Tũ-y Wẽnnaam gudgr wakat kãensã
Tũ-y Wẽnnaam gudgr wakat kãensã
“A Henok ra kẽnda ne Wẽnnaam la a wa n ka beẽ ye; tɩ bõe, Wẽnnaam dɩka yẽnda.”—SƖNGRE 5:24.
1. Yɛl kẽer bʋs n kɩt tɩ tõnd wakatã yaa toog wakate?
GUDGR wakate! Gom-kãngã bilgda gudgr la nen-kɛglem tʋʋmã sẽn kẽ ãdem-biisã vɩɩmẽ Mesi Rĩungã sẽn lugl yʋʋmd 1914 tɛkã sõma. Sẽn sɩng ne rẽ tɛka, ninsaalbã bee “yaoolem wakate.” Yel-beed wala komã, bã-longdsã, tẽn-digimdsã la zabã namsda ninsaalbã n yɩɩd pĩndã wʋsgo. (2 Tɩmote 3:1; Wilgri 6:1-8) Neb nins sẽn balemd a Zeova wã pa põsd yel-be-kãens ye. D fãa segd n maoã ne toodã la yel-lingdmã. Laogã kaalem zu-loeese, politikã sẽn wat ne gudgr ningã, bi-be-tʋʋmã, la bãasã bee yɛl nins sẽn kɩt tɩ vɩɩmã yaa toog wʋsgã sʋka.
2. Zu-loe-bʋs la a Zeova sõgen dãmbã segda?
2 Sẽn paase, a Zeova sõgen dãmb wʋsg reega namsg woo namsg b tẽebã yĩnga, a Sʋɩtãan sẽn ket n zabd ne neb nins “sẽn sakd Wẽnnaam noore, la sẽn tar a Zezi kasetã” yĩnga. (Wilgri 12:17) La baa kiris-neb hakɩkã fãa sã n pa reeg namsg vẽeneg-vẽeneg b tẽebã yĩnga, b fãa segd n zaba ne a Sʋɩtãan la b kɩɩs yam-wẽng ning a sẽn wat ne ãdem-biisã sʋkã. (Efɛɛz rãmba 2:2; 6:12) Rẽndame tɩ d maan gũusg wakat fãa n da bas tɩ yam kãng kẽ-d ye, bala d segda yam-kãng d tʋʋmã zĩisẽ, lekollẽ wã, la zĩig ning fãa d sẽn segd n yɛg neb toor sẽn kae ne baleng hakɩkã.
Tũ-y Wẽnnaam la y ra tũ tẽnsã soay ye
3, 4. Wãn to la kiris-nebã yaa toor ne dũniyã?
3 A Zezi pipi karen-biisã me zãmaanẽ, b ra maooda wʋsg ne dũni kãngã yamã, tɩ rẽ kɩt tɩ b yɩ toor wʋsg ne neb nins sẽn pa be kiris-neb tigingã pʋgẽ wã. A Poll bilga welg-kãng a sẽn wa n gʋls tɩ: “Woto yĩnga, mam yeta bõn-kãnga la m kɩt kaset Zusoaba pʋgẽ n yet tɩ y ra le kẽn wa neb sẽn ka pʋʋsd Wẽnnaam sẽn kẽnd ne tagsg sẽn ka barka ye. Bãmb yam ka lik ye, la bãmb ka mi Wẽnnaam vɩɩm ye, bãmb zɩɩlem la bãmb sũyã sẽn yaa kegemsa yĩnga. Wẽng fãa sẽn ka le sãamd bãmb sũyã, bãmb sakame n kẽ raglem yembdo la b maan tʋʋm dẽgd fãa hal tɩ looge.”—Efɛɛz rãmba 4:17-19.
