Yãmb teega Wẽnnaam tɩ ta hal zĩ-bʋgo?
Yãmb teega Wẽnnaam tɩ ta hal zĩ-bʋgo?
“Bɩ y reng n bao Wẽnnaam soolem.”—MATƖE 6:33.
1, 2. Bõe la bi-pok a ye sak n maan a tʋʋmã wɛɛngẽ, la bõe yĩnga?
B I-POK a ye n da rat n sõng n tʋm a tigingã tʋʋm n paase. La yell a ye n da be. A nug-tʋʋmdã ra gɩdgd-a lame t’a pa tõe n kẽng tigissã meng wakat fãa ye. Bõe la a maan-yã? A gesame n gĩdg a vɩɩmã, n bao nug-tʋʋmd a to sẽn pa tiisd a kiris-ned tʋʋmã, la a sɩd paamame. Rũndã-rũndã, a pa paamd ligd tɩ ta pĩndã ye, la a ket n tõe n geta a zakã neb yelle, la a tõe n sõnga tigingã wʋsg n yɩɩd pĩndã.
2 Yãmb wʋmda saam-bi-kãngã sẽn maan woto wã võor bɩ? Yãmb sã n da beẽ-la a zĩigẽ, y ra na n maanẽ-la wa yẽ bɩ? Kiris-neb wʋsg maana woto tɩ d pẽgd-b rẽ yĩnga. B yel-manesmã wilgdame tɩ b kɩsa sɩd ne a Zezi kãab-kãngã: “Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Matɩe 6:33) B teega a Zeova n na n paam koglgo, la pa dũniyã la b teegẽ ye.—Yelbũna 3:23, 26.
3. Bõe yĩng tɩ neb wʋsg tõe n sokd b mens n getẽ, sã n zemsame tɩ b lʋɩɩs Wẽnnaam Rĩungã taoor b vɩɩmã pʋgẽ rũndã-rũndã?
3 Tõnd wakatã sẽn yaa toog wakatã yĩnga, kẽer tõe n sokda b mens n getẽ saam-bi-kãngã sẽn maanã sã n yaa yam tʋmde. Rũndã-rũndã, ãdem-biis wʋsg vɩɩ naong meng-meng pʋgẽ, tɩ neb a taab vɩ naar buud sẽn zɩ n zĩnd pʋgẽ. Neb wʋsg sẽn vɩ tẽns nins naongã sẽn beẽ wã baooda soay buud fãa, n na n maneg b vɩɩmã n paase. La ne neb wʋsg yẽ sẽn be tẽns nins sẽn tar arzɛgsã pʋsẽ wã, laogã zãab yell yaa toogo, tʋʋmã paoong lebga toogo, sẽn paase tʋʋmã taoor dãmb baoodame tɩ tʋmd-tʋmdbã rɩk sẽk n paas tʋʋmã pʋsẽ. Rẽ fãa kɩtame tɩ mao n kell n vɩɩmd naarã pʋgẽ wa pĩndã lebg toog ne nin-kãensã. Bao-n-kõ-noorã sẽn yaa toogã yĩnga, neb kẽer tõe n sokda b mens sã n ket n zemsame tɩ b kell n bao Rĩungã nanda. Sẽn na yɩl n sõng n leok sok-kãngã, bɩ d ges neb nins a Zezi sẽn da gomd ne wã sẽn da yaa b rãmba.
‘Bɩ y ra le maan yɩɩr ye’
4, 5. Wãn to la a Zezi rɩk makr n wilg tɩ ra zemsame tɩ Wẽnnaam nin-buiidã ra maan yɩɩr tɩ loog ne daar fãa bõn-datmã?
4 A Zezi ra bee Galile, n da gomd ne neb kʋʋng sẽn yi zĩis wʋsg n wa. (Matɩe 4:25) Bãmb sʋkã, arzɛgs rãmb sã n da beẽ me, b ra pa wʋsg ye. Wõnda bãmb wʋsg ra yaa naong rãmba. Ne rẽ fãa, a Zezi sagl-b lame tɩ b ra lʋɩɩs arzɛgsã baoob taoor ye. A yeel-b lame tɩ b bao bũmb sẽn tar yõod n yɩɩd rẽ zĩig sẽn zãre, la b lʋɩɩs bõn-kãng taoore. Bõn-kãng yaa tẽebã arzɛgse. (Matɩe 6:19-21, 24) A yeelame: “Bɩ y ra maan yɩɩr ne y vɩɩma yelle, yãmb sẽn na n dɩ bũmb ninga, la yãmb sẽn na n yũ bũmb ninga, la yãmb yĩnga yelle, yãmb sẽn na n yeelg bũmb ninga ye. Vɩɩm ka yɩɩd dɩɩb laa, bɩ yĩnga ka yɩɩd futu?”—Matɩe 6:25.
