Kẽn-y ne tẽebo, la pa ne nif yãab ye
Kẽn-y ne tẽebo, la pa ne nif yãab ye
“Tõnd kẽnda ne tẽebo, la d ka yã n yaool n tẽed ye.”—2 KORẼNT DÃMBA 5:7.
1. Bõe n wilgd tɩ tʋm-tʋmd a Poll kẽna ne tẽebo, la pa ne nif yãabo?
YAA yʋʋmd 55 Kirist zãmaanã pʋgẽ. Rẽ wẽnd tɩ yaa yʋʋm 20 la rao ning yʋʋr sẽn boond t’a Soll sẽn da namsd kiris-nebã sak n lebg kiris-neda. A pa bas tɩ yʋʋm kãensa fãa sẽn loogã boog a tẽebã ne Wẽnnaamã ye. Baa ne a sẽn da pa tõe n yã saasẽ yɛlã ne a ninã, a kell n paa kãn-kãe tẽebã pʋgẽ. Woto, tʋm-tʋmd a Poll sẽn da wa n gʋlsd kiris-neb nins sẽn paam vʋʋsem sõng zaeebã sẽn da tar saagr n na n tɩ vɩɩmd saasẽ wã, a yeelame: “Tõnd kẽnda ne tẽebo, la d ka yã n yaool n tẽed ye.”—2 Korẽnt dãmba 5:7.
2, 3. a) Wãn to la d wilgd tɩ d kẽnda ne tẽebo? b) Kẽn ne nif yãab rat n yeelame tɩ bõe?
2 Kẽn ne tẽeb baoodame tɩ d tall bas-yard zãng-zãng tɩ Wẽnnaam tara tõog n tõe n wilg tõnd sor d vɩɩmã pʋgẽ. D segd n kɩsa sɩd zãng fasɩ t’a sɩd mii bũmb nins sẽn na n naf tõnd n yɩɩgã. (Yɩɩl Sõamyã 119:66) D sã n wa yãkd yam n na n maan bũmb d vɩɩmã pʋgẽ d na n ninga ‘bũmb nins sẽn be neb sẽn ka yãtã’ d yamẽ. (Hebre dãmba 11:1) “Yĩngr paalgã la tẽn-paalgã” b sẽn kãabã bee bõn-kãens sʋka. (2 Pɩɛɛr 3:13) La d sã n kẽnd ne nif yãabo, rat n yeelame tɩ d togenda d vɩɩmã tɩ zems ne tõnd ninã sẽn ne wã la d sẽn wʋmdã bala. Woto yaa yelle, bala a tõe n wa kɩtame tɩ d pa maan Wẽnnaam daabã ye.—Yɩɩl Sõamyã 81:13; Koɛɛg Soaba 11:9.
3 Tõnd bee “bãg-bilã” neb sẽn tar saasẽ vɩɩmã boollã sʋk tɩ d bee “piis a taabã” sẽn tar tẽng zug vɩɩmã saagrã sʋk me, tõnd ned kam fãa segd n tũu saglg ning sẽn yet tɩ d kẽn ne tẽeb la pa ne nif yãabã neere. (Luk 12:32, NW; Zã 10:16) Bɩ d ges sagl-kãngã vʋʋsem sõng sẽn vẽneg tɩ b gʋlsã tũub sẽn tõe n kogl tõnd to-to tɩ d ra bao “sũ-noog ninga yel-wẽnã sẽn kõt wakat bilf pʋgẽ wã,” la d ra kẽ laogã nonglem sẽn yaa bẽdgã pʋgẽ, la d ra yĩm tɩ dũni kãngã saabã kolgame ye. D na n yãa yɛl nins me kẽn ne nif yãabã sẽn wat ne wã.—Hebre dãmba 11:25.
