A Zeova yaa ‘neb nins sẽn sɩd baood yẽ wã roanda’
A Zeova yaa ‘neb nins sẽn sɩd baood yẽ wã roanda’
“Ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.”—HEBRE DÃMBA 11:6.
1, 2. Bõe yĩng t’a Zeova sõgen dãmb kẽer tõe n wa tar tagsa sẽn komsd raoodo?
“MAM yaa a Zeova Kaset soab sẽn na maan yʋʋm 30, la m zɩ n tags tɩ m zemsa ne b na bool-m woto ye.” Woto la a Barbara yeel-yã. * A paasame: “Baa ne m sẽn yɩ so-pakd la m tall zu-noog tʋʋm wʋsgã, bõn-kãens baa a yembr yĩng pa wõnd a seka a na kɩt tɩ m tẽed tɩ m zemsa ne b na bool-m t’a Zeova Kaset soab ye.” A Keith me togsa goam sẽn wõnd woto. Ad a sẽn yeele: “Wakat ninga m tagsame tɩ m pa zems ne b bool-m t’a Zeova Kaset soab ye, bala a Zeova sõgen dãmbã tara bʋʋm wʋsg n na n tall sũ-noogo, la maam yẽ ra pa tar sũ-noog ye. Rẽ kɩtame tɩ m da ningd m meng taale, la rẽ zẽna yɛlã n paas bala.”
2 A Zeova sõgen-sakdb wʋsg sẽn zĩnd pĩnd la sẽn be masã maoa ne tagsa woto buudu. Yaa woto ne yãmb wakat ning bɩ? Tõe tɩ yãmb zu-loeesã yaa wʋsgo, tɩ yaool n yaa wa y tẽed-n-taasã tara sũ-noog b vɩɩmã pʋgẽ, n pa tar zu-loees ye. Rẽ tõe n kɩtame tɩ y tags tɩ y pa tat a Zeova yam bɩ tɩ pa zems t’a ges y yell ye. Ra yɩ-y tao-tao n tags tɩ yaa woto ye. Biiblã kõta tõnd bas-m-yam n yetẽ: “[A Zeova] ka paoog naong soaba walla a kɩɩs yẽnda a naong yĩng ye. La bãmb Yɩɩl Sõamyã 22:25) Bãngr-gom-kãensã sẽn tɩ loe ne Mesi wã wilgdame t’a Zeova pa wʋmd a sõgen-sakdbã pʋʋsg bal ye, la t’a keood-b lame me.
ka solg bãmb neng ne-a ye. La yẽ sẽn kelemd n kot sõngre, bãmb kelgdame.” (3. Bõe yĩng tɩ dũni kãngã weoogrã tat tõndo?
3 Ned baa a yembr pa põsd dũni kãngã weoogrã ye, baa a Zeova nin-buiidã menga. Tõnd sẽn vɩ dũni ning pʋgẽ wã, yaa a Zeova bɛ a Sʋɩtãan n dɩt naam. (2 Korẽnt dãmba 4:4; 1 Zã 5:19) A Zeova sõgen dãmbã pa paamd koglg ne yel-solemd ye, la pʋd n yaa bãmb la a Sʋɩtãan zabd ne n yɩɩda. (Zoob 1:7-12; Wilgri 2:10) La hal tɩ Wẽnnaam sẽn yãk wakat ningã ta, d segd n ‘maana sũ-mar toog pʋgẽ,’ la d “pʋʋs n da bas ye,” n miẽ bal t’a Zeova geta d yelle. (Rom dãmba 12:12) D pa segd n tags tɩ tõnd Wẽnnaam a Zeova pa nong-d ye!
