Ãnd la yãmb sakda? Wẽnnaam bɩ ninsaalbã?

“A zemsame tɩ tõnd sak Wẽnnaam n yɩɩd nebã.”—TƲƲMA 5:29.

1. a) Rũndã zãmsgã verse yẽgr yaa bʋgo? b) Bõe yĩng tɩ b yõg tʋm-tʋmdbã?

ZƲƖF rãmbã bʋ-kaoodb sul-kãseng kaoa a Zezi Kirist bʋʋd n kʋ-a. Semen a wãn poore, b yõga a karen-biisã n ning bãens roogẽ. Masã b ra ratame n kao a tʋm-tʋmdbã me bʋʋdo. La bãens roogã gũudb sẽn kẽng n na n yiis-b bãensã roogẽ n kẽng bʋʋdã zĩigẽ, b mikame tɩ ned pa leb n be bãensã roogẽ ye, tɩ kʋɩlensã yaool n ket n pag kĩmm. Ad woto sɩd ra segd n puuga bʋ-kaoodbã sũy wʋsgo! La pa yã n kaoos la gũudbã bãng tɩ tʋm-tʋmdbã ra bee Zerizalɛm wẽn-doogẽ wã n zãmsd nebã ne raood a Zezi Kirist sẽn yaa a soab ye. Yaool n da yaa tʋʋm-kãng yĩng la b sẽn da yõg-bã. Bãens roogã gũudb kell n dɩka wẽn-doogã sore, n ye tɩ yõg tʋm-tʋmdbã n kẽng bʋ-kaoodbã nengẽ.—Tʋʋma 5:17-27.

2. Malɛkã yeela tʋm-tʋmdbã tɩ b maan bõe?

² Ra yaa malɛk n yiis tʋm-tʋmdbã bãensã roogẽ. La a yiis-b lame sẽn na yɩl tɩ b põs namsg nins sẽn da watã bɩ? Ayo. Ra yaa sẽn na yɩl tɩ Zerizalɛm nebã tõog n wʋm a Zezi Kirist koe-noogã. Malɛkã yeela tʋm-tʋmdbã tɩ b “kẽng . . . Wẽnnaam dooga pʋgẽ n togs neba vɩɩm koɛɛga fãa.” (Tʋʋma 5:19, 20) Yaa woto la tʋm-tʋmdbã ra maanda, sasa ning wẽn-doogã gũudb sẽn wa n yã-b wẽn-doogẽ wã.

3, 4. a) B sẽn wa n kõ noor tɩ b ra ye moonã, wãn to la a Pɩɛɛr ne a Zã leok-yã? b) Wãn to la tʋm-tʋmdb a taabã me leok-yã?

 ³ Koe-moondb kãens sẽn tar yẽesmã sʋka, neb a yiib n da zoe n kẽng bʋ-kaoodbã taoore. Yaa a Pɩɛɛr ne a Zã. Rẽ n so tɩ bʋ-kaoodbã naab a Zozɛf Kayif sũurã yik t’a yeel-b woto: “Tõnd yeela yãmb tɩ y ra le zãms neba ne yʋ-kãng [a Zezi yʋʋrã] ye. La gese, yãmb pida Zerizalɛm ne y zãmsgã.” (Tʋʋma 5:28) Ra pa segd n yɩ lingr ne a Kayif, a sẽn le yã a Pɩɛɛr ne a Zã bʋ-kaoodbã sull taoorã ye, bala b sẽn da wa n yeel-b pipi tɩ b ra ye moonã, b leokame: “Yaa tɩrg Wẽnnaam nifẽ tɩ tõnd sak yãmb n yɩɩd Wẽnnaam bɩ? Bɩ yãmb mens togse. Tɩ bõe, tõnd ka tõe n ka togs bũmb nins tõnd sẽn yã la d wʋma ye.” Wala pĩnd wẽndẽ no-rɛɛs a Zeremi, a Pɩɛɛr ne a Zã ra pa tõe n pa pids tʋʋmd ning Wẽnnaam sẽn bobl-b sẽn yaa koɛɛgã moonegã ye.—Tʋʋma 4:18-20; Zeremi 20:9.

