kell n pa vɩɩmã sor zug b bɩʋʋng wakatã kõta b roagdbã su-no-kãsenga. (Yɩɩl Sõamyã 127:3-5) Sũ-no-kãngã na n kaoosa wakat sẽn pa sate! La wãn to la kambã tõe n pẽg a Zeova masã? Sõsg ning sẽn pʋgdã na n goma rẽ yelle.

[Tẽngr not rãmba]

Wãn to la y na n leoke?

Bõe la roagdbã tõe n maan n ges b kambã yell

• laogã wɛɛngẽ?

• tẽebã wɛɛngẽ?

• la nonglmã wɛɛngẽ?

[Zãmsgã sogsgã]

[Foto, seb-neng 12]

Liuuli wʋsg tʋmda wʋsg n dɩlgd b kambã

[Foto, seb-neng 14]

Roagdbã segd n deng n paasa b mensã tẽebo

[Foto rãmba, seb-neng 14, 15]

Roagdbã tõe n yãa segb wʋsg n zãms b kambã Naandã zugu

[Foto, seb-neng 16]

Kambã sã n miẽ tɩ b tata b roagdbã yam, kengda b pɛlg la kõt-b raoodo