B taasa muk koe-noogã

“B ZÃMSD-Y-LA Wẽnd sore!” Yaa woto la tʋʋm zĩig taoor soab a ye togs-yã. A tʋmda zak-kẽeng b sẽn me zĩig sẽn be Navalkarnero sẽn be Madrid Ɛspayn tẽngẽ wã, n deegd nin-kẽemb la pʋg-yãanse, n get b yelle. Yaa a Zeova Kaset rãmbã sẽn wa n kaag a tʋʋmã zĩigã n bas n loog poor la a togs goam nins sẽn be yĩngrã. Yaa bõe n kɩt t’a yeel woto?

Neb wʋsg sẽn be zĩ-kãng b sẽn boond tɩ Rosas del Kamyo wã yaa mugsi. La a Zeova Kaset rãmbã modgame n zãms Ɛspayn mugsã goamã sẽn na yɩl n tõog n gom ne be mugsã. Zĩigã taoor soab pẽga Kaset rãmbã, b sẽn dɩkd b sẽkã n zãmsd nebã Biiblã zaalmã yĩnga. A yãa koe-noogã sẽn toeem nebã tɩ b lebg sõma n paasã. La neb nins sẽn be be wã, sẽn yɩɩd fãa neb nins sẽn pa wʋmd sõma bɩ nin sẽn pa ne sõma wã sũy noomã wʋsg me ne a Zeova Kaset rãmbã sẽn wat n kaagd-bã.

Ned a ye n be be, n yaa muk la a le yaa zoanga, t’a yʋʋr boondẽ t’a Elozio. La a zãmsda Biiblã ne a Zeova Kaset rãmbã masã. Daar a yembre, b sẽn da wa n zãmsd Biiblã ne a Elozio, nin-kẽem a yembr n wa n kõ Kaset soabã sebr zĩ-kãng nebã sẽn gʋls sẽn na yɩl n wilg b mi-beoog ne kaset rãmbã. Sebrã gom-zug yetame tɩ: “Kaset soab sẽn dat n yɛɛlga.” B gʋlsa sebra pʋg me tɩ: “Kaset rãmbã vɩɩm yaa sõma, b zãada b mens sõma vɩɩmã pʋgẽ, sẽn paase, a Zeova kõt-b-la yam sẽn kɩtd tɩ b tar sũ-noogo. Yaa b sẽn kɩs sɩd ne a Zeova wã n kɩt tɩ b kaagd nebã b zagsẽ wã n yɩlemdẽ wã.”

Dũniyã gill zugu, a Zeova Kaset rãmb wʋsg me kɩsa sɩd ne-a woto. Yaa rẽ n kɩt tɩ b zãms bãmb tẽngã mugsã goama. Woto, b tõe n taasa mugsã Biiblã koɛɛg sẽn kõt saagr la sẽn kengd raoodã.