Yãmb na n yãga ne Wẽnnaam ziirã bɩ?
Yãmb na n yãga ne Wẽnnaam ziirã bɩ?
‘Tõnd yãgda ne a Zeova ziirã wa nin-getse.’—2 KORẼNT DÃMBA 3:18, NW.
1. Bõe la a Moiiz yã-yã, la bõe n maan dẽ poore?
RA YAA vẽnegr nins sẽn yɛɛsd-b n yɩɩdã, ninsaal sẽn yã wã a yembre. A Moiiz ra yaa a yembr Sinayi Tãngã zugu, la a maana kosg sẽn pa wõnd a taaba, tɩ b sake. A paama sor n na n yã bũmb ninsaal sẽn da zɩ n yã: a Zeova ziirã. Yaa sɩd t’a Moiiz pa yã a Zeova mengã ye. Wẽnnaam ziirã yaa kãseng hali tɩ kɩt tɩ ninsaal baa a yembr pa tõe n yã-a la a ket n vɩ ye. A Zeova luda a Moiiz ne a “nug” tɩ kogl-a, hal n wa pɩʋʋge. La a tũnuga ne malɛk n kõ-a vẽnegr kãngã. Rẽ poore, a Zeova basame t’a Moiiz yã a ziirã vẽenem pukr bilfu. A Zeova leb n tũnuga ne malɛk n gom ne a Moiizi. Biiblã bilgda bũmb ning sẽn maan rẽ poorã woto: “La a Moiiz sẽn sigd tãnga zugã, . . . yẽ sẽn gom ne [a Zeova wã,] a nenga pɩndame.”—Yikri 33:18–34:7, 29.
2. Bõe la tʋm-tʋmd a Poll gʋls kiris-nebã sẽn yãgd ne ziir ningã wɛɛngẽ?
2 Mams-y n ges-y yãmb sẽn da na n be tãn-kãngã zug ne a Moiizi. Ad sɩd da na n yɩẽ-la bõn-kãseng ne-y tɩ y ges Sẽn-tõeyã-fãa soabã ziir yãgb la y kelg a goamã! La sɩd yɩtẽ-la zu-noog meng tɩ y paam n tũ a Moiiz sẽn da yaa Tõogã kaool sɛ-yõkdã n sig Sinayi Tãngã zugu. La yãmb miime tɩ ne manesem buudu, kiris-neb hakɩkã yãgda ne Wẽnnaam ziirã tɩ yɩɩd a Moiiz sẽn da yãgd ne-a to-to wã bɩ? Yel-kãngã sẽn kɩtd tɩ d tags neerã bee lɛtr tʋm-tʋmd a Poll sẽn gʋls pʋgẽ. A gʋlsame n wilg tɩ kiris-neb nins sẽn paam vʋʋsem sõng zaeebã “yãgda ne a Zeova ziirã wa nin-getse.” (2 Korẽnt dãmba 3:7, 8, 18, NW) D tõe n yeelame tɩ kiris-neb nins sẽn tar tẽng zug vɩɩmã saagrã me yãgda ne Wẽnnaam ziirã.
Kiris-nebã sẽn yãgd ne Wẽnnaam ziirã to-to
3. Wãn to la tõnd wa n bãng a Zeova t’a Moiiz pa tõog n bãng-a boto?
3 Wãn to la d tõe n yãg ne Wẽnnaam ziirã? Tõnd pa yã a Zeova, d pa wʋm a goamã me wa a Moiiz ye. La tõnd bãnga a Zeova ne manesem buud a Moiiz sẽn da pa tõe n bãng-a. Yaa sẽn kolg yʋʋm 1500 a Moiiz kũum poor bal la a Zezi sẽn yaa Mesi wã puk-yã. Woto yĩnga, a Moiiz ra pa tõe n bãng Tõogã sẽn da na n pids a Zezi sẽn ki n na n fãag ninsaalbã ne yel-wẽnã la kũumã yembdã zugã to-to ye. (Rom dãmba 5:20, 21; Galat dãmba 3:19) Sẽn paase, a Moiiz ra pa tõe n bãng a Zeova raab kãsengã beoog-daar yĩngã wʋsg ye. Raab kãng tara loees wʋsg ne Mesi Rĩungã, la tẽng zug Arzãnã Rĩung kãng sẽn na n wa ne wã. Woto d nee a Zeova ziirã, pa ne d nin meng-mengã ye, la yaa ne d tẽebã nini, Biiblã zãmsgã maasem yĩngã. Sẽn paase, pa ne malɛk maasem la d wʋm a Zeova koɛɛgã ye, yaa ne Biiblã maasem, sẽn yɩɩd fãa, ne Evãnzill dãmbã sẽn bilgd a Zezi zãmsgã la a koe-moonegã tɩ be yamleoogã maasem.
