Bũmb nins sẽn be saasẽ la sẽn be tẽng zugã tigingu
Bũmb nins sẽn be saasẽ la sẽn be tẽng zugã tigingu
‘Wa sẽn zems yam-yãkr ning b sẽn da pĩnd n yãkã, . . . bãmb na n tigsa bũmb nins fãa sẽn be yĩngri la sẽn be tẽng zugã tɩ b sak naab a yembre: Kiristã.’—EFƐƐZ RÃMBA 1:9, 10, Kãab-paalgã Koe-noogo.
1. Bõe la a Zeova pĩnd n yãk yam n na n wa maan saasã la tẽngã wɛɛngẽ?
BÃAN saasẽ la tẽng zugu! Yaa woto la a Zeova sẽn yaa “Wẽnnaam sẽn so laafɩ” wã raab sẽn tar ziirã. (Hebre dãmba 13:20) A vẽnega tʋm-tʋmd a Poll t’a gʋls n wilg t’a ra pĩnd n ‘yãka yam’ n na n wa ‘tigis bũmb nins fãa sẽn be yĩngr la sẽn be tẽngã zugã tɩ b sak naab a yembre: Kiristã.’ (Efɛɛz rãmba 1:9, 10, Kãab-paalgã Koe-noogo) Gomd ning sẽn yaa ‘tigsã’ verse kãngã pʋgẽ wã võor yaa bõe takɩ? Biiblã mit a John Lightfoot yeela woto: “Gomdã rat n yeelame tɩ zems-n-taar hakɩk n na n zĩnd saasẽ la tẽng zugu, tɩ welsg la kɩɩs taab pa na n le zĩndi, tɩ nebã fãa na n tik Kirist zug n paam zems-n-taare. Yel-wẽnã la kũumã, sũ-sãamsã, kongr la namsg pa na n ye zĩnd ye.”
“Bũmb nins fãa sẽn be yĩngrã”
2. ‘Bũmb nins sẽn be yĩngrã’ b sẽn segd n tigmã yaa bʋse?
2 Tʋm-tʋmd a Pɩɛɛr kʋmsa kiris-neb hakɩkã saagr sẽn yaa kãsengã, a sẽn wa n gʋls woto wã: “A wa sẽn zems bãmb kãabgo, tõnd gũuda yĩngr paalg la tẽn-paalga, tɩrlem sẽn na n zĩnd b pʋsẽ.” (2 Pɩɛɛr 3:13) “Yĩngr paalgã” b sẽn kãab ka wã yaa goosneema paalga, sẽn yaa Mesi Rĩungã. A Poll lɛtr ning a sẽn taas Efɛɛz rãmbã pʋgẽ wã, a yeelame tɩ ‘Bũmb nins sẽn be yĩngrã’ segd n tigma “Kirist pʋgẽ.” Yaa neb b sẽn tũus tɩ b sõorã yaa takɩ, tɩ b na n tɩ rɩ naam ne Kirist saasẽ. (1 Pɩɛɛr 1:3, 4) B raa kiris-neb 144000 kãensã sẽn paam vʋʋsem sõng zaeebã ‘tẽngã zugu,’ ‘b ra-b-la ãdem-biisã sʋka,’ sẽn na yɩl tɩ b tɩ rɩ naam ne Kirist a saasẽ Rĩungã pʋgẽ.—Wilgri 5:9, 10; 14:3, 4, NW; 2 Korẽnt dãmba 1:21; Efɛɛz rãmba 1:11; 3:6.
