‘Ket-y n gũusdẽ,’ tɩ bʋ-kaoorã wakat taame!
‘Ket-y n gũusdẽ,’ tɩ bʋ-kaoorã wakat taame!
“Bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.”—MATƖE 24:42.
1, 2. Wa sẽn zemse, a Zezi maka a waoongã ne bõe?
YÃMB sã n miẽ tɩ wagdr n be yãmb sakẽ wã n soosd n wat n kẽed rotã n zuuda, y na n talla manesem bʋgo? Y na n ket n gũusdame, sẽn na yɩl n kogl y nin-nongdsã la y laogã. Yãmb meng la sẽn mi tɩ wagdr pa rengd n tool-y lɛtr n wilg a waoong wakatã la! A soosdame n wa ling-yã.
2 Naoor yaka, a Zezi rɩka makr ne wagdr sẽn wat to-to wã. (Luk 10:30; Zã 10:10) A Zezi goma yɛl nins sẽn na n zĩnd saabã wakat la sẽn deng a sẽn na n wa pids bʋ-kaoorã yelle, n kõ keoog-kãngã: “Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye. Bɩ y bãng bõn-kãnga, tɩ roog soab sã n bãng wakat ninga wagdr sẽn na n wa, a na n gũume n ka sak t’a kẽ a roogẽ ye.” (Matɩe 24:42, 43) A Zezi maka a waoongã ne wagdr sẽn soosd n wa lingi.
3, 4. a) A Zezi keoogr ning a sẽn kõ a waoongã wɛɛngẽ kelgr baoodame tɩ d maan bõe? b) Rẽ wata ne sogs-bʋse?
3 A Zezi makrã zemsame, bala ned pa mi a Zezi waoongã wakat takɩ ye. Bãngr-gom-kãng pʋgẽ, a Zezi ra reng n yeelame: “Ned ba a yembr ka mi daar kãnga la wakat kãng ye, baa malɛk rãmba sẽn be [saasẽ wã], baa Wẽnnaam Biiga meng ka mi ye, yaa Ba bala.” (Matɩe 24:36) Rẽ n so t’a Zezi sagl a kɛlgdbã: “Bɩ y segle.” (Matɩe 24:44) Neb nins sẽn kelgd a Zezi keoogrã segd n segl n saame, n na n zã b mens tɩ zemse, baa a Zeova bʋ-kao wã a Zezi sẽn na n wa pidsã sẽn na n yɩ sasa ning fãa.
4 Rẽ wata ne sogs-kãsems nins sẽn pʋgdã: Yaa dũniyã neb bal la a Zezi sẽn keoogã bɩ, bɩ kiris-neb hakɩkã me segd n ket n gũusdame? Bõe yĩng tɩ ‘ket n gũusdẽ’ wã yaa yãgb bũmbu, la rẽ baoodame tɩ d maan bõe?
Keoogrã yaa ãnd dãmb yĩnga?
5. Wãn to la d mi tɩ keoogr ning sẽn yet tɩ b ket n gũusdẽ wã paka kiris-neb hakɩkã?
5 Yaa sɩd tɩ Soaalã waoong na n yɩɩ wa wagdr sẽn wat to-to wã ne dũniyã neb sẽn pa rat n kelg keoogr ning sẽn yet tɩ saabã kolga wʋsgã. (2 Pɩɛɛr 3:3-7) La yaa wãn to ne kiris-neb hakɩkã? Tʋm-tʋmd a Poll gʋlsa a tẽed-n-taasã woto: “Yãmb mens mii sɩda [t’a Zeova] daarã na n waa wa wagdr sẽn wat yʋngo.” (1 Tesalonik rãmba 5:2) Tõnd mii vẽeneg ‘t’a Zeova daarã watame,’ la pa rẽ yĩng la d pa segd n ket n gũusdẽ ye. Ges-y tɩ ra yaa a karen-biisã la a Zezi sẽn yeel tɩ: “Ninsaal Biiga wata wakat ninga yãmb sẽn ka tẽedã.” (Matɩe 24:44) Sẽn deng rẽ, a Zezi sẽn da wa n sagend a karen-biisã tɩ b bao Wẽnnaam Rĩungã wakat fãa wã, a keoog-b lame: “Bɩ y segle; tɩ bõe, Ninsaal Biiga wata wakat ninga yãmb sẽn ka tẽeda.” (Luk 12:31, 40) Rẽnd yaa vẽeneg tɩ yaa a Zezi karen-biisã yell la a ra tagsda, a sẽn wa n yeel tɩ b ket n gũusdẽ wã.
