Armagedõ yaa dũni paalg sɩngre

GOM-BIIG ning sẽn yaa Armagedõ wã yaa hebre gom-biig sẽn dat n yeel tɩ “Megido tãnga.” Yaa Wilgr 16:16 pʋgẽ wã la d yãt-a. Be b yetame: “Bãmb tigma bãmb zĩig sẽn boond ne hebre goama tɩ Armagedõ.” Yaa ãnd dãmb la b sẽn tigimd Armagedõ wã, la bõe yĩnga? Wilgri 16:14 yeelame tɩ yaa “dũniyã tɛk fãa nanambs” la b tigisd tɩ b na n wa “Wẽnnaam Sẽn-tõe-fãa da-kãsengã zabre.” Gom-kãensã wata ne sogsg a taab wala bãmbã: Yɛ la “nanambsã” na n zabe? B zabda bõe poorẽ, la yaa ne ãnda la b zabda? B na n talla zab-teed sẽn yaa wẽns tɩ loog nug n zab wala neb wʋsg sẽn tẽedã bɩ? Armagedõ zabrã raare, neb n na n põs bɩ? Bɩ d bas tɩ Biiblã leok sogs-kãensã n kõ-do.

Gom-biig ning sẽn yaa Armagedõ wã sẽn dat n yeel tɩ “Megido tãngã,” wilgdame tɩ zabrã na n zĩnda Israɛll soolmã tãng a ye zug bɩ? Ayo. Bala tãng pa be pĩnd wẽndẽ Megido wã sẽn da be zĩig ningã ye. Yaa kunkubr zãntlem sẽn zems metr 20 bala. Sẽn paase, Megido yalmã pa tõe n deeg “dũniyã rĩm dãmba la b sodaasã” fãa ye. (Wilgri 19:19) Baasg zãnga, Israɛll kʋdemdã kibay wilgdame tɩ Megido ra yɩɩ zab-bɛd zĩiga. Dẽnd Armagedõ wã makda zab-kãseng b sẽn na n zabe, tɩ sẽn na n tõog-a wã na n tõog ne tõogr sẽn yaa kãsenga.—Ges-y seb-neng a 5 zĩ-gũbrã: “Megido yaa makr sẽn zemse.”

Wilgri 16:14 sẽn yeel tɩ “dũniyã tɛk fãa nanambs” tigma taab n na n tɩ zab “Wẽnnaam Sẽn-tõe-fãa da-kãsengã zabrã” yĩnga, Armagedõ pa tõe n yɩ dũniyã rĩm dãmb ne taab zabr ye. A Zeremi yeela a bãngr-gomdã pʋgẽ tɩ ‘neb nins a Zeova sẽn kʋ wã’ na n yadga “dũniyã kɩreng a yembr n tɩ ta a kɩreng a to.” (Zeremi 25:33) Dẽnd Armagedõ pa ninsaalb ne taab zabr sẽn na n zĩnd Israɛll ye. Yaa a Zeova zabr sẽn na n maan dũniyã gill zugu.

Wilgri 16:16 yeelame tɩ Armagedõ yaa “zĩiga.” La Biiblã pʋgẽ, b tõe n gomda zĩig yell tɩ yaool n pa zĩig sɩd-sɩd ye. Ka wã zĩigã bilgda yelle. A yaa makr sẽn wilgd tɩ dũniyã tẽns fãa na n naaga taab n zab ne a Zeova. (Wilgri 12:6, 14) Armagedõ, tẽnsã fãa na n naaga taab n zab ne “Rĩm dãmb Dĩm la zu-soben dãmb Zusoab” a Zezi Kirist saasẽ sodaasã.—Wilgri 19:14, 16.

Neb kẽer yetame tɩ Armagedõ yaa zab-teed sẽn yaa wẽns wʋsg n na n sãam neb kʋʋngo, bɩ tɩ yaa bũmb n na n yi yĩngr n wa fão tẽngã t’a sãame. Yaa woto bɩ? Rẽ yĩnga nonglem Wẽnnaam na sak n sãam ninsaalbã la dũniyã a sẽn naan n kõ-bã woto sɩda? Ayo. A meng yeela vẽeneg t’a pa naan dũniyã “t’a lebg zaalem ye,” “t’a naan-a lame tɩ neb zĩnd a zugu.” (Ezai 45:18; Yɩɩl Sõamyã 96:10.) Armagedõ, a Zeova pa na n sãam tẽngã ye. A na n sãama “neb nins sẽn sãamd dũniyã.”—Wilgri 11:18.

Armagedõ na n yɩɩ rabʋre?