3. Wãn to la b tõe n yeel tɩ b zĩndga sẽn paam-b vʋʋsem sõng zaeebã saasẽ, baa ne b sẽn be tẽng zugã?
3 Kiris-neb nins sẽn paam vʋʋsem sõngã rogmã bɩ rogem paalgã lebga a Zeova komdibli tẽebã wɛɛngẽ. (Zã 1:12, 13; 3:5-7) A Zeova sẽn get-b wa a “kamba” yĩnga, b lebga a Zezi ba-biisi. (Rom dãmba 8:15; Efɛɛz rãmba 1:5) Baa b sã n ket n be tẽng zugu, b yetame tɩ b ‘vʋʋga bãmb n zĩndg-b saasẽ ne Kirist Zezi.’ (Efɛɛz rãmba 1:3; 2:6) B paamda zĩ-kãng sẽn tar ziir tẽebã wɛɛngẽ wã, bala b “paama bãnd sẽn yaa Sɩɩg Sõng Wẽnnaam sẽn dag n kãabe. Sɩɩg Sõng yaa deng n lɛmbg ne bũmb ninga [bãmb] sẽn na n paamã,” b sẽn bĩng b yĩng saasẽ wã. (Efɛɛz rãmba 1:13, 14; Kolos rãmba 1:5) Woto yĩnga, bãmb n yaa ‘bũmb nins sẽn be yĩngrã,’ t’a Zeova pĩnd n yãk b sõorã, n baood n na n tigim-b masã.
Bũmb fãa tigingã sɩngame
4. Wakat bʋg la wãn to la ‘bũmb nins sẽn be yĩngrã’ tiging sɩng-yã?
4 Wa sẽn zems ne a Zeova ‘sẽn sigind la a get yɛlã yell to-to wã,’ ‘bũmb fãa sẽn be yĩngrã’ tiging ra segd n sɩnga wakat ning Wẽnnaam sẽn yãk rẽ yĩngã sasa. (Efɛɛz rãmba 1:10) Wakat kãng taa yʋʋmd 33 Pãntekotã raare. Baraare, Wẽnnaam pʋdga vʋʋsem sõngã tʋm-tʋmdbã la karen-biis sull sẽn yaa rap la pagb zutu. (Tʋʋma 1:13-15; 2:1-4) Rẽ kõo kaset tɩ kaool paalgã lebga yel-sɩda, tɩ yɩ kiris-neb tigingã sɩngre, la tẽeb Israɛll bu-paalg sẽn yaa “Israɛll sẽn yaa Wẽnnaam dẽnda” sɩngre.—Galat dãmba 6:16; Hebre dãmba 9:15; 12:23, 24.
5. Bõe yĩng t’a Zeova ledg tẽng zug Israɛllã ne bu-paalga?
5 Tõogã kaool b sẽn maan ne tẽng zug Israɛllã pa kɩt tɩ b lebg ‘buud neb sẽn yɩ maan-kʋʋdb la neb sẽn welg Wẽnnaam yĩng’ sẽn na n tɩ tʋm saasẽ wakat sẽn pa sat yĩng ye. (Yikri 19:5, 6) A Zezi yeela Zʋɩf rãmbã tũudum taoor dãmb tɩ: “B na n deega Wẽnnaam soolem yãmb nengẽ n kõ buud ninga sẽn na n maan tʋʋm sẽn zemse.” (Matɩe 21:43) Yaa kiris-neb nins sẽn paam vʋʋsem sõng zaeebã b sẽn kẽes kaool paalgã pʋgẽ wã n yaa bu-kãngã, sẽn yaa tẽeb Israɛllã. Tʋm-tʋmd a Pɩɛɛr gʋlsa nin-kãensã woto: “Yãmb yaa nin-tũusdsi la naam maan-kʋʋdba la buud sẽn yaa sõama la nin-daadse, n na n wilg sẽn bool-a yãmb tɩ y yi lik pʋgẽ n kẽ bãmb vẽenem kãsenga pʋgẽ wã bõn-sõama wã fãa. Yãmb dag n ka burkĩmb ye, la masã yãmb yaa Wẽnnaam burkĩmba.” (1 Pɩɛɛr 2:9, 10) A Zeova ra pa le tar kaool ne tẽng zug Israɛllã ye. (Hebre dãmba 8:7-13) Wala a Zezi sẽn da reng n togsã, b reega zu-noog ning b sẽn da tar n tõe n zĩnd Mesi Rĩungã pʋgẽ wã n kõ tẽeb Israɛllã neb 144000.—Wilgri 7:4-8.