6. Bõe yĩng tɩ d segd n ‘ket n gũusdẽ’?
6 Bõe yĩng tɩ d segd n ket n ‘gũusdẽ’ la d ‘segendẽ’? A Zezi wilgame: “Rap a yiib na n bee pʋʋgẽ, tɩ b rɩk a yembr n bas a yembre. La pagb a yiib na n bee neerẽ n werda, tɩ b rɩk a yembre n bas a yembre.” (Matɩe 24:40, 41) Neb nins b sẽn “dɩk” bɩ b sẽn fãag wẽn-kɩɩsdbã zãmaan sãoong wakatã na n yɩɩ neb nins sẽn ‘segl n sa’ wã. Neb a taabã b sẽn “bas” sãoong yĩngã yaa neb sẽn kell n tall rat-m-yembr vɩɩmã. Nin-kãens tõe n yɩɩ neb nins meng sẽn da paam vẽnegr sɩdã pʋgẽ la b pa kell n gũusã.
7. D sẽn pa mi saabã sẽn na n wa wakat ning takɩ wã kɩtame tɩ d tõe n maan bõe?
7 Tõnd sẽn pa mi dũni wẽng kãngã saab daar takɩ wã kɩtame tɩ d tõe n wilg Wẽnnaam tɩ d maanda a raabã, d sẽn nong-a wã yĩnga. Wãn to? Tõe n wõnda saabã waoong kaoosdame. Kiris-neb kẽer sẽn tagsd woto basame tɩ b yẽesmã a Zeova tʋʋmdã pʋgẽ wã maage. Ad woto yaa kaeto! La tõnd sẽn dɩk d mens n kõ wã, d wilga d meng a Zeova n na n maan a raabã zãng ne d sũur fãa. Neb nins sẽn mi a Zeova wã miime tɩ f sã n bas tɩ wa kẽ n bõog tɩ f yaool n yik n dat n wilg yẽesem, pa tat a yam ye. A geta sẽn be tõnd sũurẽ wã.—1 Sãmwɛll 16:7.
8. Wãn to la d sẽn nong a Zeova wã kɩt tɩ d ket n gũusdẽ?
8 Tõnd sẽn sɩd nong Wẽnnaam a Zeova wã yĩnga, a raabã maaneg kõt-d-la sũ-noog wʋsgo. (Yɩɩl Sõamyã 40:9; Matɩe 26:39) Sẽn paase, d rat n maana a Zeova raabã wakat sẽn pa sate. Saag-kãngã ket n tara yõodo, baa d sã n segd n gũu a pidsgã tɩ kaoos n yɩɩg tõnd sẽn da tagsdã. Sẽn yɩɩd fãa, d ket n gũusdame, d sẽn gẽegd ne yãgb t’a Zeova daarã wa t’a raabã pidsã yĩnga. D sẽn tʋll ne d sũy fãa n ta Wẽnnaam yamã kɩtdame tɩ d tũud a Gomdã sagls la d lʋɩɩsd a Rĩungã taoor d vɩɩmã pʋgẽ. (Matɩe 6:33; 1 Zã 5:3) Masã, bɩ d ges ket n gũusdẽ wã sẽn segd n kɩt tɩ d rɩk sard sẽn zemse, la a kɩt tɩ d yel-manesmã zems daar fãa to-to.
Yãmb vɩɩmã tar-y lame n debd zĩ-bʋgo?
