D tũ Wẽnnaam n paam barka
D tũ Wẽnnaam n paam barka
“Bãmb sã n bʋd sobgo, b na n wʋka sɩlman-waafo.”—OZE 8:7.
1. Wãn to la d tõe n tũ a Zeova?
D SÃ N togd sore, n miẽ tɩ d tõe n sega yelle, n paam tɩ so-mit na n lʋɩ taoor n wilg-d sore, d na n toga d sorã ne bãan n yɩɩge. D sẽn na n kẽn ne so-mit n são d sẽn na n kẽn d yembre. Mak-kãngã wilgdame tɩ vɩɩmã nens a taab pʋsẽ me, tõnd rata sor-wilgri. A Zeova rat n wilga tõnd sor dũni wẽng kãngã sẽn pid ne yɛlã pʋgẽ. D sẽn na n kẽn ne a Zeova n são d sẽn na n bao n kẽn d yembre. Wãn to la d tõe n tũ Wẽnnaam? Yaa d sẽn na n sak sor-wilgr ning a sẽn kõt a Sebrã pʋgẽ wã.
2. Yaa bõe yell la d na n gom sõs-kãngã pʋgẽ?
2 Sõsg ning sẽn loogã pʋgẽ, d sõsa makr sẽn be Oze sak a 1 n tɩ ta 5 wã pʋgẽ zugu. Wala tõnd sẽn yã wã, yel-kãngã tara zãmsg sẽn tõe n sõng tõnd tɩ d tũ Wẽnnaam. Masã, d na n sõsa sebrã sak a 6 n tãag a 9 wã zugu. Bɩ d sɩng ne sebrã sags a naas kãensã kʋmsgo, tɩ na n sõng-d-la wʋsgo.
Sagsã kʋmsgo
3. Bõe yell la a Oze sebrã sak a 6 n tɩ ta a 9 gomd koɛɛg-koɛɛga?
3 Pipi, a Zeova tʋma a Oze t’a taas Israɛll buud piigã soolem a bãngr-gomdã. Bu-kãng sẽn yaa kãseng tɩ b boond-a me tɩ Efrayim basa Wẽnnaam. Oze sebrã sak a 6 n tõk a 9 wilgdame tɩ nin-buiidã yɩɩ tõatba, b sẽn sãam a Zeova kaoolã la b ra maand wẽngã yĩnga. (Oze 6:7) B zãgsa a Zeova n wẽneg n maan kaool dãmb ne bu-zẽmsã. B sẽn da bʋt wẽngã yĩnga, b ra kẽebda wẽnga. Rat n yeelame bal tɩ b bʋ-kaoorã ra kolga wʋsgo. La a Oze bãngr-gomdã leb n tara koɛɛg sẽn kengd sũuri. B yeela nebã tɩ b gãneg b yam t’a Zeova ra tõe n leb n zoea b nimbãaneg n sak-ba, b sã n da tek yam n kos sugr ne b sũur fãa.
4. Zãms-bʋs sẽn tar yõod vɩɩmã pʋgẽ la d na n yã a Oze bãngr-gomdã pʋga?
4 A Oze bãngr-gomdã sak a 6 n tɩ tõk a 9 wã vaeesg tõe n sõnga tõnd tɩ d paam sor-wilgr sõma sẽn na yɩl n tũ Wẽnnaam n paase. D ges zãmsg a 4 sẽn tar yõod vɩɩmã pʋgẽ. 1) Tek-yam-n-kos-sugr hakɩk yaa bũmb sẽn yaa vẽeneg tõnd tʋʋmã pʋgẽ, pa d no-goamẽ bal ye. 2) Maand yen-yen pa noom Wẽnnaam ye. 3) A Zeova balemdbã sã n bas-a, a sũur sãamdame, la 4) d sã n dat n kẽeb bi-sõma, rẽnda d bʋd sẽn yaa sõma.