5 Sã n yaa ne neb wʋsg sẽn da kelgd a Zezi wã, a goamã ra wõnda goam b sẽn pa tõe n tũ. B ra miime tɩ b sã n da pa tʋm wʋsgo, b zagsã neb ra na n namsame. Baasg zãnga, a Zezi tẽeg-b-la liuuli wã yelle. Liuuli wã sẽn baoodã yaa b daarã rɩɩb bala, la a Zeova geta b yelle. A Zezi leb n yeelame tɩ b tẽeg a Zeova sẽn get tɩ-puud neerem sẽn yɩɩd a Salomo ne a ziirã fãa wã yelle. A Zeova sã n get liuuli wã la tɩ-puudã yelle, a kõn ges tõnd yell n yɩɩd sɩda? (Matɩe 6:26-30) Wala a Zezi sẽn yeelã, tõnd vɩɩmã la d yĩnsã tara yõod n yɩɩd rɩɩbã tõnd sẽn daad n na n dɩ n vɩɩmdã, la futã d sẽn baood n yelgdẽ wã zĩig sẽn zãre. Tõnd sã n modgdẽ bal sẽn na yɩl n paam dɩɩb la d paam fut n yeelge, n pa tar sẽk wʋsg a Zeova balengã yĩnga, d vɩɩmã nan pa tar võor ye.—Koɛɛg Soaba 12:13.
D tall tagsg sẽn zems bao-n-kõ-noorã wɛɛngẽ
6. a) Zɩɩb bʋg n zao kiris-nebã zutu? b) Yaa ãnd la kiris-nebã teeg ne b sũy fãa?
6 A Zezi ra pa sagend a kɛlgdbã tɩ b bas b tʋʋmã, n gũ tɩ Wẽnnaam ges b zagsã yell ye. Baa liuuli wã segd n baoa rɩɩb n dɩlg b mens la b kambã. Rẽnd kiris-nebã sã n da rat n dɩ, b ra segd n tʋmame. B ra segd n tʋka b zagsã pʋsẽ zɩɩbo. Kiris-neb nins sẽn da yaa tʋm-tʋmdb bɩ yembsã ra segd n tʋma wʋsg n kõ b zu-soben dãmbã. (2 Tesalonik rãmba 3:10-12; 1 Tɩmote 5:8; 1 Pɩɛɛr 2:18) Tʋm-tʋmd a Poll da wʋgda fu-rot n paamd a noor dɩɩbo. (Tʋʋma 18:1-4; 1 Tesalonik rãmba 2:9) Ne rẽ fãa, kiris-nin-kãensã ra pa teegd b nug-tʋʋmã ye. B ra teegda a Zeova. Rẽ kɩtame tɩ b yamã ra gãe bãane, tɩ neb a taabã yaool n da pa tar bãan woto ye. Yɩɩl gʋlsdã yeelame: “Neb nins sẽn delld Zusoaba wẽnda Siõ tãnga; bũmb ka na n viig-a ye, yẽ na n paa wakat fãa.”—Yɩɩl Sõamyã 125:1.
7. Ned ning sẽn pa teeg a Zeova zãng-zãng tagsg tõe n yaa wãn to arzɛgsã wɛɛngẽ?
7 Tõeeme tɩ neb nins fãa sẽn pa teeg a Zeova zãng-zãngã tagsg yɩ toore. Ãdem-biisã wʋsg sẽn yɩɩd geta arzɛgsã wala bõn-kãseng ning sẽn tõe n kogl nedã. Woto kɩtame tɩ roagdb tus b kamb tɩ b rɩk b bi-bɩɩlmã n kẽes karen-bɛd pʋsẽ, n saagdẽ tɩ rẽ na n segl-b lame tɩ b wa paam tʋʋm sẽn yaood sõma. Zu-bʋko, kiris-neb n maan woto, la modgr la sẽk ning b sẽn dɩk rẽ yĩngã yɩɩ faoore. B kambã wa n baas n basa b tẽebã n kẽ laogã baoobo.