9. Bõe yĩng tɩ dũniyã neb segd n bao n wʋm tõnd wakatã yɛl võor tao-tao?
9 Rũndã-rũndã, neb wʋsg nee zu-loe-kãsems la yel-beed sẽn wat daar fãa, la tõe tɩ b sũyã pa noom ne bãmb mensã vɩɩm sẽn tar-b n debd zĩig ningã ye. La b mii dũniyã yɛl võor meng-meng bɩ? B miime tɩ d vɩɩ ‘dũniyã sɛɛb wakat’ bɩ? (Matɩe 24:3) B miime tɩ rat-m-yembrã, nen-kɛglmã tʋʋm la wẽn-kɩɩsgã meng sẽn be masã wã wilgdame tɩ d vɩɩ yaoolem dayã bɩ? (2 Tɩmote 3:1-5) B segd n bao n bãnga bõn-kãensã fãa võor tao-tao, la b ges b vɩɩmã sẽn tar-b n debd zĩig ningã.
10. Bõe la d segd n maan sẽn na yɩl n ket n gũusd wakat fãa?
10 La yaa wãn to ne tõndo? Daar fãa d maanda yam yãkr d tʋʋmã, d yĩnsã laafɩ, d zakã neb bɩ d Wẽnnaamã tũudum wɛɛngẽ. Tõnd mii Biiblã sẽn yet bũmb ningã, n modgd n na n tũ-a. Rẽnd d segd n soka d mens woto: ‘Mam basdame tɩ vɩɩmã yɩɩr kɩt tɩ m bʋdg bɩ? Mam basdame tɩ ninsaalbã bãngr la b tagsg wilg-m sor m yãkrã pʋgẽ bɩ?’ (Luk 21:34-36; Kolos rãmba 2:8) D segd n ket n wilgdame tɩ d teega a Zeova ne d sũur fãa, la tɩ d pa teeg d meng bãngr ye. (Yelbũna 3:5) D sã n maan woto, d na n sɩd gãda vɩɩm sɩd-sɩdã sẽn yaa vɩɩm sẽn pa satã Wẽnnaam dũni paalgã pʋgẽ wã.—1 Tɩmote 6:12, 19.
11-13. a) Yɛl nins sẽn zĩnd a Nowe wakatã tõe n zãmsa tõnd bõe? b) Yɛl nins sẽn zĩnd a Lot wakatã tõe n zãmsa tõnd bõe?
11 Biiblã tara makr toɛy-toɛy sẽn yaa keoogr n kõ-do, tɩ tõe n sõng-d tɩ d ket n gũusdẽ. Ges-y bũmb ning sẽn maan a Nowe wakatã. Wẽnnaam da pĩnd n kɩtame tɩ b keoog nebã. La sã n dok a Nowe ne a zakã rãmba, nebã pa kelg ye. (2 Pɩɛɛr 2:5) A Zezi yeela woto rẽ wɛɛngẽ: “Bũmb ninga sẽn zĩnd a Nowe wakata na n zĩnda Ninsaal Biiga waoong wakat me. Tɩ bõe, sẽn deng sãoong sa-kãsengã, neba ra dɩtame la b yũuda, la b peesd pagba, la b kõt b kamb sɩdba hal tɩ ta daar ning a Nowe sẽn kẽ koom-koglga pʋgẽ. La bãmb ka bãng hal tɩ sãoong sa-kãsenga wa n loog ne bãmb fãa. A na n yɩɩ woto me ne Ninsaal Biiga waoongo.” (Matɩe 24:37-39) Kiba-kãngã tõe n zãmsa tõnd bõe? Sã n mikame tɩ tõnd basame tɩ vɩɩmã yɛla, baa yaa d raasenkam tʋʋmã, kɩt tɩ d lebs tẽebã tʋʋm Wẽnnaam sẽn yet tõnd tɩ d lʋɩɩs taoorã poorẽ, d segd n tagsa d vɩɩmã sẽn yaa to-to wã zug neere.—Rom dãmba 14:17.