4. a) Wãn to la kiris-neb nins sẽn paam vʋʋsem sõng zaeebã yãgd ne Wẽnnaam ziirã? b) Wãn to la neb nins sẽn tar saagr n na n vɩɩmd tẽng zugã yãgd ne Wẽnnaam ziirã?
4 Baa ne kiris-nebã nens sẽn pa sɩd yãgd ne Wẽnnaam ziirã, b nen-wamã sɩd pukda sũ-noogo, b sẽn togsd neb a taabã a Zeova zʋgã la a raabã sẽn tar ziirã. No-rɛɛs a Ezai pĩnd n togsame tɩ tõnd wakatã Wẽnnaam nin-buiidã ra na n “wilga buud a taaba [a Zeova] waoogrã.” (Ezai 66:19) Sẽn paase, d karemda 2 Korẽnt dãmba 4:1, 2 pʋgẽ tɩ: “Yaa woto yĩnga tõnd sẽn tar tʋʋm kãnga . . . tõnd basa bũmb nins sẽn yaa yãnde sẽn soos n maana. Tõnd ka kẽnd ne sɩlem ye, la tõnd ka tekd Wẽnnaam goama ye. La tõnd wilgda sɩd vẽenega n paamd kaset sõng ned kam fãa sũur pʋgẽ Wẽnnaam taoore.” Sẽn tɩ yɩɩd fãa, a Poll ra gomda kiris-neb nins sẽn paam vʋʋsem sõng zaeebã, sẽn yaa “kãab paalga karen-saam dãmba” yelle. (2 Korẽnt dãmba 3:6) La b tʋʋmdã sõnga neb sõor ka tɛk sẽn paam tẽng zug vɩɩm sẽn pa satã saagre. Neb sul a yiibã tʋʋmd baoodame me tɩ b yãg ne a Zeova ziirã, pa b zãmsgã pʋgẽ bal ye, la yaa b yel-manesmã pʋgẽ me. Yãg ne Wẽnnaam sẽn ka to wã ziir yaa zɩɩb la zu-noog bũmb ne-do.
5. Tõnd sẽn yidgd tẽebã wɛɛngẽ wã kõta kaset ne bõe?
5 Rũndã-rũndã, Wẽnnaam Rĩungã koe-noog sẽn tar ziirã moonda dũniyã neb sẽn beẽ fãa wala a Zezi sẽn da pĩnd n wilgã. (Matɩe 24:14) Neb sẽn yit tẽns fãa la buud fãa pʋsẽ, la neb sẽn gomd buud goam toɛy-toɛy fãa saka koe-noogã ne yẽesem, n toeem b vɩɩmã sẽn na yɩl n maan Wẽnnaam daabã. (Rom dãmba 12:2; Wilgri 7:9) Wala pipi kiris-nebã, b pa tõe n bas yɛl nins b sẽn yã la b wʋmã togsg ye. (Tʋʋma 4:20) Sẽn yɩɩd neb milyõ a yoobe n be, n yãgd ne Wẽnnaam ziirã rũndã-rũndã n yɩɩd sõor nins fãa sẽn zĩnd zãmaan nins sẽn loogã. Yãmb bee b sʋk bɩ? Wẽnnaam nin-buiidã sẽn tar yidgr tẽebã wɛɛngẽ wã yaa kaset sẽn tar pãng sẽn wilgd t’a Zeova ningd-b-la bark la a kogend-ba. D sã n ges tõnd bɛɛbã sẽn tar pãng ningã, d bãngda vẽeneg t’a Zeova vʋʋsem sõngã sɩd bee ne tõndo. Bɩ d ges bũmb ning sẽn wilgd t’a Zeova vʋʋsem sõngã bee d zutã.
