Tõnd rata Mesi bɩ?

TÕE tɩ yãmb mi n sokda y mens n get tõnd sã n sɩd rata Mesi. Sɩd zemsame tɩ y mi n sok y mens n ges Mesi wã belem sã n sɩd tara yõod ne-yã.

Neb kẽer yãmb sẽn nand sõma tõe n yeel-y-la ne bas-m-yam tɩ sok-kãngã leokr yaa nana la vẽenega: Yãmb me rata Mesi wã wa neb a taaba fãa sẽn dat-a wã. Zʋɩf rãmba laloa mit a ye sẽn vɩɩmd a Zezi pipi karen-biisã zãmaanẽ gʋlsame n yeel tɩ: “Wẽnnaam kãabg fãa yaa n-ye Kirist maasem yĩnga.” Ne a sẽn yeel woto wã, a wilga vẽeneg tɩ Mesi wã tʋʋmd yaa kãseng wʋsg tõnd Naandã raab ning sẽn yaa a bark buuda fãa wã pʋgẽ. (2 Korẽnt dãmba 1:20) Mesi wã tʋʋmd yaa kãseng wʋsg hal tɩ Biiblã bãngr-goamã fãa tik a waoogã la a vɩɩmã tẽng zug ka wã zugu. Porfesɛɛr a Henry Halley yeela seb-bil a ye neb milyõ rãmb sẽn karemd sẽn zems yʋʋm 70 tɛk n tar n watẽ wã pʋgẽ tɩ: “B gʋlsa Kãab Kʋdgã n na n deng n pak sor la b maneg zĩig [Mesi wã] waoong yĩnga.” La rẽ yĩnga Mesi wã waoog yaa tɩlae bɩ? Bõe yĩng tɩ rẽ segd n pak yãmba?

Gom-biig ning sẽn yaa “Mesi” wã võor meng–mengã yaa: “B sẽn zae-a soabã,” la a võorã yaa ye ne gom-biig ning sẽn yaa “Kirist” neb wʋsg sẽn mi sõma wã. Bãngr sebr a yembr (Encyclopædia Britannica) goma Mesi wã yell n yeel t’a yaa “fãagd sẽn ka to” sẽn da segd n wa, kɩɩsg tʋʋmd ning tõnd pipi yaab rãmb a Ãdem ne Hawa sẽn da maanã yĩnga. B sẽn wa n naan-bã sasa, rẽ tɩ b ra pa tar yel-wẽnd ye, la b ra tara zu-noog n na n vɩɩmd wakat sẽn-kõn-sa Arzãn pʋgẽ, la b konga rẽ fãa. Malɛg-tõtr a ye, yʋʋr sẽn lebg a Sʋɩtãanã yeela tõnd yaab rãmbã tɩ Wẽnnaam kõt-b-la noy sẽn yaa tood wʋsgo, tɩ sẽn da yaa sõma ne bãmb n yɩɩd yaa b sẽn na n yãkd sẽn yaa sõma bɩ wẽngã b toore.—Sɩngre 3:1-5.

B belga a Hawa t’a sak n tẽ ziri-n-be-kãnga. A Ãdem gesa a pagã tũud-n-taar wa bũmb sẽn tar yõod n yɩɩd Wẽnnaam sakre, tɩ rẽ kɩt t’a pʋg a Sʋɩtãan a kɩɩsgã pʋgẽ. (Sɩngre 3:6; 1 Tɩmote 2:14) B sẽn maan woto wã, ka bãmb mens vɩɩm sẽn-kõn-sa arzãnã pʋgẽ wã bal la b kongẽ ye. B bẽega b kambã la hal baa b yagensã fãa yel-wẽnã la a sẽn wat ne bũmb ningã, rat n yeel tɩ kũumã.—Rom dãmba 5:12.

Zĩig pʋgẽ, tõnd Naand a Zeova waa ne yellã tɩɩm, sẽn na yɩl n wa menes yel-beed nins sẽn na n pʋg taab n wa kɩɩsgã yĩngã. A Zeova tũu tɩrlem noor n kɩt tɩ zems taab na n ye wa zĩndi. Yaa noor ning sẽn yet tɩ vɩɩm vɩɩm yĩngã. No-kãng la a Moiiz Tõogã sẽn wa n togs vẽenegã. (Tõodo 19:21; 1 Zã 3:8) No-kãng tũub ra yaa tɩlae, sẽn na yɩl tɩ ãdem-biisã wa tõog n vɩɩmd wakat sẽn-kõn-sa tẽng sẽn na n yɩ arzãn pʋgẽ, wa Naandã sẽn da rat tɩ yɩ to-to ninsaalbã fãa yĩng sɩngrẽ wã. Rẽ n kɩt tɩ Mesi wã waoog ra yaa tɩlae wã.

Beegrã poore, a Zeova ninga a Sʋɩtãan taal n togs gom-kãensã sẽn yaa Biiblã pipi bãngr gomdã: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng na n pogla fo zugu, la fo na n pogla yẽ na-kãsenkãare.” (Sɩngre 3:15) Biibl-mit a ye wilgame tɩ: “Gʋlsg Sõamyã bãngr-goam nins sẽn gomd Mesi wã waoong yellã sʋka, yaa gom-kãensã la pipi soaba.” Bãngd a to me yeelame tɩ yaa ne Mesi wã la Wẽnnaam na n tũnug n “menes tood nins fãa beegrã sẽn wa ne wã” la a bark ãdem-biisã.—Hebre dãmba 2:14, 15.

La baasgo rũndã-rũndã wã, yaa vẽeneg tɩ neba ka vɩ bark vɩɩm kãnga ye. Sẽn yaa lebend menga, neba wʋsg vɩɩ saagr kaalem pʋgẽ. Rẽ n so tɩ bãngr sebr a ye (The World Book Encyclopedia) yeel tɩ “Zʋɩf rãmba wʋsg ket n gũudame tɩ Mesi wã wa” la a wa “menes wẽnga la a sãam b bɛɛbã fãa.” Biiblã yaool n wilgdame tɩ Mesi wã zoe n waame.