So-toak sẽn yɩ woko, la sẽn tall nafa

KIBAR n yi Repiblik Demokratik di Kõngo n wilg tɩ saam-bi-pogs a yiib sẽn yaa ned ne a yao n dɩk sard n na n maan so-toak sẽn yaa wok n pɩʋʋg zabr zĩiga, sẽn na yɩl n tɩ kelg “Pẽg-y Wẽnnaam” tigis-kãsengã Lisala. Be b ra na n paama zãmsg tẽebã wɛɛngẽ la b maan zĩnd-n-taar ne sãam-biisã. La rẽ toor sẽn ka be, b ra baoodame me n na n yã a Zeova Kaset rãmbã tʋʋmd will sẽn be Kinsasa wã sẽn tʋm saam-biis nins tigis-kãsengẽ wã kẽere. Zabrã yĩnga, b maana yʋʋm n pa yã tʋʋmdã will ned baa a ye, tɩ b da rat n bẽd ne so-kãngã n yã-ba.

Saam-bi-pogs a yiibã yii b ba-yirã sẽn boond tɩ Basankusu wã ne koom-koglg n kẽng Lisala sẽn zãr ne bãmb tẽngã ne kilometr 300 wã. B so-toakã wakate, b pasga kãgr la kʋɩls a yiibu. So-toakã rɩka semen a tãabo. B yiiba fãa yaa so-pakdba, a ye wã bee so-pakrã tʋʋmd pʋgẽ yʋʋm a 3 masã, t’a to wã yaa yʋʋm 19 masã. Rẽ n so tɩ b kell n bẽd ne b so-toakã n moon koe-noogã. B moona neb nins b sẽn da segd b sorã zugu, n maan lɛɛr 110, n bas seb-vãad 200 la zʋrno rãmb 30.

B ra segd n toga sor ne b koom-koglgã n yɛg yɛmã la yẽbsã sẽn da wae n be kʋɩlgẽ be wã. B ra pa tõe n pasg kʋɩlgã ne yʋng ye. Sẽn paase, b sega sodaas wʋsg b sorã zugu.

Baa so-taokã sẽn da yaa wok wʋsg la a kõ-b yaamsã, saam-bi-pogsã sũy ra nooma ne modgr ning b sẽn maanã. B ra tara mi-beoog wʋsg la sũ-noogo, b sẽn tõog n zĩnd tigis-kãsengẽ wã Lisala wã. B ra tara yẽesem wʋsg sɩdã yĩnga, la b sẽn tõog n zĩnd ne saam-biis 7000 wã kenga b raoodo. Tigis-kãsengã poore, b leb n dɩka sor n na n leb b yirã, la b sega zu-loees nins b sẽn da sɛg b waoongã wakatã, n ta b yirã n mik b zaka rãmb ne laafɩ.