Neb sẽn tall sũ-mar toog pʋgẽ pĩnd wẽndẽ
4. Rɩk-y makr sẽn wilgd a Zeova sõgen-sakdb sẽn tall sũ-mar yel-tood pʋsẽ.
4 A Zeova pĩnd wẽndẽ sõgen dãmb wʋsg talla sũ-mar tood pʋsẽ. Wala makre, a Ana “sũurã sãamame,” a sẽn da pa tar dogmã yĩnga, t’a ra get rẽ wa bũmb sẽn wilgd tɩ Wẽnnaam bas-a lame. (1 Sãmwɛll 1:9-11) Na-pag a Zezabɛll sẽn da wa n baood a Eli n na n kʋ wã, a Eli zoee rabeem n pʋʋs a Zeova woto: “Zusoaba, masã, a sekame, bɩ y reeg m vɩɩma, tɩ mam me ka yɩɩd m yaab rãmba ye.” (1 Rĩm dãmba 19:4) Tʋm-tʋmd a Poll me pãn-komsmã ra segd n sãama a sũurã wʋsgo, a sẽn wa n sak n yeel tɩ: “Mam sẽn dat n maan neere, wẽng loee ne mam.” A paasame tɩ: “Mam yaa nimbãan-ned bala.”—Rom dãmba 7:21-24.
5. a) Wãn to la Zeova keo a Ana, a Eli la a Polle? b) Bels-bʋg la d tõe n paam Wẽnnaam Gomdã pʋgẽ, d sã n maood ne tagsa sẽn sãamd sũuri?
5 Yaa sɩda, d miime t’a Ana, a Eli la a Poll reega toog ne sũ-mar a Zeova tʋʋmdã pʋgẽ, la t’a keo-b-la wʋsgo. (1 Sãmwɛll 1:20; 2:21; 1 Rĩm dãmba 19:5-18; 2 Tɩmote 4:8) Baasg zãnga, yɛl nins sẽn mi n paamd ninsaalbã paama bãmb me, wala makre, sũ-sãamse, raood komsgo, la rabeem. Rẽnd wakat-wakate, d sã n tar tagsa sẽn sãamd sũuri, pa segd n ling-d ye. La bõe la y tõe n maane, vɩɩmã yɩɩr sã n kɩt tɩ y sãmbd a Zeova sã n sɩd nong-y lame bɩ a pa nong-yã? Y tõe n paama belsg Wẽnnaam Gomdã pʋgẽ. Wala makre, sõsg ning sẽn loogã pʋgẽ, d sõsa a Zezi sẽn togs t’a Zeova sõda “yãmb zoobda fãa” wã yelle. (Matɩe 10:30) Gom-kãensã sẽn kengd pɛlgã wilgdame t’a Zeova sõgen dãmbã yembr-yembr yell pak-a-la wʋsgo. Tẽeg-y a Zezi sẽn dɩk makr ne yirsã me. Liuun-kɩds kãensã a yembr sã n pa tõe n lʋɩ tẽng t’a Zeova pa yã, bõe yĩng masã t’a na n mum a nin yãmb toogã taoore?
6. Wãn to la Biiblã tõe n yɩ belsg n kõ neb nins sẽn maood ne tagsa sẽn komsd raoodã?
6 Tõnd sẽn yaa ninsaalb sẽn pa zems zãngã, d sɩd tõe n talla yõod wʋsg Wẽnnaam a Zeova sẽn yaa Naand sẽn tõe fãa wã nifẽ bɩ? N-ye! Sɩda, Biiblã zĩis wʋsg n kõt tõnd bas-m-yam ne rẽ. D sã n bʋgs b zug neere, d tõe n wa yeela wa Yɩɩl gʋlsdã woto: “Wakat ninga tagsg sẽn yaa toog sẽn yaa wʋsg ne maama, yãmb belsga kõta maam sũ-noogo.” (Yɩɩl Sõamyã 94:19) Bɩ d ges gom-kãens sẽn kõt belsgã sẽn yit Wẽnnaam Gomdã pʋgẽ wã sãnda. Rẽ na n sõng-d lame tɩ d bãng n paas tɩ d tara yõod Wẽnnaam nifẽ, la t’a na n keoa tõndo, d sã n ket n maand a raabã.
A Zeova meng ‘neba’
