Yɛl gesgo, Wẽnnaam daabã pidsg yĩnga

“[Wẽnnaam n] kɩtd tɩ bũmb fãa sak bãmb daabã.”—EFƐƐZ RÃMBA 1:11.

1. Bõe yĩng t’a Zeova Kaset rãmbã tigims fãa na n seg taab tʋʋl-nif kiuug rasem 12, yʋʋmd 2006?

ARBÃ daar zaabre, yʋʋmd 2006, tʋʋl-nif kiuug rasem 12, neb sẽn na ta milyõ 16 n na n tigim taab n maan Soaalã kũumã Tẽegre. Zĩig ning fãa b sẽn na n tigmẽ taabã, bur sẽn ka rabɩll sẽn makd Kirist yĩngã, la divẽ miuug sẽn makd a zɩɩmã sẽn daagã la b na n dogl taabl zugu. Sõsg n na n wilg a Zezi kũumã tẽegr võore. Sõs-kãng saab sẽnese, b na n deng n wilga burã la divẽ wã sẽn makd bũmb ningã, la b yaool n kɩt tɩ b pɩʋʋg watbã fãa taoore. A Zeova Kaset rãmbã tigims a wãn bal pʋsẽ, kɛlgdbã fãa sʋka, ned a yembr bɩ neb a wãn bal n na n wãb burã la b yũ divẽ wã. La tigims wʋsg pʋsẽ, ned baa a yembr pa na n wãb burã bɩ n yũ divẽ wã ye. Bõe yĩng tɩ yaa kiris-neb a wãn bala, sẽn dat n yeel tɩ kiris-neb nins sẽn saagd n na n tɩ vɩɩmd saasẽ wã bal n wãbd burã la b yũud divẽ wã, tɩ watbã wʋsg sẽn saagd n na n vɩɩmd tẽng zug wakat sẽn pa satã yaool n pa wãbd burã la b yũud divẽ wã?

2, 3. a) Wãn to la a Zeova naan yɛlã tɩ zems ne a raabã? b) Yaa raab bʋg yĩng la a Zeova naan tẽngã la ninsaalbã?

² A Zeova yaa Wẽnnaam sẽn tar daab n na n pidsi. Sẽn na yɩl tɩ rẽ paam pidsgu, a ‘kɩtdame tɩ bũmb fãa sak a raabã.’ (Efɛɛz rãmba 1:11) Pipi, a reng n naana a Biribl yendã a toore. (Zã 1:1, 14; Wilgri 3:14, Sebr Sõngo) La rẽ poore, a tũnuga ne Biribl kãng n naan komdibli sẽn yaa malɛgse, la a yaool n naan bũmb nins fãa sẽn be yĩngr la sẽn be tẽng zug tɩ tõnd ninã tõe n yã wã, tẽngã ne ninsaalbã sẽn be a zugã me sẽn naage.—Zoob 38:4, 7; Yɩɩl Sõamyã 103:19-21; Zã 1:2, 3; Kolos rãmba 1:15, 16.

³ A Zeova pa naan tẽngã sẽn na yɩl t’a yɩ zĩig b sẽn na n mak nebã n bãng b sã n tõe n wa yɩɩ malɛgse, n tɩ yalg a komdibli wã sẽn be saasẽ wã sõore, wala kiris-neb ne yʋʋr tũudmã egiliiz rãmb wʋsg sẽn zãmsd nebã ye. A naan-a-la ne yam daab sẽn yaa takɩ. Yaa sẽn na yɩl tɩ “neb zĩnd a zugu.” (Ezai 45:18) Wẽnnaam naana tẽngã n kõ ninsaalbã, la a naan ninsaalbã me tɩ b zĩnd tẽngã zugu. (Yɩɩl Sõamyã 115:16) Tẽngã gill da segd n yɩɩ arzãnã, n pid ne ninsaan-tɩrse, sẽn da na n ko-a la b ges a yelle. Pipi ninsaalã ne a pagã zɩ n saag tɩ b na n wa baas n tɩ vɩɩmda saasẽ ye.—Sɩngre 1:26-28; 2:7, 8, 15.