B kẽes-b-la Rĩungã kaool pʋgẽ
6, 7. Kaool bʋg la a Zezi maan ne a ba-biisã sẽn paam dogem paalg ne vʋʋsem sõng pãngã, la rẽ rat n yeelame tɩ bõe ne bãmba?
6 Yʋng ning a Zezi sẽn lugl a kũumã Tẽegrã, a yeela a tʋm-tʋmdb nins sẽn yɩ sakdbã woto: “Yãmb yaa neb sẽn pa ne maam m makra pʋgẽ n ka bas ye. Yaa woto yĩng la mam kõt yãmb soolem [“maand kaool ne yãmb rĩung yĩnga,” NW] wa m Ba sẽn kõ maam soolmã, tɩ yãmb tõe n zĩnd mam taablẽ m soolem pʋgẽ n dɩ la y yũ, la y zaoond gɛyã n kao Israɛll buud piig la a yiiba bʋʋdo.” (Luk 22:28-30) Ka wã, a Zezi ra gomda kaool sẽn yaa toor zall yelle, yẽ meng sẽn maan ne neb 144000 sẽn paam vʋʋsem sõng rogmã n lebg a ba-biisã, la sẽn na n “maan neer hal tɩ ta kũum” la b wilg tɩ b yaa ‘tõogdbã.’—Wilgri 2:10; 3:21.
7 Sul-kãngã neb sõor b sẽn yãkã sakame n pa na n kell n yɩ ninsaalb sẽn tar nems la zɩɩm n vɩɩmd tẽnga zug wakat fãa yĩng ye. B na n tɩ rɩɩ naam ne Kirist saasẽ, n zĩnd naam gɛy zut n kao ãdem-biisã bʋʋdo. (Wilgri 20:4, 6) Masã, bɩ d vaees verse rãmb a taab sẽn pidsd nin-kãensã sẽn paam vʋʋsem sõng zaeebã zut bala, tɩ rẽ wilgd bũmb ning sẽn kɩt tɩ piis a taabã pa wãbd burã la b yũ divẽ wã Tẽegrã wakatã.—Zã 10:16.
8. Bõe la sẽn paam-b vʋʋsem sõng zaeebã sẽn wãbd burã wilgda? (Ges-y zĩ-gũbr ning sẽn be seb-neng 15 pʋgẽ wã.)
8 Sẽn paam-b vʋʋsem sõng zaeebã namsda wa Kirist sẽn nams to-to wã, la b sakame n na n ki a kũumã buudu. A Poll sẽn yaa sul-kãng ned a ye wã yeelame t’a seglame n na n mong a meng bũmb buud fãa, sẽn na yɩl n “paam Kirist . . . n bãng bãmba la bãmb kũum vʋʋgr pãnga, la a paam lageng ne bãmb b namsga pʋgẽ.” N-ye, a Poll da sakame n na n “lebg yembr ne [Kirist a] kũumã pʋgẽ.” (Filip rãmba 3:8, 10) Kiris-neb wʋsg sẽn paam vʋʋsem sõng zaeeb paama ‘a Zezi kũumã namsg’ buudu.—2 Korẽnt dãmba 4:10.