Sẽn na n maan yʋʋm kobs masã, nebã sẽn wẽed no-koɛɛm n dat n bãng yaa Armagedõ sẽn na n yɩ daar ningã. Wilgr  sebrã la Biiblã sɛb a taab vaeesg tõe n sõnga tõnd tɩ d bãng zab-kãngã sẽn yaa kãsengã sẽn na n yɩ wakat ninga. Sẽn zems ne Wilgr 16:15 sẽn yetã, Armagedõ na n yɩɩ a Zezi waoongã wa wagdrã sasa. A leb n dɩka bilg-kãng n wilg a sẽn wat n na n wa kao dũniyã bʋʋdã.—Matɩe 24:43, 44; 1 Tesalonik rãmba 5:2.

Wa Biiblã bãngr-goamã pidsg sẽn wilgã, sẽn sɩng ne yʋʋmd 1914 tɛkã n tar n watẽ, d vɩya dũni kãngã yaoolem daya. * Yaoolem dayã na n baasa ne bũmb ning a Zezi sẽn bool tɩ “to-kãsengã.” Biiblã pa wilgd a sẽn na n kaoos to-to ye, la a wilgame t’a toogã buud nan pa zĩnd dũniyã zug ye. To-kãseng kãng na n baasa ne Armagedõ.—Matɩe 24:21, 29.

Armagedõ sẽn yaa “Wẽnnaam Sẽn-tõe-fãa da-kãsenga zabrã,” ãdem-biisã pa tõe n viig-a ye. A Zeova yãka wakat takɩ n na n yik zab-kãngã. ‘A pa na n vaal ye.’—Habakuk 2:3.

Tɩrlem Wẽnnaam n zabd tɩrlem zabre

Bõe yĩng tɩ Wẽnnaam na n zab zab-kãseng a woto? Yaa a tɩrlmã yĩng n kɩt t’a  na n wa ne Armagedõ wã. Biiblã yeelame t’a ‘Zeova nonga tɩrlem.’ (Yɩɩl Sõamyã 37:28) A Zeova yãa tʋʋm-kɛg nins fãa sẽn sɩng n maand dũniyã zugã, la yaa vẽeneg tɩ rẽ sãama a sũuri. Rẽ n so t’a na n kɩt t’a Biriblã zab tɩrlem zabr n sãam dũni kãngã sẽn yaa wẽngã fasɩ.

Yaa a Zeova a ye bal n tõe n zab tɩrlem hakɩk zabre, n sãam neb nins sẽn segd ne sãoongã bala, la a kogl nin-tɩrsã, baa b sẽn beẽ zĩig ning fãa sasa kãngã. (Matɩe 24:40, 41; Wilgri 7:9, 10, 13, 14) Sẽn yaa a Zeova n naan dũniyã, yẽ a ye bal n tar sor n na n kɩt tɩ ãdem-biisã fãa sak a naamã.—Wilgri 4:11.

Bõe la a Zeova na n tall n sãam a bɛɛbã? D pa mi ye. D sẽn mi bal yaa t’a tara a sẽn na n tũnug ne bũmb ning n menes dũni-kãngã nin-wẽnsã fasɩ. (Zoob 38:22, 23; Sofoni 1:15-18) La Wẽnnaam tẽng-zug balemdbã baa a ye pa na n naag n zab zab-kãngã ye. Wilgr 19 wã wilgdame tɩ yaa saasẽ tãb-biisã bal ne a Zezi Kirist n na n zab zabrã. A Zeova sõgen dãmb nins sẽn be tẽng zugã baa a ye pa na n kẽ zabrẽ wã ye.—2 Kibaya 20:15, 17.

Wẽnnaam sẽn yaa yam-kãseng soabã keoogda nebã sõma

Neb n na n põs bɩ? N-ye, sẽn dat-a fãa tõe n põsa Armagedõ. Tʋm-tʋmd a Pɩɛɛr yeelame: “Zusoaba . . . ka rat tɩ ned ba a ye sãam ye, bãmb maanda sũ-mar ne yãmba n dat tɩ yãmb fãa yam tek tɩ y kos sugri.” (2 Pɩɛɛr 3:9) Tʋm-tʋmd a Poll me yeelame tɩ Wẽnnaam “datame tɩ neba fãa paam fãagre la b bãng sẽn yaa sɩda.”—1 Tɩmote 2:4.

