A Zeova sõda “yãmb zoobda fãa”
A Zeova sõda “yãmb zoobda fãa”
“[Yirg] a yembr ka lʋɩt tẽng tɩ yãmb Ba ka yã ye. La baa yãmb zoobda fãa sõdame.”—MATƖE 10:29, 30.
1, 2. a) Bõe yĩng t’a Zoob ra tagsdẽ tɩ Wẽnnaam bas-a lame? b) A Zoob goamã ra rat n yeelame t’a ra zabda ne a Zeova bɩ? Wilg-y y leokrã võore.
“WẼNNAAM, mam boolame tɩ y wa sõng-ma, la y ka sak ye. Mam sã n pʋʋs yãmba, y ka leokd ye. Yãmb maana maam pʋ-toogo. Yãmb namsda maam ne pãn-kãsenga.” Rao ning sẽn gomd woto wã ra bee yɩɩr kãseng pʋgẽ, la rẽ pa lingr ye. B fãa a laogã fãa n bas-a zaalem, yel-beed n tiig n kʋ a kambã, la bã-toaag n namsd yẽ mengã. Raoã yʋʋr la a Zoobe, la b gʋlsa a zu-loe-kãsems nins sẽn paam-a wã Biiblã pʋgẽ tõnd nafr yĩnga.—Zoob 30:20, 21.
2 A Zoob goamã tõe n kɩtame tɩ b tags t’a ra zabda ne Wẽnnaam, la ra pa woto ye. A Zoob ra wilgda a sũ-sãang sẽn yaa kãsengã bala. (Zoob 6:2, 3) A ra pa mi tɩ yaa a Sʋɩtãan n da wat ne a zu-loe-kãsemsã ye, yaa rẽ yĩng la a sẽn tudg n yeel tɩ Wẽnnaam da bas-a lame wã. Wakat n zĩnd t’a Zoob yeel a Zeova woto menga: “Yaa bõe tɩ y solg y neng ne maam n get maam wa bɛ?” *—Zoob 13:24.
3. Toog sã n paam-do, bõe n tõe n wa d yamẽ?
3 Rũndã-rũndã, a Zeova sõgen dãmb wʋsg n namsde, zabã, politikã la nin-buiidã sẽn wat ne gudgr ninsã, sabab-wẽnsã, kʋʋlmã, bãasã, farã la goosneema rãmbã sẽn gɩdgd tõnd tʋʋmdã, sẽn wat ne toog sẽn pa satã yĩnga. Tõe tɩ yãmb me segda makr sẽn wõnd woto. Wakat ninga y tõe n tagsame t’a Zeova solgda a neng ne yãmba. Y mii Zã 3:16 goamã neere. “Wẽnnaam nonga dũniyã hal tɩ b kõ b Biiga sẽn ka to.” La yãmb sã n namsdẽ tɩ pa wõnd y na n wa paama yolsgo, y tõe n sokda y menga: ‘Wẽnnaam sɩd nonga maam bɩ? A nee mam namsgã bɩ? A tagsda mam mengã yell bɩ?’
4. Yel-bʋg sẽn da be wakat fãa la a Poll da segd n mao ne, la bõe la yel-kãngã buud tõe n kɩt tɩ tõnd tagse?
4 Ges-y bũmb ning sẽn paam tʋm-tʋmd a Pollã. A gʋlsa woto: “B kõo maam yĩng gõaag sẽn yaa Sʋɩtãana tʋm-tʋmd t’a nams maam.” A paasame: “Mam kosa Zusoaba naoor a tãab tɩ b kɩt tɩ bõn-kãng loog n bas maam.” A Zeova wʋma a kosgã. Baasg zãnga, a wilga a Poll t’a pa na n welg a yellã ne yel-solemd ye. La a Poll ra segd n teega Wẽnnaam pãngã tɩ sõng-a t’a mao ne a ‘yĩng gõaagã.’ * (2 Korẽnt dãmba 12:7-9) Wala a Polle, tõe tɩ bũmb n namsd yãmb wakat fãa, tɩ y tõe n sokd-y y meng woto: ‘Sẽn wõnd a Zeova pa maan bũmb n na n yols maam m toogã pʋgẽ wã rat n yeelame t’a pa ne m yellã bɩ t’a toog kae bɩ?’ Vẽenega, leokrã yaa ayo! A Zezi sẽn tũus a tʋm-tʋmdbã poor bilfu, a yeel-b-la bũmb sẽn wilgd vẽeneg t’a Zeova tagsda a sõgen dãmbã sẽn sakd-a wã fãa yelle. Bɩ d ges a goamã sẽn tõe n keng tõnd raood to-to rũndã-rũndã.
