Yaa masã la d segd n maan bũmb n paam n põse
Yaa masã la d segd n maan bũmb n paam n põse
“Yaa wakat a wãn la yãmb na n yeeb ne yam a yiibu?”—1 RĨM DÃMBA 18:21.
1. Bõe n kɩt tɩ tõnd wakatã yaa toor ne pĩndã?
YÃMB tẽedame tɩ yaa a Zeova a yembr bal la sɩd Wẽnnaam bɩ? Y leb n tẽedame tɩ Biiblã bãngr-goam wilgdame tɩ yaa tõnd wakatã la a Sʋɩtãan dũni wẽng kãngã ‘yaoolem wakat’ bɩ? (2 Tɩmote 3:1) Sã n yaa woto, y na n sak n deegame tɩ yaa masã tɛk la nebã segd n yãk yam n maan bũmb n paam n põse. Ãdem-biis wʋsg vɩɩm bee yell pʋgẽ tõnd wakatã n yɩɩd pĩndã.
2. Bõe n zĩnd Israɛll buud piigã rĩung pʋgẽ rĩm a Akaab naamã wakate?
2 Yʋʋm kob-gĩnd piig soab sẽn deng a Zezi rogmã, Israɛll buudã ra segd n yãka yam n maan bũmb n paam n põse. B ra segd n yãka b sẽn na n maaneg sok-kãngã taoore: Ãnd la b na n tũ? Bala, rĩm a Akaab pag a Zezabɛll tus-a lame t’a kɩt tɩ Baal balengã paam pãng Israɛll buud piigã rĩung pʋgẽ. A Baal da yaa wẽnnaam b sẽn da tẽed t’a wata ne saaga, la b tẽed me t’a kɩtdame tɩ kood la gʋʋlg yɩ sõma. Tõe t’a Baal balemdb wʋsg sã n da na n balm-a, b ra mokda b nug n sɩɩsd-a n wilgdẽ tɩ b waoogd-a lame, bɩ b ra wõgemdeda a taoore. B ra yooda ne b wẽn-doogã pʋg-yoaadb sẽn na yɩl t’a Baal ning b koodã la b gʋʋlgã barka. B ra leb n minim n wãada b mens sẽn na yɩl n tɩ b zɩɩmã yi.—1 Rĩm dãmba 18:28.
3. Baal balengã kɩtame tɩ Wẽnnaam nin-buiidã maan bõe?
3 Israɛll neb 7000 n zãgs tɩ b kõn kẽes b mens baleng kãngã buud pʋgẽ ye, bala ra yaa bõn-naands pʋʋsgo, yoob la nen-kɛglem tʋʋmã. (1 Rĩm dãmba 19:18) B kell n gãda zems-n-taar kaool ning b sẽn tar ne Wẽnnaam a Zeova wã, la b sẽn maan woto wã yĩnga, nebã nams-b lame. Wala makre, na-pag a Zezabɛll kʋʋ a Zeova no-rɛɛsdb wʋsgo. (1 Rĩm dãmba 18:4, 13) Yel-tood kãensã kɩtame tɩ Israɛll neb wʋsg gẽdem tũudmã, n bao n na n ta a Zeova yam la b bao n na n ta a Baal yam me. La Israɛll ned sã n da maan woto n bas a Zeova n balem wẽn-faoogo, ra yaa sɩdã la a kɩɩsda. A Zeova kãabame t’a na n ninga Israɛll nebã barka, la ra yaa b sẽn da na n nong-a la b sakd a noyã bala. La a keoog-b lame tɩ b sã n pa sak-a ne b sũy fãa, b ra na n paama sãango.—Tõodo 5:6-10; 28:15, 63.