B kɩɩsa a Zeova raabã

4. Wãn to la b kɩɩs a Zeova sẽn rɩt a naamã to-to wã ninsaalbã naaneg poor bilfu?

⁴ Wẽnnaam a Zeova biribl a ye n wɛgme, n tõdg-a la a kɩɩs a raabã. Wẽnnaam sẽn kõ-a sor ning t’a tõe n maan a yam-daabã, a tʋma kɛgr ne rẽ. Rẽ kɩtame t’a sãam laafɩ ning neb nins fãa sẽn da sakd a Zeova naamã ne nonglmã  sẽn da tar ne taabã. A Sʋɩtãan tusa pipi rao wã ne a pagã tɩ b bas Wẽnnaam n bao soog-m-mengã. (Sɩngre 3:1-6) A Sʋɩtãan pa kɩɩs t’a Zeova tara pãng ye, la a kɩɩsa a sẽn dɩt a naamã to-to wã, rẽnd a ra rat n yeelame tɩ Wẽnnaam pa tar sor meng n na n dɩ naam ye. Woto kɩtame tɩ tẽng zug ka, hal ninsaalbã naaneg poor bilf bala, no-koeem-kãseng la b wẽed a Zeova naamã zemsg zugu.

5. Gomd a yiib soab bʋg la b wa ne, la gom-kãng paka ãnd dãmba?

⁵ A Zoob wakatã, a Sʋɩtãan waa ne gomd a to sẽn tar loees ne pipi gomd ning a sẽn da gom tɩ wa ne sãmb-sãmb Wẽnnaam naamã zemsg zugã. A Sʋɩtãan yeelame tɩ pa yam-sõng n tusd a Zeova bõn-naandsã tɩ b sakd-a la b balemd-a ye. A yeelame tɩ nebã sẽn sakd Wẽnnaamã yaa b mens nafr bal la b baooda, tɩ b sã n mak-b fãa, b na n kɩɩsa Wẽnnaam. (Zoob 1:7-11; 2:4, 5) Baa ne no-koeem-kãngã sẽn da pak a Zeova sõgen sẽn da yaa ninsaalã, yaa no-koeemd sẽn pak Wẽnnaam komdibli nins sẽn yaa malɛgsã me, baa a Zeova pipi Biribl yɛng ning a sẽn naan a toorã menga.

6. Wãn to la a Zeova yɩ sɩd soab ne a raabã la ne a yʋʋrã?

⁶ A Zeova kell n yɩɩ sɩd soab ne raab ning a sẽn da yãk n na n pidsã, la ne a yʋʋrã võore, tɩ kɩt t’a pĩnd n togs sẽn wate, la a yɩ Fãagda. * A yeela a Sʋɩtãan woto: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng na n pogla fo zugu, la fo na n pogla yẽ na-kãsenkãare.” (Sɩngre 3:15) A Zeova tara “paga,” sẽn yaa a siglg sẽn be saasẽ wã. Ne pʋg-kãng yagengã maasem, a Zeova na n leoka a Sʋɩtãan no-baoodmã la a kõ a Ãdem kambã ne a yagensã saagr tɩ b na n wa paama fãagr la vɩɩm.—Rom dãmba 5:21; Galat dãmba 4:26, 31.

A raabã yel-solgdg sõngo

7. Raab bʋg la a Zeova tũnug ne tʋm-tʋmd a Poll n vẽnege?

⁷ Tʋm-tʋmd a Poll lɛtr ning a sẽn taas Efɛɛz kiris-nebã pʋgẽ, a wilga a Zeova sẽn get yɛlã yell to-to sẽn na yɩl n pids a raabã. A Poll gʋlsa woto: “Tɩ tõnd tõe n bãng bãmb daab sãmbg wa sẽn zems bũmb ninga bãmb sẽn pĩnd n yãk yam n na n maanã. Bãmb tagsame n dat n pids yõwã wakat sã n ta, tɩ bũmb fãa sẽn be yĩngr la sẽn be dũniyã sak Kirist.” (Efɛɛz rãmba 1:9, 10) A Zeova raabã sẽn segd ne pẽgrã yaa a kɩt tɩ bõn-naandsã fãa sẽn be saasẽ la tẽng zugã tall zems-n-taar la b sak a naamã ne nonglem. (Wilgri 4:11) Woto la a yʋʋrã na n paam sõmsgo, la wilg t’a Sʋɩtãan yaa zɩlem-n-be-neda, tɩ Wẽnnaam daabã maan “dũniyã zug wa sẽn maand [saasẽ wã].”—Matɩe 6:10.