D zãgs ‘wakat bilf sũ-noog yel-wẽnã sẽn kõtã’
4. Bõe la a Moiiz yãk yam n maane, la bõe yĩnga?
4 Mams-y n ges-y a Amram biribl a Moiiz sẽn da tõe n paam vɩɩm ningã. B wuba a Moiiz tẽn-kʋdem wẽndẽ Eziptã na-zakẽ, t’a ra tõe n paam naam, arzɛk la tõogo. A Moiiz ra tõe n tagsa woto: ‘M zãmsa Ezipt dãmbã yam nebã sẽn da kilsdã sõma, la m tara pãnga, tɩ m goamã me tar pãnga. M sã n kell n pa na-zakẽ wã, m tõe n tũnuga ne m naamã n sõng Hebre rãmbã sẽn yaa m saam-biisã b sẽn weoogdã!’ (Tʋʋma 7:22) La a Moiiz pa maan woto ye. A yãka yam n na n “lagem ne Wẽnnaam nebã n sak namsgo.” Bõe yĩnga? Yaa bõe n kɩt t’a Moiiz zãgs bũmb nins fãa a sẽn da tõe n paam Eziptã? Biiblã leokdame: “Ne tẽebo, [a Moiiz] yii Ezipt n ka zoe rĩma ye, la yẽ talla tẽeb kãn-kãe wa a yãa neba nin sẽn ka tõe n yã a soabã.” (Hebre dãmba 11:24-27) A Moiiz sẽn da tar tẽeb t’a Zeova ra na n sɩd keoa tɩrlmã tʋʋmã sõng-a lame t’a kɩɩs yel-wẽnã ne wakat bilf sũ-noog ning rẽ sẽn wat ne wã.
5. Wãn to la a Moiiz mak-sõngã sõngd tõndo?
5 Naoor wʋsgo, tõnd me segd n maana yam-yãkr sẽn pa nana yɛl kẽer taoore. Wala makre: ‘M segd n basa minim sẽn pa zems zãng fasɩ ne Biiblã noyã bɩ? M segd n saka nug-tʋʋmd sẽn wõnd a na n kɩtame tɩ m paam laogo, la sẽn na n kɩt tɩ m pa bɩ tẽebã pʋgẽ bɩ?’ A Moiiz makrã sõngda tõnd tɩ d ra maan yãkr sẽn wilgd tɩ d yaa yam-koees rãmb wa dũni kãngã nebã ye. D segd n wilga d tẽeb ne “neba nin sẽn ka tõe n yã a soabã,” sẽn yaa Wẽnnaam a Zeova sẽn tar yam wʋsg n mi sẽn wat beoogã. Wala a Moiizi, bɩ d nong a Zeova zoodã n yɩɩd bũmb ning fãa dũni kãngã sẽn tõe n kõ-dã.
6, 7. a) Wãn to la a Ezayu wilg t’a rat n kẽna ne nif yãabo? b) Mak-bʋg sẽn yaa keoogr la a Ezayu kõ-yã?
6 Mak-y a Moiiz ne a Izaak biribl a Ezayu. A Ezayu ra nonga a wee n paam a ratmã pidsg zĩig pʋgẽ. (Sɩngre 25:30-34) A Ezayu paooga tẽebã yɛla, n dɩk a bi-kãseng pʋɩɩrã n tek ne “dɩɩb vugr bala.” (Hebre dãmba 12:16) A pa tags n ges a rogem-pʋɩɩrã koosg sẽn da na n toeem a zems-n-taarã ne a Zeova wã to-to, bɩ rẽ sẽn na n wa ne bũmb ning a kambã la a yagensã zut ye. A ra pa get yɛlã ne tẽeb ye. A Ezayu basa Wẽnnaam kãabsã sẽn tar yõod wʋsgã, n da get-b wa bũmb sẽn ka yõodo. A ra kẽnda ne nif yãabo, pa ne tẽeb ye.
7 A Ezayu makrã yaa keoogr n kõ tõnd rũndã-rũndã. (1 Korẽnt dãmba 10:11) Tõnd sã n wa segd n yãk yam n maan yɛl sẽn yaa kãsems bɩ bõonego, d pa segd n bas t’a Sʋɩtãan dũniyã sẽn belgd nebã zĩig fãa n yetẽ tɩ f segd n paama f sẽn dat bũmb ningã masã balã tudg-d ye. D segd n soka d mens woto: ‘Manesem sẽn wõnd a Ezayu rẽndã n pukd mam yam-yãkrã pʋgẽ bɩ? Mam sẽn dat bũmb nins masã wã pʋgb baoodame tɩ m lebs tẽebã yɛl poorẽ bɩ? Mam sẽn yãkd yam n maand bũmb ninsã sãamda mam zoodã ne Wẽnnaam la mam beoog-daar keoorã bɩ? Yaa mak-bʋg buud la mam kõt neb a taabã?’ Tõnd sẽn yãkd yam n maand bũmb ninsã sã n wilgdẽ tɩ d nanda Wẽnnaam balengã yɛla, a Zeova na n ning-d-la barka.—Yelbũna 10:22.
