Kẽnd-y wa a Zezi Kirist sẽn kẽn to-to wã
Kẽnd-y wa a Zezi Kirist sẽn kẽn to-to wã
“Sẽn yet-a tɩ yẽ tũuda [Wẽnnaam], yẽ me tog n kẽnda wa [a Zezi] sẽn dag n kẽndã.”—1 ZÃ 2:6.
1, 2. Ges a Zezi neer rat n yeelame tɩ d maan bõe?
TƲM-TƲMD a Poll gʋlsa woto: “D zoe zoees ninga sẽn be tõnd taoorã n da yɛ ye. Bɩ tõnd ges a Zezi sẽn yaa tõnd tẽeb sɩngd la a taasdã [neere, NW].” (Hebre dãmba 12:1, 2) Sak Wẽnnaam wakat fãa baoodame tɩ d ges a Zezi Kirist neere.
2 Kiris-neb Gɛrk Gʋlsg Sõamyã pʋgẽ, gɛrk gom-biig ning b sẽn lebg tɩ “ges neerã” rat n yeelame tɩ “tags bũmb zug n da bas tɩ bũmb tiis-fu,” “bas bũmb a yembr gesg n ges a to.” Sebr a yembr wilgda woto: “Gɛrk zoe-zoɛt sẽn be ɛstaadẽ n zoetẽ sã n bas gũusg wakat bilf pʋgẽ a zoeesã sasa n yĩm zĩig ning a sẽn dat n ta wã, n bas n ges kʋʋngã sẽn get zoɛtbã, a zoeesã maagdame. Yaa woto ne kiris-ned me.” D sã n bas tɩ yɛl tiisd-du, tõe n gɩdga tõnd tẽebã bɩʋʋngo. D segd n gesa a Zezi Kirist neere. La yaa bõe la d segd n ges d tẽeb “sɩngda la a taasda” nengẽ? Gɛrk gom-biig ning b sẽn lebg tɩ “sɩngda la a taasdã” rat n yeelame tɩ “taoor lʋɩta, a soab ning sẽn lʋɩt taoor bũmb fãa pʋgẽ, ned sẽn kõt neb a taab mak-sõngã.” Ges a Zezi neer rat n yeelame tɩ d tũ a makrã.
3, 4. a) Kẽn wa a Zezi Kirist sẽn kẽnã baoodame tɩ d maan bõe? b) Zemsame tɩ d bao n leok sogs-bʋse?
3 Biiblã yetame tɩ: “Sẽn yet-a tɩ yẽ tũuda [Wẽnnaam], yẽ me tog n kẽnda wa [a Zezi] sẽn dag n kẽndã.” (1 Zã 2:6) D segd n paa zems-n-taar pʋgẽ ne Wẽnnaam, ne d sẽn na n tũud a Zezi sẽn kõ noy ninsã wa yẽ mengã sẽn tũ a Ba wã noy to-to wã.—Zã 15:10.
4 Woto yĩnga, kẽn wala a Zezi sẽn kẽn to-to wã baoodame tɩ d ges-a neere, a sẽn yaa Taoor lʋɩtã yĩnga, la tɩ d tũ a nao wã me neere. Sogs-kãsems nins d sẽn segd n bao n leok rẽ wɛɛngẽ wã la woto: Wãn to la Kirist sẽn yaa tõnd Taoor lʋɩtã wilgd tõnd sor rũndã-rũndã? Tõnd sẽn dɩkd togs-n-taar ne a kẽndã, segd n kɩtame tɩ d maan bõe? D sã n tũ mak-sõng ning a Zezi Kirist sẽn kõ-dã, na n naf-d-la wãn to?
Kirist sẽn wilgd a karen-biisã sor to-to
5. Nand t’a Zezi rʋ saasẽ, yaa bõe la a kãab a karen-biisã?
5 Nand t’a Zezi Kirist rʋ saasẽ, a vʋʋgrã poore, a puka a karen-biisã n bobl-b tʋʋm-kãsenga. A yeelame: “Bɩ y kẽng n maan neba buud fãa tɩ b yɩ mam karen-biisi.” Sasa kãnga, Taoor lʋɩtã kãabame me t’a na n zĩnda ne-b tʋʋm-kãng pʋgẽ, n yeele: “Gese, mam bee ne yãmb wakat fãa hal tɩ ta wakat sɛɛbo.” (Matɩe 28:19, 20) Wãn to la a Zezi Kirist be ne a karen-biisã dũni kãngã saabã wakate?