8. Gom-biig ning b sẽn lebg tɩ “yɛl yell gesgã” võor yaa bõe?

⁸ A Zeova ‘raabã’ bɩ a sẽn yãk yam n na n maanã na n pidsa ne a yɛlã yell gesgã maasem. Ka wã, a Poll tũnuga ne gom-biig sẽn dat n yeel koɛɛg-koɛɛg bal tɩ zak yell gesgo. A pa gomd goosneema wala Mesi Rĩungã yell ye, la yaa b  sẽn get yɛl yell to-to wã yell la a gomda. * B ra na n vẽnega a Zeova “yel-solgdg sõngã” n wilg bilf-bilf yʋʋm kob-gĩnã sẽn da na n pʋg taabã pʋgẽ. Rẽ ra bee yɛl nins yell a sẽn ges ne yam kãseng sẽn na yɩl t’a raabã yɩ wã pʋgẽ.—Efɛɛz rãmba 1:10; 3:9, NW.

9. Wãn to la a Zeova puk yel-solgdg sõngã sẽn da be a raabã pʋgẽ wã bilf-bilfu?

⁹ Bilf-bilfu, ne kaool dãmb sẽn pʋg taab maasem, a Zeova wilga a raab sẽn tɩ loe ne Yageng ning waoong yell a sẽn gom Edɛn zẽedẽ wã sẽn da na n pids to-to. Pʋleng bɩ Kaool ning a sẽn maan ne a Abrahaamã wilgame tɩ Yageng ning a sẽn da kãabã na n waa tẽngã zug a Abrahaam yagensã sʋka, tɩ ne yagen-kãng maasem bɩ “dũniyã buud fãa” paam barka. Kaool kãng ra wilgdame me tɩ neb a taab n da na n naag yagengã sull zu-raoog soabã. (Sɩngre 22:17, 18) Tõogã sẽn da yaa kaool a Zeova sẽn da maan ne tẽng zug Israɛllã wilgame t’a raabã ra yaa a paam “maan-kʋʋdb” rĩungu. (Yikri 19:5, 6) Kaool ning Wẽnnaam sẽn maan ne a Davɩɩdã wilgame tɩ Yagengã ra na n yɩɩ Rĩungã Zu-raoog soab wakat fãa yĩnga. (2 Sãmwɛll 7:12, 13; Yɩɩl Sõamyã 89:4, 5) Tõogã kaool sẽn tall Zʋɩf rãmbã n kẽng Mesi wã nengẽ wã poore, a Zeova puka yɛl a taab me sẽn da be a raabã pʋgẽ. (Galat dãmba 3:19, 24) Neb nins b sẽn na n wa kɩt tɩ b tɩ naag yagengã sull zu-raoog soabã na n yɩɩ “maan-kʋʋdb” rĩung b sẽn da reng n togs tɩ watame, la b na n kẽes-b-la “kaool paalg” pʋgẽ tɩ b yɩ “Israɛll” paalg sẽn yaa tẽeb Israɛllã.—Zeremi 31:31-34; Hebre dãmba 8:7-9. *

10, 11. a) Wãn to la a Zeova reng n wilg Yageng ning waoong a sẽn kãabã sẽn da na n yɩ a soaba? b) Bõe yĩng tɩ Wẽnnaam Biribl yɛng a sẽn naan a toorã wa tẽng zugu?