4 Ad gom-kãensã sɩd bilgda a Poll wakatẽ dũniyã la tõnd wakatã me dũni kãngã likã sẽn yaa to-to tẽebã la vɩɩm manesmã wɛɛngẽ wã sõma. Wala pipi kiris-nebã zãmaanẽ, rũndã-rũndã kiris-nebã me pa ‘kẽnd wa neb nins sẽn ka pʋʋsd Wẽnnaamã ye.’ B pʋd n tara zu-no-kãseng n kẽnd ne Wẽnnaam. Neb kẽer tõeeme n sokdẽ tɩ rẽ yĩnga, ninsaal sẽn pa zems zãng la a ka pãngã tõe n sɩd kẽna ne a Zeova sɩda? La Biiblã wilgdame tɩ tõeeme. Sẽn paas me, a Zeova baoodame tɩ d maan woto. Yʋʋm kob-gĩnd a nii soab sẽn deng a Zezi rogmã, Wẽnnaam vẽnega no-rɛɛs a Mise t’a gʋls goam nins sẽn pʋgdã. A yeelame: “Ninsaalba, [a Zeova] wilga yãmb sẽn yaa neere. Yaa bõe la [a] baood yãmb nengẽ, sã n ka tɩ y maan sẽn yaa tɩrga n wilg nonglem daar fãa la y sik y mens n sak [bɩ n kẽnd ne y Wẽnnaam, NW] bala.”—Miise 6:8.
Wãn to la d na n kẽn ne Wẽnnaam, la bõe yĩnga?
5. Wãn to la ninsaal sẽn pa zems zãng tõe n kẽn ne Wẽnnaam?
5 Wãn to la d tõe n kẽn ne Wẽnnaam sẽn yaa pãng sẽn ka to soabã, la d sẽn pa ne wã? Vẽenega, d pa tõe n kẽn ne a Zeova wa d sẽn kẽnd ne ninsaalbã ye. Biiblã pʋgẽ, gom-biig ning sẽn yaa “kẽna” rat n yeelame me tɩ “tũ vɩɩm manesem b sẽn yãka.” * D sã n ning rẽ d yamẽ, d bãngdame tɩ ned sẽn kẽnd ne Wẽnnaam tũudã vɩɩm manesem noy nins Wẽnnaam sẽn lugl la sẽn tat a yamã. D sã n tũud vɩɩm manesem kãnga, kɩtdame tɩ d yɩ toor ne neb wʋsg sẽn gũbg tõndo. La yaa yãk-kãngã bal n zems ne kiris-neda. Bõe yĩnga? Bʋʋm wʋsg yĩnga.
6, 7. Bõe yĩng tɩ d sẽn na n tũ Wẽnnaam n sɩd são n yɩɩda?
6 Pipi, a Zeova yaa tõnd Naanda, tõnd vɩɩmã yita yẽ nengẽ, la a yaa a soab ning sẽn kõt tõnd bũmb nins fãa sẽn zãad d vɩɩmã. (Wilgri 4:11) Rẽ kɩtame tɩ yaa yẽ bal n tar sor n na n wilg tõnd d sẽn segd n kẽn to-to. Sẽn paase, yaa d sẽn na n tũ Wẽnnaam la sõma n yɩɩda. A Zeova rɩka segls sẽn na yɩl tɩ neb nins sẽn tũud-a wã paam b yel-wẽnã sugri, la a kãabd-b-la vɩɩm sẽn pa satã. Tõnd saasẽ Ba wã sẽn tar nonglem wʋsgã leb n kõta tõnd sagl-sõma sẽn sõngd neb nins sẽn tũud-a wã tɩ b vɩɩmã tall sũ-noog masã, baa ne b sẽn pa zems zãng la b vɩ dũni sẽn be a Sʋɩtãan nugẽ wã. (Zã 3:16; 2 Tɩmote 3:15, 16; 1 Zã 1:8; 2:25; 5:19) Bũmb a to sẽn kɩt tɩ d tũud Wẽnnaamã yaa tɩ rẽ sõngd n wata ne laafɩ la zems-n-taar tigingã pʋgẽ.—Kolos rãmba 3:15, 16.
7 Sẽn na n baase, la sẽn tar yõod n yɩɩda, yaa tɩ d sã n tũud Wẽnnaam, d wilgda d sẽn be a soab poorẽ no-koeem kãseng ning b sẽn wa ne Edɛn zẽedẽ wã wɛɛngẽ. No-koeem-kãng tika naam sẽn ka to wã zugu. (Sɩngre 3:1-6) D wilgda ne d vɩɩmã manesem tɩ d bee a Zeova poorẽ zãng-zãnga, la ne raoodo, d moondame n yetẽ tɩ yẽ a yembr bal n yaa naab sẽn ka to wa sẽn segde. (Yɩɩl Sõamyã 83:19) Woto, d tʋmdame tɩ zemsd ne pʋʋsg ning d sẽn maand n yetẽ tɩ Wẽnnaam yʋʋrã paam waoogr la t’a raabã maanã. (Matɩe 6:9, 10) Ad neb nins sẽn yãkd n na n tũ Wẽnnaamã sɩd tar yam! B tõe n kɩsa sɩd tɩ b rɩka so-sõngã, bala yaa a Zeova bal n yaa “yam soaba n ka to.” A pa tudgd abada.—Rom dãmba 16:27.