8. Kiris-nebã tara tagsg la manesem bʋg sẽn zems laogã wɛɛngẽ wakat fãa?
8 Rẽ wã yĩnga, kiris-neb nins sẽn tar yamã neeme t’a Zezi saglgã tara yõod rũndã-rũndã, wa a sẽn da tar yõod to-to yẽ wakatã, tɩ woto kɩt tɩ b tar tagsg la manesem sẽn zems yel-kãngã zugu. Baa b sã n dɩkd lɛɛr dãmb wʋsg nug-tʋʋmã yĩng sẽn na yɩl n pids zɩɩb Gʋlsg Sõamyã sẽn kõ-b noor tɩ b pidsi, b zɩ n bas tɩ ligd raab lud b yamã tɩ b ye pa ne tẽebã yɛl sẽn tar yõod n yɩɩdã ye.—Koɛɛg Soaba 7:12.
“Bɩ yãmb da maan yɩɩr” abada
9. Wãn to la a Zezi kõt neb nins sẽn teeg a Zeova zãng-zãngã bas-m-yam?
9 Zãmsg ning a Zezi sẽn kõ nebã tãngã zugã pʋgẽ, a sagla a kɛlgdbã tɩ: “Dẽ yĩnga, bɩ yãmb da maan yɩɩr ye, la y ra yeele: Tõnd na n dɩɩ bõe? Tõnd na n yũu bõe? Tõnd na n yeelga bõe? Tɩ bõe, bõn-kãens la neb sẽn ka pʋʋsd Wẽnnaam baood wakat fãa. Yãmb Ba sẽn be arzãna miimi tɩ yãmb data bõn-kãense.” (Matɩe 6:31, 32) Ad sɩd yaa goam sẽn kengd pɛlga! Tõnd sã n teegd a Zeova zãng-zãnga, a na n teela tõnd wakat fãa. La a Zezi goamã leb n kɩtdame tɩ d tagse. B tẽegda tõnd tɩ d sã n baood laogã “wakat fãa,” d tagsgã yaa wa “neb nins sẽn ka pʋʋsd Wẽnnaamã,” sẽn dat n yeel tɩ neb nins sẽn pa kiris-neb hakɩkã.
10. Bi-bɩɩg a yembr sẽn wa n kos a Zezi saglga, wãn to la a Zezi maanẽ tɩ bi-bɩɩgã wilg a sẽn da nong n yɩɩda?
10 Vugri, bi-bɩɩg sẽn da tar arzɛk wʋsg n sok a Zezi a sẽn segd n maaneg n paam vɩɩm sẽn pa satã. A Zezi tẽeg-a-la Tõogã noy b sẽn da segd n ket n tũud rẽ wẽndã. Bi-bɩɩgã yeela a Zezi: “Mam saka bãmb fãa. La bõe n keta?” Sã n yaa ne neb wʋsgo, tõe t’a Zezi sẽn leok bũmb ningã wõnda bũmb b sẽn da pa tõe n tũ. A yeelame: “Fo sã n dat n zems zãnga, bɩ f kẽng n koos fo sẽn tara fãa n kõ naong rãmba, la fo na paam paoong arzãna. La wa n tũ maam.” (Matɩe 19:16-21) Bi-bɩɩgã looga ne sũ-sãoongo, a sẽn da pa tõe n sak t’a arzɛkã yɩ bõnã yĩnga. Baa a sã n da nong a Zeova wʋsg me, a sẽn da nong a paoongã n yɩɩde.
11, 12. a) Gom-bʋs sẽn kɩtd tɩ d tags la a Zezi togs arzɛgsã wɛɛngẽ? b) Wãn to la arzɛgsã tõe n gɩdg ned t’a pa maan a Zeova raabã?
11 Yel-kãngã kɩtame t’a Zezi togs bũmb sẽn ling nebã: “Mam yeta yãmb sɩda tɩ yaa toog tɩ arzɛk soab kẽ arzãn soolmẽ. Mam leb n yeta yãmba tɩ yaa naana tɩ yʋgemd kẽ fupĩim yõore n yɩɩda tɩ arzɛk soab kẽ Wẽnnaam soolem pʋgẽ.” (Matɩe 19:23, 24) A Zezi ra rat n yeelame tɩ arzɛk soab baa a yembr da pa tõe n kẽ Wẽnnaam Rĩungã pʋgẽ bɩ? Ayo, bala a ra paasame: “Wẽnnaam tõee bũmb fãa.” (Matɩe 19:25, 26) Sɩda, ne a Zeova sõngre, arzɛgs rãmb kẽer sẽn da be wakat kãng lebga kiris-neb sẽn paam vʋʋsem sõng zaeebo. (1 Tɩmote 6:17) Baasg zãnga, a Zezi togsa gom-kãensã sẽn ling nebã bʋʋm sẽn sek yĩnga. A ra kõta keoogre.