Tek-yam-n-kos-sugr hakɩkã sẽn pukd to-to
5. Oze 6:1-3 zãmsda tõnd bõe?
5 A Oze bãngr-gomdã zãmsda tõnd bũmb wʋsg tek-yam-kos-sugrã la nimbãan-zoeerã zugu. D karemda woto Oze 6:1-3 pʋgẽ: “Wa-y tɩ d lebg n leb Zusoaba nengẽ tɩ yaa bãmb n da rũm tõndo, la yaa bãmb n na n maag-do. Yaa bãmb n pogl tõndo, la yaa bãmb n na n tɩp-do. Sã n yɩ rasem a yiibu, bãmb na n vʋʋga tõndo. Bãmb na n zẽka tõnd tɩ d zĩnd b nengẽ. Bɩ b bãng Zusoabã, bãmb wata wa zĩ-yẽegre, b ka na n vaal ye. Bãmb na n waa wa saag tõnd yĩnga, la b na n waa wa sigr saag sẽn madgd tẽnga.”
6-8. Bõe n kɩt tɩ Israɛll tek-yam-n-kos-sugrã ra pa zemse?
6 Yaa ãnd dãmb la sẽn gomd verse kãensã pʋsẽ wã? Neb kẽer yetame tɩ yaa Israɛll nin-kɩɩsdbã. B yetame me tɩ nin-kɩɩsdb kãensã maandame bal wa b teka yam n kos sugri, n tagsdẽ tɩ b na n paamame tɩ Wẽnnaam zoe b nimbãanega. Neb a taab yetame tɩ yaa no-rɛɛs a Oze n da gomd verse kãensã pʋsẽ, n kot nin-buiidã tɩ b lebg n wa a Zeova nengẽ. Sẽn yaa ned ning fãa goam me, sokr sẽn tar pãng n be: Rẽ yĩnga Israɛll buud piigã neb lebg n waa a Zeova nengẽ, n sɩd pelg b pʋg n tek yam n kos sugr bɩ? Sok-kãngã leokr yaa ayo. A Zeova tũnuga ne a Oze n yeele: “Efrayim neba, mam na n maana yãmb bõe? Zida neba, mam na n maana yãmb bõe? Yãmb nonglma yaa wa yibeoog wulgu, la a wa meenem sẽn loogd tao-tao.” (Oze 6:4) Ad woto sɩd yaa kaset sẽn wilgd tɩ Wẽnnaam nin-buiidã tẽeb ra pa lebd be ye! Nonglem hakɩk menema wa yibeoog meenem sẽn mesg wĩndg pukr wakate. Baa ne nin-buiidã sẽn maan wa b teka yam n kos sugrã, a Zeova pa yã bũmb sẽn da tõe n kɩt t’a zoe b nimbãaneg ye. La yaa bõe yĩng tɩ ra yaa woto?
7 Israɛll sugrã kosg ra pa yɩ ne a sũur fãa ye. Oze 7:14 wilgda bũmb ning sẽn kɩt t’a Zeova sũurã pa yɩ noog ne a nin-buiidã woto: “Bãmb sã n gãe b rotẽ n yãbda, bãmb ka baood maam ne b sũyã fãa ye.” Verse 16 paasda woto: “Bãmb basa maam n get Baal,” sẽn dat n yeel tɩ “baleng buud sẽn pa são ye.” Nin-buiidã ra pa rat n leb n balem a Zeova yɛs ye. B sẽn yaool n da balemd yẽ wã n são b sẽn da balemd wẽnnaam dãmb a taabã. B ra pa rat n sak n toeem wa sẽn segdã, sẽn na yɩl n ye paam zems-n-taar ne-a ye. Sɩd-sɩda, b sɩd ra pa rat n tũ Wẽnnaam ye.