8. Wãn to la a Enok la a Nowe wakatã wõnd tõnd wakatã?
8 La wãn-wãn la d tõe n vɩɩmd wala kiris-ned sẽn segd n vɩɩmd to-to wã, dũni sẽn gudg woto pʋgẽ, tɩ neb wʋsg pa rat n maan a Zeova raabã? D tõe n paama sok-kãngã leokre, d sã n ges pĩnd wẽndẽ neb sẽn kell n yɩ wẽn-sakdb toog wakat makre. A Enok la a Nowe bee nin-kãens sʋka. Bãmb b yiibã fãa vɩɩmda wakat sẽn wõnd tõnd wakatã. Wẽngã ra piuugame. A Nowe wakatã, tẽngã ra pida ne neb sẽn da maand taab pãng la raglem tʋʋmã. Ne rẽ fãa, a Enok ne a Nowe kɩɩsa dũniyã yam b ned kam fãa zãmaanẽ, la b tũ a Zeova. Wãn to la b tõog n maan woto? Sẽn na yɩl n leok sok-kãngã, sõs-kãngã pʋgẽ d na n goma a Enok makrã yelle, la sõsg ning sẽn pʋgdã pʋgẽ, d na n goma a Nowe makrã yelle.
A Enok ra tũuda Wẽnnaam gudgr wakate
9. Kiba-bʋs la d tar a Enok zugu?
9 Gʋlsg Sõamyã pʋgẽ, yaa a Enok yell la b gom pipi n yeel t’a ra kẽnda ne Wẽnnaam. Biiblã yetame: “A Henok tũu Wẽnnaam yʋʋm kobs-tã a Metusela rogma zugẽ.” (Sɩngre 5:22) Biiblã sẽn togs a Enok yʋʋmã wilgdame t’a pa paam yõ-wok ye. Baa sã n yaa yõ-wok ne tõndo, a yɩɩ yõ-koɛɛga, b sã n mak ne a zãmaanẽ neb yõe woglem. Biiblã yetame: “A Henok ra kẽnda ne Wẽnnaam la a wa n ka beẽ ye; tɩ bõe, Wẽnnaam dɩka yẽnda.” (Sɩngre 5:24) Yaa vẽeneg t’a Zeova yiisa a Enok nin-vɩɩsã sʋk t’a kell n ki sẽn na yɩl t’a bɛɛbã ra wa nams-a ye. (Hebre dãmba 11:5, 13) Sã n dok verse koees kãensã, b pa gomd a Enok yell wʋsg Biiblã pʋgẽ ye. Baasg zãnga, ne kibay nins tõnd sẽn tarã, n paas kibay a taaba, d sɩd tõe n yeelame t’a Enok wakatã talla gudgri.
10, 11. a) Wãn to la wẽngã piuug a Ãdem ne a Hawa tõdgrã poore? b) Yaa bãngr-gom-bʋg la a Enok moon-yã, la nebã manesem yɩɩ wãn to?
10 Wala makre, ges-y wẽngã sẽn piuug n kẽ ãdem-biisã sʋk tao-tao to-to a Ãdem beegrã poorã. Biiblã yeta tõnd t’a Ãdem biribl kãseng a Kayẽ n yɩ pipi ninsaal sẽn kʋ a to, a sẽn wa n kʋ a yao a Abɛllã. (Sɩngre 4:8-10) A Abɛll kũ-toaagã poore, a Ãdem ne a Hawa paama biribl a to, n pʋd a yʋʋr t’a Sɛt. D karemda woto yẽ zugu: “A Sɛt me roga biribla, n pʋd a yʋʋr t’a Enos. Yaa yẽ n sɩng n pʋʋs ne Zusoaba [a Zeova, NW] yʋʋre.” (Sɩngre 4:25, 26) Zu-bʋko, b sẽn da ‘pʋʋsd ne a Zeova yʋʋrã’ ne manesem ningã ra kɩɩsda sɩdã. * Yʋʋm wʋsg a Enos rogmã poore, a Kayẽ yageng a yembr b sẽn boond t’a Lamek maana yɩɩll a pagb a yiibã yĩnga. Yɩɩllã pʋgẽ a ra yetame t’a ra kʋʋ bi-bɩɩg sẽn pogl-a, la a keoog woto me: “B sã n dok b sũur naoor a yopoe a Kayẽ yĩnga, dẽ, b na n doka b sũur naoor pis-yopoe la a yopoe maam a Lamek yĩnga.”—Sɩngre 4:10, 19, 23, 24.