4. A Zezi ne a tʋm-tʋmdbã reng n togsame tɩ bõe n da na n zĩnd kiris-nebã sʋka, la wãn to la rẽ paam pidsgu?
4 Yell sẽn wõnd woto n be kiris-neb ne yʋʋr tũudmã pʋsẽ. Neb wʋsg sẽn debd wẽn-dotẽ yetame tɩ b yaa kiris-neba, la b tigã, b yel-manesmã la b sẽn tẽed bũmb ninsã kɩɩsda Biiblã sẽn yetã. Wala a Zezabɛlle, kiris-neb ne yʋʋr tũudmã taoor dãmb lʋɩɩ taoor n kɩt tɩ b nams a Zeova Kaset rãmbã. Kiris-neb ne yʋʋr tũudmã taoor dãmb leb n teela zab wʋsgo, n yɩ sabab tɩ b kʋ b meng tũudmã neb milyõ rãmb ka tɛka. Biiblã wilgdame tɩ tũudmã sẽn teend dũniyã goosneema rãmbã, yaa tẽeb wɛɛngẽ yoob la b sẽn maandã. (Wilgri 18:2, 3) Sẽn paase, kiris-neb ne yʋʋr tũudmã pa zabd tɩ b nebã ra yo ye, hal baa b taoor dãmbã meng yoodame. A Zezi Kirist ne a tʋm-tʋmdbã ra reng n togsame tɩ neb n da na n wa kɩɩs sɩdã wʋsg woto. (Matɩe 13:36-43; Tʋʋma 20:29, 30; 2 Pɩɛɛr 2:1, 2) Bõe n na n paam neb sẽn yɩɩd milyaar a yembrã sẽn be kiris-neb ne yʋʋr tũudmã pʋsẽ wã? La bõe la a Zeova balemdb hakɩkã segd n maan n sõng nin-kãensã la neb a taabã, tũudum nins sẽn pa zãmsd sɩdã sẽn belgã? D tõe n paama sogs-kãensã leoor vẽenega, d sã n vaees yɛl nins sẽn zĩnd n wa tãag b sẽn na n ‘yiis a Baal Israɛll nebã sʋkã.’—2 Rĩm dãmba 10:28.
Wẽnnaam wilgame t’a ket n nonga a nin-buiidã baa ne b sẽn bʋdgã
5. Wãn to la a Zeova wilg t’a ket n nonga a nin-buiidã baa ne b sẽn da yaa tõtbã?
5 Wẽnnaam a Zeova sã n wa sɩbg neb nins sẽn tõdgd-a wã, pa noom-a ye. A sẽn yaa Ba sẽn tar nonglmã yĩnga, a ratame tɩ nin-wẽnsã tek yam n kos sugri, n lebg n wa a nengẽ. (Ezekɩɛll 18:32; 2 Pɩɛɛr 3:9) Bũmb ning sẽn wilgd t’a Zeova sɩd rata woto wã yaa a sẽn tʋm no-rɛɛsdb wʋsg a Akaab la a pag a Zezabɛll wakatẽ wã, tɩ b keoog a nin-buiidã tɩ b gũus t’a Baal balengã ra na n waa ne yel-beedo. Wala makre, a Eli ra bee no-rɛɛsdb nins a Zeova sẽn tʋmã sʋka. A Eli reng n togsame tɩ war sẽn na n yɩ toaag wʋsg n da na n wa. Sɩd yɩɩ woto. Rẽ poore, a yeela rĩm a Akaab t’a tigim Israɛll nebã la Baal balemdbã Karmell Tãngã zugu.—1 Rĩm dãmba 18:1, 19.
6, 7. a) Wãn to la a Eli wilg bʋʋm kãseng ning sẽn kɩt tɩ Israɛll kẽ sɩdã kɩɩsg pʋgẽ wã? b) Bõe la a Baal no-rɛɛsdbã maan-yã? d) Bõe la a Eli maan-yã?
6 A Zeova tẽn-kugr n da be zĩig ning b sẽn tigim taabã, la b ra luba tẽn-kug-kãnga, tõe tɩ yaa sẽn na yɩl n noog a Zezabɛll sũuri. (1 Rĩm dãmba 18:30) Zu-bʋko, Israɛll neb nins sẽn da wa tigisgã zĩigẽ wã ra pa mi sã n yaa a Zeova bɩ a Baal n da tõe n kɩt tɩ saagã nebã sẽn da rat ne b sũy fãa wã ni ye. A Baal no-rɛɛsdb 450 n da wa, t’a Eli yaool n da yaa a yembr n yaa a Zeova no-rɛɛsa. A Eli wilga yellã yẽgre, a sẽn sok nin-buiidã tɩ: “Yaa wakat a wãn la yãmb na n yeeb ne yam a yiibu?” Rẽ poore, a yeel-b-la woto vẽenega: “Sã n yaa Zusoaba n yaa Wẽnnaam, bɩ y tũ bãmba, la sã n yaa Baal la Wẽnnaam, bɩ y tũ-a.” Sẽn na yɩl n tus Israɛll nebã sẽn tar yam a yiibã tɩ b sak a Zeova ne b sũyã fãa, a Eli yeel-b lame tɩ b wa tɩ b maan bũmb sẽn na yɩl n bãng a soab ning sẽn yaa sɩd Wẽnnaamã. B ra segd n kooda lols a yiib n maan maoongo, a yembr a Zeova yĩnga, a to wã a Baal yĩnga. Sɩd Wẽnnaamã ra na n kɩtame tɩ bugum dɩ a maoongã tɩ b bãnge. A Baal no-rɛɛsdbã segla b maoongã, la lɛɛr a naas poore, b ra ket n kaasdame tɩ: “Baall, leok tõndo.” A Eli sẽn sɩng n laad-bã, b wãa b mensã hal tɩ zɩɩm wa yit wʋsgo, hali n zẽkd b koees n kaasd n boondẽ, la b kell n pa paam leokr ye.—1 Rĩm dãmba 18:21, 26-29.