 ¹⁰ Sẽn na yɩl n ges yɛlã yell tɩ Wẽnnaam daabã pidsi, wakat da taame tɩ Yagengã na n wa tẽng zugu. A Zeova tʋma malɛk a Gabriyɛll t’a tɩ yeel a Maari t’a na n doga biribl b sẽn na n bool t’a Zezi. Malɛkã yeel-a lame: “A na n yɩɩ nin-kãsenga, la b na n boond-a lame tɩ Sẽn-ka-to Biiga. La Zusoab a Wẽnnaam na n kõo yẽ a yaab a Davɩɩd naam. Yẽ na n sooga a Zakoob buuda wakat fãa la a soolem ka na n sɛ abada.” (Luk 1:32, 33) Woto, ned ning sẽn da na n yɩ-a yageng ning waoong b sẽn da pĩnd n togsã da lebga vẽeneg masã.—Galat dãmba 3:16; 4:4.

¹¹ A Zeova Biribl yend a sẽn naan a toorã ra segd n waa tẽng zugu, sẽn na yɩl tɩ b maka ne mak-toaag hal tɩ tãag a kũum n ges a sã n na n kell n yɩɩ tɩrga. A Sʋɩtãan no-baoodmã leoor zãng-zãngã ra bee a Zezi nugẽ masã. A ra na n kell n saka a Ba wã bɩ? Rẽ ra tɩ loee ne yel-solgdg sõngo. Tʋm-tʋmd a Poll lɛtr a ye n wilg a Zezi sẽn tall tʋʋmd ning rẽ pʋgẽ wã. A yeta woto: “La ned ka tõe n kɩɩs tɩ Wẽnnaam wẽneg ka sãmbg kãseng ye. Bãmb waa ne yĩnga, la Sɩɩg Sõng kɩsa bãmb kaseto, la malɛk rãmb yãa bãmba, la b koɛɛga moona bu-zẽms sʋka, la neb tẽe bãmba, la b zẽkame n kẽng [saasẽ].” (1 Tɩmote 3:16) N-ye, ne a Zezi sẽn tall a wẽn-sakrã sõma-sõma hal tɩ ta a kũumã, a leoka a Sʋɩtãan no-baoodmã zãng-zãnga. La sãmbg kãseng bɩ yel-solgdg sõngã pẽgs a taab la b ra segd n vẽnege.

Wẽnnaam Rĩungã yel-solgdg sõngo

12, 13. a) Wẽnnaam Rĩungã yel-solgdg sõngã neng a yembr la bʋgo? b) Sẽn na yɩl tɩ ninsaalb sõor bilfã kẽng saasẽ, yaa bõe la a Zeova ra segd n maane?

¹² Vugri, a Zezi sẽn da wa n gilgd n moond Galile soolmẽ wã, a wilgame tɩ yel-solgdg sõngã ra tara loees wʋsg ne a Mesi Rĩungã goosneema. A yeela a karen-biisã: “B kõo yãmb tɩ y bãng arzãn soolem [“Wẽnnaam soolmã,” Mark 4:11] sãmbdo.” (Matɩe 13:11) A Zeova sẽn tũus “bãg-bil” sẽn yaa ninsaalb 144000 tɩ b na n tɩ naag a Biriblã n yɩ yagengã sull neb n dɩ naam ne-a saasẽ wã yaa yel-solgdg kãng neng a yembre.—Luk 12:32, NW; Wilgri 14:1, 4.

¹³ A Zeova sẽn naan ninsaalbã tɩ b vɩɩmd tẽngã zugã yĩnga, ra yaa tɩlae t’a kɩt tɩ ninsaalb kẽer lebg ‘nin-paals’ sẽn na yɩl n kẽng saasẽ. (2 Korẽnt dãmba 5:17) Tʋm-tʋmd a Pɩɛɛr sẽn be neb nins sẽn paam zu-no-kãseng ning sẽn yaa tɩ vɩɩmd saasẽ wã sʋkã gʋlsa woto: “Pẽgre Wẽnnaam tõnd Zusoab a Zezi Kirist Ba sẽn kõ tõnd dogem paalga, sẽn zems bãmb nimbãan-zoeera sẽn yaa kãsenga tɩ tõnd paam tẽeb sẽn vɩ a Zezi Kirist kũum vʋʋgr yĩnga la d paam dogem-pʋɩɩr sẽn ka tõe n sãam, la sẽn ka dẽgemda, la sẽn ka loogda, sẽn bĩng yãmb yĩng [saasẽ].”—1 Pɩɛɛr 1:3, 4.