⁴ Masã, ra pa a Pɩɛɛr la a Zã bal n da paam sor n na n wilg bãmb sẽn da na n sak a soab ye, ra yaa tʋm-tʋmdbã fãa, baa ne a Matɩaas b sẽn yãk paalmã. (Tʋʋma 1:21-26) B sẽn wa n kõ-b noor tɩ b ra ye moonã, bãmb me leoka woto ne raoodo: “A zemsame tɩ tõnd sak Wẽnnaam n yɩɩd nebã.”—Tʋʋma 5:29.

B saka Wẽnnaam bɩ, bɩ yaa ninsaalbã?

5, 6. Bõe yĩng tɩ tʋm-tʋmdbã pa sak noor ning bʋ-kaoodbã sull sẽn kõ wã?

⁵ Tʋm-tʋmdbã ra yaa sakdba. Rẽnd b ra pa na n sak n kɩɩs bʋ-kaoodb sull noor tɩ sã n pa bʋʋm tɩrg yĩng ye. La ninsaal baa a yembre, baa a pãngã sẽn zem to-to pa tar sor n na n kõ noor sẽn kɩɩsd Wẽnnaam noor ye. A Zeova yaa “Sẽn-ka-to dũniyã tɛk fãa.” (Yɩɩl Sõamyã 83:19) A pa ‘dũniyã fãa bʋ-kaood’ bal ye, la a leb n yaa tõod Lugend sẽn yɩɩd a taabã fãa, la a leb n yaa wakat fãa Rĩmã. Dẽnd bʋ-kaoodb sull noor ning fãa sẽn kɩɩsd Wẽnnaam noyã yaa zaalem yẽ nifẽ.—Sɩngre 18:25; Ezai 33:22.

⁶ Laloa mitbã mii yel-kãngã sõma. Wala makre, a William Blakston sẽn yaa Ãngeletɛɛr laloa mit kãseng a ye sẽn vɩɩmd yʋʋm kob-gĩnd 18 soabã wilga a tagsg yel-kãngã zugu. A yeelame tɩ ninsaal noor baa a yembr pa segd n kɩɩs Wẽnnaam noyã sẽn be Biiblã pʋgẽ wã ye. Woto yĩnga, Sanedrẽ wã sẽn yaa Zʋɩf rãmbã bʋ-kaoodb sullã gãndga b zu-sobendã sẽn da kõ-b sor tɩ b maanã, b sẽn wa n kõ tʋm-tʋmdbã noor tɩ b ra ye moonã. Tʋm-tʋmdbã ra pa tõe n sak no-kãngã ye.

