“Ned kam fãa na n tʋka a meng zɩɩbo”
“Ned kam fãa na n tʋka a meng zɩɩbo”
“Tõnd ned kam fãa na n togsa a meng yell Wẽnnaam taoore.”—ROM DÃMBA 14:12.
1. Yaa zɩɩb bʋg la Hebre kom-bɩɩs a tãabã tʋk sõma?
HEBRE kom-bɩɩs a tãab sẽn da be Babilon n da segd n maan yam yãkr sẽn da yaa yõor yelle. B ra na n sak n wõgemda bõn-naandg kãsenga taoor wala Babilon tẽngã tõogã sẽn da baoodã bɩ? Bɩ b ra na n zãgsa rẽ maanego, tɩ b lob-b wʋng sẽn wɩng wʋsgã pʋgẽ? A Sadrak, a Mesak la a Abɛdnego ra pa tar sẽk n na n sok neda, ra leb n pa tɩlae ne-b meng tɩ b maan rẽ ye. B togsa woto vẽenega: “Naab a Nebukadnezaar, . . . bɩ y bãng tɩ tõnd ka na n waoog y wẽnnaam dãmbã la d wõgemd sãnem bõn-naandg ninga yãmb sẽn lugla taoor ye.” (Daniɛll 3:1-18) Hebre kom-bɩɩs a tãabã tʋka b mens zɩɩbã b toore.
2. A Zezi Kirist yellã pʋgẽ, sɩd-sɩda, yaa ãnd dãmb n tus guvɛrneer a Pɩlat t’a rɩk sard ning a sẽn dɩkã, la rẽ yiisa taalã a Pɩlat zug bɩ?
2 Yʋʋm kobs yoob poore, guvɛrneer n kelg yɛl nins b sẽn da rogend rao a ye zugu. A sẽn vaees yellã poore, a wa n baas n kɩsa sɩd tɩ b ra rõd-a lame bala. La kʋʋngã ra ratame tɩ b kʋ raoã bala. Sɩngrẽ wã guvɛrneerã kɩɩsa kʋʋngã raabã, la baasgẽ wã, a pa tʋk a meng zɩɩbã ye, a saka kʋʋngã sẽn da pẽdgd-a wã raabo. A waa n baas n pɛgsa a nus n yeele: “Nin-tɩrg kãngã zɩɩm ka be mam zug ye.” Rẽ poore, a kɩsa raoã tɩ b ka ra-luk zugu. A Zezi Kirist yellã pʋgẽ, a Põns Pɩlat pa tʋk a meng zɩɩbã a toor ye, a basame tɩ neb a taab rɩk sardã a zĩigẽ. Baa ne a Pɩlat sẽn pɛgs a nusã to-to fãa, a ra pa tõe n yiis a taalã, a sẽn kao a Zezi bʋʋdã kɛgrã yĩng ye.—Matɩe 27:11-26; Luk 23:13-25.
3. Bõe yĩng tɩ d pa segd n bas tɩ neb a taab rɩk sard n kõ tõndo?
3 Yaa wãn to yẽ ne yãmba? Y sã n wa segd n yãk yam, y maanda wa Hebre kom-bɩɩs a tãabã bɩ, bɩ y basdame tɩ neb a taab rɩk sard n kõ-yã? Bãng n yãk yam tɩ zems pa nana ye. Sẽn na yɩl n maan yam yãkr sẽn zemse, rẽnda f yɩ ned yam sẽn bɩ. Wala makre, yaa roagdbã n segd n dɩk sard sẽn yaa sõma b kamb nins sẽn nan pa kãsembã zĩigẽ. Yaa sɩd tɩ yel-gĩtim taoore, yɩl n bãng n maan yam-yãkr sẽn yaa sõma yaa toog wʋsgo, tɩ d segd n tags yellã nens toɛy-toɛy zut sõma. Baasg zãnga, bãng n maan yam-yãkr sẽn yaa sõma yaa zɩɩb sẽn zao tõnd mens zutu. La a pa zɩs wʋsg n sek saam-biis nins sẽn bɩ tẽebã pʋgẽ wã na tʋk-a tõnd yĩng ye. (Galat dãmba 6:1, 2) D bãng bal tɩ zɩɩb ning sẽn yaa bãng n maan yam-yãkr sẽn yaa sõma wɛɛngẽ wã, “tõnd ned kam fãa na n togsa a meng yell Wẽnnaam taoore.” (Rom dãmba 14:12) Biiblã yetame tɩ “ned kam fãa na n tʋka a meng zɩɩbo.” (Galat dãmba 6:5) Rẽnd wãn to la d tõe n maan yam-yãkr sẽn yaa sõma vɩɩmã pʋgẽ? Pipi, d segd n sak n deegame tɩ d sẽn yaa ninsaalbã, d yamã pa sek-do, la d bao n bãng d sẽn segd n maan to-to n lok-a.
