D zãag d mens ne tũudum sẽn yaa ziri!
D zãag d mens ne tũudum sẽn yaa ziri!
‘Zu-soaba [a Zeova] yetame yaa: Yi-y bãmb sʋka, welg-y toor ne-ba. La y ra sɩɩs bũmb sẽn yaa rẽgd ye.’—2 KORẼNT DÃMBA 6:17, Kãab-paalgã Koe-noogo.
1. Neb wʋsg sẽn pelg b pʋs n baood sɩdã Wẽnnaamã zug bee zĩ-bʋgo?
NEB wʋsg n sɩd pelg b pʋs n baood n na n bãng sɩdã Wẽnnaam la ninsaalbã beoog-daar zugu, la b ket n pa miẽ ye. B maanda b mens sogs-bɛd Wẽnnaam zugu, la b ket n bee lik la sãmb-sãmb pʋgẽ. Neb milyõ rãmb yaa tẽeb ziri wã, rog-n-migsã la kibs rãmb sẽn beegd tõnd Naandã yembse. Tõe tɩ y tara yags la roagdb sẽn tẽed bugum yiri, tãablem Wẽnnaam, sɩɩg pa-kiidã bɩ zãmsg a taab sẽn yaa ziri.
2. Bõe la tũudmã taoor dãmb maan-yã, la rẽ waa ne bõe?
2 Yaa bõe n kɩt tɩ neb wʋsg be zɩɩlem pʋgẽ Wẽnnaam bãngrã wɛɛngẽ? Kaeto, yaa tũudmã. Sẽn yɩɩd fãa yaa tũudmã ne a taoor dãmbã sẽn zãmsd yɛl sẽn kɩɩsd Wẽnnaam daabã. (Mark 7:7, 8) Rẽ kɩtame tɩ b belg neb wʋsg tɩ b tẽed tɩ b balemda sɩd Wẽnnaamã, mik b beegd-a lame. Rẽ fãa yaa ziri tũudmã yelle.
3. Yaa ãnd n sɩng ziri tũudmã la a ket n yelgd-a, la wãn to la Biiblã bilg-a?
3 Bãng-y tɩ ned tõnd ninã sẽn pa tõe n yã n gãe tẽng n teend ziri tũudmã. Tʋm-tʋmd a Poll goma a yell n yeele: “Bãmb yaa neb nins sẽn ka tẽebo la neb nins dũni kãnga wẽnnaam sẽn lud b yam tɩ b ra yã koe-nooga vẽenem sẽn pukd Kirist ziirã sẽn yaa Wẽnnaam wẽnega ye.” (2 Korẽnt dãmba 4:4) “Dũni kãngã Wẽnnaam” pa ned a to n zʋʋg a Sʋɩtãan ye. Yaa yẽ n sɩng ziri tũudmã la a ket n yelgd-a. A Poll gʋlsame: “Sʋɩtãanã toeemda a meng n lebgd vẽenem malɛka. Dẽ yĩnga, yẽ tʋm-tʋmdba sã n toeem b mense tɩ yɩ tɩrlem tʋm-tʋmdba, ka bõn-kãseng ye.” (2 Korẽnt dãmba 11:14, 15) A Sʋɩtãan kɩtdame tɩ bõn-wẽnsã wõnd bõn-sõma, la a belgd nebã tɩ b sakd ziri.
4. Tõog ning Wẽnnaam sẽn kõ pĩnd wẽndẽ Israɛllã ra yetame tɩ b tall manesem bʋg ne ziri no-rɛɛsdbã?
4 Pa lingr tɩ Biiblã ningd ziri tũudmã taal wʋsg ye. Wala makre, a Moiiz Tõogã keoogda Wẽnnaam nin-buiid ning a sẽn tũusã vẽeneg tɩ b gũus ne ziri no-rɛɛsdbã. Ned ning fãa sẽn zãmsd nebã ziri Wẽnnaam zugu, la a tusd nebã tɩ b balem ziri wẽnnaam dãmba, b ra ‘segd n kʋ-a lame, a sẽn zãmsd neb tɩ b zãgs a Zeova wã’ yĩnga. B kõo Israɛll nebã noor tɩ b ‘yiis yel-wẽnda bãmb sʋka.’ (Tõodo 13:2-6) Ziri tũudmã yaa wẽng wʋsg a Zeova nifẽ.—Ezekɩɛll 13:3.