7. Bãngr-gom-bʋg sẽn kengd raood la a Zeova tũnug ne a Malaki n kõ buudã sẽn da kẽ yel-wẽn pʋgẽ wã?
7 Yʋʋm kob-gĩnd a naas soab sẽn deng a Zezi rogmã, Zʋɩf rãmbã vɩɩm da pa lebd be ye. Maan-kʋʋdbã ra sakd n deegda rũms sẽn tar zams n maand maand a Zeova tẽn-kugrã zugu. Bʋ-kaoodbã ra wẽgda neb kẽer b bʋʋdã kaoob pʋgẽ. Sõodã, ziri wã, zãmbã la yoobã ra bee wʋsgo. (Malaki 1:8; 2:9; 3:5) A Malaki togsa bu-kãngã sẽn da kẽ yel-wẽn wʋsg pʋgẽ wã bãngr-gomd sẽn lingd wʋsgo. A wilgame tɩ wakat n da na n wa zĩnd t’a Zeova na n kɩt t’a nin-buiidã le paam a lohormã. D karemdame: “Saasẽ-pãng-soaba yeelame: ‘Bãmb na n yɩɩ mam neba. Raar ninga m sẽn segendã, bãmb na n yɩɩ mam dẽnda. Mam na n zoee bãmb nimbãaneg wa ned sẽn zoet a biig sẽn zoet-a nimbãanega.’”—Malaki 3:17.
8. Bõe yĩng tɩ Malaki 3:17 tõe n tɩ loe ne kʋʋn-kãsengã?
8 A Malaki bãngr-gomdã tara pidsg rũndã-rũndã kiris-neb nins sẽn paam vʋʋsem sõng zaeebã sẽn yaa buud tẽebã wɛɛngẽ, t’a nebã sõor yaa 144000 zutu. Bu-kãng sɩd yaa a Zeova “neba,” bɩ a “nin-daadse.” (1 Pɩɛɛr 2:9) A Malaki bãngr-gomdã tõe n kenga ‘kʋʋn-kãsengã’ sẽn ‘yas geera ne Pebila taoore, n yer fu-peelsã’ me raoodo. (Wilgri 7:4, 9) B lebga bãgr a yembr ne sẽn paam-b vʋʋsem sõng zaeebã, Pekɩɩm yɛng a Zezi Kirist sor-wilgr pʋgẽ.—Zã 10:16.
9. Bõe yĩng t’a Zeova sõgen dãmbã yaa a meng ‘neba’?
9 Wãn to la a Zeova get neb nins sẽn yãk yam n na n maan a raabã? Wala b sẽn wilg Malaki 3:17 pʋgẽ wã, a get-b-la wala ba sẽn tar nonglem sẽn get a biig to-to wã. La ges-y a sẽn pẽgd a nin-buiidã ne pẽgr goam ninsã. A yeelame tɩ: “mam neba.” Biiblã lebgr a taab yetame tɩ “mam meng nebã,” “mam soolem sẽn tar yõod n yɩɩdã,” “mam bõn-neebã.” Bõe yĩng t’a Zeova nand neb nins sẽn maand a raabã wʋsg woto? Bʋʋm a yembr yaa a sẽn yaa Wẽnnaam sẽn pa yĩmd ned tʋʋm sõma wã yĩnga. (Hebre dãmba 6:10) A pẽnegda neb nins sẽn maand a raabã ne b sũy fãa wã la a nand-b n yɩɩd neb a taabã.
10. Wãn to la a Zeova kogend a nin-buiidã?
10 Yãmb tara bũmb sẽn tar yõod wʋsg y sẽn get wa bũmb sẽn yaa sõmã n yɩɩd a taabã bɩ? Y pa maand y sẽn tõe tɛk n kogend-a sɩda? Yaa woto la a Zeova maand ne a meng nebã. Yaa sɩd t’a pa kɩtd t’a nin-buiidã põs vɩɩmã yel-tood la a zu-loees fãa ye. (Koɛɛg Soaba 9:11) La a Zeova tõeeme la a na n kogla a sõgen dãmb nins sẽn sakd-a wã tẽebã wɛɛngẽ. A kõt-b-la pãng sẽn na yɩl tɩ b tõog n tall sũ-mar makr buud fãa pʋgẽ. (1 Korẽnt dãmba 10:13) Woto, a Moiiz ra yeela Israɛll sẽn yɩ Wẽnnaam pĩnd wẽndẽ nin-buiidã tɩ: “Nang-y pãnga, keng-y y sũyã. . . . Tɩ bõe, Zusoab a Wẽnnaam yãagda yãmba. Bãmb sõngra ka na n vaal ye, b ka na n bas yãmb ye.” (Tõodo 31:6) A Zeova keoogda a nin-buiidã. Sã n yaa ne yẽ, b yaa yẽ meng “neba.”
A Zeova yaa “roanda”
11, 12. Wãn to la d sẽn na n miẽ t’a Zeova sɩd yaa Roandã tõe n sõng tõnd tɩ d ra maan yam-yoogo?