Bũmb maaneg sẽn yaa tɩlae
4. Pipi ninsaalbã kɩɩsg segd n zãmsa tõnd bõn-kãseng bʋg yam-yãkrã wɛɛngẽ?
4 Ninsaalbã naaneg poor bilf bala, b maana yam yãkr sẽn wa ne yel-beedo. B yãka yam n dɩ sõma la wẽng bãngr tɩɩgã biiga. (Sɩngre 2:16, 17) Yam-yãkr kãnga ra tika bõe zugu? Biiblã yetame: “Paga yãame tɩ tɩɩga biis yaa sõama tɩ rɩ la b yaa neer tɩ gese, la yaa tɩɩga ned sẽn dat n dɩ n paam yam vẽnegre. La yẽ yãka a biisã n dɩ. La a yãkame n kõ a sɩda me sẽn be ne yẽ wã t’a rɩ.” (Sɩngre 3:6) A Hawa yam-yãkrã tika a meng raab zug bala. A tusa a Ãdem me t’a maan wa yẽ. Rẽ kɩtame tɩ yel-wẽndã la kũumã “yõkd neba fãa.” (Rom dãmba 5:12) A Ãdem ne a Hawa kɩɩsgã segd n zãmsa tõnd bõn-kãsenga: Ninsaal yamã sẽn pa sek-a wã yĩnga, a sã n pa sak Wẽnnaam sor-wilgrã fãa, a yam-yãkrã na n yɩɩ kɛgre.
5. Wãn-wãn la a Zeova wilgd tõnd sore, la bõe la d segd n maan sẽn na yɩl n dɩ rẽ nafa?
5 Ad d sũy sɩd segd n yɩɩ noog wʋsgo, Wẽnnaam a Zeova sẽn wilgd-d sorã! Gʋlsg Sõamyã yeta tõndo: “Yãmb sã n dat n kẽng rɩtg walla goabga, yãmb tʋba na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’” (Ezai 30:21) A Zeova tũnugda ne a Gomdã sẽn yaa Biiblã n gomd ne tõndo. D segd n zãmsa Gʋlsg Sõamyã la d bãng-a sõma tɩ zems kɛpɩ. D segd n dɩɩ ‘rɩɩb sẽn yaa taoko, neb nins sẽn bɩ’ wã sẽn dɩtã, sẽn na yɩl n tõog n maan yam-yãkr sẽn zemse. D sã n minim n maanda woto, wat n yɩɩ nana ne-d tɩ d bãng ‘sõma ne wẽng n bake.’ (Hebre dãmba 5:14) Sẽn paase, d sã n tũud bũmb nins d sẽn zãmsd Wẽnnaam Gomdã pʋgẽ wã, d na n tõog n bãngda sõma ne wẽng n bakdẽ.
6. Bõe n yaa tɩlae sẽn na yɩl tɩ tõnd sũur kasetã tʋm sõma?
6 D sã n wa segd n maan yam-yãkre, sũur kasetã tõnd sẽn dog ne wã me tara yõod wʋsg ne-d wakat kãnga. Sũur kasetã tõe n kaoa tõnd meng bʋʋdo, a tõe n ninga tõnd taale, walla a yiis taal d zutu. (Rom dãmba 2:14, 15) La sẽn na yɩl tɩ tõnd sũur-kasetã tʋm a tʋʋmdã sõma, a segd n paamame tɩ Wẽnnaam Gomdã bãngr sẽn yaa takɩ wã vẽneg-a, la yaa tɩlae me tɩ tõnd tũ d sẽn bãng bũmb ning Gom-kãng pʋgẽ wã. Sũur kaset sẽn pa paam vẽnegr tõee nana-nana n bas tɩ buudã minung tall pãng a zugu. Sẽn paase, tõnd sẽn vɩẽ wã la neb a taabã tagsa tõeeme n tudg-du. Yaa bõe n maande, tõnd sã n minim n kɩɩsd d sũur-kasetã sor-wilgri, la d kɩɩsd Wẽnnaam noyã? A tõe n wa lebga wala “bũmb sẽn dɩ bugum,” n diglem n pa wʋmd toog ye. (1 Tɩmote 4:2) La tõnd sũur-kasetã sã n paama Wẽnnaam Gomdã zãmsgo, a tõe n wilg-d-la sor sõma.