6, 7. Wãn to la a Zezi wilgd tõnd sor ne vʋʋsem sõngã maasem?
6 A Zezi yeelame: “Sõangdã sẽn yaa Sɩɩg Sõngo, m Ba sẽn na n tʋm ne mam yʋʋra na n zãmsa yãmb bũmb fãa; la b na n tẽega yãmb bũmb nins fãa mam sẽn da togs yãmbã.” (Zã 14:26) Vʋʋsem sõngã b sẽn tʋm a Zezi yʋʋr yĩngã wilgda tõnd sor la a kõt-d pãng rũndã-rũndã. A vẽnegda tõnd tẽebã wɛɛngẽ la a sõngd tõnd tɩ d wʋmd Wẽnnaam yel-zulumsã võore. (1 Korẽnt dãmba 2:10) Sẽn paase, zʋg sõma sẽn tat Wẽnnaam yam wala “nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga” yaa vʋʋsem sõngã biisi. (Galat dãmba 5:22, 23) D tõe n bɩɩsa zʋg-kãensã ne vʋʋsem sõngã sõngre.
7 D sẽn zãmsd Gʋlsg Sõamyã la d maood n na n tũ d sẽn zãmsdã kɩtame t’a Zeova vʋʋsem sõngã sõngd tõnd tɩ d yamã bɩt n paasdẽ, tɩ d bãngd yɛlã n welgdẽ la d wʋmd b võor n paasdẽ, tɩ d bãngrã paas la d sẽn magd yɛlã to-to wã yɩ sõma n paase, la d tõogd n tagsd tɩrg sõma n paasdẽ. (Yelbũna 2:1-11) Vʋʋsem sõngã le sõngda tõnd tɩ d maood ne kʋɩɩbgã n yalsd kãn-kãe makr pʋgẽ. (1 Korẽnt dãmba 10:13; 2 Korẽnt dãmba 4:7; Filip rãmba 4:13) B sagla kiris-nebã tɩ b ‘lak ne bũmb fãa sẽn yaa rẽgdo, yĩnga rẽnd la sũur dẽnda, la b bɩ sõmblem pʋgẽ.’ (2 Korẽnt dãmba 7:1) Tõnd pa tõe n sɩd tũ Wẽnnaam noor ning sẽn baood tɩ d yɩ sõng la yɩlemdã, tɩ sã n pa tũ ne vʋʋsem sõngã sõngr ye. A Zezi sẽn tũnugd ne bũmb nins n wilgd tõnd sor rũndã-rũndã wã a yembr yaa vʋʋsem sõngã, Wẽnnaam a Zeova sẽn kõ-a sor t’a tʋm ne wã.—Matɩe 28:18.
8, 9. Wãn to la Kirist tũnugd ne ‘tʋm-tʋmd sẽn tũud sɩd la sẽn tar yamã’ n kõt sor-wilgri?
8 Ges-y bũmb a to Kirist sẽn tũnugd ne n wilgd tigingã sor rũndã-rũndã. A Zezi goma a belmã la dũniyã saab wakat yell n yeele: “Ãnda n yaa tʋm-tʋmd sẽn tũud sɩd la sẽn tar yam, t’a Zusoaba kõ-a noor t’a ges a zak yell n moeneg a zaka wa sẽn zemse? Bark bee tʋm-tʋm kãng zugu, a Zusoaba sẽn na n wa mik t’a maanda woto. Mam yeta yãmb sɩda tɩ yẽ na kõ-a noor t’a yɩ a zaka fãa yel-gɛta.”—Matɩe 24:3, 45-47.
9 “Zusoabã” yaa a Zezi Kirist. ‘Tʋm-tʋmdã’ yaa kiris-neb nins sẽn paam vʋʋsem sõngã zaeeb n be tẽng zugã sulli. B bobla tʋm-tʋmd kãngã a Zezi tẽng zug paoongã t’a ges a yelle, la a kõ tẽebã rɩɩb wakat sẽn zems sasa. ‘Tʋm-tʋmd sẽn tũud sɩd la sẽn tar yamã’ neb sʋka, neb a wãn sẽn tar tõog la b yãk tɩ b yaa Siglgã Taoor lʋɩtb Sulli, n gomd tʋm-tʋmdã sull yʋʋr yĩngã. B kõta sor-wilgr Rĩungã mooneg tʋʋmd b sẽn maand dũniyã gill zugã pʋgẽ, la b kõt tẽebã rɩɩb wakat sẽn zems sasa. Yaa woto la Kirist tũnugd ne ‘tʋm-tʋmd sẽn tũud sɩd la sẽn tar yamã’ sẽn paam vʋʋsem sõngã zaeebã la Siglgã Taoor lʋɩtbã Sullã n wilgd tigingã sore.