14. a) Wãn to la neb sẽn pa Zʋɩf rãmb wa n be Wẽnnaam Rĩungã yel-solgdg sõngã pʋgẽ? b) Bõe n kɩt tɩ tõnd tõe n wʋm Wẽnnaam yel-zulumsã võore?

¹⁴ Wẽnnaam beoog daar Rĩungã bũmb a to me n da be yel-solgdg sõngã pʋgẽ. Yaa Wẽnnaam sẽn da rat tɩ neb sẽn pa Zʋɩf rãmb naag ninsaalb sul-bil ning sẽn na n tɩ rɩ naam ne Kirist saasẽ wã. A Poll wilga a Zeova sẽn sigl yɛlã bɩ a sẽn ges yɛlã yell hal t’a raabã wa pidsã yell to-to n yeel woto: “Sãmbg kãng ka puk ne ninsaalba kamb wakat sẽn loog wa Sɩɩg Sõng sẽn wilgd Kirist tʋm-tʋmd sõama wã ne b no-rɛɛsdba masã wã ye. Sãmbg kãng yaa tɩ bu-zẽms me lebga pʋɩt-n-taas ne kãabg a yembr Kirist la Koe-nooga yĩnga, la tõnd lebga yĩng a yembr bala.” (Efɛɛz rãmba 3:5, 6) Yɩɩ “tʋm-tʋmd sõama wã” n paam n bãng yel-solgdg sõngã bab-kãngã wã võore. Rũndã-rũndã me, sã n da paẽ ne vʋʋsem sõngã sõngre, d ra pa na n tõog n wʋm “Wẽnnaam sãmbd kãsemsã” bɩ a yel-zulumsã võor ye.—1 Korẽnt dãmba 2:10; 4:1; Kolos rãmba 1:26, 27.

15, 16. Bõe yĩng t’a Zeova tũus Kirist na-rɩt-n-taasã ãdem-biisã sʋka?

 ¹⁵ B yeelame tɩ “neb tus koabg la tus pis-naas la tus a naasã” b sẽn yã tɩ b yas ne “Pebila” saasẽ Siõ Tãngã zugã, b “ra-b-la tẽngã zugu,” la b paas tɩ “b ra-b-la ãdem-biisã sʋka, tɩ b yaa dẽenem biis Wẽnnaam la Pebil” a Zezi Kirist yĩnga. (Wilgri 14:1-4, NW) A Zeova yãka a saasẽ pipi biriblã t’a lebg yageng ning b sẽn kãab Edɛn zẽedẽ wã pipi babgã bɩ a zu-raoogo. La bõe yĩng masã t’a tũus Kirist na-rɩt-n-taasã ãdem-biisã sʋka? Tʋm-tʋmd a Poll wilgame tɩ nin-kãensã sõor sẽn paoodã yaa neb b sẽn “bool tɩ zems bãmb [a Zeova] daabã” la ‘wa sẽn zems a daabo tɩ yɩ a sũ-noogo.’—Rom dãmba 8:17, 28-30; Efɛɛz rãmba 1:5, 11; 2 Tɩmote 1:9.

¹⁶ A Zeova raabã yaa a kɩt t’a yʋʋrã sẽn yaa kãseng la sõngã paam waoogre, la a wilg t’a naamã rɩɩb saasẽ la tẽng zugã zemsame. A sẽn get yɛlã yell ne yam sẽn ka to wã pʋgẽ, a Zeova tʋma a pipi Biriblã tẽngã zugu, t’a paam makr hal tɩ tũ ne a yõore. Sẽn paase, a Zeova yãka yam tɩ ninsaalb kẽer sẽn zoe n wilg tɩ b teela yẽ mengã naam hal n tɩ tõk b kũumã na n wa naag n yɩ nanambs a Biriblã sẽn yaa Mesi wã Rĩungã pʋgẽ.—Efɛɛz rãmba 1:8-12; Wilgri 2:10, 11.