7. Bõe maaneg n yaa tɩlae sẽn na yɩl n yãk yam tɩ zemse?
7 Bãng n yãk yam tɩ zemsã yaa tõnd ned kam fãa zɩɩbo. Rẽnd sẽn na yɩl n maan woto, wakat buud fãa, d segd n paama Gʋlsg Sõamyã bãngr sẽn zems kɛpɩ la d bãng d sẽn na n tũ-a to-to. D pa na n yɩ yãg-yãg n yãk yam yell taoor ye, d na n dɩka sẽk n bao n bãng Wẽnnaam noyã la d tags neer n tũ-ba. Sã n mikame tɩ d tara Wẽnnaam Gomdã bãngr sẽn yaa takɩ, la tɩ d sũur kasetã paama zãmsgo, baa d sã n wa segd n yãk yam zĩig pʋgẽ wala a Sadrak, a Mesak la a Abɛdnego, mikdame tɩ d paama seglg sõma. Sẽn na yɩl n ges bɩʋʋngã sẽn tõe n sõng tõnd tɩ d tõog n yãk yam tɩ zems to-to, bɩ d vaees vɩɩmã nens a yiibu.
Ãnd dãmb la d na n yãk tɩ yɩ d tũud-n-taase?
8, 9. a) No-bʋs n wilgd tɩ yaa tɩlae tɩ d zãag d mens ne tũud-n-ta-wẽnse? b) Yaa neb sẽn tar vɩɩm manesem sẽn yaa wẽng bal la tũud-n-ta-wẽns bɩ? Wilg-y a võore.
8 Tʋm-tʋmd a Poll gʋlsame: “Da belg-y y mens ye, tũud-n-ta-wẽns sãamda nin-sõamyã.” (1 Korẽnt dãmba 15:33) A Zezi yeela a karen-biisã: “Yãmb ka dũniyã rẽnd ye.” (Zã 15:19) D sã n wa bãng no-kãensã, tao-tao bala d neeme tɩ d segd n zãaga d mens ne yoaadba, wagda, rã-yũudb la neb sẽn maand sẽn wõnd woto. (1 Korẽnt dãmba 6:9, 10) La d Biiblã bãngr sã n paasdẽ, d mikdame tɩ d sã n dɩkd sẽk n get neb nins sẽn maand woto filim dãmbẽ wã, televiziõ wã pʋgẽ, bɩ ordinatɛɛrẽ wã, wall d sã n karemd sɛb sẽn gomd b yelle, d maanda d meng wẽng me. Yaa woto me ne d sẽn na n tũnug ne ẽntɛrnetã n tall tũud-n-taar ne neb sẽn solgd b sẽn sɩd yaa b rãmbã.—Yɩɩl Sõamyã 26:4.
9 Yaa wãn to yẽ ne lagem-n-taar wʋsg maaneg ne neb nins sẽn tar vɩɩm manesem sẽn pa wẽnga, n yaool n pa tar tẽeb hakɩk ne sɩd Wẽnnaamã? Gʋlsg Sõamyã yeta tõndo: “Dũniyã fãa bee wẽng soaba nugẽ.” (1 Zã 5:19) D bãngame masã tɩ tũud-n-ta-wẽnsã pa neb sẽn vɩ yaare, bɩ neb sẽn yaa yoaadb bal ye. Woto yĩnga, yaa yam tʋʋmd ne-d tɩ d bao zood ne neb nins sẽn nong a Zeova wã bala.