7 Masã yaa a Eli n da segd n wa maan maoongã tɩ b gese a Wẽndã sã n na n kɩtame tɩ bugum dɩ maoongã. Pipi, a manega a Zeova tẽn-kugrã n dɩk lol-pollã b sẽn kʋ wã n dogl a zugu. Rẽ poore, a kõo noor tɩ b rɩk ko-yʋy bɛd a naas ne koom n daag maoongã zugu. B maana rẽ naoor a tãabo, hal tɩ tẽn-kugrã bok wa pid ne koom. Rẽ poore a Eli pʋʋsa woto: “Zusoaba, yãmb yaa a Abrahaam ne a Izaak la Israɛll Wẽnnaam. Kɩt-y tɩ neba bãng rũnda tɩ yãmb yaa Israɛll Wẽnnaam, la mam yaa y tʋm-tʋmda, n maand bõn-kãens fãa ne yãmb noore. Zusoaba, bɩ y leok maam tɩ nin-kãensa bãng tɩ yaa yãmb la Wẽnnaam, la yaa yãmb n tekd neba yam.”—1 Rĩm dãmba 18:30-37.
8. Wãn to la Wẽnnaam deeg a Eli pʋʋsgã, la bõe la no-rɛɛsã maan-yã?
8 Sɩd Wẽnnaamã leokame n kɩt tɩ bugum yi yĩngr n dɩ maoongã la tẽn-kugrã. Bugmã rɩɩ koomã meng sẽn da gũbg tẽn-kugrã! Mams-y n ges-y rẽ sẽn kɩt tɩ Israɛll nebã tall manesem ningã. “Bãmb fõgna b nens tẽng n yeel tɩ: ‘Yaa Zusoaba n yaa Wẽnnaam. Yaa Zusoaba n yaa Wẽnnaam.’” Rẽ poor masã a Eli rɩka sard sẽn yaa kãsenga. A kõo Israɛll nebã noor “tɩ b yõg Baall bãngdbã n da bas tɩ b ned baa a ye põs ye.” Rẽ b kʋʋ a Baall no-rɛɛsdb 450 wã fãa Karmell tãngã sɛɛga.—1 Rĩm dãmba 18:38-40.
9. Bõe n kɩt tɩ Wẽnnaam balemdb hakɩkã tẽeb ra ket n paamd makre?
9 Daar n kãng sẽn yaa daar b sẽn pa tõe n yĩmã, a Zeova kɩtame tɩ saagã ni Israɛll soolmã pʋgẽ. Ra maana yʋʋm a tãab la pʋɩ-sʋk tɩ saag pa tosg soolmã pʋgẽ ye. (Zak 5:17, 18) Mams-y n ges-y Israɛll nebã sẽn sõs rẽ zug to-to b sẽn wa n leb b yiyã. A Zeova wilgame t’a sɩd yaa Wẽnde. La a Baal balemdbã kell n pa reeg tɩ yell yaa sɩd ye. A Zezabɛll kell n namsa a Zeova sõgen dãmbã wʋsgo. (1 Rĩm dãmba 19:1, 2; 21:11-16) Woto, Wẽnnaam nin-buiidã tẽeb ye paama makr yɛsa. La rẽ yĩnga, a Baal balemdbã bʋʋd kaoob raare, ra na n mikame tɩ yaa a Zeova bal la a nin-buiidã balemd bɩ?
D maan bũmb masã tɛk n paam n põse
10. a) Tõnd wakatã, bõe la kiris-neb nins sẽn paam vʋʋsem sõng zaeebã maanda? b) Noor ning sẽn be Wilgri 18:4 pʋgẽ wã sakr baooda bõe maanego?