11 Bũmb a to sẽn wilgd t’a Zeova nanda a sõgen dãmbã wʋsg yaa a sẽn keood-bã. A yeela Israɛll nebã tɩ: “Mak-y maam woto n ges mam sã n ka na n pak saag t’a ni-yã. La m kõ yãmb bark wʋsg tɩ sek-yã. Mam yaa Saasẽ-pãng-soaba, yaa maam n yeele.” (Malaki 3:10) Yaa vẽeneg tɩ sẽn na n baase, a Zeova na n keoa a sõgen dãmbã n kõ-b vɩɩm sẽn pa satã. (Zã 5:24; Wilgri 21:4) Keo-kãngã sẽn pa tõe n bãng n sɩfã wilgda a Zeova nonglmã sẽn yaa kãsengã la a sẽn yaa kõt tɩ ta zĩig ningã. Woto leb n wilgdame t’a sɩd nanda neb nins sẽn yãk yam n maand a raabã. D sã n minim n get a Zeova wala Roanda, tõe n sõnga tõnd tɩ d ra maan yam-yoog Wẽnnaam sẽn get tõnd to-to wã wɛɛngẽ ye. Sɩda, a Zeova yeta tõnd tɩ d bãng tɩ yẽ yaa Roanda. A Poll gʋlsame: “Ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.”—Hebre dãmba 11:6.
12 Yaa sɩd tɩ d sẽn maand a Zeova raabã, yaa d sẽn nong-a wã yĩnga, la pa a sẽn kãab tõnd keoorã yĩng bal ye. La d sã n ket n tẽed tɩ d na n paama keoorã, pa bũmb sẽn pa zems bɩ sẽn wilgd tɩ d yaa rat-m-yembr soab ye. (Kolos rãmba 3:23, 24) A Zeova yãka yam n na n sõng la a keo neb nins sẽn baood-a ne b sũy fãa wã, a sẽn nong-ba yĩnga, la b sẽn tar yõod wʋsg a nifẽ wã yĩnga.
13. Bõe yĩng tɩ rondã yaa kaset ning sẽn yaa kãseng n yɩɩd sẽn wilgd t’a Zeova nonga tõndã?
13 Bũmb ning sẽn yaa kãseng n yɩɩd sẽn wilgd tɩ ãdem-biisã tara yõod a Zeova nifẽ yaa a sẽn kõ rondã. Tʋm-tʋmd a Zã gʋlsa woto: “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) A Zezi Kirist maoongã sẽn yaa rondã wilgda vẽeneg tɩ d pa segd n tags tɩ d ka yõod a Zeova nifẽ bɩ t’a pa nong-d ye. Sɩda, a Zeova sã n yaoa yaood sẽn yaa kãseng wʋsg woto tõnd yĩnga, n kõ a Biribl yend ning a sẽn naan a toorã, rẽnd a sɩd nong-d-la wʋsgo.
14. Bõe n wilgd a Poll tagsg sẽn da yaa to-to ne rondã?
14 Yãmb sã n wa tagsdẽ tɩ y pa tar yõodo, bɩ y tags rondã yelle. N-ye, ges-y kũun kãngã wa kũun a Zeova sẽn kõ yãmb mengã. Yaa woto la tʋm-tʋmd a Poll maan-yã. Tẽeg-y t’a yeelame: “Mam yaa nimbãan ned bala.” La a paasa woto: “Bark Wẽnnaam tõnd Zusoab a Zezi Kirist maasem yĩnga,” ‘sẽn nong maam n kõ a meng mam yĩngã.’ (Rom dãmba 7:24, 25; Galat dãmba 2:20) A Poll sẽn yeel woto wã, a ra pa tagsd a meng yell bal ye. A goamã wilgdame bal t’a ra kɩsa sɩd t’a Zeova ra nanda yẽ mengã. Wala a Polle, yãmb me segd n geta rondã wala Wẽnnaam kũun a sẽn kõ yãmb mengã. A Zeova pa Fãagd sẽn tar pãng bal ye, a yaa Roand sẽn tar nonglem me.