10. Bõe n na n sõng tõnd tɩ d yãk yam sẽn wilgd tɩ d yamã bɩɩme, d yel-manesmã ne dũni-kãngã nebã wɛɛngẽ?
10 D pa tõe n zãag d mens fasɩ ne neb nins sẽn be dũniyã pʋgẽ wã, b pa baood tɩ d maan woto me. (Zã 17:15) Koe-noogã moonego, lekollã la tʋʋmã baoodame tɩ d pẽneg dũniyã neba. Kiris-ned sã n tar kẽed-n-taag sẽn pa a Zeova Kaset soaba, a segdame n mao ne dũniyã n yɩɩd neb a taabã. Dẽnd d sã n tags tɩ bɩ, d bãngdame tɩ pẽneg dũniyã neb sasa kẽer bal pa yembr ne f sẽn na n bao b zood ye. (Zak 4:4) Rẽnd d tõe n maana yam-yãkr sẽn wilgd tɩ d bɩɩ tẽebã pʋgẽ, n bãng d sã n na n kẽesa d toog d lekollã yɛlẽ wala ɛspoorã, saoogã la d tʋʋmã zĩigẽ kibs rãmba pʋsẽ.
Tʋʋmã baoobo
11. D segd n deng n tagsa bõe zug pipi, d sã n wa baood tʋʋma?
11 D sã n tũud Biiblã noy tɩ wilgdẽ tɩ d bɩɩ tẽebã pʋgẽ, sõngd-d lame tɩ d bãng d sẽn na n yãk yam tɩ zems to-to n tõog n tʋk d zɩɩb ning sẽn yaa ‘ges d zakã neb yellã.’ (1 Tɩmote 5:8) Pipi d segd n deng n tagsa tʋʋmdã halhaal zugu, sẽn dat n yeel t’a sẽn baood tɩ d maan bũmb ninsã. Yãk tʋʋm sẽn tusd ned t’a maan bũmb Biiblã sẽn gɩdg vẽeneg yaa wẽng fasɩ. Yaa rẽ n so tɩ kiris-neb hakɩkã pa na n sak tʋʋm b sẽn mi tɩ bõn-naands pʋʋsgo, wagdem, zɩɩmã tall n tʋm tɩ pa zems ne Wẽnnaam noyã, bɩ manesem a taab sẽn kɩɩsd Gʋlsg Sõamyã n lagem ne-a ye. Sẽn paase, d pa na n yag la d zãmbe, baa tʋʋmd taoor soab sã n dat tɩ d maan woto ye.—Tʋʋma 15:29; Wilgri 21:8.
12, 13. Tʋʋmdã meng toor sẽn ka be, yel-bʋs sẽn tar yõod yell la d segd n tagse, d sã n wa baood tʋʋma?
12 La sã n mik tɩ tʋʋmdã meng pa kɩɩsd Wẽnnaam noor baa a yembre, bõe la d segd n maane? D sɩdã bãngrã sã n paasdẽ tɩ d yam-vẽenemã paasdẽ, d wat n bãngame tɩ d segd n tagsa yɛl a taab yelle. Yaa wãn to, tʋʋmdã sã n tar yɛl kẽer sẽn kɩɩsd Gʋlsg Sõamyã, wala f sẽn na n leokd telefon ligd reem-doogẽ? Sã n wa mik tɩ tʋʋmdã meng pa kɩɩsd Wẽnnaam noor baa a yembre, baasg zãnga, d segd n bao n bãnga ãnd n yaood tʋm-tʋmdbã, la tʋʋmdã zĩig sẽn yaẽ. Wala makre, kiris-ned sẽn na n tʋmd a menga, n yaa pẽntre, n baood kõntra rãmba, rẽ yĩnga, a na sak n bao tʋʋmd sẽn baood t’a tɩ nags kiris-neb ne yʋʋr tũudmã wẽn-doogo, n teel tũudum sẽn yaa ziri wã bɩ?—2 Korẽnt dãmba 6:14-16.
