D kẽn sor vẽenem sẽn tar paasgã zugu
D kẽn sor vẽenem sẽn tar paasgã zugu
“Nin-sõng sor yaa wa sõ-pukri n paasd vẽenem hal tɩ ta sõ-bɩɩmde.”—YELBŨNA 4:18.
1, 2. Tẽebã vẽenem sẽn yit a Zeova nengẽ wã maasem yĩnga, bõe la Wẽnnaam nin-buiidã paam-yã?
ÃND n tõe n sɩd bilg wĩndg vẽenem sẽn pukd n digd likã to-to wã, n yɩɩd a Zeova sẽn yaa vẽenemã Yẽgrã? (Yɩɩl Sõamyã 36:10) Wẽnnaam yeelame tɩ “zĩig sã n yẽege, dũniyã tekda wa ned sẽn dɩk yagd n maan dʋko wala ned sẽn los fuug gare.” (Zoob 38:12-14) Wĩntoogã sã n zẽkdẽ, zĩigã lebgda vẽeneg me n paasdẽ, wala ned sẽn tʋmd ne yagd hal t’a wa lebg rʋkã.
2 A Zeova n leb n yaa tẽebã vẽenem Yẽgre. (Yɩɩl Sõamyã 43:3) Baa ne dũniyã sẽn be lik bida pʋgẽ wã, sɩd Wẽnnaam a Zeova yẽ ket n vẽnegda a nin-buiidã. Tɩ rẽ wat ne bõe? Biiblã leokdame: “Nin-sõng sor yaa wa sõ-pukri n paasd vẽenem hal tɩ ta sõ-bɩɩmde.” (Yelbũna 4:18) Vẽenemã sẽn yit a Zeova nengẽ wã sẽn tar paasga ket n vẽnegda a nin-buiidã sorã. A manegda b sẽn sigl to-to wã, b tẽebã zãms-yẽgã, la b vɩɩm manesmã n paasdẽ.
Tẽebã vẽenem kɩtame tɩ b maneg b sẽn da sigl to-to wã
3. Bõe la b kãab Ezai 60:17 pʋgẽ?
3 A Zeova reng n togsa woto ne no-rɛɛs a Ezai maasem: “Mam na n waa ne sãnem t’a reeg zũud zĩiga la m wa ne wanzũri n kɩt t’a reeg kut zĩiga tɩ zũud reeg raad zĩiga tɩ kut me reeg kug zĩiga.” (Ezai 60:17) Wala b sẽn na n dɩk bõn-sõng n ledg bũmb sõmblem sẽn pa ta yẽ tɩ yaa manegrã, woto me, “dũniyã sɛɛb wakate,” bɩ ‘yaoolem wakat’ kãensã sasa, a Zeova Kaset rãmbã paamame tɩ b maneg b sẽn da sigl to-to wã.—Matɩe 24:3; 2 Tɩmote 3:1.
4. Segl-bʋg la b rɩk yʋʋmd 1919, la bõe yĩng t’a ra be nafre?
4 Dũni wẽng kãngã yaoolem wakatã sɩngrẽ, a Zeova Kaset rãmbã b sẽn da boond rẽ wẽnd tɩ Biiblã Zãmsdbã ra votda b kãsem dãmbã la b sõngdbã b sẽn da boond tɩ diakr dãmbã. La kãsem dãmb kẽer sɩd ra pa tʋll n moon koe-noogã ye. Kẽer da pa rat n moon koe-noogã, la sẽn paase, b ra komsda neb a taabã raood ne koe-noogã mooneg me. Rẽ n so tɩ yʋʋmd 1919 wã, b yãk tʋʋmd taoor lʋɩt tiging fãa pʋgẽ. Ra pa tigingã neb n votd tʋʋmd taoor lʋɩtã ye, la ra yaa Wẽnnaam nin-buiidã tʋʋmd will n yãkd-a tɩ zems ne Wẽnnaam sor-wilgri. Taoor lʋɩt ning b sẽn yãkã ra segd n sigla koe-moonegã tʋʋmde, n pʋɩ moonegã zĩisi, la a keng tigingã neb raood tɩ b kẽes b mens koe-noogã moonegẽ. Rĩungã mooneg tʋʋmd paama pãng hal wʋsg yʋʋm nins sẽn pʋglã sasa.