Wẽnnaam nin-buiidã bɛɛb pa tõe tɩ b sĩnd ye
6. Bõe yĩng tɩ tẽeb la raood yaa tɩlae sẽn na yɩl n zĩnd a Zeova poorẽ?
6 Mams-y n ges-y b sẽn na n bool yãmb bʋʋd zĩigẽ tɩ y wa kõ kaset n ning bi-bɛɛg piig la a yiib taale. Yãmb miime tɩ bi-bɛɛgã tara a siglg sẽn tar pãnga, la t’a na n maana a sẽn na maaneg n gɩdg yãmb tɩ y ra puk a yɛlã ye. Yãmb sã n dat n kõ kaset n kɩɩs bi-be-kãngã, rẽnda y tall raoodo, la y kɩs sɩd tɩ pãn-soaadbã na n kogla yãmb ne nin-kãngã. Tõnd sẽn be zĩig ningã wõnda woto. D sẽn kõt kaset a Zeova la a raabã beoog-daar yĩngã zugã, d kõta kaset n ningd a Sʋɩtãan taale, n wilgdẽ t’a yaa nin-kʋʋd la ziri yagd sẽn belgd dũniyã neb fãa. (Zã 8:44; Wilgri 12:9) Sẽn na yɩl n zĩnd a Zeova poorẽ n kɩɩs a Sʋɩtãanã, rẽnda d tall tẽeb la raoodo.
7. A Sʋɩtãan pãn-tõogã taa zĩ-bʋgo, la bõe la a baood n na n maane?
7 Yaa sɩd t’a Zeova yɩɩda bũmb fãa. A pãngã yɩɩda a Sʋɩtãan hal zĩig sẽn zãre. D tõe n kɩsa sɩd t’a Zeova tõeeme la a ratame me n kogl tõndo, d sã n sakd-a wakat fãa. (2 Kibaya 16:9) Baasg zãnga, a Sʋɩtãan yaa zĩn dãmbã la dũniyã me sẽn zãr ne Wẽnnaamã naaba. (Matɩe 12:24, 26; Zã 14:30) B sẽn lob a Sʋɩtãan tẽngã zug t’a “sũ-puugra” yaa wʋsgã yĩnga, a kɩɩsda a Zeova sõgen dãmbã wʋsgo, la a tũnugd ne dũni ning a sẽn so wã n dat n kɩt tɩ neb nins fãa sẽn moond koe-noogã sĩndi. (Wilgri 12:7-9, 12, 17) Wãn to la a maand rẽ? Yaa ne manesem sẽn ta a tã.
8, 9. Wãn to la a Sʋɩtãan tũnugd ne nonglem sẽn pa zemse, la bõe yĩng tɩ d segd n yãk d tũud-n-taasã neere?
2 Tɩmote 3:1-4) Vɩɩmã yɛlã paka neb wʋsg hal tɩ kɩt tɩ b pa kelgd koe-noogã tõnd sẽn taasd-bã ye. B pʋd n pa rat n bãng sɩd ning sẽn be Biiblã pʋgẽ wã ye. (Matɩe 24:37-39) Manesem kãngã tõe n bẽega tõndo, n kɩt tɩ d wa tall yam-kaalg tẽebã wɛɛngẽ. D sã n nong laogã la vɩɩmã sũ-noog wʋsgo, tõnd nonglmã ne Wẽnnaam na n maagame.—Matɩe 24:12.
8 Manesem a ye a Sʋɩtãan sẽn tũnugd ne n makd n na n kɩt tɩ tõnd bʋdg yaa vɩɩmã yɛla. Yaoolem day kãensã, nebã nonga ligdi, n nong b mens tɩ looge, la b nong dũniyã sũ-noogo. B pa nong Wẽnnaam ye. (9 Yaa rẽ n kɩt tɩ kiris-nebã yãkd b tũud-n-taasã neere. Rĩm a Salomo gʋlsa woto: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.” (Yelbũna 13:20) Bɩ d tũ neb nins sẽn yãgd ne Wẽnnaam ziirã. Ad rẽ maaneg sɩd bee yamleoog wʋsgo! D sẽn tigimd ne d tẽeb pʋgẽ saam-biisã d tigissẽ wã la zĩis a taabã, b nonglmã, b tẽebã, b sũ-noogã la b yamã kengda tõnd raoodo. Tũud-n-taar woto sẽn yaa sõma wã paasda sard ning tõnd sẽn dɩk n na n ket n moondẽ wã pãnga.