12 Leb-y n tags-y a Lot wakatã yelle. A Lot ne a zakã rãmb ra vɩɩ Sodom. Sodom galʋ-tẽngã ra tara arzɛka, la a ra pida ne raglem tʋʋm me. A Zeova tʋma malɛgs tɩ b tɩ sãam tẽngã. La malɛgsã yeela a Lot ne a zakã rãmb tɩ b zoe n yi Sodom la b ra wẽneg n ges b poorẽ ye. Malɛgsã sẽn sagl-bã yĩnga, b yii tẽngã. Wõnda a Lot pagã ra ket n tagsda a roogã sẽn da be Sodommã yelle, tɩ rẽ kɩt t’a kɩɩs n wẽnemd n ges poorẽ, tɩ tũ ne a yõore. (Sɩngre 19:15-26) Bãngr-gomd pʋgẽ a Zezi keooga tõnd woto: “Bɩ y tẽeg a Lot paga yelle.” Tõnd kelgda keoog-kãngã bɩ?—Luk 17:32.
13 Neb nins sẽn kelg Wẽnnaam keoogrã põsame. Yɩɩ woto ne a Nowe la a zakã rãmba, la a Lot ne a kompugli wã. (2 Pɩɛɛr 2:9) Tõnd sã n sɩd kelg keoogr ning sẽn be kiba-kãensã pʋsẽ wã neere, fãagr koe-kãngã b sẽn taasd sẽn nong-b tɩrlmã na n kenga tõnd raood n paase. Rẽ kɩtame tɩ tõnd gẽegd ne bas-m-yam tɩ Wẽnnaam na n wa pidsa a kãabg ning sẽn yaa wa ne ‘yĩngr paalg la tẽn-paalg tɩrlem sẽn na n zĩnd b pʋsẽ’ wã.—2 Pɩɛɛr 3:13.
‘Bʋʋdã kaoob wakat taame’
14, 15. a) Bõe me n maand bʋ-kaoorã “wakat” pʋgẽ? b) ‘Zoe Wẽnnaam la waoog-a’ wã baoodame tɩ d maan bõe?
14 D sẽn ket n gũusdẽ wã, bõe la d tõe n gẽege? Wilgr sebrã gomda yɛl sẽn pʋgd taab tɩ pidsd Wẽnnaam daabã yelle. Yaa tɩlae tɩ d tũ koe-kãngã saglgã, d sã n dat n segl n sa. Bãngr-gomdã bilgda yɛl nins sẽn da na n zĩnd ‘Zusoaba raarã’ sẽn sɩnge, b sẽn wa n kõ Kirist naam saasẽ yʋʋmd 1914. (Wilgri 1:10) Wilgr sebrã togsda tõnd tɩ malɛk n tar “koe-noog sẽn ka sɛt n na n moon.” Malɛkã zẽka a koɛɛg n yeel woto: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame.” (Wilgri 14:6, 7) Bʋʋda kaoob “wakat” yaa wakat koɛɛga. Sasa ning b sẽn togsd bʋ-kao wã la b pidsgã b sẽn bilg bãngr-gom-kãngã pʋgẽ wã maanda bʋ-kaoorã “wakat” pʋgẽ. Tõnd vɩɩ wakat kãng pʋgẽ masã.