5. Maneg bʋs n zĩnd yʋʋmd 1920 la 1930 sʋkã?
5 Nebã fãa sẽn da be tigimsã pʋsẽ wã ra paama pãng n paas ne sagl-kãngã b sẽn kõ yʋʋmd 1922, Biiblã Zãmsdb tigis-kãsengẽ sẽn zĩnd Sedaar Põent, Ohio soolmã sẽn be Etazini wã pʋgẽ wã: “Moon-y-yã, moon-y-yã, moon-y Rĩmã la a Rĩungã.” Yʋʋmd 1927, b sigla koe-noogã mooneg yiib hal n kɩt tɩ b yãk hat daar n da getẽ tɩ yaa daar ning sẽn zems n yɩɩd ne zak-zak koe-noogã moonegã. Bõe yĩng tɩ b yãk ra-kãnga? Yaa neb wʋsg sẽn pa tʋmd hat daarã yĩnga. Rũndã-rũndã, a Zeova Kaset rãmbã ket n tara yam-kãng buudu, n maood n tʋgd n yãt nebã b sẽn tõe n yã-b yir sasa nins n yɩɩdã, wala makre wɩkɛn dãmbã la zaaba wã.
6. Yʋʋmd 1931, no-sɩɩr bʋg la b maan-yã, la wãn to la rẽ sõng ne Rĩungã moonego?
6 Yʋʋmd 1931, sẽoog kiuug rasem 26 sẽn yɩ hat daarã zaabre, tigis-kãseng sẽn zĩnd Kolõmbus, Ohio soolmã sẽn be Etazini wã wakate, b reng n dɩka no-sɩɩre. Rẽ poore, b saka no-sɩɩr kãng dũniyã gill zugu, tɩ kɩt tɩ Rĩungã mooneg tʋʋmd paam pãng wʋsg n paase. Goam nins sẽn pʋgdã ra bee no-sɩɩrã pʋgẽ: “Tõnd yaa Wẽnnaam a Zeova sõgen dãmb a sẽn tʋm tɩ d tɩ tʋm tʋʋmd a yʋʋr yĩnga, tɩ tõnd sakd no-kãngã, n taasd koɛɛg ning a Zezi Kirist sẽn moonã, la d kɩtdẽ tɩ nebã bãngd t’a Zeova la sɩd Wẽnnaam pãng sẽn ka to wã. Woto yĩnga, ne sũ-noogo, tõnd sakame n na n zã yʋʋr ning Soaal a Wẽnd meng sẽn togs ne a noorã, la d ratame tɩ b bãng-d ne a yʋʋrã la b bool-d ne yʋʋr ning sẽn yaa: a Zeova Kaset rãmbã.” (Ezai 43:10, NW) Ad yʋ-paall kãngã sɩd wilga tʋʋmd ning neb nins sẽn zãad-a wã sẽn lʋɩɩsd taoor b vɩɩmã pʋgẽ wã! N-ye, a Zeova ra tara tʋʋmd n na n bobl a sõgen dãmbã fãa. Neb wʋsg saka no-sɩɩr kãngã ne yẽesem.
7. Toeen-bʋg la b wa ne yʋʋmd 1932, la bõe yĩnga?
7 Kãsem dãmb wʋsg modga ne sik-m-meng n moon koe-noogã ne yẽesem. La zĩis kẽere, kãsem dãmb b sẽn vot kɩɩsa b sẽn yeel tɩ yaa tigingã neb fãa n segd n moon koe-noogã wʋsgo. La remsg n da na n pʋgl tao-tao. Yʋʋmd 1932, ne Gũusg Gasgã tũnugri, b taasa tigimsã noor sẽn da yet tɩ b pa segd n le vot kãsem dãmbã la kãsem sõngdbã ye. Baasgo, b ra segd n ket n votda rap sull sẽn da na n ges koe-moonegã yelle. La ra segd n yɩɩ neb sẽn tar tẽeb sõma, la sẽn da kẽesd b meng koe-noogã moonegẽ wʋsgã. Rẽnd b rɩka taoor-lʋɩɩrã n bobl neb nins sẽn da moond koe-noogã wʋsgã masã, la rẽ kɩtame tɩ tʋʋmdã kẽng taoor sõma.