“Bɩ y ra zoe rabeem ye,” bõe yĩnga?
5, 6. a) Wãn to la a Zezi sõng tʋm-tʋmdbã tɩ b ra zoe rabeem ne yɛl nins sẽn da gũud-bã? b) Wãn to la a Poll wilg t’a ra kɩsa sɩd t’a Zeova na n gesa a yelle?
5 Tʋm-tʋmdbã paama pãn-kãseng a Zezi nengẽ, hal n da tõe n “dig zĩn dẽgdo, la b maag bãas buud fãa ne yĩns tood buud fãa.” La rẽ ra pa rat n yeel tɩ b ra pa na n seg makr la toog ye. A Zezi wilga yɛl sãnda sẽn da na n paam-ba. Baasg zãnga a sagl-b lame: “Bɩ y ra zoe neb nins sẽn kʋʋd yĩngã, la b ka tõe n kʋ sɩɩga ye. Sẽn yɩɩda bɩ y zoe sẽn tõe n sãama sɩɩga ne yĩng a yiib fãa [zeyɛnnã].”—Matɩe 10:1, 16-22, 28.
6 Sẽn na yɩl n sõng a tʋm-tʋmdbã tɩ b wʋm bũmb ning sẽn kɩt tɩ b pa segd n zoe rabeemã võore, a Zezi rɩka makr a yiibu, n yeel-b woto: “B ka koosd yirs a yiib sou bɩ? La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobda fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.” (Matɩe 10:29-31) Ges-y t’a Zezi wilgame tɩ ra zoe rabeem namsgã taoorã bee ne d sẽn na n tall bas-yard t’a Zeova geta tõnd mengã yelle. Tʋm-tʋmd a Poll ra tara bas-yard kãng buudu. A gʋlsame: “Wẽnnaam sã n be ne tõndo ãnda n tõe n tõog-do? Bãmb sẽn ka bas b meng Biiga tɩ põsã, la b sẽn kõ bãmb tõnd fãa yĩngã, bãmb kõn lagem bũmb fãa ne bãmb me n kõ tõnd bɩ?” (Rom dãmba 8:31, 32) Baa makr nins fãa yãmb sẽn segdã, yãmb me tõe n kɩsa sɩd t’a Zeova geta y yelle, y sã n ket n sakd-a. Rẽ na n yɩɩ vẽeneg n paas menga, y sã n vaees saglg ning a Zezi sẽn kõ a tʋm-tʋmdbã neer n paase.
Yirg ligd sẽn zem to-to
7, 8. a) Nebã tagsg ne yirsã ra yaa wãn to a Zezi wakatã? b) Vẽenega, bõe yĩng tɩ Matɩe 10:29 gom yirs sẽn yaa kɩds yelle?
7 A Zezi sẽn dɩk makr ninsã sɩd bilgda a Zeova sẽn get a sõgen dãmbã ned kam fãa yell neerã. Pipi, bɩ d ges yirsã kibare. A Zezi wakatã, neba ra wõbda yirsã, la b sẽn da sãamd koodã yĩnga, nebã ra get-b-la wa yell meng-menga. Yirsã ra yaa wʋsg la no-noog hal tɩ b ra tõe n paam bãmb b yiib ne sẽn pa ta rũndã-rũndã wakɩr a nu. Ne wakɩr piiga, f ra tõe n paama yirs a nu, t’a yembrã sẽn paasã yaa lɛnga, tɩ ra yaa wa yir-kãng pa tar yõod baa bilf ye.—Luk 12:6.