5. Keoog-bʋs la d segd n tũ rũndã-rũndã?
5 Wa a Zeova, a Zezi Kirist ne a tʋm-tʋmdbã wilgame tɩ b kisa ziri tũudmã. A Zezi keooga a karen-biisã woto: “Gũus-y yãmb mens ne zãmb bãngdbã. Bãmb wata yãmb sʋk wa piisi, la bãmb sũyã pʋsẽ, bãmb yaa wa rigd-n-yĩids kom sẽn tara.” (Matɩe 7:15; Mark 13:22, 23) A Poll gʋlsame n togs tɩ “Wẽnnaam sũ-puugr yii [saasẽ] n puki, neba sẽn kɩɩs Wẽnnaama yĩnga, la bãmb tʋʋm wẽnsa fãa sẽn gɩdgd sɩda yĩnga.” (Rom dãmba 1:18) Ad sɩd tara yõod wʋsg ne kiris-neb hakɩkã tɩ b sak keoog-kãensã, la b zãag b mens ne ned buud fãa sẽn lut sɩd ning sẽn be Wẽnnaam Gomdã pʋgẽ wã bɩ sẽn yelgd ziri zãmsgã!—1 Zã 4:1.
Zoe-y n yi-y “Babilon Kãsengã” pʋgẽ
6. Wãn to la b bilg “Babilon Kãsengã” Biiblã pʋgẽ?
6 Ges-y Wilgr sebrã sẽn bilgd ziri tũudmã to-to. A bilg-a-la wala pʋg-yoodr sẽn tɩg rãam, n so soolem toɛy-toɛyã la b nin-buiidã. Pʋg-kãngã yooda ne rĩm dãmb wʋsgo, la a yũu Wẽnnaam balemdb hakɩkã zɩɩm n tɩg t’a neng yilemdẽ. (Wilgri 17:1, 2, 6, 18) A tara yʋʋr sẽn gʋls a rĩirẽ wã, sẽn zems ne a manesem dẽgdã. A yʋʋrã yaa “Babilon kãsenga, dũniyã nin-yoaadba la wẽng ma.”—Wilgri 17:5.
7, 8. Wãn to la ziri tũudmã yo-yã, la rẽ waa ne bõe?
7 Gʋlsg Sõamyã sẽn bilgd Babilon Kãsengã to-to wã kell n zemsa ne ziri tũudmã fãa sẽn yaa to-to wã. Baa tũudmã tusa wã sẽn pa naag taab n be dũni gill sigl-yɛng pʋgẽ wã, b bõn-datlã la b tʋʋmã yaa yembre. Yaa ziri tũudmã b sẽn bilg wa pʋg-yoodr Wilgr sebrã pʋgẽ wã n tusd goosneemã rãmb wʋsg b yɛlã pʋsẽ. A sẽn maan kaool dãmb ne politik nanambs toor-toorã yĩnga, a yoome, tɩ rẽ kɩt t’a wõnd pag sẽn pa pidsd a kãadem pʋlengo. Karen-biig a Zak gʋlsame: “Yãmb sẽn wẽnd nin-yoaadbã, yãmb ka mi tɩ zood ne dũniyã yaa beem ne Wẽnnaam la? Woto yĩnga, ned ninga sẽn dat n maan zood ne dũniyã yẽ yaa Wẽnnaam bɛ.”—Zak 4:4.
8 Ziri tũudmã sẽn kẽes a toog goosneemã rãmbã yɛlẽ wã waa ne namsg wʋsg n kõ ãdem-biisã. Porfesɛɛr a Zolela Mangu sẽn yaa Afirik politik yɛl mitã yeelame tɩ “dũniyã kʋdemd pʋgẽ, d tara kibay wʋsg sẽn wilgd tɩ b kʋʋ neb wʋsgo, tũudmã sẽn kẽes a toog politikã yɛlẽ wã yĩnga.” Zʋrnall a yembr yeela woto sẽn pa kaoose: “Rũndã-rũndã, no-koɛɛm nins sẽn daag zɩɩm n tɩ yɩɩdã tɩ loee ne tũudmã yɛla.” Neb milyõ rãmb la b kʋ zab tũudmã sẽn teel pʋsẽ. Babilon Kãsengã namsame la a kʋ Wẽnnaam sõgen dãmb hakɩkã menga, tɩ b tõe n yeel tɩ yaa wa a yũu b zɩɩmã n su.—Wilgri 18:24.