Vẽenemã paasg waa ne remsg a taab yɛsa
8. Rems-bʋg n zĩnd yʋʋmd 1938?
8 Vẽenemã ra ket n ‘paasdame.’ Yʋʋmd 1938, b basa votg buud fãa. Ra yaa ‘tʋm-tʋmd sẽn tũud sɩd la sẽn tar yamã’ n da yãkd tigingã taoor lʋɩtb la b sõngdbã fãa tɩ zems ne Wẽnnaam sor-wilgrã. (Matɩe 24:45-47) A Zeova Kaset rãmbã tigims fãa la bal saka toeen-kãngã, tɩ koe-noogã mooneg kell n wom biis n paase.
9. Yʋʋmd 1972, segl-bʋg la b lugl-yã, la bõe yĩng tɩ woto ra yaa manegre?
9 Yʋʋmd 1972, zĩ-likr kiuug pipi daarã tɛka, remsg a to n wa tigimsã yell gesg wɛɛngẽ. B lugla kãsem dãmb sul tɩ b get a Zeova Kaset rãmbã tigims sẽn be dũniyã gill zugã yelle. Ye pa kãsem soab a yembr bal n get tigingã yɛl yell ye. Segl-paalg kãng kenga rap nins sẽn bɩ tẽebã pʋgẽ wã pels wʋsgo, tɩ b bao n na n bɩ n paas n wa tõog n lʋɩ taoor tigingã yɛl gesgẽ. (1 Tɩmote 3:1-7) Rẽ kɩtame tɩ rap wʋsg paam minim tigingã yɛl gesg wɛɛngẽ. Woto, b sõnga nin-paals wʋsg sẽn sak Biiblã zãmsgã tɩ b bɩ tẽebã pʋgẽ. Woto sɩd talla yõod wʋsgo!
10. Segl-bʋg la b lugl yʋʋmd 1976?
10 Siglgã taoor lʋɩtb ra sigla sul a yoob pʋgẽ, la yʋʋmd 1976, yʋʋm-vẽkr kiuug pipi daarã tɛka, yaa sul-kãens n get siglgã la tigimsã tʋʋm fãa sẽn be dũniyã gill zugã yelle. Sẽn lebg “sagendb wʋsg” n get Rĩungã tʋʋmd nens fãa yellã, sɩd yɩɩ bark bũmb menga!—Yelbũna 15:22; 24:6.
11. Maneg-bʋg n zĩnd yʋʋmd 1992, la bõe yĩnga?
11 Yʋʋmd 1992, manegr a to n zĩndi. Yɩɩ manegr sẽn wõneg sẽn da zĩnd Israɛlle. Yɩɩ wakat ning Israɛll nebã la bu-zẽms neb a taab sẽn da be ne-bã sẽn wa n yi b yembdã weoog Babilon n wa wã poorã. Rẽ wẽnde, Levi rãmbã sẽn da segd n ges wẽn-doogã tʋʋmã yellã sõor ra pa sekd ye. Woto n so tɩ b kõ Netinim dãmbã sẽn da pa Israɛll nebã tʋʋm n paase, sẽn na yɩl n sõng Levi rãmbã. Woto me, sẽn na yɩl n sõng tʋm-tʋmd sẽn tũud sɩd la sẽn tar yamã sull t’a ges a tẽng zug tʋʋmã sẽn tar paasgã yelle, yʋʋmd 1992, ‘piis a taabã’ neb sãnda paama zɩɩb n paas Wẽnnaam tʋʋmdã pʋgẽ. B yãk-b lame tɩ b sõng Siglgã taoor lʋɩtb Sula.—Zã 10:16.
12. Wãn to la a Zeova kɩt tɩ laafɩ soog tõndo?
12 Woto fãa waa ne bõe? A Zeova yeela woto: “Mam na n kɩtame tɩ laafɩ soog foom tɩ tɩrlem lebg fo tʋʋm soaadba.” (Ezai 60:17) Rũndã-rũndã, “laafɩ” bee a Zeova sõgen dãmbã sʋka, la ‘tɩrlmã’ nonglem me lebga b “tʋʋm soaadba,” dat n yeel tɩ yaa b sẽn nong tɩrlmã n kɩt tɩ b balemd Wẽnnaam. B sigla sõma sẽn na yɩl n pids Rĩungã mooneg la karen-biisã maaneg tʋʋmde.—Matɩe 24:14; 28:19, 20.