8 Bũmb a to me n kɩt tɩ Israɛll nebã sẽn yet tɩ b teka yam n kos sugrã pa ne pʋ-peelem ye. Nin-buiidã ra ket n maanda yel-wẽna. Ra yaa yel-wẽn-kãsems buud toor-toor wala zãmbo, nin-kʋʋre, wagdem, bõn-naands pʋʋsgo, la kaool dãmb sẽn ka bark maaneg ne tẽns a taabã. Oze 7:4 pʋgẽ, b maka nin-buiidã ne “fuur bugum,” bɩ bur wẽeb wʋnga, bala tʋls-wẽnsã wita b sũyã pʋsẽ wa bugum. Nin-buiidã tẽeb sẽn da pa lebd be wã yĩnga, ra zemsame tɩ b zoe b nimbãaneg bɩ? Ayo! A Oze togsa tõtbã t’a Zeova na n “tẽega b yel-wẽna,” la a “na n sɩbga bãmb b kongra yĩnga.” (Oze 9:9) B ra pa na n paam tɩ Wẽnnaam zoe b nimbãaneg ye.
9. Bõe la a Oze goamã zãmsd tõnd tek-m-yam-n-kos-sugrã ne nimbãan-zoeerã zugu?
9 D sẽn karem a Oze goamã, zãms-bʋg buud la d paamd tek-yam-n-kos-sugrã la nimbãan-zoeerã wɛɛngẽ? Bũmb ning sẽn paam Israɛll tõatbã yaa keoogr n kõ tõndo. A wilgdame tɩ d sã n dat t’a Zeova zoe d nimbãanega, d segd n wilgame tɩ d teka yam n kos sugr ne d sũur fãa. Tek-yam-n-kos-sugr kãngã pukda wãn to? Nintãm ne gom-faad pa tõe n belg a Zeova ye. D wilgda d tek-yam-n-kos-sugr hakɩkã ne d tʋʋmã. Yel-wẽn-maand sẽn dat tɩ b zoe a nimbãaneg segd n basa a yel-wẽnã fasɩ. A segd n manega a vɩɩmã tɩ zems ne a Zeova balengã sẽn yaa sõma wʋsgã noyã.
Maand yen-yen pa tat a Zeova yam ye
10, 11. Wa Israɛll nebã makr sẽn wilgã, bõe yĩng tɩ maand yen-yen pa tat a Zeova yam?
10 Masã, d sõs zãmsg a yiib-n-soabã zugu, t’a tõe n sõng-d lame tɩ d tũ a Zeova. Yẽ la woto: Maand bal pa tat Wẽnnaam yam ye. Oze 6:6 pʋgẽ, a Zeova yetame: “Yaa nonglem la mam data, ka maoong ye. Mam datame tɩ m neba bãng maam, ka maoong sẽn yõogd bugum la m dat ye.” D yãame tɩ sẽn tat Wẽnnaam a Zeova yam yaa nonglem hakɩk sẽn yit sũur pʋgẽ, la d sẽn na n bao n bãng-a. La tõe tɩ y sokdẽ tɩ: ‘Bõe yĩng tɩ verse kãngã yetẽ t’a Zeova pa rat “maoong” la “maoong sẽn yõogd bugum”? A Moiiz Tõogã ra pa kõ noor tɩ b maan woto la?’
11 A Moiiz Tõogã ra kõo noor tɩ b maan maand la kũuni, la bũmb la a Oze zãmaanẽ nebã ra maand tɩ pa zemse. Israɛll neb kẽer n da maand bõn-kãens ne rok-m-zugẽ sẽn na yɩl tɩ neb a taabã yã bala. Sasa kãng pʋgẽ me, b ra minim n maanda yel-wẽna. B sẽn da maand yel-wẽnã ra yaa bũmb sẽn wilgd tɩ b ra pa tar nonglem hakɩk ye. B wilgame me tɩ b ra zãgsa Wẽnnaam bãngrã, bala b ra pa vɩ tɩ zems ne bãng-kãng ye. Nin-buiidã sũy sã n da pa sõma tɩ b tʋʋmã me ra pa sõma, b maandã me ra pa tar yõod ye. B sã n da maand b maandã, ra yaa wa b sẽn beegd Wẽnnaam a Zeova menga.