11 Yel-kãensã d sẽn yã wã wilgdame tɩ wẽngã a Sʋɩtãan sẽn kẽes Edɛn zẽedẽ wã piuuga a Ãdem yagensã sʋk tao-tao. A Enok ra yaa a Zeova no-rɛɛs dũni a woto pʋgẽ, hali tɩ baa ne tõnd rũndã-rũndã menga, a goamã sẽn tar pãngã ket n tagem wʋsgo. A Ziid wilgame t’a Enok ra pĩnd n togsa bãngr-goam n yeele: “Gese, Zusoaba wata ne nin-sõamyã tus-kẽema n na n kao neba fãa bʋʋdo, la b kɩt tɩ Wẽn-kɩɩsdba fãa vẽneg n togs bãmb kɩɩsga bãmb sẽn maan n kɩɩs Wẽnnaamã, la pʋto-goama fãa Wẽn-kɩɩsdba sẽn yaa yel-wẽna rãmba sẽn da gom bãmbã.” (Ziid 14, 15) Gom-kãensã na n paama b pidsg zãng-zãng Armagedõ. (Wilgri 16:14, 16) Ne rẽ fãa, d tõe n kɩsa sɩd t’a Enok wakatã menga, “Wẽn-kɩɩsdba” wʋsg sẽn wʋm a Enok bãngr-goamã sũy pa yɩ noog ye. Ad sɩd yaa nonglem la a Zeova sẽn wilgi, a sẽn deeg no-rɛɛsã yõorã tɩ b pa paam n nams-a wã!
Bõe n sõng a Enok t’a tũ Wẽnnaam?
12. Bõe n kɩt t’a Enok ra yaa toor ne a wakatẽ nebã?
12 Edɛn zẽedẽ wã, a Ãdem ne a Hawa kelga a Sʋɩtãanã, t’a Ãdem kɩɩs a Zeova noore. (Sɩngre 3:1-6) La b biribl a Abɛll pa maan woto ye, rẽ n so t’a ra tat a Zeova yam. (Sɩngre 4:3, 4) Zu-bʋko, a Ãdem kamb la a yagens wʋsg pa yɩ wa a Abɛll ye. La a Enok sẽn dog yʋʋm kobs poorã yɩɩ wa a Abɛlle. Bõe n da welg a Enok ne neb a taab wʋsg sẽn da yaa a Ãdem yagensã? Tʋm-tʋmd a Poll leoka sok-kãngã, a sẽn wa n gʋls woto wã: “Ne tẽebo, a Henok paama zẽkre n ka ki ye, la neb ka yã yẽ ye, Wẽnnaam sẽn zẽk yẽnda wã yĩnga. Tɩ bõe, sẽn deng yẽ zẽkre, yẽ paama kaset tɩ yẽ taa Wẽnnaam yam.” (Hebre dãmba 11:5) A Enok bee “kaset dãmb wʋsg” sẽn zĩnd sẽn deng a Zezi rogmã, n kõ mak-sõma tẽebã wɛɛngẽ wã sʋka. (Hebre dãmba 12:1) Yaa tẽeb n kɩt t’a Enok kell n tall yel-manesem sẽn yaa sõma sẽn yɩɩd yʋʋm 300 pʋgẽ, tɩ rẽ yɩɩd tõnd wʋsg yõor woglem naoor a tãabo.