8 Leb-y n tags-y yirg bedrem sẽn da yaa to-to wã yelle. B sã n mak-a ne liuuli a taaba, baa yirg sẽn bɩ n ta ket n yaa kɩdg Matɩe 10:29 pʋgẽ wã tɩ loee ne yirs sẽn yaa kɩdse. Vẽenega, a Zezi ra ratame t’a tʋm-tʋmdbã tags liuul ning sẽn yaa kɩdg la yõod sẽn paood n yɩɩdã yelle.
bala. La gɛrk gom-biig ning b sẽn lebg tɩ “yirs”9. Zãms-bʋg sẽn tar pãng n be a Zezi bilgr ning sẽn gomd yirsã yellã pʋgẽ.
9 A Zezi sẽn dɩk makr ne yirsã kɩtdame tɩ tagsg ning a sẽn da rat tɩ b bãngã tall pãnga: Bũmb sẽn wõnd a ka yõod ninsaalbã nifẽ tara yõod ne Wẽnnaam a Zeova. Rẽ poore, a Zezi wilga sɩd kãng vẽenega, n paas tɩ yirg sẽn yaa kɩdg “ka lʋɩt tẽng” t’a Zeova pa yã ye. * Kibarã sẽn tar zãmsg ningã yaa vẽenega. Wẽnnaam a Zeova sã n ne liuul ning sẽn yaa kɩdg la yõod sẽn paood n yɩɩdã, a sẽn na n ges ninsaal sẽn yãk yam n na n maan a raabã yell n yɩɩde!
10. B sẽn yeel tɩ “baa yãmb zoobda fãa sõdame” wã võor yaa bõe?
10 A Zezi makr ning sẽn gomd yirsã yellã toor sẽn ka be, a yeelame: “Baa yãmb zoobda fãa sõdame.” (Matɩe 10:30) Gom-kãngã sẽn yaa koɛɛg la sẽn tagmã paasda a Zezi bilgr ning sẽn tɩ loe ne yirsã pãnga. Ges-y-yã: Ninsaal zoobdã sõor zemsa bãmb 100000. Tõnd zoobd wʋsg wõnda taaba, tɩ yaa wa zoobg ba a yembr pa zems ne tõnd gẽnesg ye. La Wẽnnaam a Zeova nee zoobg fãa n sõt-a. Sẽn mik tɩ yaa woto wã, bõn-kɩdg bee tõnd vɩɩmã pʋgẽ t’a Zeova pa tõe n bãng bɩ? Sɩd-sɩda, a Zeova mii a sõgen dãmbã yembr-yembr yalẽ sẽn yaa toor-toorã. Sɩda, a pʋd n “geta sũuri.”—1 Sãmwɛll 16:7.
11. Wãn to la a Davɩɩd wilg ne a goam t’a kɩsa sɩd t’a Zeova geta yẽ mengã yelle?
11 A Davɩɩd yãa tood wʋsgo. La a ra kɩsa sɩd t’a Zeova ra ne-a lame. A gʋlsame: “Zusoaba, yãmb feesda maam n mi maam. Yãmb mii wakat ninga mam sẽn zĩndeda la wakat ninga mam sẽn yikda, yãmb bãnga mam tagsga yɩɩga.” (Yɩɩl Sõamyã 139:1, 2) Yãmb me tõe n kɩsa sɩd t’a Zeova mii yãmb mengã. (Zeremi 17:10) Ra yɩ-y tao-tao n tags tɩ y yaa kɩdg wʋsg ne a Zeova na tõog n yã-y ye. A nee bũmb fãa!
“Sui-y mam nintãma y ko-waoog pʋgẽ”
12. Wãn to la d mi t’a Zeova mii tood nins sẽn namsd a nin-buiidã sõma?
12 A Zeova pa mi a sõgen dãmbã yembr-yembr bal ye, a leb n mii tood nins sẽn namsd bãmb ned kam fãa wã. Wala makre, Israɛll nebã sẽn da wa n namsd yembdã pʋgẽ wã, a Zeova yeela a Moiizi: “Mam yãa m neba sẽn be Ezipta namsgo. La mam wʋma bãmb kelemse tʋʋm soaadba sẽn namsd bãmbã. N-ye, mam mii bãmb toogã.” (Yikri 3:7) Ad sɩd yaa bũmb sẽn kõt-d belsgo, d sẽn mi tɩ d sã n wa be makr pʋgẽ, a Zeova nee bũmb ning sẽn maandã, la a wʋmda tõnd kelemsã! Sɩd-sɩda, a pa maand a toog kae ne tõnd namsgã ye.