12. Oze 6:6 tara keoog-bʋg n kõ rũndã-rũndã nebã?
12 A Oze goamã tara keoogr n kõ neb wʋsg sẽn debd wẽn-dotẽ wã rũndã-rũndã wã. B kõta Wẽnnaam maando, sẽn yaa b tũudmã yel-maandɩ wã. La b tũudmã pa toeemd b yel-manesmã wʋsg bɩ baa bilf meng ye. Rẽ yĩnga nin-kãens sɩd tata Wẽnnaam yam, b sũyã sã n pa tusd-b tɩ b bãng-a tɩ zems kɛpɩ, la b bas yel-wẽnã maaneg n tũ bãng-kãng sɩda? Bɩ ned baa a yembr da tags tɩ tũudum tʋʋm yen-yen tata Wẽnnaam yam ye. Wẽnnaam sũur pa noom ne neb nins sẽn baood n na n paam a lohorem ne tũudum tʋʋm bala, n yaool n pa tũud a Gomdã b vɩɩmã pʋgẽ wã ye.—2 Tɩmote 3:5.
13. Yaa maand bʋs buud la kiris-nebã kõta, la bõe la d segd n maan tɩ b tall yõodo?
13 Tõnd sẽn yaa kiris-neb hakɩkã, bɩ d ning d yamẽ tɩ maand yen-yen pa tat Wẽnnaam yam ye. Yaa sɩd tɩ d pa kõt a Zeova rũms maand ye. Baasg zãnga, d kõta “Wẽnnaam maand daar fãa sẽn yaa pẽgre, sẽn dat n togse tɩ d kɩs kaset ne noor goama bãmb yʋʋra yĩnga.” (Hebre rãmba 13:15) D pa segd n wõneg Israɛll neb nins sẽn da vɩ a Oze wakatã n maand yel-wẽnã ye. D ra tags tɩ d tõe n kõo Wẽnnaam tẽeb maand t’a bas d wẽngã taal ye. Ges-y makr a yembr sẽn wilgd bipugl a yembr sẽn solg n yo. A sak n deega woto kaoosg zugẽ: “M paasa m koe-moonegã tʋʋmde, n tagsdẽ tɩ rẽ na n yẽesa wẽngã m sẽn maanã.” Yaa woto la Israɛll nin-kɩɩsdbã mak maanego. La bãng-y tɩ tõnd pẽgr maandã tõe n taa Wẽnnaam a Zeova yam, la yaa d sẽn na n naag rẽ ne sũur tʋlsem sẽn zems la yel-manesem sẽn tat a yam.
A Zeova balemdbã sã n bas-a, a sũur sãamdame
14. A Oze bãngr-gomdã wilgda bõe Wẽnnaam zugu?
14 D paamda zãmsg a tãab-n-soab Oze sak a 6 n tɩ ta a 9 pʋgẽ wã. A Zeova balemdbã sã n bas-a, sãamd-a a sũuri. Wẽnnaam tõe n talla sũ-bʋgsem wʋsg wa a sũur sẽn tõe n yik wʋsg me. A tara sũ-noog la nimbãan-zoeer wʋsg ne neb nins sẽn tekd yam n kos b yel-wẽnã sugrã. La a nin-buiidã sã n pa rat n tek yam n kos sugri, a sɩbgd-b-la sõma. Tõnd neerã yell sẽn pak Wẽnnaam wʋsgã yĩnga, d sã n tũud-a ne kɩs-sɩda a sũur noomame. Yɩɩl Sõamyã 149:4 yeta woto: “Zusoaba neba tata bãmb yam.” La Wẽnnaam sõgen dãmbã sã n kɩɩsd-a, maand-a-la bõe?