10. Tõnd segd n talla manesem bʋg ne kãsem dãmbã, la bõe yĩnga?
10 La Kirist leb n tũnugda ne ‘neb a sẽn kõ wã,’ sẽn dat n yeel tɩ kiris-neb kãsem dãmbã bɩ yel-gɛtbã n wilgd tigingã sore. B kõ-b-la tigingã “Wẽnnaam neba bɩɩb yĩnga, la Wẽnnaam tʋʋmda yĩnga, la Kirist yĩnga sõngr yĩnga.” (Efɛɛz rãmba 4:8, 11, 12) Hebre dãmb 13:7 gomda bãmb yell n yet woto: “Bɩ y tẽeg yãmb taoor dãmba sẽn wilg yãmb Wẽnnaam goama yelle. La bɩ y tags bãmb baoosg sẽn yɩ bũmb ninga, la [y] maan togs-n-taar ne bãmb tẽebo.” Kãsem dãmbã lʋɩta taoor tigingã pʋgẽ. B sẽn dɩkd Kirist Zezi togs-n-taarã yĩnga, zemsame tɩ d rɩk togs-n-taar ne b tẽebã. (1 Korẽnt dãmba 11:1) D tõe n wilga d mi-beoogo, b sẽn kõ tigingã kãsem dãmbã yĩnga, d sẽn na n sakd nin-kãensã sẽn yaa Wẽnd ‘kũunã.’—Hebre dãmba 13:17.
11. Kirist tũnugda ne bõe ne bõe n wilgd a karen-biisã sor rũndã-rũndã, la kẽn wa yẽ sẽn kẽn to-to wã baoodame tɩ d maan bõe?
11 N-ye, a Zezi Kirist tũnugda ne vʋʋsem sõngã, ‘tʋm-tʋmd sẽn tũud sɩd la sẽn tar yamã,’ la tigingã kãsem dãmba n wilgd a karen-biisã sor rũndã-rũndã. Sẽn na yɩl n kẽn wa Kirist sẽn kẽn to-to wã, d segd n bãnga a sẽn wilgd a karen-biisã sor to-to la d sak a sor-wilgr kãnga. Rẽ me baoodame tɩ d kẽn wa yẽ sẽn da kẽn to-to wã. Tʋm-tʋmd a Pɩɛɛr gʋlsame: “Yaa bõn-kãng yĩng la b bool yãmba, tɩ bõe, Kirist me namsa yãmb yĩnga n bas mamsg ne yãmb tɩ y tũ bãmb naowã.” (1 Pɩɛɛr 2:21) Tõnd sẽn tũud a Zezi makrã sẽn zems zãngã segd n kɩtame tɩ d maan bõe ne bõe?
Tʋm-y ne y zu-sobendã tɩ zemse
12. Kirist mak-sõngã nen-bʋg la tigingã kãsem dãmbã segd n tũ neere?
12 Baa ne a Zezi Ba wã sẽn kõ-a zu-sobend tɩ yɩɩd ned a to buud fãa rẽndã, a Zezi tʋma ne a zu-sobendã tɩ zemse. Tigingã pʋgẽ, nebã fãa, sẽn yɩɩd fãa yel-gɛtbã segd n kɩtame tɩ “neba fãa bãng” tɩ b yaa maan-tɩ-zems rãmba. (Filip rãmba 4:5; 1 Tɩmote 3:2, 3) Sẽn mik tɩ kãsem dãmbã tara zu-sobend buud tigingã pʋgẽ wã, b segd n tũu Kirist nao wã n tʋm ne b zu-sobendã tɩ zemse.
13, 14. Wãn to la kãsem dãmbã tõe n dɩk a Zezi togs-n-taare, b sã n wa sagend neb a taabã tɩ b sak Wẽnnaam?