9. Yaa yĩn-bʋg la a Zezi kũumã Tẽegr bur makda?
9 A Zezi sẽn da wa n lugund a kũumã Tẽegrã, a yeelame: “Yõwã yaa mam yĩnga.” (Mark 14:22) A ra gomda a yĩng meng-mengã b sẽn da na n pãb tɩ madg ne zɩɩmã yelle. Bur sẽn ka rabɩllã ra yaa makr sẽn zems ne yĩn-kãngã. Bõe yĩnga? Bala Biiblã pʋgẽ, rabɩll tõe n makda yel-wẽn bɩ wẽnem. (Matɩe 16:4, 11, 12; 1 Korẽnt dãmba 5:6-8) A Zezi ra zemsa zãnga, t’a yĩngã ra pa tar yel-wẽnd ye. A ra na n kõo yĩn-kãng sẽn zems zãngã tɩ yɩ maoong sẽn yẽesd yel-wẽnã. (Hebre dãmba 7:26; 1 Zã 2:2) Woto yaa bũmb sẽn da na n naf kiris-neb nins fãa sẽn yaa wẽn-sakdbã, sẽn saagd-b n na n wa vɩɩmd saasẽ la sẽn saagd-b n na n vɩɩmd tẽng zug arzãnẽ wã wakat sẽn pa sat yĩngã.—Zã 6:51
10. Wãn to la neb nins sẽn yũud divẽ wã a Zezi kũumã Tẽegrẽ wã ‘lagemd n deegd Kirist zɩɩm’?
10 A Poll gʋlsa woto divẽ ning kiris-neb nins sẽn paam vʋʋsem sõng zaeebã sẽn yũud a Zezi kũumã Tẽegrẽ wã wɛɛngẽ: “Bark bõn-yũudla tõnd sẽn ningd barkã, tõnd ka lagemd n deegd Kirist zɩɩm sɩda?” (1 Korẽnt dãmba 10:16) Wãn to la neb nins sẽn yũud divẽ wã fãa ‘lagemd n deegd Kirist zɩɩmã’? Yaa vẽeneg tɩ bãmb mengã pa lagemd n kõt b mengã tɩ yɩ maoong sẽn yaa yel-wẽnã rond ye, bala bãmb mensã ratame tɩ rondã yẽes b yel-wẽnã. Tẽeb ning b sẽn tar ne Kirist zɩɩmã sẽn tar tõog n na n yẽes yel-wẽnã maasem yĩnga, b paamda b yel-wẽnã sugri, tɩ Wẽnd togs tɩ b yaa tɩrse, tɩ b tõe n paam n tɩ vɩɩmd saasẽ. (Rom dãmba 5:8, 9; Tɩt 3:4-7) Yaa ne Kirist zɩɩmã sẽn daagã maasem la neb 144000 sẽn yaa Kirist na-rɩt-n-taasã na n paam n “yɩ sõama,” n welg toore, n paam yɩlgr ne yel-wẽnã sẽn na yɩl n yɩ “Sẽn ka to neba.” (Hebre dãmba 10:29; Daniɛll 7:18, 27; Efɛɛz rãmba 2:19) Yaa ne Kirist zɩɩmã sẽn daagã la a “fãag ninsaalb buud fãa bãmb goam sẽn yaa toor-toore, la b buud sẽn yaa toor-toore, la b soolem sẽn yaa toor-toora . . . tɩ bãmb lebg Wẽnnaam neba . . . tɩ b yɩ rĩm dãmb la maan–kʋʋdb tõnd Wẽnnaam yĩnga, la bãmb na n dɩɩ naam dũniyã zugu.”—Wilgri 5:9, 10.
11. Bõe la sẽn paam-b vʋʋsem sõng zaeebã wilgd ne b sẽn yũud divẽ wã a Zezi kũumã Tẽegrẽ wã?
11 A Zezi sẽn sɩng a kũumã Tẽegr maanegã, a rɩka divẽ wã kup n kõ a tʋm-tʋmdb hakɩkã n yeele: “Bɩ yãmb fãa yũ. Tɩ bõe, yõwã yaa mam zɩɩm sẽn yaa kãab paalg zɩɩm sẽn daag neb wʋsg yel-wẽna sugr yĩnga.” (Matɩe 26:27, 28) Wala lolsã la boeesã zɩɩmã sẽn da kɩt tɩ Tõogã Kaool zĩnd Wẽnnaam ne Israɛll buudã sʋkã, a Zezi me zɩɩmã kɩtame tɩ kaool paalg zĩnd a Zeova ne tẽeb Israɛllã sʋka, yʋʋmd 33 Pãntekotã tɛka. (Yikri 24:5-8; Luk 22:20; Hebre dãmba 9:14, 15) Sẽn paam-b vʋʋsem sõng zaeebã sẽn yũud divẽ wã sẽn makd kaoolã zɩɩmã, b wilgdame tɩ b tũus-b lame n kẽes kaool paalgã pʋgẽ, la tɩ b rɩta a nafa.