12 Ned sã n nong a paoongã hal wʋsg wala bi-bɩɩgã sẽn yaa arzɛk soabã, a paoongã tõe n gɩdg-a lame t’a pa maan a Zeova raabã ne a sũur fãa ye. Tõe n yɩɩ woto ne ned sẽn zoe n tar arzɛka, bɩ ned ‘sẽn dat n yɩ arzɛk soaba.’ (1 Tɩmote 6:9, 10) Ned sã n teeg arzɛgsã wʋsgo, tõe n tus-a lame t’a ye pa ne a tẽebã ratem yõod sõma ye. (Matɩe 5:3) Rẽ tõe n kɩtame t’a ye pa ne t’a Zeova teelgã yaa tɩlae ne-a ye. (Tõodo 6:10-12) A tõe n wa ratame tɩ b waoog-a tigingã pʋgẽ n yɩɩd neb a taabã. (Zak 2:1-4) Sẽn paase, a tõe n dɩka sẽk wʋsg n noog a yõore, n lebs a Zeova balengã poorẽ.
Tall-y tagsg sẽn zems arzɛgsã wɛɛngẽ
13. Tags-bʋg sẽn pa zems la Laodise rãmbã ra tara?
13 Pipi kiris-nebã tiging a ye sẽn da boond tɩ Laodise wã pʋgẽ, nebã ra pa tar tagsg sẽn zems ne arzɛgsã ye. A Zezi yeel-b-la woto: “Yãmb yetame: Tõnd tara arzɛgse, tõnd paoong lebga wʋsgo, tõnd ka kongd bũmb ba a yembr ye. A yaa tɩ yãmb ka mi tɩ yãmb namsdame, la y yaa nimbãan-dãmba la naong rãmba la zoense la y yaa bɛɛl ye.” Ra pa Laodise rãmbã arzɛgs n kɩt tɩ b tẽebã wa sãam woto ye. Ra yaa b sẽn da teeg arzɛgsã n pa teeg a Zeova wã yĩnga. Rẽ kɩtame tɩ b ra yaa zal-zal tẽebã wɛɛngẽ, t’a Zezi ‘ra rat n wʋk-b a noorẽ wã.’—Wilgri 3:14-17.
14. Bõe yĩng tɩ kiris-neb nins sẽn yaa Hebre rãmbã ra zems ne a Poll pẽgrã?
14 Sẽn yaa lebend ne woto, a Poll pẽga kiris-neb nins sẽn yaa Hebre rãmbã, b sẽn da tall manesem ning b sẽn da wa n nams-b b tẽebã yĩngã sasa wã. A yeelame: “Yãmb zoee neb nins sẽn be bi-bees roogẽ wã nimbãanega, la yãmb saka yãmb paoong wʋkr ne sũ-noogo, yãmb sẽn bãng tɩ yãmb tara paoong sẽn yaa neer n yɩɩda sẽn ka sãamd ye.” (Hebre dãmba ) Kiris-nin-kãensã paoongã sẽn yɩ bõnã pa sãam b sũyã tɩ loog ye. B kell n talla b sũ-noogã, bala b kell n gãda paoong ning sẽn tar yõod n yɩɩdã, la “sẽn yaa neer n yɩɩda, sẽn ka sãamdã.” A Zezi yel-bũndã pʋgẽ toandã basa bũmbã fãa n da kĩndf ning yõod sẽn yaa kãsengã. Wala toand kãngã, bãmb me ra yãka yam n na n kell n tall saagr ning Rĩungã sẽn kõtã, baa sẽn na n yɩlg fãa. ( 10:34Matɩe 13:45, 46) Ad sɩd yaa manesem sẽn yaa sõma!
