Bãng bãn võor pa reem yell ye!

“Sɩngrẽ wã mam da tagsdame tɩ yaa zu-zabr bal n da tar tõnd biribl a Andreas. La a wa n pa le rat n dɩ ye, t’a yĩnga wɩngd wʋsgo. A zu-zabrã paasame, tɩ rẽ kẽes maan rabeem. Mam sɩdã sẽn lebg n wa yiri, d rɩka a Andreas n tɩ yã logtore. Logtorã sẽn ges-a wã, a kɩtame tɩ b tall-a n kẽng logtor-yir tao-tao. Bãagã ra yɩɩda zu-zabr bala. A Andreas da bẽeda mininziti. A paama tɩpgo, la pa kaoos la a sãoog ye.”—A Zɛrtriid sẽn yaa ma a ye sẽn be Alemayn n togs woto.

ROAGDB wʋsg zoe n paama a Zɛrtriid yellã buudu. B gũusdame n get bãn nins sẽn wilgd tɩ b biigã pa segd n tar laafɩ wã. Baa sã n pa bãasã fãa n yaa bã-kɛgemse, roagdbã sã n maand wa b pa ne bãn nins sẽn wilgd tɩ b kambã bẽedame wã, tõe n wa yɩɩ yelle. La b sã n gũusd n get bãn kãens la b baood yellã tɩɩm, tõeeme n kɩt tɩ b tõog n gil yelle. Woto maaneg yaa bũmb sẽn pa reem yelle.

Laafɩ wã toor sẽn ka be, gũus n ges la f tõog n bãng bãnd võor tara yõod zĩis a taab pʋsẽ me. Sabaab ning b sẽn boond tɩ Sunami wã sẽn zĩnd Ẽnd mogrẽ wã yʋʋmd 2004 yʋʋm-sar kiuugã yaa makr a ye sẽn wilgd rẽ. Ostrali la Hawai sigls nins sẽn da be-b zĩ-kãensã wã bãngame tɩ tẽn-digimdg kãseng n da na n zĩnd Sumatra tẽngã rɩtg babgẽ wã, la b da reng n bãnga rẽ sẽn da na n wa ne yell ningã. La b ra pa tar b sẽn na n maaneg n wilg nebã tɩ yell n wat sẽn na yɩl tɩ b tõog n beool b mens ye. Rẽ kɩtame tɩ sẽn yɩɩd neb 220000 ki.

Bãn yõod sẽn yaa kãsems n yɩɩd bãn a taaba fãa zĩig sẽn zãre

A Zezi Kirist sẽn wa n be tẽng zugã, a zãmsa a kɛlgdbã tɩ b tõe n bãng bãn la b tʋm tɩ zems ne b sẽn bãngã. A ra gomda bũmb sẽn tar yõod wʋsg n yɩɩd yelle. Biiblã yeta woto:

“Fariziẽ dãmba ne Sadiseẽ dãmba waa a Zezi nengẽ n kos bãmb bãnd sẽn yi yĩngri, tɩ bãmb tõe n paam n mak bãmba. A Zezi leoka bãmb yaa: ‘Zaabre yãmb yetame tɩ zĩiga na n yɩɩ vẽenega, tɩ bõe, yĩngr yaa miuugu. La  yibeoogo yãmb yetame tɩ saag na n waa rũnda, tɩ bõe, yĩngr yaa miuugu la sablga.’ Yãmb mii yĩngri yɛla n yaool n ka tõe n bãng bãn sẽn wilgd wakat ye.”—Matɩe 16:1-3.

A Zezi sẽn gom ‘bãn sẽn wilgd wakatã’ yellã, a ra wilgame t’a kɛlgdbã sẽn da yaa Zʋɩf rãmbã ra segd n bãngame tɩ b zãmaanã saab ra kolga wʋsgo. Yel-be-kãseng n da wat Zʋɩf rãmbã zãmaan zugu, tɩ ra na n pak tẽngã nebã fãa. Rasem a wãn sẽn deng a kũumã, a Zezi goma bãnd a to yell ne a karen-biisã. Yaa a belmã bãnde. A sẽn yeel bũmb ning wakat kãnga wã tara yõod wʋsg ne tõnd ned kam fãa rũndã-rũndã.