13. Bõe n wilgd t’a Zeova sɩd zoeta a sõgen dãmbã nimbãanega?
13 D leb n nee a Zeova sẽn get neb nins sẽn tar zood ne yẽ wã yelle, d sã n ges Ezai 63:9, NW) Y sã n yaa a Zeova sõgen sẽn sakd-a, y tõe n kɩsa sɩd tɩ bũmb sã n sãamd y sũuri, sãamda a Zeova me sũuri. Rẽ pa tusd yãmb tɩ y zab ne yɛlã n da zoe rabeem la y ket n maand y sẽn tõe fãa sẽn na yɩl n maan a Zeova raabã sɩda?—1 Pɩɛɛr 5:6, 7.
a sẽn tall nimbãan-zoeer ning ne Israɛll nebã. Baa ne sẽn da yaa bãmb mens tõdgrã n da kɩtd tɩ b namsd naoor wʋsgã, a Ezai gʋlsa woto a Zeova wɛɛngẽ: “B toogã fãa sasa, yɩɩ sũ-sãang ne-a.” (14. Yaa yel-bʋs pʋsẽ la b gʋls Yɩɩl Sõamyã 56 soabã?
14 Rĩm a Davɩɩd sẽn da kɩs sɩd t’a Zeova ra geta a yell la t’a ra zoeta a nimbãanegã yaa vẽeneg Yɩɩl Sõamyã 56 soabã pʋgẽ. Yaa a Davɩɩd n gʋls yɩɩn-kãngã a sẽn da wa n zoet n baood a yõor rĩm a Sayull sẽn da baood-a n dat n kʋ wã sasa. A Davɩɩd zoe n kẽnga Gate, la Filisti nebã sẽn wa n bãng-a wã, a ra yaeesda b na n wa yõk-a. A gʋlsame: “Mam gũusdba baooda mam n na n tab daar fãa; tɩ bõe, wʋsg zẽkda b mens ne maam n zabd ne maam.” A Davɩɩd sẽn da be yell pʋgẽ wã yĩnga, a baoa a Zeova sõngre. A yeelame: “Daar fãa bãmb wẽnemdeda mam goama. Bãmb ka tar tagsg ne maam tɩ sã n ka wẽng ye.”—Yɩɩl Sõamyã 56:3, 6.
15. a) A Davɩɩd da rat n yeelame tɩ bõe, a sẽn kos a Zeova t’a ning a nintãmã ko-waoogẽ bɩ t’a gʋls-a sebr zugã? b) Tõnd sã n segd yell sẽn yaa makr n kõ tõnd tẽebã, d tõe n kɩsa sɩd ne bõe?
15 Yɩɩl Sõamyã 56:9 pʋgẽ, a Davɩɩd leb n togsa gom-kãensã sẽn be rasãndã: “Yãmb geelgda mam gõodem. Sui-y mam nintãma y ko-waoog pʋgẽ. Bãmb ka be yãmb sebr pʋgẽ sɩda?” Ad bilg-kãngã sɩd wilgdame t’a Zeova geta d yell ne nonglem wʋsgo! D sã n wa be yɩɩr pʋgẽ, d tõe n kelmame n kos a Zeova sõngr ne nintãm. Baa ne a Zezi sẽn da yaa ninsaal sẽn zems zãngã, a maana woto. (Hebre dãmba 5:7) A Davɩɩd da kɩsa sɩd t’a Zeova ra get-a lame, la t’a ra na n wa tẽega a toogã yelle, tɩ yaa wala a ra bĩngda a nintãmã ko-waoog pʋgẽ bɩ t’a ra gʋlsd-a-la sebr pʋgẽ. * Tõe tɩ y tagsdame tɩ y nintãmã yaa wʋsg ko-wao-kãng pʋgẽ bɩ tɩ y nintãmã gʋlsa seb-nens wʋsg zut seb-kãng pʋgẽ. Sã n yaa woto, y tõe n paama belsgo. Biiblã kõta tõnd bas-m-yam woto: “Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã.”—Yɩɩl Sõamyã 34:19.