7. Bõe yĩng tɩ koe-moonegã yik maan-kʋʋdbã kãsem dãmb sũuri?

⁷ Tʋm-tʋmdbã sẽn dɩk sard kãn-kãe n na n ket n moondẽ wã yika maan-kʋʋdbã kãsem dãmbã sũy wʋsgo. Maan-kʋʋdb kẽer wala a Kayif mengã, ra yaa Sadiseẽ rãmb sẽn pa tẽed tɩ kũum na n wa vʋʋgame ye. (Tʋʋma 4:1, 2; 5:17) Ne rẽ fãa, tʋm-tʋmdbã ra ket n yetame bal t’a Zezi vʋʋgame. Bãng-y me tɩ maan-kʋʋdbã kãsem dãmb kẽer n modg n paam Rom zu-soben dãmbã lohorem. A Zezi bʋʋdẽ wã, b sẽn wa n sok maan-kʋʋdbã kãsem dãmb tɩ b wilg b sã n datame t’a Zezi yɩ b rĩmã, b tolg n kaasame n yeel tɩ: “Tõnd ka tar dĩm a to sã n ka Sezaar ye.” (Zã 19:15) * Tʋm-tʋmdbã ra pa yet bal t’a Zezi ra vʋʋgame ye, b ra zãmsda nebã me tɩ sã n pa ne a Zezi yʋʋre, “fãagr ka be ne ned a to ye; tɩ bõe, yʋʋr a to ka be dũniyã zugu sẽn kõ neba tɩ tõnd tõe n paam fãagr ne-a ye.” (Tʋʋma 2:36; 4:12) Maan-kʋʋdbã ra yɛɛsda nin-buiidã na n wa sɩng n get a Zezi sẽn paam vʋʋgrã wa b Taoor soaba, tɩ rẽ yɩ sabab tɩ Rom dãmbã wa kɩt tɩ Zʋɩf rãmbã taoor dãmb kong b ‘Wẽn-doogã ne b buudã.’—Zã 11:48.

8. Sagl-sõng bʋg la a Gamalyɛll kõ Zʋɩf rãmbã bʋ-kaoodb sulli?

⁸ Ra wõnda yɛlã ra pa na n yɩ nana ne a Zezi tʋm-tʋmdbã ye. Zʋɩf rãmbã bʋ-kaoodb sull ra yeelame tɩ b sẽn kʋ-b bal n sa. (Tʋʋma  5:33) La yɛlã toeema zĩig pʋgẽ, tɩ ling nebã. A Gamaliɛll sẽn yaa Tõogã mitã yik n yalsame n keoog a taabã tɩ b ra yɩ yãg-yãg n maan bũmb ye. A goma yam goam n togs woto: “Tʋʋm-kãng sã n yaa neb rẽnda a na n yɩɩ zaalem. La a sã n yaa Wẽnnaam dẽnda, yãmb ka tõe t’a yɩ zaalem ye.” Rẽ poore, a Gamalyɛll paasa bũmb sẽn tar yõod wʋsgo. A yeela woto: “Bɩ y gũus yãmb mense n da wa zab ne Wẽnnaam ye.”—Tʋʋma 5:34, 38, 39.

9. Bõe n wilgd tɩ tʋm-tʋmdbã tʋʋmd ra yita Wẽnnaam nengẽ?

⁹ Yɩɩ lingri, la bʋ-kaoodbã sull saka a Gamalyɛll saglgã. Bʋ-kaoodbã sull “boola tʋm-tʋmdbã n kɩt tɩ b pãb bãmb ne kalwaase n togs bãmb tɩ b ra le gom ne a Zezi yʋʋr ye. La b basa bãmba.” Rẽ pa kɩt tɩ tʋm-tʋmdbã zoe rabeem ye. B rɩka sard kãn-kãe n na n sak malɛkã sẽn kõ-b noor tɩ b moon koɛɛgã. Woto, b sẽn bas-bã poore, “daar fãa Wẽnnaam dooga pʋgẽ ne dot pʋsẽ [tʋm-tʋmdbã] zãmsa neba la b moon a Zezi Kirist koe-noogã n ka bas ye.” (Tʋʋma 5:40, 42) A Zeova ninga b modgrã barka, la hal sẽn ta zĩ-bʋgo? “Wẽnnaam koɛɛga saagame n yɩɩd pĩnda, la karen-biisa paasa wʋsg Zerizalɛm.” Sɩda, “maan-kʋʋdba wʋsg saka tẽeb kãnga.” (Tʋʋma 6:7) Ad woto sɩd sãama maan-kʋʋdbã kãsem dãmb sũur wʋsgo! Ra yaa vẽeneg tɩ tʋm-tʋmdbã tʋʋmd sɩd ra yita Wẽnnaam nengẽ.