D gũus n da kẽ bẽdg ning sẽn yaa laogã nonglmã pʋgẽ ye
8. Keoog-bʋg la Laodise kiris-nebã paam-yã, la bõe yĩng tɩ rẽ pak tõndo?
8 Tʋm-tʋmd a Zã paama vẽnegr pipi kiris-nebã zãmaan saab sẽnese. Vẽneg-kãng pʋgẽ, a Zezi Kirist sẽn paam ziirã taasa koɛɛg tiging sẽn be Laodise, Azimineer soolmẽ wã. Koɛɛgã ra yetame tɩ b gũus ne laogã nonglem. Baa ne Laodise kiris-nebã sẽn da tar arzɛgsã, tẽebã wɛɛngẽ b ra bee naong pʋgẽ. B pa kell n kẽn ne tẽeb ye, b basame tɩ laogã lud b tẽebã nini. (Wilgri 3:14-18) Rũndã-rũndã, laogã nonglem maanda nebã woto me. A komsda tõnd tẽebã, n wa kɩt tɩ d ya, n bas “zoees ninga sẽn be tõnd taoorã.” (Hebre dãmba 12:1) Tõnd sã n pa gũusi, “dũniyã vɩɩm sũ-noog” tõe n gɩdga tõnd tẽebã tʋʋm hali n dɩ-b zãnga.—Luk 8:14.
9. Wãn to la d sẽn na n maan sũ-noog ne d sẽn tarã, la d sẽn na n nand tẽebã rɩɩb kogend tõndo?
9 Sẽn na yɩl n kogl d tẽebã, yaa d sẽn na n maan sũ-noog ne d sẽn tarã, la pa d sẽn na n bao n dɩ dũni kãngã tɩ pid zãnga, la d bao n lebg arzɛgs rãmb ye. (1 Korẽnt dãmba 7:31; 1 Tɩmote 6:6-8) D sã n kẽnd ne tẽeb la pa ne nif yãabo, d paamda sũ-noog masã tẽeb arzãnã pʋgẽ. D sẽn dɩt tẽebã rɩɩb sẽn yaa sõma wã, pa kɩt tɩ d ‘yɩɩnd ne sũ-noog’ sɩda? (Ezai 65:13, 14) Sẽn paase, d maanda sũ-noog ne lagem-n-taar ning d sẽn tar ne neb nins sẽn pukd Wẽnnaam vʋʋsem sõngã biisã. (Galat dãmba 5:22, 23) Sɩd tara yõod wʋsg tɩ d paam sũ-noog la pɛlg kengr ne bũmb nins a Zeova sẽn kõt tẽebã wɛɛngẽ wã!
10. Sogs-bʋs la d segd n sok d mense?
10 D segd n soka d mens woto: ‘Mam ninga laogã zĩ-bʋg m vɩɩmã pʋgẽ? Mam tũnugda ne laog ning m sẽn tarã n na n noog m yõor bɩ, bɩ n na n kɩt tɩ Wẽnnaam baleng hakɩkã kẽng taoore? Yaa bõe n kõt maam sũ-noog n yɩɩda? Yaa Biiblã zãmsg la tũud-n-taar maaneg ne m kiris-nin-taasã tigissẽ wã bɩ, bɩ m basda tẽeb tʋʋm nins kiris-nebã sẽn segd n tʋma n yit wɩkɛn n noogd m yõore? Mam dɩkda wɩkɛn dãmb wʋsg pemsem kokr yĩnga, n bas koe-noogã mooneg la Wẽnnaam baleng hakɩkã tʋʋm a taab m sẽn segd n maan bɩ?’ Kẽn ne tẽeb rat n yeelame tɩ d ket n tʋmd Rĩungã tʋʋmd wʋsgo, n tar bas-yard zãng-zãng ne a Zeova kãabsã.—1 Korẽnt dãmba 15:58.