Sẽn na yɩl tɩ woto tõog n yɩ, a Zeova kɩtame tɩ b moond Rĩungã koe-noog dũniyã gill zug buud goam kobs pʋgẽ. Zĩig fãa, nebã tõeyã masã tɛk n segl b mens n wa põs la b paam fãagre. (Matɩe 24:14; Yɩɩl Sõamyã 37:34; Filip rãmba 2:12) Neb nins sẽn sakd koe-noogã tõe n põsa Armagedõ daarã, la b paam n vɩɩmd wakat sẽn kõn sa tẽng zug arzãnã pʋgẽ. (Ezekɩɛll 18:23, 32; Sofoni 2:3; Rom dãmba 10:13) Wẽnnaam sẽn yaa nonglem segd n sɩd maana boto bal kɛpɩ.—1 Zã 4:8.

Nonglem Wẽnnaam segd n zabame bɩ?

Wẽnnaam sẽn yaa nonglem n yaool n na n sãam ãdem-biis wʋsgã, kẽer pa wʋmd a võor ye. A makr yaa wala yal sẽn na n waoog ned roogẽ. Rẽ yĩnga y pa ne tɩ sẽn na yɩl n kogl zakã neb laafɩ, zemsame tɩ b kʋ yalã fãa sɩda?

Yaa a Zeova me sẽn nong ãdem-biisã wʋsgã yĩng n kɩt t’a na n zab Armagedõ zabrã. Wẽnnaam datame tɩ tẽngã lebg arzãna, la a kɩt tɩ ãdem-bɩɩsã ye zems zãnga, la tɩ ned ra leb n “yɛɛs-b ye.” (Miise 4:3, 4; Wilgri 21:4) La b na n maana neb nins sẽn kɩt tɩ b taabã pa tõe n vɩɩmd laafɩ la bãan pʋgẽ wã bõe? Nin-tɩrsã neer yĩnga, Wẽnnaam na n sãama nin-wẽns nins fãa sẽn pa rat n toeemã.—2 Tesalonik rãmba 1:8, 9; Wilgri 21:8.

Rũndã-rũndã, naoor wʋsgo, yaa ninsaalbã sẽn yaa yel-wẽn-maandbã naam la tẽng fãa sẽn baood a meng nafr balã n wat ne zabã la kʋ-taabã. (Koɛɛg Soaba 8:9) B fãa sẽn dat n paas b naamã, b kɩɩsda Wẽnnaam Rĩungã a sẽn luglã. Baa fʋɩ pa wilgd tɩ goosneema rãmbã na n sak n basa b naamã n kõ Wẽnnaam ne Kiristã ye. (Yɩɩl Sõamyã 2:1-9) Woto yĩnga, b segd n menemame n bas weer t’a Zeova Rĩungã a sẽn kõ Kiristã rɩ a tɩrlem naamã. (Daniɛll 2:44) Armagedõ zabrã na n welga yɛlã vugr wakat fãa yĩnga, n kɩt tɩ b bãng sẽn segd-a n yɩ dũniyã fãa naab n soog ãdem-biisã wakat fãa wã.

Yaa ãdem-biisã neer yĩng la a Zeova sẽn na n zab Armagedõ zabrã. Dũniyã yɛl sẽn tar  zẽnebã, yaa Wẽnnaam naamã sẽn zems zãngã bal n tõe n pids ãdem-biisã raab fãa. Yẽ Rĩungã bal n tõe n wa ne laafɩ la sũ-noog hakɩka. Wẽnnaam sã n pa kẽes a toog lae-lae, yɛla na n wa yɩɩ wãn to dũniyã zugu? Kisg-taabã, nen-kɛglmã la zabã kõn kell n nams nebã wala sẽn yɩ to-to ninsaalbã sẽn sɩng n dɩt naamã tɛkã sɩda? Armagedõ zabrã sɩd yaa bõn-sõng sẽn na n naf-do!—Luk 18:7, 8; 2 Pɩɛɛr 3:13.

Zabr ning sẽn na n kɩt tɩ zabã fãa sa wã

Armagedõ leb n na n maana bũmb zabr a to sẽn zɩ n maane. A na n kɩtame tɩ zaba fãa sa. Rẽ yĩnga, d fãa pa gũud wakat ning zabr sẽn pa na n ye zĩndã ne yãgb sɩda? Ãdem-biisã maoome n na n kɩt tɩ zabã sa, la b pa tõog ye. Rẽ wilgda vẽeneg t’a Zeremi goamã yaa sɩda. A yeelame: “Zusoaba, mam miime tɩ ninsaal ka tar noor ne a vɩɩm sẽn na n yɩ bũmb ninga ye. Ninsaal ka so a meng vɩɩm yell ye.” (Zeremi 10:23) A Zeova sẽn na n maan bũmb ninsã wɛɛngẽ, Biiblã yeelame: “Bãmb kɩtdame tɩ zabr sɛ hal dũniyã tɛk fãa. Bãmb kaooda tãbdo la b kʋʋsda kãna la b yõogda saar dãmb bugum.”—Yɩɩl Sõamyã 46: 9, 10.