10. Wãn to la a Sʋɩtãan tũnugd ne yaalg n zabd ne neb nins sẽn yãgd ne Wẽnnaam ziirã?
10 Manesem a yiib-n-soab a Sʋɩtãan sẽn tũnugd ne n makd n na n kɩt tɩ kiris-nebã fãa bas n le pa yãgd ne Wẽnnaam ziirã yaa yaalgã. Manesem kãng pa segd n ling tõnd ye. A Zezi Kirist tẽng zug koe-moonegã sasa, b yaal-a lame, n la-a, n paoog-a la b tʋbs kolkood a zug menga. (Mark 5:40; Luk 16:14; 18:32) B yaala pipi kiris-nebã me. (Tʋʋma 2:13; 17:32) A Zeova rũndã-rũndã sõgen dãmbã me paamda yaalg woto. Sã n yaa ne tʋm-tʋmd a Pɩɛɛre, nebã na n yeelame tɩ b yaa ‘zãmb bãngdba.’ A Pɩɛɛr pĩnd n togsa woto: “Yaoolem wakate neb sẽn laad neba la neb sẽn sakd bãmb mens wẽnga ratem na n zĩndame. La bãmb na n yeelame: ‘Bãmb waoong kãabg bee yɛ? Tɩ bõe, . . . bũmb fãa ket n yaa wa dũniyã naaneg wakate.’” (2 Pɩɛɛr 3:3, 4) B yaanda Wẽnnaam nin-buiidã n yetẽ tɩ b sẽn tẽedã pa zems ne yɛlã sẽn sɩd yaa to-to wã ye. B getame tɩ Biiblã sẽn gãneg noy nins sõma la wẽngã wɛɛngẽ wã yaa no-kʋd sẽn ye ka yõod ye. Ne neb wʋsgo, koɛɛg ning tõnd sẽn moondã yaa yalemdo. (1 Korẽnt dãmba 1:18, 19) D sẽn yaa kiris-nebã, d tõe n paama yaalg b lekoll dãmbẽ wã, b tʋʋm zĩisẽ, la wakat ninga b zagsã pʋsẽ menga. D pa komsd raood ye, d ket n yãgda ne Wẽnnaam ziirã ne d koe-moonegã maasem, n mi wala a Zezi tɩ Wẽnnaam Gomdã yaa sɩda.—Zã 17:17.
11. Wãn to la a Sʋɩtãan kɩt tɩ b nams kiris-nebã sẽn na yɩl tɩ b sĩndi?
11 Manesem a tãab-n-soab a Sʋɩtãan sẽn tũnugd ne n makd n na n kɩt tɩ d bas moonegã yaa gɩdgrã bɩ namsgã d tẽebã yĩngã. A Zezi yeela a karen-biisã woto: “B na n ninga yãmb neb nins sẽn na n nams yãmba nusẽ tɩ b kʋ yãmba. La buud fãa na n kisga yãmb mam yʋʋra yĩnga.” (Matɩe 24:9) Sɩda, d sẽn yaa a Zeova Kaset rãmbã, d sega nams-toos d tẽebã yĩng dũniyã tẽns wʋsg pʋsẽ. D miime tɩ hal sẽn kaoose, a Zeova pĩnd n togsame tɩ kisgr bɩ beem n da na n zĩnd neb nins sẽn maand Wẽnnaam daabã la neb nins sẽn maand a Sʋɩtãan raabã sʋka. (Sɩngre 3:15) D leb n miime tɩ d sã n kell n yɩ wẽn-sakdb toogã pʋgẽ, d wilgdame t’a Zeova naam sẽn ka to ãndũniyã gill zugã zemsame. D sã n mi rẽ, tõe n kɩtame tɩ d paam pãnga, baa yɛl nins sẽn yaa tood n yɩɩdã pʋsẽ. D sã n dɩk sard kãn-kãe tɩ d na n kell n yãga ne Wẽnnaam ziirã, namsg ning d sẽn deegd d tẽebã yĩngã ba a yembr pa na n tõog n kɩt tɩ tõnd bas moonegã wakat fãa yĩng ye.