13 Yaa wãn to, tõnd tʋʋmdã taoor soab sã n sak tʋʋmd sẽn baood t’a nags tũudum sẽn yaa ziri wã pʋʋsg roogo? Yel-kãngã pʋgẽ, bee ne tõnd sã n na n sooga tʋʋmdã taoore, bɩ b sã n na n kɩtame tɩ d maan bũmb a ye bala, la tõnd kẽes-m-meng tʋʋmdã pʋgẽ sẽn ta zĩig ninga. Yaa wãn to yẽ ne tʋʋm sẽn pa kɩɩsd Biiblã noy wala lɛta kɩsg zĩig fãa, zĩis nins wẽngã sẽn maandẽ wã me sẽn naage? Noor ning b sẽn togs Matɩe 5:45 tõe n sõnga tõnd tɩ yãk yam sẽn zemse. La d pa segd me n yĩm tʋʋmdã tʋmb daarã fãa tõrã sẽn tõe n maan tõnd sũur kasetã bũmb ningã ye. (Hebre dãmba 13:18) Bãng n yãk yam tɩ zems d toor tʋʋmã baoob wɛɛngẽ wã baoodame tɩ d yɩ neb sẽn bɩɩsd d yam-vẽenemã n paasdẽ, la d zãmsd d sũur kasetã Wẽnnaam sẽn kõ-dã.
‘Fo sẽn maand bũmb ninga fãa, bɩ f tẽeg Wẽnd yelle’
14. D sã n wa rat n maan yam-yãkr fãa, bõe la d segd n maane?
14 Yaa wãn to yẽ ne yam yãkr nins d sẽn maand yɛl a taab wala karem-bɛdã, sak bɩ zãgs tɩbsg kẽerã wɛɛngẽ? D sã n wa segd n yãk yam yell buud fãa taoore, d segd n bao n bãnga Biiblã noy sẽn yet bũmb ning takɩ rẽ zugã, tɩ rẽ poor bɩ d tags neer n bãng d sẽn na n tũ-b to-to. Pĩnd wẽndẽ Israɛllã rĩm a Salomo sẽn tall yamã yeela woto: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.”—Yelbũna 3:5, 6.
15. Bõe la d tõe n zãms pipi kiris-nebã nengẽ, yam yãkrã wɛɛngẽ?
15 Tõnd yam-yãkrã nong n mata neb a taabã, tɩ d segd n tags rẽ yell sõma. Wala makre, a Zezi pipi karen-biisã ra pa leb n segd n tũ a Moiiz Tõogã noy wʋsg sẽn da gɩdg rɩɩb kẽerã ye. B sã n da rata, b ra tõe n dɩɩ rɩɩb kẽer a Moiiz Tõogã sẽn da yet tɩ yaa rẽgdo, rẽ sã n da pa kɩɩsd noy a taaba. Baasg zãnga, tʋm-tʋmd a Poll lɛtr a ye pʋgẽ, a goma rũng nemd yelle, tõe tɩ ra yaa pʋʋsg roogẽ wẽn-naand maand nemdo. A yeelame: “Nemd sã n na n lub m ba-biiga, mam kõn le wãb nemd abada ye, n da wa lub m ba-biig ye.” (1 Korẽnt dãmba 8:11-13) A Poll sagla pipi kiris-nebã tɩ b tall naneb ne neb a taabã sũur kaset tɩ b ra wa lʋɩ tẽebã wɛɛngẽ ye. D bãng tɩ tõnd yam-yãkrã pa segd n ‘wa ne ned lʋɩɩs’ ye.—1 Korẽnt dãmba 10:29, 32, Sebr Sõngo.
Bao-y Wẽnnaam yamã
16. Wãn to la pʋʋsgã sõngd tõnd tɩ d tõog n maan yam-yãkr sẽn yaa sõma?
16 Pʋʋsgã na n sõnga tõnd wʋsg tɩ d tõogd n maand yam-yãkr sẽn yaa sõma. Karen-biig a Zak yeela woto: “Ned sã n be yãmb sʋk t’a yam paoodẽ, bɩ a kos Wẽnnaam sẽn kõt neba fãa ne yamleoog n ka lengdẽ wã, la a na paam.” (Zak 1:5) Ne bas-yardo, d tõe n pʋʋsa a Zeova n kos-a yam sẽn na yɩl n tõog n maan yam-yãkr sẽn yaa sõma. D sã n togs sɩd Wẽnnaamã d yɩɩrã n kos a sor-wilgri, vʋʋsem sõngã tõe n sõnga tõnd tɩ d wʋm verse rãmb nins d sẽn vaeesdã võor sõma n paase, la a tẽeg-d verse rãmb nins d sẽn yĩmã.