15. Wãn to la Liberia kiris-nin-poak a yembr lʋɩɩs Rĩungã taoore?
15 Rũndã-rũndã, neb wʋsg n tall manesem-sõng kãngã buudu. Wala makre, Liberia, kiris-nin-poak sẽn yaa bi-bɩɩg la b ra kõ zu-noog t’a tõe n tɩ karem inivɛrsite. Tẽn-kãng pʋgẽ, b geta inivɛrsite kareng wa bũmb sẽn kɩtd tɩ f wa paam tʋʋm sẽn yaood sõma. La saam-bi-poak kãngã ra yaa so-pakda, bɩ koe-moond sẽn dɩkd sẽk wʋsg kiuug fãa n moond koe-noogã, la a paama boolg sebr sẽn wilgd t’a tõe n yɩɩ zall so-pakd kiis a wãn pʋgẽ. A yãkame n na n deng n bao Rĩungã n kell n pa so-pakrã tʋʋmdẽ. A sak n kẽnga zĩig ning b sẽn tʋm-a t’a tɩ moon koɛɛgã, n sɩng Biibl zãms rãmb 21 kiis a tãab pʋgẽ. Pʋgsad kãngã la kom-bɩɩs tus a taab baooda Rĩungã nanda, baa b sã n paamda bõn loagã wɛɛngẽ rẽ yĩnga. B maana wãn n kell n tall manesem kãngã dũni kãngã sẽn pid ne neb sẽn nong laogã pʋgẽ? B baoa zʋg-sõma. Bɩ d gom zʋg-kãens sãnda yelle.
16, 17. a) Bõe yĩng tɩ sik-m-meng tar yõod wʋsgo, d sã n dat n teeg a Zeova? b) Bõe yĩng tɩ d segd n tall bas-yard ne Wẽnnaam kãabsã?
16 D tall sik-m-menga. Biiblã yetame: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã. Ra tags tɩ f tara yam wʋsg ye.” (Yelbũna 3:5-7) Wakat ninga, manesem ning tõe n wõnda a zemsame, sã n yaa ne dũniyã neb tagsgo. (Zeremi 17:9) La kiris-neb nins sẽn yaa pʋ-peelem dãmbã baooda a Zeova sor-wilgri. (Yɩɩl Sõamyã 48:15) B “sẽn maand bũmb ninga fãa” pʋgẽ, yaa tigingã yɛlẽ, karengã bɩ nug-tʋʋmdã pʋgẽ, tɩ yaa pemsem kokrã pʋgẽ bɩ sẽn yaa bũmb ning fãa pʋgẽ, b sikda b mens n baood a Zeova saglgo.—Yɩɩl Sõamyã 73:24.
17 D tall bas-yard ne a Zeova kãabsã. A Poll yeelame: “Ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.” (Hebre dãmba 11:6) Tõnd yamã sã n yooda ne a Zeova sã n na n pidsa a kãabsã, d tõe n tagsame tɩ zemsame tɩ d bao n dɩ dũniyã yõod wʋsgo. (1 Korẽnt dãmba 7:31) La tõnd tẽebã sã n tar pãnga, d na n data ne d sũy fãa n deng n bao Rĩungã. Wãn to la d tõe n paam tẽeb sẽn tar pãnga? Yaa d sẽn na n pẽnegd a Zeova wakat fãa, ne pʋʋsg d sẽn maand ne d sũy fãa la d zãmsd Biiblã n pa vaandẽ. (Yɩɩl Sõamyã 1:1-3; Filip rãmba 4:6, 7; Zak 4:8) Wala rĩm a Davɩɩde, d tõe n pʋʋsa woto: “Zusoaba, mam teega yãmba. Mam yetame tɩ yãmb yaa mam Wẽnnaam. Zusoaba, bõn-sõma nins yãmb sẽn bĩng y zoɛtba yĩnga yaa kãsenga.”—Yɩɩl Sõamyã 31:15, 20.
18, 19. a) Wãn to la d sẽn wɩngd ne tẽebã tʋʋmã paasd bas-yard ning d sẽn tar ne a Zeova wã pãnga? b) Bõe yĩng tɩ kiris-ned segd n sak n mong a menga?