15. Israɛll neb kẽer yel-manesem da yaa wãn to ne b kẽed-n-taasã?
15 A Zeova goma Israɛll nin-kɩɩsdbã yell woto: “Bãmb sãama mam kaoola wa nin-zaalse n zãmb maam.” (Oze 6:7) Hebre gom-biig b sẽn lebg ka tɩ ‘zãmbã’ rat n yeelame me tɩ “belge, tõdge.” Malaki 2:10-16 pʋgẽ, yaa hebre gom-bi-kãng la b tũnug ne n bilg Israɛll nin-tõatbã sẽn da zãmbd b kẽed-n-taasã. Sebr a yembr yeelame tɩ b sẽn gom zãmb yell Oze 6:7 pʋgẽ wã, “yaa makr sẽn na yɩl n wilg kẽed-n-taag sẽn pa tall nonglem ne a to wã n yo wã.”
16, 17. a) Israɛll manesem yɩɩ wãn to ne kaool ning Wẽnnaam sẽn maan ne-a wã? b) Bõe la d segd n tẽeg d tʋʋmã wɛɛngẽ?
16 A Zeova ra geta Israɛll wa a paga, a sẽn da maan kaool ne-a wã yĩnga. Rẽnd a nin-buiidã sẽn wa n kɩɩs a kaoolã noyã, ra yaa wa b ra maanda yoobo. Wẽnnaam da yaa wa sɩd sẽn pa zãmbd a pag lae-lae, t’a nin-buiidã yaool n bas-a.
17 Yaa wãn to ne tõndo? Wẽnnaam toog bee ne tõnd sã n tũud-a lame, bɩ d pa tũud-a. D segdame n ning d yamẽ tɩ “Wẽnnaam yaa nonglem,” la tɩ d tʋʋmã tõe n nooga a sũur wall sãam a sũuri. (1 Zã 4:16) Tõnd sã n ket n maand sẽn yaa wẽnga, d tõe n sãama a Zeova sũuri, n sɩd pa ta a yam ye. D sã n ningd rẽ d yamẽ wakat fãa, tõe n sõng-d lame tɩ d pa sak kʋɩɩbg ye.
Wãn to la d tõe n kẽeb bi-sõma?
18, 19. Zãms-bʋg la d yãt Oze 8:7 pʋgẽ, la wãn to la a pids Israɛll nebã zutu?
18 Bɩ d ges zãmsg a naas-n-soab sẽn be a Oze bãngr-gomdã pʋgẽ. Zãms-kãng yaa: Wãn to la d tõe n kẽeb bi-sõma? A Oze gʋlsame n wilg tɩ Israɛll nebã sẽn tõdgã pa yam tʋʋmd ye. A yeelame: “Bãmb sã n bʋd sobgo, b na n wʋka sɩlman-waafo.” (Oze 8:7) Zãmsg n be verse kãngã pʋgẽ tɩ d segd n ning-a d yamẽ wakat fãa: Bũmb ning sẽn na n wa paam tõndã bee ne tõnd sẽn maand bũmb ning masã wã. Wãn to la rẽ yɩ yel-sɩd ne Israɛll nin-tõtbã?
19 Israɛll nin-kãensã sẽn da maand yel-wẽnã tɩ lebg minungã, b ra bʋta sẽn yaa wẽnga. B ra tõe n ket n maanda woto n pa kẽeb bi-wẽns bɩ? Sɩd-sɩda b ra pa na n põs sɩbgrã ye. Oze 8:13 pʋgẽ, a Zeova yetame: “Mam na n tẽega b yel-wẽna n sɩbg-ba.” La Oze 9:17 pʋgẽ d karemda woto: “Mam Wẽnnaam na n kisga bãmba. Bala, bãmb ka kelg Wẽnnaam goama ye. Bãmb na n yɩɩ nimbãan-dãmb buud a taaba sʋka.” A Zeova ra na n wa kɩtame tɩ Israɛll nebã kolg n togs b yel-wẽnã yĩnga. B sẽn bʋd wẽngã yĩnga, b ra na n kẽeba wẽnga. Wẽnnaam bʋ-kaoorã pidsa bãmb zug yʋʋmd 740 sẽn deng a Zezi rogem, Asiri nebã sẽn wa n zab n tõog Israɛll buud piigã rĩung n tall a nebã n kẽng yembdã.