17. Wãn to la neb a taabã tõe n sõng tõnd tɩ d yãk yam sẽn zemse?
17 Neb a taabã tõe n sõnga tõnd tɩ d maan yam yãkr bɩ? N-ye, a Zeova kõo tõnd neb sẽn bɩ tẽebã pʋgẽ tigingã pʋgẽ. (Efɛɛz rãmba 4:11, 12) D tõe n kosa b sõngre, sẽn yɩɩd fãa, yam-yãkrã sã n yaa bũmb sẽn pa reem yelle. Neb nins sẽn tar tẽeb yam-vẽenem wʋsg la b tar minim wʋsg vɩɩmã pʋgẽ wã tõe n tẽega tõnd Wẽnnaam noy nins sẽn na n sõng-d tɩ d yãk yam sẽn zemsã, la sõng tõnd tɩ d “bãng bũmb nins sẽn yaa sõama n yɩɩdã.” (Filip rãmba 1:9, 10) La yaa d gũusi: D pa segd n bas tɩ neb a taabã yãk yam n kõ-d ye. Rẽ yaa tõnd meng zɩɩbo.
Yam-yãkr sẽn tik Biiblã zug baasda neer wakat fãa bɩ?
18. Bõe la b tõe n yeel yam-yãkr sẽn yaa sõma baasg wɛɛngẽ?
18 Yam-yãkr nins fãa sẽn tik Biiblã zugã baasda neer wakat fãa bɩ? N-ye, a wat n yɩɩ woto baa yaa kaoosg zugẽ. Yaa sɩd tɩ wakat ninga, a tõe n waa ne zu-loees zĩig pʋgẽ. A Sadrak, a Mesak la a Abɛdnego ra miime tɩ b sẽn da yãk yam n pa na n balem bõn-naandg kãsengã ra tõe n tũu ne b yõore. (Daniɛll 3:16-19) Woto me, tʋm-tʋmdbã sẽn yeel Zʋɩf rãmbã bʋ-kaoodb sull tɩ b segd n saka Wẽnnaam wa naab n yɩɩd ninsaalbã, b pãb-b lame n yaool n bas-ba. (Tʋʋma 5:27-29, 40) Sẽn paase, yel-lingdem tõe n wa kɩtame tɩ yam-yãkr buud fãa baas wẽnga. (Koɛɛg Soaba 9:11) La bãng-y tɩ d sã n namsdẽ, baa d sẽn maan yam-yãkr sẽn yaa sõma yĩnga, d tõe n kɩsa sɩd t’a Zeova na n sõng-d lame tɩ d tõog toogo, la a na n wa baas n ning-d-la barka.—2 Korẽnt dãmba 4:7.
19. Wãn to la d tõe n tʋk d zɩɩb ning sẽn yaa yãk yam tɩ zemsã ne raoodo?
19 Rẽnd d sã n wa na n yãk yam, d segd n bao n bãnga Gʋlsg Sõamyã noy yellã zugu, la d tags neer n bãng d sẽn na n tũ-b to-to. Ad d sɩd tara mi-beoog ne sõngr ning a Zeova sẽn tũnugd ne a vʋʋsem sõngã, la sẽn bɩ-b tẽebã wɛɛngẽ tigingã pʋgẽ n kõtẽ wã! D sẽn tar sor-wilgr la sõngr a woto fãa wã yĩnga, bɩ d tʋk d zɩɩb ning sẽn yaa d yãk yam tɩ zemsã ne raoodo.
Bõe la y zãms-yã?
• Bõe maaneg n yaa tɩlae sẽn na yɩl n yãk yam tɩ zemse?
• Wãn to la tẽebã bɩʋʋng sõngd tõnd d tũud-n-taasã yãkr pʋgẽ?
• Yel-kãsems bʋs la d segd n vaees neere, d sã n wa baood tʋʋma?
• Sõng-bʋg la d tõe n paam sẽn na yɩl n maan yam-yãkr sẽn yaa sõma?
[Zãmsgã sogsgã]
[Foto, seb-neng a 9]
A Ãdem ne a Hawa kɩɩsgã zãmsda tõnd bõn-kãsenga
[Foto, seb-neng 10]
Nand tɩ d maan yam-yãkr sẽn pa reem yelle, bɩ d bao n bãng Wẽnnaam noyã yellã zugu