Sẽn zabd-b ne Wẽnnaamã pa tõe n tõog ye

10. Tõe tɩ yaa bõe yĩng la a Kayif sẽn da tẽed t’a zu-sobendã ra vigla kãn-kãeyã, la bõe yĩng t’a sẽn da tẽed woto wã ra yaa tudgri?

¹⁰ Pipi kiris-nebã zãmaanẽ, ra yaa Rom zu-soben dãmbã n yãkd Zʋɩf rãmbã maan-kʋʋdb kãsem dãmba. Yaa a Valerius Gratus n yãk a Zozɛf Kayif sẽn da yaa arzɛk soabã t’a yɩ maan-kʋʋdbã kãsmã. A Zozɛf Kayif yɩɩ maan-kʋʋdbã kãsem tɩ kaoos n yɩɩg wʋsg sẽn da reng-b yẽ wã. A Kayif ra tagsdame t’a sẽn tõog n kaoos woto wã yaa a sẽn da mi a sẽn na n maan to-to n zems ne nebã, la a sẽn da tar zood ne a Pɩlatã yĩnga. A ra pa tagsd tɩ yaa  Wẽnnaam sõngr yĩng ye. Sẽn yaa a soab fãa, a sẽn kɩs sɩd ne ninsaalbã baas n yɩɩ faoore. Tʋm-tʋmdbã sẽn puk Zʋɩf rãmbã bʋ-kaoodb sull taoorã yʋʋm a tãab poor bala, a Kayif konga Rom zu-soben dãmbã lohorem, tɩ b sik-a t’a ye pa maan-kʋʋdbã kãsem ye.

11. Bõe n paam a Põns Pɩlat la Zʋɩf rãmbã ne b tẽngã, la bõe la rẽ zãmsd yãmba?

¹¹ Noor ning b sẽn kõ tɩ b yiis a Kayif a taoor sobendã zĩigẽ wã yii a Pilat taoor soab a Lusius Vitelius sẽn da yaa Siiri soolmã guvɛrneerã nengẽ, la a Kayif zoa a Pilat pa tõog n gɩdg rẽ ye. B sẽn sik a Kayif tɩ rɩẽ bala, b sika a Pilat me a naamẽ wã, n bool-a bʋʋd Rom, taal b sẽn da ningd-a yɛl sẽn pa reem yell zug yĩnga. La Zʋɩf nanambs nins sẽn da teeg a Sezaarã yẽ? Rom dãmbã sɩd reega b ‘zĩigã la b buudã.’ Yɩɩ yʋʋm 70 a Zezi rogem poore. Rom tãb-biisã wa n sãamã Zerizalɛm zãnga, n paas wẽn-doogã la Zʋɩf rãmbã bʋ-kaoodb sullã roogo. Ad Yɩɩl gʋlsdã gom-kãensã sɩd paama pidsg yel-kãngã pʋgẽ: “Da rell nin-kãsems sẽn yaa ninsaalba sẽn ka tõe n fãag fooma ye.”—Zã 11:48; Yɩɩl Sõamyã 146:3.

12. Wãn to la yɛlã sẽn wa n baas n yɩ to-to ne a Zezi wã wilgd tɩ Wẽnnaam sakr yaa yam tʋʋmde?

¹² La sẽn yaa lebende, Wẽnnaam yãka a Zezi Kirist sẽn paam vʋʋgrã t’a yɩ maankʋʋdb Kãsem tẽeb wẽn-do-kãsengã pʋgẽ. Ninsaal baa a yembr pa tõe n sik-a ye. Sɩda, a Zezi “maan-kʋʋr ka tedgd ye.” (Hebre dãmba 2:9; 7:17, 24; 9:11) Wẽnnaam leb n yãka a Zezi t’a yaa sẽn vɩ-bã la sẽn ki-bã Bʋkaooda. (1 Pɩɛɛr 4:5) A Zezi sẽn tar zu-sobend kãngã wã, yẽ n na n ges a Zozɛf Kayif la a Põns Pɩlat sã n na n vʋʋgame bɩ b pa na n vʋʋge.—Matɩe 23:33; Tʋʋma 24:15.