15 Masã, nand tɩ bʋ-kaoorã baase, b sagenda tõnd woto: “Bɩ y zoe Wẽnnaam la y waoog bãmba.” Rẽ baoodame tɩ d maan bõe? Wẽn-zoeerã segd n kɩtame tɩ d lak d mens ne wẽnga. (Yelbũna 8:13) Tõnd sã n waoogd Wẽnnaam, d na n kelg-a-la ne waoogr wʋsgo. D pa na n bas tɩ yɛl a taab yãmb d sẽkã n kɩt tɩ d pa karemd a Gomdã sẽn yaa Biiblã wakat fãa ye. D pa na n deem ne saglg ning sẽn yet tɩ d kẽng kiris-neb tigissẽ wã ye. (Hebre dãmba 10:24, 25) D na n nonga zu-noog ning sẽn yaa moon Wẽnnaam Rĩungã a sẽn bobl Mesi wã koe-noogã ne yẽesmã. D na n teega a Zeova wakat buud fãa, la ne d sũur fãa. (Yɩɩl Sõamyã 62:9) D sẽn sak n deeg tɩ yaa a Zeova n yaa ãndũniyã gill Naab sẽn ka to wã yĩnga, d waoogd-a lame, n sakd-a ne nonglem a sẽn yaa d vɩɩmã Soaalã. Yãmb sɩd zoeta Wẽnnaam n waoogd-a woto bɩ?
16. Bõe yĩng tɩ d tõe n yeel tɩ bʋ-kaoor ning b sẽn togs Babilon Kãsengã zug Wilgr 14:8 pʋgẽ wã zoe n pidsdame?
16 Wilgr sak 14 wilgda yɛl a taab sẽn na n zĩnd bʋ-kaoorã wakate. Yaa Babilon Kãsengã sẽn makd dũni gill ziri tũudmã yell la a gomd pipi, n yetẽ: “A to sẽn yaa malɛk a yiib soaba pʋgla yẽnda n yeele: ‘A lʋɩɩme! a lʋɩɩme! Babilon kãsenga lʋɩɩme!’” (Wilgri 14:8) N-ye, Wẽnnaam nifẽ, Babilon Kãsengã zoe n lʋɩɩme. Yʋʋmd 1919, a Zeova sõgen dãmbã sẽn paam vʋʋsem sõngã zaeebã paama b mens ne Babilon zãmsgã la minund nins sẽn soog buud la tẽns toɛy-toɛyã sẽn na maan yʋʋm tusa wã. (Wilgri 17:1, 15) Rẽ tɛka, b ra tõeeme n kɩt tɩ sɩd balengã kẽng taoore. Rẽ tɛka, yaa Wẽnnaam Rĩungã koe-noog la b moond dũniyã gill zugu.—Matɩe 24:14.
17. Yi Babilon Kãsengã pʋgẽ baooda bõe maanego?
17 La Wẽnnaam bʋʋdã Babilon Kãsengã zug pa tek woto ye. A sãoong zãng-zãngã na n waa ka la bilfu. (Wilgri 18:21) Biiblã bee bʋʋm a sẽn sagend nebã sẽn be zĩig ning fãa tɩ: “Bɩ y yi yẽ [Babilon Kãsengã] pʋgẽ n da lagem ne yẽ yel-wẽnã.” (Wilgri 18:4, 5) Wãn to la d yit Babilon Kãsengã pʋgẽ? Rẽ pa d sẽn na n bas lagem-n-taar maaneg ne ziri tũudmã bal ye. Babilon zãmsgã tara pãng zãma wã kibs rãmb la b minung wʋsg zutu, la dũniyã sẽn sakd yoobã, ne reem sẽn tik tɩt maanegã zug la yɛl a taab wʋsg zutu. Sẽn na yɩl n ket n gũusdẽ, tara yõod wʋsg tɩ d wilg ne d tʋʋmã la d sũurã tʋlsem tɩ d sɩd welga d mens ne Babilon Kãsengã bũmb fãa pʋgẽ.