12. Wãn to la sẽn paam-b vʋʋsem sõng zaeebã paamd lisg Kirist kũumã pʋgẽ?
12 Bũmb a to me la b tẽegd neb nins sẽn paam vʋʋsem sõng zaeebã. A Zezi yeela a karen-bi-sakdbã tɩ: “Yãmb na n yũu bõn-yũudl ninga sẽn yaa tɩlae tɩ mam yũ wã, la y sak lisg ninga sẽn yaa tɩlae tɩ mam sakã.” (Mark 10:38, 39) Kaoosg zugẽ, tʋm-tʋmd a Poll goma kiris-nebã yell n yeel tɩ b reegda “lisg [Kirist] kũum pʋgẽ.” (Rom dãmba 6:3) Sẽn paam-b vʋʋsem sõng zaeebã vɩɩm yaa maoong vɩɩm. B kũumã yaa maoongo, b sẽn sak n bas tẽng zug vɩɩm sẽn kõn sa wã yĩnga. Kiris-nin-kãensã sẽn paam vʋʋsem sõng zaeebã lisg Kirist kũumã pʋgẽ wã pitame, b sã n wa ki wẽn-sakr pʋgẽ n paam vʋʋgr n lebg wa malɛgse, sẽn na yɩl n “dɩ naam” ne Kirist saasẽ wã.—2 Tɩmote 2:10-12; Rom dãmba 6:5; 1 Korẽnt dãmba 15:42-44, 50.
Divẽ wã yũubu, la burã wãbre
13. Bõe yĩng tɩ neb nins sẽn tar saagr n na n vɩɩmd tẽngã zugã pa wãbd Tẽegrã bur la b pa yũud a divẽ wã, la bõe yĩng tɩ b wat Tẽegrã?
13 Sẽn mik tɩ yaa neb nins sẽn na n tɩ vɩɩmd saasẽ wã bal n segd n wãb burã la b yũ divẽ wã Tẽegrã wakatã yĩnga, yaa vẽeneg tɩ pa segd tɩ neb nins sẽn tar saagr n na n vɩɩmd tẽng zug wakat sẽn pa satã wãb burã la b yũ divẽ wã ye. Neb nins sẽn tar saagr n na n vɩɩmd tẽng zugã neeme tɩ b pa paam vʋʋsem sõng zaeeb n be Kirist yĩngã pʋgẽ ye. B leb n neeme tɩ b pa be kaool paalgã a Zeova sẽn maan ne neb nins sẽn na n dɩ naam ne a Zezi Kiristã pʋgẽ ye. Sẽn mik tɩ ‘bõn-yũudlã’ makda kaool paalgã, yaa neb nins sẽn be kaool paalgã pʋgẽ wã bal n tõe n wãb burã la b yũ divẽ wã sẽn yaa bõn-makdsã. Ninsaalb nins sẽn na n paam vɩɩm sẽn pa sat zems-zãng pʋgẽ tẽng zug Rĩungã naam dɩɩb wakatã pa reegd lisg a Zezi kũumã pʋgẽ, b leb n pa bool-b tɩ b wa rɩ naam ne-a saasẽ. B sã n wãb burã la b yũ divẽ wã, b maanda bũmb sẽn pa segd ne-ba. Rẽnd b pa wãbd burã, b pa yũud divẽ wã me ye. La baa ne rẽ, b wata a Zezi kũumã Tẽegrẽ, n get a maanegã la b kelgd ne waoogre. B tara mi-beoog ne bũmb nins fãa a Zeova sẽn tũnug ne a Biriblã n kõ-bã. Wala makre, b tara mi-beoog b sẽn tõe n paam b yel-wẽnã sugr Kirist zɩɩmã sẽn daagã maasem yĩngã.