D ning d yamẽ tɩ saabã kolgame
11. Wãn to la d sẽn na n kẽn ne tẽeb kɩtd tɩ d kell n tall d yamẽ tɩ saabã kolgame?
11 D sã n kẽnd ne tẽebo d pa na n tags wa ned sẽn ka tẽebo, sẽn yet tɩ saabã zãrame bɩ t’a pʋd n pa na n wa abada wã ye. D pa na n maan wa sãmb-sãmb rãmbã sẽn sãbsd Biiblã bãngr-goamã ye. Tõnd nee dũniyã yɛl sẽn pidsd bũmb nins Wẽnnaam Gomdã sẽn da reng n togs tõnd wakatã yĩngã. (2 Pɩɛɛr 3:3, 4) Wala makre, nebã wʋsg tagsa la b yel-manesem pa wilgd tɩ d vɩɩ ‘yaoolem wakatã’ sɩda? (2 Tɩmote 3:1-5) Ne tẽeb nini, d neeme tɩ dũniyã yɛl pa tẽn-kʋdem wẽndẽ yɛlã bal sẽn tar yɩleng ye. La yel-kãens lagem n yaa ‘bãnd ninga sẽn wilgd Kirist belmã la dũniyã sɛɛb wakatã.’—Matɩe 24:1-14.
12. Wãn to la a Zezi goam nins sẽn be Luk 21:20, 21 pʋgẽ wã pids pipi kiris-neba wakatẽ wã?
12 Ges-y bũmb sẽn maan pipi kiris-neba wakatẽ wã, tɩ wõnd sẽn maand tõnd wakatã. A Zezi Kirist sẽn da wa n be tẽng zugu, a keooga a karen-biisã woto: “Yãmb sã n wa yã tɩ sodaas wʋsg gũbg Zerizalɛm, dẽ, bɩ y bãng t’a sãoong kolgame. Wakat kãnga neb nins sẽn be Zide, bɩ b zoe n kẽng tãens zutu. La neb nins sẽn be Zerizalɛm, bɩ b yi.” (Luk 21:20, 21) A Sɛstius Galus waa ne Rom tãb-biisã n gũbg Zerizalɛm yʋʋmd 66 Kirist zãmaanã pʋgẽ tɩ pids bãngr-gom-kãngã. La tãb-biisã tiig n loogame, tɩ kõ kiris-neb nins sẽn da be be wã sor tɩ b tõog n ‘zoe n kẽng tãensã zutu.’ Yʋʋmd 70 Kirist zãmaanã pʋgẽ, Rom tãb-biisã lebg n wa zaba ne Zerizalɛm, n sãam a wẽn-doogã. A Zozɛf gʋls n wilgame tɩ yaa sẽn yɩɩd Zʋɩf rãmb milyõ n ki, tɩ b yõg bãmb 97000 n maan yembse. Wẽnnaam bʋ-kaoorã ra pidsa Zʋɩf rãmbã zãmaan zugu. Neb nins sẽn kẽn ne tẽeb n kelg a Zezi keoogrã põsa yel-beedã.
13, 14. a) Yel-bʋs n wat ka la bilfu? b) Bõe yĩng tɩ d segd n gũusd n bãngd Biiblã bãngr-goam pidsgu?
13 Tõnd wakatã, bũmb sẽn wõnd woto n wat ka la bilfu. Tẽn-tẽns sẽn lagem taab Siglgã (ONU) na n kẽesa a toog Wẽnnaam bʋ-kaoorã pidsg pʋgẽ. Wala Rom tãb-biisã pipi kiris-nebã zãmaan pʋgẽ wã sẽn da rat n kɩt tɩ Pax Romana (Rom laafɩ wã) kell n zĩndã, Tẽn-tẽns sẽn lagem taab Siglgã sẽn be rũndã-rũndã wã ratame n kɩt tɩ laafɩ zĩnd dũniyã zugu. Baa ne Rom tãb-biisã sẽn mak n na n kɩt tɩ bãan zĩnd wakat kãng dũniyã pʋgẽ wã, yaa bãmb n wẽneg n sãam Zerizalɛm. Biiblã bãngr-goam wilgdame tɩ rũndã-rũndã me, tẽns sodaas nins be Tẽn-tẽns sẽn lagem taab Siglgã pʋgẽ wã na n gesame tɩ tũudmã wata ne gudgri, la b na n yik n sãama rũndã-rũndã Zerizalɛmã sẽn yaa kiris-neb ne yʋʋr tũudmã, n paas Babilon Kãsengã babs a taabã fãa. (Wilgri 17:12-17) N-ye, dũni gill ziri tũudmã fãa sãoong kolgame.