12. Bõe yĩng tɩ d segd n kɩdem, d sẽn ket n yaa wẽn-sakdb baa ne a Sʋɩtãan sẽn wat ne gɩdgr ningã?
12 Yãmb zãgsda dũniyã sũ-noogo, la y wilgdẽ tɩ y ket n yaa wẽn-sakd yaalgã la bɛɛbã kɩɩsg taoor bɩ? Sã n yaa woto, rẽnd y tara bʋʋm n na n kɩdem. A Zezi kõo neb nins sẽn da na n tũ-a wã bas-m-yam woto: “Bark bee yãmb zutu neb sẽn na n gom yãmb wẽnga, la nams yãmba, la sãbs yãmb mam yĩnga. Bɩ y maan sũ-noogo n kɩdem, yãmb keoor sẽn yaa kãseng [saasẽ] wã yĩnga, tɩ bõe, b ra namsa Wẽnnaam no-rɛɛsdba me woto sẽn deng yãmba.” (Matɩe 5:11, 12) Yãmb sẽn deegd toog ne sũ-marã kõta kaset t’a Zeova vʋʋsem sõngã pãng bee y zugu, n kõt-y pãng tɩ y yãgd ne a ziirã.—2 Korẽnt dãmba 12:9.
Yaa a Zeova n kõt sũ-mare
13. Yaa bʋʋm kãseng bʋg yĩng la tõnd sẽn ket n moond koe-moonegã?
13 Bʋʋm kãseng ning sẽn kɩt tɩ d ket n moond koe-moonegã yaa d sẽn nong a Zeova la d nong n yãgd ne a ziirã yĩnga. Ninsaalbã nong n dɩkda togs-n-taar ne neb nins b sẽn nong la b waoogdẽ wã, la ned pa be n zems ne b na rɩk togs-n-taar ne-a n ta Wẽnnaam a Zeova ye. Yẽ mengã nonglem sẽn yaa wʋsgã yĩnga, a tʋma a Biriblã tẽng zug t’a kõ kaset sɩdã zugu, la a fãag ãdem-biis nins sẽn yaa sakdbã. (Zã 3:16; 18:37) Tõnd tʋlla wala Wẽnnaam tɩ neb buud fãa tek yam n kos sugr la b paam fãagre. Yaa rẽ yĩng la d sẽn moond-b koe-noogã. (2 Pɩɛɛr 3:9) Tõnd sẽn tar tʋlsem kãngã wã, la d sẽn dɩk sard n na n dɩk togs-n-taar ne Wẽnnaamã, kɩtdame tɩ d ket n yãgd ne a ziirã ne d koe-moonegã maasem.
14. Wãn to la a Zeova kõt tõnd pãng tɩ d ket n moond koe-moonegã?
14 La tõnd sẽn tar pãng ning n ket n moond koe-noogã yita a Zeova nengẽ. A teenda tõnd la a kõt-d pãng ne a vʋʋsem sõngã, a siglgã la Biiblã sẽn yaa a Gomdã maasem. A Zeova kõta neb nins sẽn dat n yãg ne a ziirã sũ-mare. A reegda d pʋʋsgã n kõt-d yam tɩ d tõogd n Zak 1:5) Sẽn paase, a Zeova pa basd tɩ makr sẽn yɩɩd tõnd pãng paam-d ye. Tõnd sã n teeg a Zeova, a na n tuka sor tɩ d tõe n ket n yãgd ne a ziirã.—1 Korẽnt dãmba 10:13.
maood ne toodã. (Rom dãmba 15:5;15. Yaa bõe n sõngd tõnd tɩ d ket n moond koe-noogã?
15 Tõnd sẽn ket n moond koe-moonegã wilgdame tɩ Wẽnnaam vʋʋsem sõngã bee tõnd zutu. D rɩk makr ne ned sẽn na n yeel yãmb tɩ y gilg zak-zak n pʋɩ nebã bur zaalem. A yeela yãmb tɩ y yiis y toorẽ ligdi, la y bao sẽk n maan dẽ. Sẽn paase, y pa kaoos la y bãng tɩ neb nins sẽn sɩd dat yãmb burã pa waoog ye, la tɩ kẽer me na n bao n gɩdga modgr nins y sẽn maand n pʋɩt burã. Yãmb tẽedame tɩ y na n ket n tʋmda tʋʋm kãngã kiuug ne a to fãa la yʋʋmd ne a to fãa bɩ? Y na n leokame tɩ ayo. La tõe tɩ y modgame n dɩk y sẽk la y ligd n moon koe-noogã sẽn na maan yʋʋm bɩ yʋʋm pi-gĩn menga. Bõe yĩnga? Pa y sẽn nong a Zeova wã yĩnga, la a sẽn tũnug ne a vʋʋsem sõngã n ningd-y modgrã barkã n sõng-y tɩ y ket n moond koe-noogã sɩda? Vẽenega yaa woto.