13 A Zezi ra pa yĩmd t’a karen-biisã pãn-tõog ra tara koak ye. A ra pa baood tɩ b maan sẽn yɩɩd b pãng ye. (Zã 16:12) A Zezi pa modg a karen-biisã tɩ b maan bũmb ye, a sagl-b lame tɩ b “mao” n maan Wẽnnaam daabã. (Luk 13:24) A maana woto n wilgd-b sore, la a zãms-b tɩ kẽ b sũyã. Rũndã-rũndã, kiris-neb kãsem dãmbã me pa ningd neb a taabã yãnde, bɩ taale, sẽn na yɩl tɩ b maan Wẽnnaam daabã ye. B sagend-b lame tɩ b maan a Zeova raabã, b sẽn nong yẽ ne a Zezi, n paas b taabã yĩnga.—Matɩe 22:37-39.
14 A Zezi pa tʋm ne zu-sobend ning b sẽn bobl-a wã tɩ loog nug n bao n na n soog neb a taabã vɩɩm ye. A zɩ n yãk noy tũub sẽn yɩɩd nebã pãnga, bɩ noy ka tɛk b yĩng ye. La a kɩtame tɩ no-yẽg nins sẽn pukd tõod nins b sẽn tũnug ne a Moiiz n kõ wã kẽ a taabã sũyã. (Matɩe 5:27, 28) Kãsem dãmbã rɩkda a Zezi Kirist togs-n-taare. B pa yãkd noy sẽn zems ne bãmb tagsg bal n kõt b taabã ye. B pa baood me tɩ b tũ bãmb mensã tagsa bal ye. Fu-yerdɩ wã la meng manegrã, bɩ pemsem kokrã la reemã wɛɛngẽ, kãsem dãmbã baoodame n na n tik Wẽnnaam noyã zut n zãms nebã tɩ kẽ b sũyã. Wala makre b tikda noy nins sẽn be Miise 6:8; 1 Korẽnt dãmba 10:31-33; la 1 Tɩmote 2:9, 10 pʋgẽ wã zutu.
Yɩ-y nimbãan-zoɛtb la sugr kõtba
15. A Zezi talla manesem bʋg a karen-biisã kongr taoore?
15 Kirist sẽn tall manesem ning ne a karen-biisã b kongrã la b tudgrã pʋgẽ wã yaa mak-sõng la a kõ tõnd tɩ d tũ. Ges-y yɛl a yiib sẽn zĩnd a Zezi tẽng zug yaoolem yʋngã sasa. A sẽn ta Gɛtsemane wã poore, a “peega a Pɩɛɛr ne a Zak la a Zã tɩ b tũ” yẽ, la a yeel-b lame tɩ b ket n gũusdẽ, la a ‘kẽng taoor bilfu, n lʋɩ tẽng n pʋʋse.’ A sẽn wa n lebg n wa wã, a ‘mikame tɩ bãmb gõeeme.’ A Zezi manesem yɩɩ wãn to? A yeelame: “Sɩɩga ratame, la yĩnga ka tar pãng ye.” (Mark 14:32-38) A pa zab a Pɩɛɛre, a Zak ne a Zã ye, a zoea b nimbãanega! Baraar yʋng bala, a Pɩɛɛr kɩɩsa naoor a tãab t’a pa mi a Zezi ye. (Mark 14:66-72) A Zezi talla manesem bʋg ne a Pɩɛɛr yel-kãng loogr poore? “Zusoaba vʋʋgame, la bãmb vẽnega b meng ne a Simo [Pɩɛɛre].” (Luk 24:34) Biiblã yetame: “Bãmb vẽnega b meng ne a Sefas n yaool n vẽneg b meng ne piig la a yiibã.” (1 Korẽnt dãmba 15:5) A Zezi pa tall sũ-kẽk ye, a kõo tʋm-tʋmdã sẽn tek yam n kos sugrã sugri, la a keng a pɛlga. Rẽ poore, a Zezi bobla a Pɩɛɛr taoor sobend wʋsgo.—Tʋʋma 2:14; 8:14-17; 10:44, 45.