9. Wãn to la Wilgr sebrã wilgd t’a Zeova sɩd kisa ziri tũudmã wʋsgo?
9 D sã n ges bũmb ning sẽn na n paam Babilon Kãsengã, d bãngda vẽeneg t’a Zeova kisa ziri tũudmã. Wilgri 17:16 yetame: “Yɩɩl piiga fo sẽn yã rũnga zuga na n kisga pʋg-yoodrã, la b na n sãama yẽnda t’a lebg beelle, la b na n wãba yẽ nemdo la b yõog-a bugum.” Pipi, rũm-kãseng n yõk-a n kʋ, n wãb a nemdã, la b yõog bũmb ning fãa sẽn kellã bugum. Woto me, ka la bilfu, dũniyã goosneema rãmb na n tik n yik n zaba ne ziri tũudmã. Wẽnnaam na n kɩtame tɩ woto zĩndi. (Wilgri 17:17) B na n sãama Babilon Kãsengã sẽn yaa ziri tũudmã fãa sẽn be dũniyã zugã. “A kõn le zĩnd abada.”—Wilgri 18:21.
10. Tõnd tagsg segd n yɩɩ bõe ne ziri tũudmã?
10 Wẽnnaam balemdb hakɩkã tagsg ne Babilon Kãsengã segd n yɩɩ bʋgo? Biiblã kõta noor woto vẽenega: “Mam neba, bɩ y yi yẽ pʋgẽ n da lagem ne yẽ yel-wẽna la y paam a tooda ye.” (Wilgri 18:4) Neb nins sẽn dat n põs sãoongã segd n yii ziri tũudmã pʋgẽ tɩ nan da kẽ n bõog ye. A Zezi Kirist sẽn da wa n be tẽng zugu, a reng n togsame tɩ yaoolem wakatã, neb wʋsg ra na n yeela ne b no-goam bal tɩ b tũud-a lame. (Matɩe 24:3-5) A yeta nin-kãense: “Mam ka mi yãmb baa bilf ye. Bɩ y bas maam, yãmb tʋʋm wẽns maandba.” (Matɩe 7:23) A Zezi Kirist b sẽn kõ naam t’a yaa Rĩm masã wã kisa ziri tũudmã.
Wãn to la d tõe n zãag d mens ne ziri tũudmã?
11. Bõe la d segd n maan n zãag d mens ne ziri tũudmã?
11 Kiris-neb hakɩkã zãagda b mens ne ziri tũudmã, n zãgsd a ziri zãmsgã. Woto baoodame tɩ b zãag b mens ne tũudmã zãmsg nins fãa b sẽn kõt radio rãmbẽ wã, televiziõ rãmbẽ wã, n paas b sɛbã sẽn togsd ziri, Wẽnnaam la a Gomdã zugã. (Yɩɩl Sõamyã 119:37) Leb n yaa yam tʋʋmd tɩ d ra kẽes d mens reem la kɛrmes nins sigls sẽn tar loees ne ziri tũudmã sẽn maandã pʋsẽ ye. Sẽn paase, d pa teend ziri tũudmã ne manesem buud baa a yembr ye. (1 Korẽnt dãmba 10:21) Woto maaneg na n sõnga tõnd tɩ d gũus “tɩ ned da sãam [tõnd] ne ninsaalb bãngr la b belgr sẽn ka yõodo, sẽn yaa ninsaalba minund sẽn yaa dũniyã rẽnda la ka Kirist rẽnda ye.”—Kolos rãmba 2:8.
12. Wãn to la ned tõe n yiis a meng ziri tũudmã pʋgẽ?
12 Yaa wãn to masã, ned sã n tʋll n lebg a Zeova Kaset soaba, t’a yʋʋrã yaool n gʋls ziri tũudmã sɛbẽ n wilgdẽ t’a bee b sʋka? Naoor wʋsgo, f sã n gʋls lɛtr n wilg tɩ f yiisa f meng ziri tũudmã pʋgẽ, wilgda vẽeneg tɩ f ye pa be b sʋk ye. Sẽn yɩɩd fãa, tara yõod wʋsg tɩ nedã zãag a meng zãng fasɩ ne ziri tũudmã rẽgd fãa. Ned sẽn dat n lebg a Zeova Kaset soab segd n kɩtame t’a manesmã wilg vẽenega, t’a pĩnd tũudmã la neb a taabã fãa bãng t’a ye pa be tũudum kãng pʋgẽ ye.
13. Sagl-bʋg la Biiblã kõta, zãag-m-meng ne ziri tũudmã wɛɛngẽ?
13 Tʋm-tʋmd a Poll gʋlsame: “Bɩ y ra lagem ne neb nins sẽn ka tẽeba ye. Tɩ bõe, bõe lageng n be tɩrlem ne wẽng sʋka? Walla bõe lageng n be vẽenem ne lik sʋka? La bõe sakr n be Kirist ne Beliall sʋka? Walla ned ninga sẽn tẽeda tara bõe ne ned ninga sẽn ka tẽeda? Bõe lageng n be Wẽnnaam doog ne bõn-naands sʋka? . . . Yaa woto yĩnga Zusoaba yetame yaa: ‘Bɩ y yi bãmb sʋka la y welg ne bãmba. Da sak-y tɩ yãmb sũyã rẽgem ye.’” (2 Korẽnt dãmba 6:14-17) D tũuda gom-kãensã n zãag d mens ne ziri tũudmã. A Poll saglgã baoodame me tɩ d zãag d mens fasɩ ne ziri balemdbã bɩ?