A Zeova vẽnega a nin-buiidã tẽebã zãms-yẽg zutu
13. Wãn to la a Zeova vẽneg a nin-buiidã tẽebã zãms-yẽgã wɛɛngẽ yʋʋmd 1925 wã tɛka?
13 Bilf-bilfu, a Zeova leb n vẽnega a nin-buiidã tẽebã zãms-yẽg wɛɛngẽ. Makr a yembr sẽn wilgd rẽ yaa sẽn be Wilgri 12:1-9 pʋgẽ wã. Biiblã kiba-kãngã gomda yɛl a tãab yelle, tɩ yell fãa makd bũmbu. A gomda “pag” sẽn tʋt sẽn dog biiga, “dragõ” la “biribl” yelle. Yãmb mii bõn-kãensã sẽn makd bũmb nins bɩ? B wilga b sẽn makd bũmb ninsã sõsg gom-zug sẽn yaa: “Buud rogem,” sẽn yi yʋʋmd 1925, tʋʋlg kiuug pipi daar Gũusg Gasgã (ne ãngilindã) pʋgẽ. Sõs-kãngã sõnga Wẽnnaam nin-buiidã tɩ b wʋm bãngr-goam nins sẽn gomd Rĩungã rogem yellã võor n paase. Rẽ kɩtame tɩ b bãng vẽeneg tɩ sigls a yiib sẽn welg toor n be. Yaa a Zeova siglgã la a Sʋɩtãan siglgã. Rẽ poore, yʋʋmd 1927 la 1928, Wẽnnaam nin-buiidã bãngame tɩ Nowɛllã la rogem tẽegr kibs rãmbã kɩɩsda Gʋlsg Sõamyã, tɩ b bas n le pa maand-b ye.
14. Tẽebã zãms-yẽg bʋs la b vẽneg yʋʋmd 1930 wã tɛka?
14 Yʋʋmd 1930 wã tɛka, b paama vẽnegr sɩdã zãms-yẽg a tãab zutu. Hal yʋʋm wʋsg sẽn denge, Biiblã Zãmsdb bãngame tɩ ‘kʋʋn-kãsengã’ yell b sẽn gom Wilgri 7:9-17 wã yaa toor ne neb 144000, sẽn yaa neb sẽn na n yɩ maan-kʋʋdb la rĩm dãmb n dɩ naam ne Kiristã. (Wilgri 5:9, 10; 14:1-5) Baasg zãnga, b ra ket n pa mi kʋʋn-kãsengã sẽn da yaa neb sull ningã vẽeneg ye. Wala sõ-bɩɩmd sẽn kɩtd tɩ bũmb nins sẽn da pa vẽenegã puk vẽenegã, woto me, yʋʋmd 1935, b bãngame tɩ kʋʋn-kãsengã yaa neb nins sẽn na n põs ‘to-kãsengã’ tɩ b saagr yaa b vɩɩmd wakat sẽn-kõn-sa tẽng zugã. Yʋʋm-kãng pʋgẽ me, tẽns wʋsg pʋsẽ, vẽnegr sẽn da pak a Zeova Kaset rãmbã kamb nins sẽn da yaa karen-biisã la b wa ne. Rẽ tɩ tẽng-n-biilmã yell da wita wa bugum dũniyã gill zugu. Sasa kãnga, a Zeova Kaset rãmbã bãngame tɩ darpo wã pʋʋsg ra pa rok-m-zugẽ bũmb bal ye. Yʋʋmd ning sẽn pʋglã, b wilgame me tɩ Kirist kii ra-luk zugu, la pa ra-pɩk zug ye.—Tʋʋma 10:39, NW.
15. Wakat bʋgo, la wãn to la b bãng vẽeneg tɩ zɩɩmã yaa bõn-kãseng Wẽnnaam nifẽ?
15 Dũni gill zabr a yiib-n-soabã sasa, b ra minim n tɩbsda sodaas nins sẽn poglã n ningd-b zɩɩm. Zabrã poor bala, Wẽnnaam vẽnega a sõgen dãmbã n wilg-b tɩ zɩɩmã yaa bõn-kãseng a nifẽ. Yʋʋmd 1945, sẽoog kiuug pipi daar Gũusg Gasgã sagla “a Zeova balemdb nins fãa sẽn baood vɩɩm sẽn pa satã a dũni paalgã sẽn na n yɩ tɩrgã pʋgẽ wã tɩ b tall waoogr ne zɩɩmã sẽn yaa bõn-kãseng Wẽnnaam nifẽ wã, la b sak n tũ no-tɩrs nins Wẽnnaam sẽn kõ yel-kãngã sẽn pa reem yellã zugã.”