Tʋʋmd d sẽn segd n tẽegdẽ
16. D sã n ket n moond koe-moonegã, wata ne bõe n kõ tõnd la neb nins sẽn kelgd tõndã?
16 Kaool paalgã tʋʋmd yaa kũun sẽn ka mak-n-taaga. (2 Korẽnt dãmba 4:7) Woto me, koe-noogã piis a taabã sẽn moond dũniyã gill zugã me yaa paoong sẽn tar yõodo. Y sẽn ket n moond koe-noogã, y tõe n maana wa a Poll sẽn gʋls a Tɩmote wã, n ‘fãag y meng la neb nins sẽn kelgd yãmbã.’ (1 Tɩmote 4:16) Tags-y rẽ sẽn dat n yɛɛlgã zugu. Koe-noog ning yãmb sẽn moondã pakda sor n kõt neb a taabã tɩ b tõe n paam vɩɩm sẽn pa sate. Y tõe n talla zood sẽn tar pãng ne neb nins y sẽn sõngd tẽebã wɛɛngẽ wã. Mams-y n ges-y sũ-noog ning y sẽn na n talle, y sã n wa paam n na n vɩɩmd wakat sẽn pa sat tẽng zug Arzãnã pʋgẽ ne neb nins yãmb sẽn sõng tɩ b bãng Wẽnnaamã! Sɩd-sɩda, b pa na n tol n yĩm modgr nins yãmb sẽn maan n sõng-bã ye. Ad sɩd na yɩ sũ-noog tɛkẽ!
17. Bõe yĩng tɩ tõnd sẽn vɩ wakat ningã pa wõnd a taabã ãdem-biisã zãmaan fãa pʋgẽ?
17 Tõnd sẽn vɩ wakat ning sasa wã yaa wakat sẽn pa wõnd a taab ãdem-biisã zãmaan fãa pʋgẽ. Wakat pa na n le wa zĩnd tɩ b moond dũni neb sẽn zãr ne Wẽnnaam koe-noogã wa masã wã ye. A Nowe vɩɩmda dũni sẽn da zãr ne Wẽnnaam woto pʋgẽ, la a yãa dũni kãng loogre. A sũur sɩd da segd n yɩɩ noog a sẽn bãng t’a tʋma Wẽnnaam tʋʋmdã, a sẽn ka koom koglgã sẽn fãag yẽ ne a zakã rãmbã! (Hebre dãmba 11:7) Yãmb me tõe n paama sũ-no-kãngã buudu. Mams-y n ges y tagsg sẽn na n yɩ to-to, y sã n wa be dũni paalgã pʋgẽ n lebg n tẽegd tʋʋmd ning y sẽn maand yaoolem day kãensã wã yelle, n miẽ tɩ y ra maana y sẽn tõe tɛk n kɩt tɩ Rĩungã tʋʋm kẽng taoore.
18. Bas-m-yam la raood kengr bʋg la a Zeova kõt a sõgen dãmbã?
18 Rẽ wã yĩng bɩ d ket n yãgd ne Wẽnnaam ziirã. D sã n maan woto, yaa bũmb d sẽn na n tẽegd wakat sẽn pa sate. A Zeova tẽra tõnd tʋʋmã yell me. Biiblã kengda tõnd raood woto: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye. La tõnd datame tɩ yãmb ned kam fãa wɩng woto n gũ y tẽeba pidsg hal tɩ wakat ta. La bɩ yãmb da maan kʋɩɩng ye, bɩ y modg n yɩ neb nins sẽn paam kãabgo tẽeb ne sũ-mar yĩnga togs-n-taase.”—Hebre dãmba 6:10-12.
Y tõe n wilga a võor bɩ?
• Wãn to la kiris-nebã yãgd ne Wẽnnaam ziirã?
• Wãn to la a Sʋɩtãan makd n na n kɩt tɩ Wẽnnaam nin-buiidã sĩndi?
• Kaset bʋg n wilgd vẽeneg tɩ Wẽnnaam vʋʋsem sõngã bee tõnd zutu?
[Zãmsgã sogsgã]
[Foto, seb-neng a 9]
A Moiiz nengã ra yãgda ne ziiri
[Foto rãmba, seb-neng 10, 11]
Tõnd yãgda ne Wẽnnaam ziirã d koe-moonegã pʋgẽ