‘Bɩ y gũus y mens neere’
14. D segd n zãaga d mens fasɩ ne neb nins sẽn be ziri tũudmã pʋgẽ wã bɩ? Wilg-y y leokrã võore.
14 Wẽnnaam balemd hakɩkã segd n laka b mens fasɩ ne ziri tũudmã neb bɩ? Rẽ yĩnga d segd n laka d mens zãng ne neb nins tẽeb sẽn yaa toor ne tõndã bɩ? Leokrã yaa ayo. No-kãseng a yiib-n-soabã yetame: “Nong f to wala f menga.” (Matɩe 22:39, Sebr Sõngo) D sɩd wilgdame tɩ d nonga d taabã, d sã n taasd-b Rĩungã koe-noogo. D wilgdame me tɩ d nong-b lame, d sã n zãmsd Biiblã ne-b la d kɩtdẽ tɩ b bãngdẽ tɩ b segd n zãaga b mens ne ziri tũudmã.
15. Ra ‘yɩ dũniyã rẽnd’ rat n yeelame tɩ bõe?
15 Baa ne tõnd sẽn moond d taabã koe-noogã, d sẽn yaa a Zezi karen-biisã yĩnga, d pa ‘dũniyã rẽnd ye.’ (Zã 15:19) ‘Dũni’ ning yell b sẽn gomd ka wã yaa ãdem-biis nins sẽn zãr ne Wẽnnaamã. (Efɛɛz rãmba 4:17-19; 1 Zã 5:19) D laka d mens ne dũniyã, d sẽn kɩɩsd a tagsa wã, a goamã la a yel-manesmã sẽn beegd a Zeova wã. (1 Zã 2:15-17) Sẽn paase, wala sẽn zems ne noor ning sẽn yet tɩ “tũud-n-ta-wẽns sãamda nin-sõamyã,” d pa baood zood ne neb nins sẽn pa tũud noy nins b sẽn kõ kiris-nebã ye. (1 Korẽnt dãmba 15:33) Ra yɩ dũniyã rẽnd yaa d sẽn na n zãag d mens ne zãmaanã bɩ dũniyã rẽgd buud fãa. (Zak 1:27, Sebr Sõngo) Woto, welg d mens ne dũniyã pa rat n yeel tɩ d sɩd lak d mens fasɩ ne neb a taaba ye.—Zã 17:15, 16; 1 Korẽnt dãmba 5:9, 10.
16, 17. Kiris-nebã segd n talla yel-manesem bʋg ne neb nins sẽn pa mi sɩd nins sẽn be Biiblã pʋgẽ wã?
16 Rẽnd d manesem segd n yɩɩ wãn to ne neb nins sẽn pa mi sɩd nins sẽn be Biiblã pʋgẽ wã? A Poll gʋlsa Kolos tigingã woto: “Bɩ y gũus y mens neer ne neb nins sẽn ka be tẽeb pʋgẽ wã. La y maan yãmb sẽn tõe tɛk wakat fãa. Bɩ y kɩt tɩ yãmb goama zĩnd bark wakat fãa n paam yamsem noom, la y bãng sẽn zemse n leok ned kam fãa.” (Kolos rãmba 4:5, 6) Tʋm-tʋmd a Pɩɛɛr gʋlsa woto: “Yãmb sũyã pʋsẽ, bɩ y waoog Kirist sẽn yaa Zusoabã. Bɩ y bãng daar fãa tɩ leok ne sũ-maasem la sik-m-menga ned ninga fãa sẽn sokd yãmb tẽeb yelle.” (1 Pɩɛɛr 3:15) A Poll sagla kiris-nebã “tɩ bãmb da gom ned ba a ye wẽng ye, la b ra yɩ zabr dãmb ye, la bɩ bãmb yɩ mi-m-meng rãmba sẽn maand sũ-bʋgsem ne neba fãa.”—Tɩt 3:2.