10 Rũndã-rũndã, kiris-neb nins sẽn paam vʋʋsem sõng zaeebã tʋma tʋʋmd sẽn wõnd a Eli rẽndã. B tũnuga ne mooneg la sɛb pʋɩɩb n keoog tẽnsã fãa neb sẽn be kiris-neb ne yʋʋr tũudmã pʋsẽ, ne neb a taabã fãa, tɩ b gũus ne tũudum wẽnsã. Rẽ kɩtame tɩ neb milyõ rãmb yãk yam n yi tũudum wẽnsã pʋsẽ fasɩ. B rɩka b vɩɩmã n kõ a Zeova n deeg lisg n lebg a Zezi Kirist karen-biisi. B saka Wẽnnaam bool-yãgdem ning sẽn tɩ loe ne tũudum wẽnsã. A yetame: “Mam neba, bɩ y yi yẽ pʋgẽ n da lagem ne yẽ yel-wẽna la y paam a tooda ye.”—Wilgri 18:4.
11. Bõe n yaa tɩlae sẽn na yɩl n tõog n ta a Zeova yam?
11 Baa neb milyõ rãmb a taab sã n nong Biiblã koɛɛg a Zeova Kaset rãmbã sẽn moondã, b yamã ket n yuusdame, tɩ b pa mi b sẽn segd n maaneg ye. Wakat-wakate, bãmb kẽer wata tõnd tigissã, wala a Zezi kũumã Tẽegrẽ bɩ rasem a tãab tigis-kãsengã babs kẽere. Tõnd pẽdgda bãmb rãmbã fãa tɩ b tags a Eli gom-kãensã zug neere: “Yaa wakat a wãn la yãmb na n yeeb ne yam a yiibu?” (1 Rĩm dãmba 18:21) B pa segd n yaas tɩ kaoos ye. B segdame n maan bũmb masã menga, la b tʋm ne yẽesem n paam n lebg a Zeova balemdb sẽn dɩk b mens n kõ-a n deeg lisgu. B vɩɩm sẽn pa satã saagr bee ne rẽ maanego.—2 Tesalonik rãmba 1:6-9.
12. Yel-bʋg pʋgẽ la kiris-neb kẽer sẽn deeg lisg kẽes b mense, la yaa bõe la b segd n maane?
12 Zu-bʋko, kiris-neb kẽer sẽn deeg lisg mi n maanda kiuug tõr n pa moon koɛɛgã, pa rẽ bɩ b pʋd n pa ye moond koɛɛgã la b pa kẽnd tigissã ye. (Hebre dãmba 10:23-25; 13:15, 16) Kẽer basa b yẽesmã, sẽn na yɩl n põs namsg b tẽebã yĩngã. Kẽer me nengẽ, yaa yɩɩrã, bao-n-kõ-noorã, arzɛgsã baoob bɩ yõ-noogrã n kɩt tɩ b ye pa tar yẽesmã. A Zezi keoogame n wilg tɩ bõn-kãensã ra tõe n yɩɩ bẽdg ne a karen-biis kẽer tɩ b lak n bas tẽebã. (Matɩe 10:28-33; 13:20-22; Luk 12:22-31; 21:34-36) Nin-kãensã pa segd n ‘yeeb ne yam a yiib ye,’ b segd n ‘nanga pãng la b tek yam n kos sugri,’ n sɩd pids b pʋlengã, b sẽn dɩk b mens n kõ Wẽnnaamã yĩnga.—Wilgri 3:15-19.
Tũudum wẽnsã na n saa zĩig pʋgẽ
13. Bilg-y yɛlã sẽn yɩ to-to Israɛlle, wakat ning b sẽn wa n zae a Zehu ne kaam t’a lebg rĩmã?
13 Ad bʋʋm ning sẽn kɩt tɩ yaa yãgb bũmb masã ne ninsaalbã tɩ b maan bũmb n paam n põsã. Yaa bũmb ning sẽn paam pĩnd wẽndẽ Israɛllã nebã, a Eli sẽn n wilg sɩd Wẽnnaamã sẽn sɩd yaa a soab Karmell tãngã zugã tɩ yʋʋm 18 poorã. A Zeova bʋ-kaoorã a Baal balengã zug waa zĩig pʋgẽ la sasa ning b sẽn da pa tẽedã, a Eli lɛdgd a Elize no-reesemdã wakate. Rĩm a Akaab biribl a Zoram da rɩta naam Israɛlle, t’a ma a Zezabɛll ra ket n vɩ. A Elize gãanda tẽng n tʋm a tʋm-tʋmd t’a tɩ zae Israɛll rĩmã tãb-biis naab a Zehu ne kaam t’a lebg rĩma. Wakat kãng t’a Zehu ra bee Zʋrdẽ kʋɩlgã yaang rʋʋnd Galaad Ramot, n zabd ne Israɛll bɛɛbã. La rĩm a Zoram da bee Zisreɛlle, bãoog ning sẽn da be Megido noorẽ wã, n tɩbsd sãmpogr a sẽn paam zabr pʋgẽ.—2 Rĩm dãmba 8:29–9:4.