14 To-kãsengã na n sɩnga ne ziri tũudmã sãoongo. To-kãsengã yaoolem babgẽ, b na n sãama dũni wẽng kãngã babs nins sẽn ketã. (Matɩe 24:29, 30; Wilgri 16:14, 16) D sã n kẽnd ne tẽebo, kɩtdame tɩ d gũusd n bãngd Biiblã bãngr-goam pidsgu. Tõnd pa belgd d mens n tagsdẽ tɩ Wẽnnaam na n tũnuga ne siglg ninsaal sẽn maan wala ONU wã n wa ne laafɩ la bãan ye. Woto yĩnga, tõnd vɩɩmã manesem segd n wilgame tɩ d tẽedame t’a Zeova “ra-kãsengã kolgame.”—Sofoni 1:14.
Kẽn ne nif yãab sɩd yaa yell bɩ?
15. Baa ne Israɛll buudã sẽn paam Wẽnnaam barkã, yaa bẽd-bʋg pʋgẽ la b lʋɩ-yã?
15 Pĩnd wẽndẽ Israɛllã yɛl wilgdame tɩ f sã n kẽnd ne nif yãab tɩ f tẽebã komse yaa yelle. Baa ne Israɛll nebã sẽn maan kaset ne tood piigã sẽn ning Ezipt wẽnnaam dãmbã yãndã, la b yã b sẽn fãag-b ne yel-solemd tɩ b pasg Mog-miuugã, b kɩɩsame n maan sãnem nag-bil n sɩng a balengo. B ra gũu a Moiiz n ya, n da yãgdẽ, ‘a sẽn kaoos tãngã zug n ka sigdã’ yĩnga. (Yikri 32:1-4) B sẽn pa tall maag-m-mengã kɩtame tɩ b balem bõn-naandg b nina sẽn da tõe n yã. B sẽn da kẽnd ne nif yãabã kɩtame tɩ b beeg a Zeova, tɩ rẽ wa ne ‘neb tus a tãab’ kũum. (Yikri 32:25-29) A Zeova balemd sã n dɩk sard rũndã-rũndã tɩ wilgdẽ t’a pa tar bas-yard ne a Zeova, la a pa kɩs sɩd t’a tõe n pidsa a kãabsã, ad sɩd yaa kaeto menga!
16. Israɛll nebã sẽn da get ninsaal nif sẽn tõe n yã wã balã kɩtame tɩ b maan bõe?
16 Kẽn ne ninsaal nin sẽn ne wã balã me kɩtame tɩ Israɛll tall manesem a taab sẽn pa sõma. B sẽn da kẽnd ne nif yãabã kɩtame tɩ rabeem wʋsg yõk-b b bɛɛbã taoore. (Sõdbo 13:28, 32; Tõodo 1:28) Manesem kãng kɩtame me tɩ b kɩɩs zu-sobend ning Wẽnnaam sẽn bobl a Moiizã la b yẽgem b vɩɩmã sẽn da yaa to-to wã yĩnga. Tẽeb kaalem kãng kɩtame tɩ b wa rat n bas Kãabg Tẽngã babsg n leb Ezipt zĩn dãmbã sẽn da tarẽ pãngã. (Sõdbo 14:1-4; Yɩɩl Sõamyã 106:24) Ad a Zeova sũur da segd n sãama wʋsgo, a sẽn yã a nin-buiidã sẽn paoog yẽ sẽn yaa b Rĩm b sẽn da pa tõe n yã wã hal kẽengã!
17. Yaa bõe n kɩt tɩ Israɛll nebã zãgs a Zeova sor-wilgrã a Sãmwɛll wakatã?
17 No-rɛɛs a Sãmwɛll wakatã me, Israɛll buudã sẽn paam Wẽnnaam lohormã ra lʋɩya bẽdg ning sẽn yaa kẽn ne nif yãabã pʋgẽ. Nin-buiidã wa n yikame n dat rĩm b sẽn da tõe n yã. Baa ne a Zeova sẽn da wilg t’a ra yaa b Rĩmã, ne bãmba, woto ra pa sek tɩ b na n kẽn ne tẽeb ye. (1 Sãmwɛll 8:4-9) B maana yalemd n zãgs a Zeova sor-wilgrã sẽn yaa sõma zãngã, n wã b mense, b sẽn bao n na n yɩ wa buud a taabã sẽn gũbg-bã.—1 Sãmwɛll 8:19, 20.