17 Tõnd sẽn yaa a Zeova Kaset rãmbã, d gũusdame n pa rat n paoog neb a taabã, la d yɩ tɩtaam dãmb ne-b me ye. Sɩd-sɩda d pa na n tũnug ne tʋʋsg goam n sãbg tũudum a taabã neb ye. La d na n goma ne gũusg d koe-moonegã sasa, ne d yagsã la d tʋmd-n-taasã, baa b sã n leokd ne mo-beedo.—Kolos rãmba 4:6; 2 Tɩmote 2:24.
‘Tall gom-sõma wã mamsgo’
18. Bõe n paamd neb nins sẽn lebd ziri tũudmã pʋgẽ wã?
18 Ad sɩd yaa kaeto ne ned sẽn bãng sɩd nins sẽn yit Biiblã pʋgẽ wã, n yaool n leb ziri tũudmã pʋgẽ! Biiblã bilgda manesem a woto baas beedã n yetẽ: “Bãmb sã n põs ne dẽgd sẽn be dũniyã zugu bãmb sẽn bãng tõnd Fãagda la Zusoab a Zezi Kirista yĩnga n yaool n leb n sak tɩ yel-wẽna tõog bãmb yɛsa, yaoolem dẽnda na n yɩɩ toog n yɩɩd pĩnd dẽndã . . . Ne bãmba a yaa wa yel-bũnd sɩda sẽn yeta: ‘Baaga leb n dɩ a sẽn dag n wubã, la kurku-yãang sẽn pek leb n bilma bɛgd pʋgẽ.’”—2 Pɩɛɛr 2:20-22.
19. Bõe yĩng tɩ tar yõod wʋsg tɩ d gũus ne bũmb ning fãa sẽn tõe n yɩ yell ne tõnd tẽebã?
19 D segd n ket n gũusda ne bũmb ning fãa sẽn tõe n yɩ yell n kõ tõnd tẽebã, bala yel-kãng sɩd tõe n waa wakat buud fãa! Tʋm-tʋmd a Poll keoogda tõnd woto: “Sɩɩg Sõng yeta vẽeneg tɩ yaoolem wakate kẽer na n basa tẽebo, la b na n saka belgr sɩɩse la zĩn dãmb koeese.” (1 Tɩmote 4:1) Tõnd vɩɩ “yaoolem wakate.” Neb nins sẽn pa zãagd b mens ne ziri tũudmã tõe n wa yɩɩ wa “kamb sẽn ka yam sẽn sakd kareng buud toor-toor wa sobg sẽn dɩkd bũmbu, la neba belgre la b sɩlem wẽnga b sẽn baood weer tɩ belg neba.”—Efɛɛz rãmba 4:13, 14.
20. Wãn to la d tõe n kogl d mens ne ziri tũudmã sẽn tõe n sãam d tẽebã?
20 Wãn to la d tõe n kogl d mens ne ziri tũudmã sẽn tõe n sãam-dã? Ges-y bũmb nins fãa a Zeova sẽn kõ wã. D tara Wẽnnaam Gomdã sẽn yaa Biiblã. (2 Tɩmote 3:16, 17) A Zeova leb n tũnuga ne “tʋm-tʋmd sẽn tũud sɩd la sẽn tar yamã” n kõ tẽeb rɩɩb wʋsgo. (Matɩe 24:45) D sẽn bɩt sɩdã pʋgẽ wã, rẽ yĩnga d pa segd n bao ‘rɩɩb sẽn yaa taoko, neb nins sẽn bɩ’ wã sẽn dɩtã, la d tʋlg n tigim taab zĩig ning d sẽn paamdẽ sɩdã zãmsgã sɩda? (Hebre dãmba 5:13, 14; Yɩɩl Sõamyã 26:8) Bɩ d yãk yam ne d sũyã fãa n dɩ a Zeova seglsã nafa, sẽn na yɩl n ket n tũud ‘goam sõma wã’ d sẽn wʋmã “mamsgo.” (2 Tɩmote 1:13) Yaa woto la d tõe n zãag d mens ne ziri tũudmã.
Bõe la y zãms-yã?
• “Babilon Kãsengã” yaa bõe?
• Bõe la d segd n maan n zãag d mens ne ziri tũudmã?
• Yel-bʋs sẽn yɛgd d tẽebã la d segd n zãag d mens ne?
[Zãmsgã sogsgã]
[Foto, seb-neng 14]
Yãmb mii bũmb ning sẽn kɩt tɩ b bilg “Babilon Kãsengã” wa pʋg-yoodrã bɩ?
[Foto rãmba, seb-neng 15]
Yaa sãoong n gũud “Babilon Kãsengã”
[Foto, seb-neng 17]
D tara sũ-maasem la sik-m-meng ne neb nins tẽeb sẽn yaa toor ne tõnd rẽndã