13. A Enok ra tara tẽeb bʋg buudu?
13 A Poll bilga a Enok ne kaset rãmb a taab tẽeb a sẽn wa n gʋls tɩ: “Tẽeb yaa bãngr sũur pʋgẽ tɩ tõnd na n paama bũmb nins tõnd sẽn gũudã, la a yaa kaset sũur pʋgẽ tɩ bũmb n be neb sẽn ka yãt ye.” (Hebre dãmba 11:1) N-ye, tẽeb yaa f sẽn na n kɩs sɩd tɩ f na n paama bũmbu, tɩ rẽ tik yɛl sẽn be bas-m-yam zutu, n wilgdẽ tɩ bũmb nins f sẽn saagd n na n paama na n pidsame. Tõnd sẽn gũud bũmb ningã kɩtdame tɩ d bãngd bũmb nins d sẽn segd n lʋɩɩs taoor d vɩɩmã pʋgẽ wã. Yaa tẽeb kãng buud n kɩt t’a Enok tõog n tũ Wẽnnaam, baa dũni ning sẽn gũbg yẽ wã sẽn da pa maand woto wã.
14. A Enok tẽebã ra segd n tika bãngr sẽn yaa takɩ bʋg zugu?
14 Tẽeb hakɩkã tika bãngr sẽn yaa takɩ zugu. A Enok ra tara bãng-bʋgo? (Rom dãmba 10:14, 17; 1 Tɩmote 2:4) Sãmbg sẽn ka be, a ra mii yɛl nins sẽn zĩnd Edɛnnã. A wʋma vɩɩmã sẽn da yaa to-to Edɛn zẽedẽ wã kibare, tõe tɩ wakat kãng tɩ Edɛn zẽedã ket n beeme, baa b sã n da gɩdga ninsaalbã tɩ b ra kẽ be. (Sɩngre 3:23, 24) La a bãngame tɩ Wẽnnaam raabã ra yaa t’a Ãdem yagensã rog n pids tẽngã la b kɩt t’a gillã yɩ wala pipi Arzãnã. (Sɩngre 1:28) Sẽn paase, a Enok sɩd ra nonga a Zeova kãabg ning sẽn wilg t’a ra na n waa ne Yageng sẽn da na n pogl a Sʋɩtãan zugã la a yiis bõn-wẽns nins a Sʋɩtãan belgrã sẽn wa ne wã. (Sɩngre 3:15) Sɩda, a Enok mengã bãngr-gomd Wẽnnaam sẽn vẽneg-a t’a togs tɩ be a Ziid sebrã pʋgẽ wã gomda a Sʋɩtãan yagensã sãoong yelle. A Enok sẽn da tar tẽebã yĩnga, d miime t’a balma a Zeova, la t’a ra get-a-la wa ‘neb nins sẽn sɩd baood yẽ wã roandã.’ (Hebre dãmba 11:6) Woto yĩnga, baa ne a Enok sẽn da pa tar bãngr ning fãa tõnd sẽn tarã, a ra tara bãngr tɩ sek a na paam tẽeb sẽn yaa kãn-kãe. Ne tẽeb a woto, a tõog n kell n yɩɩ wẽn-sakd gudgr wakate.
Rɩk-y a Enok togs-n-taare
15, 16. Wãn to la d tõe n dɩk a Enok togs-n-taare?
15 Sẽn mik tɩ gudgr wakat kãngã tõnd me rat n taa a Zeova yam wala a Enokã, d segd n dɩka a togs-n-taare. A Zeova la a raabã beoog-daar yĩngã bãngr sẽn yaa takɩ yaa tɩlae ne-do. La woto pa sek ye. D segd n basame tɩ bãng-kãngã sẽn yaa takɩ wã wilg-d sore. (Yɩɩl Sõamyã 119:101; 2 Pɩɛɛr 1:19) D segd n basame tɩ Wẽnnaam tagsgã wilg-d sore, n maood wakat fãa n dat n ta a yam d tagsga ne d tʋʋmã fãa pʋsẽ.