18. Kẽn ne nif yãabã sẽn wat ne yɛl ninsã zãmsda tõnd bõe?
18 D sẽn yaa Wẽnnaam a Zeova rũndã-rũndã sõgen dãmbã, d nanda zems-n-taar ning d sẽn tar ne-a wã. D rata ne d sũy fãa n zãms la d tũ zãmsg sẽn tar yõod wʋsgã d sẽn tõe n paam yɛl nins sẽn zĩnd pĩndã pʋgẽ wã. (Rom dãmba 15:4) Israɛll nebã sẽn da kẽnd ne nif yãabã yĩnga, b wa n yĩmame tɩ Wẽnnaam da tũnugda ne a Moiiz n wilgd-b sore. Tõnd sã n pa gũusi, tõnd me tõe n wa yĩmame tɩ Wẽnnaam a Zeova ne Moiiz Kãseng a Zezi Kirist n wilgd kiris-neb tigingã sor rũndã-rũndã. (Wilgri 1:12-16) D segd n gũusame n da ges a Zeova tẽng zug siglgã ne ninsaal tagsg bal ye. D sã n kɩɩs n maan woto, d tõe n talla yẽgeng yam la d pa wilg mi-beoogo, a Zeova sẽn kõ neb nins taoor sobendã, la tẽebã rɩɩb ‘tʋm-tʋmd sẽn tũud sɩd la sẽn tar yamã’ sẽn kõtã yĩng ye.—Matɩe 24:45.
Yãk-y yam n kẽn ne tẽeb wakat fãa
19, 20. Yãmb yãka yam n na n maan bõe wakat fãa, la bõe yĩnga?
19 Biiblã yetame: “Tõnd zabr ka be ne ninsaal ye, la a yaa ne sɩɩs wẽns buud fãa sẽn be yĩngri la bãmb dĩm dãmba la pãens rãmba la lik soaadba sẽn so pãng masã.” (Efɛɛz rãmba 6:12) Tõnd bɛ kãsengã yaa a Sʋɩtãana. A raabã yaa a sãam tẽeb ning tõnd sẽn tar ne a Zeova wã fasɩ. A na n tũnuga ne belgr buud fãa sẽn tõe n kɩt tɩ d bʋdg n bas Wẽnnaam sõgenego. (1 Pɩɛɛr 5:8) Yaa bõe n na n kogl tõnd ne a Sʋɩtãan dũniyã bũmb nins sẽn be neer nif gesgẽ wã belgre? Yaa d sẽn na n kẽnd ne tẽebo, la pa ne nif yãab ye. D sã n tar bas-yard ne a Zeova kãabsã, na n kogla tõnd tɩ d ‘tẽebã ra sãam’ ye. (1 Tɩmote 1:19) Bɩ d yãk yam tɩ d na n ket n kẽnda ne tẽeb wakat fãa, n kɩs sɩd zãng-zãng tɩ d na n paama a Zeova barka. La bɩ d ket n pʋʋsdẽ, sẽn na yɩl n põs bũmb nins sẽn na n wa ka la bilfã.—Luk 21:36.
20 D sẽn kẽnd ne tẽeb la pa ne nif yãabã, mak-sõng sẽn yaa kãseng la d tara. Biiblã yetame: “Kirist me namsa yãmb yĩnga n bas mamsg ne yãmb tɩ y tũ bãmb naowã.” (1 Pɩɛɛr 2:21) Sõsg ning sẽn pʋgdã na n wilga d sẽn tõe n kẽn n tũ yẽ naowã to-to.
Y tẽrame bɩ?
• Bõe la a Moiiz la a Ezayu makrã zãms yãmb kẽn ne tẽebo, la pa ne nif yãabã zugu?
• Bõe la d segd n maan sẽn na yɩl n da kẽ laogã nonglem pʋgẽ?
• Wãn to la kẽn ne tẽebã sõngd tõnd tɩ d ra tags tɩ saabã ket n zãrame?
• Bõe yĩng tɩ yaa yell tɩ d kẽn ne nif yãabo?
[Zãmsgã sogsgã]
[Foto, seb-neng a 9]
A Moiiz kẽna ne tẽebo
[Foto, seb-neng 10]
Naoor wʋsgo, pemsem kokrã kɩtdame tɩ y pa tʋmd tẽebã tʋʋm bɩ?
[Foto, seb-neng 12]
Wãn to la y sẽn kelgd Wẽnnaam Gomdã kogend yãmba?