Rũndã-rũndã, Rĩungã koe-moondb pa zoet rabeem ye

13. Tõnd wakatã, wa n lebga vẽeneg tɩ tʋʋm-bʋg n da yit ninsaalbã nengẽ, tɩ tʋʋm bʋg ra yit Wẽnnaam nengẽ? La bõe yĩng tɩ y yet woto?

¹³ Wala pipi kiris-nebã zãmaanẽ, tõnd wakatã, neb wʋsg n ‘zabd ne Wẽnnaam.’ (Tʋʋma 5:39) Wala makre, Alemayn, a Zeova Kaset rãmbã sẽn wa n zãgs tɩ b kõn kils a Adolf Hitlɛɛrã, a wẽename n pids t’a na n menems-b lame. (Matɩe 23:10) D sã n na n gese, a Hitlɛɛr sodaasã sẽn da yaa nin-toosã ra tõe n menemsa a Zeova sõgen dãmbã. Nazi rãmbã sɩd tõogame n yõg a Zeova Kaset rãmb tusa n kẽng ne-b a Hitlɛɛr nams-bɛɛgã zagsẽ. B tõog n kʋʋ kaset rãmb kẽer menga. La Nazi rãmbã pa tõog t’a Zeova Kaset rãmbã bas n pa balem Wẽnnaam a ye tãa bal ye, b leb n pa tõog n menems Wẽnnaam sõgen dãmbã ye. Kiris-nin-kãensã tʋʋmdã ra yita Wẽnnaam nengẽ, la pa ninsaalb nengẽ ye. Ned me la sẽn yaool n pa tõe n gɩdg Wẽnnaam tʋʋmdã la. Yʋʋm pis-yoob la woto masã, la wẽn-sakdb nins b sẽn da kẽes a Hitlɛɛr nams-toosã zagsẽ sẽn vɩ rũndã-rũndã wã ket n maanda a Zeova raabã ne b ‘sũur fãa, b sɩɩs fãa la b yam fãa,’ t’a Hitlɛɛr ne a poorẽ dãmbã yẽ menem tɩ b yʋy sãame.—Matɩe 22:37.

14. a) Modg-bʋs la bɛɛbã maan sẽn na yɩl n kãneg Wẽnnaam sõgen dãmbã, la a baasg yɩɩ wãn to? b) Bɛɛbã na n maana Wẽnnaam nin-buiidã wẽng tɩ tɩɩm kaẽ bɩ? (Hebre dãmba 13:5, 6)

¹⁴ Nazi rãmbã sẽn zab ne a Zeova la a nin-buiidã n pa tõogã tɛka, neb a taab me n kong zabrã wa bãmba. Erop tẽns wʋsg pʋsẽ, tũudum taoor dãmb la politik taoor dãmb n maan b sẽn na maanega, n na n kɩt tɩ nebã  tags t’a Zeova Kaset rãmbã yaa ‘tũudum will sẽn yaa wẽnga,’ wala b sẽn da bilg pipi kiris-nebã me to-to wã. (Tʋʋma 28:22, NW) La Erop Bʋ-kaoodbã sull sẽn get ninsaalbã dʋrwa rãmb yellã sak n deegame t’a Zeova Kaset rãmbã yaa tũudum, la a pa tũudum will ye. Sẽn kɩɩsd-b a Zeova Kaset rãmbã tog n mii woto, la ne rẽ fãa, b ket n kãnegda a Zeova Kaset rãmbã. Kãneg-kãng kɩtame tɩ b sãam kiris-nin-kãensã kẽer tʋʋma. B namsa a Zeova Kaset rãmbã kamb lekoll dãmbẽ wã. Rabeem sẽn kẽ neb nins sẽn da sɩng n sakd hal sẽn kaoos n luaasd b rot ne a Zeova Kaset rãmbã tɩ b maand b tigissã zãgsame tɩ b ye kõn sak ye. Tẽn-soaadbã zãgsame tɩ neb kẽer kõn paam sɛb sẽn wilgd tɩ b yaa tẽng-n-biis ye, b sẽn yaa a Zeova Kaset rãmbã yĩng bala. La rẽ pa koms a Zeova Kaset rãmbã raood ye.