16. Wakat bʋg la b yiis Les Saintes Écritures — Traduction du monde nouveau wã, la rẽ yĩnga y tõe n sõdga yɛl a yiib sẽn welgd-a ne Biibl dãmb a taabã bɩ?
16 Yʋʋmd 1946, b yãame tɩ b ra segd n lebga Biiblã, tɩ zems ne bãng-yaoogã, la a ra yɩ lebgr sẽn tar zãms-kɛg nins sẽn tik kiris-neb ne yʋʋr tũudmã rog-n-migsã zut ye. B sɩnga lebg-kãng yʋʋmd 1947, yʋʋm-sar kiuugu. Yʋʋmd 1950, b yiisa Les Écritures grecques chrétiennes — Traduction du monde nouveau ne ãngilindi. Bilf-bilfu, sẽn sɩng ne yʋʋmd 1953 tɛka, b lebga Hebre Gʋlsg Sõamyã sɛb a nu pʋgẽ. B yiisa seb-kãensã yaoolem soabã yʋʋmd 1960, lebgrã tʋʋmd sẽn wa n sɩng tɩ yʋʋm 12 la kiis a wãn poore. Yʋʋmd 1961, b yiisa Biiblã gill seb-yɛng pʋgẽ, tɩ b boond tɩ Les Saintes Écritures — Traduction du monde nouveau. Lebg-kãngã sẽn be buud-goam wʋsg pʋsẽ masã wã pa wõnd a taabã ye. B lebg n ninga Wẽnnaam yʋʋrã sẽn yaa Zeova wã be. Sẽn paase, b sẽn lebg-a tɩ sɩd zems kɛpɩ wala pipi goamã Wẽnnaam sẽn vẽneg tɩ b gʋlsã kɩtame tɩ nebã tõog n bãng sɩd ning Wẽnnaam sẽn taasdã n paase.
17. Vẽneg-bʋg la b wa ne yʋʋmd 1962?
17 Yʋʋmd 1962, vẽnegr la b wa ne ‘pãn-soaadb sẽn yɩɩdã’ yell b sẽn gom Rom dãmba 13:1 (Kãab-paalgã Koe-noogo) pʋgẽ wã zugu, la b vẽneg n wilg kiris-nebã sẽn segd n sak-b to-to wã me. Rom dãmb sak 13 la verse rãmb wala Tɩt 3:1, 2 la 1 Pɩɛɛr 2:13, 17 vaeesg neer wilga vẽeneg tɩ ‘pãn-soaadb sẽn yɩɩdã’ pa Wẽnnaam a Zeova la a Zezi Kirist ye, la yaa ninsaalbã goosneema rãmbã pãn-soaadba.
18. Sɩd bʋs võor la b vẽneg yʋʋmd 1980 wã tɛka?
18 Yʋʋm nins sẽn pʋglã, nin-tɩrsã sor paama vẽnegr n paase. Yʋʋmd 1985, b waa ne vẽenem goam nins sẽn yaa: f yaa tɩrg n zems ne vɩɩmã, la tɩ f yaa nin-tɩrg sẽn yaa Wẽnnaam zoa wã zutu. (Rom dãmba 5:18; Zak 2:23) B wilga kiris-nebã Zibile bɩ kɩdeng wakatã võor zãng yʋʋmd 1987.
19. Wãn to la a Zeova vẽneg a nin-buiidã tẽeb n paas yʋʋm sẽn pa kaoosã pʋsẽ?
19 Yʋʋmd 1995, b wʋma “piisã” la “bʋʋsã” welgr võor n paase. Yʋʋmd 1998, b wilga vẽnegr ning a Ezekɩɛll sẽn yã wẽn-doogã wɛɛngẽ wã sẽn zoe n paamd pidsgã võor n fasem. Yʋʋmd 1999, b wilga ‘sãoong bõn-wẽngã sẽn yas zĩ-sõnga pʋgẽ’ wã sẽn pids to-to la wakat ningã. (Matɩe 24:15, 16; 25:32) Sẽn paase, yʋʋmd 2002, d bãnga balem Wẽnnaam ne d sɩɩs bɩ d yam, la ne sɩdã sẽn dat n yɛɛlga.—Zã 4:24.