20. Bõe la bũmb ning sẽn paam Israɛll nebã zãmsd tõndo?
20 Bũmb ning sẽn paam Israɛll nin-kãensã wã wilgda tõnd yel-bũnd sẽn yaa sɩd la sẽn tar pãnga: D kẽebda d sẽn bʋte. Wẽnnaam Gomdã keoogda tõndo: “Da belg-y yãmb mens ye; ned ka tõe n paoog Wẽnnaam ye. Ned sẽn bʋt bũmb ningã, yaa bõn-kãng la a na n wʋke.” (Galat dãmba 6:7) D sã n bʋd wẽnga, d na n kẽeba wẽnga. Wala makre, neb nins sẽn pẽdgd yoob pʋgẽ wã na n kẽeba bi-wẽnse. Yel-wẽn-maandb nins sẽn pa tekd yam n kos sugrã na n wa baasa wẽnga.
21. Wãn to la d tõe n kẽeb sẽn yaa sõma?
21 Rẽnd wãn to la d tõe n kẽeb sẽn yaa sõma? D tõe n dɩka makr sẽn yaa nana n leok sok-kãngã. Koaad sã n dat n wa kẽeb ki, a na n bʋda bɛng bɩ? Yaa vẽeneg tɩ yaa ayo! A segd n bʋda bũmb ning a sẽn dat n kẽebã. Woto me, d sã n dat n kẽeb sẽn yaa sõma, d segd n bʋda sẽn yaa sõma. Yãmb rat n ket n kẽebda sẽn yaa sõma bɩ, sẽn dat n yeel tɩ n paam vɩɩm sẽn kõt sũ-noog masã, la y ye paam vɩɩm wakat sẽn kõn sa yĩng Wẽnnaam dũni paalgã pʋgẽ bɩ? Sã n yaa woto, y segd n ket n bʋta sẽn yaa sõma, y sẽn na n tũud Wẽnnaam la y tũud a no-tɩrsã y vɩɩmã pʋgẽ.
22. Oze sak a 6 n tɩ ta a 9 zãmsa tõnd bõe?
22 Oze sak a 6 n tɩ ta a 9 vaeesg kõ-d-la zãmsg zĩis a naas pʋsẽ tɩ tõe n sõng-d tɩ d tũ Wẽnnaam: 1) Tek-yam-n-kos-sugr hakɩkã pukda ne tʋʋma, 2) maand yen-yen pa tat Wẽnnaam yam ye, 3) a Zeova sũur sãamdame, a balemdbã sã n bas-a, 4) sẽn na yɩl n kẽeb sẽn yaa sõma, rẽnda d bʋd sẽn yaa sõma. Wãn to la Biiblã seb-kãngã yaoolem sags a nu wã tõe n sõng tõnd tɩ d tũ Wẽnnaam?
Wãn to la y na n leoke?
• Wãn to la tek-yam-n-kos-sugr hakɩkã pukda?
• Bõe yĩng tɩ maand yen-yen pa tat tõnd saasẽ Ba wã yam?
• Wẽnnaam balemdbã sã n bas-a, maand-a-la bõe?
• Bõe la d segd n bʋde, d sã n dat n kẽeb bi-sõma?
[Zãmsgã sogsgã]
[Foto, seb-neng 15]
Bõe yĩng t’a Zeova zãgs a nin-buiidã maando?
[Foto, seb-neng 16]
D sã n dat n kẽeb sẽn yaa sõma, rẽnda d bʋd sẽn yaa sõma