16 Kibar ka be sẽn wilgd tõnd tɩ ned a to n zʋʋg a Enok n da maand a Zeova raabã wakat kãng ye, la yaa vẽeneg t’a sã n da pa a yembr bal n maand a Zeova raabã me, neb sẽn da maand wa yẽ ra yaa bilf bala. Tõnd me sõorã paooda dũniyã zugu, la rẽ pa komsd tõnd raood ye. A Zeova na n sõnga tõndo, baa ne kɩɩsg buud fãa d sẽn tõe n wa seg taoore. (Rom dãmba 8:31) Ne raoodo, a Enok keooga wẽn-kɩɩsdbã tɩ sãoong n wate. Ne raoodo, tõnd me moonda “Wẽnnaam soolem koe-noog kãngã,” baa ne yaalgã, kɩɩsgã la namsgã d sẽn deegd d tẽebã yĩngã. (Matɩe 24:14) A Enok pa vɩɩmd n kaoos wa a wakatẽ neb wʋsg ye. Ne rẽ fãa, a ra pa tik a saagrã dũni kãng yɛlã zug ye. A ra geta bũmb sẽn da yaa kãseng n yɩɩd rẽ zĩig sẽn zãre. (Hebre dãmba 11:10, 35) Tõnd me gẽegdame t’a Zeova raabã pidsi. Yaa rẽ n so tɩ d pa baood n na n dɩ dũni kãngã nafa fãa ye. (1 Korẽnt dãmba 7:31) Sẽn yɩɩd fãa, d rɩkda d pãngã la d laogã n kẽesd a Zeova tʋʋmdã pʋgẽ.
17. Bãng-bʋg la tõnd tar t’a Enok ra pa tarẽ, la rẽ segd n kɩtame tɩ d maan bõe?
17 A Enok ra tara tẽeb tɩ yageng ning Wẽnnaam a Zeova sẽn kãabã ra na n waa sasa ning a Zeova meng sẽn yãkã. Yaa yʋʋm 2000 la bal masã Yageng kãng sẽn yaa a Zezi Kiristã sẽn wa n kõ rondã, la a pak sor n kõ tõndo, la pĩnd wẽndẽ kaset rãmb sẽn yɩ wẽn-sakdb wala a Enok tɩ b tõe n paam vɩɩm sẽn pa satã. Yageng kãng b sẽn zĩnig naam geer zug masã t’a yaa Wẽnnaam Rĩungã Rĩmã riga a Sʋɩtãan t’a yi saasẽ n wa tẽn-kãngã zugu, la tood nins sẽn gũbg tõndã n wilgd rẽ. (Wilgri 12:12) N-ye, bãngr ning tõnd sẽn tarã yɩɩda a Enok sẽn da tõe n paamã zĩig sẽn zãre. Rẽ wã yĩnga, bɩ d tall tẽeb sẽn tar pãng wa yẽ sẽn tallã buudu. Bɩ tõnd sẽn tar bas-yard ning ne Wẽnnaam kãabsã pidsgã tall pãn-tusdg bũmb nins fãa d sẽn maandã pʋgẽ. Wala a Enoke, bɩ d tũ Wẽnnaam, baa ne d sẽn vɩ gudgr wakatã.
[Tẽngr not rãmbã]
^ sull 5 Ges-y Étude perspicace des Écritures volume 1, seb-neng 228 sull a 6. Yaa a Zeova Kaset rãmbã n yiis seb-kãngã.
^ sull 10 Sẽn deng a Enos rogmã, a Zeova goma ne a Ãdem. A Abɛll kõo a Zeova kũun t’a sak n deege. Nand tɩ sũ-kiir tus a Kayẽ t’a kʋ a ba-biigã, Wẽnnaam sõsa ne a Kayẽ menga. B sẽn sɩng woto n ‘pʋʋsd ne a Zeova yʋʋrã’ ra segd n yaa ne manesem zẽnga, la pa ne manesem sẽn zems ne Wẽnnaam baleng hakɩkã ye.
Wãn to la y na n leokẽ?
• Kẽn ne Wẽnnaam dat n yeelame tɩ bõe?
• Bõe yĩng tɩ Wẽnnaam tũub yaa sõma n yɩɩd sẽn keta fãa?
• Bõe n sõng a Enok t’a tũ Wẽnnaam, baa ne a sẽn da vɩ gudgr wakatã?
• Wãn to la d tõe n dɩk a Enok togs-n-taare?
[Zãmsgã sogsgã]
[Foto, seb-neng 25]
Ne tẽebo, ‘a Enok ra ket n kẽnda ne sɩd Wẽnnaamã’
[Foto, seb-neng 26]
Tõnd sɩd tẽedame t’a Zeova kãabsã na n pidsame
[Fotã soaadba, seb-neng 23]
Pagã sẽn be hal rɩtgã: FAO photo/B. Imevbore; ro-kẽeng sẽn siigdi: San Hong R-C Picture Company