15, 16. A Zeova Kaset rãmbã sẽn be Fãrensã manesem yɩɩ wãn to ne bɛɛbã sẽn kɩɩs koe-moonegã tʋʋmd be wã, la bõe yĩng tɩ b ket n moondẽ?

¹⁵ Wala makre, Fãrense, nebã nong n yaa wʋmdb la b nong tɩrlem. La baasgo, bɛɛb kẽer n yiis noy sẽn na yɩl n gɩdg Rĩungã tʋʋmde. A Zeova Kaset rãmb nins sẽn be be wã manesem yɩɩ wãn to? B modga ne b koe-moonegã tʋʋmd wʋsg n paas n yɩɩd pĩndã, hal tɩ wom bi-sõma. (Zak 4:7) Bãng-y tɩ kiis a yoob pʋgẽ bala, Biibl zãms rãmbã sõor paasa wʋsgo, hali n ta bãmb 33 koabg zug tẽn-kãng pʋgẽ. Pʋ-peelem dãmbã sẽn sak koe-noogã Fãrens tẽngã yaa bũmb sẽn yik a Sʋɩtãan sũurã hal wʋsgo. (Wilgri 12:17) Tõnd kiris-nin-taasã sẽn be Fãrensã kɩsa sɩd tɩ no-rɛɛs a Ezai gom-kãensã na n pidsa bãmb zutu: “Zab-teed nins fãa neb sẽn maand n na n zab ne foomã ka na n tõog ye. Fo na n sãama zɛlma nins fãa sẽn dõt fooma.”—Ezai 54:17.

¹⁶ B sẽn namsd a Zeova Kaset rãmbã b tẽebã yĩngã pa bũmb sẽn noom-b ye. La b sẽn sakd noor ning Wẽnnaam sẽn kõ kiris-nebã fãa wã yĩnga, b pa tõe n base, la b pa na n bas n pa moon bũmb nins b sẽn wʋmã ye. B modgdame n na n yɩ tẽng-n-bi-sõma. La Wẽnnaam noor ne ninsaalbã noor sã n wa kɩɩsd taaba, yaa Naab a Wẽnd la b segd n sake.

Ra zoe-y-b ye

17. a) Bõe yĩng tɩ d pa segd n zoe rabeem d bɛɛbã yĩnga? b) Tõnd manesem segd n yɩɩ bõe ne sẽn namsd-b tõndã?

¹⁷ Tõnd bɛɛbã kẽesda b mens yell meng-meng pʋgẽ, bala b zabda ne Wẽnnaam. Woto, wala sẽn zems ne noor ning a Zezi sẽn kõ wã, d pa na n zoe-b ye, la d na n pʋʋs n kõo neb nins sẽn namsd tõndã. (Matɩe 5:44) Tõnd pʋʋsdame tɩ neb nins fãa sẽn kɩɩsd tõnd ne zɩɩlem wala a Soll sẽn yit Tarsã, bɩ a Zeova yok b ninã tɩ b bãng sɩdã. (2 Korẽnt dãmba 4:4) A Soll wa n lebga kiris-ned tɩ b boond-a tɩ tʋm-tʋmd a Polle, la yẽ mengã namsa wʋsg a wakatẽ zu-soben dãmbã nusẽ. Ne rẽ fãa, a ra ket n tẽegda a tẽed-n-taasã “tɩ b sak soolem soaadba ne nanambsã, la b sak n maan tʋʋm sõama fãa, tɩ bãmb da gom ned ba a ye wẽng ye, la b ra yɩ zabr dãmb ye, la bɩ bãmb yɩ mi-m-meng rãmba sẽn maand sũ-bʋgsem ne neba fãa.” (Tɩt 3:1, 2) A Zeova Kaset rãmb nins sẽn be Fãrens la zĩis a taabã modgdame n na n tũ sagl-kãngã neere.