D lebg Wẽnnaam zoa
16, 17. a) Wãn to la d mi t’a Zeova pa maand a toog kae ne zu-loees nins a nin-buiidã sẽn segdã? b) Bõe la a Zeova maan sẽn na yɩl tɩ nebã tõog n paam zood ne-a?
16 A Zeova sẽn sõt ‘tõnd zutã zoobdã’ sõngda tõnd tɩ d bãng Wẽnnaam ning tõnd sẽn tar zu-noog n balemdẽ wã sẽn get tõnd yellã tɩ ta zĩig ningã. Baa ne d sẽn segd n gũ dũni paalgã tɩ d toodã la d namsgã fãa yaool n sa wã, a Zeova maanda bõn-kãseng a nin-buiidã yĩng masã menga. A Davɩɩd gʋlsame: “Zusoaba zood yaa neb nins sẽn zoet bãmba yĩnga, la bãmb kãabg zãmsda bãmb bãngre.”—Yɩɩl Sõamyã 25:14.
17 “Zood ne” a Zeova. Yel-kãngã tõe n yɩɩda tõnd sẽn yaa ninsaalb sẽn pa zems zãngã võor wʋmbo! Ne rẽ fãa, a Zeova boonda neb nins sẽn zoet-a wã tɩ b wa sig a zãndẽ wã. (Yɩɩl Sõamyã 15:1-5) La yaa bõe la a Zeova maand n kõt neb nins a sẽn boolã? Sã n yaa ne a Davɩɩde, a kɩtdame tɩ b bãng a kaoolã. A Zeova basa yard ne-ba, n wilgd a no-rɛɛsdbã ‘bũmb nins a sẽn na n maanã,’ la b sẽn na n maan to-to tɩ b vɩɩmã zems ne bõn-kãense.—Amos 3:7.
18. Wãn to la d mi t’a Zeova ratame tɩ d paam zood ne-a?
Zak 4:8) A Zeova ratame tɩ d tall zood ne-a. Sɩda, a zoe n dɩka segls sẽn na yɩl tɩ zood kãng tõog n zĩndi. A Zezi maoongã sẽn yaa rondã paka sor tɩ d tõe n paam zood ne Wẽnnaam Sẽn-tõe-fãa wã. Biiblã yetame: “Tõnd nonga bãmba, bãmb sẽn deng n nong tõnda yĩnga.”—1 Zã 4:19.
18 Ad d sũy sɩd yaa noog d sẽn mi tɩ tõnd sẽn yaa ninsaalb sẽn pa zems zãngã tõe n lebga Wẽnnaam a Zeova sẽn yaa zãntlem sẽn ka to Soabã zo-rãmbã. Sɩda, a sagenda tõnd tɩ d bao a zoodo. Biiblã yeta woto: “Bɩ y kolg Wẽnnaam, la bãmb na kolg yãmba.” (19. Wãn to la sũ-marã tallg toog pʋgẽ paasd zems-n-taar ning d sẽn tar ne a Zeova wã?
19 Zood kãng pãngã paasdame, d sã n tar sũ-mar yel-toodã pʋsẽ. Karen-biig a Zak gʋlsa woto: “Yaa tɩlae tɩ sũ-mar maan a tʋʋmd n baase tɩ yãmb bɩ n zems zãnga la tɩ bũmb da paoog yãmb ye.” (Zak 1:4) ‘Tʋʋm-bʋg’ n maande, d sã n tall sũ-mar toogã pʋgẽ? Tẽeg-y a Poll ‘yĩng gõaagã’ yelle. Wãn to la sũ-marã sõng-a yel-kãng pʋgẽ? A Poll yeela woto a toodã wɛɛngẽ: “Woto, mam na n maana sũ-noog n yɩɩd m pãn-komsma pʋgẽ tɩ Kirist pãng pid maam. Yaa woto yĩnga mam maanda sũ-noog pãn-komsem pʋgẽ la paoogr pʋgẽ la yel-pakr pʋgẽ la namsg pʋgẽ la tood pʋsẽ Kirist yĩnga; tɩ bõe, mam sẽn ka be pãng wakate, yaa wakat kãng la mam paamd pãnga.” (2 Korẽnt dãmba 12:9, 10) A Poll sẽn vɩɩmd bũmb ningã wilgdame tɩ sã n yaa tɩlae, a Zeova ra na n kõ-a-la pãng sẽn yɩɩd pãn-zaalgã, t’a tõog n tall sũ-mar toogã pʋgẽ. Yaa rẽ n pẽneg-a ne Kirist la ne Wẽnnaam a Zeova n paase.—2 Korẽnt dãmba 4:7; Filip rãmba 4:11-13.