Gũus-y ne ‘a Sʋɩtãan sɩlmã’
15-17. a) Wãn to la a Sʋɩtãan rat n kʋɩɩb tõnd ne tagsa nins sẽn komsd raoodã? b) Wãn to la a Zoob sẽn vɩɩmd yɛl ninsã tõe n keng tõnd raoodo?
15 La tõe tɩ ket n yaa toog ne yãmb tɩ y tẽ tɩ belsg ning Wẽnnaam sẽn kɩt tɩ b gʋls a Gomdã pʋgẽ wã sɩd yaa bũmb sẽn tõe n naf yãmba. Tõe tɩ y tags tɩ vɩɩm sẽn pa sat Wẽnnaam dũni paalgã pʋgẽ wã yaa keoor neb a taabã sẽn tõe n paame, la tɩ yãmb pa zems ne a paoong ye. Y sã n tagsd woto, yaa bõe la y tõe n maane?
16 Sãmbg sẽn ka be, y mii a Poll sagl-kãngã a sẽn taas Efɛɛz rãmbã: “Bɩ y bob Wẽnnaam zab-teed fãa, tɩ yãmb tõe n tõog Sʋɩtãana sɩlem fãa.” (Efɛɛz rãmba 6:11) Y sã n tagsd a Sʋɩtãan bẽdsã yelle, yɛl wala laogã nonglem la yoobã tõe n waa y yamẽ nana-nana, la y bee bʋʋm. Bõn-kãens yɩɩ bẽdg n kõ Wẽnnaam sõgen dãmb wʋsg pĩnd wẽndẽ wã la rũndã-rũndã me. La a Sʋɩtãan tara bẽdg a to d sẽn pa segd n yĩm ye. A maoodame n dat tɩ nebã tags tɩ Wẽnnaam a Zeova pa nong-b ye.
17 A Sʋɩtãan tara yam wʋsg sã n yaa ne tũnug ne tags-kãensã buud n kɩt tɩ nebã bas Wẽnnaamã. Tẽeg-y goam nins a Bildaad sẽn taas a Zoobã yelle. A yeelame: “Ned na n yɩɩ wãn n paam bʋʋm Wẽnnaam taoore? Ninsaalb na n yɩɩ wãn n yɩ sõama? Gese, ne Wẽnnaam, kiuuga peelem ka waoog ye. La ãdsa me ka sõama zãng ne bãmb ye, la ninsaal sẽn yaa wa zũnzũrã n yɩɩda.” (Zoob 25:4-6; Zã 8:44) Gom-kãensã ra segd n komsa a Zoob raood wʋsgo. Bɩ y ra bas t’a Sʋɩtãan koms y raood ye. Bãng-y a Sʋɩtãan bõn-datɩ wã me, sẽn na yɩl n tall daood n ket n maoodẽ la y paam pãng n maand sẽn yaa tɩrga. (2 Korẽnt dãmba 2:11) Baa ne sẽn yɩ tɩlae t’a Zeova rems a Zoob tagsgã, a Zeova keo-a-la a sẽn tall sũ-mar toogã pʋgẽ wã n lebs-a bũmb nins a sẽn da tar tɩ yɩ bõnã naoor a yiibu.—Zoob 42:10.
A Zeova “yɩɩda tõnd sũyã”
18, 19. Wãn to la Wẽnnaam ‘yɩɩd tõnd sũyã,’ la zĩ-bʋg wɛɛngẽ wã la a ‘mi bũmb fãa’?
18 Yaa sɩd tɩ tõe n yɩɩ toog tɩ d mao ne raood komsgã, sã n mik t’a kɩɩ yẽg wʋsg tõnd sũurã pʋgẽ. Ne rẽ fãa, a Zeova vʋʋsem sõngã tõe n sõng-y-la bilf-bilf tɩ y tõog bõn-yood sẽn tar pãng sẽn kɩɩsd Wẽnnaam bãngrã. (2 Korẽnt dãmba 10:4, 5) Tagsa sẽn komsd raood sã n wa rat n loog y pãnga, bɩ y tags tʋm-tʋmd a Zã gom-kãensã yelle: “Ne bõn-kãnga tõnd na n bãngame tɩ tõnd yaa sɩd dãmba, la tõnd na n paama sũ-noog bãmb taoore tõnd sũur sẽn mongd tõnd bʋʋmã. Tɩ bõe, Wẽnnaam yɩɩda tõnd sũyã, la bãmb mii bũmb fãa.”—1 Zã 3:19, 20.