14, 15. Tʋʋm bʋg la b bobl a Zehu, la a talla manesem bʋgo?
14 A Zeova kõo a Zehu noor woto: “Fo na n kʋʋ f zu-soab a Akaab buudã n dok m sũur ne a Zezabɛlle, yẽ sẽn daag m no-rɛɛsdba ne m tʋm-tʋmdb a taaba zɩɩma yĩnga. A Akaab rooga fãa na n sãamame . . . Baas na n wãba a Zezabɛll Zizreɛll pʋʋga pʋgẽ, tɩ ned ka be n na n mum-a ye.”—2 Rĩm dãmba 9:7-10.
15 A Zehu ra yaa ned sẽn da nong n dɩkd sard tao-tao yell taoor n maan bũmb zĩig pʋgẽ. Tao-tao bala, a kẽe a saarã n kẽng Zisrɛlle. A sẽn wa n kolgdẽ wã, Zisreɛll gũud n bãng-a, a sẽn da zoet ne a saarã to-to wã yĩnga. Gũuda togsa rĩm a Zoram, tɩ rĩmã kẽ a saarã n na n tɩ seg a Zehu. B sẽn wa n seg taabã a Zoram sokame: “Zehu, yaa laafɩ?” T’a Zehu leoke: “Y ma a Zezabɛll yooba ne a bagra bʋgb sã n kell n yɩ woto, laafɩ na n yɩɩ wãn n zĩndi?” Woto, nand tɩ rĩm a Zoram zoe, a Zehu yãaga a tãpã n tão-a tɩ kõs a sũurã t’a ki.—2 Rĩm dãmba 9:20-24.
16. a) Yel-bʋg la a Zezabɛll zakã nin-kãsemsã seg ne lingri? b) Wãn to la a Zeova sẽn da togs goam nins a Zezabɛll zugã pids-yã?
16 Rẽ poore, a Zehu pa yaas n gũ ye, a zoea ne a saarã tao-tao n kẽng galʋ-tẽngã pʋgẽ. A Zezabɛll ra nagame n bao kɩrʋ n dẽes a ninã. A lɩka rooga fenetrẽ n pʋʋs a Zehu ne no-rɩkre. A Zehu maana wa a pa ne-a ye, n soke: “Ãnda n be ne maam?” Masã, a Zezabɛll tʋm-tʋmdbã ra segd n dɩka sard zĩig pʋgẽ. Na-zakã nin-kãsems a yiib bɩ a tãab n lɩk fẽnetrẽ wã n gese. Zĩig pʋgẽ, b ra segd n wilga b sẽn be a soab poorẽ, bala a Zehu kõ-b-la noor tɩ: “Bɩ y wõog-a n lob tẽnga.” Nin-kãens rɩka a Zezabɛll n lɩk n lob tẽng sorã zugu, t’a Zehu wed-moosã la a saarã tab-a. Woto, pʋg-kãngã sẽn da kɩt t’a Baal balengã kẽ Israɛllã kiime tɩ sa. La ra zemsame t’a paam sɩbg-kãngã. Nebã ne b na n wa rɩk-a n tɩ mumã tɩ baasã ra zoe n wãba a nemdã wala b sẽn da reng n togs bãngr-gomd pʋgẽ wã.—2 Rĩm dãmba 9:30-37.
17. Wẽnnaam sẽn kao a Zezabɛll bʋʋdã to-to wã segd n paasa tõnd tẽebã ne yel-bʋg sẽn wat beoog-daare?
17 Yaa woto me la b na n sãam tẽebã wɛɛngẽ pʋg-yoodr ning yʋʋr sẽn yaa ‘Babilon Kãsengã.’ Pʋg-yoodrã makda a Sʋɩtãan dũniyã tũudum wẽns sẽn sɩng hal pĩnd wẽndẽ Babilon tẽngã. Wẽnnaam a Zeova sã n sãam tũudum wẽnsã poore, a na n zaba ne ninsaalb nins fãa sẽn teend a Sʋɩtãan dũniyã. Bãmb me na n paama sãoongo, sẽn na yɩl n segl sor dũni paalg sẽn yaa tɩrg waoong yĩnga.—Wilgri 17:3-6; 19:19-21; 21:1-4.