20. Zĩ-bʋs wɛɛngẽ me la Wẽnnaam nin-buiidã paam remsgo?
20 Kiris-nebã sẽn sigl to-to wã la b tẽebã zãms-yẽgã remsg sẽn yãk a toogo, remsg me la b wa ne kiris-nebã yel-manesem pʋgẽ. Wala makre, yʋʋmd 1973, b bãngame tɩ tabã rɩɩb la sɩgaarã yũub yaa bũmb sẽn ‘dẽgemd yĩngã,’ la a yaa beeg-kãsenga. (2 Korẽnt dãmba 7:1) Yʋʋm piig poore, yʋʋmd 1983, zĩ-likr kiuug rasem 15 Gũusg Gasgã (ne farende) wilga tõnd tagsg sẽn yaa a soab ne bug-raadã rɩk-n-tʋme. Woto yaa makr a wãn bal sẽn wilgd vẽenemã sẽn paas tõnd wakatã.
Ket-y n kẽnd-y sor ning vẽenem sẽn tar paasgã zugu
21. Yaa d sẽn na n tall tags-bʋg la na n sõng-d tɩ d kẽn sor ning vẽenem sẽn tar paasgã zugu?
21 Saam-biig a yembr sẽn yaa kãsem soab hal sẽn kaoos yeela woto: “Sɩd sak toeeng tõe n yɩɩ toogo.” La yaa bõe n sõng-a t’a sak remsg wʋsg nins a sẽn yã yʋʋm 48 wã pʋsẽ a sẽn yɩ Rĩungã koe-moondã? A leokame: “Yaa m sẽn tall tagsg ning sẽn zemsã yĩnga. F sã n zãgs remsgo, siglgã kẽngda taoor n bas-f poorẽ. Toeeng sakr sã n wa yaa toog ne maam, m tagsda goam nins a Pɩɛɛr sẽn taas a Zezi woto wã zutu: ‘Zusoaba, tõnd na n basa yãmb n kẽng ãnda nengẽ? Yãmb tara vɩɩm sẽn ka sɛt goama.’ Rẽ poore m sokda m menga: ‘Yɛ la m na n kẽnge? M na n leba dũniyã lik pʋgẽ bɩ?’ M sẽn tagsd woto wã, sõngd-m lame tɩ m gãt Wẽnnaam siglgã kãn-kãe.”—Zã 6:68.
22. Wãn to la vẽenemã pʋgẽ kẽnd nafd tõndo?
22 Dũniyã sẽn gũbg tõndã sɩd bee lik bida pʋgẽ. A Zeova yẽ ket n vẽnegda a nin-buiidã, tɩ kɩt tɩ welgr ning sẽn be bãmb ne dũniyã nebã sʋkã tar paasgo. Yaa wãn to la vẽenem kãng nafd tõndo? Wala vẽenem sẽn tʋrs sor sẽn yaa lik zug sẽn pa yiisd bokã, vẽenem ning sẽn yit Wẽnnaam Gomdã pʋgẽ wã me pa yiisd bẽdsã ye. La Wẽnnaam vẽenemã sɩd sõngda tõnd tɩ d gil bẽdsã la d ket n kẽnd sor ning vẽenem sẽn tar paasgã zugu. Woto yĩnga, bɩ d ket n tũud a Zeova bãngr-gomdã, ‘wa fɩtl sẽn yãgd lik zĩigẽ.’—2 Pɩɛɛr 1:19.
Y tẽrame bɩ?
• A Zeova waa ne rems-bʋs a nin-buiidã sẽn sigl to-to wã wɛɛngẽ?
• Vẽenemã paasg waa ne rems-bʋs tẽebã zãms-yẽg zutu?
• Rems-bʋs la yãmb mengã yã-yã, la yaa bõe n sõng yãmb tɩ y sak-ba?
• Bõe yĩng tɩ y rat n ket n kẽnd vẽenemã sẽn tar paasgã sor zugu?
[Zãmsgã sogsgã]
[Foto, rãmba, seb-neng 19]
Yʋʋmd 1922, Ohio, Sedaar Põent tigis-kãsengã kõo Biiblã Zãmsdb raood tɩ b tʋm Wẽnnaam tʋʋmdã
[Foto, seb-neng 21]
A Natã Noor sẽn wilgd Les Écritures grecques chrétiennes — Traduction du monde nouveau wã yiib yʋʋmd 1950 wã
[Foto soaadba, seb-neng 18]
© 2003 BiblePlaces.com