19 Biiblã sẽn yet tɩ “Wẽnnaam yɩɩda tõnd sũyã” võor yaa bõe? Wakat-wakate, tõnd sũyã tõe n ning-d-la taale, sẽn tɩ yɩɩd fãa, d sã n wa yã vẽeneg tɩ d pa zems zãnga, la tɩ d kongame. Bɩ tõe tɩ tõnd wubrã sẽn yɩ to-to wã yĩng kɩtame tɩ d nong n tagsd wẽng d mensã zutu, tɩ yaa wala tõnd pa maand baa fʋɩ sẽn noom a Zeova ye. Tʋm-tʋmd a Zã goamã kõta tõnd bas-m-yam t’a Zeova yaa kãseng n yɩɩd rẽ. A getame tɩ zʋʋg tõnd kongrã, la a nee tõnd sẽn sɩd tõe n maan bũmb ninsã. A leb n mii yam la tʋlsem nins sẽn tusd tõnd d tʋʋmã pʋsẽ wã. A Davɩɩd gʋlsame: “Bãmb mii bãmb sẽn yãk bũmb ning n naan tõndo, bãmb tẽegdame tɩ tõnd yaa tẽng tom.” (Yɩɩl Sõamyã 103:14) N-ye, a Zeova mii tõnd n yɩɩd tõnd mensã.
“Maanf sẽn tar ziir” la “naam peen-vindga”
20. Bõe la a Ezai bãngr-gomd ning sẽn gomd lebs-n-luglã yellã wilgd a Zeova sẽn get a sõgen dãmbã to-to wã?
20 A Zeova tũnuga ne no-rɛɛs a Ezai n kõ a pĩnd wẽndẽ nin-buiidã saagr tɩ lebs-n-lugl n wate. B sẽn da wa n kẽng yembd Babilonnã, yaa belsg kãngã la pɛlg kengr kãngã bal la neb nins sẽn da koms raood wʋsgã ra rata! A Zeova gesa wakat ning b sẽn da na n lebg n wa b ba-yirã, n yeele: “Fo na n yɩɩ wa maanf sẽn tar ziir Zusoaba nugẽ la wa naam peen-vindg fo Wẽnnaamã nugẽ.” (Ezai 62:3) Ne gom-kãensã, a Zeova kɩtame tɩ ziir la waoogr wʋsg wa a nin-buiidã zugu. A maana woto me ne tẽeb Israɛllã buudã neb rũndã-rũndã. Yaa wala a zẽk-b lame tɩ nebã fãa pẽg-ba.
21. Wãn to la y tõe n kɩs sɩd t’a Zeova na n keoa yãmb sẽn sakd-a ne sũ-mar toogã pʋgẽ wã?
21 Bãngr-gom-kãngã reng n pidsda sẽn paam-b vʋʋsem sõng zaeebã zutu, la a leb n wilgda a Zeova sẽn kɩtd tɩ neb nins fãa sẽn maand a raabã paam ziir wʋsg to-to wã me. Woto yĩnga, sãmb-sãmb sã n wa kẽ-yã, tẽeg-y tɩ baa ne y sẽn pa zems zãngã, y tõe n talla yõod wala “maanf sẽn tar ziir” la wala “naam peen-vindg” a Zeova nifẽ. Woto yĩnga, ket-y n maand a raabã n noogd a sũuri. (Yelbũna 27:11) Y sã n maan woto, y tõe n kɩsa sɩd t’a Zeova na n keoa yãmb y sẽn sakd-a ne sũ-mar toogã pʋgẽ wã yĩnga.
[Tẽngr note]
^ sull 1 B toeema yʋy kẽere.
Y tẽrame bɩ?
• Wãn to la d yaa a Zeova meng neba?
• Bõe yĩng tɩ tar yõod tɩ d ges t’a Zeova yaa Roanda?
• D segd n gũusa d mens ne a Sʋɩtãan “sɩlem” bʋgo?
• Wãn to la Wẽnnaam ‘yɩɩd tõnd sũyã’?
[Zãmsgã sogsgã]
[Foto rãmba, seb-neng 23]
A Polle
A Eli
A Ana
[Foto, seb-neng 24]
Wẽnnaam Gomdã tara belsg goam wʋsgo