16. Tõnd tẽed-n-taasã sã n wa kong bɩ b sã n beeg tõnd wakate, wãn to la d tõe n kẽn wa a Zezi sẽn kẽn to-to wã?
16 Tõnd tẽed-n-taasã sã n wa kong bɩ b sã n beeg tõnd b sẽn yaa pãn-komsem dãmbã yĩnga, rẽ yĩnga tõnd me pa segd n tall nimbãan-zoeer la d kõ sugr wa a Zezi sẽn maanã sɩda? A Pɩɛɛr sagla a tẽed-n-taasã woto: “A yaa tɩ yãmb fãa paam tagsg a yembr la yam a yembre, la y paam nonglem ba-biis yĩnga, la sũ-bʋgsem la sik-m-menga. Bɩ y ra lebs wẽng wẽng yĩng ye, walla tʋʋsg tʋʋsg yĩng ye. Bɩ y ra lebs bãmb woto ye. La bɩ y lebs barka.” (1 Pɩɛɛr 3:8, 9) Yaa wãn to yẽ, ned a to sã n pa maan wa a Zezi, n pa rat n zoe tõnd nimbãanega, bɩ n pa rat n kõ sugri? Baa sã n wa yaa woto, tõnd segd n modgame n dɩk a Zezi togs-n-taare.—1 Zã 3:16.
Ning-y Rĩungã pipi zĩigẽ
17. Bõe n wilgd t’a Zezi rɩka Wẽnnaam daabã maaneg n lʋɩɩs taoor a vɩɩmã pʋgẽ?
17 La bũmb a to pʋgẽ me la d segd n kẽn wa a Zezi Kirist sẽn kẽn to-to wã. A Zezi vɩɩmã pʋgẽ, Wẽnnaam Rĩungã koe-noog mooneg n da tar yõod n yɩɩda. A Zezi sẽn moon Samari poakã sẽn da pẽ Sisaar sẽn be Samari soolmẽ wã poore, a yeela a karen-biisã. “Mam dɩɩb yaa tɩ maan sẽn tʋma maama ratem, la tɩ maan bãmb tʋʋma n sɛ.” (Zã 4:34) A Zezi sẽn da maand a Ba wã raabã sõng-a lame. Ra yaa bũmb sẽn da be yamleoog ne-a, la kõt-a sũ-noog wala rɩɩbo. D sã n dɩk a Zezi togs-n-taar n lʋɩɩs Wẽnnaam daabã taoor d vɩɩmã pʋgẽ, kõn kɩt tɩ d vɩɩmã tall võor la sũ-noog sɩda?
18. F sã n sagl kambã tɩ b rɩk so-pakrã tʋʋmde, bark bʋs la b paamda?
18 Roagdbã sã n sagend b kambã tɩ b wa yɩ so-pakdba, bãmb ne b kambã paamda bark wʋsgo. Komdibli sẽn yaa kinkirs ba n da sagend-b tɩ b rɩk so-pakrã tʋʋmd tɩ b ket n yaa kɩdse. Kinkirsã sẽn sa b karengã, b sɩd lebga so-pakdba. B ba wã tagsa sũ-noog ning a sẽn paam dẽ yĩngã yell n gʋls woto: “Tõnd komdibli wã pa sãam d sũy ye. D tõe n yeela ne mi-beoog tɩ ‘komdibli yaa pʋɩɩr a Zeova sẽn kõta.’” (Yɩɩl Sõamyã 127:3) La so-pakrã tʋʋmd nafda kambã wãn to? Kamb a nu ma yeela woto: “So-pakrã tʋʋmd sõnga mam kambã fãa tɩ b paas b zems-n-taarã ne a Zeova wã pãngã. A kɩtame tɩ b paam minung sẽn yaa sõma Biiblã zãmsg wɛɛngẽ n paase. A leb n sõng-b lame tɩ b rɩkd b sẽkã n tʋmd ne yam, la leb n sõng-b lame tɩ b lʋɩɩsd tẽebã yɛl taoor b vɩɩmã pʋgẽ. Baa sẽn yɩ tɩlae ne bãmb fãa tɩ b maan toeeng wʋsgã, b baa a yembr pa maand a bãngẽ ne sor ning a sẽn yãk n tũudẽ wã ye.”
19. Kom-bɩɩsã segd n mag n maana bõe beoog-daare?
19 Kom-bɩɩse, bõe la yãmb magd n na n maan beoog-daare? Yãmb baoodame n na n lʋɩ taoor y tʋʋmã zĩigẽ bɩ? Bɩ y modgdame n na n wa kɩt tɩ so-pakrã yɩ y yõor tɛk tʋʋmde? A Poll sagla woto: “Bɩ y gũus ne yãmb kẽnd neere tɩ zems ne bũmb fãa zãng wa yam dãmba, la ka wa yalemb ye. Bɩ y maan yãmb sẽn tõe tɛk wakat fãa.” A paasa woto: “Bɩ y ra maan yalemd ye, la bɩ y bãng Zusoaba yam sẽn yaa bũmb ninga.”—Efɛɛz rãmba 5:15-17.