Tẽns toɛy-toɛyã sã n wa rɩk b zab-teed nins sẽn yaa wẽns wʋsgã n na n zab taab tɩ sãam dũniyã, tẽngã Naand na n yik n zaba ne-ba. Yaa rẽ la Biiblã sẽn boond tɩ Armagedõ wã. (Wilgri 11:18) Zab-kãngã na n pidsa bũmb ning wẽn-zoɛtbã fãa sẽn da sɩng n gũud hal pĩnd wẽndẽ n tãag masã wã. A na n wilgame tɩ Wẽnnaam a Zeova sẽn yaa tẽngã Soaadã bal n segd n dɩ naam a bõn-naandsã fãa zutu.

Rẽnd neb nins sẽn nong tɩrlmã pa segd n zoe Armagedõ rabeem ye. A pʋd n kɩtame tɩ b tõe n tẽ manegre. Armagedõ zabrã na n kɩtame tɩ tʋʋm-wẽnsã la wẽnemã fãa sa tẽngã zugu, tɩ dũni-paalg sẽn yaa tɩrgã Wẽnnaam Mesi Rĩungã sẽn na n dɩ naam a zugã sɩnge. (Ezai 11: 4, 5) Armagedõ pa yel-beed sẽn na n sãam dũniyã ye. A yaa dũni-paalg sẽn na n tall bark sɩngr n kõ nin-tɩrsã sẽn na n vɩɩmd tẽngã sẽn na n lebg arzãnã zug wakat sẽn-kõn-sa wã.—Yɩɩl Sõamyã 37:29.

[Tẽngr note]

[Zĩ-gũbri, seb-​neng a 5]

MEGIDO YAA MAKR SẼN ZEMSE

Pĩnd wẽndẽ Megido wã sẽn da be zĩig ningã ra yaa so-tiisi. A ra bee Israɛll nug-goabga, Zizreɛll bãoogã sẽn sakd koodã wĩndg sẽn lʋɩtẽ. Ra yaa tɩlae ne tẽns toɛy-toɛy lɛɛbdb la b sodaas tɩ b tũ soay sẽn pɩʋʋgd be. Woto kɩtame tɩ Megido wa lebg zab-bɛd zĩiga. Porfesɛɛr Graham Davies gʋlsa a sebr a ye (Villes du monde biblique : Megiddo [ãngil.]) pʋgẽ woto: “Megido kẽngr da yaa nana ne lɛɛbdb la sãamb sẽn yit zĩig fãa. La zabr wakate, tẽn-kãngã ra tõe n gɩda a soayã nana-nana tɩ ned ba ye ra tõog n pɩʋʋg be ye. Dẽnd pa lingr tɩ b ra kogend-a neere, tẽns wʋsg sẽn da rat n deeg-a wã yĩng ye.”

Megido yellã sɩngr taa sẽn yɩɩd yʋʋm 3500 masã, Ezipt rĩm a Tutmos tãab-n-soab sẽn zab ne Kanaã rĩm dãmbã beenẽ n tõog-bã. A kell n yɩɩ zab zĩig n tãag yʋʋmd 1918 wã, yʋʋmd ning Gãrãnd Bertayn zenerall a Edmund Allenby ne a sodaasã sẽn zab ne Turki rãmbã be n tõog-ba. Yɩɩ Megido la Wẽnnaam sẽn sõng Bʋkaood a Barak t’a tõog Kanaã rĩm a Zabẽ ne tõogr sẽn yɩ kãsengã. (Bʋkaoodba 4:12-24; 5:19, 20) Yaa sẽn pẽ ne be la Bʋkaood a Zedeõ sẽn tõog Madiã nebã. (Bʋkaoodba 7:1-22) Leb n yaa be la b kʋ rĩm dãmb a Akazia ne a Zozɩase.—2 Rĩm dãmba 9:27; 23:29, 30.

Dẽnd b sẽn mak Armagedõ ne zĩ-kãngã wã sɩd zemsame, bala a yɩɩ zab-bɛd zĩiga. Woto yĩnga, Megido yaa makr sẽn zems sẽn bilgd tɩ Wẽnnaam na n tõoga a bɛɛbã fasɩ.

[Fotã sẽn yitẽ]

Pictorial Archive (Near Eastern History) Est.

[Foto rãmba, seb-​neng a 7]

Dũniyã gill zugu, b keoogda nebã la b sõngd-b sẽn na yɩl tɩ b wa põs Armagedõ daarã

[Foto, seb-​neng a 7]

Armagedõ na n yɩɩ dũni paalg sẽn be bark sɩngre