20. Wãn to la d tõe n kɩs sɩd t’a Zeova na n teela tõnd la a bels-d d toogã pʋgẽ?
20 Tõe t’a Zeova basame tɩ yãmb makrã ket n beẽ. Sã n yaa woto, bɩ y ning kãab-kãngã a sẽn kãab neb nins fãa sẽn zoet-a wã y yamẽ: “Mam kõn bas yãmb walla m mong yãmb abada.” (Hebre dãmba 13:5) Y tõe n paama teelg la bels-kãngã. A Zeova sõda “yãmb zoobdã fãa.” A nee yãmb sẽn deegd toog ning ne sũ-marã. Y toogã reeg n namsd-a lame. A sɩd geta yãmb yelle. La a pa na n tol n “yĩm yãmb tʋʋmda ne y nonglma yãmb sẽn wilg [a] yʋʋrã yĩnga” ye.—Hebre dãmba 6:10.
[Tẽngr not rãmbã]
^ sull 2 Nin-tɩrg a Davɩɩd la a Koore kambã sẽn yɩ wẽn-sakdbã me goma goam sẽn wõnd woto.—Yɩɩl Sõamyã 10:1; 44:25.
^ sull 4 Biiblã pa wilgd a Poll ‘yĩng gõaagã’ sẽn da yaa bũmb ning ye. Tõe tɩ ra yaa bãag wala nin sẽn pa ne sõma. Bɩ tõe tɩ yaa ziri tʋm-tʋmdbã la neb a taabã sẽn kɩɩs a Poll tʋʋmdã la a koe-moonegã.—2 Korẽnt dãmba 11:6, 13-15; Galat dãmba 4:15; 6:11.
^ sull 9 Mitb kẽer yetame tɩ yirgã sẽn lʋɩt tẽngã tõeeme n pa a kũum bal ye. B yetame tɩ sã n yaa ne pipi buud-goamã, tõe tɩ woto bilgda liuulã sẽn na n sig tẽng n baood rɩɩbo. Sã n yaa woto, tõe n dat n yeelame tɩ Wẽnnaam nee liuulã sẽn maand daar fãa wã, la a get a yelle, pa a sã n wa kiidẽ bal ye.—Matɩe 6:26.
^ sull 15 Tẽn-kʋdem wẽndẽ wã, ko-waoosã ra maana ne piisi, bʋʋs bɩ niig gãnd b sẽn nome. B ra suiida bĩisim, bĩis-kaam, formaaz bɩ koom ko-wao-kãens pʋsẽ. B ra tõe n suiya kaam bɩ rãam ko-waoos nins gãnd b sẽn nom sõma wã pʋsẽ.
Y tẽrame bɩ?
• Yel-bʋs n tõe n kɩt tɩ ned tags tɩ Wẽnnaam bas-a lame?
• A Zezi bilgr ning sẽn gomd yirsã la tõnd zutã zoobd sõdgã yellã zãmsda tõnd bõe?
• Paam t’a Zeova suy f nintãmã a ‘ko-waoog’ pʋgẽ bɩ a gʋls-a ‘a sebrã’ pʋgẽ wã võor yaa bõe?
• Wãn to la d tõe n paam a Zeova “zoodo”?
[Zãmsgã sogsgã]
[Foto, seb-neng 19]
Bõe yĩng t’a Zeova pa yãk a Poll ‘yĩng gõaagã’?
[Foto, seb-neng 20]
Bõe la yirsã makr a Zezi sẽn dɩkã tõe n zãms tõndo?
[Fotã sẽn yitẽ]
© J. Heidecker/VIREO
[Foto, seb-neng 22]
Biiblã kareng wakat fãa tõe n kõo tõnd mengã bas-m-yam tɩ Wẽnnaam geta d yelle