18. a) Wãn to la a Zeova tõe n fãag a nin-buiidã neb nins sẽn zabd ne-bã nusẽ? b) La zabrã baasg na n yɩɩ wãn to?

¹⁸ Wẽnnaam yeela no-rɛɛs a Zeremi tɩ: “Mam bee ne foom n na n fãag foom.”  (Zeremi 1:8) Wãn to la a Zeova tõe n fãag tõnd ne namsg ning d sẽn paamd d tẽebã yĩngã rũndã-rũndã? A tõe n tũnuga ne bʋ-kaood sẽn tar yam-sõng wala a Gamaliɛlle. A tõeeme me n kɩt tɩ ned a to sẽn tar yam-sõng n yɩɩd ledg na-wẽng sẽn namsd a sõgen dãmbã. La wakat-wakate, a Zeova tõe n basame tɩ b ket n namsd a nin-buiidã. (2 Tɩmote 3:12) La Wẽnnaam sã n bas tɩ b namsd tõnd d tẽebã yĩnga, wakat fãa, a na n kõ-d-la pãng tɩ d tõog nams-kãnga. (1 Korẽnt dãmba 10:13) La baa yɛl nins fãa Wẽnnaam sẽn bas tɩ wa, d mii yɛlã sẽn na n wa baas to-to: Neb nins sẽn zabd ne Wẽnnaam nin-buiidã zabda ne Wẽnnaam menga, la sẽn zabd-b ne Wẽnnaamã pa na n tõog zabrã ye.

19. Yʋʋmd 2006 verse yaa bʋgo, la bõe yĩng t’a zemse?

¹⁹ A Zezi yeela a karen-biisã tɩ b bãng tɩ b na n paama namsg b tẽebã yĩnga. (Zã 16:33) Rẽ wã yĩnga, goam nins sẽn be Tʋʋma 5:29 pʋgẽ wã zemsa wʋsg n yɩɩd pĩndã: “A zemsame tɩ tõnd sak Wẽnnaam n yɩɩd nebã.” Yaa rẽ yĩng n kɩt tɩ b yãk gom-kãensã sẽn tar pãngã tɩ b na n yɩ a Zeova Kaset rãmbã yʋʋmd 2006 verse. Bɩ d rɩk sard kãn-kãe yʋʋmd 2006 tɛk la wakat sẽn-kõn-sa yĩnga, n sak Naab a Wẽnd n yɩɩd nebã, baa sẽn sõs n yɩlga.

[Tẽngr note]

Y tõe n leokame bɩ?

• Tʋm-tʋmdbã sẽn mao to-to ne namsg ning b sẽn deegã kõta tõnd mak-sõng bʋg sẽn kengd d pelse?

• Bõe yĩng tɩ d segd n sak Naab a Wẽnd wakat fãa n yɩɩd ninsaalbã?

• Sɩd-sɩda, yaa ne ãnd la tõnd bɛɛbã sẽn zabd ne wã?

• Neb nins sẽn namsd b tẽebã yĩngã na n wa paama bõe?

[Zãmsgã sogsgã]

[Goam sẽn tar pãngã, seb-neng a 7]

Yʋʋmd 2006 verse wã na n yɩɩ: “A zemsame tɩ tõnd sak Wẽnnaam n yɩɩd nebã.”—Tʋʋma 5:29.

[Foto, seb-neng a 3]

“A zemsame tɩ tõnd sak Wẽnnaam n yɩɩd nebã”

[Foto, seb-neng a 5]

A Kayif basa Wẽnnaam teegr n teeg ninsaalba