18. A Zezabɛll kũumã poore bõe n paam a Baal balemdb nins sẽn da be Israɛllã?
18 A Zezabɛll kũumã poore, rĩm a Zehu pa yaas n gũ la a kʋ a Akaab kambã ne a tɛɛndbã fãa ye. (2 Rĩm dãmba 10:11) La a Baal balemdb wʋsg sẽn yaa Israɛll neb ra ket n bee soolmã pʋgẽ. A Zehu maana nin-kãens bũmb n wilg t’a ‘wɩngda ne Zusoaba tʋʋmde.’ (2 Rĩm dãmba 10:16) A Zehu maana wa a yaa a Baal balemda, n moon kibs kãseng a Baal balengã roog ning a Akaab sẽn da me Samari wã pʋgẽ. A Baal balemdb nins fãa sẽn da be Israɛllã waa kibsẽ wã. B sẽn da wa n be balengã roogẽ, b bẽd-b-la be t’a Zehu rapã kʋ-b fãa. Biiblã baasa kɩbarã ne gom-kãensã: “Woto, a Zehu yiisa Baal Israɛll neba sʋka.”—2 Rĩm dãmba 10:18-28.
19. Bark kãseng bʋg n gũud a Zeova balemdb hakɩk nins sẽn yaa kʋʋn-kãsengã?
19 B yiisa a Baal balengã Israɛlle. Yaa woto me la b na n kɩt tɩ dũni kãngã tũudum wẽnsã menem zĩig pʋgẽ hal tɩ sãmbg kaẽ ye. Yãmb na n zĩnda ãnd poorẽ bʋ-kaoor kãngã raar sẽn yaa ra-kãsengã sasa? Maan-y bũmb masã tɛka sẽn na yɩl n wa paam n põse, tɩ rẽ y tõe n wa paama zu-noog n zĩnd kʋʋn-kãsengã neb sẽn na n põs “to-kãsengã” sʋka. Rẽ, y na n tõog n lebs n tẽega Wẽnnaam bʋ-kaoorã yell ne sũ-noogo, la y pẽg Wẽnnaam, a sẽn kao ‘pʋg-yood-kʋdr ninga sẽn sãam dũniyã fãa ne a yooba bʋʋdã’ yĩnga. Y na n naaga Wẽnnaam balemdb hakɩk a taabã, n wilg tɩ y saka yɩɩn-noog ning sẽn yit saasẽ wã goamã. Yɩɩllã yetame: “Aleluia! Tɩ bõe, tõnd Zusoaba Wẽnnaam sẽn tõe fãa rɩta naam.”—Wilgri 7:9, 10, 14; 19:1, 2, 6.
Sogsg sẽn kɩtd tɩ d bʋgse
• Wãn to la pĩnd wẽndẽ Israɛllã paam taal ne a Baal balengã?
• Bõe la Biiblã ra reng n togs sɩdã kɩɩsg wʋsgã zugu, la wãn to la bãngr-gom-kãngã pids-yã?
• Wãn to la a Zehu yiis a Baal balengã zãnga?
• Bõe la d segd n maan n põs Wẽnnaam bʋ-kaoorã daare?
[Zãmsgã sogsgã]
[Kart, seb-neg a 9]
Afɛk
Helkat
Bɛtsemes
Jokneam
Ãndoor
Ofra
Sunem
Megido
Harod bulgã
Zisreɛll
Taanak
Bɛtsean
Zabɛs Galaad?
Ibleam (Gat-rimon)
Dotãn
Abɛll-mehola
Arbɛll roogo
Ramot Galaad
Tirza
Soko
SAMARI
tãense
Karmell tãngã
Gilboa tãngã
Taboor tãngã
More
[Mog-toɛy-toɛya]
Mediterane mogrã
Galile mogrã
[Kʋɩlga]
Zʋrdẽ kʋɩlgã
[Kartã soaadba]
Based on maps copyrighted by Pictorial Archive (Near Eastern History) Est. and Survey of Israel
[Picture on page 10]
Rĩungã koɛɛg mooneg la kiris-neb tigissã kẽnd wakat fãa yaa Wẽnd baleng hakɩkã nen-kãsemse
[Foto rãmba, seb-neng 12, 13]
Wala a Zehu, neb nins fãa sẽn dat n põs a Zeova daarã sasa wã segd n maana bũmbu