Yɩ-y kɩs-sɩd soab wakat fãa
20, 21. Wãn to la a Zezi ra yaa kɩs-sɩd soaba, la wãn to la d tõe n dɩk togs-n-taar ne a kɩs-sɩdã?
20 D sã n dat n kẽn wa a Zezi sẽn kẽn to-to wã, d segd n talla yẽ kɩs-sɩdã buudu. Biiblã yeta woto a Zezi kɩs-sɩdã wɛɛngẽ: “Baa a sẽn zĩnd Wẽnnaam wẽnegã pʋgẽ wã, a pa tags n na n deeg a zĩig ye, sẽn dat n yeel tɩ zeng Wẽnnaam ye. Ayo, la a faaga a menga, n dɩk yamb wẽnego, la a puka ninsaalb wẽneg pʋgẽ. Sẽn paasde, a sẽn wa n yaa ninsaalã wakate, a sika a menga n yɩ sakda hal n tɩ ta kũum, n-yẽe, kũum namsg ra-luk zugu.” A Zezi teela a Zeova naam sẽn ka to wã n sak n tũ raab ning Wẽnnaam sẽn yãk a yĩngã wakat fãa. A yɩɩ sakd hal n ki namsg ra-luk zugu. Tõnd segd n talla ‘yam kãng’ buudu, la d sak n maan Wẽnnaam daabã wakat fãa.—Filip rãmba 2:5-8, NW.
21 A Zezi talla kɩs-sɩd me ne a tʋm-tʋmdb nins sẽn yɩ sakdbã. Baa ne b sẽn tall pãn-komsmã, a Zezi talla “nonglem kãseng” ne-b hal tɩ ta a kũum. (Zã 13:1) Woto tõnd me pa segd n bas tɩ d saam-biisã pãn-komsmã kɩt tɩ d lebg nin-sãbsd ye.
Tũ-y mak-sõng ning a Zezi sẽn kõ wã neere
22, 23. D sã n tũ a Zezi mak-sõngã neere, d na n paama nafa bʋse?
22 Tõnd sẽn yaa ninsaalb sẽn pa zems zãngã, d pa tõe n tũ a Zezi makrã sẽn zems zãngã tɩ zems kɛpɩ ye. La d tõe n modgame n tũ a nao wã neere. Rẽ maaneg baoodame tɩ d bãng Kirist sẽn wilgd a karen-biisã sorã to-to la d tũ mak-sõng ning a sẽn kõ-dã neere.
23 D sã n yɩ Kirist togs-n-taase, d na n paama bark wʋsgo. D sẽn na n baood n na n maan Wẽnnaam daabã n yɩɩd d mensã raabã yĩnga, d vɩɩmã na n talla võor la a tall yamleoog n paase. (Zã 5:30; 6:38) D na n talla sũur kaset sẽn pa ningd-d taale. D sẽn kẽnd to-to wã lebgda sõma. A Zezi boola neb nins fãa sẽn da namsde, tɩ zɩɩb wʋsg zɩlg-bã tɩ b wa yẽ nengẽ n paam vʋʋsgo. (Matɩe 11:28-30) Tõnd sã n tũud a Zezi mak-sõngã, tõnd me tõe n kõo neb a taabã vʋʋsg ne d lagem-n-taarã. Rẽ wã yĩng bɩ d ket n kẽnd wala a Zezi sẽn kẽn to-to wã.
Y tẽrame bɩ?
• Wãn to la Kirist wilgd a karen-biisã sor rũndã-rũndã?
• Wãn to la kãsem dãmbã tõe n tũ Kirist mak-sõngã b sẽn wilgd b zu-sobendã to-to wã pʋgẽ?
• Neb a taabã sã n wa konge, wãn to la d tõe n tũ Kirist mak-sõngã?
• Wãn to la kom-bɩɩsã tõe n lʋɩɩs Rĩungã yɛl taoore?
[Zãmsgã sogsgã]
[Foto, seb-neng 15]
Kiris-neb kãsem dãmbã sõngda tõnd tɩ d tũ Kirist sor-wilgrã
[Foto rãmba, seb-neng 1,6 17]
Kom-bɩɩse, magb bʋs la y maanda, sẽn na yɩl n paam kiris-ned vɩɩm sẽn be barka?