B reng n nams-b lame, n yaool n wa nong-ba

YƲƲM a wãn sẽn looge, a Santiago la a pag a Lourdes yik n kẽnga Huilkapata sẽn yaa Peru tẽn-bil a ye sẽn yaa neerã pʋgẽ, n na n tɩ sõng be nebã tɩ b bãng Biiblã koɛɛg sẽn kõt saagrã. La pa yã n kaoos la prɛtr a ye me yi Kuzko n wa be ye. A tigisa tẽngã neb n keoog-b tɩ b gũus t’a Zeova Kaset rãmbã sẽn wa b tẽngẽ wã, na n waa ne bã-kʋʋdga, la kɩt tɩ neezã sẽn yaa galaas buudã ni wʋsg n sãam b pʋtã la kʋ b rũmsã.

Neb wʋsg tẽe prɛtrã gom-kãensã, tɩ rẽ kɩt tɩ maan sẽn yɩɩd kiis a yoob tɩ ned baa a ye pa sak n na n zãms Biiblã ne a Santiago la a pag a Lourdes ye. A Miguel sẽn yaa tẽngã guvɛrneer pʋgdgã da rigd-b lame, n pʋgd n lobd-b kuga. La b kell n wilgame tɩ b yaa kiris-neba, n kell n yɩ neb sẽn nong laafɩ.

Sẽn wa n beẽ-n-beẽ, tẽngã neb kẽer sakame n na n zãms Biiblã. Baa guvɛrneer pʋgdg ning sẽn da rigd-bã meng yel-manesem wa n toeemame. A sɩnga Biiblã zãmsg ne a Santiago, n bas rãamã yũ tɩ loogã, n lebg ned sẽn nong laafɩ. Rẽ poor bilfu, a Miguel ne a pagã la a kom-pugli a yiib n sak sɩdã.

Rũndã-rũndã, a Zeova Kaset rãmbã tiging a ye sẽn tar fɩɩgr n be Huillkapata tẽngẽ wã. A Miguel sũur yaa noogo, kug nins a sẽn da lobd a Santiago la a Lourdesã wʋsg sẽn pa yõg-bã yĩnga. La a pʋʋsd-b-la barka, b sẽn kell n yɩ neb sẽn kõ mak-sõng n wilg tɩ b yaa neb sẽn nong laafɩ wã yĩnga.

[Foto rãmba, seb-neng 32]

A Santiago la a Lourdes (sẽn be goabgã) sẽn yɩ neb sẽn nong laafɩ wã kɩtame t’a Miguel (sẽn be rɩtgã) toeeme