18. Sã n yaa ne bilgr ning sẽn be Wilgri 14:9, 10 pʋgẽ wã, bõe la kiris-neb nins sẽn tar yamã gũusd n pa maandẽ?
18 Wilgri 14:9, 10 pʋgẽ, ‘bʋ-kaoorã wakat’ neng a to la b bilg-yã. Malɛk a to yeela woto: “Ned sã n waoog [we-rũngã] walla yẽ bõn-naandgã, la a sã n deeg a gʋlsem a dĩirẽ walla a nugẽ, yẽ soab me na n yũu Wẽnnaam sũ-puugra rãam sẽn ka pulã.” Bõe yĩnga? ‘We-rũngã ne a bõn-naandgã’ makda ninsaalbã naam sẽn pa sakd a Zeova naam sẽn ka to wã. Kiris-neb sẽn tar yamã gũusdame n pa basdẽ tɩ neb nins sẽn pa sakd sɩd Wẽnnaam a Zeova naam sẽn ka to wã kɩt tɩ b maan wa bãmba, n lebg b yembs ye. Kiris-nebã miime tɩ Wẽnnaam Rĩungã zoe n lugla saasẽ, t’a na n sãama ninsaalbã naam fãa, la a pa wakat sẽn pa sate.—Daniɛll 2:44.
Ra yĩm-y tɩ saabã kolga wʋsg ye!
19, 20. a) D sẽn pẽnegd saabã raarã, d tõe n kɩsa sɩd t’a Sʋɩtãan na n maka bõe maanego? b) Bõe la d segd n yãk yam n maan wakat fãa?
19 Tõnd sã n pẽnegd saabã raare, weoogrã la yɛl nins sẽn wat ne kʋɩɩbgã na n talla paasgo. Tõnd sã n ket n be dũni wẽng kãngã pʋgẽ fãa, la tõnd sẽn ket n yaa pãn-komsem dãmbã yĩnga, yɛl wʋsg n namsd tõndo. Wala makre, bãase, kʋʋlem, d nin-nongr kaalem, neb sẽn sãamd d sũuri, la sũ-sãams d sẽn tare, d sẽn modgd n moond Wẽnnaam Gomdã tɩ neb wʋsg pa sakdẽ wã, n paas yɛl a taaba. Ra yĩm-y t’a Sʋɩtãan sẽn nong n yɩɩd yaa a tũnug ne yɛl nins sẽn namsd tõndã n kɩt tɩ d koms raood n bas koe-noogã moonego, bɩ n bas n pa le tũud Wẽnnaam noyã ye. (Efɛɛz rãmba 6:11-13) Masã pa wakat ning d sẽn segd n yĩm tɩ saabã kolga wʋsgã ye.
20 A Zezi ra miime tɩ yɛl wʋsg n na n wa kɩt tɩ d wa rat n bas Wẽnnaam tũubu, rẽ n so t’a sagl tõnd woto: “Woto yĩnga, bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.” (Matɩe 24:42) Dẽnd, bɩ d ra yĩm wakat ning tõnd sẽn vɩyã pʋgẽ võor abada. Bɩ d gũus ne a Sʋɩtãan sɩlmã sẽn tõe n kɩt tɩ d maag sɩdã pʋgẽ bɩ n bas-a wã. Bɩ d yãk yam n ket n moond Wẽnnaam Rĩungã koe-noog ne yẽesem sẽn paasd wakat fãa. D ning d yamẽ tɩ saabã wakat kolga wʋsgo, la d kell n tũ a Zezi keoog-kãngã: “Bɩ yãmb gũusi.” D sã n maan woto, d na n waooga a Zeova la d na n zĩnda neb nins sẽn na n paam a bark sẽn ka saabã sʋka.
Y na n leokame tɩ bõe?
• Wãn to la d mi t’a Zezi sẽn keoog tɩ d ‘ket n gũusdẽ’ wã paka kiris-neb hakɩkã?
• Mak-bʋs sẽn yaa keoogr n be Biiblã pʋgẽ tɩ tõe n sõng tõnd tɩ d ‘ket n gũusdẽ’?
• Bʋ-kaoorã wakat yaa wakat bʋgo, la bõe la b sagend tõnd tɩ d maane, nand t’a baase?
[Zãmsgã sogsgã]
[Note, seb-neng 23]
Zãms-kãngã tika seb-bil ning sẽn yaa Ket-y n gũusdẽ! wã yiisg b sẽn wilg rasem a tãab tigis-kãsems nins d sẽn maan dũniyã gill zug yʋʋmd 2004/05 wã zugu.
[Foto, seb-neng 26]
Babilon Kãsengã sãoong kolgame