17. Bõe yĩng tɩ d sũy segd n yɩ noogo, Kirist ne a na-rɩt-n-taasã sẽn yɩ ninsaalbã?

¹⁷ A Zeova wilgame t’a nonga a Ãdem yagensã hal wʋsgo, a sẽn kɩt t’a Biriblã wa tẽngã zugu, la a tũus neb nins sẽn da na n wa yɩ na-rɩt-n-taas ne a Biriblã Rĩungã pʋgẽ wã ãdem-biisã sʋka. Wãn to la rẽ na n naf neb a taab nins sẽn na n sak a Zeova wã, sẽn sɩng ne a Abɛll n zẽk n watẽ? Ninsaalbã roga ne yel-wẽnã la kũumã yembdo. B maanda yel-kɛga, n dat sãoogr tẽebã la yĩngã wɛɛngẽ, la b baooda me n na n wa pa le tol n maand yel-kɛga, wa sẽn zems ne a Zeova pipi raabã ne ãdem-biisã. (Rom dãmba 5:12) Neb nins fãa sẽn saagd n na n paam vɩɩm sẽn pa satã tẽngã zugã sẽn mi tɩ b Rĩmã na n talla nonglem, la t’a na n yɩɩ wʋmd ne-b wala a sẽn maan to-to ne a karen-biisã a sẽn da wa n be tẽnga zugã, woto sɩd kengda b pɛlga! (Matɩe 11:28, 29; Hebre dãmba 2:17, 18; 4:15; 7:25, 26) Sẽn paase, b sẽn mi tɩ Kirist na-rɩt-n-taasã sẽn na n yɩ maan-kʋʋdb n zĩnd saasẽ wã me yɩɩ rap la pagb sẽn tall tẽebo, la sẽn mao ne b mens pãn-komsem la b seg zu-loees wa tõndã, sɩd kengda b pɛlga!—Rom dãmba 7:21-25.

A Zeova raabã pidsg pa tõe n vaal ye

18, 19. Bõe yĩng t’a Poll goam nins sẽn be Efɛɛz rãmba 1:8-11 pʋgẽ wã yaa vẽenes ne tõndo, la bõe la d na n yã sõsg ning sẽn pʋgdã pʋgẽ?

¹⁸ Masã d tõe n wʋma a Poll goam nins a sẽn taas kiris-neb nins sẽn paam vʋʋsem sõng zaeebã tɩ be Efɛɛz rãmba 1:8-11 pʋgẽ wã võor sõma n yɩɩda. A yeelame t’a Zeova kɩtame tɩ bãmb bãng “a raabã sãmbg” sõngã, la a paas tɩ bãmb me “paama pʋɩɩr” ne Kirist, la tɩ b ra ‘pĩnd n tũusa bãmb tɩ zems sẽn kɩtd-a tɩ bũmb fãa sak yẽ raabã.’ D neeme tɩ rẽ zemsa ne a Zeova sẽn sigl la a get yɛlã yell sõma to-to sẽn na yɩl n pids a raabã. Rẽ me leb n sõngda tõnd tɩ d bãng bũmb ning sẽn kɩt tɩ yaa kiris-neb sõor bilf bal n wãbd burã la b yũud divẽ wã a Zezi kũumã Tẽegr wakatã.

¹⁹ Sõsg ning sẽn pʋgdã pʋgẽ, d na n yãa Kirist kũumã Tẽegr sẽn dat n yɛɛlg ne kiris-neb nins saagr sẽn yaa tɩ vɩɩmd saasẽ wã. D na n leb n bãnga bũmb ning sẽn kɩt tɩ neb milyõ rãmb nins saagr sẽn yaa vɩɩmd wakat sẽn kõn sa tẽng zugã segd n sɩd bao n bãng Tẽegrã sẽn makd bũmb ningã.

[Tẽngr not rãmbã]

Lebg-n-gese

• Bõe yĩng t’a Zeova naan tẽngã la a ning ninsaal a zugu?

• Bõe yĩng tɩ ra yaa tɩlae t’a Zeova Biribl yɛng a sẽn naan a toorã paam makr tẽng zugu?

• Bõe yĩng t’a Zeova tũus Kirist na-rɩt-n-taasã ãdem-biisã sʋka?

[Zãmsgã sogsgã]