Sũur pʋgẽ bãanã baoobo

A ALBERT da yaa yikãad sũur sẽn noom ne a kãadmã. A ra tara kamb a yiib sẽn yaa kom-sõmse. La a ra getame tɩ bũmb n paoog-a a vɩɩmã pʋgẽ. A sẽn wa n baood tʋʋm tɩ yaa toogo, a kẽe politikã pʋgẽ, n kẽ politikã will ning b sẽn boond tɩ sosialiismã. A wa n pʋd n lebga bãmb babgẽ wã parti koministã ned sẽn tar yẽesem.

La pa yã n kaoos la a Albert sũur sãam ne kominismã ye. A basa politikã maaneg n dɩk a sẽka fãa n na n ges a zakã rãmb yelle. Bũmb ning a sẽn da baood a vɩɩmã pʋgẽ masã lebga a zakã neb sũ-noogo. La a Albert da baas n ket n neeme tɩ bũmb n paoog-a hal wʋsgo. A ra ket n pa tar sũur pʋgẽ bãanã ye.

Pa a Albert a yembr n tar zu-loe-kãngã ye. Sẽn na yɩl tɩ b vɩɩmã tall võore, neb milyõ rãmb tũu tagsa buud toor-toore, filozofi rãmb la tũudum toɛy-toɛya. Neb sull ning b sẽn boond tɩ hipi rãmbã sẽn zĩnd nasaar tẽnsã pʋsẽ yʋʋmd 1960 tɛkã yɩɩ neb sẽn da kɩɩsd vɩɩm manesem noy nins nebã sẽn dog n mikã. Sẽn yɩɩd fãa, kom-bɩɩsã baoa sũ-noogã la b tʋlgame n na n bãng vɩɩmã võore, n dɩk dorg rãmb sẽn menemsd yam la b sak filozofi nins hipi rãmbã taoor dãmbã sẽn da zãmsd nebã. La hipi rãmbã pa tõog n kɩt tɩ sũ-noog hakɩk zĩnd ye. A pʋd n kɩtame tɩ kom-bɩɩs wʋsg lebg dorgã yembs la yoaadba, la kɩt tɩ vɩɩm manesmã sãoong yãdg tɩ lebg yaare.

Sẽn na maan yʋʋm kobse, neb wʋsg baoa arzɛgse, naam la bãngre, n tẽ tɩ rẽ n na n kõ-b sũ-noog hakɩkã. La rẽ wa n baasa ne  sũ-sãamse. A Zezi yeelame tɩ “ned ka tar vɩɩm a paoong sẽn yaa wʋsg yĩng ye.” (Luk 12:15) Ned sã n pʋd n dat n yɩ arzɛk soab ne a sũur fãa, naoor wʋsgo, sũ-sãams n wat n paam-a. Biiblã yeelame tɩ ‘neb nins sẽn dat n yɩ arzɛgs rãmba kẽeda makr la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ. Tɩ bõe, ligd datem yaa bõn-wẽns fãa yẽgre. La ligd datem sẽn so kẽerã, . . . b kẽesa b mens to-kãseng pʋgẽ.’—1 Tɩmote 6:9, 10.

La wãn-wãn la ned tõe n paam sũur pʋgẽ bãanã la a kɩt t’a vɩɩmã tall võore? Rẽ yĩnga bõn-kãensã paoong yaa toog tɩ b baoob yaa mak-n-ges bal bɩ? Zu-noogo, pa woto ye. Wala d sẽn na n yã sõsg ning sẽn pʋgdã pʋgẽ wã, yel-kãngã tɩɩmã yaa f sẽn na n tɩgs ratem buud sẽn yaa kãseng wʋsg ãdem-biisã fãa sẽn tare.

[Foto, seb-neng a 3]

Arzɛka, naam, bɩ bãngr baoob tõe n kɩtame tɩ y paam sũur pʋgẽ bãan bɩ?