18 D wɩng ne a Zeova tʋʋmdã. A Poll wilgame tɩ f sã n kɩs sɩd ne a Zeova kãabsã, f wɩngda ne a tʋʋmdã. A gʋlsame: “Tõnd datame tɩ yãmb ned kam fãa wɩng woto n gũ y tẽeba pidsg hal tɩ wakat ta.” (Hebre dãmba 6:11) Tõnd sã n tar tʋʋm wʋsg a Zeova tʋʋmdã pʋgẽ, a na n teela tõndo. Wakat ning fãa d sẽn ne teelg kãngã, bas-yard ning d sẽn tar ne-a wã paasdame, tɩ d ‘tẽebã lebgd kãn-kãe n pa vigsdẽ ye.’ (1 Korẽnt dãmba 15:58) D tẽebã pãng paasdame tɩ d saagrã maneg n kɩ yẽga.—Efɛɛz rãmba 3:16-19.
19 D sak n mong d mens yɛl kẽere. A Poll sak n basa tʋʋm sẽn da tõe n wa kɩt t’a lebg nin-kãseng dũniyã pʋgẽ, sẽn na yɩl n tũ a Zezi. Vẽenega a maana yãkr sẽn yaa tɩrga, baa ne a vɩɩmã sẽn yɩ toog wakat ning laogã kaalem yĩngã. (1 Korẽnt dãmba 4:11-13) A Zeova pa kãabd tõnd naar vɩɩm ye, rẽ n so tɩ wakat ninga, a sõgen dãmbã namsdẽ. Tõnd sẽn pa gĩt d vɩɩmã la d rat n mong d mensã, wilgdame tɩ d rat n maana a Zeova raabã ne d sũy fãa.—1 Tɩmote 6:6-8.
20. Bõe yĩng tɩ sũmar tar yõod wʋsg ne ned sẽn lʋɩɩsd Rĩungã taoore?
20 D tall sũmare. Karen-biig a Zak sagla a kiris-nin-taasã woto: “Dẽ yĩnga, m ba-biisi, bɩ y maan sũmar hal tɩ ta Zusoaba waoongo.” (Zak 5:7) Dũni kãngã yɛl sẽn tar taoor kẽngr tʋʋll-tʋʋllã kɩtame tɩ sũmar tallg lebg toogo. D ratame tɩ bũmbã fãa maan tao-tao. La a Poll sagla tõnd tɩ d rɩk togs-n-taar ne neb nins ‘sẽn paamd kãabg pidsgu, tẽeb ne sũmarã yĩngã.’ (Hebre dãmba 6:12) Sak-y n gũ t’a Zeova maan yɛlã b wakate. Vɩɩm sẽn pa satã tẽng zug arzãnã pʋgẽ sɩd zemsa gũubu.
21. a) Bõe la d wilgda, d sã n lʋɩɩsd Rĩungã taoore? b) Bõe yell la d na n gom sõsg ning sẽn pʋgdã pʋgẽ?
21 A Zezi sẽn sagl tɩ d reng n bao Rĩungã yaa bũmb sẽn sɩd zemse. D sã n maan woto, d wilgdame tɩ d sɩd teega a Zeova, la yaa kiris-ned sẽn na n maan woto bal la a tõe n sɩd paam koglg a vɩɩmã pʋgẽ. La a Zezi leb n sagla tõnd tɩ d “reng n bao Wẽnnaam . . . tɩrlem.” Sõsg ning sẽn pʋgdã pʋgẽ, d na n yãa bũmb ning sẽn kɩt tɩ d sɩd rat sagl-kãngã rũndã-rũndã n yɩɩdã.
Y tõe n wilga a võor bɩ?
• Sã n yaa ne laogã wɛɛngẽ, manesem bʋg sẽn zems la a Zezi yeel tõnd tɩ d talle?
• Bõe la makr ning a Zezi sẽn dɩk yʋgemdã la sũ-pĩimã zugã zãmsd tõndo?
• Kiris-ned zʋg-bʋs n sõngd tõnd tɩ d reng n bao Wẽnnaam Rĩungã?
[Zãmsgã sogsgã]
[Foto seb-neng 19]
Neb wʋsg sẽn kelg a Zezi goamã ra yaa naong rãmba
[Foto, seb-neng 21]
A Zezi makrã pʋgẽ toandã teka a sẽn tara fãa ne kĩndf yõod sẽn yaa kãsenga
[Foto, seb-neng 21]
Bi-bɩɩg ning sẽn yaa arzɛk soabã ra nonga a paoongã n yɩɩd Wẽnnaam
[Foto, seb-neng 22]
Tõnd sã n wɩngd ne a Zeova tʋʋmdã, a na n teela tõndo