14. Neb nins sẽn paamd vʋʋsem sõng zaeebã sã n wãbd burã la b yũud divẽ wã, wãn to la rẽ kengd b tẽebã?
14 Kiris-neb nins sẽn na n tɩ rɩ naam ne Kirist saasẽ wã sõor sẽn yaa bilfã bãndã ningr zãng-zãng kolga a saabo. Hal tɩ ta b tẽng zug vɩɩmã sẽn yaa maoong vɩɩmã baasgẽ, sẽn paam-b vʋʋsem sõng zaeebã paamda pãng tẽebã wɛɛngẽ, b sẽn wãbd burã la b yũud divẽ wã a Zezi kũumã Tẽegr sasa wã yĩnga. Woto kɩtdame tɩ b neẽ tɩ b tara zems-n-taar ne b saam-biis nins sẽn yaa Kirist yĩngã nebã. B sẽn wãbd burã la b yũud divẽ wã sẽn yaa bõn-makdsã, tẽegd-b lame tɩ b segd n yɩɩ wẽn-sakdb hal n tɩ ta b kũum.—2 Pɩɛɛr 1:10, 11.
“Bũmb nins fãa sẽn be tẽng zugã” tigingu
15. Ãnd dãmb la b tigim kiris-neb nins sẽn paam vʋʋsem sõng zaeebã sɛɛgẽ?
15 Yʋʋmd 1935 wã tɛka, ‘piis a taabã’ sõor talla paasgo. B pa bãg-bilã neb ye. Sẽn paase, b tara saagr n na n vɩɩmd tẽng zug wakat sẽn-kõn-sa, la b teenda sẽn paam-b vʋʋsem sõng zaeebã. (Zã 10:16; Luk 12:32; Zakari 8:23) B lebga Kirist ba-biisã tũud-n-taas sẽn tar kɩs-sɩda, n sõngd-b n moond ‘Wẽnnaam soolmã koe-noog’ wʋsgo, sẽn na yɩl tɩ yɩ kaset tẽnsã fãa yĩnga. (Matɩe 24:14; 25:40) B sẽn maand woto wã, kɩtdame tɩ Kirist sã n na n wa kao tẽn-tẽnsã bʋʋd bɩ a yeel tɩ nin-kãens yaa a ‘piis’ sẽn be a ‘nug-rɩtgẽ’ sẽn makd lohorem zĩigã. (Matɩe 25:33-36, 46) B sẽn tar tẽeb ne Kirist zɩɩmã sẽn daagã yĩnga, b na n yɩɩ ‘kʋʋn-kãsenga,’ sẽn na n põs ‘to-kãsengã.’—Wilgri 7:9-14.
16. Ãnd dãmb n be ‘bũmb nins sẽn be tẽng zugã’ sʋka, la wãn to la nin-kãensã fãa na n paam n lebg “Wẽnnaam kamba”?
16 Neb 144000 bãndã ningr sã n wa sa fasɩ, b na n basa sãoong ‘sebdã’ tɩ b fug n sãam a Sʋɩtãan dũni wẽngã. (Wilgri 7:1-4) Kirist ne a na-rɩt-n-taasã sẽn yaa maan-kʋʋdbã yʋʋm tusr Naamã rɩɩb wakate, neb wʋsg b sẽn pa wilg b sõorã takɩ n na n vʋʋg n naag kʋʋn-kãsengã. (Wilgri 20:12, 13) Nin-kãens na n paama zu-noog n lebg Rĩm a Zezi Kirist sẽn yaa Mesi wã soolem neb wakat fãa tẽngã zugu. Yʋʋm tusr naamã rɩɩb saabẽ, ‘bũmb nins fãa sẽn be tẽng zugã’ na n paama baasg makre. B na n gesa neb nins fãa sẽn na n kell n tall b wẽn-sakrã wa “Wẽnnaam kamba.”—Efɛɛz rãmba 1:10; Rom dãmba 8:21; Wilgri 20:7, 8.
17. Wãn to la a Zeova raabã na n pidsi?
17 Woto, ne a Zeova sẽn sigind la a get yɛlã yell ne yam sẽn ka to wã maasem, a na n pidsa a raabã, sẽn yaa ‘tigs bũmb nins fãa sẽn be yĩngr la sẽn be tẽng zugã tɩ b sak naab a yembre: Kiristã.’ Saasẽ la tẽng zug rãmbã fãa na n le tigma taab laafɩ pʋgẽ, n sakd a Zeova sẽn tar daab sẽn yaa kãseng n pidsd-a wã naamã sẽn yaa tɩrgã.
18. Wãn to la sẽn paam-b vʋʋsem sõng zaeebã ne b tũud-n-taasã na n dɩ a Zezi kũumã Tẽegrẽ sẽn watã nafa?
18 Ad sɩd na n yɩɩ bũmb sẽn na n keng sẽn paam-b vʋʋsem sõng zaeebã sõor sẽn yaa bilfã la piis a taabã sẽn yaa neb milyõ rãmbã sẽn yaa b tũud-n-taasã tẽebo, b sã n tigim taab yʋʋmd 2006 tʋʋl-nif kiuug rasem 12 wã raare. B fãa na n maana Kirist kũumã Tẽegr wa a Zezi mengã sẽn kõ noorã woto wã: “Bɩ y maand bõn-kãnga n tẽegd mam yelle.” (Luk 22:19) Neb nins fãa sẽn na n wa wã segd n tẽega a Zeova sẽn maan bũmb ning n kõ-b ne a Biribl a Zezi Kirist maasem yĩngã.
Lebg-n-gese
• A Zeova raab ne bũmb nins sẽn be saasẽ la tẽng zugã yaa bõe?
• Ãnd dãmb la ‘bũmb nins sẽn be saasẽ’ wã, la wãn to la b tigim-ba?
• Ãnd dãmb la ‘bũmb nins sẽn be tẽng zugã,’ la b tara saag-bʋgo?
[Zãmsgã sogsgã]
[Zĩ-gũbri, seb-neng 15]
“Kirist yĩngã”
Pipi Korẽnt dãmba 10:16, 17 pʋgẽ, a Poll sẽn da wa n gomd Kirist ba-biisã sẽn paam vʋʋsem sõng zaeebã sẽn wãbd burã t’a võorã tagme wã yellã, a wilgame tɩ “yĩngã” võor yaa toor zalle. A yeelame: “Bura tõnd sẽn kaoodã, tõnd ka lagemd n deegd Kirist yĩnga sɩda? A sẽn yaa bur a yembra yĩnga, tõnd sẽn yaa wʋsgã, tõnd lebga yĩng a yembre; tɩ bõe, tõnd fãa rɩta bur a yembre.” Kiris-neb nins sẽn paam vʋʋsem sõng zaeebã sẽn wãbd Tẽegrã burã, b togsda b zems-n-taare, sẽn paam-b vʋʋsem sõng zaeebã tiging b sẽn mak ne yĩng tɩ Kirist yaa a zugã pʋgẽ.—Matɩe 23:10; 1 Korẽnt dãmba 12:12, 13, 18.
[Foto rãmba, seb-neng 15]
Bõe yĩng tɩ yaa sẽn paam-b vʋʋsem sõng zaeebã bal n wãbd burã la b yũud divẽ wã?
[Foto, seb-neng 17]
Ne a Zeova sẽn sigind la a get yɛlã yell to-to wã maasem, sẽn be-b saasẽ la tẽng zugã fãa na n ye paama zems-n-taare